ဖဲ လါအ့ဖြ့ၣ်​ ၄ သီ ၂၀၂၂ န့ၣ်တၢ်ကစီၣ်လၢ ပဒိၣ်တဖၣ်​ ပာ်ဖျါထီၣ်​ ဘၣ်ဃးဒီး မူခိၣ်ကလံၤသီၣ်ဂီၤအဂ့ၢ်န့ၣ်​ အဲၤထိနံၤယိၤ ကူထါရဲၤ လၢအကဲဝဲ ဘီမုၢ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်တဂၤ တဲဝဲလၢ “တၢ်လၢ ပှၤဟီၣ်ခိၣ်ဖိတဖၣ်​ မၤဝဲန့ၣ်​ ကမၤဘၣ်ဒိ ဟီၣ်ခိၣ်အါမး. အဃိ ခါဆူညါန့ၣ်ထံဒိၣ်ထီၣ်ကအါထီၣ်, တၢ်ကကိၢ်ဒိၣ်ထီၣ်, ကလံၤမုၢ်လၢ အလီၤပျံၤတဖၣ်ကအါထီၣ်, ထံကၤနိကၤကအါထီၣ်. တကးဒံးဘၣ်​ တၢ်မုၢ်တၢ်ဘိ ဒီးဆၣ်ဖိကီၢ်ဖိ အမၠိ တကကွဲၢ် ကလီၤတူာ်ဝဲ. တၢ်ဂ့ၢ်တဖၣ်အံၤန့ၣ်​ တမ့ၢ် ပှၤတဲကြီအီၤဘၣ်. ပှၤကူၣ်ဘၣ်ကူၣ်သ့တဲဝဲလၢ ပဒိၣ်ပပှၢ်တဖၣ်​ မ့ၢ်တဆီတလဲ အတၢ်သိၣ်တၢ်သီ ဘၣ်ဃးဒီး တၢ်သူလီမ့ၣ်အူ အကျိၤအကျဲဘၣ်န့ၣ်​ တၢ်ကကဲထီၣ်အသးဒ်န့ၣ်သပှၢ်တၢၢ်လီၤ.”

 ဖဲ ၂၀၂၂ လါယူၤ ၁၅ န့ၣ်​ နူယီး တၢ်ကစီၣ်တခါ ပာ်ဖျါထီၣ်ဝဲလၢ “ထံဒိၣ်ထီၣ်လၢ ယဲလိစတိ တၢ်ဟးလိၣ်ကွဲလီၢ်န့ၣ်​ အကဲဝဲ တၢ်ပနီၣ်တခါလၢ ခါဆူညါန့ၣ်​ ပကထံၣ်ဘၣ်ဒီး တၢ်ကီတၢ်ခဲ.” ဒီးဖဲန့ၣ်အတဲဝဲလၢ “ပှၤကူၣ်ဘၣ်ကူၣ်သ့တဖၣ်​ ဟ့ၣ်ပလီၢ်ဝဲလၢ ခါဆူညါန့ၣ်​ ခီဖျိလၢ မူခိၣ်ကလံၤသီၣ်ဂီၤ တၢ်ဆီတလဲ ဒီးလီၤဆီဒၣ်တၢ်လၢ တၢ်ကိၢ်ဒိၣ်ထီၣ်အဃိန့ၣ်​ ကမၤဘၣ်ဒိဝဲ တၢ်ဟးလိၣ်ကွဲအလီၢ် ၄၂၃ တီၤဃၣ်ဃၣ်​ လၢကီၢ်အမဲရကၤအပူၤ. တၢ်လီၤသးအုးတဖၣ်လၢ အဟဲကဲထီၣ်အသး ခီဖျိလၢ န့ဆၢၣ်တၢ်ဘၣ်ဒိဘၣ်ထံး ဟဲကဲထီၣ်အဃိန့ၣ်​ ပဖးဘၣ်အီၤလၢ လံာ်စီဆှံအပူၤ. အဒိ ဒ်သိးဒီး မ့ၣ်အူအီၣ်တၢ်, ထံဒိၣ်ထီၣ်, ထံခုၣ်ကိၣ်လိၣ်ပှံၢ်လီၤ, ပီၣ်လဲၣ်အထံဟဲဒိၣ်ထီၣ်အါထီၣ်​ ဒီးတၢ်ကိၢ်ဒိၣ်ထီၣ်.”

 န့ဆၢၣ်တၢ်ဘၣ်ဒိဘၣ်ထံးလၢ ပထံၣ်ဘၣ်အီၤန့ၣ်​ အကလီၤမၢ်ကွံာ်ဒံးဧါ. အမ့ၢ်လီၤမၢ်န့ၣ်​ မတဂၤကမၤလီၤမၢ်န့ၢ်ပှၤလဲၣ်. ဘၣ်ဃးဒီး တၢ်ဂ့ၢ်အံၤန့ၣ်​ လံာ်စီဆှံတဲဝဲဒ်လဲၣ်​ ပကကွၢ်သကီး.

 လံာ်စီဆှံတဲဝဲလၢ ကစၢ်ယွၤ “ကမၤဟးဂီၤ ပှၤလၢအမၤဟးဂီၤ ဟီၣ်ခိၣ်.” (လီၣ်ဖျါ ၁၁:၁၈) လံာ်စီဆှံတဆၢအံၤ သိၣ်လိပှၤတၢ်ဂ့ၢ်သၢမံၤ–

1.  ၁. တၢ်လၢ ပှၤဟီၣ်ခိၣ်ဖိမၤဝဲတဖၣ်န့ၣ်​ ကမၤဘၣ်ဒိဟီၣ်ခိၣ်.

2.  ၂. ပှၤလၢအမၤဟးဂီၤဟီၣ်ခိၣ်န့ၣ်​ ကလီၤမၢ်ကွံာ်ဝဲ.

3.  ၃. န့ဆၢၣ်တၢ်ဘၣ်ဒိဘၣ်ထံးလၢ ပထံၣ်ဘၣ်အီၤန့ၣ်​ ပှၤလၢကမၤလီၤမၢ်ကွံာ်ဝဲန့ၣ်​ အကဲဝဲကစၢ်ယွၤ တမ့ၢ်ပှၤဟီၣ်ခိၣ်ဖိဘၣ်.

 လံာ်စီဆှံ တဲဝဲလၢ “ဟီၣ်ခိၣ်န့ၣ်​ အိၣ်ဂၢၢ်ဆိးကျၢၤဝဲ လီၤထူလီၤယိာ်.” (စံၣ်တဲၤတဲလီၤတၢ် ၁:၄) အဃိ ဟီၣ်ခိၣ်အံၤကအိၣ်ဝဲထီဘိ.

•   “ပှၤတီပှၤလိၤ ကန့ၢ်သါဘၣ်​ ဟီၣ်ခိၣ်​ ဒီးအဝဲသ့ၣ်​ ကအိၣ်ဘၣ်ဝဲလၢ ဟီၣ်ခိၣ်ချၢ လီၤထူလီၤယိာ်လီၤ.”—စံးထီၣ်ပတြၢၤ ၃၇:၂၉.

 ခါဆူညါန့ၣ်​ ဟီၣ်ခိၣ်တဖျၢၣ်အံၤ ကဂ့ၤထီၣ်က့ၤခဲလၢာ်.

•   “ပှၢ်မုၢ်ကနၢ ဒီးကီၢ်ဃ့ထီန့ၣ်​ ကသးခု ဒီးမဲးမုၢ်ပျီန့ၣ်​ ကသူၣ်ဖှံသးညီ ဒီးကပှဲၤဒီး ဖီတဖၣ်လီၤ.”—ယၡါယၤ ၃၅:၁.