တၢ်မ့ၢ်တၢ်တီဘၣ်ဃးဒီး ခါဆူညါ
တၢ်ကမၤအသး လၢခါဆူညါဒ်လဲၣ်န့ၣ် မ့ၢ်နဆိကမိၣ်ဘၣ်တဘျီဘျီဧါ. လံာ်စီဆှံပာ်ဖျါထီၣ်န့ၢ်ပှၤ တၢ်ကမၤအသးလၢ ခါဆူညါအရ့ဒိၣ်တဖၣ်န့ၣ် တယံာ်လၢၤဘၣ်ကဘၣ်ဝဲ ပှၤဟီၣ်ခိၣ်ဖိကိးဂၤဒဲးန့ၣ်လီၤ.
ယ့ၣ်ၡူးပာ်ဖျါထီၣ်န့ၢ်ပှၤ ဒ်သိးပကသ့ၣ်ညါလၢ “ယွၤအဘီအမုၢ်န့ၣ်ဘူးထီၣ်လံ” လီၤ. (လူၤကၣ် ၂၁:၃၁) အဝဲတဲဆိပာ်ဝဲလၢ တၢ်ဒုးတၢ်ယၤဖးဒိၣ်ကအိၣ်ထီၣ်, ဟီၣ်ခိၣ်ကဟူးဝးဆှဲးဆှိးနးနးကလဲာ်, တၢ်သၣ်ဝံၤလီၤဒိ, တၢ်ဆါသံသတြိာ် ဃုာ်ဒီးတၢ်အဂုာ်အဂၤတဖၣ် ကအိၣ်ထီၣ်ဝဲန့ၣ် ပထံၣ်ဘၣ် တၢ်အုၣ်သးလၢ မုၢ်မဆါတနံၤအံၤလီၤ.—လူၤကၣ် ၂၁:၁၀-၁၇.
ပှၤကညီအတၢ်ပၢတၢ်ပြးလၢ “မုၢ်နံၤအခံအကတၢၢ်တဖၣ်” အပူၤန့ၣ် လံာ်စီဆှံပာ်ဖျါထီၣ်ဝဲလၢ အဝဲသ့ၣ်အတၢ်ပာ်သူၣ်ပာ်သးတဖၣ် ကအၢထီၣ်သီထီၣ်ဝဲကွ့ၢ်ကွ့ၢ်လီၤ. ဒီးနဖးအီၤဖဲ ၂ တံၤမသ့း ၃:၁-၅ အပူၤသ့ဝဲလီၤ. ပထံၣ်ဘၣ်ပှၤကညီ အတၢ်ပာ်သူၣ်ပာ်သးဒီး အတၢ်ဖံးတၢ်မၤတဖၣ် လၢမုၢ်မဆါတနံၤအံၤ တၢ်ကဲထီၣ်သးန့ၣ် အလီၤပလိာ်ဝဲဒီး ဝံအတၢ်စံးပာ်အဃိ သုကတူၢ်လိာ်အီၤလီၤ.
တၢ်အံၤအခီပညီ ကမ့ၢ်မနုၤလဲၣ်. တၢ်ဆၢကတီၢ်ဘူးထီၣ်လံလၢ ယွၤအဘီအမုၢ်န့ၣ် ကဆီတလဲဟီၣ်ခိၣ်တၢ်အိၣ်သး ဒီးကမၤဂ့ၤထီၣ်ပှၤဟီၣ်ခိၣ်ဖိအတၢ်အိၣ်မူန့ၣ်လီၤ. (လူၤကၣ် ၂၁:၃၆) လၢလံာ်စီဆှံပူၤန့ၣ် ကစၢ်ယွၤအၢၣ်လီၤပှၤလၢ အကမၤဂ့ၤထီၣ်ဝဲဟီၣ်ခိၣ်အတၢ်အိၣ်သး ဃုာ်ဒီးပှၤလၢ ကအိၣ်ဝဲဆိးဝဲလၢအပူၤတဖၣ် အဂီၢ်စ့ၢ်ကီးလီၤ. ခဲအံၤပကတဲသကိး တၢ်အဒိတနီၤ.
တၢ်ပၢတၢ်ပြးလၢအဂ့ၤ
“ဒီးတၢ်ဟ့ၣ်လီၤအီၤ [ယ့ၣ်ၡူး] လၢတၢ်ပၢတၢ်အလီၢ်, ဒီးတၢ်လၤကပီၤ, ဒီးတၢ်အဘီအမုၢ် ဒ်သိးကယဲၢ်ပှၤဂီၢ်မုၢ်တဖၣ်, ပှၤကလုာ်တဖၣ်, ဒီးပှၤကတိၤတၢ်အကျိာ် အကလုာ်ကလုာ်ခဲလၢာ် ကမၤအတၢ်လီၤ. အပၢတၢ်အလီၢ်န့ၣ် မ့ၢ်တၢ်ပၢအလီၢ်အထူအယိာ်လၢ အတလၢာ်ကွံာ်ဘၣ်, ဒီးအဘီအမုၢ် တတုၤဘၣ်လၢတၢ်ဟးဂီၤဘၣ်.”—ဒၤနံးယ့လး ၇:၁၄.
အခီပညီဒ်လဲၣ်– ကစၢ်ယွၤဒုးအိၣ်ထီၣ် တၢ်ပၢတၢ်ပြးလၢဟီၣ်ခိၣ်တဘ့ၣ်အံၤန့ၣ် အဝဲဃုထၢထီၣ်အဖိခွါ ဒ်စီၤပၤအဂၤအသိးလီၤ. ဒီးနအိၣ်မူဘၣ်လၢ အတၢ်ပၢဖီလာ်သ့ဝဲလီၤ.
တၢ်အိၣ်ဆူၣ်အိၣ်ချ့လၢ အလၢအပှဲၤ
“ပှၤအိၣ်ဝဲဆိးဝဲတဖၣ်န့ၣ်တစံး, ယမၤတကဲဘၣ်န့ၣ်ဘၣ်.”—ယၡါယၤ ၃၃:၂၄.
အခီပညီဒ်လဲၣ်– နကအိၣ်ဒီး တၢ်အိၣ်ဆူၣ်အိၣ်ချ့လၢအဂ့ၤ ဒီးနနီၢ်ခိကလၢပှဲၤဝဲ ဒီးတကးဒံးဘၣ် နကအိၣ်မူဘၣ်လီၤထူလီၤယိာ်န့ၣ်လီၤ.
တၢ်ဃူတၢ်ဖိးအါအါကလဲာ်
“ဒုးအိၣ်ကတီၢ် တၢ်ဒုးတၢ်ယၤတဖၣ် တုၤလၢဟီၣ်ခိၣ်အကတၢၢ်လီၤ.”—စံးထီၣ်ပတြၢၤ ၄၆:၉.
အခီပညီဒ်လဲၣ်– တၢ်မၤပျံၤမၤဖုး ဒီးတၢ်နးတၢ်ဖှီၣ်ခဲလၢာ်လၢ အဟဲကဲထီၣ်သးလၢ တၢ်ဒုးတၢ်ယၤန့ၣ် ကလီၤမၢ်ကွံာ်ဝဲလီၤ.
ဟီၣ်ခိၣ်အံၤကပှဲၤဝဲဒီး ပှၤတီၤပှၤလိၤတဖၣ်
“ပှၤတတီတလိၤ တအိၣ်လၢၤဘၣ် . . . မ့မ့ၢ်ပှၤလၢအသးစူၤ ကန့ၢ်ဘၣ်သါထံဧိၤကီၢ်ဧိၤ.”—စံးထီၣ်ပတြၢၤ ၃၇:၁၀, ၁၁.
အခီပညီဒ်လဲၣ်– ပှၤအၢပှၤသီတဖၣ်တအိၣ်လၢၤဘၣ် ဒီးကအိၣ်တ့ၢ်က့ၤထဲ ပှၤလၢအသးအိၣ်ဒိကနၣ် ကစၢ်ယွၤကလုၢ်ကထါတဖၣ်န့ၣ်လီၤ.
ဟီၣ်ခိၣ်ဒီဘ့ၣ် ကကဲထီၣ်ပၤရဒံစူး
“ဒီးကသူၣ်ဟံၣ်, ဒီးကအိၣ်ဝဲဆိးဝဲလၢအပူၤ, ဒီးကသူၣ်စပံးအလီၢ်, ဒီးကအီၣ်အတၤသၣ်လီၤ.”—ယၡါယၤ ၆၅:၂၁, ၂၂.
အခီပညီဒ်လဲၣ်– ဟီၣ်ခိၣ်ဒီဘ့ၣ်ညါ ကဃံလၤထီၣ်ဝဲလီၤ. ပတၢ်ထုကဖၣ်လၢ ကစၢ်ယွၤအတၢ်ဘၣ်သး ကဟဲလၢပှဲၤထီၣ်ဝဲလၢ “ဟီၣ်ခိၣ်ချၢ” အံၤန့ၣ် အကမၤလၢထီၣ်ပှဲၤထီၣ်န့ၢ်ပှၤလီၤ.—မးသဲ ၆:၁၀.
