ပတၢ်စံၣ်တဲၤတဲလီၤတၢ်မၤန့ၣ် မ့ၢ်တၢ်လၢအရ့ဒိၣ် ဒီးအလုၢ်ဒိၣ်ပှ့ၤဒိၣ်န့ၣ်လီၤ. ဘၣ်ဆၣ် ပှၤတသးအိၣ် ပတၢ်သးခုကစီၣ်ကိးဂၤဒဲးဘၣ်. ပှၤတနီၤလၢအသူၣ်အိၣ်သးအိၣ် လံာ်စီဆှံဒၣ်လဲာ် ဆိကမိၣ်ဝဲလၢ အဝဲသ့ၣ်တလိၣ်မၤလိ လံာ်စီဆှံဒီးပှၤဘၣ်.

အဒိ, ပကကွၢ်သကိး ခဲဘ့အဂ့ၢ်မီၣ်. အဝဲထီၣ်တၢ်အိၣ်ဖှိၣ်ရိဖှိၣ်ဘၣ်ဆၣ် အဝဲတအဲၣ်ဒိးမၤလိလံာ်စီဆှံဘၣ်. မ့ၢ်လၢအဝဲတအဲၣ်ဒိးဝဲလၢ ပှၤကသ့ၣ်ညါလၢ အတၢ်သ့ၣ်ညါ လံာ်စီဆှံစှၤဝဲအဃိန့ၣ်လီၤ. အဂၤတမံၤန့ၣ် အဝဲဘၣ်ယိၣ်ဝဲလၢ ပှၤကမၢအနုာ်လီၤဆူ တၢ်ဘူၣ်တၢ်ဘါအပူၤ တကးဒံးဘၣ် ဘၣ်ယိၣ်စ့ၢ်ကီးဝဲလၢ အတၢ်ဃုထၢ ကကမၣ်ဝဲန့ၣ်လီၤ. နဆိကမိၣ်ဒ်လဲၣ်. မ့ၢ်ခဲဘ့ ဆီတလဲအသးကသ့ဧါ. ဆိကမိၣ်ကွၢ် လံာ်စီဆှံ တၢ်သိၣ်တၢ်သီန့ၣ် ဆီတလဲပှၤသးသ့န့ၣ်တက့ၢ်. ယဟိဝၤယွၤ စံးဘၣ်ပှၤအံၣ်စရ့လးဖိလၢ “ယကလုၢ်ကလီၤဒ်ပစီၤထံအသိး ဒ်တၢ်သဖှံၣ်လၢတၢ်မဲထီၣ်သီအဖီခိၣ်အသိး, ဒီးဒ်ပစီၤထံအဖျၢၣ်လၢ နီၣ်ဧိၤမံၤဧိၤအဖီခိၣ်အသိး” လီၤ. (၅ မိၤၡ့ ၃၁:၁၉, ၃၀; ၃၂:၂) လၢတၢ်န့ၣ်အဃိ မ်ပကမၤလိသကိး ပစီၤထံလၢ ဘၣ်တၢ်ဒိလီၤအီၤ ဒ်တၢ်စံၣ်တဲၤတဲလီၤတၢ်မၤ ဒ်သိးပမၤစၢၤ “ပှၤကညီခဲလၢာ်” ကသ့အဂီၢ်န့ၣ်လီၤ.—၁ တံၤမသ့း ၂:၃, ၄.

ပစီၤထံန့ၣ် ဟဲဘၣ်နၤကဖီလီဖိလီၤ. ထံသဝံသ့ၣ်တဖၣ်လၢအိၣ်လၢ ကလံၤကျါန့ၣ် ကဲထီၣ်ဝဲပစီၤထံ ကယီကယီလီၤ. ယဟိဝၤယွၤ အတၢ်ကတိၤလီၤဂာ်ဒ် “ပစီၤထံအသိး” ဒ်လဲၣ်. ဖဲအဝဲကတိၤတၢ်ဒီး အပှၤဂီၢ်မုၢ်အခါ ကတိၤဝဲလၢ အကလုၢ်ကပုာ်လုးကဖီလီဖိ ဒီးလၢတၢ်အဲၣ်တၢ်ကွံအပူၤစ့ၢ်ကီးလီၤ. ပဝဲသ့ၣ်တဖၣ် ပကွၢ်လိ ကစၢ်ယွၤသ့ခီဖျိလၢ ပပာ်ဖျါထီၣ်တၢ်ယူးယီၣ်ပာ်ကဲပှၤဂၤ အတၢ်ဘူၣ်တၢ်ဘါန့ၣ်လီၤ. ပဂုာ်ကျဲးစၢးတဲနၢ်ပၢၢ်အီၤ ဘၣ်ဆၣ်ပဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကဆၢတဲာ်တၢ်လၢ အနီၢ်ကစၢ်န့ၣ်လီၤ. ပမ့ၢ်ပာ်ဖျါထီၣ် ပတၢ်သူၣ်အိၣ်သးအိၣ်ပှၤဂၤနီၢ်နီၢ်န့ၣ် ပှၤဂၤတဖၣ်စ့ၢ်ကီး ကအဲၣ်ဒိးဒိကနၣ် ပတၢ်ကစီၣ် ဒီးပတၢ်စံၣ်တဲၤတဲလီၤတၢ်မၤန့ၣ် ကဖီထီၣ်သၣ်ထီၣ်ဝဲန့ၣ်လီၤ.

ပစီၤထံန့ၣ် မၤဖှံထီၣ်နသးလီၤ. ဖဲပစံၣ်တဲၤတဲလီၤတၢ်အခါ ပမ့ၢ်သူကျဲအဘိဘိ ဒ်သိးကမၤစၢၤ ပှၤအဂၤတဖၣ် လၢကသ့ၣ်ညါထီၣ် တၢ်မ့ၢ်တၢ်တီအဂီၢ်န့ၣ် အဝဲသ့ၣ်ကဒိးန့ၢ်ဘၣ် တၢ်သူၣ်မံသးမုာ်န့ၣ်လီၤ. ဒီပုၢ်ဝဲၢ်ခွါ ခရံာ်စ်န့ၣ်သံကွၢ်ဝဲ ခဲဘ့ ဒ်သိးအကမၤလိလံာ်စီဆှံ ဒီးအီၤလီၤ. ဘၣ်ဆၣ်အဝဲ တမၢဆူၣ်အီၤဘၣ်. အဝဲတဲဝဲဒၣ် သ့သ့ဘၣ်ဘၣ်အဃိ တဲသကိးဘၣ် ကစၢ်ယွၤအကလုၢ်ကထါ ဒီးခဲဘ့ဂ့ၤဂ့ၤန့ၣ်လီၤ. ခရံာ်စ်တဲဘၣ်ခဲဘ့လၢ တၢ်ဂ့ၢ်အရ့ဒိၣ်တဖၣ် လၢအိၣ်လၢလံာ်စီဆှံအပူၤအံၤ နမ့ၢ်မၤလိလံာ်စီဆှံဒီး နမ့ၢ်ဟဲထီၣ်တၢ်အိၣ်ဖှိၣ်ရိဖှိၣ်န့ၣ် နကနၢ်ပၢၢ်အါထီၣ် တၢ်ဂ့ၢ်လၢပှၤသိၣ်လိနၤ တဖၣ်န့ၣ်လီၤ လၢခံခရံာ်စ် တဲဘၣ်အီၤလၢ ဝံအတၢ်စံးပာ်လၢ လံာ်စီဆှံအပူၤတဖၣ် ဟဲလၢပှဲၤထီၣ်ဝဲ အဂ့ၢ်အဃိ ခဲဘ့နာ်ဝဲလၢ လံာ်စီဆှံန့ၣ် မ့ၢ်တၢ်မ့ၢ်တၢ်တီလီၤ. လၢတၢ်န့ၣ်အဃိ အဝဲသ့ၣ်တဲသကိးဘၣ်ဝဲ ဝံအတၢ်စံးပာ်တဖၣ် ဟဲလၢပှဲၤထီၣ်ဝဲ ဒ်လဲၣ်အဂ့ၢ်န့ၣ်လီၤ. တၢ်တဲသကိးတဖၣ်အံၤ ထုးန့ၢ်ခဲဘ့အသးအဃိ အဝဲတူၢ်လိာ်ဝဲ တၢ်မၤလိလံာ်စီဆှံလီၤ.

ပစီၤထံအံၤ အရ့ဒိၣ်လၢသးသမူအဂီၢ်လီၤ. ဖဲတၢ်ကိၢ်ခါလၢ ကီၢ်အံၣ်စရ့လးအပူၤန့ၣ် မူခိၣ်တစူၤဝဲ တဘျုးလါညါလီၤ. ခီဖျိလၢ ပစီၤထံတအိၣ်ဘၣ်အဃိ တၢ်ထူၣ်တၢ်ဘိတဖၣ် ဃ့ထီဒီးသံဝဲန့ၣ်လီၤ. ယဟိဝၤယွၤ တဲဆိပာ်စၢၤဝဲလၢ ပစိၤခဲအံၤန့ၣ် တၢ်ကမၤအသးဒ် တၢ်ယီၤဃ့အဆၢကတီၢ်လီၤ. အဲၣ်ဒိးစံးဝဲလၢ ပှၤဟီၣ်ခိၣ်ဖိတဖၣ် ကသၣ်ဝံၤလီၤဒိလၢ “တၢ်နၢ်ဟူယွၤ အကလုၢ်ကထါလီၤ.” (ဧၤမိၣ် ၈:၁၁) ကစၢ်ယွၤအၢၣ်လီၤဝဲလၢ ပှၤလၢအဘၣ်တၢ်ဒိးဖှူအီၤတဖၣ် ကလီၤဂာ်ဒ် “ပစီၤထံလၢ ယွၤအအိၣ်” မ့ၢ်လၢအဝဲသ့ၣ် စံၣ်တဲၤတဲလီၤဘီမုၢ် တၢ်သးခုကစီၣ်အဃိလီၤ. ဒီး “သိလၢအဂုၤအဂၤ” တဖၣ်ကဆီၣ်ထွဲမၤစၢၤအဝဲသ့ၣ်န့ၣ်လီၤ. (မံကၤ ၅:၇; ယိၤဟၣ် ၁၀:၁၆) တၢ်ကစီၣ်လၢ ပစံၣ်တဲၤတဲလီၤတၢ်မၤအံၤန့ၣ် မ့ၢ်ဝဲယဟိဝၤယွၤ အတၢ်ရဲၣ်တၢ်ကျဲၤလၢ ကဟ့ၣ်လီၤ တၢ်မူအထူအယိာ် ဆူပှၤလၢတၢ်သၣ်ဝံၤအသးလၢ တၢ်မ့ၢ်တၢ်တီတဖၣ်န့ၣ်လီၤ. မ့ၢ်နပာ်လုၢ်ပာ်ပှ့ၤ တၢ်သးခုကစီၣ်အံၤ စ့ၢ်ကီးဧါ.

ပစီၤထံသ့ၣ်တဖၣ်အံၤ မ့ၢ်တၢ်ဆိၣ်ဂ့ၤလၢ အဟဲလၢယဟိဝၤယွၤ အအိၣ်န့ၣ်လီၤ. (၅ မိၤၡ့ ၃၃:၁၃) ပတၢ်စံၣ်တဲၤတဲလီၤတၢ်မၤအံၤ ကကဲထီၣ် တၢ်ဆိၣ်ဂ့ၤ မ့တမ့ၢ် တၢ်ဟ့ၣ်တခါလၢ ပှၤလၢအဒိကနၣ်တၢ် တဖၣ်အဂီၢ်လီၤ. ခဲဘ့ မၤလိလံာ်စီဆှံအဃိ ဒိးန့ၢ်ဘၣ်တၢ်ဆိၣ်ဂ့ၤတဖၣ် မ့ၢ်လၢအဃုထံၣ်န့ၢ် တၢ်စံးဆၢတဖၣ်လၢ အဲၣ်ဒိးသ့ၣ်ညါဝဲန့ၣ်လီၤ. အဝဲမၤလိလံာ်စီဆှံ ဒီးတယံာ်တမီၢ် ဒိးဘျၢအသးလၢထံ ဒီးအခဲအံၤန့ၣ် အဝဲဒီးအမါကၠိးဝဲ မၤဝဲဘီမုၢ်တၢ်သးခုကစီၣ်တၢ်မၤန့ၣ်လီၤ.

ပတၢ်စံၣ်တဲၤတဲလီၤတၢ်မၤအံၤ ပထိၣ်သတြီၤအီၤဒီး ပစီၤထံအဃိ ပနၢ်ပၢၢ်ထီၣ်လၢ ပတၢ်မၤအံၤန့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်န့ၣ်လီၤ. လၢကျဲဒ်လဲၣ်. ပစီၤထံတလီၤစီၤဖိန့ၣ် မ့ၢ်ဒၣ်ဆံးဆံးဖိလီၤ. ဘၣ်ဆၣ် ပစီၤထံလၢ အကကွဲၢ်သ့ၣ်တဖၣ် မ့ၢ်ဟဲလီၤန့ၣ် ကမၤဘၣ်စီၣ်ဝဲ ဟီၣ်ခိၣ်န့ၣ်လီၤ. ဒ်န့ၣ်အသိး ပစံၣ်တဲၤတဲလီၤတၢ် တဂၤစုာ်စုာ်န့ၣ် ကဖျါဝဲဒ်သိး တၢ်ဆံးဆံးဖိတခါလီၤ. ဘၣ်ဆၣ် မ့ၢ်လၢ ယဟိဝၤပှၤအုၣ်အသး လၢအကကွဲၢ်သ့ၣ်တဖၣ် ပာ်ဖှိၣ်ထီၣ်အသး ဒီးစံၣ်တဲၤတဲလီၤတၢ်အဃိ ရၤလီၤအသးသကုၤ “ဟီၣ်ခိၣ်ဒီဘ့ၣ်ညါ” န့ၣ်လီၤ. (မးသဲ ၂၄:၁၄) ပတၢ်စံၣ်တဲၤတဲလီၤတၢ်မၤအံၤန့ၣ် ကမ့ၢ်တၢ်ဆိၣ်ဂ့ၤလၢပှၤဂၤအဂီၢ်လၢ အဟဲလၢယဟိဝၤယွၤ အအိၣ်န့ၣ်ဧါ. မ့ၢ်ဝဲလီၤ. ပတၢ်စံၣ်တဲၤတဲလီၤတၢ်မၤအံၤ မၤအသးဒ် ပစီၤထံလၢ အဘၣ်ပှၤကဖီလီဖိ, မၤဖှံထီၣ်ပှၤသး ဒီးအရ့ဒိၣ်လၢပှၤသးသမူအဂီၢ်န့ၣ်လီၤ.