ဖဲ ၂၀၂၄ အတီၢ်ပူၤန့ၣ် ထံကီၢ် ၂၀၆ ဘ့ၣ်ကပၣ်ဃုာ်လၢ တၢ်ကိၢ်ခါ အိၣ်လၣ်ပ့း တၢ်လိာ်ကွဲ ဒီးပှၤအကကွဲၢ်ယဲၢ်ကထိန့ၣ် ကကွၢ်ဝဲ တၢ်လိာ်ကွဲတခါအံၤ. ဟီၣ်ခိၣ်ဒီဘ့ၣ် အိၣ်လၣ်ပ့း ကမံးတံာ် အခိၣ်နၢ်တဂၤလၢအမ့ၢ် ထီမၢၣ်ဘး တဲဝဲလၢ “ပဝဲဒၣ်န့ၣ် ပပၣ်ဃုာ်လၢ တၢ်မၤလၢ အကမၤဃူမၤဖိး ပှၤလၢဟီၣ်ခိၣ်ဒီဘ့ၣ်. အိၣ်လၣ်ပ့း တၢ်လိာ်ကွဲန့ၣ် ဒုးသ့ၣ်နီၣ်ထီၣ်ပှၤလၢ ပဝဲဒၣ်သ့ၣ်တဖၣ်န့ၣ် ပလီၤဆီလိာ်သး တဂၤဒီးတဂၤ သနာ်က့ ပကြၢးအိၣ်ဃူဃူဖိးဖိး. အဃိ မ်ပကဆီၣ်ထွဲ တၢ်လိာ်ကွဲတခါအံၤ.”

 အိၣ်လၣ်ပ့း တၢ်လိာ်ကွဲန့ၣ် အဒုးအိၣ်ထီၣ် တၢ်ဃူတၢ်ဖိးနီၢ်ကီၢ်ကသ့ဧါ. တၢ်ဃူတၢ်ဖိး တၢ်မုာ်တၢ်ခုၣ် နီၢ်ကီၢ်န့ၣ် အိၣ်ထီၣ်ဝဲ ကသ့သပှၢ်တၢၢ်ဧါ.

 အိၣ်လၣ်ပ့း တၢ်လိာ်ကွဲလၢ တနံၣ်ညါအံၤန့ၣ် တဘၣ်ဃးထဲ တၢ်လိာ်ကွဲတခါဘၣ်. အဘၣ်ဃးဒီး တၢ်ရ့လိာ်မုာ်လိာ် ဒီးထံဂ့ၢ်ကီၢ်ဂ့ၢ် လၢအမၤလီၤဖး ပှၤဟီၣ်ခိၣ်ဖိတဖၣ်. အဒိ အဘၣ်ဃးဒီး ပှၤဟီၣ်ခိၣ်ဖိခွဲးယာ်, ကလုာ်ဒူၣ်, တၢ်ဘူၣ်တၢ်ဘါ, တၢ်တထဲသိးတုၤသိးလိာ်သးဘၣ် ဒီးတၢ်တတီတလိၤ.

 ဟီၣ်ခိၣ်ဒီဘ့ၣ် တၢ်လိာ်ကွဲ ဒ်သိးဒီး အိၣ်လၣ်ပ့း တၢ်လိာ်ကွဲန့ၣ် အမၤမုာ်မၤဖှံပှၤသးသ့. သနာ်က့ တၢ်လိာ်ကွဲတခါအံၤန့ၣ် လၢအကဒုးအိၣ်ထီၣ် တၢ်ဃူတၢ်ဖိးအလီၢ် အဒုးအိၣ်ထီၣ် တၢ်ပာ်သူၣ်ပာ်သး ဒီးတၢ်မၤလၢ အမၤလီၤမုၢ်လီၤဖးတၢ်.

 လံာ်စီဆှံ တဲဆိပာ်စၢၤဝဲ ဘၣ်ဃးဒီး ပှၤဟီၣ်ခိၣ်ဖိတဖၣ် ကအိၣ်ဒီး တၢ်ပာ်သူၣ်ပာ်သးလၢ ကမၤဃူမၤဖိးတၢ်အဂီၢ်ကီ. (၂ တံၤမသ့း ၃:၁-၅) နမ့ၢ်အဲၣ်ဒိးသ့ၣ်ညါအါထီၣ် ဘၣ်ဃးဒီး ဝံအတၢ်စံးပာ်အံၤန့ၣ် ဖးကွၢ်တၢ်ဂ့ၢ်လၢအမ့ၢ် “ပစိၤခဲအံၤ ပှၤဟီၣ်ခိၣ်ဖိတဖၣ် အတၢ်ပာ်သူၣ်ပာ်သး ဒီးအတၢ်မၤ ကအိၣ်ဒ်လဲၣ်န့ၣ် လံာ်စီဆှံ တဲဆိပာ်စၢၤဝဲဧါ.”

 လံာ်စီဆှံပာ်ဖျါထီၣ်ဝဲလၢ တၢ်မုၢ်လၢ်အိၣ်လၢ ဟီၣ်ခိၣ်ဒီဘ့ၣ် ကပှဲၤဒီး တၢ်ဃူတၢ်ဖိး ဒီးတၢ်မုာ်တၢ်ခုၣ်. လံာ်စီဆှံ တဲဝဲလၢ “ယွၤအဘီအမုၢ်” လၢမူခိၣ် အတၢ်ပၢအဖီလာ်န့ၣ် ပှၤဟီၣ်ခိၣ်ဖိခဲလၢာ် ကအိၣ်ဝဲ ဃူဃူဖိးဖိး.—လူၤကၣ် ၄:၄၃; မးသဲ ၆:၁၀.

 ယွၤအဘီအမုၢ် အစီၤပၤယ့ၣ်ၡူးခရံာ်န့ၣ် ကဒုးအိၣ်ထီၣ်ဝဲ တၢ်ဃူတၢ်ဖိးလၢ ဟီၣ်ခိၣ်ဒီဘ့ၣ်. လံာ်စီဆှံတဲဝဲလၢ–

•    “ပှၤတီပှၤလိၤ ကဒိၣ်ထီၣ်ထီထီၣ် ဒီးတၢ်မုာ်တၢ်ခုၣ် ကအိၣ်ဝဲအါအါဂီၢ်ဂီၢ်.”—စံးထီၣ်ပတြၢၤ ၇၂:၇.

•    “ပှၤဖှီၣ်ဖိယာ်ဖိလၢ အကိးပသူထီၣ်လၢ တၢ်မၤစၢၤအဂီၢ် . . . န့ၣ်အဝဲကမၤပူၤဖျဲးဝဲလီၤ. အဝဲကမၤပူၤဖျဲး အဝဲသ့ၣ်လၢ တၢ်ဆီၣ်တံၢ်မၤနၢၤ ဒီးတၢ်မၤဆူၣ်မၤစိး.”—စံးထီၣ်ပတြၢၤ ၇၂:၁၂, ၁၄.

 လၢဆၢကတီၢ်ခဲအံၤစ့ၢ်ကီး ယ့ၣ်ၡူးအတၢ်သိၣ်လိန့ၣ် အမၤဃူမၤဖိးဝဲ ပှၤလၢ အကကွဲၢ်တဖၣ် လၢအအိၣ်လၢ ထံကီၢ် ၂၃၉ ဘ့ၣ်. ယဟိဝၤပှၤအုၣ်အသးလၢ ဟီၣ်ခိၣ်ဒီဘ့ၣ်န့ၣ် အဝဲသ့ၣ် ဂုာ်ကျဲးစၢးအိၣ်ဝဲ ဃူဃူဖိးဖိး. နမ့ၢ်အဲၣ်ဒိးသ့ၣ်ညါ ဘၣ်ဃးဒီး အဝဲသ့ၣ် အိၣ်ဃူအိၣ်ဖိး ဒ်လဲၣ်န့ၣ် ဖးကွၢ်တၢးထီခိးတၢ် လၢအခိၣ်တီမ့ၢ်ဝဲ “တၢ်သးဟ့ပှၤဂၤန့ၣ် ပမၤလီၤမၢ်ကွံာ်သ့.”