လံာ်စီဆှံ တဲဆိပာ်စၢၤဝဲလၢ ဖဲ “တၢ်အစိၤလၢ အလီၢ်ခံကတၢၢ်န့ၣ် . . . ပှၤကလုာ် တဒူၣ်ဒီးတဒူၣ် ကဒုးလိာ်အသး” ဒီးန့ဆၢၣ်တၢ်ဘၣ်ဒိဘၣ်ထံး ကအိၣ်ထီၣ်ဝဲ. (မးသဲ ၂၄:၃, ၇) ဖဲ ၂၀၂၃ တၢ်မၤအနံၣ် a အတီၢ်ပူၤန့ၣ် ပထံၣ်ဘၣ်လၢ ဝံအတၢ်စံးပာ်အံၤ ဟဲလၢထီၣ်ပှဲၤထီၣ်ဝဲ. ဒီးလၢထံကီၢ်အဘ့ၣ် ၁၀၀ ဃၣ်ဃၣ်အပူၤန့ၣ် တၢ်ဒုးတၢ်ယၤ ဒီးန့ဆၢၣ်တၢ်ဘၣ်ဒိဘၣ်ထံး ကဲထီၣ်ဝဲသနာ်က့ ယဟိဝၤပှၤအုၣ်အသးတဖၣ်န့ၣ် ပာ်ဖျါထီၣ်ဝဲ တၢ်အဲၣ် ဒ်ယဟိဝၤယွၤအသိး. အဝဲသ့ၣ် ပာ်ဖျါထီၣ်ဝဲဒ်လဲၣ်.

 ဖဲ ၂၀၂၃ တၢ်မၤအနံၣ်အတီၢ်ပူၤန့ၣ် ပဒီပုၢ်ဝဲၢ်မုၣ်ခွါတဖၣ် ထံၣ်ဘၣ်န့ဆၢၣ်တၢ်ဘၣ်ဒိဘၣ်ထံး ဒီးတၢ်ဘၣ်ဒိဘၣ်ထံး လၢအဂၤတဖၣ်န့ၣ် ကအိၣ်ဝဲ အခါ ၂၀၀ ဘျဲၣ်ညါ. အဃိ ယဟိဝၤပှၤအုၣ်အသးတဖၣ်န့ၣ် အသူဝဲ တၢ်မၤဘူၣ်လၢ ဟီၣ်ခိၣ်ဒီဘ့ၣ် တၢ်မၤအဂီၢ် ဒ်သိးကမၤစၢၤဝဲ ပှၤလၢအထံၣ်ဘၣ်ဒီး တၢ်ဘၣ်ဒိဘၣ်ထံးတဖၣ်အံၤန့ၣ် ကအိၣ်ဝဲ ဒီၤလၤ b အကကွဲၢ် တဆံဘျဲၣ်ညါ. တကးဒံးဘၣ် ပဒီပုၢ်ဝဲၢ်မုၣ်ခွါအါဂၤန့ၣ် အဟ့ၣ်မၤဘူၣ်လီၤတၢ် ဒ်သိးကမၤစၢၤဝဲ ပှၤလၢ လီၢ်ကဝီၤပူၤ လၢအထံၣ်ဘၣ်ဒီး တၢ်ဘၣ်ဒိဘၣ်ထံးတဖၣ်အဂီၢ် အိၣ်ဒံးဝဲစ့ၢ်ကီး. ပကပာ်ဖျါထီၣ် တၢ်ဂ့ၢ်ခံခါလၢ အဘၣ်ဃးဒီး ပဒီပုၢ်ဝဲၢ်မုၣ်ခွါလၢ အထံၣ်ဘၣ်ဝဲ န့ဆၢၣ်အတၢ်ဘၣ်ဒိဘၣ်ထံး ဒီးပှၤသူတၢ်မၤဘူၣ်လၢ အဝဲသ့ၣ် အဂီၢ်ဒ်လဲၣ်.

 လၢကီၢ်နဲးကၠံရံယါ အပူၤ တၢ်လီၢ်တနီၤန့ၣ် ညီနုၢ်န့ၣ် ထံဒိၣ်ထီၣ်ဝဲ. ဘၣ်ဆၣ် ဖဲလါအီးကထိဘၢၣ် ၂၀၂၂ န့ၣ် ထံဒိၣ်ထီၣ်ဝဲနးမး. လၢအနံၣ်တဆံအတီၢ်ပူၤန့ၣ် ထံတဒိၣ်ထီၣ်ဒ်အံၤ နီတဘျီဘၣ်. အဃိ စံာ်ပျီတဖၣ် ဟးဂီၤဝဲ ၁,၆၇၀,၄၃၂ အ့ကၢၢ်. ဒီးပှၤခံကကွဲၢ်ဘျဲၣ်န့ၣ် ဘၣ်သုးလီၢ်သုးကျဲ. အဃိ နဲးကၠံရံယါ ဝဲၤတြၢ် မၢဝဲန့ဆၢၣ်တၢ်ဘၣ်ဒိဘၣ်ထံး ကမံးတံာ် လၢကမၤစၢၤဝဲ ဒီပုၢ်ဝဲၢ်မုၣ်ခွါဖဲန့ၣ်တဖၣ် ဒီးကမၤစၢၤအဝဲသ့ၣ်လၢ နီၢ်သးတကပၤအဂီၢ်စ့ၢ်ကီး.

•   ပှၤစံၣ်တဲၤတဲလီၤတၢ်ဖိ အဂၤ ၇,၅၀၅ ဂၤဘၣ်သုးလီၢ်သုးကျဲ

•   ဟံၣ် ၈၆၀ န့ၣ် ဟးဂီၤတနီၤ မ့တမ့ၢ် လီၤပှီၢ်ကွံာ်ခဲလၢာ် တနီၤ

•   ထံဒိၣ်ဘၢကွံာ်ဝဲ ဘီမုၢ်ဘျီၣ်ဒိၣ် အဖျၢၣ် ၉၀ ဒီးကဝီၤအဘျီၣ်ဒိၣ်တဖျၢၣ်

 ပသူစ့ဒီၤလၤ ၂၅၀,၀၀၀ ဘျဲၣ်လၢ တၢ်မၤစၢၤတၢ်လၢ န့ဆၢၣ်အတၢ်ဘၣ်ဒိဘၣ်ထံး ကဲထီၣ်အဂီၢ် ဒီးပသူအီၤလၢ

•   တၢ်အီၣ်တၢ်အီ ဒ်သိးဒီး ဟုသး, ပဲ ဒီးခီနီဘိၣ်အဂီၢ်

•   တၢ်ပီးတၢ်လီလၢ ဟံၣ်ပူၤဃီပူၤအဂီၢ် ဒ်သိးဒီး လီၢ်ခူ ဒီးပ့ၢ်ပီၤတဖၣ်

•   တၢ်ဘှီဂ့ၤထီၣ် ဒီးသူၣ်ထီၣ်က့ၤ ဟံၣ်လၢအသီအဂီၢ်

 ပဒီပုၢ်ဝဲၢ်တဖၣ် သူဝဲ တၢ်မၤဘူၣ် သ့သ့ဘၣ်ဘၣ်ဒ်လဲၣ်. အဝဲသ့ၣ် ကွၢ်ထံကွၢ်ဆးဝဲ တၢ်သူၣ်ထီၣ်တဖျၢၣ်န့ၣ် ပှၤဘှီဂ့ၤထီၣ်က့ၤအီၤသ့ဒံးဧါ မ့တမ့ၢ် ပှၤဘၣ်တ့ထီၣ်က့ၤအီၤ လၢအသီဧါ. ပှၤမ့ၢ်ဘၣ်တ့ထီၣ်လၢအသီန့ၣ် အဝဲသ့ၣ် တ့ထီၣ်ဝဲယိယိဖိ ဒ်အကြၢးအဘၣ်လၢ လီၢ်ကဝီၤအပူၤအသိး.

 ပဒီပုၢ်ဝဲၢ်မုၣ်ခွါတဖၣ် ဒိးန့ၢ်ဘၣ် တၢ်မၤစၢၤအဃိ အဝဲသ့ၣ် သးခုဒိၣ်မး. ဒီပုၢ်ဝဲၢ်မုၣ်တဂၤ တဲဝဲလၢ “ထံဒိၣ်ထီၣ်အဃိ ပတၢ်လီၢ်တၢ်ကျဲ ဒီးတၢ်လၢအိၣ်ဒီးပှၤ ဟးဂီၤကွံာ်ဝဲခဲလၢာ် ဒီးပဟံၣ်ပဃီ တအိၣ်လၢၤဘၣ်. သနာ်က့ ဖဲတၢ်ကဲထီၣ်သးဝံၤ တနံၤဃီဃီန့ၣ် ဒီပုၢ်ဝဲၢ်မုၣ်ခွါတဖၣ် ကတဲာ်ကတီၤန့ၢ်ပှၤ တၢ်လီၢ်တၢ်ကျဲလၢ ပကအိၣ်အဂီၢ် ဒီးဘ့ၤသ့လး ဆှၢလီၤန့ၢ်ပှၤ တၢ်အီၣ်တၢ်အီ. အဃိ ပပလၢၢ်ဘၣ် ယဟိဝၤယွၤ အတၢ်အဲၣ် ဒီးပထံၣ်ဘၣ်လၢ ယိၤဟၣ် ၁၃:၃၄, ၃၅ ဟဲလၢထီၣ်ပှဲၤထီၣ် လၢပတၢ်အိၣ်မူအပူၤ အဃိ ပကဘၣ်တဲ တၢ်မနုၤလဲၣ်မၣ် ပတဲတဘၣ်လၢၤဘၣ်. ဖဲပလိၣ်ဘၣ် တၢ်မၤစၢၤ အဆၢကတီၢ် ဒီပုၢ်ဝဲၢ်မုၣ်ခွါတဖၣ် ဟဲမၤစၢၤပှၤအဃိ ယၤဒီးယဟံၣ်ဖိဃီဖိ ပစံးဘျုးဘၣ် အဝဲသ့ၣ်လၢ သူၣ်ဒီဖျၢၣ်သးဒီဖျၢၣ်.”

 ပှၤလၢ တၢ်ကပိာ်ကပၤတဖၣ်စ့ၢ်ကီး ပာ်သူၣ်ပာ်သးဝဲ ပတၢ်မၤစၢၤလၢ န့ဆၢၣ်တၢ်ဘၣ်ဒိဘၣ်ထံး တကပၤစ့ၢ်ကီး. စဲးပကြံယါ ပဲၤအဲစၤ ကီၢ်စဲၣ် ခိၣ်နၢ်တဂၤ တဲဝဲလၢ “လၢဟီၣ်ခိၣ်ဒီဘ့ၣ်န့ၣ် တၢ်ကရၢကရိတဖၣ် ဒီးတၢ်ဘူၣ်တၢ်ဘါ အတၢ်ကရၢကရိတဖၣ် အိၣ်ဝဲအါမး. ဘၣ်ဆၣ် ထဲဒၣ် သုဝဲ ယဟိဝၤပှၤအုၣ်အသးတဖၣ်န့ၣ် အမၤစၢၤပှၤဂၤဒ်အံၤ. သုတၢ်ကရၢကရိတခါအံၤန့ၣ် အကဲဝဲ တၢ်ကရၢကရိလၢ အဂ့ၤကတၢၢ်တဖၣ်အကျါတခါ.”

 ဖဲ လါဖ့ၤဘြူၤအါရံၤ ၂၀၂၃ နံၣ်အတီၢ်ပူၤန့ၣ် မ့ၣ်အူအီၣ်တၢ်လၢ ကီၢ်ခၠံၢ်လံၣ် အဘျီ ၄၀၀ ဒီးတၢ်ဟးဂုာ်ဟးဂီၤဝဲအါမး. မ့ၣ်အူအီၣ်တၢ်လီၢ်န့ၣ် ကအိၣ်ဝဲ အအ့ကၢၢ် ၁,၀၆၂,၅၅၃. လၢတၢ်လီၢ်လၢ အဟးဂီၤတဖၣ်အကျါန့ၣ် အပၣ်ဃုာ်ဒီး ကီၢ်ခၠံၢ်လံၣ် အတၢ်လီၢ်လၢ အရ့ဒိၣ်တဖၣ်စ့ၢ်ကီး. ပှၤအဂၤ ၈,၀၀၀ ဃၣ်ဃၣ်န့ၣ် ဘၣ်သုးလီၢ်သုးကျဲလၢ တၢ်လီၢ်အဂၤ. တၢ်ဘၣ်ဒိဘၣ်ထံး ကဲထီၣ်ဝံၤန့ၣ် ဝဲၤတြၢ်ရဲၣ်ကျဲၤတၢ်လၢ ပှၤကလဲၤမၤစၢၤတၢ် ဖဲန့ၣ်အဂီၢ်.

•   ပှၤစံၣ်တဲၤတဲလီၤတၢ်ဖိ ၂၂၂ ဂၤ ဘၣ်သုးလီၢ်သုးကျဲ

•   ဟံၣ်ဟးဂီၤဝဲ အဖျၢၣ် ၂၀

 ပသူစ့ဒီၤလၤ ၂၀၀,၀၀၀ ဘျဲၣ်လၢ တၢ်မၤစၢၤတၢ်လၢ န့ဆၢၣ်အတၢ်ဘၣ်ဒိဘၣ်ထံး ကဲထီၣ်အဂီၢ် ဒီးပသူအီၤလၢ

•   တၢ်အီၣ်တၢ်အီ ဒီးထံ

•   သ့ၣ်မုၣ်, တၢ်ပီးတၢ်လီလၢ တၢ်မၤကဆှဲကဆှီအဂီၢ် ဒီးကသံၣ်ကသီတဖၣ်

•   တ့ထီၣ်က့ၤ ဟံၣ်လၢအဟးဂီၤတဖၣ်

 ဖဲဟံၣ်ဖိဃီဖိတဒူၣ်န့ၣ် ထံၣ်ဘၣ်ဝဲလၢ တၢ်လၢအိၣ်ဒီး အဝဲသ့ၣ်ခဲလၢာ်ဟးဂီၤ ဒီးအဟံၣ်အဃီ ဒီးအတၢ်ဖံးတၢ်မၤ တအိၣ်လၢၤဘၣ်အခါ အဝဲသ့ၣ် ဖုးဘၣ်အသးဒိၣ်မး. ဒီးအဝဲသ့ၣ် လုၢ်အီၣ်လုၢ်အီ အသးသမူ တသ့လၢၤဘၣ်. လၢအခီၣ်ထံး တသီခံသီန့ၣ် အဝဲသ့ၣ် ကွၢ်လီၤဝဲအဟံၣ်လီၢ် ဒီးတၢ်တအိၣ်နီတမံၤဘၣ် အဃိ အဝဲသ့ၣ် အသးအုးဒိၣ်မး. သနာ်က့ ဖဲဒီပုၢ်ဝဲၢ်တဖၣ် က့ၤတ့ထီၣ်န့ၢ်က့ၤ အဝဲသ့ၣ် အဟံၣ်အခါန့ၣ် အဝဲသ့ၣ် အသးခုထီၣ်. ဒီးအဝဲသ့ၣ်ထံၣ်ဘၣ်ဝဲ ဒီပုၢ်ဝဲၢ်လၢ အမၤစၢၤတၢ်တဖၣ် အတၢ်အဲၣ် ဒီးအတၢ်ကဟုကယာ်အဃိ မၤစၢၤအဝဲသ့ၣ် ဒ်သိးအလဲၤခီဖျိတၢ် ကန့ၢ်အဂီၢ်. အဃိ ထိၣ်ဟူးထီၣ်ဂဲၤထီၣ် အဝဲသ့ၣ်လၢ အဝဲသ့ၣ်နာ်က့ ကမၤစၢၤပှၤဂၤ ဒီးကပၣ်ဃုာ်လၢ ဖဲပှၤတ့ထီၣ် ဒီပုၢ်ဝဲၢ်မုၣ်ခွါအဂၤ အဟံၣ်အခါ.

 ပဒီပုၢ်ဝဲၢ်မုၣ်ခွါတဖၣ်န့ၣ် ဖဲအဝဲသ့ၣ် ထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံးအခါ ပှၤဟဲမၤစၢၤအဝဲသ့ၣ် အဃိ အဝဲသ့ၣ် သးခုဒိၣ်မး. အဃိ ဒီပုၢ်ဝဲၢ်တဂၤ တဲဝဲလၢ “ယဟိဝၤယွၤ အတၢ်ရဲၣ်တၢ်ကျဲၤ လၢအမ့ၢ် န့ဆၢၣ်တၢ်ဘၣ်ဒိဘၣ်ထံး ကမံးတံာ်န့ၣ် မ့ၢ်တၢ်ရဲၣ်တၢ်ကျဲၤလၢ အဂ့ၤဒိၣ်မး. တၢ်ဘၣ်ဒိဘၣ်ထံး ကဲထီၣ်ဝံၤ လၢခံတနံၤန့ၣ် အဝဲသ့ၣ်ဟဲတုၤလၢ တၢ်ကဲထီၣ်အသးအလီၢ် ဒီးဟဲစိာ်ဝဲ တၢ်ဖိတၢ်လံၤလၢ ပှၤလိၣ်ဘၣ်ဝဲတဖၣ်. နဖးဘၣ် တၢ်လဲၤခီဖျိ ဘၣ်ဃးဒီး ပှၤမၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံး အဂ့ၢ်န့ၣ် နဂံၢ်နဘါထီၣ်ဒိၣ်မး. ဘၣ်ဆၣ် ဖဲနလဲၤခီဖျိဘၣ်လၢ နနီၢ်ကစၢ်အခါန့ၣ် အလီၤဆီဒိၣ်ဒံး. နပာ်လုၢ်ပာ်ပှ့ၤ ယဟိဝၤယွၤ အတၢ်ကရၢကရိဒိၣ်ထီၣ် ဒီးနထံၣ်ဘၣ်လၢ ဒီပုၢ်ဝဲၢ်မုၣ်ခွါတဖၣ် ပာ်ဖျါထီၣ် တၢ်ဂ့ၤတၢ်ဝါ ဒ်ယဟိဝၤယွၤအသိး. ဒီးအဝဲသ့ၣ် မၤစၢၤပှၤလၢ နီၢ်ခိနီၢ်သး ဒီးလၢသးအတၢ်တူၢ်ဘၣ် တကပၤ အဃိ ပတူၢ်ဘၣ်လၢ ပပလၢၢ်ဘၣ် ယဟိဝၤယွၤ အတၢ်အဲၣ် လၢပနီၢ်ကစၢ်.”

 ဒ်တၢ်ကတၢၢ် ဘူးထီၣ်ဝဲအသိး ပကထံၣ်ဘၣ် န့ဆၢၣ်အတၢ်ဘၣ်ဒိဘၣ်ထံးတဖၣ် အါထီၣ်ဝဲ. (လူၤကၣ် ၂၁:၁၀, ၁၁) သနာ်က့ ပထံၣ်ဘၣ်စ့ၢ်ကီးလၢ ပစီၤပၤ ယ့ၣ်ၡူးလၢ အအိၣ်ဒီး တၢ်အဲၣ်တၢ်ကွံတဂၤန့ၣ် အသူဝဲတၢ်အိၣ်ဖှိၣ် ဒီးအပာ်ဖျါထီၣ်လၢ အအိၣ်ဒီးပှၤ “ကိးမုၢ်နံၤဒဲး တုၤလီၤလၢ တၢ်အကတၢၢ်.” (မးသဲ ၂၈:၂၀) နဟ့ၣ်တၢ်မၤဘူၣ်လၢ ဟီၣ်ခိၣ်ဒီဘ့ၣ်တၢ်မၤအဂီၢ် ဒီးလၢ donate.pr418.com အပူၤ ဒီးနဟ့ၣ်တၢ်မၤဘူၣ်လၢ ကျဲအဂၤ, နဟ့ၣ်လီၤ နတၢ်ဆၢကတီၢ် ဒီးနတၢ်ဂံၢ်တၢ်ဘါန့ၣ် အပာ်ဖျါထီၣ်ဝဲလၢ နဆီၣ်ထွဲ ယွၤအဘီအမုၢ် ဒီးအစီၤပၤ. သုဆဲးဟ့ၣ်တၢ်မၤဘူၣ်လၢ တၢ်သူၣ်အိၣ်သးအိၣ်အပူၤအဃိ ပစံးဘျုးဘၣ်သုဒိၣ်မး.