ယဟိဝၤပှၤအုၣ်အသးတဖၣ် မၤဝဲတၢ်အိၣ်ဖှိၣ်ဖးဒိၣ် တနံၣ်တဘျီန့ၣ် အိၣ်ဝဲအနံၣ် ၁၃၀ ဘျဲၣ်လံ. တၢ်အိၣ်ဖှိၣ်ဖးဒိၣ်လၢ ပမၤအီၤလၢ ဆၢကတီၢ်ခဲအံၤန့ၣ် ပနၢ်ဟူဘၣ် တၢ်စံၣ်တဲၤတဲလီၤတၢ် အခါ ၄၀ ဘျဲၣ် ဒီးတၢ်ဒ့တၢ်အူ, တၢ်သံကွၢ်စံးဆၢ ဒီးတၢ်ဂီၤမူတဖၣ်. ဒီးဒ်သိးပှၤဟဲထီၣ်တၢ်အိၣ်ဖှိၣ်ဖးဒိၣ်တဖၣ် ကဒိးန့ၢ်ဘၣ်အဘျုး ဒီးကထိးဘၣ်အဝဲသ့ၣ်အသးအဂီၢ် အဝဲသ့ၣ် ကဘၣ် “နၢ်ဟူဒီးထံၣ်ဘၣ်” တၢ်ဂ့ၤဂ့ၤ. (လူၤကၣ် ၂:၂၀) အဃိ ပှၤကိးဂၤဒဲးလၢ အလဲၤထီၣ် တၢ်အိၣ်ဖှိၣ်လၢ တၢ်လီၢ်တတီၤဂ့ၤတတီၤဂ့ၤ ကဒိးန့ၢ်ဘၣ်အဘျုးအဂီၢ် ပသူတၢ်မၤဘူၣ်တဖၣ်ဒ်လဲၣ်.

 လၢထံကီၢ်လၢ ကီၢ်မုၢ်နုာ်တကပၤ အတၢ်သူၣ်ထီၣ် ဒီးတၢ်လီၢ်အါတက့ၢ်န့ၣ် အအိၣ်ပာ်စၢၤဒီး တၢ်ကလုၢ်ဒီးတၢ်ဂီၤမူ အတၢ်ပီးတၢ်လီတဖၣ်လံ. သနာ်က့ ဖဲပငါ တၢ်လီၢ်တဖၣ်န့ၣ်လၢ တၢ်အိၣ်ဖှိၣ်ဖးဒိၣ်အဂီၢ်အခါ ဘၣ်မနုၤအဃိ ပဘၣ်သူဒံး ပနီၢ်ကစၢ် တၢ်ပီးတၢ်လီတဖၣ်လဲၣ်. ဒီပုၢ်ဝဲၢ် ဒ့ဘ့း လၢအမၤတၢ်လၢ ဝဲၤလီၢ်ခိၣ်သ့ၣ် တၢ်ဂီၤမူဝဲၤကျိၤန့ၣ် အတဲဝဲလၢ “တၢ်သူၣ်ထီၣ်လၢ ပငါအီၤတနီၤန့ၣ် ပှၤထီထီၣ်ပာ်စၢၤစဲး အါတက့ၢ်လၢ ပှၤကတဲတၢ်အဂီၢ်. ဒီးကမျၢၢ်တဖၣ် ကနၢ်ဟူဘၣ်ဝဲထဲ ၆ နၣ်ရံၣ်ဘျဲၣ်. အဒိ ဒ်သိးဒီး ပှၤလိၣ်ကွဲပြၢတၢ်အလီၢ်န့ၣ် ပှၤဘိးဘၣ်သ့ၣ်ညါလီၤတၢ်န့ၢ်ဝဲ ဖုၣ်ဖုၣ်ဖိ ဒီးပှၤအိးထီၣ်တၢ်ဒ့န့ၢ်ဝဲ တစဲးတမွဲး. မ့မ့ၢ် လၢတၢ်ဂီၤမူန့ၣ် အပာ်ဖျါထီၣ်ဝဲ ပှၤလိၣ်ကွဲအမး ဒီးပှၤကၠီၣ်ညၣ်လီၤတၢ် ဒီးပှၤက့ၤအိးထီၣ်ကဒါက့ၤ ပှၤလိၣ်ကွဲတၢ်ဒ်လဲၣ်. ဘၣ်ဆၣ် လၢတၢ်အိၣ်ဖှိၣ်ဟီန့ၣ် ဒီပုၢ်ဝဲၢ်တဖၣ် ကဘၣ်ကွၢ်ဝဲ တၢ်ဂီၤမူဖးထီ. ပအဲၣ်ဒိးလၢ ပှၤကနၢ်ဟူဘၣ် တၢ်လၢပှၤစံၣ်တဲၤတဲလီၤတၢ်တဖၣ်တဲဝဲဂ့ၤဂ့ၤ ဒီးကနၢ်ပၢၢ်ဝဲၡဲၡဲအဂီၢ်. တၢ်လီၢ်လၢပှၤမၤဝဲ တၢ်အိၣ်ဖှိၣ်ဖးဒိၣ်တခါဘၣ်တခါန့ၣ် လီၤဆီလိာ်သးအဃိ တၢ်ပီးတၢ်လီလၢ ပသူအီၤလၢ တၢ်ဂီၤမူ ဒီးတၢ်ကလုၢ်အဂီၢ်န့ၣ် လီၤဆီလိာ်အသးစ့ၢ်ကီး.”

 ဖဲပှၤဃုထၢဝဲ တၢ်လီၢ်လၢ ပှၤကမၤတၢ်အိၣ်ဖှိၣ်ဝံၤအခါ တၢ်ဂီၤမူ ဒီးတၢ်ကလုၢ်အဝဲၤကျိၤန့ၣ် တယာ်ဝဲလၢ ပှၤကထီၣ်တၢ်အိၣ်ဖှိၣ်ပှဲၤဂၤလဲၣ် ဒီးပှၤကတြီၢ်ဝဲ ပှဲၤဂၤလဲၣ်. ဝံၤဒီးဒ်သိးဒီး ပှၤကိးဂၤဒဲးလၢ အဟဲထီၣ်တၢ်အိၣ်ဖှိၣ်န့ၣ် ကထံၣ်ဘၣ် ဒီးကနၢ်ဟူဘၣ်တၢ်ဂ့ၤဂ့ၤအဂီၢ် အဝဲသ့ၣ် ဒွးကွၢ်ဝဲလၢ အကလိၣ်ဘၣ် စီဘီး (speaker) ဒီးတၢ်ဂီၤမူ ပှဲၤဖျၢၣ်လဲၣ်, ပှၤကဘၣ်ပာ်လီၤဝဲဖဲလဲၣ် ဒီးပှၤကဘၣ်ထီထီၣ်ဝဲ တၢ်သ့ၣ်တဖၣ်န့ၣ် ဒ်လဲၣ်. ဝံၤဒီး တၢ်ပီးတၢ်လီ လၢအဝဲသ့ၣ် လိၣ်ဘၣ်ဝဲတဖၣ်န့ၣ် အဝဲသ့ၣ် မၤနီၣ်ဃာ်ဝဲ စရီခဲလၢာ်.

 တၢ်အိၣ်ဖှိၣ်ဖးဒိၣ်တခါန့ၣ် ပှၤမ့ၢ်မၤအီၤလၢ ကျိာ်အါကျိာ်န့ၣ် ပှၤကဘၣ်ထီထီၣ်ဝဲ တၢ်ကလုၢ် ဒီးတၢ်ဂီၤမူ အတၢ်ပီးတၢ်လီတဖၣ် ကီတစဲး. အဒိ ပှၤမ့ၢ်ကျိာ်ထံဝဲ တၢ်စံၣ်တဲၤတဲလီၤလၢ ကျိာ်အဂၤတကျိာ်န့ၣ် အကဘၣ်နၢ်ဟူ ဒီးထံၣ်ဝဲ တၢ်ဂီၤမူဂ့ၤဂ့ၤ. ဒီးပှၤဘၣ်ရၤလီၤက့ၤ အကလုၢ်လၢ ကွဲၤလ့လိၤ (radio) အကျိၤအကျဲလၢအဂၤတခါ လၢပှၤလၢအဒိကနၣ် ကျိာ်တခါန့ၣ်အဂီၢ်. ခီဖျိလၢ ပအိၣ်ဒီး special media players အဃိ ပမ့ၢ်ဘၣ်ရၤလီၤတၢ်ကလုၢ်လၢ ကျိာ်ဃိးကျိာ်နာ်က့ ပရၤလီၤအီၤသ့ဝဲ တဘျီဃီ. ဒ့ဘ့း တဲဝဲလၢ “တၢ်ကလုၢ်ဒီးတၢ်ဂီၤမူ အတၢ်ရဲၣ်တၢ်ကျဲၤတခါအံၤန့ၣ် အကီဒိၣ်မးအဃိ ပှၤလၢအဟဲမၤစၢၤတၢ်တဖၣ်န့ၣ် ပှၤဘၣ်သိၣ်လိပာ်စၢၤအီၤဂ့ၤဂ့ၤ.”

 ဝဲၤတြၢ်အါတက့ၢ်န့ၣ် အအိၣ်ဒီး တၢ်ကလုၢ်ဒီးတၢ်ဂီၤမူ အတၢ်ပီးတၢ်လီလၢ ပှၤသူအီၤလၢ ကိးနံၣ်ဒဲးအဂီၢ်. ဒီပုၢ်ဝဲၢ်တဖၣ်န့ၣ် အရဲၣ်ကျဲၤဝဲလၢ ပှၤကဆှၢထီၣ်ဆှၢလီၤ တၢ်ပီးတၢ်လီတဖၣ်အံၤလၢ တၢ်အိၣ်ဖှိၣ် တခါဘၣ်တခါ. လၢကီၢ်အမဲရကၤန့ၣ် ဒ်သိးဒီး ပှၤကဆှၢထီၣ်ဆှၢလီၤ တၢ်အိၣ်ဖှိၣ်ဖးဒိၣ် တၢ်ပီးတၢ်လီတဖၣ်အဂီၢ် တနံၣ်ဘၣ်တနံၣ်န့ၣ် ပှၤသူဝဲ အမဲရကၤ ဒီၤလၤ a ခံကလီၢ်ဘျဲၣ်ညါ. ဘၣ်ဆၣ် ပမ့ၢ်ပှ့ၤလၢ အသီဒီး ကွၢ်ထွဲကတဲာ်ကတီၤအီၤန့ၣ် ကလၢာ်အါန့ၢ်အန့ၣ်ဒံး. ဒီးပုၢ်ဝဲၢ် စတံၤဘ့ၣ် လၢအမၤတၢ်လၢ တၢ်ကလုၢ် ဒီးတၢ်ဂီၤမူ လၢတၢ်အိၣ်ဖှိၣ်ဖးဒိၣ်လၢ ခဲနဒၣ်န့ၣ် အတဲဝဲလၢ “ပှၤလၢအမၤတၢ်လၢ တၢ်ကလုၢ် ဒီးတၢ်ဂီၤမူအဂီၢ်န့ၣ် အဝဲသ့ၣ် ကတဲာ်ကတီၤဝဲ ထးမူၤလံၤ, ထး ဒီးပျံၤတဖၣ်ဂ့ၤဂ့ၤ ဒီးဘိၣ်ဘံထီၣ်ဝဲဂ့ၤဂ့ၤ ဒီးပာ်ဃာ်ဝဲ ဒ်သိးပှၤသူက့ၤအီၤလၢ တၢ်အိၣ်ဖှိၣ်လၢခံတဘျီကန့ၢ်အဂီၢ်.”

 ပမ့ၢ်ငါတၢ်ကလုၢ် ဒီးတၢ်ဂီၤမူတၢ်ပီးတၢ်လီတဖၣ်န့ၣ် အပှ့ၤဒိၣ်ဒိၣ်မး ဒီးညီနုၢ်န့ၣ် အတဂ့ၤအါအါဘၣ်. အဃိ အါတက့ၢ်န့ၣ် ပပှ့ၤတၢ်ပီးတၢ်လီတဖၣ်အံၤ ဖဲပလိၣ်ဘၣ်အီၤအခါ. ဒီးဆၢကတီၢ်ခဲအံၤန့ၣ် ဒ်သိးဒီး LED တၢ်ဂီၤမူလၢ အလဲၢ်ဝဲ ၁၆ ပ့ၣ် ဒီးထီဝဲအပ့ၣ် ၁၀ န့ၣ် အအိၣ်ဝဲ စ့ဒီၤလၤ ၂၄,၀၀၀ ဒီးမဲးခြိၤဖိအပျံၤ အပ့ၣ် ၅၀ န့ၣ်အအိၣ်ဝဲ စ့ဒီၤလၤ ၂၀. အဃိ တချုးလၢ တၢ်ကလုၢ် ဒီးတၢ်ဂီၤမူအဝဲၤကျိၤ ပှ့ၤတၢ်ဒံးဘၣ်န့ၣ် အဝဲသ့ၣ်တဲသကိးတၢ်ဒီး တၢ်ပှ့ၤတၢ်အဝဲၤကျိၤ ဒ်သိးဒီးက “ဒွးဆိဝဲ အတၢ်လၢာ်ဘူၣ်လၢာ်စ့ၤ” အဂီၢ်. (လူၤကၣ် ၁၄:၂၈) အဒိ အဝဲသ့ၣ် တဲသကိးဘၣ်ဃးဒီး ပမ့ၢ်ပှ့ၤ တၢ်ပီးတၢ်လီအသီန့ၣ် အကကဲဘျုးလၢ ပှၤပှဲၤဂၤအဂီၢ်လဲၣ်, ပမ့ၢ်ပှ့ၤအီၤန့ၣ် ကမ့ၢ်ကျဲလၢအဂ့ၤကတၢၢ်ဧါ. ဒီးပအိၣ်ဒီးတၢ်လီၢ်တၢ်ကျဲလၢ ပကပာ်ဃာ် တၢ်ပီးတၢ်လီတဖၣ်အံၤအဂီၢ်ဧါ. ဒီးပှၤလၢကကွၢ်ထွဲ ကတဲာ်ကတီၤ တၢ်ပီးတၢ်လီတဖၣ်အံၤန့ၣ် အိၣ်ဧါ. ဒီးတၢ်ဖိတၢ်လံၤလၢ ပကသူအီၤလၢ ပကကတဲာ်ကတီၤ တၢ်ပီးတၢ်လီအသီတဖၣ်အံၤန့ၣ် အိၣ်ဧါ.

 ဒ်သိးဒီး တၢ်ကလုၢ် ဒီးတၢ်ဂီၤမူ အတၢ်ပီးတၢ်လီတဖၣ် ကတူၢ်ယံာ်အဂီၢ်န့ၣ် ပဘၣ်ကွၢ်ထွဲ ကတဲာ်ကတီၤအီၤထီဘိ. ပမ့ၢ်မၤဒ်န့ၣ်မၣ် တၢ်မၤဘူၣ် တလၢာ်အါအါဘၣ်. ဒီးဖဲပဆှၢထီၣ်ဆှၢလီၤ တၢ်ဖိတၢ်လံၤတဖၣ်အံၤအခါ ပပၢနုာ်လီၤအီၤလၢ တၢ်ဒၢပူၤမူာ်မူာ်နီၢ်နီၢ် ဒီးတၢ်ဒၢတဖၣ်အံၤ စ့ၢ်ကီး ပဘၣ်ကွၢ်ထွဲ ကတဲာ်ကတီၤအီၤ ထီဘိ.

 ပှၤလၢအတကဲ ယဟိဝၤပှၤအုၣ်အသးတဖၣ်န့ၣ် အဝဲသ့ၣ် ထံၣ်ဘၣ်ဝဲလၢ တၢ်ကလုၢ် ဒီးတၢ်ဂီၤမူတဖၣ်န့ၣ် အၡဲဒိၣ်မးအဃိ အဝဲသ့ၣ် ကမၢကမၣ်ဒိၣ်မး. အဒိ ပှၤလၢအမၤတၢ်လၢ တၢ်ကလုၢ် ဒီးတၢ်ဂီၤမူ အခီပနံာ်လၢ အဒိၣ်ကတၢၢ်လၢ ဟီၣ်ခိၣ်ချၢတဂၤန့ၣ် အပတြၢၤဘၣ် တၢ်လၢပမၤတဖၣ် ဒီးအတဲဝဲလၢ ဂ့ၤဒိၣ်မး. ဒီပုၢ်ဝဲၢ် ကၠီနသၢၤ လၢအမၤတၢ်လၢ ပှၤထီထီၣ် တၢ်ကလုၢ်ဒီးတၢ်ဂီၤမူ အတၢ်ပီးတၢ်လီလၢ တၢ်အိၣ်ဖှိၣ်ဖးဒိၣ်န့ၣ် တဲဝဲလၢ “ဖဲပှၤတဂၤန့ၣ် သ့ၣ်ညါဘၣ်ဝဲလၢ ပဒီပုၢ်ဝဲၢ်လၢ အမၤသကိးတၢ်တဖၣ်န့ၣ် တကဲဝဲ ပှၤသ့ပှၤဘၣ်လၢ တၢ်ကလုၢ်ဒီးတၢ်ဂီၤမူ နီတဂၤဘၣ်အခါ အကမၢကမၣ်ဝဲဒိၣ်မး. ဒီးအတဲဝဲလၢ တၢ်လၢပမၤအီၤလၢ တနံၤဒီးတဝာ်အတီၢ်ပူၤန့ၣ် မ့မ့ၢ်လၢ အဝဲသ့ၣ် အခီပနံာ်န့ၣ် ကဘၣ်မၤဝဲ ယဲၢ်သီညါ. တၢ်မၤခိၣ်လၢ အဒုးငါပှၤ တၢ်သူၣ်ထီၣ်လၢ တၢ်အိၣ်ဖှိၣ်ဖးဒိၣ်အဂီၢ်တဂၤန့ၣ် တဲဝဲလၢ “ပှၤသးဝံၣ်တၢ်ဖိ ဒီးပှၤပၠးတၢ်ဂီၤမူ ဟဲငါတၢ်လီၢ်ဖဲအံၤ အါမး. သနာ်က့ ယကထံၣ်ဘၣ်လၢ ပှၤမၤတၢ်ဂ့ၤ ဒီးဖၠဲးထဲသိးဒီးသု နီတဘျီဘၣ်.”

 လၢတၢ်အိၣ်ဖှိၣ်ဖးဒိၣ်န့ၣ် ခီဖျိလၢ တၢ်ကလုၢ်ဒီးတၢ်ဂီၤမူအဃိ နဒိးန့ၢ်ဘၣ်အဘျုးဒ်လဲၣ်. ဘၣ်သ့ၣ်သ့ၣ် နကတူၢ်ဘၣ်ဒ်သိးဒီး ဒီပုၢ်ဝဲၢ် ဒ့ဘ့းလၢအအိၣ်လၢ ကီၢ်အဲကလံးတဂၤ တဲဝဲလၢ “ယသးအိၣ် ၈၈ နံၣ်လံ. လၢယတၢ်အိၣ်မူပူၤန့ၣ် ယထီၣ်ဘၣ် တၢ်အိၣ်ဖှိၣ်ဖးဒိၣ် အဘျီအါမး. ဘၣ်ဆၣ် ခဲအံၤန့ၣ် ယသးစၢၢ်ဆၢဘၣ်တၢ် ညီဒိၣ်န့ၢ်ဒံးလၢညါဒံး. ခီဖျိလၢ တၢ်ဂီၤမူအဃိန့ၣ် ယတူၢ်ဘၣ်လၢ တၢ်အိၣ်ဖှိၣ်တၢ်ရဲၣ်တၢ်ကျဲၤန့ၣ် ဝံၤချ့မး ဒီးယနၢ်ပၢၢ်ဘၣ်တၢ်ဂ့ၢ်ၡဲၡဲ ဒီးယတူၢ်ဘၣ်လၢ တၢ်ဂ့ၢ်တဖၣ်န့ၣ် ဘျးစဲလိာ်သးဂ့ၤဂ့ၤ အဃိတၢ်ဘျုးဒိၣ်မး.” မံၤကဲ လၢအအိၣ်လၢ နဲးကၠံရံယါန့ၣ် တဲဝဲလၢ “ပဒီပုၢ်ဝဲၢ်တဖၣ်န့ၣ် အထံၣ်ဘၣ်တၢ်ဂီၤမူဂ့ၤဂ့ၤ ဒီးအနၢ်ဟူဘၣ် တၢ်စံၣ်တဲၤတဲလီၤတၢ်ၡဲၡဲအဃိ အဝဲသ့ၣ် သးစၢၢ်ဆၢတၢ်န့ၢ်ဝဲ ဒီးအဝဲသ့ၣ် တဟးမၤဒီးဆိကမိၣ်ဘၣ် တၢ်ဂ့ၢ်အဂၤဘၣ်.”

 ဖဲနထီၣ် “စံၣ်တဲၤတဲလီၤ တၢ်သးခုကစီၣ်” တၢ်အိၣ်ဖှိၣ်ဖးဒိၣ် ဒီးတၢ်အိၣ်ဖှိၣ်ဖးဒိၣ်လီၤဆီတဖၣ်အခါ ဆိကမိၣ်ထံၣ် ဘၣ်ဃးဒီး ဒ်သိးနကနၢ်ဟူ ဒီးထံၣ်ဘၣ်တၢ်ဂ့ၤဂ့ၤအဂီၢ် ပဒီပုၢ်ဝဲၢ်တဖၣ် မၤဝဲမနုၤလဲၣ်. သုဟ့ၣ်တၢ်မၤဘူၣ်လၢ သုနီၢ်ကစၢ် ဒီးလၢ donate.pr418.com အပူၤအဃိ ပမၤတၢ်သ့ၣ်တဖၣ်အံၤ သ့ဝဲ. အဃိ ပစံးဘျုးဘၣ်သုဒိၣ်မး.