“တယံာ်ဒံးဘၣ်န့ၣ်​ ပကဒိးန့ၢ်ဘၣ်ဝဲ နီၢ်သးတၢ်အီၣ်တၢ်အီလၢ ဒံၣ်ကၠံၤတဲၣ်အပူၤန့ၣ်​ ပတဆိကမိၣ်ဘၣ်နီတဘျီဘၣ်.” နၤစ့ၢ်ကီး နဆိကမိၣ်ဘၣ်ဒ်န့ၣ်​ မ့ၢ်ဧါ. တၢ်ကတိၤတဖၣ်အံၤ ပၣ်ဃုာ်လၢ ကၠဲဖၢၤရံၤ ကၠဲၣ်ကစၢၤ အတၢ်စံၣ်တဲၤတဲလီၤလၢ အဟ့ၣ်ဂံၢ်ဟ့ၣ်ဘါပှၤလၢ ၂၀၂၀ တၢ်ကစီၣ်အသီ ၆ အပူၤ. အဝဲဆဲးတဲဝဲလၢ “ဒီးဘၣ်သ့ၣ်သ့ၣ်​ ခဲအံၤပကဆိကမိၣ်ဘၣ်​ ဖဲတၢ်ဆါရၤလီၤအသးအဆၢကတီၢ် JW Library app မ့ၢ်တအိၣ်ဘၣ်န့ၣ်​ ပကမၤဒ်လဲၣ်. ယဟိဝၤယွၤန့ၣ်​ ကတဲာ်ကတီၤန့ၢ်ပှၤ တၢ်သ့ၣ်တဖၣ်အံၤ အိၣ်ဝဲဒၣ်တဘျုးနံၣ်လံ.”

 ယဟိဝၤယွၤ ကတဲာ်ကတီၤတ့ၢ်ဝဲဒ်လဲၣ်. ဖဲပတ့ထီၣ်​ JW Library app အခါပဘၣ်မၤတၢ်မနုၤလဲၣ်. ဒ်သိးပကကွၢ်ကတဲာ်ကတီၤဒီး မၤဂ့ၤထီၣ်အီၤအဂီၢ် လိၣ်လၢပကဘၣ်မၤတၢ်မနုၤလဲၣ်.

 ဖဲ ၂၀၁၃ လါမ့ၤန့ၣ်​ ပှၤပၢဆှၢတၢ်ကမံးတံာ် မၢဝဲ MEPS Programming ဝဲၤကျိၤလၢ အိၣ်လၢဝဲၤလီၢ်ခိၣ်သ့ၣ်န့ၣ်​ တ့ထီၣ်ဝဲ app တခါလၢ အပၣ်ဃုာ်ဒီး ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ လၢဘၣ်တၢ်မၤဂ့ၤထီၣ်က့ၤအီၤ. ဖီ ဝ့ၤလံၤ လၢအမၤတၢ်ဒီး MEPS Programming န့ၣ်တဲဝဲလၢ “ဖဲန့ၣ်အခါန့ၣ်​ ပတရၤလီၤဘၣ်​ mobile app လၢ app stores အပူၤနီတဘျီဒံးဘၣ်. ဘၣ်ဆၣ်​ ပပာ်ဖှိၣ်ထီၣ်​ ပှၤတဖု ဒီးပပာ်ပတုာ်ဃာ်တၢ်မၤအဂၤတနီၤ ဒီးမၤသကိးတၢ်ဒီး ဝဲၤကျိၤအဂၤ ဒ်သိးပကတ့ထီၣ်​ app ဒီးတၢ်လၢအဘၣ်ထွဲဒီးအီၤ. ပဃ့ဘါထုကဖၣ်​ တလီၢ်လီၢ်ဒီး မ့ၢ်လၢယဟိဝၤယွၤအတၢ်မၤစၢၤအဃိ ဖဲယဲၢ်လါပူၤကွံာ်အလီၢ်ခံ ပရၤလီၤဘၣ်ဝဲ app တခါအံၤဖဲ တနံၣ်တဘျီတၢ်အိၣ်ဖှိၣ်ရိဖှိၣ်အခါလီၤ.”

 တၢ်ကီတၢ်ခဲအဂၤတခါန့ၣ်​ အိၣ်ထီၣ်ဝဲဖဲ ပကမၤကဲထီၣ်​ app လၢ library, ထၢနုာ်အါထီၣ်လံာ်လဲၢ်တဖၣ်​ ဒီးကျိာ်အဂၤတဖၣ်. ဒီးဖဲ ၂၀၁၅ လါယနူၤအါရံၤန့ၣ်​ ပလံာ်လၢ အဟဲထီၣ်သီလၢ ကိၤလၤဝါကျိာ်အါတက့ၢ်န့ၣ်​ ပပာ်ထီၣ်အီၤလၢ app အပူၤ ဒီးဃုလါဝံၤအလီၢ်ခံ ပှၤလၢအသူ app တဖၣ်န့ၣ်​ ဒီလိးဝဲ လံာ်လဲၢ်တဖၣ်န့ၣ်လၢ ကျိာ်လၢအကယၤသ့ဝဲလီၤ.

 ဖဲန့ၣ်ဝံၤအလီၢ်ခံ ဒီပုၢ်ဝဲၢ်တဖၣ်​ မၤဂ့ၤထီၣ်​ app လၢကျဲအါဘိဒီး ပာ်ထီၣ်ဝဲ တၢ်ဂီၤမူတဖၣ်, ပာ်ဖှိၣ်ထီၣ်လံာ်လဲၢ်တဖၣ်​ ဒီးမံဒံယါလၢ တၢ်ထီၣ်တၢ်အိၣ်ဖှိၣ်ရိဖှိၣ်အဂီၢ်လၢ တၢ်လီၢ်တတီၤဃီအပူၤ. အဃိ ပှၤလၢအသူ app တဖၣ်န့ၣ်​ ဖဲအဆီၣ်လီၤဝဲ လံာ်စီဆှံအဆၢတဖၣ်အခါ နုာ်လီၤဝဲဆူ Research Guide references အပူၤသ့တဘျီဃီလီၤ.

 တနံၤဘၣ်တနံၤ ပှၤအိးထီၣ်​ JW Library လၢ လီတဲစိ, ထဲးဘလဲး ဒီးခီၣ်ဖၠူထၢၣ်န့ၣ်​ အိၣ်ဝဲ ၈ ကကွဲၢ်ဘျဲၣ်​ ဒီးကိးလါဒဲးန့ၣ်​ ပှၤအိးထီၣ်ဝဲအိၣ်​ ၁၅ ကကွဲၢ်ဘျဲၣ်ညါ. ဒီးဒ်သိးပှၤသူအီၤ ကန့ၢ်ဂ့ၤဂ့ၤအဂီၢ် ပဘၣ်ဆဲးမၤဒံးတၢ်မနုၤလဲၣ်. ဒီပုၢ်ဝဲၢ် ဝ့ၤလံၤ ၡဲပၠးဝဲလၢ “mobile app န့ၣ်နမၤဂ့ၤထီၣ်အီၤ ဝံၤတန့ၢ်နီတဘျီဘၣ်. ဒ်သိးပှၤသူအီၤ ကညီထီၣ်အဂီၢ် ထီဘိန့ၣ်​ ပကဘၣ်ဆဲးမၤဂ့ၤထီၣ်အီၤ ဒီးထၢနုာ်အါထီၣ်​ တၢ်ပနီၣ်အသီသ့ၣ်တဖၣ်လီၤ. မ့ၢ်လၢ စံပွါယ့ အတၢ်ရဲၣ်တၢ်ကျဲၤ ဘၣ်ဃးဒီး ဒံၣ်ကၠံၣ်တဲၣ်​ တၢ်ပီးတၢ်လီတဖၣ်န့ၣ်​ ပှၤမၤသီထီၣ်အီၤ ထီဘိအဃိ ပဝဲသ့ၣ်စ့ၢ်ကီး ပဘၣ်မၤသီထီၣ်ပ app ဒ်သိးကတုၤထီၣ်ထီၣ်ဘးဒီး ဒံၣ်ကၠံၣ်တဲၣ်​ တၢ်ပီးတၢ်လီအသီတဖၣ်အဂီၢ်. လၢ JW Library အပူၤန့ၣ်​ လံာ်လဲၢ်ဒီး တၢ်ကလုၢ်တဖၣ်​ အါထီၣ်ဝဲကွ့ၢ်ကွ့ၢ်အဃိ ပဘၣ်ကွၢ်ကတဲာ်ကတီၤဒီး မၤဂ့ၤထီၣ်​ ပစီးဝဲ (software) ထီဘိလီၤ.” လၢ JW Library အပူၤ ပမ့ၢ်ဒွးဃုာ် ကျိာ်ခဲလၢာ်န့ၣ်​ လံာ်လဲၢ်အိၣ်ဝဲ ၂၀၀,၀၀၀ ဃၣ်ဃၣ်​ ဒီးတၢ်ကလုၢ်ဒီးတၢ်ဂီၤမူအိၣ်ဝဲ ၆၀၀,၀၀၀ ဘျဲၣ်လီၤ.

 ဒ်သိး app ကဆဲးမၤတၢ်ဂ့ၤဂ့ၤထီဘိအဂီၢ် ပလိၣ်ဘၣ်အါထီၣ်​ ခီၣ်ဖၠူထၢၣ်​ အတၢ်ပီးတၢ်လီ (hardware) လီၤ. ပဘၣ်ပှ့ၤစ့ၢ်ကီး စီးဝဲ လဲးစ့ၤတဖၣ်​ (software licenses) လီၤ. လၢတနံၣ်အဂီၢ် လဲးစ့ၤတခါန့ၣ်​ အပှ့ၤအိၣ်ဝဲ ဒီလၣ်​ ၁,၅၀၀ (U.S.) လီၤ. တကးဒံးဘၣ်​ ဒ်သိးပှၤသူ app အံၤ လၢခီၣ်ဖၠူထၢၣ်, ထဲးဘလဲး ဒီးလီတဲစိအသီအပူၤတဖၣ်​ ကန့ၢ်ဝဲဂ့ၤဂ့ၤအဂီၢ် ပဘၣ်သူစ့လၢ MEPS Programming အဂီၢ်န့ၣ်​ တနံၣ်လီၤလဲဝဲ ဒီလၣ်​ ၁၀,၀၀၀ (U.S.) ဃၣ်ဃၣ်လီၤ.

 JW Library အဃိ တၢ်လၢာ်ဘူၣ်လၢာ်စ့ၤ ဘၣ်ဃးဒီး တၢ်စဲကျံးလံာ်, တၢ်ဆးလံာ် ဒီးတၢ်ဆှၢထီၣ်ဆှၢလီၤလံာ်လဲၢ်အဂီၢ်န့ၣ်​ စှၤလီၤဝဲဖးဒိၣ်ညါ. အဒိ, ဆိကမိၣ်ကွၢ် လံာ်လၢအမ့ၢ် တၢ်သမံသမိးလံာ်စီဆှံအဆၢကိးနံၤဒဲး တက့ၢ်. တၢ်သမံသမိးလံာ်စီဆှံအဆၢကိးနံၤဒဲး —၂၀၁၃ န့ၣ်​ ပစဲးကျံးထုးထီၣ်အီၤ အဘ့ၣ်​ ၁၂ ကကွဲၢ်ဃၣ်ဃၣ်ညါ. ဘၣ်ဆၣ်​ ဖဲပှၤကထုးထီၣ်​ လံာ်တဘ့ၣ်အံၤလၢ ၂၀၂၀ အဂီၢ်အခါ ပှၤစံၣ်တဲၤတဲလီၤတၢ်ဖိအနီၣ်ဂံၢ် အါထီၣ်ဝဲ ၇၀၀,၀၀၀ ဃၣ်ဃၣ်​ သနာ်က့ ပစဲးကျံးထုးထီၣ်ဒၣ်ထဲ အဘ့ၣ်​ ၅ ကကွဲၢ်ဃၣ်ဃၣ်လီၤ. ဘၣ်မနုၤအဃိလဲၣ်. မ့ၢ်လၢ ဆၢကတီၢ်ခဲအံၤ ပဒီပုၢ်ဝဲၢ်အါတက့ၢ်န့ၣ်​ ဖးဝဲ တၢ်သမံသမိးလံာ်စီဆှံအဆၢကိးနံၤဒဲးလၢ JW Library ပူၤအဃိလီၤ.  a

 JW Library န့ၣ်အဘျုးအိၣ်လၢ ပှၤလၢအသူဝဲတဖၣ်အဂီၢ်လၢ ကျဲအါမံၤလီၤ. ကၠဲနဘံၤလၢ အအိၣ်လၢ ကီၢ်ခဲနဒၣ်န့ၣ်​ တဲဝဲဒၣ်လၢ မ့ၢ်လၢ JW Library app အဃိ အဝဲမၤဝဲ အနီၢ်ကစၢ်တၢ်မၤလိ လံာ်စီဆှံ ထီဘိလီၤ. အဝဲတဲဒံးဝဲလၢ “ယမ့ၢ်ဘၣ်ပာ်ဖှိၣ်​ လံာ်လၢယလိၣ်ဘၣ်​ ကိးဘ့ၣ်ဒဲးလၢ တၢ်မၤလိအဂီၢ်န့ၣ်​ တမ့ၢ်လၢ ယကမၤလိတၢ် ကိးဂီၤဒဲးဘၣ်. ဘၣ်ဆၣ်​ မ့ၢ်လၢယသူ app အံၤအဃိန့ၣ်​ အိၣ်ဒၣ်ယဘၣ်ဟံးထီၣ်ဒၣ်ထဲ ယထဲးဘလဲးတဖျၢၣ်အံၤ ဒီးလံာ်လၢယလိၣ်ဘၣ်တဖၣ်န့ၣ်​ အိၣ်လၢအပူၤခဲလၢာ်လီၤ. ယမၤလိတၢ်ဒ်အံၤထီဘိအဃိ ယတၢ်နာ်ဂၢၢ်ကျၢၤထီၣ်​ ဒီးယဘူးဒိၣ်ထီၣ်ဒီး ယဟိဝၤယွၤလီၤ.”

 လီၤဆီဒၣ်တၢ် ဖဲခိၣ်ရိၤနၤတၢ်ဆါသံသတြိာ် ကဲထီၣ်အတီၢ်ပူၤ ပထံၣ်ဘၣ်လၢ app တခါအံၤအဘျုးအိၣ်ဝဲဒိၣ်မး. ခၠၣ်လ့ၤ လၢအိၣ်လၢ ကီၢ်အမဲရကၤန့ၣ်​ တဲဝဲလၢ “ခီဖျိလၢ ခိၣ်ရိၤနၤ တၢ်ဆါရၤလီၤအသးလၢ ဟီၣ်ခိၣ်ဒီဘ့ၣ်အဃိ ပတဒိးန့ၢ်ဘၣ်​ လံာ်လဲၢ်လၢပှၤစဲးကျံးအီၤန့ၣ်​ ကအိၣ်တနံၣ်ဘျဲၣ်လံ. ဘၣ်ဆၣ်​ မ့မ့ၢ်လၢ JW Library အပူၤလံာ်လဲၢ်တဖၣ်လၢ ပလိၣ်ဘၣ်အီၤလၢ ကမၤဂၢၢ်ကျၢၤထီၣ်ပတၢ်နာ်န့ၣ်​ ဟဲနုာ်လီၤဝဲထီဘိလီၤ. ယစံးဘျုးဘၣ်​ ယဟိဝၤယွၤလၢ အတၢ်ကတဲာ်ကတီၤလၢ အပှဲၤဒီးတၢ်အဲၣ်အံၤအဃိ.”

 ပှၤအါတက့ၢ်န့ၣ်​ တူၢ်ဘၣ်ဝဲဒ်သိး ဖ့ၤ လၢအအိၣ်လၢ ကီၢ်ဖံးလံးဖံ(စ်)လီၤ. အဝဲတဲဝဲလၢ “ယသူ app လၢအဂ့ၤဒိၣ်မးတခါအံၤ ဒ်သိးယကဘူးထီၣ်ဒီး ယဟိဝၤယွၤအဂီၢ်. ကိးဂီၤဒဲး တၢ်လၢယဖးအဆိကတၢၢ်န့ၣ်​ မ့ၢ်ဝဲ app အဝဲအံၤ. ဒီးဖဲယမၤ ဟံၣ်အတၢ်မၤအခါစ့ၢ်ကီး ယဒိကနၣ်​ app အဝဲအံၤလီၤ. တကးဒံးဘၣ်​ ဖဲယကတဲာ်ကတီၤလၢ တၢ်အိၣ်ဖှိၣ်အဂီၢ်မ့ၢ်ဂ့ၤ, ဖဲယကတဲာ်ကတီၤ တၢ်မၤလိလံာ်စီဆှံအခါမ့ၢ်ဂ့ၤ ယသူ app အဝဲအံၤလီၤ. ဖဲယချုးအဆၢကတီၢ် ယအိးထီၣ်ကွၢ် တၢ်ဂီၤမူဖဲန့ၣ်စ့ၢ်ကီး. ဖဲယအိၣ်ခိးတၢ်အခါစ့ၢ်ကီး ယဖးလံာ်လဲၢ်တဖၣ်​ မ့တမ့ၢ် လံာ်စီဆှံ. App တခါအံၤ အလုၢ်အပှ့ၤဒိၣ်မး.”

 App တခါအံၤ အဘျုးအိၣ်ဒိၣ်မးလၢ တၢ်စံၣ်တဲၤတဲလီၤတၢ်မၤအဂီၢ်စ့ၢ်ကီး. အဒိ, ဒီပုၢ်ဝဲၢ်မုၣ်​ အိၣ်လၢ ခဲမရိတဂၤ ဖဲအလဲၤစံၣ်တဲၤတဲလီၤတၢ်အခါ အဲၣ်ဒိးသူဝဲ လံာ်စီဆှံတဆၢလၢ အထံၣ်ဝဲ ဒီပုၢ်ဝဲၢ်မုၣ်တဂၤသူဝဲလၢ ပူၤကွံာ်စှၤကိာ်နွံအခါ. ဘၣ်ဆၣ်​ လံာ်စီဆှံတဆၢအံၤ အိၣ်ဖဲလဲၣ်န့ၣ်​ အဝဲတနီၣ်ဘၣ်ဝဲလၢၤဘၣ်. အဝဲတဲဝဲလၢ “ကိညၢ်လၢ ယနီၣ်ဘၣ်​ တၢ်ကတိၤတနီၤ. ယအိးထီၣ်​ app ဝံၤ ယဆီၣ်လီၤလံာ်စီဆှံ ဒီးယဒိလီၤတၢ်ကတိၤဖဲန့ၣ်​ ဒီးယထံၣ်လံာ်စီဆှံအဆၢဝဲန့ၣ်​ တဘျီဃီလီၤ. ဖဲယသူ app အံၤအခါ လံာ်စီဆှံအဆၢလၢ ယသးပ့ၤနီၣ်တဖၣ်န့ၣ်​ ယဃုက့ၤအီၤဘၣ်ဝဲ.”

 သုသူတၢ်ဟ့ၣ်တၢ်မၤဘူၣ် အကျိၤအကျဲလၢ donate.pr418.com ဒီးဟ့ၣ်လီၤတၢ်မၤဘူၣ်​ လၢတၢ်သူၣ်အိၣ်သးအိၣ်အပူၤအဃိ ပမၤဒိၣ်ထီၣ်, ကွၢ်ကတဲာ်ကတီၤ, ဒီးမၤဂ့ၤထီၣ်​ JW Library app လၢပဒီပုၢ်ဝဲၢ်မုၣ်​ ဒီပုၢ်ဝဲၢ်ခွါလၢ ဟီၣ်ခိၣ်ဒီဘ့ၣ်အဂီၢ်သ့ဝဲအဃိ ပစံးဘျုးဘၣ်သုဒိၣ်မး. တၢ်ဘျုးဒိၣ်မးလၢ သုဟ့ၣ်တၢ်လၢ တၢ်သူၣ်အိၣ်သးအိၣ်အပူၤအဃိ.

1. ၂၀၁၃ လါအီးကထိဘၢၣ်—ဖဲပှၤရၤလီၤ app အခါန့ၣ်ပၣ်ဃုာ်ဒီး ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ လၢဘၣ်တၢ်မၤဂ့ၤထီၣ်က့ၤအီၤ

2. ၂၀၁၅ လါယနူၤအါရံၤ—လံာ်လဲၢ်အဂၤတဖၣ်​ ပှၤပာ်ထီၣ်အီၤ အဆိကတၢၢ်လၢ ကိၤလၤဝါကျိာ် ဒီးလၢခံကျိာ်လၢအကယၤတဖၣ်

3. ၂၀၁၅ လါနိၣ်ဝ့ဘၢၣ်—ပှၤဖၢနုာ်အါထီၣ်​ တၢ်အလွဲၢ်တဖၣ်

4. ၂၀၁၆ လါမ့ၤ—ပှၤဖၢနုာ်အါထီၣ်​ တၢ်အိၣ်ဖှိၣ်ရိဖှိၣ်​ tab

5. ၂၀၁၇ လါမ့ၤ—ပှၤဖၢနုာ်အါထီၣ်​ တၢ်ပနီၣ်လၢ တၢ်ကွဲးနီၣ်အဂီၢ်

6. ၂၀၁၇ လါဒံၣ်စ့ဘၢၣ်—ပှၤဖၢနုာ်အါထီၣ်​ တၢ်မၤစၢၤလၢ လံာ်စီဆှံလၢတၢ်မၤလိအဂီၢ်

7. ၂၀၁၉ လါမၢ်ၡး—ပှၤဖၢနုာ်အါထီၣ်​ ပှၤဒီလိး တၢ်ကလုၢ်အဂီၢ်, ပှၤကွၢ်တၢ်ဂီၤမူ တဘျီဃီကသ့အဂီၢ် ဒီးလံာ်နဲၣ်ကျဲလၢ ကဃုသ့ၣ်ညါတၢ်အဂီၢ်

8. ၂၀၂၁ လါယနူၤအါရံၤ—ပှၤဖၢနုာ်အါထီၣ်တၢ်ပနီၣ်လၢ အိၣ်မူလီၤထူလီၤယိာ် ပှဲၤဒီးတၢ်သးခု အဂီၢ်