တၢ်သူၣ်စူၤသးစူၤ ကဲဘျုးလၢပဂီၢ်ဒ်လဲၣ်
စါရၤ * တဲဝဲလၢ “ယမ့ၢ်ပှၤလၢ အမဲာ်ဆှးသ့တဂၤ ဒီးယတနာ်န့ၢ်လီၤယသးအါအါဘၣ်. အဃိ ဖဲယအိၣ်ဒီး ပှၤလၢအနာ်န့ၢ်လီၤအသးအါမး ဒီးပှၤလၢအဃု တၢ်အ့ၣ်လိာ်အခါ ယအိၣ်တဘၣ်အါအါဘၣ်. ဘၣ်ဆၣ် ဖဲယအိၣ်ဒီး ပှၤလၢအသူၣ်စူၤသးစူၤ ဒီးအဆီၣ်လီၤအသးအခါ ယပာ်ယသး မုာ်မုာ်ခုၣ်ခုၣ်သ့ဝဲလီၤ. ဒီးပှၤဒ်န့ၣ်သ့ၣ်တဖၣ်န့ၣ် ညီလၢယကတဲဘၣ်အီၤ ယတၢ်တူၢ်ဘၣ် ဒီးယတၢ်ကီတၢ်ခဲတဖၣ်အဂီၢ်လီၤ. ယသကိးလၢ အဘူးဒီးယၤသ့ၣ်တဖၣ်န့ၣ် မ့ၢ်ပှၤဒ်န့ၣ်လီၤ.”
စါရၤအတၢ်ကတိၤတဖၣ်န့ၣ် ပာ်ဖျါထီၣ်ဝဲလၢ ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ပှၤဂၤကအဲၣ်ဒိး ဒီတံၤဒီသကိးဒီးပှၤလီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ယဟိဝၤယွၤ ဘၣ်သူၣ်ဘၣ်သးဝဲ ပှၤလၢအအိၣ်ဒီး တၢ်သူၣ်စူၤသးစူၤလီၤ. ကစၢ်ယွၤအကလုၢ်ကထါ ပာ်ဖျါထီၣ်ဝဲလၢ “ကူထီၣ်သိးထီၣ် . . . တၢ်သးစူၤ” တက့ၢ်. (ကလီးစဲ ၃:၁၂) တၢ်သူၣ်စူၤသးစူၤန့ၣ် မ့ၢ်မနုၤလဲၣ်. ယ့ၣ်ၡူးပာ်ဖျါထီၣ်ဝဲ တၢ်သူၣ်စူၤသးစူၤ ဒ်လဲၣ်. ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ဘၣ်မနုၤအဃိ ပကအိၣ်ဒီး တၢ်သးခု အါထီၣ်လဲၣ်.
တၢ်သူၣ်စူၤသးစူၤန့ၣ် မ့ၢ်မနုၤလဲၣ်
တၢ်သူၣ်စူၤသးစူၤန့ၣ် မ့ၢ်ဝဲပအိၣ်ဒီးတၢ်ဃူတၢ်ဖိး လၢပသးပူၤလီၤ. ပှၤလၢအအိၣ်ဒီး တၢ်သူၣ်စူၤသးစူၤတဂၤန့ၣ် ရ့ဒီးပှၤဂၤလၢ တၢ်အဲၣ်တၢ်ကွံအပူၤ ဒီးတရ့ဒီးပှၤဂၤဆူၣ်ဆူၣ်ကိၤကိၤဘၣ်. တၢ်လၢအမၤတံာ်တာ်အသး မ့ၢ်အိၣ်ဒၣ်လဲာ် အဝဲပာ်အသးမုာ်မုာ်ခုၣ်ခုၣ်လီၤ.
နမ့ၢ်အိၣ်ဒီး တၢ်သူၣ်စူၤသးစူၤန့ၣ် အခီပညီတမ့ၢ်လၢ နမ့ၢ်ပှၤလၢ အဂံၢ်စၢ်ဘါစၢ်ဘၣ်.လၢလံာ်စီဆှံအပူၤ ကြံးအတၢ်ကတိၤလၢအမ့ၢ် တၢ်သူၣ်စူၤသးစူၤန့ၣ် အဲၣ်ဒိးပာ်ဖျါထီၣ်ဝဲ ကသ့ၣ်မံၤလၢ အဘၣ်တၢ်မၤဘှါအီၤတဒုလီၤ. ကသ့ၣ်မံၤတဒုအံၤ ပှၤသိၣ်လိအီၤ ဒ်သိးအကပၢၤဃာ် အတၢ်ဂံၢ်တၢ်ဘါဘၣ်ဆၣ် အဂံၢ်အဘါတလီၤစှၤဘၣ်. ဒ်န့ၣ်အသိး ဖဲပပာ်ဖျါထီၣ်တၢ်သူၣ်စူၤသးစူၤအခါ ပပၢၤပတၢ်သးအဲၣ်ဒိးလၢ အတဂ့ၤ ဒီးပၢၤဃာ်တၢ်ဃူတၢ်ဖိးဒီးပှၤဂၤလီၤ.
ဘၣ်သ့ၣ်သ့ၣ် ပကဆိကမိၣ်လီၤပသးလၢ ‘ယတမ့ၢ်ပှၤလၢ အအိၣ်ဒီးတၢ်သူၣ်စူၤသးစူၤဘၣ်.’ ဘၣ်မနုၤအဃိလဲၣ်. မ့ၢ်လၢပှၤအါဂၤန့ၣ် အအဲၣ်တၢ်အ့ၣ်လိာ်ဆိးက့လိာ် ဒီးတအိၣ်ဒီးတၢ်သးစူၤဘၣ်အဃိ ကီလၢပကပာ်ဖျါထီၣ် တၢ်သူၣ်စူၤသးစူၤလီၤ. (ရိမ့ၤ ၇:၁၉) အဃိ ဒ်သိးပကမၤဒိၣ်ထီၣ်အါထီၣ် တၢ်သူၣ်စူၤသးစူၤအဂီၢ် ပကဘၣ်ထဲးဂံၢ်ထဲးဘါ သပှၢ်ကတၢၢ်လီၤ. ဘၣ်ဆၣ် ယဟိဝၤယွၤအသးစီဆှံ ကမၤစၢၤပှၤ ဒ်သိးပကဆဲးပာ်ဖျါထီၣ် တၢ်သူၣ်စူၤသးစူၤအဂီၢ်လီၤ. (ကလၤတံ ၅:၂၂, ၂၃) ဘၣ်မနုၤအဃိ ပကြၢးမၤဒိၣ်ထီၣ်အါထီၣ် တၢ်သူၣ်စူၤသးစူၤလဲၣ်.
တၢ်သူၣ်စူၤသးစူၤန့ၣ် မ့ၢ်ဝဲတၢ်ဂ့ၤတၢ်ဝါတခါလၢ အထုးန့ၢ်ပှၤဂၤအသးလီၤ. ဒ်စါရၤ တဲဖျါထီၣ်တ့ၢ်ဝဲအသိး ပဝဲသ့ၣ်တဖၣ် ပအဲၣ်ဒိးရ့ဒီးပှၤလၢ အအိၣ်ဒီးတၢ်သူၣ်စူၤသးစူၤတဖၣ်လီၤ. ယ့ၣ်ၡူးမ့ၢ် ပှၤဒိဂ့ၤတဲာ်ဘၣ်တဂၤလၢ အအိၣ်ဒီးတၢ်သူၣ်စူၤသးစူၤဒီး တၢ်ဝံသးစူၤလီၤ. (၂ ကရံၣ်သူး ၁၀:၁) ဖိသၣ်လၢ အတသ့ၣ်ညါအီၤတဖၣ်ဒၣ်လဲာ် အဲၣ်ဒိးရ့လိာ်သးဒီးအီၤလီၤ.—မၢ်ကူး ၁၀:၁၃-၁၆.
တၢ်သူၣ်စူၤသးစူၤန့ၣ် ကဲဘျုးလၢပဂီၢ် တကးဒံးဘၣ် ကဲဘျုးစ့ၢ်ကီးလၢ ပှၤလၢပခိၣ်ပဃၢၤတဖၣ် အဂီၢ်လီၤ. ပမ့ၢ်အိၣ်ဒီးတၢ်သူၣ်စူၤသးစူၤန့ၣ် ပတသးထီၣ်တၢ်ချ့ချ့ ဒီးတမၤဆၢက့ၤတၢ်လၢ တၢ်သူၣ်ဒိၣ်သးဖျိးအပူၤ တဘျီဃီဘၣ်. (ကတိၤဒိ ၁၆:၃၂) ဒီးခီဖျိလၢ ပတမၤကမၣ်ဘၣ် ပှၤတဂၤဂၤ လီၤဆီဒၣ်တၢ် ပှၤလၢပအဲၣ်အီၤတဖၣ်အဃိ ပတတူၢ်ဘၣ် တၢ်သူၣ်အုးသးအုးဘၣ်. ဒီးခီဖျိလၢ ပပၢၤပသး ဒီးပတမၤဘၣ်ဒိပှၤဂၤဘၣ်အဃိ ကဲဘျုးလၢပှၤဂၤ အဂီၢ်လီၤ.
ပှၤအဒိဂ့ၤတဲာ်ဘၣ်လၢ အပာ်ဖျါထီၣ် တၢ်သူၣ်စူၤသးစူၤ
ယ့ၣ်ၡူးအတၢ်မၤအါ ဒီးအိၣ်ဒီးမူဒါတဖၣ်အါမး ဘၣ်ဆၣ်အဝဲပာ်ဖျါထီၣ် တၢ်သူၣ်စူၤသးစူၤလၢ ပှၤကိးဂၤဒဲးအဖီခိၣ်လီၤ. ဖဲယ့ၣ်ၡူးအစိၤန့ၣ် ပှၤအါဂၤလၢအအိၣ်ဒီး တၢ်ဝံတၢ်ယိး ဒီးလီၤဘှံးလီၤတီၤတဖၣ်န့ၣ် လိၣ်ဘၣ်တၢ်အိၣ်ဘှံးလီၤ. ဖဲယ့ၣ်ၡူးတဲအဝဲသ့ၣ်လၢ “ဟဲဆူယအိၣ်တက့ၢ်. . . . အဂ့ၢ်ဒ်အံၤ, ယသးစူၤ, ဒီးယသးဆီၣ်လီၤယသး” အခါ အဝဲသ့ၣ်ကသးမုာ်ထီၣ်က့ၤဒိၣ်မးလီၤ.—မးသဲ ၁၁:၂၈, ၂၉.
ပပာ်ဖျါထီၣ် တၢ်သူၣ်စူၤသးစူၤ ဒ်ယ့ၣ်ၡူးအသိး ကသ့ဒ်လဲၣ်. ပမၤသ့ခီဖျိ ပမၤလိကစၢ်ယွၤအကလုၢ်ကထါ လၢအဘၣ်ဃးဒီး ယ့ၣ်ၡူးရ့ဒီးပှၤဂၤဒ်လဲၣ် ဒီးဖဲအဝဲထံၣ်ဘၣ် တၢ်ကီတၢ်ခဲ အဆၢကတီၢ်ဒၣ်လဲာ် အမၤဝဲဒ်လဲၣ်န့ၣ်လီၤ. ဒီးဖဲပထံၣ်ဘၣ် တၢ်အိၣ်သးလၢ အကဲထီၣ်တၢ်မၤကွၢ် လၢပကပာ်ဖျါထီၣ် တၢ်သူၣ်စူၤသးစူၤအခါ ပကဘၣ် ဂုာ်ကျဲးစၢးမၤဒ် ယ့ၣ်ၡူးအသိးလီၤ. (၁ ပ့းတရူး ၂:၂၁) ဆိကမိၣ်ကွၢ် တၢ်ဂ့ၢ်သၢမံၤလၢ အမၤစၢၤယ့ၣ်ၡူး ဒ်သိးအကအိၣ်ဒီး တၢ်သူၣ်စူၤသးစူၤအဂီၢ်န့ၣ်တက့ၢ်.
ယ့ၣ်ၡူးမ့ၢ် ပှၤလၢအအိၣ်ဒီး တၢ်ဆီၣ်လီၤသးနီၢ်ကီၢ်. ယ့ၣ်ၡူးတဲဝဲလၢ “ယသးစူၤ, ဒီးယသးဆီၣ်လီၤယသးလီၤ.” (မးသဲ ၁၁:၂၉) မ့ၢ်လၢတၢ်သူၣ်စူၤသးစူၤန့ၣ် အခီပညီ ဘူးကလီၤဂာ်လိာ်အသးဒီး တၢ်ဆီၣ်လီၤသးအဃိ လံာ်စီဆှံ ပာ်ဖျါထီၣ်ဝဲ တၢ်ဂ့ၢ်တၢ်ဝါခံမံၤအံၤ တပူၤဃီလီၤ.—အ့းဖ့းစူး ၄:၁-၃.
တၢ်ဆီၣ်လီၤသးန့ၣ် ကမၤစၢၤပှၤဒ်သိး ပသုတထံၣ်လီၤပသးလၢ ပမ့ၢ်ပှၤလၢအရ့ဒိၣ်တလၢ ဒီးပသုတသးဘၣ်ဒိ ညီညီတဂ့ၤအဂီၢ်လီၤ. ယ့ၣ်ၡူးန့ၣ် ဖဲပှၤတဲဆါအီၤလၢအမ့ၢ်ပှၤ “အီၣ်လုၣ်ကိတၢ်, ဒီးပှၤအီစပံးထံ” အခါ အဝဲမၤဝဲဒ်လဲၣ်. အဝဲသ့ၣ်တဲတၢ် ကမၣ်န့ၣ် ယ့ၣ်ၡူးပာ်ဖျါထီၣ်ဝဲ ခီဖျိလၢ အတၢ်မၤတဖၣ်လီၤ. မ့ၢ်လၢယ့ၣ်ၡူးအိၣ်ဒီး တၢ်ဆီၣ်လီၤသးအဃိ လၢတၢ်သူၣ်စူၤသးစူၤအပူၤ အဝဲတဲဝဲလၢ “တၢ်ကူၣ်ဘၣ်ကူၣ်သ့န့ၣ် ဘၣ်တၢ်ပာ်တီပာ်လိၤအီၤလၢ အဖိ [မ့တမ့ၢ် အတၢ်မၤ] ဒၣ်ဝဲလီၤ.”—မးသဲ ၁၁:၁၉.
ခီဖျိလၢ နကလုာ်ဒူၣ်, နတၢ်အိၣ်မူလၢ အပူၤကွံာ် ဒီးနကဲပိာ်မုၣ် မ့တမ့ၢ် ပိာ်ခွါအဃိ ပှၤဂၤမ့ၢ်တဲဆါနၤန့ၣ် မ့ၢ်အကီလၢ နကအိၣ်ဒီး တၢ်သူၣ်စူၤသးစူၤဧါ. ဖံထၢၤလၢအမ့ၢ် တၢ်အိၣ်ဖှိၣ်သးပှၢ်တဂၤ လၢအအိၣ်လၢ ကလံၤထံး အၤဖြံၤကၤန့ၣ် တဲဝဲလၢ “ဖဲယသးအ့န့လၢ ပှၤတဂၤဂၤ အတၢ်ကတိၤအဃိအခါ ယသံကွၢ်လီၤယသးလၢ ‘ယ့ၣ်ၡူးမ့ၢ်ထံၣ်ဘၣ် တၢ်အိၣ်သးအံၤန့ၣ် အဝဲကမၤဆၢဝဲဒ်လဲၣ်.’ ဒီးယသ့ၣ်ညါလၢ ယတဘၣ်ဆိကမိၣ်လီၤယသး လၢယမ့ၢ်ပှၤလၢ အရ့ဒိၣ်အါတလၢဘၣ်.”
ယ့ၣ်ၡူးနၢ်ပၢၢ်ဝဲ ပှၤဟီၣ်ခိၣ်ဖိတဖၣ် အတၢ်လီၤတူာ်လီၤကာ်လီၤ. ယ့ၣ်ၡူးအပျဲၢ်အဘီၣ်တဖၣ်န့ၣ် အဲၣ်ဒိးမၤ တၢ်လၢအဘၣ်ဘၣ်ဆၣ် မ့ၢ်လၢအဝဲသ့ၣ် တလၢတပှဲၤအဃိ အဝဲသ့ၣ် တမၤတၢ်အဘၣ် ထီဘိဘၣ်. အဒိ တချုးယ့ၣ်ၡူးသံအနၤန့ၣ် ယ့ၣ်ၡူးမၢ စီၤပ့းတရူး, စီၤယၤကိာ် ဒီးစီၤယိၤဟၣ် ဆိးသီဒီးအီၤဘၣ်ဆၣ် အဝဲသ့ၣ် မံဘၣ်အသးလီၤ. သနာ်က့ ယ့ၣ်ၡူးပာ်ဖျါထီၣ်ဝဲလၢ အနၢ်ပၢၢ်စၢၤအဝဲသ့ၣ် ခီဖျိအတဲဝဲလၢ “သးတမံၤအသးအိၣ်, မ့မ့ၢ်တၢ်ဖံးတၢ်ညၣ် အဂံၢ်စၢ်အဘါစၢ်လီၤ.” (မးသဲ ၂၆:၄၀, ၄၁) မ့ၢ်လၢယ့ၣ်ၡူး သ့ၣ်ညါဝဲလၢ အတၢ်မၢဖိတဖၣ် တလၢတပှဲၤဘၣ်အဃိ အဝဲအသးတအ့န့ အဝဲသ့ၣ်ဘၣ်.
ဒီပုၢ်ဝဲၢ်မုၣ်မဲဒံၤန့ၣ် လၢညါ အမ့ၢ်ပှၤတဂၤလၢ အဃုပှၤဂၤ အတၢ်ကမၣ်ထီဘိ ဘၣ်ဆၣ် ခဲအံၤအဝဲ ဂုာ်ကျဲးစၢးကွၢ်လိမၤဒိးဝဲ ယ့ၣ်ၡူးအတၢ်သူၣ်စူၤသးစူၤလီၤ. အဝဲတဲဝဲလၢ “ယဂုာ်ကျဲးစၢး သ့ၣ်နီၣ်ထီၣ်လၢ ပှၤဟီၣ်ခိၣ်ဖိကိးဂၤဒဲးန့ၣ် မ့ၢ်ပှၤလၢအတလၢတပှဲၤဘၣ် ဒီးယဂုာ်ကျဲးစၢးကွၢ်လၢ ပှၤဂၤအတၢ်ဂ့ၤတၢ်ဝါတခီ ဒ်ယဟိဝၤယွၤ အသိးလီၤ.” ယ့ၣ်ၡူးအတၢ်နၢ်ပၢၤစၢၤ ပှၤဟီၣ်ခိၣ်ဖိ အတၢ်လီၤတူာ်လီၤကာ်န့ၣ် မ့ၢ်အမၤစၢၤနၤ ဒ်သိးနကရ့ဒီးပှၤဂၤ လၢတၢ်သူၣ်စူၤသးစူၤအပူၤဧါ.
ယ့ၣ်ၡူးပာ်ထီၣ် အတၢ်ကီတၢ်ခဲ လၢကစၢ်ယွၤအစုပူၤ. ဖဲယ့ၣ်ၡူးအိၣ်လၢ ဟီၣ်ခိၣ်အခါ ပှၤရ့ဒီးအီၤ တတီတလိၤဘၣ်. ပှၤထံၣ်ကမၣ်အီၤ, ပှၤတပာ်ကဲအီၤဘၣ် ဒီးပှၤမၤအၢမၤနးအီၤလီၤ. ဘၣ်ဆၣ်မ့ၢ်လၢ “အအးလီၤအသးလၢ ပှၤစံၣ်ညီၣ်တၢ်တီတဂၤအစုပူၤ” အဃိ အဝဲဆဲးအိၣ်ဒီး တၢ်သူၣ်စူၤသးစူၤလီၤ. (၁ ပ့းတရူး ၂:၂၃) ယ့ၣ်ၡူးသ့ၣ်ညါဝဲလၢ အပၢ်လၢမူခိၣ် ကမၤစၢၤအီၤဒ်သိး အကအိၣ်ဒီး တၢ်တူၢ်န့ၢ်ခီၣ်ကဲ ဒီးအဆၢကတီၢ်မ့ၢ်ဘၣ်န့ၣ် ကစံၣ်ညီၣ်ဝဲ ပှၤလၢအရ့အီၤ အၢအၢသီသီတဖၣ်န့ၣ်လီၤ.
ပှၤမ့ၢ်တရ့ဒီးပှၤ တီတီလိၤလိၤ ဒီးပမ့ၢ်မၤဆၢက့ၤအီၤလၢ တၢ်သးထီၣ်အပူၤန့ၣ် ဘၣ်သ့ၣ်သ့ၣ် ပတၢ်အိၣ်သး ကနးထီၣ်လီၤ. လၢတၢ်န့ၣ်အဃိ လံာ်စီဆှံ ဟ့ၣ်ပလီၢ်ပှၤလၢ “ပှၤကညီအသးဒိၣ်ထီၣ်န့ၣ်, တမၤဘၣ် ယွၤအတၢ်တီတၢ်လိၤဘၣ်.” (ယၤကိာ် ၁:၂၀) တဘျီတခီၣ် ပသးထီၣ်တၢ် အလီၢ်မ့ၢ်ဘၣ်ဘၣ်ဆၣ် မ့ၢ်လၢပတလၢတပှဲၤဘၣ်အဃိ ပမၤဆၢဘၣ်က့ၤတၢ်လၢ ကျဲလၢအကမၣ် သ့ဝဲလီၤ.
ဒီပုၢ်ဝဲၢ်မုၣ်ခဲသံၤ လၢအအိၣ်လၢ ကီၢ်ကၠၢမနံၣ်န့ၣ် လၢညါအဆိကမိၣ်ဝဲလၢ ‘နမ့ၢ်တအိၣ်ဆၢထၢၣ်လၢ နနီၢ်ကစၢ်အဂီၢ်ဘၣ်န့ၣ် ပှၤလၢကဆၢထၢၣ်လၢနဂီၢ် တအိၣ်နီတဂၤဘၣ်.’ ဘၣ်ဆၣ် ဖဲအဝဲသ့ၣ်ညါထီၣ်လၢ အကဘၣ် သန့ၤအသး လၢယဟိဝၤယွၤအခါ အတၢ်ပာ်သူၣ်ပာ်သးအံၤ ဆီတလဲဝဲလီၤ. အဝဲတဲဝဲလၢ “မ့ၢ်လၢယသ့ၣ်ညါလၢ ယဟိဝၤယွၤ ကမၤဘၣ်ထီၣ်က့ၤ တၢ်တတီတလိၤခဲလၢာ်အဃိ ယမၤဆၢက့ၤတၢ်လၢ တၢ်သူၣ်စူၤသးစူၤအပူၤသ့လီၤ.” ဖဲပှၤရ့ဒီးနၤ တတီတလိၤဘၣ်အခါ နမ့ၢ်ကွၢ်လိမၤဒိးယ့ၣ်ၡူးလၢ အသန့ၤအသး လၢကစၢ်ယွၤန့ၣ် ကမၤစၢၤနၤဒ်သိး နကအိၣ်ဒီး တၢ်သူၣ်စူၤသးစူၤအဂီၢ်လီၤ.
‘ပှၤလၢအသးစူၤတဖၣ်န့ၣ် သးခုဝဲလီၤ’
ဖဲပထံၣ်ဘၣ်ဒီး တၢ်အိၣ်သးကီခဲအခါ တၢ်သူၣ်စူၤသးစူၤ ကမၤစၢၤပှၤဒ်လဲၣ်.
ယ့ၣ်ၡူးတဲဝဲလၢ ပမ့ၢ်အဲၣ်ဒိးအိၣ်ဒီး တၢ်သးခုန့ၣ် ပကဘၣ်မ့ၢ်ပှၤလၢ အသူၣ်စူၤသးစူၤလီၤ. အဝဲတဲဝဲလၢ ‘ပှၤလၢအသးစူၤတဖၣ်န့ၣ် သးခုဝဲလီၤ.’ (မးသဲ ၅:၅) ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ကကဲဘျုးဒ်လဲၣ်.
ဖဲတၢ်ဘၣ်ဂံာ်ဂူာ် အိၣ်ထီၣ်လၢ တၢ်ဆီဟံၣ်ဆီဃီအပူၤအခါ တၢ်သူၣ်စူၤသးစူၤ ကမၤစၢၤပှၤဒ်သိး ပကမၤဘၣ်ဂီၢ်က့ၤ တၢ်ဂ့ၢ်ကီအဂီၢ်လီၤ. ဒီပုၢ်ဝဲၢ်ရီဘၢၤ လၢအအိၣ်လၢ ကီၢ်အီးစတြ့လံယါန့ၣ် တဲဝဲလၢ “ယတဲဘၣ်တၢ်ကတိၤအါမးလၢ အမၤဆါယမါအသး ဘၣ်ဆၣ် ယတတိာ်ပာ် လၢယကတဲ ဒ်န့ၣ်ဘၣ်. တၢ်ကတိၤလၢ နတဲအီၤ ဖဲနသးထီၣ်တၢ်အခါန့ၣ် နဟံးန့ၢ်က့ၤအီၤ တန့ၢ်လၢၤဘၣ်. ယထံၣ်ဘၣ်လၢ အဝဲအသးဘၣ်ဒိဒိၣ်မးအဃိ ယသးတမုာ်ဘၣ်.”
ပဝဲခဲလၢာ် “ပမၤကမၣ်တၢ်အါမံၤ” ခီဖျိလၢ ပတၢ်စံးတၢ်ကတိၤလီၤ. မ့ၢ်လၢပတဲတၢ် တချုးလၢ ပဆိကမိၣ်ထံအီၤအဃိ အဒုးအိၣ်ထီၣ် တၢ်ကီတၢ်ခဲ လၢပတၢ်ဆီဟံၣ်ဆီဃီအပူၤ သ့ဝဲလီၤ. (ယၤကိာ် ၃:၂) ဖဲန့ၣ်အဆၢကတီၢ် တၢ်သူၣ်စူၤသးစူၤ ကမၤစၢၤပှၤဒ်သိး ပကပာ်ပသး မုာ်မုာ်ခုၣ်ခုၣ် ဒီးပကပၢၤ ပထးခိၣ်အဂီၢ်လီၤ.—ကတိၤဒိ ၁၇:၂၇.
ရီဘၢၤ ဂုာ်ကျဲးစၢးထဲးဂံၢ်ထဲးဘါ ဒ်သိးအကအိၣ်ဒီး တၢ်ကီၤသူၣ်ကီၤသး ဒီးကပာ်အသး မုာ်မုာ်ခုၣ်ခုၣ်အဂီၢ်လီၤ. အဝဲတဲဝဲလၢ “ခဲအံၤ ဖဲယၤဒီးယမါ ပသးမ့ၢ်တလီၤပလိာ်အခါ ယဂုာ်ကျဲးစၢး ဒိကနၣ်အီၤ လီၤတံၢ်လီၤဆဲး, တဲတၢ်ဒီးအီၤ လၢတၢ်သူၣ်စူၤသးစူၤ ဒီးယတသးဒိၣ်ထီၣ်တၢ်ဘၣ်. အဃိ ယတၢ်ရ့လိာ်သးဒီးယမါန့ၣ် ဂ့ၤထီၣ်အါန့ၢ်ဒံး လၢညါလီၤ.”
တၢ်သူၣ်စူၤသးစူၤ မၤစၢၤပှၤဒ်သိး ပတၢ်ရ့လိာ်သးဒီးပှၤဂၤ ကဂ့ၤအါထီၣ်အဂီၢ်လီၤ. ပှၤလၢအသးထီၣ်တၢ် ညီညီတဖၣ်န့ၣ် အသကိးတအိၣ်အါအါဘၣ်. ဘၣ်ဆၣ် ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ကမၤစၢၤပှၤဒ်သိးပက ‘ဟံးဃာ်ပသး . . . လၢတၢ်ဃူတၢ်ဖိး အတၢ်စၢဃာ်အပူၤ’ အဂီၢ်လီၤ. (အ့းဖ့းစူး ၄:၂, ၃) ခဲသံၤ လၢဘၣ်တၢ်ပာ်ဖျါထီၣ်အဂ့ၢ် ဖဲမကၢာ်န့ၣ် တဲဝဲလၢ “ပှၤတနီၤန့ၣ် ယရ့ဘၣ်အီၤမ့ၢ်ကီဒၣ်လဲာ် မ့ၢ်လၢယအိၣ်ဒီး တၢ်သူၣ်စူၤသးစူၤအဃိ ယဟးရ့ပှၤဂၤ မုာ်မးလီၤ.”
ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ပကဒိးန့ၢ်ဘၣ် တၢ်သူၣ်မံသးမုာ်လီၤ. လံာ်စီဆှံ ပာ်ဖျါထီၣ်ဝဲလၢ “တၢ်ကူၣ်ဘၣ်ကူၣ်သ့လၢထး” န့ၣ်ဘၣ်ထွဲလိာ်အသးဒီး တၢ်သူၣ်စူၤသးစူၤ ဒီးတၢ်မုာ်တၢ်ဖိးလီၤ. (ယၤကိာ် ၃:၁၃, ၁၇) ပှၤလၢအအိၣ်ဒီး တၢ်သူၣ်စူၤသးစူၤန့ၣ်မ့ၢ် “ပှၤအသးမုာ်” လီၤ. (ကတိၤဒိ ၁၄:၃၀) မၤတ့ၤလၢ အဂုာ်ကျဲးစၢး မၤအါထီၣ် အတၢ်သူၣ်စူၤသးစူၤန့ၣ် တဲဝဲလၢ “ခဲအံၤန့ၣ် ယတမၢဆူၣ်ပှၤဂၤလၢ ကဘၣ်မၤဝဲဒ်သိး ယအဲၣ်ဒိးဝဲအသိး ထီဘိဘၣ် အဃိယဒိးန့ၢ်ဘၣ် တၢ်သူၣ်မံသးမုာ် ဒီးယသးခုအါထီၣ်လီၤ.”
ဒ်သိးပကကဲထီၣ် ပှၤလၢအအိၣ်ဒီး တၢ်သူၣ်စူၤသးစူၤအဂီၢ် ပကဘၣ်ဂုာ်ကျဲးစၢး သပှၢ်ကတၢၢ်လီၤ. ဒီပုၢ်ဝဲၢ်ခွါတဂၤ တဲဝဲလၢ “ယမ့ၢ်ဘၣ်တဲတီတီန့ၣ် တုၤလၢခဲအံၤဒၣ်လဲာ် တဘျီတခီၣ်န့ၣ် ယသးပှံၢ်ထီၣ်တၢ်ဒိၣ်မးလီၤ.” ဘၣ်ဆၣ် ယဟိဝၤယွၤ လၢအဟ့ၣ်ဂံၢ်ဟ့ၣ်ဘါပှၤ လၢပကမၤအါထီၣ် တၢ်သူၣ်စူၤသးစူၤန့ၣ် ကမၤစၢၤပှၤလီၤ. (ယၡါယၤ ၄၁:၁၀; ၁ တံၤမသ့း ၆:၁၁) အဝဲ “ကမၤလၢထီၣ်ပှဲၤထီၣ်” ဒီးကမၤ “ဆူၣ်ထီၣ်ချ့ထီၣ်” ပှၤလီၤ. (၁ ပ့းတရူး ၅:၁၀) ဒီးဒ်တၢ်မၢဖိပီလူးအသိး ပကွၢ်လိမၤဒိး “ခရံာ် အတၢ်သူၣ်စူၤသးစူၤ, ဒီးအတၢ်ဝံသးစူၤ” ကသ့ဝဲလီၤ.—၂ ကရံၣ်သူး ၁၀:၁.
^ လံာ်အဆၢ. 2 ပှၤမံၤတနီၤ ဘၣ်တၢ်ဆီတလဲအီၤလီၤ.
^ လံာ်အဆၢ. 3 တၢ်သူၣ်စူၤသးစူၤန့ၣ် လၢကညီလံာ်စီဆှံအပူၤ မ့ၤစံၣ်ကွဲးကျိာ်ထံဝဲလၢ “တၢ်ဆီၣ်လီၤပသး” လီၤ.
တၢ်ဂ့ၤအဂၤလၢ နကဘၣ်သး
တၢးထီခိးတၢ်—လံာ်လၢတၢ်မၤလိအဂီၢ်
တၢ်မၤဂ့ၤတၢ် ပမၤဒိၣ်ထီၣ် တၢ်ဂ့ၤတၢ်ဝါတခါအံၤ ကသ့ဒ်လဲၣ်
တၢ်မၤဂ့ၤတၢ်န့ၣ် မ့ၢ်မနုၤလဲၣ်, ဘၣ်မနုၤအဃိ ပကဘၣ် ဂုာ်ကျဲးစၢးမၤဒိၣ်ထီၣ် တၢ်ဂ့ၤတၢ်ဝါတခါအံၤလဲၣ်
