လံာ်စီဆှံပာ်ဖျါထီၣ်ဝဲ မူခိၣ်ကလူးလၢ အပူထီၣ်ထီဒါတၢ်တဂၤ လၢခံဘၣ်တၢ်ကိးက့ၤအီၤလၢ စၤတၣ်မုၣ်ကီၤလံၢ်န့ၣ်​ အထီဒါဝဲကစၢ်ယွၤအတၢ်ပၢလီၤ. မုၣ်ကီၤလံၢ်တဲဝဲလၢ ပှၤဟီၣ်ခိၣ်ဖိမ့ၢ်တအိၣ်လၢ ကစၢ်ယွၤအတၢ်ဟံးစုနဲၣ်ကျဲဒီး အတၢ်ပၢဖီလာ်ဘၣ်န့ၣ်​ ကဂ့ၤဝဲလီၤ. ဒီးလီၤသးအုးဒိၣ်မးလၢ ပမိၢ်ပပၢ်အဆိကတၢၢ်ခံဂၤ လၢအမ့ၢ်နီၢ်အံၣ်အုဒီး စီၤအၤဒၣ်န့ၣ်​ ဒိကနၣ်ဝဲ မုၣ်ကီၤလံၢ်အကလုၢ်ဒီး ထီဒါဝဲကစၢ်ယွၤန့ၣ်လီၤ.—၁ မိၤၡ့ ၃:၁-၆; လီၣ်ဖျါ ၁၂:၉.

မ့ၢ်လၢ နီၢ်အံၣ်အုဒီးစီၤအၤဒၣ်​ တတူၢ်လိာ်ဝဲကစၢ်ယွၤ ဒ်အတၢ်ပၢကစၢ်အသိးလၢၤဘၣ်အဃိ အဝဲသ့ၣ်ဘၣ်ဟးထီၣ်ကွံာ်လၢ ဧ့ၤဒ့ၣ်တၤသၣ်အလီၢ်ပူၤ ဒီးအတၢ်မုၢ်လၢ်လၢ ကအိၣ်မူဘၣ်လီၤထူလီၤယိာ် ဃုာ်ဒီးတၢ်ဆူၣ်အိၣ်ချ့ လၢအလၢအပှဲၤန့ၣ်​ လီၤမၢ်ကွံာ်ဝဲလီၤ. (၁ မိၤၡ့ ၃:၁၇-၁၉) အဝဲသ့ၣ်တၢ်ဆၢတဲာ်န့ၣ်​ မၤဘၣ်ဒိဝဲအဖိအလံၤ ခဲလၢာ်လီၤ. လံာ်စီဆှံတဲဝဲလၢ စီၤအၤဒၣ်မၤတၢ်ဒဲးဘးအဃိ “တၢ်ဒဲးဘး ဟဲနုာ်ဆူဟီၣ်ခိၣ်​ ခီဖျိလၢပှၤတဂၤ, ဒီးအဝဲအတၢ်ဒဲးဘး ဟဲစိာ်ဃုာ်ဒီး တၢ်သံန့ၣ်လီၤ.” (ရိမ့ၤ ၅:၁၂, ခ့ခါစှီၤကျိာ်) ခီဖျိလၢ တၢ်ဒဲဘးအဃိ တၢ်ကီတၢ်ခဲအိၣ်ထီၣ်အဂၤတခါ လၢအမ့ၢ် “ပှၤပၢပှၤဂၤလၢ အတၢ်အၢအဂီၢ်လီၤ.” (စံၣ်တဲၤတဲလီၤတၢ် ၈:၉) အဃိ ပသ့ၣ်ညါလၢ ဖဲပှၤဟီၣ်ခိၣ်ဖိတဖၣ်​ ပၢလီၤအနီၢ်ကစၢ်သးအခါ တၢ်ကီတၢ်ခဲတဖၣ်​ အိၣ်ထီၣ်ဝဲထီဘိလီၤ.

လံာ်စီဆှံပာ်ဖျါထီၣ်ဝဲ ပှၤဟီၣ်ခိၣ်ဖိလၢ အပၢတၢ်အဆိကတၢၢ်တဂၤန့ၣ်​ မ့ၢ်ဝဲစီၤနံးမရိးလီၤ. ဒီးအပူထီၣ်ထီဒါဝဲ ယဟိဝၤယွၤအတၢ်ပၢလီၤ. စးထီၣ်လၢ စီၤနံးမရိးအစိၤ ဒီးတုၤလီၤလၢအခဲအံၤန့ၣ်​ ပှၤပၢတၢ်တဖၣ်သူကမၣ်ဝဲ အတၢ်န့ၢ်စိန့ၢ်ကမီၤလီၤ. လၢအပူၤကွံာ်အနံၣ်​ ၃,၀၀၀ န့ၣ်​ စီၤပၤၡလိၤမိၤ ကွဲးဝဲလၢ “ပှၤလၢအဘၣ်​ တၢ်မၤနးမၤဖှီၣ်အီၤတဖၣ်​ ဟီၣ်တၢ်ယၢၤတၢ်ဘၣ်ဆၣ်​ ပှၤမၤစၢၤအီၤတအိၣ်​ နီတဂၤဘၣ်. ပှၤတမၤစၢၤအီၤ နီတဂၤဘၣ်န့ၣ်​ မ့ၢ်လၢတၢ်စိကမီၤအိၣ်လၢ ပှၤမၤနးမၤဖှီၣ်တၢ်တဖၣ်​ အစုပူၤအဃိန့ၣ်လီၤ.”—စံၣ်တဲၤတဲလီၤတၢ် ၄:၁, ခ့ခါစှီၤကျိာ်.

မုၢ်မဆါတနံၤအံၤစ့ၢ်ကီး တၢ်အိၣ်သးတဆီတလဲနီတမံၤဘၣ်. ဖဲ ၂၀၀၉ န့ၣ်​ ဘီမုၢ်စၢဖှိၣ်ကရၢ အလံာ်တဘ့ၣ်တဲဝဲ မ့ၢ်လၢပှၤတီခိၣ်ရိၤမဲတၢ် တဂ့ၤဘၣ်အဃိ “တၢ်အၢတၢ်သီတဖၣ်​ အါထီၣ်ဝဲကွ့ၢ်ကွ့ၢ်လၢ ဟီၣ်ခိၣ်ချၢအံၤန့ၣ်လီၤ.”

ပှၤဟီၣ်ခိၣ်ဖိလိၣ်ဘၣ်ဝဲ ပဒိၣ်ပပှၢ်ဒီး ပှၤပၢတၢ်ပြးတၢ် လၢအဂ့ၤထီၣ်တဖၣ်လီၤ. အဃိ ပတၢ်ဘၣ်တ့ကစၢ် အၢၣ်လီၤဝဲလၢ အကမၤန့ၢ်ပှၤလီၤ.

ကစၢ်ယွၤပာ်လီၤဝဲ ဘီမုၢ်တဘီမုၢ် မ့တမ့ၢ် တၢ်ပၢတၢ်ပြးတခါလၢ ကပၢက့ၤတၢ်လၢ ပှၤဟီၣ်ခိၣ်ဖိ အတၢ်ပၢတၢ်ပြးခဲလၢာ်အလီၢ် ဒီး “မ့မ့ၢ်အဝဲန့ၣ်​ ကအိၣ်လီၤထူလီၤယိာ်လီၤ.” (ဒၤနံးယ့လး ၂:၄၄) ပှၤလၢအကကွဲၢ်တဖၣ်န့ၣ်​ ဃ့ဝဲလၢဘီမုၢ်တခါအံၤ ကဟဲအဂီၢ်လီၤ. (မးသဲ ၆:၉, ၁၀) ဘၣ်ဆၣ်​ တၢ်ပၢတၢ်ပြးတခါအံၤ ကစၢ်ယွၤအနီၢ်ကစၢ် တပၢဝဲဘၣ်. လၢတၢ်န့ၣ်အလီၢ် အဝဲဃုထၢထီၣ်​ ပှၤတဂၤလၢ အအိၣ်မူတ့ၢ် လၢဟီၣ်ခိၣ်ချၢန့ၣ်လီၤ. ကစၢ်ယွၤဃုထၢထီၣ်ဝဲ မတဂၤလဲၣ်.