ပ​မ့ၢ်​ဒိးန့ၢ်​ဘၣ်​တၢ်ဟ့ၣ်​အဂ့ၤ​ကတၢၢ်​န့ၣ် က​ထိၣ်ဟူး​ထိၣ်ဂဲၤ​ထီၣ်​ပ​သး​လၢ ပ​က​စံးဘျုး​စံးဖှိၣ်​က့ၤ ပှၤလၢ​အ​ဟ့ၣ်​ပှၤ​တၢ်ဟ့ၣ်​အံၤန့ၣ်​လီၤ. ဖဲ​ယ့ၣ်ၡူး​မၤဘျါ​က့ၤ ပှၤဘၣ်​တၢ်ဆါအၢ​အဂၤ​တဆံ​ဝံၤ​အလီၢ်​ခံ​န့ၣ် အဝဲ​ဟ့ၣ်​ပှၤ​တၢ်​မၤလိ​အရ့ဒိၣ်​တခါ​ဒ်လဲၣ်. လၢ​ပှၤအဂၤ​တဆံ​အကျါ​တဂၤ “ဟဲက့ၤ​ကဒါက့ၤ​ဒီး စံးထီၣ်​ပတြၢၤ​ယွၤ​လၢ အ​ကလုၢ်​ဖးဒိၣ်​လီၤ.” ယ့ၣ်ၡူး​တဲဝဲ​လၢ “မ့ၢ်​ပှၤ​ဆံဆဲၣ်​ဂၤန့ၣ် ကဆှီ​ထီၣ်ဝဲ​တမ့ၢ်​ဘၣ်​ဧါ. ဒီး​ပှၤ​ခွံ​ဂၤန့ၣ်​အိၣ်​ဖဲလဲၣ်.” (လူၤကၣ် ၁၇:၁၂-၁၇) အဃိ​ပ​ဒိးန့ၢ်​ဘၣ်​တၢ်​မၤလိ​ဒ်လဲၣ်. ပှၤဂၤ​တဖၣ်​မ့ၢ်​မၤစၢၤ​ပှၤ​သနာ်က့ ပ​သးပ့ၤနီၣ်​ကွံာ်​တၢ်​လၢ အဝဲသ့ၣ်​မၤန့ၢ်​ပှၤ​ညီဝဲ​လီၤ.

တၢ်ပှ့ၤက့ၤ​န့ၣ်​တ​ဒ်သိး​ဒီး တၢ်ဟ့ၣ်​လၢ​အဂၤ​နီ​တခါ​ဘၣ်. တၢ်ပှ့ၤက့ၤ​န့ၣ်​မ့ၢ်​တၢ်ဟ့ၣ်​လၢ အဂ့ၤ​ကတၢၢ်​တခါ​လီၤ. ခီဖျိ​လၢ ကစၢ်​ယွၤ​ဟ့ၣ်လီၤ​နၤ​တၢ်ပှ့ၤက့ၤ​အဃိ က​ထိၣ်ဟူး​ထိၣ်ဂဲၤ​ထီၣ်​န​သး​လၢ န​က​မၤ​တၢ်မနုၤ​လဲၣ်.

• ဃု​သ့ၣ်ညါ​အါထီၣ် ပှၤလၢ​အ​ဟ့ၣ်​နၤ တၢ်ဟ့ၣ်​တဂၤ​အံၤ​အဂ့ၢ်​တက့ၢ်. လၢ​တၢ်ပှ့ၤက့ၤ​အဃိ ပှၤ​ဟီၣ်ခိၣ်​ဖိ​တ​ဒိးန့ၢ်​ဘၣ် တၢ်မူ​အထူ​အယိာ်​တထံၣ်ဃီ​ဘၣ်. လၢတၢ်န့ၣ်​အလီၢ် ယ့ၣ်ၡူး​ဃ့​ဘါ​ထုကဖၣ်​လၢ ကစၢ်​ယွၤ​အ​အိၣ်​လၢ– “ဒီး​တၢ်မူ​အထူ​အယိာ်​န့ၣ် မ့ၢ်​တၢ်​သ့ၣ်ညါ​နၤ, ယွၤ​နီၢ်နီၢ်​တဂၤဃီ, ဒီး​ယ့ၣ်ၡူး​ခရံာ်​လၢ န​မၢလီၤ​အီၤ​န့ၣ်​လီၤ.” (ယိၤဟၣ် ၁၇:၃) အဒိ ပှၤ​တဂၤ​တဲဘၣ်​နၤ​လၢ ဖဲ​န​နီၢ်ဆံး​ခါ​န့ၣ်​ပှၤလၢ​အ​မၤ​ပူၤဖျဲး န​သးသမူ​န့ၣ်​အိၣ်ဝဲ​တဂၤ​လီၤ. ဘၣ်ဃး​ဒီး​ပှၤလၢ​အ​မၤ​ပူၤဖျဲး​နၤ တဂၤ​အံၤ​အဂ့ၢ် ဒီး​ဘၣ်​မနုၤ​အဃိ အဝဲ​မၤ​ပူၤဖျဲး​န​သးသမူ​လဲၣ်န့ၣ် န​တ​အဲၣ်ဒိး​သ့ၣ်ညါ ဘၣ်​ဧါ. တၢ်ပှ့ၤက့ၤ​န့ၣ်​မ့ၢ်​တၢ်ဟ့ၣ်​တခါ​လၢ အ​မၤ​ပူၤဖျဲး​န​သးသမူ​သ့ဝဲ​လီၤ. ယဟိဝၤ​ယွၤ မ့ၢ်​ပှၤလၢ​အ​ဟ့ၣ်​နၤ​တၢ်ဟ့ၣ်​အံၤ​အဃိ မ့ၢ်​န​တ​အဲၣ်ဒိး​သ့ၣ်ညါ​အါထီၣ်​အဂ့ၢ်​ဘၣ်​ဧါ. န​က​အဲၣ်ဒိး​သုးဘူး​န​သး​ဆူ​အ​အိၣ် သပှၢ်​ကတၢၢ်​လီၤ. တကးဒံးဘၣ် န​က​အဲၣ်ဒိး​လၢ န​တၢ်​ရ့လိာ်သး​ဒီး​အီၤ​က​ဂ့ၤထီၣ်​ဝဲ​လီၤ. လံာ်စီဆှံ​ဟ့ၣ်သဆၣ်​ထီၣ်​ပှၤလၢ– “သုးဘူး​သု​သး​ဆူ​ယွၤ​အ​အိၣ်​တက့ၢ်, ဒီး​က​သုးဘူး​အသး​ဆူ​သု​အိၣ်​လီၤ.”—ယၤကိာ် ၄:၈.

• စူၢ်က့ၤ​နာ်က့ၤ​တၢ်ပှ့ၤက့ၤ. “ပှၤလၢ​အ​စူၢ်က့ၤ​နာ်က့ၤ​ဖိခွါ​န့ၣ်, အိၣ်ဒီး​တၢ်မူ​အထူ​အယိာ်​လီၤ.” (ယိၤဟၣ် ၃:၃၆) ပ​ပာ်ဖျါ​ထီၣ်​လၢ ပ​စူၢ်က့ၤ​နာ်က့ၤ​ယ့ၣ်ၡူး​အ​တၢ်ပှ့ၤက့ၤ က​သ့​ဒ်လဲၣ်. ပ​ပာ်ဖျါ​ထီၣ်​လၢ ပ​နာ်​တၢ်ပှ့ၤက့ၤ​သ့ ခီဖျိ​လၢ​ပ​တၢ်မၤ​လီၤ. (ယၤကိာ် ၂:၁၇) ပ​က​ဘၣ်​မၤ​တၢ်မနုၤ​လဲၣ်. ကစၢ်​ယွၤ​အဲၣ်ဒိး​လၢ ပ​က​အိၣ်မူ​ဘၣ်​ဒ်လဲၣ်​န့ၣ် ဃု​သ့ၣ်ညါ​အါထီၣ်​ဒီး အိၣ်မူ​မၤထွဲ​အ​တၢ်​ဘၣ်သး​တက့ၢ်. * ဃ့ကညး​ကစၢ်​ယွၤ​လၢ က​ပျၢ်​န​တၢ်ကမၣ် ဒီး​က​ဟ့ၣ်လီၤ​နၤ​သး​လၢ အ​သ့ၣ်ညါ​ဒၣ်တၢ်​လၢ​အ​ကဆှီ​တက့ၢ်. တကးဒံးဘၣ် န​က​ဘၣ်​နာ်​သပှၢ်​ကတၢၢ်​လၢ တၢ်ပှ့ၤက့ၤ​အံၤ က​မၤစၢၤဝဲ​ကယဲၢ်​ပှၤလၢ အ​စူၢ်က့ၤ​နာ်က့ၤ​တၢ်ပှ့ၤက့ၤ​တဂၤ​လၢ်လၢ် ဒ်သိး​ခါဆူညါ​န့ၣ် အဝဲသ့ၣ်​ကအိၣ်​ဒီး​တၢ်ဃူ​တၢ်ဖိး, တၢ်ဘံၣ်​တၢ်ဘၢ​ဒီး​ကအိၣ်​ဘၣ်​ဝဲ မုာ်မုာ်​ခုၣ်ခုၣ်​အဂီၢ်​လီၤ.—ဧ့ၤဘြံၤ ၁၁:၁.

• ဟဲထီၣ်​တၢ်​သ့ၣ်နီၣ်ထီၣ်​က့ၤ ယ့ၣ်ၡူး​အ​တၢ်သံ​အမူး. ဒ်သိး​ပ​ကသ့ၣ်​နီၣ်ထီၣ်က့ၤ ယ့ၣ်ၡူး​အ​တၢ်ဟ့ၣ်​လုၢ်ထီၣ်​သး​လၢ​ပဂီၢ်​န့ၣ် ယ့ၣ်ၡူး​ဒုးအိၣ်​ထီၣ်ဝဲ​မူးပွဲ​တခါ​လၢ ပ​ကသ့ၣ်​နီၣ်ထီၣ်က့ၤ​အီၤ​အဂီၢ်​လီၤ. ဘၣ်ဃး​ဒီး​မူးပွဲ​လၢ ဘၣ်​တၢ်မၤ​အီၤ​တနံၣ်​တဘျီ​အံၤန့ၣ် ယ့ၣ်ၡူး​တဲဝဲ​လၢ– “မၤ​တၢ်အံၤ​လၢ​သု​သ့ၣ်နီၣ်ထီၣ်​က့ၤ​ယၤ အဂ့ၢ်​န့ၣ်​တက့ၢ်.” (လူၤကၣ် ၂၂:၁၉) တနံၣ်​အံၤ ယဟိဝၤ​ပှၤအုၣ်​အသး​တဖၣ် က​မၤဝဲ​တၢ်​သ့ၣ်နီၣ်ထီၣ်​က့ၤ ယ့ၣ်ၡူး​အ​တၢ်သံ​အမူး​လၢ မုၢ်ခံနံၤ, လါအ့ဖြ့ၣ် ၁၁, ၂၀၁၇ ဖဲ​မုၢ်လီၤနုာ်​ဝံၤ​အလီၢ်​ခံ​န့ၣ်​လီၤ. မူးပွဲ​အံၤ​က​ဘၣ်​တၢ်မၤ​အီၤ​ယံာ်ဝဲ တ​နၣ်ရံၣ်​ဃၣ်ဃၣ်​န့ၣ်​လီၤ. ပ​က​နၢ်ဟူ​ဘၣ်​တၢ်​စံၣ်တဲၤ​တဲလီၤ​တၢ်​လၢ က​ဒုး​နၢ်ပၢၢ်​ပှၤလၢ ယ့ၣ်ၡူး​အ​တၢ်သံ ကဲဘျုး​လၢ​ခဲအံၤ ဒီး​လၢ​ခါဆူညါ​အဂ့ၢ်​န့ၣ်​လီၤ. လၢ​အ​ပူၤကွံာ်​တနံၣ်​န့ၣ် ပှၤ​အိၣ်​လၢ​ဟီၣ်ခိၣ်​ဒီဘ့ၣ်​လၢ အ​ဟဲထီၣ်ဝဲ တၢ်မၤ​တၢ်​သ့ၣ်နီၣ်ထီၣ်​က့ၤ ယ့ၣ်ၡူး​အ​တၢ်သံ​အမူး​န့ၣ် အိၣ်ဝဲ​အဂၤ​အ​ကကွဲၢ်​ခံ​ဆံ​ဃၣ်ဃၣ်​လီၤ. ခီဖျိ​လၢ ပ​အဲၣ်ဒိး​ပာ်ဖျါ​ထီၣ်​တၢ်​စံးဘျုး​စံးဖှိၣ်​က့ၤ ကစၢ်​ယွၤ​အ​တၢ်ဟ့ၣ်​လၢ​အဂ့ၤ​ကတၢၢ်​အံၤ​အဃိ ပ​ကွဲမုာ်​ဘၣ်​နၤ​လၢ န​က​ဟဲထီၣ်​တၢ်မၤ​တၢ်​သ့ၣ်နီၣ်ထီၣ်​က့ၤ ယ့ၣ်ၡူး​အ​တၢ်သံ​အမူး​အံၤန့ၣ်​လီၤ.