ယဟိဝၤ ပှၤအုၣ်အသးတဖၣ်​ မၤဝဲ တၢ်မၤလၢအရ့ဒိၣ်လၢ အမၤစၢၤဝဲ ပှၤလၢအိၣ်လၢ ထံကီၢ်ဒီးတၢ်လီၢ် ၂၀၀ ဘျဲၣ်အပူၤန့ၣ်လီၤ. ထံကီၢ်တဖၣ်န့ၣ်အကျါ ထဲဒၣ်​ ထံကီၢ် ၃၅ ဘ့ၣ်န့ၣ်​ ဒိးန့ၢ်ဘၣ်ဝဲ တၢ်မၤဘူၣ်လၢလၢလီၣ်လီၣ်လၢ အဝဲသ့ၣ်​ အတၢ်လိၣ်ဘၣ်အဂီၢ်လီၤ. ထံကီၢ်လၢ အဖှီၣ်ဝဲယာ်ဝဲတဖၣ်မီၣ်, မၤဝဲဒ်လဲၣ်.

 ယဟိဝၤပှၤအုၣ်အသး အပှၤပၢဆှၢတၢ် ကမံးတံာ်န့ၣ်​ ဆိကမိၣ်ဝဲ ယဟိဝၤပှၤအုၣ်အသးလၢ ဟီၣ်ခိၣ်ဒီဘ့ၣ်​ အတၢ်လိၣ်ဘၣ်​ ဒ်သိးအဝဲသ့ၣ်​ ကဘူၣ်ထီၣ်ဘါထီၣ်​ ဒီးကစံၣ်တဲၤတဲလီၤတၢ်အဂီၢ်လီၤ. တၢ်မၤဘူၣ်တဖၣ်န့ၣ် ဘၣ်တၢ်ကတဲာ်ကတီၤအီၤဂ့ၤဂ့ၤ ဒီးဘၣ်တၢ်သူအီၤလၢ အလီၢ်ဘၣ်ဘၣ်န့ၣ်လီၤ. ဝဲၤတြၢ်တဖျၢၣ်​ မ့ၢ်ဒိးန့ၢ်ဘၣ်​ တၢ်မၤဘူၣ်​ အါန့ၢ်ဒံး အဝဲသ့ၣ်​ အလီၢ်ကဝီၤ အတၢ်လိၣ်ဘၣ်န့ၣ်​ စ့လၢအပိၣ်တဖၣ်န့ၣ်​ အဝဲသ့ၣ်​ ဟ့ၣ်လီၤဝဲဆူ ထံကီၢ်အဂၤလၢအလိၣ်ဘၣ်​ တၢ်မၤစၢၤသ့ဝဲလီၤ. တၢ်ရဲၣ်တၢ်ကျဲၤတခါအံၤန့ၣ် မ့ၢ်ဒၣ်တၢ်မၤပိာ်ထွဲ ခရံာ်ဖိလၢညါတဖၣ်​ အဒိအတဲာ်လၢ အမၤစၢၤလိာ်အသး ဒ်သိး “အတၢ်ဝံတၢ်ယိး ကဘၣ်ဂီၢ်လိာ်က့ၤအသး” အဂီၢ်လီၤ. (၂ ကရံၣ်သူး ၈:၁၄) အဝဲသ့ၣ်​ သူဝဲ အတၢ်လၢအအိၣ်ဘျဲၣ်တဖၣ်​ ဒ်သိးကမၤစၢၤဝဲ ခရံာ်ဖိလၢ အလိၣ်ဘၣ်တၢ်မၤစၢၤတဖၣ်န့ၣ်လီၤ.

 ဖဲပဒီပုၢ်ဝဲၢ်တဖၣ်​ ဒိးန့ၢ်ဘၣ်ဝဲ စ့အပိၣ်လၢ ဝဲၤတြၢ်အဂၤတဖၣ်​ ဆှၢလီၤဝဲအခါ အဝဲသ့ၣ်​ အသးမၤသးဒ်လဲၣ်. အဒိ, လၢကီၢ်ထၣ်စါနံယါအပူၤ ထံဖိကီၢ်ဖိအနီၣ်ဂံၢ် တဝာ်ဘျဲၣ်န့ၣ်​ အစ့ဟဲနုာ်လၢ တသီအဂီၢ်န့ၣ်​ စှၤန့ၢ်ဒံး ၂ ဒီလၣ်လီၤ. ဖဲအဝဲသ့ၣ်​ ဒိးန့ၢ်ဘၣ်စ့ပာ်ဖှိၣ်တဖၣ်အခါ အဝဲသ့ၣ်ဘှီဂ့ၤထီၣ်က့ၤဝဲ ဘီမုၢ်ဘျီၣ်ဒိၣ်လၢ မၢ်ဖ့ၣ်ကၣ်လီၤ. တၢ်အိၣ်ဖှိၣ်န့ၣ်​ ကွဲးဝဲလၢ “စးထီၣ်လၢ ပဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်ဝံၤလံၤလံၤန့ၣ်​ ပှၤဟဲထီၣ်တၢ်အိၣ်ဖှိၣ်ရိဖှိၣ်​ အနီၣ်ဂံၢ်အါထီၣ်ဝဲလီၤ. ပစံးဘျုးစံးဖှိၣ်ဘၣ်​ ယဟိဝၤယွၤ အတၢ်ကရၢကရိ ဒီးဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ်​ လၢအဟ့ၣ်တၢ်လၢ တၢ်သူၣ်အိၣ်သးအိၣ်အဃိ ပထီၣ်ဘၣ်တၢ်အိၣ်ဖှိၣ်လၢ ဘျီၣ်ဒိၣ်လၢအဃံအလၤအပူၤလီၤ.”

 ဖဲခိၣ်ရိၤနၣ်​ (COVID-19) တၢ်ဆါသံသတြိာ် ကဲထီၣ်အခါ ပဒီပုၢ်ဝဲၢ်မုၣ်ခွါတနီၤလၢ အအိၣ်လၢ ကီၢ်စြံၣ်လၣ်ကၣ်န့ၣ်​ အတၢ်အီၣ်တၢ်အီတအိၣ်လၢၤဘၣ်. ဒီပုၢ်ဝဲၢ်မုၣ်​ အ့ၤမရၣ်​ ဖနၤဒိၤ ဒီးအဖိခွါ အံၤနီၤစ့ၢ်ကီး ထံၣ်ဘၣ်ဒီး တၢ်ကီတၢ်ခဲအံၤလီၤ. ဘၣ်ဆၣ်​ ခီဖျိလၢ ထံကီၢ်အဂၤတဖၣ်​ ဆှၢလီၤဝဲတၢ်မၤဘူၣ်အဃိ အဝဲသ့ၣ်ဒိးန့ၢ်ဘၣ်​ တၢ်မၤစၢၤလီၤ. လၢခးက့ဖိတက့အပူၤန့ၣ်အဝဲသ့ၣ်​ ဒီဖိမိၢ်ခံဂၤ ကွဲးဝဲဒ်အံၤ “ဖဲတၢ်ကီတၢ်ခဲအဆၢကတီၢ် သုဝဲဒီပုၢ်ဝဲၢ်မုၣ်ခွါတဖၣ်​ သုပာ်ဖျါထီၣ်​ တၢ်အဲၣ်တၢ်ကွံ လၢပဖီခိၣ်အဃိ ပစံးဘျုးသုဒိၣ်မးလီၤ. ပအိၣ်ဘၣ်လၢ ဟံၣ်ဖိဃီဖိတဒူၣ်အံၤအပူၤအဃိ ပသးခုဒိၣ်မး. ပဆဲးဃ့ဘါထုကဖၣ်လၢ ယဟိဝၤယွၤအအိၣ်​ ဒ်သိးကမၤစၢၤဝဲ ပဒီပုၢ်ဝဲၢ်မုၣ်ခွါတဖၣ်​ လၢမုၢ်နံၤခံကတၢၢ်အတီၢ်ပူၤန့ၣ်လီၤ.”

 ဒီပုၢ်ဝဲၢ်မုၣ်ခွါတဖၣ်​ မ့ၢ်အိၣ်လၢ တၢ်လီၢ်ဖဲလဲၣ်ဂ့ၤ ဖဲလဲၣ်ဂ့ၤ အဝဲသ့ၣ်​ အသးအိၣ်ဟ့ၣ်နီၤလီၤဝဲ တၢ်လၢအိၣ်ဒီးအဝဲသ့ၣ်လီၤ. အဒိ, အံၤနီၤန့ၣ်​ ပာ်ဃာ်ဝဲ တလါဆံးဆံးဖိတဖျၢၣ်​ လၢကစူးဝဲစ့အဂီၢ် ဒ်သိးမၤစၢၤဝဲ ဟံၣ်ဖိဃီဖိလၢ အလိၣ်ဘၣ်တၢ်မၤစၢၤတဖၣ်ကန့ၢ်အဂီၢ်လီၤ. လၢကီၢ်မဲးကစံၣ်ကိၣ်​ စ့ၢ်ကီး ဒီပုၢ်ဝဲၢ်မုၣ်လၢအမံၤမ့ၢ် ကွၢ်တၣ်လူဖ့ၣ်​ အဲဘရဲးန့ၣ်​ အိၣ်ဒီးတၢ်ပာ်သူၣ်ပာ်သး ဒ်သိးအံၤလီၤ. အဝဲအိၣ်ဘၣ်လၢ တၢ်လီၢ်လၢ စ့တနုာ်လီၤအါအါဘၣ်​ ဒီးပှၤဘၣ်မၤအီၣ်​ တနံၤအဂီၢ်တနံၤအဂီၢ် သနာ်က့ တသ့ဖဲအသ့န့ၣ်​ အဝဲဟ့ၣ်​ တၢ်မၤဘူၣ်လီၤ. အဝဲကွဲးဝဲလၢ “ယစံးဘျုး ယဟိဝၤယွၤလၢ အတၢ်မၤဂ့ၤတၢ် ဒီးအတၢ်အဲၣ်လၢအတီအဃိလီၤ. ယသ့ၣ်ညါလၢ ယတၢ်မၤဘူၣ်အံၤ ပှၤကပာ်ဖှိၣ်အီၤဒီး ပှၤဂၤအတၢ်မၤဘူၣ်​ ဒီးဟ့ၣ်မၤစၢၤဒီပုၢ်ဝဲၢ်လၢ အလိၣ်ဘၣ်တၢ်မၤစၢၤတဖၣ်လီၤ.”

 ဝဲၤတြၢ်တဖၣ်စ့ၢ်ကီး ဆှၢလီၤဘၣ်ဝဲစ့ ဆူတၢ်လီၢ်လၢ အလိၣ်ဘၣ်​ တၢ်မၤစၢၤအဃိ အသးခုဝဲစ့ၢ်ကီးလီၤ. အဲသနံၤ ခၤဘၤဟိၤ လၢအမၤတၢ်လၢ ဘြၣ်စ့(လ်) ဝဲၤတြၢ်ကမံးတံာ်အကျါန့ၣ်​ တဲဝဲလၢ “ပဘၣ်ဟံးန့ၢ် ကျိၣ်စ့တၢ်မၤစၢၤလၢ ထံကီၢ်အဂၤ တဘျုးနံၣ်ညါ. မ့ၢ်လၢပဒိးန့ၢ်ဘၣ်​ တၢ်မၤစၢၤအဃိ ပတၢ်ဖံးတၢ်မၤ လဲၤထီၣ်လဲၤထီဝဲအါမးလီၤ. ဆၣ်ဆၣ်​ အခဲအံၤန့ၣ်​ ပမၤစၢၤဘၣ်​ ထံကီၢ်အဂၤတဖၣ်န့ၢ်လံလီၤ. ဒီပုၢ်ဝဲၢ်သ့ၣ်တဖၣ်န့ၣ်​ ဒ်အမ့ၢ်ခရံာ်အပျဲၢ်အဘီၣ်အသိး တသ့ဖဲအသ့ အသးအိၣ်မၤစၢၤဝဲ တၢ်စံၣ်တဲၤတဲလီၤတၢ်မၤလၢ ဘၣ်တၢ်မၤအီၤလၢ ဟီၣ်ခိၣ်ဒီဘ့ၣ်န့ၣ်လီၤ.”

 ယဟိဝၤပှၤအုၣ်အသးတဖၣ်​ မၤစၢၤဝဲ ဒီပုၢ်ဝဲၢ်လၢ အလိၣ်ဘၣ်​ တၢ်မၤစၢၤတဖၣ်ဒ်လဲၣ်. အဝဲသ့ၣ်​ တဟ့ၣ်လီၤဝဲ တၢ်မၤဘူၣ်ဆူ ဝဲၤတြၢ်တဖၣ်အအိၣ်​ တဘျီဃီဘၣ်. လၢတၢ်န့ၣ်အလီၢ် အဝဲသ့ၣ်​ ဟ့ၣ်ဝဲတၢ်မၤဘူၣ်လၢ ဟီၣ်ခိၣ်ဒီဘ့ၣ်တၢ်မၤအဂီၢ်လီၤ. အဝဲသ့ၣ်​ ထၢနုာ်တၢ်မၤဘူၣ်လၢ “ဟီၣ်ခိၣ်ဒီဘ့ၣ်​ တၢ်မၤဘူၣ်” တလါလၢအအိၣ်လၢ တၢ်အိၣ်ဖှိၣ်အပူၤ မ့တမ့ၢ် ထၢနုာ်ဝဲလၢ donate.pr418.com အပူၤသ့လီၤ.