ပှၤသးစၢ်သ့ၣ်ဧၢ ဒုးဆၢက့ၤ မုၣ်ကီၤလံၢ်ဒူဒူတက့ၢ်
“သိးထီၣ်ယွၤ အစုကဝဲၤခဲလၢာ်, ဒ်သိးသုတြီမုၣ်ကီၤလံၢ် အတၢ်လီတၢ်ဝ့ၤ ကသ့န့ၣ်တက့ၢ်.”—အ့းဖ့းစူး ၆:၁၁.
၁, ၂. (က) ဘၣ်မနုၤအဃိ ခရံာ်ဖိသးစၢ်တဖၣ် မၤနၢၤဝဲမုၣ်လီၤလံၢ် ဒီးအတၢ်ဝံတၢ်နါတဖၣ် သ့ဝဲလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) ပကတဲသကိးတၢ်ဂ့ၢ် မနုၤတဖၣ်လဲၣ်.
တၢ်မၢဖိပီလူး ထိၣ်သတြီၤဝဲ ခရံာ်ဖိတဖၣ်ဒီးသုးဖိလီၤ. ပအိၣ်လၢတၢ်ဒုးပျီအပူၤ ဒီးပဒုၣ်ပဒါန့ၣ် တမ့ၢ်ပှၤဟီၣ်ခိၣ်ဖိဘၣ် မ့ၢ်ဝဲမုၣ်ကီၤလံၢ် ဒီးတၢ်ဝံတၢ်နါတဖၣ်လီၤ. အဝဲသ့ၣ်တဖၣ်န့ၣ် မ့ၢ်တ့ၢ်သုးဖိအိၣ်လၢ အနံၣ်လၢအကထိတဖၣ်လံ ဒီးအဝဲသ့ၣ် ဒုးတၢ်ဖၠဲးမးလီၤ. လၢတၢ်န့ၢ်အဃိ ဖျါလၢပဝဲခရံာ်ဖိ လီၤဆီဒၣ်တၢ် ပှၤသးစၢ်သ့ၣ်တဖၣ် ဒုးနၢၤ အဝဲသ့ၣ်တညီဘၣ်. မ့ၢ်ပှၤသးစၢ်တဖၣ် မၤနၢၤဝဲအဒုၣ်အဒါလၢ အဂံၢ်ဆူၣ်တဖၣ်အံၤကသ့ဧါ. သ့ဝဲလီၤ ဒီးအဝဲသ့ၣ်အါတဂၤန့ၣ် မၤနၢၤတၢ်လံ. ဘၣ်မနုၤအဃိ အဝဲသ့ၣ်မၤနၢၤဝဲသ့လဲၣ်. မ့ၢ်လၢအဝဲသ့ၣ် ဒိးန့ၢ်ဘၣ်တၢ်ဂံၢ်တၢ်ဘါလၢ ယဟိဝၤယွၤ အအိၣ်အဃိလီၤ. တကးဒံးဘၣ် ဒ်သုးဖိတဖၣ်လၢ အဒိးန့ၢ်ဘၣ်တၢ်သိၣ်လိ ဂ့ၤဂ့ၤအသိး အဝဲသ့ၣ် “သိးထီၣ်ယွၤ အစုကဝဲၤခဲလၢာ်” ဒ်သိးကကတဲာ်ကတီၤအသးလၢ တၢ်ဒုးအဂီၢ်န့ၣ်လီၤ.—ဖး အ့းဖ့းစူး ၆:၁၀-၁၂ တက့ၢ်.
၂ ဖဲစီၤပီလူးတဲဝဲ တၢ်ကတိၤဒိအံၤအခါ ဘၣ်သ့ၣ်သ့ၣ် အဝဲကဆိကမိၣ်ဝဲ ဘၣ်ဃးရိမ့ၤသုးဖိတဖၣ် အတၢ်ကူတၢ်သိး ဒီးအစုကဝဲၤတဖၣ်အဂ့ၢ်လီၤ. (မၤတၢ် ၂၈:၁၆) လၢတၢ်မၤလိအံၤအပူၤ ပကတဲသကိး တၢ်အဒိအံၤလီၤ. ဒီးပကတဲသကိးစ့ၢ်ကီး ပှၤသးစၢ်တဖၣ် အတၢ်လဲၤခီဖျိလၢ အဝဲသ့ၣ် ကကူထီၣ်သိးထီၣ် နီၢ်သးအသုးဖိ အကူအသိးတဖၣ်အံၤအဂီၢ် ကီခဲဝဲထဲလဲၣ် ဒီးခီဖျိလၢ သိးထီၣ်ဝဲအဃိ ကဲဘျုးလၢအဝဲသ့ၣ်အဂီၢ် ဒ်လဲၣ်အဂ့ၢ်န့ၣ်လီၤ.
မ့ၢ်နသိးထီၣ် နီၢ်သးအတၢ်ကူးတၢ်သိး ဒီးအစုကဝဲၤ တခါစုာ်စုာ်ဧါ
“ကံၢ်တူာ်သုယီၢ်ဒ့ ဒီးတၢ်မ့ၢ်တၢ်တီ”
၃, ၄. တၢ်မ့ၢ်တၢ်တီလၢ လံာ်စီဆှံအပူၤန့ၣ် လီၤဂာ်လိာ်အသးဒီး ရိမ့ၤသုးဖိတဖၣ် အယီၢ်တကိးဒ်လဲၣ်.
၃ ဖး အ့းဖ့းစူး ၆:၁၄ တက့ၢ်. ရိမ့ၤအသုးဖိ အယီၢ်တကိးန့ၣ် အိၣ်ဒီးထးလၢ ကဒီသဒၢဝဲ သုးဖိအယီၢ်ဒ့ ဒီးတီဃာ်ဝဲ သုးဖိအဆ့သဃိးလၢအဃၢအံၤ ဒ်သိးအကဖှံလီၤအဂီၢ်လီၤ. တကးဒံးဘၣ် ယီၢ်တကိးတနီၤန့ၣ် အိၣ်ဒီးတၢ်လီၢ်လၢ ပှၤဘျးလီၤ နးဒီးဒီဖိအလီၢ်န့ၣ်လီၤ. သုးဖိတဖၣ် မ့ၢ်သိးထီၣ်ဃာ် ယီၢ်တကိးဃံးဃံးန့ၣ် ကမၤစၢၤအဝဲသ့ၣ် ဒ်သိးကလဲၤဒုးတၢ်လၢ တၢ်သူၣ်ဒူသးဒူအပူၤလီၤ.
တၢ်မ့ၢ်တၢ်တီလၢ ပမၤလိဘၣ်လၢ လံာ်စီဆှံအပူၤန့ၣ် ကဒီသဒၢပှၤလၢ တၢ်သိၣ်လိလၢအကမၣ်
၄ ဒ်ယီၢ်တကိး ဒီသဒၢဝဲသုးဖိအသိး တၢ်မ့ၢ်တၢ်တီလၢ ပမၤလိဘၣ်လၢလံာ်စီဆှံအပူၤတဖၣ်န့ၣ် ဒီသဒၢပှၤလၢ တၢ်သိၣ်လိနဲၣ်လိလၢ အကမၣ်တဖၣ်လီၤ. (ယိၤဟၣ် ၈:၃၁, ၃၂; ၁ ယိၤဟၣ် ၄:၁) ပတၢ်အဲၣ် လံာ်စီဆှံ တၢ်မ့ၢ်တၢ်တီတဖၣ် မ့ၢ်အါထီၣ်န့ၣ် ပအိၣ်မူမၤထွဲဒ် ယွၤအတၢ်သိၣ်တၢ်သီအသိး မ့တမ့ၢ် ပကသိးထီၣ် “သဃိး” အဂီၢ်ကညီထီၣ်ဝဲလီၤ. (စံးထီၣ်ပတြၢၤ ၁၁၁:၇, ၈; ၁ ယိၤဟၣ် ၅:၃) တကးဒံးဘၣ် ပနၢ်ပၢၢ်တၢ်မ့ၢ်တၢ်တီ မ့ၢ်အါထီၣ်န့ၣ် ပဒုးဆၢက့ၤ ပဒုၣ်ပဒါကသ့ အါထီၣ်စ့ၢ်ကီးလီၤ.—၁ ပ့းတရူး ၃:၁၅.
၅. ဘၣ်မနုၤအဃိ ပကဘၣ်တဲ တၢ်မ့ၢ်တၢ်တီထီဘိလဲၣ်.
၅ တၢ်မ့ၢ်တၢ်တီလၢ လံာ်စီဆှံအပူၤတဖၣ်န့ၣ် မ့ၢ်တၢ်လၢအရ့ဒိၣ်လၢ ပဂီၢ်ဒိၣ်မးအဃိ ပဒိကနၣ်တၢ်လၢ လံာ်စီဆှံတဲဝဲတဖၣ် ဒီးပတဲတၢ်တီတီလိၤလိၤ ထီဘိလီၤ. ဘၣ်မနုၤအဃိလဲၣ်. မ့ၢ်လၢတၢ်လံၣ်တၢ်လီန့ၣ် မ့ၢ်ဝဲမုၣ်ကီၤလံၢ် အစုကဝဲၤလၢ အလ့ပစီပှၤန့ၢ် အါကတၢၢ်အကျါတခါလီၤ. တၢ်လံၣ်တၢ်လီန့ၣ် မၤဘၣ်ဒိဝဲပှၤလၢ အတဲလံၣ်တဲလီတၢ်တဂၤ တကးဒံးဘၣ် မၤဘၣ်ဒိစ့ၢ်ကီး ပှၤလၢအနာ်ဝဲ တၢ်လံၣ်တၢ်လီအံၤန့ၣ်လီၤ. (ယိၤဟၣ် ၈:၄၄) ပတမ့ၢ် ပှၤလၢပှၤပှဲၤသနာ်က့ ပဂုာ်ကျဲးစၢး တဲတၢ်မ့ၢ်တၢ်တီထီဘိလီၤ. (အ့းဖ့းစူး ၄:၂၅) ဘၣ်ဆၣ် ပကမၤဒ်န့ၣ်အဂီၢ် ကကီဝဲလီၤ. အဘံၤကဲ(လ်) လၢ အသးအိၣ် ၁၈ နံၣ်န့ၣ်တဲဝဲလၢ “ပမ့ၢ်တဲတၢ်မ့ၢ်တၢ်တီန့ၣ် ဖျါလၢအဘျုးတအိၣ် ထီဘိဘၣ်. မ့ၢ်လၢတဘျီတခီၣ် နမ့ၢ်တဲလံၣ်တဲလီတၢ်န့ၣ် နတထံၣ်ဘၣ် တၢ်ကီတၢ်ခဲဘၣ်.” ဘၣ်ဆၣ် ဘၣ်မနုၤအဃိ အဝဲတဲတၢ်မ့ၢ်တၢ်တီထီဘိလဲၣ်. အဝဲတဲဝဲလၢ “ဖဲယတဲတၢ်မ့ၢ်တၢ်တီအခါ ယအိၣ်ဒီးသးလၢ အသ့ၣ်ညါဒၣ်တၢ်လၢအကဆှီ လၢယဟိဝၤယွၤအမဲာ်ညါ ဒီးယမိၢ်ယပၢ် ဒီးယတံၤသကိးတဖၣ်စ့ၢ်ကီး နာ်န့ၢ်ယၤသ့ဝဲလီၤ.” ဒီးဝံးထိရံယါလၢ အသးအိၣ် ၂၃ နံၣ်န့ၣ်တဲဝဲလၢ “နမ့ၢ်တဲတၢ်မ့ၢ်တၢ်တီ ဒီးဆၢထၢၣ်ဂၢၢ်ကျၢၤလၢ နတၢ်စူၢ်တၢ်နာ်အဂီၢ်န့ၣ် ပှၤကမၤမဲာ်ဆှးနၤ ဘၣ်ဆၣ် နမၤဒ်န့ၣ်န့ၣ် အဘျုးအိၣ်ဝဲဒိၣ်မးလီၤ. အဒိ, နတၢ်သးဒူကအါထီၣ်, နကဘူးထီၣ်ဒီး ယဟိဝၤယွၤ ဒီးပှၤလၢအအဲၣ်နၤန့ၣ် ကပာ်ကဲနၤလီၤ.” ဘၣ်မနုၤအဃိ အရ့ဒိၣ်လၢ ပကဘၣ်သိးထီၣ် “တၢ်တီတၢ်လိၤအသဃိး” ထီဘိလဲၣ်န့ၣ် နသ့ၣ်ညါလံဧါ.
ကံၢ်တူာ်သုယီၢ်ဒ့ ဒီးတၢ်မ့ၢ်တၢ်တီ (ကွၢ်လံာ်အဆၢ ၃-၅)
“တၢ်တီတၢ်လိၤအသဃိး”
၆, ၇. ဘၣ်မနုၤအဃိ တၢ်တီတၢ်လိၤန့ၣ် ဘၣ်တၢ်ထိၣ်သတြီၤ အီၤဒီး သဃိးလဲၣ်.
၆ သဃိးလၢ ရိမ့ၤသုးဖိတဖၣ် သိးဝဲလၢအသးနါပှၢ်န့ၣ် အါတက့ၢ် ဘၣ်တၢ်တ့အီၤလၢထးလၢ ပှၤမၤက့ၣ်အီၤတစဲး ဒ်သိးကကးဘၢဃာ် သုးဖိအသးနါပှၢ် ဂ့ၤဂ့ၤအဂီၢ်လီၤ. သဃိးန့ၣ် ဘၣ်တၢ်မၤအီၤဒီးထး တကဘျၣ်တကဘျၣ် ဒီးဘၣ်တၢ်ဘျးဃာ်အီၤဃံးဃံးဒီး ပျံၤလၢဘၣ်တၢ်မၤအီၤလၢ တၢ်ဖံးတဖၣ်လီၤ. ဒီးလၢအဖံဘၣ်ခိၣ်တကူာ်န့ၣ် ဘၣ်တၢ်မၤဘၢအီၤဒီး ထးအကဘျၣ်အါမး ဒီးအစဲဘူးလိာ်သးဒီး ပျံၤလၢဘၣ်တၢ်မၤအီၤလၢ တၢ်ဖံးစ့ၢ်ကီးလီၤ. အဝဲမ့ၢ်သိးသဃိးအံၤန့ၣ် ဟူးဝဲတညီအါအါဘၣ် ဒီးထီဘိန့ၣ် အဝဲဘၣ်ကွၢ်ဝဲလၢ မ့ၢ်ထးအကဘျၣ်တဖၣ်အိၣ်လၢ အလီၢ်ဧါတအိၣ်ဧါန့ၣ်လီၤ. ဘၣ်ဆၣ် သဃိးအံၤ ကဒီသဒၢဝဲအသးဒီး အက့ၢ်အဂီၤအဂၤလၢအဒွဲပူၤ ဒ်သိးအသုတဘၣ်ဒီး နးဒီးပျၢ်အခိၣ်တဂ့ၤန့ၣ်လီၤ.
ပတၢ်သ့တၢ်ဘၣ် တအိၣ်လၢ ပကဒီသဒၢလီၤ ပသးအဂီၢ်ဘၣ်
၇ ဒ်သုးဖိ အသဃိးအသိး ယဟိဝၤယွၤ အတၢ်သိၣ်တၢ်သီလၢ အတီအလိၤတဖၣ်အံၤ ဒီသဒၢပ “သး” လီၤ. (ကတိၤဒိ ၄:၂၃) သုးဖိတဂၤ တဆီတလဲဝဲ အသဃိးထးလၢအကျၢၤအံၤ ဆူသဃိးထးလၢ အတကျၢၤဒိၣ်ဒိၣ်န့ၣ်ဘၣ်. ဒ်န့ၣ်အသိး ပတဆိကမိၣ်လၢ ပတၢ်ထံၣ်န့ၣ်ဂ့ၤန့ၢ် ယဟိဝၤယွၤ အတၢ်သိၣ်တၢ်သီတဖၣ်ဘၣ်. ပသ့ၣ်ညါလၢ ပတအိၣ်ဒီး တၢ်သ့တၢ်ဘၣ်လၢ ပကဒီသဒၢလီၤပသးဘၣ်. (ကတိၤဒိ ၃:၅, ၆) လၢတၢ်န့ၣ်အဃိ မ့ၢ်ပ “သဃိး” ဒီသဒၢပသးဒံးဧါန့ၣ် ပကဘၣ် သမံသမိးလီၤက့ၤအီၤ ထီဘိလီၤ.
၈. ဘၣ်မနုၤအဃိ ပဘၣ်ဒိကနၣ် ယဟိဝၤယွၤ အတၢ်သိၣ်တၢ်သီလဲၣ်.
၈ တဘျီတခီၣ်န့ၣ် မ့ၢ်နတူၢ်ဘၣ်လၢ ယဟိဝၤယွၤ အတၢ်သိၣ်တၢ်သီန့ၣ် မၤလီၤမၢ်ကွံာ် နတၢ်သဘျ့တဖၣ် မ့တမ့ၢ် တြီနၤလၢ နကမၤတၢ်ဖဲ နအဲၣ်ဒိးမၤသ့ၣ်တဖၣ်ဧါ. ဒဲနံၣ်ယၢၤလၢ အသးအိၣ် ၂၁ နံၣ်န့ၣ်တဲဝဲလၢ “မ့ၢ်လၢယအိၣ်မူ မၤထွဲလံာ်စီဆှံ အတၢ်ဟံးစုနဲၣ်ကျဲအဃိ ယသရၣ် သရၣ်မုၣ် ဒီးယတံၤသကိးလၢကၠိတဖၣ် မၤမဲာ်ဆှးယၤလီၤ. လၢတၢ်န့ၣ်အဃိ ယတၢ်နာ်န့ၢ်လီၤသး တအိၣ်လၢၤဘၣ် ဒီးယသးလီၤစၢ်လီၤ.” ဘၣ်ဆၣ်ခဲအံၤ အဝဲတူၢ်ဘၣ်ဝဲဒ်လဲၣ်. အဝဲတဲဝဲလၢ “လၢခံယထံၣ်ဘၣ်လၢ ယအိၣ်မူမၤထွဲ ယဟိဝၤယွၤ အတၢ်သိၣ်တၢ်သီန့ၣ် ကဲဘျုးဝဲလီၤ. ယ ‘တံၤသကိး’ တနီၤန့ၣ် အဝဲသ့ၣ်စးထီၣ်သူဝဲ တၢ်မူၤတၢ်ဘှီး ဒီးတနီၤန့ၣ် ဟးထီၣ်ကွံာ်လၢကၠိလီၤ. အဝဲသ့ၣ် ကဲထီၣ်ဒ်အံၤအဃိ ယသးတမုာ်ဘၣ်. ယဟိဝၤယွၤန့ၣ် ဒီသဒၢပှၤအနီၢ်ကီၢ်လီၤ.” မဲဒံၣ်စ့ လၢအသးအိၣ် ၁၅ နံၣ်န့ၣ်တဲဝဲလၢ “ယကမၤထွဲ ယွၤအတၢ်သိၣ်တၢ်သီ ဒီးဟးဆှဲး တၢ်မုာ်တၢ်ပၠီၣ်လၢ ယသကိးတဖၣ် မၤဝဲန့ၣ် တညီစ့ၢ်ကီးဘၣ်.” အဃိအဝဲမၤဝဲဒ်လဲၣ်. “ယတဲလီၤယသးလၢ မ့ၢ်လၢယဘၣ်တၢ်ကိးယၤလၢ ယဟိဝၤယွၤအမံၤအဃိ မုၣ်ကီၤလံၢ် ကဒုးယၤဒ်အံၤလီၤ. ဖဲယမၤနၢၤကွံာ် တၢ်လ့ပစီအခါ ယသူၣ်မံသးမုာ်ဒိၣ်မးလီၤ.”
တၢ်တီတၢ်လိၤအသဃိး (ကွၢ်လံာ်အဆၢ ၆-၈)
“ဖျီၣ်သုခီၣ်ဒီး တၢ်သးခုအကစီၣ် ဘၣ်ဃးဒီး တၢ်ဃူတၢ်ဖိး”
၉-၁၁. (က) ခရံာ်ဖိတဖၣ် အခီၣ်ဖံးန့ၣ် မ့ၢ်မနုၤလဲၣ်. (ခ) ဒ်သိးပစံၣ်တဲၤတဲလီၤတၢ် ကညီထီၣ်အဂီၢ် တၢ်မနုၤမၤစၢၤပှၤသ့လဲၣ်.
၉ ဖး အ့းဖ့းစူး ၆:၁၅ တက့ၢ်. ရိမ့ၤသုးဖိတဖၣ် ကလဲၤဒုးတၢ်အဂီၢ် လိၣ်ဘၣ်ဝဲခီၣ်ဖံးလီၤ. အဝဲသ့ၣ်အခီၣ်ဖံးန့ၣ် ဘၣ်တၢ်မၤအီၤလၢ တၢ်အဖံးသၢကထြၢအဃိ ကျၢၤဝဲဒိၣ်မးလီၤ. ဒီးခီၣ်ဖံးအံၤ ပှၤဒိးအီၤမုာ်ဒိၣ်မးအဃိ သုးဖိတဖၣ်ကဟးဘၣ်ဝဲ ဂ့ၤဂ့ၤဘၣ်ဘၣ် ဒီးတလီၤဃံၢ်ညီညီဘၣ်.
၁၀ ဒ်ခီၣ်ဖံးမၤစၢၤဝဲ သုးဖိတဖၣ်လၢ ကမၤနၢၤ တၢ်ဒုးအသိး နီၢ်သးခီၣ်ဖံးစ့ၢ်ကီး ကမၤစၢၤပှၤလၢ ပကစံၣ်တဲၤတဲလီၤ “တၢ်သးခုအကစီၣ် ဘၣ်ဃးဒီး တၢ်ဃူတၢ်ဖိး” အဂီၢ်လီၤ. (ယၡါယၤ ၅၂:၇; ရိမ့ၤ ၁၀:၁၅) ဘၣ်ဆၣ် တဘျီတခီၣ်န့ၣ် ဒ်သိး ပကစံၣ်တဲၤတဲလီၤတၢ်အဂီၢ် ပလိၣ်ဘၣ် တၢ်သူၣ်ဒူသးဒူလီၤ. ဘိၤ လၢအသးအိၣ်အနံၣ် ၂၀ န့ၣ်တဲဝဲလၢ “လၢညါယစံၣ်တဲၤတဲလီၤ ယတံၤသကိးလၢ ကၠိတဖၣ်တဘူၣ်ဘၣ်. ယဆိမိၣ်မ့ၢ်လၢ ယမဲာ်ဆှးအဃိလီၤ. ဘၣ်မနုၤအဃိ ယမဲာ်ဆှးလဲၣ်န့ၣ် ယတသ့ၣ်ညါဘၣ်. ဘၣ်ဆၣ် ခဲအံၤယစံၣ်တဲၤတဲလီၤ ယတံၤသကိးတဖၣ်ဘူၣ်လံ.”
၁၁ ပှၤသးစၢ်အါဂၤ တဲဝဲလၢ အဝဲသ့ၣ်မ့ၢ်အိၣ် ကတဲာ်ကတီၤအသးလၢ တၢ်စံၣ်တဲၤတဲလီၤ အဂီၢ်ဂ့ၤဂ့ၤန့ၣ် အဝဲသ့ၣ် ကစံၣ်တဲၤတဲလီၤတၢ်အဂီၢ် ညီထီၣ်ဝဲဒိၣ်မးလီၤ. နအိၣ်ကတဲာ်ကတီၤနသး ကသ့ဒ်လဲၣ်. ကၠူလယါ လၢအသးအိၣ် ၁၆ နံၣ်တဂၤ တဲဝဲလၢ “ယလဲၤစိာ်တၢ်အိၣ်ဖှိၣ် အလံာ်လဲၢ်တဖၣ်လၢ ယထၢၣ်ပူၤ ဒီးယဒိကနၣ် ယတံၤသကိးလၢတီၤပူၤတဖၣ် အတၢ်နာ် ဒီးအတၢ်ထံၣ်လီၤ. ဒီးလၢခံ ယဆိကမိၣ်ထီၣ်တၢ်ဂ့ၢ်လၢ ကမၤစၢၤအဝဲသ့ၣ်န့ၣ်လီၤ. ယမ့ၢ်အိၣ်ကတဲာ်ကတီၤယသးန့ၣ် ယတဲဘၣ်အဝဲသ့ၣ် တၢ်ဂ့ၢ်လၢအကဲဘျုးလၢ အဝဲသ့ၣ်အဂီၢ်သ့ဝဲလီၤ.” မၢၤခဲစံၤ လၢအသးအိၣ် ၂၃ နံၣ်တဂၤစ့ၢ်ကီး တဲဝဲလၢ “နသးမ့ၢ်ဂ့ၤဒီး နမ့ၢ်ဒိကနၣ်တၢ်လၢ အဝဲသ့ၣ်တဲဝဲန့ၣ် နကသ့ၣ်ညါဘၣ် တၢ်ကီတၢ်ခဲလၢ အဝဲသ့ၣ်ထံၣ်ဘၣ်ဝဲတဖၣ်လီၤ. ယဂုာ်ကျဲးစၢးဖး လံာ်လဲၢ်ခဲလၢာ်လၢ ဘၣ်တၢ်ထုးထီၣ်အီၤလၢ ပှၤသးစၢ်တဖၣ်အဂီၢ်လီၤ. မ့ၢ်လၢယမၤဒ်န့ၣ်အဃိ ယပၠးအဝဲသ့ၣ် တၢ်ဂ့ၢ်တၢ်ကျိၤလၢ ကမၤစၢၤအဝဲသ့ၣ်လၢ jw.org အပူၤသ့ဝဲလီၤ.” ပမ့ၢ်အိၣ်ကတဲာ်ကတီၤ ပသးဂ့ၤဂ့ၤလၢ တၢ်စံၣ်တဲၤတဲလီၤ တၢ်မၤအဂီၢ်န့ၣ် လီၤဂာ်ဒ်သိး ပဒိးထီၣ် “ခီၣ်ဖံး” တခိၣ်လၢအဘၣ်ဒီးပခီၣ် ဂ့ၤဂ့ၤန့ၣ်လီၤ.
ဖျီၣ်သုခီၣ်ဒီး တၢ်သးခုအကစီၣ် (ကွၢ်လံာ်အဆၢ ၉-၁၁)
“တၢ်နာ်အကတီၤ”
၁၂, ၁၃. မုၣ်ကီၤလံၢ် “အပျၢ်မ့ၣ်အူ” တနီၤန့ၣ် မ့ၢ်မနုၤလဲၣ်.
၁၂ ဖး အ့းဖ့းစူး ၆:၁၆ တက့ၢ်. ရိမ့ၤသုးဖိတဖၣ် စိာ်ဝဲကတီၤဖးဒိၣ်လၢ အအိၣ်လွံၢ်နၢၣ်န့ၣ်လီၤ. ကတီၤအံၤ မၤဘၢအီၤစးထီၣ်လၢ အဖံဘၣ်ခိၣ်တုၤလီၤလၢ အခီၣ်လ့ၢ်ခိၣ် ဒ်သိးနး, ဘီ ဒီးပျၢ်သုတဘၣ်အီၤ တဂ့ၤအဂီၢ်လီၤ.
၁၃ မုၣ်ကီၤလံၢ် ခးပှၤဒီး “ပျၢ်မ့ၣ်အူ” မနုၤတဖၣ်လဲၣ်. ဘၣ်သ့ၣ်သ့ၣ် မုၣ်ကီၤလံၢ် ကသူဝဲ တၢ်လံၣ်တၢ်လီ ဘၣ်ဃးဒီး ယဟိဝၤယွၤအဂ့ၢ် ဒ်သိးကဒုးတၢ်ဒီး နၤအဂီၢ်လီၤ. မုၣ်ကီၤလံၢ်အဲၣ်ဒိးလၢ နကတူၢ်ဘၣ်လၢ ယဟိဝၤယွၤ တအဲၣ်နၤဘၣ် ဒီးပှၤတအဲၣ်နၤ နီတဂၤဘၣ်. အံဒၤ လၢအသးအိၣ် ၁၉ နံၣ်န့ၣ်တဲဝဲလၢ “အါဘျီယတူၢ်ဘၣ်လၢ ယတဘူးဒီးယဟိဝၤယွၤဘၣ် ဒီးအဝဲတအဲၣ်ဒိးကဲ ယတံၤသကိးဘၣ်.” ဖဲအဝဲတူၢ်ဘၣ်ဒ်န့ၣ်အခါ အဝဲမၤဝဲဒ်လဲၣ်. “တၢ်အိၣ်ဖှိၣ်ရိဖှိၣ်န့ၣ် မၤဂၢၢ်ကျၢၤထီၣ်ဝဲ ယတၢ်နာ်လီၤ. ညီနုၢ်န့ၣ် ယလဲၤဆ့ၣ်နီၤဒီး ယတဟ့ၣ်တၢ်စံးဆၢဘၣ် မ့ၢ်လၢယဆိကမိၣ်လၢ ပှၤတအဲၣ်ဒိးနၢ်ဟူ ယတၢ်စံးဆၢ နီတဂၤဘၣ်အဃိလီၤ. ဘၣ်ဆၣ်ခဲအံၤ ယကတဲာ်ကတီၤပာ်စၢၤလၢ တၢ်အိၣ်ဖှိၣ်အဂီၢ် ဒီးဂုာ်ကျဲးစၢး ဟ့ၣ်ထီၣ်တၢ်စံးဆၢ ခံဘျီသၢဘျီလီၤ. ယကမၤဒ်န့ၣ်အဂီၢ် တညီဘၣ် ဘၣ်ဆၣ် ယဒိးန့ၢ်ဘၣ်တၢ်သးခုလီၤ. တကးဒံးဘၣ် ဒီပုၢ်ဝဲၢ်တဖၣ် ဟ့ၣ်ဂံၢ်ဟ့ၣ်ဘါယၤလီၤ. ထီဘိန့ၣ် ဖဲယလဲၤထီၣ် တၢ်အိၣ်ဖှိၣ်ဝံၤ ယဟဲက့ၤအခါ ယတူၢ်ဘၣ်လၢ ယဟိဝၤယွၤအဲၣ်ယၤလီၤ.”
၁၄. ပမ့ၢ်ကွၢ် အံဒၤ အတၢ်လဲၤခီဖျိန့ၣ် ပဟံးန့ၢ်တၢ်မၤလိ မနုၤသ့လဲၣ်.
၁၄ သုးဖိတဖၣ်အကတီၤန့ၣ် တဒိၣ်ထီၣ်ဘၣ် ဒီးတဆံးလီၤစ့ၢ်ကီးဘၣ်. ဘၣ်ဆၣ် ပမ့ၢ်ကွၢ် အံဒၤ အတၢ်လဲၤခီဖျိန့ၣ် ပသ့ၣ်ညါဘၣ်လၢ ခရံာ်ဖိတဖၣ် အတၢ်နာ်အကတီၤန့ၣ် ဆီတလဲအသးသ့ဝဲလီၤ. ပတၢ်နာ်န့ၣ် ဆူၣ်ထီၣ် မ့တမ့ၢ် လီၤစၢ်သ့ဝဲလီၤ. ပတၢ်နာ် ကဒိၣ်ထီၣ်ဧါ, ကစှၤလီၤဧါန့ၣ် ဒိးသန့ၤထီၣ်အသးလၢ ပတၢ်ဃုထၢအဖီခိၣ်လီၤ. (မးသဲ ၁၄:၃၁; ၂ သ့းစၤလနံ ၁:၃) ဒ်သိးပ “တၢ်နာ်အကတီၤ” ကဒီသဒၢပှၤအဂီၢ် ပကဘၣ်ဆဲးမၤဆူၣ်ထီၣ် ဒီးမၤအါထီၣ်ပတၢ်နာ်လီၤ.
တၢ်နာ်အကတီၤ (ကွၢ်လံာ်အဆၢ ၁၂-၁၄)
“တၢ်အုၣ်က့ၤခီၣ်က့ၤအခိၣ်ကုာ်”
၁၅, ၁၆. ပတၢ်မုၢ်လၢ်န့ၣ် လီၤဂာ်ဒီး ခိၣ်ဖျီၣ်လၢကျဲဒ်လဲၣ်.
၁၅ ဖး အ့းဖ့းစူး ၆:၁၇ တက့ၢ်. ရိမ့ၤသုးဖိတဖၣ်န့ၣ် ဖျီၣ်ဝဲခိၣ်ကုာ် မ့တမ့ၢ် ခိၣ်ဖျီၣ်လၢ ကဒီသဒၢ အခိၣ်, အကိာ်ဘိ ဒီးအမဲာ်သၣ်အဂီၢ်န့ၣ်လီၤ. တဘျီတခီၣ် ခိၣ်ကုာ်န့ၣ် အိၣ်ဒီးအစုဖီၣ်အဃိ သုးဖိတဖၣ် စိာ်ဝဲလၢစုသ့ဝဲလီၤ.
၁၆ ဒ်ခိၣ်ဖျီၣ်ထး ဒီသဒၢဝဲ သုးဖိအခိၣ်နူာ်အသိး ပ “တၢ်မုၢ်လၢ်ဘၣ်ဃးဒီး တၢ်အုၣ်က့ၤခီၣ်က့ၤ အခိၣ်ကုာ်” န့ၣ်ကဒီသဒၢ ပတၢ်ဆိကမိၣ်လီၤ. (၁ သ့းစၤလနံ ၅:၈; ကတိၤဒိ ၃:၂၁) တၢ်မုၢ်လၢ်န့ၣ် မၤစၢၤပှၤဒ်သိး ပကသးစၢၢ်ဆၢ ကစၢ်ယွၤအတၢ်အၢၣ်လီၤ ဒီးကမၤစၢၤပှၤဒ်သိး ဖဲပထံၣ်ဘၣ် တၢ်ကီတၢ်ခဲအခါ ပသးသုတလီၤစၢ်တဂ့ၤအဂီၢ်လီၤ. (စံးထီၣ်ပတြၢၤ ၂၇:၁, ၁၄; မၤတၢ် ၂၄:၁၅) ဒ်သိး “ခိၣ်ကုာ်” ကဒီသဒၢပှၤအဂီၢ် ပတဘၣ်စိာ်အီၤလၢပစုဘၣ် ပကဘၣ်ဖျီၣ်အီၤလၢပခိၣ်လီၤ. ဒ်န့ၣ်အသိး ပမ့ၢ်အဲၣ်ဒိးလၢ ပတၢ်မုၢ်လၢ်ကဒီသဒၢပှၤန့ၣ် ပကဘၣ်နာ်လၢ ပတၢ်မုၢ်လၢ် မ့ၢ်တၢ်နီၢ်ကီၢ်တခါလီၤ.
၁၇, ၁၈. (က) ဒ်သိးပကဘ့ၣ်လီၤကွံာ် ပခိၣ်ဖျီၣ်အဂီၢ် မုၣ်ကီၤလံၢ်မၤဝဲဒ်လဲၣ်. (ခ) မုၣ်ကီၤလံၢ် ကွဲန့ၢ်လွဲန့ၢ်ပှၤ တန့ၢ်ဘၣ်န့ၣ် ပပာ်ဖျါထီၣ်အီၤ ကသ့ဒ်လဲၣ်.
၁၇ ဒ်သိးပကဘ့ၣ်လီၤကွံာ် ပခိၣ်ဖျီၣ်အဂီၢ် မုၣ်ကီၤလံၢ် ကွဲန့ၢ်လွဲန့ၢ်ပှၤဒ်လဲၣ်. ဆိကမိၣ်ကွၢ် အဝဲလ့ပစီဝဲ ယ့ၣ်ၡူးဒ်လဲၣ်န့ၣ်တက့ၢ်. မုၣ်ကီၤလံၢ် သ့ၣ်ညါလၢ ယ့ၣ်ၡူးကပၢဘၣ် ဟီၣ်ခိၣ်လီၤ. ဘၣ်ဆၣ်ဒ်သိး ယ့ၣ်ၡူးကကဲဘၣ် စီၤပၤအဂီၢ် အဝဲကဘၣ် တူၢ်ဆါအသး ဒီးကဘၣ်သံဝဲလီၤ. ဒီးတကးဒံးဘၣ် အဝဲကဘၣ်အိၣ်ခိးဝဲတုၤလၢ မုၢ်နံၤလၢ ယဟိဝၤယွၤ ပာ်ပနီၣ်ဝဲ တနံၤမ့ၢ်တုၤမး အဝဲကကဲဘၣ်စီၤပၤလီၤ. လၢတၢ်န့ၣ်အဃိ မုၣ်ကီၤလံၢ် လ့ပစီအီၤဒ်သိး အဝဲကပၢဘၣ်တၢ်လၢ အဆိအချ့အဂီၢ်လီၤ. မုၣ်ကီၤလံၢ် အၢၣ်လီၤဝဲလၢ ယ့ၣ်ၡူးမ့ၢ်ဘါလီၤအီၤ ထဲတဘျီဧိၤန့ၣ် အဝဲကပၢဘၣ် ဟီၣ်ခိၣ်တဘျီဃီလီၤ. (လူၤကၣ် ၄:၅-၇) မုၣ်ကီၤလံၢ်သ့ၣ်ညါဝဲလၢ ယဟိဝၤယွၤအၢၣ်လီၤဝဲလၢ ကဟ့ၣ်ပှၤတၢ်ဆိၣ်ဂ့ၤအါမးလၢ ဟီၣ်ခိၣ်သီအပူၤန့ၣ်လီၤ. ဘၣ်ဆၣ်ဒ်သိး တၢ်အၢၣ်လီၤအံၤ ကဟဲလၢထီၣ်ပှဲၤထီၣ်အဂီၢ် ပကဘၣ်အိၣ်ခိး ဒီးဖဲပအိၣ်ခိးတၢ်အဆၢကတီၢ် ပကထံၣ်ဘၣ် တၢ်ကီတၢ်ခဲအါမးလီၤ. လၢတၢ်န့ၣ်အဃိ ဆၢကတီၢ်ခဲအံၤ မုၣ်ကီၤလံၢ် လ့ပစီပှၤဒ်သိး ပကဃုထၢလၢ ပကအိၣ်ဘၣ်မုာ်မုာ်ခုၣ်ခုၣ် တစိၢ်တလီၢ်လီၤ. အဝဲအဲၣ်ဒိးလၢ ပကဃုဆိတၢ်အဂၤ ဒ်သိးပကအိၣ်ဘၣ် မုာ်မုာ်ခုၣ်ခုၣ် ဒီးပာ်ယွၤအဘီအမုၢ်လၢ နီၣ်ဂံၢ်ခံန့ၣ်လီၤ.—မးသဲ ၆:၃၁-၃၃.
၁၈ ပှၤသးစၢ်အါဂၤန့ၣ် မုၣ်ကီၤလံၢ် ကွဲန့ၢ်လွဲန့ၢ်အီၤတန့ၢ်ဘၣ်. အဒိ, ခံၤအါနၤ လၢအသးအိၣ်အနံၣ် ၂၀ န့ၣ်တဲဝဲလၢ “ယသ့ၣ်ညါလၢ ထဲဒၣ်ယွၤအဘီအမုၢ်တခါဧိၤန့ၣ် ကမၤလီၤမၢ်ကွံာ်ဝဲ ပတၢ်ကီတၢ်ခဲ ခဲလၢာ်လီၤ.” အတၢ်မုၢ်လၢ်အံၤ ကဲဘျုးလၢ အဂီၢ်ဒ်လဲၣ်. အတၢ်မုၢ်လၢ်အံၤ မၤစၢၤအီၤဒ်သိး အဝဲကသ့ၣ်နီၣ်ထီၣ်ဝဲလၢ တၢ်အိၣ်လၢဟီၣ်ခိၣ်တဖၣ်အံၤ ကအိၣ်ထဲတစိၢ်တလီၢ်လီၤ. လၢတၢ်န့ၣ်အဃိ အဝဲကဃု တၢ်ဖံးတၢ်မၤဂ့ၤဂ့ၤအလီၢ် အဝဲသူဝဲအတၢ်ဆၢကတီၢ် ဒီးအတၢ်ဂံၢ်တၢ်ဘါ လၢကမၤယဟိဝၤယွၤ အတၢ်မၤအဂီၢ်လီၤ.
တၢ်အုၣ်က့ၤခီၣ်က့ၤအခိၣ်ကုာ် (ကွၢ်လံာ်အဆၢ ၁၅-၁၈)
“ဟံးထီၣ်သးအနး လၢအမ့ၢ်ယွၤ အကလုၢ်အကထါတက့ၢ်”
၁၉, ၂၀. ဒ်သိးပသူ ယွၤအကလုၢ်ကထါ ကသ့ဂ့ၤဂ့ၤအဂီၢ် ပမၤတၢ်မနုၤသ့ဝဲလဲၣ်.
၁၉ ရိမ့ၤသုးဖိတဖၣ်အနးန့ၣ် အထီအိၣ်ဝဲ ၅၀ စဲးထံၣ်မံထၢၣ် (အလဲးမး ၂၀) လီၤ. ဒ်သိးသုးဖိတဖၣ် သူဝဲစုကဝဲၤတခါအံၤ ကသ့ဂ့ၤဂ့ၤအဂီၢ် ကဘၣ်မၤလိသ့အသး ကိးနံၤဒဲးလီၤ.
၂၀ တၢ်မၢဖိပီလူး တဲဝဲလၢ ယွၤအကလုၢ်ကထါန့ၣ် လီၤဂာ်ဒ်နးတဘ့ၣ်လီၤ. ယဟိဝၤယွၤ ဟ့ၣ်လီၤပှၤ စုကဝဲၤအံၤလီၤ. ဘၣ်ဆၣ် ပကဘၣ်မၤ လိသ့ထီၣ်ပသး ဒ်သိးပသူစုကဝဲၤအံၤ ကသ့ဂ့ၤဂ့ၤလၢ ပကတဲပၠးပှၤဂၤ ပတၢ်နာ်ဒီးကမၤဘၣ်ထီၣ် ပတၢ်ထံၣ် ဒီးပတၢ်ဆိကမိၣ်လၢ အကမၣ်တဖၣ်အဂီၢ်လီၤ. (၂ ကရံၣ်သူး ၁၀:၄, ၅; ၂ တံၤမသ့း ၂:၁၅) ဒ်သိးနသူ စုကဝဲၤအံၤကသ့ ဂ့ၤဂ့ၤအဂီၢ် နမၤလိနသးကသ့ဒ်လဲၣ်. စဘဲစၢၤ(န်) လၢအသးအိၣ် ၂၁ နံၣ်န့ၣ်တဲဝဲလၢ “ဖဲယဖး လံာ်စီဆှံအခါ အဆၢဒိၣ်တဆၢစုာ်စုာ်န့ၣ် ယကွဲးနီၣ်ဃာ်အဆၢဖိတဆၢလီၤ. ယမၤနီၣ်ဃာ် အဆၢဖိလၢ ယဘၣ်သးအဒိၣ် ကတၢၢ်တဖၣ်လီၤ.” အဝဲမၤဝဲဒ်အံၤအဃိ မၤစၢၤအီၤဒ်သိး အကနၢ်ပၢၢ်ထီၣ် ယဟိဝၤယွၤ အတၢ်ထံၣ်န့ၣ်လီၤ. ဒဲနံၣ်ယၢၤ စ့ၢ်ကီးတဲဝဲလၢ “ယဖးလံာ်စီဆှံ ဒီးယမၤနီၣ်ဃာ် လံာ်စီဆှံအဆၢလၢ ယဆိကမိၣ်လၢ ကကဲဘျုးလၢ ပှၤလၢယကလဲၤစံၣ်တဲၤတဲလီၤအီၤ တဖၣ်အဂီၢ်န့ၣ်လီၤ. ယထံၣ်လၢ ဖဲပှၤဂၤထံၣ်လၢ နသ့ၣ်ညါလံာ်စီဆှံအဂ့ၢ်ဂ့ၤဂ့ၤ ဒီးနအဲၣ်ဒိးမၤစၢၤအီၤအခါ အဝဲသ့ၣ်သးအိၣ် ဒိကနၣ်တၢ်လီၤ.”
သးအနး (ကွၢ်လံာ်အဆၢ ၁၉-၂၀)
၂၁. ဘၣ်မနုၤအဃိ ပတလိၣ်ပျံၤ မုၣ်ကီၤလံၢ် ဒီးအတၢ်ဝံတၢ်နါတဖၣ်လဲၣ်.
၂၁ ဒ်ပမၤလိဘၣ် ပှၤသးစၢ်တဖၣ်အဂ့ၢ်လၢ တၢ်မၤလိအံၤအပူၤအသိး ပတလိၣ်ပျံၤ မုၣ်ကီၤလံၢ် ဒီးအတၢ်ဝံတၢ်နါတဖၣ်ဘၣ်. အဝဲသ့ၣ်အိၣ်ဒီး အစိအကမီၤ ဘၣ်ဆၣ် ယဟိဝၤယွၤ အစိအကမီၤန့ၣ် ဒိၣ်န့ၢ်ဒံးအဝဲသ့ၣ်လီၤ. ဒီးအဝဲသ့ၣ် တအိၣ်မူဘၣ် လီၤစိၤလီၤထီဘၣ်. အဝဲသ့ၣ်ကအိၣ်ဘၣ်လၢ ဃိာ်ပူၤ ဒီးဖဲခရံာ်ပၢတၢ် အနံၣ်တကထိအတီၢ်ပူၤ အဝဲသ့ၣ်မၤဘၣ်ဒိပှၤ တသ့နီတဂၤဘၣ်. ဒီးအနံၣ်တကထိဝံၤအလီၢ်ခံ အဝဲသ့ၣ်ကဘၣ် တၢ်မၤဟးဂီၤကွံာ်အီၤလီၤ. (လီၣ်ဖျါ ၂၀:၁-၃, ၇-၁၀) ပသ့ၣ်ညါပဒုၣ်ပဒါ, အဝဲအတၢ်ကူၣ် ဒီးအတၢ်တိာ်ပာ်လီၤ. ခီဖျိယဟိဝၤယွၤ အတၢ်မၤစၢၤအဃိ ပဒုးဆၢက့ၤအီၤဒူဒူသ့ဝဲလီၤ.
