၂၀၂၀ တၢ်အိၣ်ဖှိၣ်ဖးဒိၣ်န့ၣ်​ မ့ၢ်တၢ်အိၣ်ဖှိၣ်ဖးဒိၣ်အဆိကတၢၢ်တခါလၢ ပှၤသွီတၢ်ကလုၢ် ဒီးတၢ်ဂီၤမူ ဒီးရၤလီၤအီၤခီဖျိလၢ အ့ထၢၣ်နဲးလီၤ. ဘၣ်ဆၣ်​ လၢမလၣ်ဝံၣ်​ ဒီးမိၣ်စဲဘံး န့ၣ်ပဒီပုၢ်ဝဲၢ်အါတက့ၢ် အိၣ်တၢ်လီၢ်န့ၣ်​ အ့ထၢၣ်နဲး တအိၣ်ဘၣ်သနာ်က့ အဝဲသ့ၣ်ထီၣ်ဘၣ်​ တၢ်အိၣ်ဖှိၣ်ဒ်လဲၣ်.

 ပှၤပၢဆှၢတၢ်ကမံးတံာ် အပှၤရဲၣ်ကျဲၤတၢ်ကမံးတံာ် ဒီးတၢ်သိၣ်လိနဲၣ်လိကမံးတံာ် ဟ့ၣ်အခွဲးလၢ မလၣ်ဝံၣ်​ ဒီးမိၣ်စဲဘံးန့ၣ်​ ပှၤကရၤလီၤ တၢ်အိၣ်ဖှိၣ်အတၢ်ရဲၣ်တၢ်ကျဲၤလၢ ကွဲၤဟူဖျါ ဒီးကွဲၤလ့လိၤ. ဘၣ်မနုၤအဃိ လိၣ်လၢပကဘၣ်မၤဒ်အံၤလဲၣ်. လၢဟီၣ်ခိၣ်ချၢ ထံကီၢ်လၢ အ့ထၢၣ်နဲးအပှ့ၤဒိၣ်အကျါန့ၣ်​ ပၣ်ဃုာ်ဒီး မလၣ်ဝံၣ်​ အဃိယဟိဝၤပှၤအုၣ်အသးတဖၣ်သူဝဲ အ့ထၢၣ်နဲး န့ၢ်ထဲဒၣ်တနီၤလီၤ. ဒီပုၢ်ဝဲၢ် ဝ့လံၤယၢၤ(မ်) လၢအမ့ၢ် မလၣ်ဝံၣ်အဝဲၤတြၢ် ကမံးတံာ်န့ၣ်​ တဲဝဲလၢ “ကျဲထဲတဘိလၢ ဒီပုၢ်ဝဲၢ်တဖၣ်​ ကကွၢ်ဒီးဒိကနၣ်ဘၣ်​ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤန့ၣ်​ မ့ၢ်ဝဲ ကွဲၤဟူဖျါ ဒီးကွဲၤလ့လိၤအတၢ်ရဲၣ်တၢ်ကျဲၤ.” ဒီပုၢ်ဝဲၢ် လူၤကၢ် စံၤဘံၤခိၤ လၢအမ့ၢ်စ့ၢ်ကီး မလၣ်ဝံၣ်အဝဲၤတြၢ် ကမံးတံာ်န့ၣ်​ တဲဝဲလၢ “ပသူ ကွဲၤဟူဖျါ ဒီးကွဲၤလ့လိၤ အတၢ်ရဲၣ်တၢ်ကျဲၤ မ့ၢ်တသ့ဘၣ်န့ၣ်​ ဒီပုၢ်ဝဲၢ်လၢကဒိးန့ၢ်ဘၣ်​ တၢ်အဘျုးအဖှိၣ်လၢ တၢ်အိၣ်ဖှိၣ်ဖးဒိၣ်အံၤန့ၣ်​ ကအိၣ်ဒၣ်ထဲတစဲးလီၤ.” လၢကီၢ်မိၣ်စဲဘံးစ့ၢ်ကီး တဘၣ်တဲလၢ အ့ထၢၣ်နဲးတဂ့ၤ, ဒီပုၢ်ဝဲၢ်လၢ အသူအံၣ်လဲးထြီနံး တၢ်ပီးတၢ်လီလၢ ကကွၢ်ဝဲ တၢ်အိၣ်ဖှိၣ်အဂီၢ်န့ၣ်​ အိၣ်ဒၣ်ထဲတစဲးလီၤ.

 ခီဖျိလၢ ခိၤရိၤနၤ တၢ်ဆါသံသတြိာ်အဃိ ဒီပုၢ်ဝဲၢ်တဖၣ်သူပာ်စၢၤဝဲ ကွဲၤဟူဖျါ ဒီးကွဲၤလ့လိၤ အတၢ်ရဲၣ်တၢ်ကျဲၤတနီၤလၢ တၢ်အိၣ်ဖှိၣ်ရိဖှိၣ်အဂီၢ်လံ. a တကးဒံးဘၣ်​ ဒီပုၢ်ဝဲၢ်တဖၣ်​ ဆဲးကျိးဒီး ကွဲၤလ့လိၤသန့လၢ ကရၤလီၤန့ၢ်အီၤ တၢ်အိၣ်ဖှိၣ်ဖးဒိၣ်အတၢ်ရဲၣ်တၢ်ကျဲၤလီၤ.

 ပဒီပုၢ်ဝဲၢ်လၢ မလၣ်ဝံၣ်တဖၣ်​ ထံၣ်ဘၣ်ဒီး တၢ်အိၣ်သးလၢ အကီအခဲ. ညီနုၢ်န့ၣ်​ ကွဲၤလ့လိၤသန့ ဟ့ၣ်အခွဲး ထဲဒၣ်တနၣ်ရံၣ်လီၤ. အဝဲသ့ၣ်​ ဘၣ်ယိၣ်ဝဲလၢ တၢ်ရဲၣ်တၢ်ကျဲၤမ့ၢ်ထီတလၢန့ၣ်​ ပှၤဒိကနၣ်တၢ်ဖိတဖၣ်​ တသးစၢၢ်ဆၢ တၢ်ရဲၣ်တၢ်ကျဲၤလၢၤဘၣ်. ဘၣ်ဆၣ်​ ပဒီပုၢ်ဝဲၢ်တဖၣ်​ တဲနၢ်ပၢၢ်အဝဲသ့ၣ်လၢ ပတၢ်ဖံးတၢ်မၤန့ၣ်​ မ့ၢ်တၢ်မၤလၢ အကဲဘျုးလၢ ပှၤကမျၢၢ်အဂီၢ်. ဖဲပှၤဘၣ်အိၣ်လၢဟံၣ်ပူၤအဆၢကတီၢ်ဒၣ်လဲာ် ပဆဲးဟ့ၣ်ဂံၢ်ဟ့ၣ်ဘါ ပှၤဂၤလၢတၢ်သးခုကစီၣ်လၢ လံာ်စီဆှံအပူၤ အဃိတၢ်မၤအံၤ မၤစၢၤပှၤဂၤလၢ ကကဲထီၣ်ထံဖိကီၢ်ဖိလၢအဂ့ၤ ဒီးအိၣ်ဒီးဟံၣ်မုာ်ဃီပၢၤအဂီၢ်. ဖဲကွဲၤလ့လိၤသန့ အပှၤဘၣ်မူဘၣ်ဒါတဖၣ်​ နၢ်ဟူဘၣ်ဝဲဒ်အံၤအခါ အဝဲသ့ၣ်တူၢ်လိာ်ဝဲလၢ ကရၤလီၤန့ၢ်ဝဲ ဒီပုၢ်ဝဲၢ်တဖၣ်​ အတၢ်ရဲၣ်တၢ်ကျဲၤလီၤ.

 လၢမလၣ်ဝံၣ်န့ၣ်​ ပှၤရၤလီၤ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤလၢ ကွဲၤဟူဖျါသန့တခါ ဒီးကွဲၤလ့လိၤသန့တခါအဃိ ပှၤအကကွဲၢ်လၢထံကီၢ်အပူၤန့ၣ်​ ကွၢ်ဒီးဒိကနၣ်ဘၣ်ဝဲလီၤ. မ့မ့ၢ်လၢမိၣ်စဲဘံးန့ၣ်​ ပှၤရၤလီၤတၢ်အိၣ်ဖှိၣ်ဖးဒိၣ်အတၢ်ရဲၣ်တၢ်ကျဲၤလၢ ကွဲၤဟူဖျါသန့တခါ ဒီးလၢကွဲၤလ့လိၤသန့ၤ ၈၅ ခါလီၤ.

 လၢထံကီၢ်ခံဘ့ၣ်လၢာ်အဂီၢ် တၢ်ရၤလီၤတၢ်အိၣ်ဖှိၣ်​ အတၢ်ရဲၣ်တၢ်ကျဲၤလၢ ကွဲၤဟူဖျါအဂီၢ်န့ၣ်လၢာ်ဝဲ ၂၈,၂၂၇ ဒီလၣ်​  b ဒီးလၢကွဲၤလ့လိၤအဂီၢ်န့ၣ်လၢာ်ဝဲ ဒီလၣ်​ ၂၀,၀၀၀ ဃၣ်ဃၣ်လီၤ. တၢ်လၢာ်ဘူၣ်လၢာ်စ့ၤလၢ ကွဲၤလ့လိၤသန့လၢအဆံးတဖၣ်အဂီၢ်န့ၣ်မ့ၢ်ဝဲ ၁၅ ဒီလၣ် ဒီးသန့လၢအဒိၣ်လၢ ဘၣ်တၢ်ရၤလီၤအီၤလၢ ထံကီၢ်ဒီတဘ့ၣ်အဂီၢ်န့ၣ်လၢာ်ဝဲ ၂,၇၇၇ ဒီလၣ်လီၤ.

 ပဒီပုၢ်ဝဲၢ်တဖၣ်​ ဂုာ်ကျဲးစၢးဝဲလၢ ကသူတၢ်မၤဘူၣ်လၢကျဲလၢအဂ့ၤကတၢၢ်. အဒိ, လၢမလၣ်ဝံၣ်န့ၣ်​ ဒီပုၢ်ဝဲၢ်တဖၣ်​ လဲၤတဲသကိးတၢ်ဒီး ပှၤဘၣ်မူဘၣ်ဒါတဖၣ်ဒ်သိး ကမၤလီၤစှၤန့ၢ်အီၤတၢ်အပှ့ၤအဃိ သန့တခါန့ၣ်​ မၤလီၤစှၤန့ၢ်အီၤ အမျးကယၤ ၃၀ လီၤ. အဃိ တၢ်လၢာ်ဘူၣ်လၢာ်စ့ၤ စှၤလီၤဝဲ ၁,၇၁၁ ဒီလၣ်လီၤ. လၢမိၣ်စဲဘံးန့ၣ်​ သန့တနီၤနၢ်ဟူဘၣ်ဝဲလၢ ဒီပုၢ်ဝဲၢ်တဖၣ်န့ၣ်​ မၤတၢ်တီတီလိၤလိၤ ဒီးဟ့ၣ်တၢ်အပှ့ၤဘၣ်ဆၢဘၣ်ကတီၢ်အဃိ အဝဲသ့ၣ်မၤစှၤလီၤန့ၢ်ဝဲအပှ့ၤလီၤ.

 ခီဖျိလၢ ပဒီပုၢ်ဝဲၢ်တဖၣ်​ ကွၢ်ဘၣ်​ မ့တမ့ၢ် နၢ်ဟူဘၣ်ဝဲ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤလၢ လီၢ်ကဝီၤသန့တဖၣ်အဃိ အဝဲသ့ၣ်​ ပာ်လုၢ်ပာ်ပှ့ၤဝဲဒိၣ်မး. လၢမလၣ်ဝံၣ်န့ၣ်​ တၢ်အိၣ်ဖှိၣ်သးပှၢ်လၢအမ့ၢ် ပဲးထြံး တဲဝဲလၢ “ပစံးဘျုးဘၣ်​ ပှၤပၢဆှၢတၢ်ကမံးတံာ် ဒီပုၢ်ဝဲၢ်တဖၣ်လၢ အကတဲာ်ကတီၤန့ၢ်ပှၤ တၢ်လၢပဂီၢ် ဖဲတၢ်ဆါသံသတြိာ်ကဲထီၣ်​ အတီၢ်ပူၤအဃိလီၤ.” အါစဲးလၢ အအိၣ်လၢမလၣ်ဝံၣ်စ့ၢ်ကီး တဲဝဲလၢ “ပလီတဲစိ ဒီးထဲးဘလဲး တအိၣ်ဘၣ်, ဘၣ်ဆၣ်​ ယဟိဝၤယွၤ အတၢ်ကရၢကရိ ကတဲာ်ကတီၤန့ၢ်ပှၤ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤလၢ ကွဲၤလ့လိၤအဃိ ပသးခုဒိၣ်မး. ခီဖျိလၢ တၢ်ကတဲာ်ကတီၤဒ်အံၤအဃိ ယဟံၣ်ဖိဃီဖိခဲလၢာ် ဒိးန့ၢ်ဘၣ်တၢ်အဘျုးလၢ တၢ်အိၣ်ဖှိၣ်ဖးဒိၣ်. ပထံၣ်ဘၣ်တၢ်အုၣ်သးလၢ ယဟိဝၤယွၤ အဲၣ်ဝဲအခ့အပှၤတဖၣ်လီၤ.”

 ဖဲ ၂၀၂၀ တၢ်အိၣ်ဖှိၣ်ဖးဒိၣ်န့ၣ်​ ပှၤစံၣ်တဲၤတဲလီၤတၢ်ဖိတဂၤလၢ အအိၣ်လၢကီၢ်မိၣ်စဲဘံးန့ၣ်​ ထီၣ်ဘၣ်ဝဲ တၢ်အိၣ်ဖှိၣ်ဖးဒိၣ်​ အဆိကတၢၢ်တဘျီ လၢအဂီၢ်လီၤ. အဝဲတဲဝဲလၢ “ယကွၢ်ဘၣ်​ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤလၢ ကွဲၤဟူဖျါအဃိ ဒုးသ့ၣ်နီၣ်ထီၣ်ယၤလၢ ယဟိဝၤယွၤမ့ၢ် သ့တၢ်လၢာ်ကစၢ်. ဒ်သိးပသုတဒိးန့ၢ်ဘၣ်​ နီၢ်သးတၢ်အီၣ်တဂ့ၤအဂီၢ် တၢ်ဆါသံသတြိာ်အံၤ တြီဝဲတန့ၢ်ဘၣ်​ တကးဒံးဘၣ်​ ကစၢ်ယွၤန့ၣ်​ ဆှၢန့ၢ်ပှၤတုၤလၢ ပဒၢးပူၤညါ. ယထံၣ်ဘၣ်စ့ၢ်ကီး ယဟိဝၤယွၤ အပှၤဂီၢ်မုၢ်တဖၣ်​ ပာ်ဖျါထီၣ်တၢ်အဲၣ်လၢ တဂၤဒီးတဂၤအဖီခိၣ်​ အဃိ ယနာ်သပှၢ်တၢၢ်လၢ တၢ်ကရၢကရိအံၤ မ့ၢ်ဝဲတၢ်ဘူၣ်တၢ်ဘါအမ့ၢ်အတီ.”

 တၢ်အိၣ်ဖှိၣ်သးပှၢ်လၢ အမံၤမ့ၢ် ဝ့ၣ်စၣ်န့ၣ်​ တဲဝဲလၢ “ယအဲၣ်ဒိးစံးဘျုးစံးဖှိၣ်​ ကုၢ်လၢအကလုၢ်တီ မ့ၢ်လၢအဝဲသ့ၣ်​ ကဟုကယာ်ပှၤ ဖဲတၢ်ဆါသံသတြိာ် ရၤလီၤအသးအဆၢကတီၢ်အဃိလီၤ. ပဝဲအါတက့ၢ်န့ၣ်​ ပကျိၣ်စ့တအိၣ်အါအါဘၣ်. မ့ၢ်လၢတၢ်ကရၢကရိ ကတဲာ်ကတီၤန့ၢ်ပှၤ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤလၢ ကွဲၤလ့လိၤ ဒီးကွဲၤဟူဖျါအဃိ ပကွၢ်ဘၣ်တၢ်အိၣ်ဖှိၣ်အတၢ်ရဲၣ်တၢ်ကျဲၤ ဒီးပဒိးန့ၢ်ဘၣ်အဘျုးအါမးလီၤ.”

 ပှၤရဲၣ်ကျဲၤတၢ်ကမံးတံာ် ဒီးတၢ်သိၣ်လိနဲၣ်လိကမံးတံာ်န့ၣ်​ ကတဲာ်ကတီၤဝဲလၢ ကရၤလီၤကဒီးဝဲ ၂၀၂၁ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤလၢ ကွဲၤလ့လိၤ ဒီးကွဲၤဟူဖျါလၢ တၢ်လီၢ်လၢပှၤဃုထၢပာ်ဝဲလီၤ. တၢ်လၢာ်ဘူၣ်လၢာ်စ့ၤလၢ ပကရၤလီၤ တၢ်အိၣ်ဖှိၣ်ဖးဒိၣ်​ အတၢ်ရဲၣ်တၢ်ကျဲၤအဂီၢ် ပဒိးန့ၢ်ဘၣ်​ ကျိၣ်စ့ဖဲလဲၣ်. ပဒိးန့ၢ်ဘၣ်တၢ်မၤဘူၣ်လၢ သုဟ့ၣ်လီၤအီၤလၢ ဟီၣ်ခိၣ်ဒီဘ့ၣ်တၢ်မၤအဂီၢ်လၢ ကျဲအကလုာ်ကလုာ်လၢ donate.pr418.com အဃိလီၤ. သုဟ့ၣ်တၢ်လၢ တၢ်သူၣ်အိၣ်သးအိၣ်အပူၤအဃိ ပစံးဘျုးဘၣ်သုဒိၣ်မး.