အိၣ်ပလီၢ်သးထီဘိ
ဟီၣ်ခိၣ်ဒီဘ့ၣ် တၢ်ဂဲၤပြၢ ဖျၢၣ်ထူအမူးန့ၣ် အမၤဃူမၤဖိး ပှၤလၢဟီၣ်ခိၣ်ဒီဘ့ၣ် နီၢ်ကီၢ်ကသ့ဧါ—လံာ်စီဆှံတဲဝဲဒ်လဲၣ်
ပှၤတယာ်ဝဲလၢ ပှၤအကကွဲၢ် ယဲၢ်ကထိဃၣ်ဃၣ်န့ၣ် ကကွၢ်ဝဲ ဟီၣ်ခိၣ်ဒီဘ့ၣ် တၢ်ဂဲၤပြၢ ဖျၢၣ်ထူအမူး (FIFA) လၢပှၤစးထီၣ်မၤအီၤဖဲ ၂၀၂၂ လါနိၣ်ဝ့ဘၢၣ် ၂၀ တုၤလၢ လါဒံၣ်စ့ဘၢၣ် ၁၈ သီ. ပှၤအါဂၤ ဆိကမိၣ်ဝဲလၢ တၢ်လိာ်ကွဲအမူး ဒ်အံၤတဖၣ်န့ၣ် အမၤဃူမၤဖိးဝဲ ပှၤလၢအကွၢ်တၢ်လိာ်ကွဲ အမူးတဖၣ် တကးဒံးဘၣ် အမၤဝဲ အါန့ၢ်အန့ၢ်သ့ဒံး.
နဲလစၢၤ မဲဒလၤ လၢအမ့ၢ် ကလံၤထံး အၤဖြံၤကၤ အကီၢ်ခိၣ် လၢညါတဂၤ တဲဝဲလၢ “တၢ်လိာ်ကွဲအမူးတဖၣ်န့ၣ် အဆီတလဲ ဟီၣ်ခိၣ်သ့. အဟ့ၣ်ဂံၢ်ဟ့ၣ်ဘါပှၤဂၤသ့ ဒီးအမၤဃူမၤဖိးပှၤ လၢတၢ်တဆိကမိၣ်အပူၤသ့.”
ကၠဲနံၤ အ့ၤဖၢၤထံနိၤ လၢအကဲဝဲ FIFA a အခိၣ်န့ၣ် တဲဝဲလၢ “တၢ်လိာ်ကွဲဖျၢၣ်ထူန့ၣ် အမၤစၢၤပှၤဂၤဒ်သိး ကအိၣ်ဒီး တၢ်မုၢ်လၢ်, တၢ်သးခု ဒီးကအဲၣ်ပှၤဂၤအဂီၢ် ဒီးအမၤစၢၤ အဝဲသ့ၣ်ဒ်သိး အကတူၢ်ဘၣ်ဝဲလၢ တၢ်လၢအဝဲသ့ၣ် ဘၣ်သူၣ်ဘၣ်သးဝဲ ဒ်သိးသိးန့ၣ် အိၣ်တခါ. အဃိ တၢ်လိာ်ကွဲအံၤန့ၣ် အမၤဃူမၤဖိးတၢ်သ့.”
ဘၣ်ဆၣ် နီၢ်ကီၢ်န့ၣ် ဟီၣ်ခိၣ်ဒီဘ့ၣ် တၢ်ဂဲၤပြၢ ဖျၢၣ်ထူအမူးန့ၣ် အမၤစၢၤပှၤဂၤဒ်န့ၣ် ကသ့ဧါ. ဒ်သိးတၢ်ဃူတၢ်ဖိး ကအိၣ်အဂီၢ် တၢ်မနုၤကမၤစၢၤပှၤလဲၣ်.
တၢ်လိာ်ကွဲအမူးအံၤ မၤဃူမၤဖိးတၢ် ကသ့နီၢ်ကီၢ်ဧါ
ဟီၣ်ခိၣ်ဒီဘ့ၣ် တၢ်ဂဲၤပြၢ ဖျၢၣ်ထူအမူး လၢတနံၣ်အံၤန့ၣ် တမ့ၢ်ထဲ အဒုးဆိကမိၣ်ပှၤဂၤလၢ တၢ်လိာ်ကွဲ ဖျၢၣ်ထူအဂ့ၢ်ဘၣ်. အဒုးဆိကမိၣ်စ့ၢ်ကီးပှၤဂၤ ဘၣ်ဃးဒီး ပှၤဟီၣ်ခိၣ်ဖိ ကဒဲကဒဲ အတၢ်ရ့လိာ်သး, ထံဂ့ၢ်ကီၢ်ဂ့ၢ်, ပှၤဟီၣ်ခိၣ်ဖိ အတၢ်ခွဲးတၢ်ယာ်, တၢ်ကွၢ်ဒိၣ်ဆံး ကလုာ်ဒူၣ် ဒီးစံပွါယ့တၢ်ကီတၢ်ခဲအဂ့ၢ်.
ဟီၣ်ခိၣ်ဒီဘ့ၣ် တၢ်လိာ်ကွဲအမူးတဖၣ် ဒီးဟီၣ်ခိၣ်ဒီဘ့ၣ် တၢ်ဂဲၤပြၢ ဖျၢၣ်ထူအမူးန့ၣ် ပှၤအါဂၤ ကွၢ်ဝဲမုာ်မး. ဘၣ်ဆၣ် တၢ်လိာ်ကွဲအမူး ဒ်အံၤတဖၣ်န့ၣ် အမၤဃူမၤဖိးပှၤ တန့ၢ်ဝဲ ထီဘိဘၣ်. လၢတၢ်န့ၣ်အလီၢ် ခီဖျိလၢ တၢ်လိာ်ကွဲ အမူးတဖၣ်အံၤအဃိ ပထံၣ်ဘၣ် ပှၤတၢ်ပာ်သူၣ်ပာ်သး ဒီးတၢ်မၤ လၢအဒုးသ့ၣ်ညါပှၤလၢ ပအိၣ်မူဘၣ်လၢ “မုၢ်နံၤခံကတၢၢ်တဖၣ်” အတီၢ်ပူၤ.—၂ တံၤမသ့း ၃:၁-၅.
တၢ်လၢ အကမၤဃူမၤဖိးတၢ်အနီၢ်ကီၢ်
လံာ်စီဆှံ ပာ်ဖျါထီၣ်ဝဲ တၢ်လၢအကမၤဃူမၤဖိး ပှၤလၢဟီၣ်ခိၣ်ဒီဘ့ၣ်. အတဲဝဲလၢ ပှၤခဲလၢာ်ကအိၣ်ဝဲ ဃူဃူဖိးဖိးလၢ တၢ်ပၢတၢ်ပြးလၢမူခိၣ် လၢအကဲဝဲ “ယွၤအဘီအမုၢ်” အတၢ်ပၢဖီလာ်.—လူၤကၣ် ၄:၄၃; မးသဲ ၆:၁၀.
ယွၤအဘီအမုၢ် အစီၤပၤ ယ့ၣ်ၡူးန့ၣ် ကမၤဝဲဒ်သိး ဟီၣ်ခိၣ်ဒီဘ့ၣ် ကအိၣ်ဒီး တၢ်ဃူတၢ်ဖိး သပှၢ်တၢၢ်. လံာ်စီဆှံ တဲဝဲလၢ
“ပှၤတီပှၤလိၤ ကဒိၣ်ထီၣ်ထီထီၣ် ဒီးတၢ်မုာ်တၢ်ခုၣ် ကအိၣ်ဝဲအါအါဂီၢ်ဂီၢ်”—စံးထီၣ်ပတြၢၤ ၇၂:၇.
“ပှၤဖှီၣ်ဖိယာ်ဖိလၢ အကိးပသူထီၣ်လၢ တၢ်မၤစၢၤအဂီၢ် . . . န့ၣ် အဝဲကမၤပူၤဖျဲးဝဲလီၤ. အဝဲကမၤပူၤဖျဲး အဝဲသ့ၣ်လၢ တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး” လီၤ.—စံးထီၣ်ပတြၢၤ ၇၂:၁၂, ၁၄.
ဆၢကတီၢ်ခဲအံၤဒၣ်လဲာ် ယ့ၣ်ၡူးအတၢ်သိၣ်လိန့ၣ် မၤဃူမၤဖိးဝဲ ပှၤအကကွဲၢ်တဖၣ် လၢအအိၣ်လၢ ထံကီၢ် ၂၃၉ ဘ့ၣ်အပူၤ. အဝဲသ့ၣ် တသးဟ့ပှၤဂၤလၢၤဘၣ်. နမ့ၢ်အဲၣ်ဒိးသ့ၣ်ညါအါထီၣ်န့ၣ် ဖးကွၢ်တၢ်ဂ့ၢ်လၢ အခိၣ်တီမ့ၢ်ဝဲ “တၢ်သးဟ့ပှၤဂၤန့ၣ် ပမၤလီၤမၢ်ကွံာ်သ့.”
a ဟီၣ်ခိၣ်ဒီဘ့ၣ် တၢ်လိာ်ကွဲဖျၢၣ်ထူ ကမံးတံာ်.
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
ယွၤအဘီအမုၢ်န့ၣ် မ့ၢ်မနုၤလဲၣ်
ဖဲယ့ၣ်ၡူး ဟးစံၣ်တဲၤတဲလီၤတၢ်အခါ အဝဲသိၣ်လိဝဲ ယွၤအဘီအမုၢ်အဂ့ၢ် အါန့ၢ်ဒံး တၢ်ဂ့ၢ်အဂၤလီၤ. ယ့ၣ်ၡူး အပျဲၢ်အဘီၣ်တဖၣ် ဃ့ဘါထုကဖၣ်လၢ ယွၤအဘီအမုၢ်ကဟဲန့ၣ် အိၣ်အနံၣ်လၢအကထိတဖၣ်လံ
ဘၣ်ဃးဒီးပှၤ
တီၣ်ထီၣ်တၢ်ဂ့ၢ် လၢပှၤကလဲၤအိၣ်သကိးနၤအဂီၢ်
တဲသကိး လံာ်စီဆှံ မ့တမ့ၢ် ဃုသ့ၣ်ညါအါထီၣ် ယဟိဝၤပှၤအုၣ်အသးအဂ့ၢ်.
