ယဟိဝၤယွၤ အဲၣ်ဒိးသိၣ်လိဝဲ အပှၤဂီၢ်မုၢ်တဖၣ်. အဃိ ယဟိဝၤယွၤအတၢ်ကရၢကရိန့ၣ် ဒုးအိၣ်ထီၣ်ဝဲကၠိတနီၤ လၢကသိၣ်လိဝဲ အပှၤဂီၢ်မုၢ်တဖၣ် ဒ်သိးအဝဲသ့ၣ်မၤလၢပှဲၤဝဲ အမူဒါလၢအဒိးန့ၢ်ဘၣ်ဝဲတဖၣ် ကသ့ဂ့ၤဂ့ၤအဂီၢ်. ကၠိလၢ ကစၢ်ယွၤ အတၢ်ကရၢကရိ ဒုးအိၣ်ထီၣ်ဝဲအကျါတခါန့ၣ် မ့ၢ်ဝဲ ပှၤစိာ်ဘီမုၢ်တၢ်သးခုကစီၣ်ဖိအကၠိ (SKE). စးထီၣ်ဖဲအပူၤကွံာ်စှၤကိာ်နံၣ်န့ၣ် ကစၢ်ယွၤ အတၢ်ကရၢကရိ မၤဂ့ၤထီၣ်ဝဲ တၢ်သိၣ်လိနဲၣ်လိ အကျိၤအကျဲတဖၣ်. တကးဒံးဘၣ် အဝဲသ့ၣ် မၤဂ့ၤထီၣ်ဝဲ ကၠိအတၢ်သူၣ်ထီၣ်တဖၣ်စ့ၢ်ကီး. အဝဲသ့ၣ်မၤဝဲဒ်အံၤန့ၣ် အတၢ်တိာ်ပာ်မ့ၢ်ဝဲ ဒ်သိးကမၤစၢၤဝဲ ကၠိဖိ ဒီးပှၤလၢအသိၣ်လိတၢ်တဖၣ် ဒ်သိးအဝဲသ့ၣ် သးစၢၢ်ဆၢဝဲ တၢ်မၤလိကန့ၢ်ဂ့ၤဂ့ၤအဂီၢ်. တၢ်မၤဘူၣ်လၢ နဟ့ၣ်လီၤအီၤန့ၣ် ကဲထီၣ်တၢ်မၤစၢၤလၢ တၢ်ရဲၣ်တၢ်ကျဲၤအံၤအဂီၢ်ဒ်လဲၣ်.

 လၢအပူၤကွံာ် အနံၣ်အါမးန့ၣ် ကၠိလၢ တၢ်ကရၢကရိဒုးအိၣ်ထီၣ်ဝဲန့ၣ် ပှၤမၤဝဲလၢ ဘီမုၢ်ဘျီၣ်ဒိၣ် မ့တမ့ၢ် ကဝီၤအဘျီၣ်ဒိၣ်တဖၣ်အပူၤ. မ့မ့ၢ်ဒ်န့ၣ်န့ၣ် အခဲအံၤ ဘၣ်မနုၤအဃိ ပှၤသူၣ်အါထီၣ် မ့တမ့ၢ် ပှၤဘှီဂ့ၤထီၣ် တၢ်သူၣ်ထီၣ်လၢ ကၠိတဖၣ်အံၤအဂီၢ်လဲၣ်. ပကတဲသကိး တၢ်ဂ့ၢ်သၢထံၣ်.

 တၢ်လိၣ်ဘၣ်အိၣ်အါထီၣ်. ဒီပုၢ်ဝဲၢ်ခွါ ခရံာ်စတိဖၢၣ် မ့ဘၢၤ လၢအမ့ၢ် ဘီမုၢ်အတၢ်မၤ ကမံးတံာ် လၢဝဲၤလီၢ်ခိၣ်သ့ၣ် အပှၤမၤစၢၤတၢ်တဂၤ တဲဝဲလၢ “ဝဲၤတြၢ်ပာ်ဖျါထီၣ်ဝဲလၢ ပလိၣ်ဘၣ်အါထီၣ် ဒီပုၢ်ဝဲၢ်မုၣ်ခွါတဖၣ်လၢ ကမၤစၢၤတၢ်လၢတၢ်စံၣ်တဲၤတဲလီၤတၢ်တကပၤ. အဒိ ဖဲ ၂၀၁၉ န့ၣ် ကီၢ်ဘြၣ်စ့ အဝဲၤတြၢ် တယာ်ဝဲလၢ အဝဲသ့ၣ်ကလိၣ်ဘၣ်ဝဲ ပှၤလၢအဖျိထီၣ် ပှၤစိာ်ဘီမုၢ်တၢ်သးခုကစီၣ်ဖိအကၠိ အဂၤ ၇,၆၀၀ လၢကဟဲမၤစၢၤအဝဲသ့ၣ် အဝဲၤတြၢ် အဟီၣ်ကဝီၤ. တကးဒံးဘၣ် အမဲရကၤ ဝဲၤတြၢ် ပာ်ဖျါထီၣ်န့ၢ်ပှၤလၢ အဝဲသ့ၣ်လိၣ်ဘၣ်အါထီၣ်ဝဲ ပှၤလဲၤလၢညါလၢ အတုၤထီၣ်ထီၣ်ဘးလၢ ကသိၣ်လိပှၤဂၤ လၢကမၤဝဲ တၢ်စံၣ်တဲၤတဲလီၤတၢ်လီၤဆီလၢ ဝ့ၢ်ဖးဒိၣ်တဖၣ်, တၢ်စံၣ်တဲၤတဲလီၤတၢ် လၢကဘီသန့ ဒီးတၢ်စံၣ်တဲၤတဲလီၤတၢ် လၢဃိာ်ပူၤအဂီၢ်. တကးဒံးဘၣ် ပှၤလိၣ်ဘၣ်အါထီၣ်စ့ၢ်ကီး ဒီပုၢ်ဝဲၢ်ခွါတဖၣ်လၢ လီၢ်ကဝီၤတၢ်သူၣ်ထီၣ်ဘှီထီၣ်ဝဲၤကျိၤ ဒီးကမံးတံာ်လၢ အဆဲးကျိးဒီး တၢ်ဆါဟံၣ်. ပှၤလၢအဖျိထီၣ် ပှၤစိာ်ဘီမုၢ်တၢ်သးခုကစီၣ်ဖိအကၠိတဖၣ်န့ၣ် အတုၤထီၣ်ထီၣ်ဘးလၢ ကမၤဝဲမူဒါတဖၣ်အံၤ.

 ပှၤအဲၣ်ဒိးထီၣ်ကၠိအိၣ်အါထီၣ်. ဝဲၤတြၢ်အါဖျၢၣ် ဒိးန့ၢ်ဘၣ်ဝဲ လံာ်လၢပှၤတီၣ်ထီၣ်လၢ ကထီၣ်ကၠိန့ၣ် အနီၣ်ဂံၢ်အိၣ်အါန့ၢ်ဒံး ကၠိဖိနီၣ်ဂံၢ်လၢ ပှၤတူၢ်လိာ်ဝဲသ့ဒံး. အဒိ ကီၢ်ဘြၣ်စ့ အဝဲၤတြၢ်န့ၣ် လၢတနံၣ်အတီၢ်ပူၤ အဒိးန့ၢ်ဘၣ်ဝဲ ပှၤလၢအတီၣ်ထီၣ်လၢ ကထီၣ် ပှၤစိာ်ဘီမုၢ်တၢ်သးခုကစီၣ်ဖိအကၠိန့ၣ် အိၣ်ဝဲအဂၤ ၂,၅၀၀. ဘၣ်ဆၣ် ခီဖျိလၢ တၢ်သူၣ်ထီၣ် အိၣ်တယၢဘၣ်အဃိ တနံၣ်န့ၣ် ပှၤထီၣ်ဘၣ်ကၠိထဲ အဂၤ ၉၅၀ လီၤ.

 တၢ်အိၣ်တၢ်ဆိးအလီၢ်လၢ အကြၢးဝဲဘၣ်ဝဲ. ဖဲပှၤမၤဝဲကၠိလၢ ဘီမုၢ်ဘျီၣ်ဒိၣ် မ့တမ့ၢ် ကဝီၤအဘျီၣ်ဒိၣ်တဖၣ်အပူၤအခါ ညီနုၢ်န့ၣ် ကၠိဖိတဖၣ် ကဘၣ်အိၣ်ဝဲလၢ ဒီပုၢ်ဝဲၢ်မုၣ်ခွါအဟံၣ်. ဒီးလၢတၢ်လီၢ်လၢ တနံၣ်အတီၢ်ပူၤ ပှၤမၤဝဲကၠိ ထဲစှၤကိးဘျီန့ၣ် တၢ်ရဲၣ်တၢ်ကျဲၤအံၤလဲၤအသးဂ့ၤဂ့ၤဘၣ်ဘၣ်. ဘၣ်ဆၣ် လၢတၢ်လီၢ်တနီၤလၢ တနံၣ်အတီၢ်ပူၤ ပှၤမၤဝဲကၠိ အဘျီအါမးန့ၣ် ကၠိဖိတဖၣ် ကဘၣ်အိၣ်ဝဲလၢ ဒီပုၢ်ဝဲၢ်မုၣ်ခွါတဖၣ်အဟံၣ် လၢအလါအါမးအဃိ တညီလၢ ဒီပုၢ်ဝဲၢ်မုၣ်ခွါတဖၣ်အဂီၢ်စ့ၢ်ကီးဘၣ်. အဃိ ပှၤကတဲာ်ကတီၤန့ၢ်ဝဲ တၢ်သူၣ်ထီၣ်လၢကၠိဖိတဖၣ်အဂီၢ် လၢအဘူးဒီးအကၠိ.

 လၢတၢ်သူၣ်ထီၣ်တဖျၢၣ်အပူၤန့ၣ် အိၣ်ဝဲဒီး တၢ်မၤလိတီၤဒၢးတခါ ဒီးဒၢးတဖၣ်လၢ ပှၤသိၣ်လိတၢ်တဖၣ်အဂီၢ်. တကးဒံးဘၣ် ဒၢးတဖၣ်လၢ ပှၤကၠိဖိလၢ အဂၤ ၃၀ ဃၣ်ဃၣ် ဒီးပှၤလၢ အမၤစၢၤတၢ် ဖဲန့ၣ်တဖၣ်အဂီၢ်. အဃိ လၢတၢ်လီၢ် ဒီးတၢ်အိၣ်သးအဖီခိၣ်န့ၣ် တၢ်လၢာ်ဘူၣ်လၢာ်စ့ၤ ကအိၣ်ဝဲ စ့ဒီၤလၤ အကလီၢ်လၢအဆံညါ.

 ညီနုၢ်န့ၣ် ပှၤမၤဝဲကၠိလၢတၢ်ဘှ့ၣ်တၢ်ဘှီၣ် ဒီးလၢဝ့ၢ်ဖးဒိၣ်အချၢ ဘၣ်ဆၣ် ပှၤမၤဝဲလၢတၢ်လီၢ်လၢ ပှၤလဲၤတၢ်က့ၤတၢ်ညီ ဒီးပှၤစံၣ်တဲၤတဲလီၤတၢ်ဖိ အိၣ်ဝဲအါအလီၢ်. ပှၤမၤဝဲဒ်န့ၣ်န့ၣ် မ့ၢ်ဒ်သိး ဒီပုၢ်ဝဲၢ်မုၣ်ခွါတဖၣ် ဆီၣ်ထွဲမၤစၢၤ ကၠိအတၢ်ရဲၣ်တၢ်ကျဲၤ ဒီးကွၢ်ထွဲကတဲာ်ကတီၤစၢၤဝဲ တၢ်သူၣ်ထီၣ် ဒီးတၢ်ပီးတၢ်လီတဖၣ်သ့.

 လၢတၢ်သူၣ်ထီၣ်အပူၤန့ၣ် အိၣ်ဝဲဒီး လံာ်ရိဒၢး, ပှၤဖးလံာ်ဒီးမၤလိတၢ်အလီၢ်, ခီၤဖၠူထၢၣ်, စဲးစဲကျံးတၢ် ဒီးတၢ်ပီးတၢ်လီအဂၤတဖၣ်. ဒီးလၢတၢ်သူၣ်ထီၣ်အပူၤန့ၣ် အါတက့ၢ်အိၣ်ဒီး ဒၢးလၢပှၤကၠိဖိဒီး ပှၤသိၣ်လိနဲၣ်လိတၢ်ဖိတဖၣ် ကအီၣ်သကိးတၢ်အဂီၢ်. တကးဒံးဘၣ် အိၣ်စ့ၢ်ကီးဒီး တၢ်လီၢ်လၢ အဝဲသ့ၣ် ကမၤနီၢ်ခိတၢ်ဟူးတၢ်ဂဲၤ ဒီးတၢ်မၤမုာ်မၤဖှံသးအဂီၢ်.

 ဒီပုၢ်ဝဲၢ်ထြဲ လၢအမၤသကိးတၢ်ဒီး ဟီၣ်ခိၣ်ဒီဘ့ၣ် တၢ်သူၣ်ထီၣ်ဘှီထီၣ်တၢ်မၤလၢ ဝီဝံး, နူယီးန့ၣ် တဲဝဲလၢ “ပရဲၣ်လီၤကျဲၤလီၤ တၢ်မၤလိ အတီၤဒၢးဂ့ၤဂ့ၤ. ဒီးဒ်သိး ကၠိဖိတဖၣ် သးစၢၢ်ဆၢ တၢ်မၤလိကညီအဂီၢ် ပကဘၣ်ရဲၣ်လီၤကျဲၤလီၤ တီၤဒၢးဒ်လဲၣ်န့ၣ် ပလဲၤဃ့တၢ်မၤစၢၤလၢ ဒီပုၢ်ဝဲၢ်လၢ အမၤတၢ်လၢ ကၠိလၢ တၢ်ကရၢကရိဒုးအိၣ်ထီၣ်ဝဲ အဝဲၤကျိၤအအိၣ်. ဒီးဒီပုၢ်ဝဲၢ်တဖၣ် ဟ့ၣ်ပှၤတၢ်ဟံးစုနဲၣ်ကျဲလၢ အဘၣ်ဃးဒီး တီၤဒၢးန့ၣ် ကဘၣ်ဒိၣ်ထဲလဲၣ်, ပှၤကဘၣ်ရဲၣ်လီၤကျဲၤလီၤအီၤဒ်လဲၣ်, လိၣ်ဘၣ်ဝဲ တၢ်ကပီၤဒ်လဲၣ်တကလုာ်လဲၣ်, ဒီးပှၤကဘၣ်ထၢနုာ် တၢ်ပီးတၢ်လီမနုၤတဖၣ်လၢ တၢ်ကလုၢ် ဒီးတၢ်ဂီၤမူအဂီၢ်လဲၣ်. ဘၣ်ဃးဒီး တၢ်ထၢနုာ်လီၤ တၢ်ပီးတၢ်လီလၢ တၢ်ကလုၢ်အဂီၢ်န့ၣ် ဒီပုၢ်ဝဲၢ် စိၤထဲ လၢအအိၣ်လၢ ဟါကၢၤရံၤ လၢအကဲဝဲ ပှၤသိၣ်လိနဲၣ်လိတၢ်လၢ ပှၤစိာ်ဘီမုၢ်တၢ်သးခုကစီၣ်ဖိအကၠိ န့ၣ်တဲဝဲလၢ “လၢအခီၣ်ထံးခါ လၢတီၤဒၢးပူၤန့ၣ် တၢ်ကလုၢ်ဒၢ တအိၣ်ဘၣ်အဃိ ပဘၣ်ဒုးသ့ၣ်နီၣ်ထီၣ် ကၠိဖိတဖၣ်လၢ ကတဲဒိၣ်ထီၣ်အကလုၢ်မၢ်မၢ်. ဘၣ်ဆၣ်ခဲအံၤ စီၢ်နီၤခိၣ် တခါစုာ်စုာ်န့ၣ် အိၣ်ဒီးတၢ်ကလုၢ်ဒၢအဃိ တၢ်ကီတၢ်ခဲတခါန့ၣ် တအိၣ်လၢၤဘၣ်.”

 ပှၤမၤဂ့ၤထီၣ် တၢ်သူၣ်ထီၣ်အဃိ ကဲဘျုးလၢ ပှၤသိၣ်လိနဲၣ်လိတၢ် ဒီးကၠိဖိတဖၣ်အဂီၢ်ဒ်လဲၣ်. ပှၤစိာ်ဘီမုၢ်တၢ်သးခုကစီၣ်ဖိအကၠိ လၢအမ့ၢ် ဒီပုၢ်ဝဲၢ်မုၣ် အဲကၠၢၤလၤ လၢအအိၣ်လၢ ဖီ ခိၣ်, ဖျီရဒၤ, U.S.A န့ၣ် တဲဝဲလၢ “တၢ်သူၣ်ထီၣ်တခါအံၤ အိၣ်ဘှ့ၣ်ဘှ့ၣ်ဘှီၣ်ဘှီၣ်လီၤ. ဒီးဒ်သိး ပမၤလိတၢ် ဒီးသးစၢၢ်ဆၢတၢ် ကန့ၢ်ဂ့ၤဂ့ၤအဂီၢ် ပှၤရဲၣ်ကျဲၤန့ၢ်ပှၤ တၢ်ခဲလၢာ်ဂ့ၤဂ့ၤ ဃုာ်ဒီးပတီၤဒၢး, ပအိၣ်တၢ်အလီၢ် ဒီးတၢ်အဂၤခဲလၢာ်.” ဒီပုၢ်ဝဲၢ် စါဘၤ လၢအိၣ်လၢ ဟါကၢၤရံၤ ဒီးအမ့ၢ်ဝဲ ပှၤသိၣ်လိနဲၣ်လိတၢ်န့ၣ် တဲဝဲလၢ အန့ၢ်ဘၣ် တၢ်ခွဲးတၢ်ယာ်လၢ အအီၣ်သကိးဘၣ်တၢ်ဒီး ကၠိဖိတဖၣ်အဃိအသးခုဒိၣ်မး. ခီဖျိလၢ အအီၣ်သကိးဘၣ်တၢ် ဒ်န့ၣ်အဃိ အတဲဝဲလၢ “ကၠိဖိတဖၣ် တဲပၠးပှၤအဝဲသ့ၣ်အဂ့ၢ် ဒီးအတၢ်လဲၤခီဖျိ. အဃိ ပသ့ၣ်ညါအါထီၣ်အဝဲသ့ၣ်အဂ့ၢ် ဒီးပမၤစၢၤအဝဲသ့ၣ် သ့ဒိၣ်ထီၣ်စ့ၢ်ကီး.”

 ပှၤမၤဂ့ၤထီၣ် ကၠိအတၢ်သူၣ်ထီၣ်တဖၣ်န့ၣ် ကၠိဖိတဖၣ် ဒီးပှၤသိၣ်လိတၢ်တဖၣ် ထံၣ်ဝဲလၢ အကဲတၢ်ဆိၣ်ဂ့ၤလၢ အဟဲလၢ ယဟိဝၤယွၤ လၢအမ့ၢ် “သရၣ် လၢအဒိၣ်အထီတဂၤ” အအိၣ်. (ယၡါယၤ ၃၀:​၂၀, ၂၁) ဒီပုၢ်ဝဲၢ်မုၣ်တဂၤလၢ အအိၣ်လၢ ကီၢ်ဖံးလံးပံ လၢအထီၣ်ဘၣ် ပှၤစိာ်ဘီမုၢ်တၢ်သးခုကစီၣ်ဖိအကၠိ လၢတၢ်သူၣ်ထီၣ်လၢ ပှၤတ့ထီၣ်က့ၤလၢကၠိ တဂၤတဲဝဲလၢ “ကၠိအတၢ်လီၢ်တၢ်ကျဲအံၤ ဒုးသ့ၣ်နီၣ်ထီၣ်ပှၤလၢ ပတမ့ၢ်ထဲ ကၠိဖိယိယိဘၣ်. ပမ့ၢ်ယဟိဝၤယွၤ အပှၤတမှံၤလီၤဆီ. ဖဲပမၤလိ ယဟိဝၤယွၤအကလုၢ်ကထါ လီၤတံၢ်လီၤဆဲးအခါ အဝဲအဲၣ်ဒိးလၢ ပကသးခု.”

 တၢ်သူၣ်ထီၣ်တဖၣ် ဘၣ်တၢ်သူၣ်ထီၣ်အီၤ, မၤဂ့ၤထီၣ်က့ၤအီၤ, ပှၤကွၢ်ထွဲကတဲာ်ကတီၤအီၤသ့န့ၣ် ခီဖျိလၢနဟ့ၣ်တၢ်မၤဘူၣ်အဃိ. ပှၤအါဂၤ ဟ့ၣ်တၢ်မၤဘူၣ်လၢ donate.pr418.com. သုသးအိၣ်ဟ့ၣ်တၢ်အဃိ တၢ်ဘျုးဒိၣ်မး.