တၢ်တ့လီၤပှၤဒ်သိး ပကအိၣ်မူဝဲ လီၤထူလီၤယိာ်အဂီၢ်
ပှၤဟီၣ်ခိၣ်ဖိခဲလၢာ်န့ၣ် အဲၣ်ဒိးအိၣ်မူဝဲဖးယံာ် လၢအပှဲၤဒီးတၢ်သူၣ်ဖှံသးညီန့ၣ်လီၤ. ဆိကမိၣ်ကွၢ် နမ့ၢ်အိၣ်မူဘၣ်လီၤထူလီၤယိာ် ပှဲၤဒီးတၢ်သူၣ်ဖှံသးညီ ဒီးနမ့ၢ်တဆူးတဆါနီတဘျီဘၣ်န့ၣ် ကမုာ်ဘၣ်နၤထဲလဲၣ်. အဒိ, နကအိၣ်ဘၣ်ဒီး ပှၤလၢနအဲၣ်ဘၣ်အီၤတဖၣ် တကးဘၣ် နကဟးဘၣ်လၢဟီၣ်ခိၣ်ဒီဘ့ၣ်, နကမၤလိန့ၢ်တၢ်သ့တၢ်ဘၣ် လၢအသီတဖၣ်, ဒီးနတၢ်ကူၣ်သ့ကအါထီၣ်ဒီး နကမၤလိဘၣ်ကယဲၢ် တၢ်လၢနအဲၣ်ဒိးအီၤတဖၣ်န့ၣ်လီၤ.
ပတၢ်မိၣ်န့ၢ်သးလီဒ်န့ၣ်တဖၣ်န့ၣ် မ့ၢ်အကမၣ်ဧါ. တကမၣ်ဘၣ်. ခီဖျိလံာ်စီဆှံပာ်ဖျါထီၣ်ဝဲလၢ ကစၢ်ယွၤထၢနုာ်လီၤဝဲ တၢ်မိၣ်န့ၢ်သးလီတခါအံၤလၢပသးပူၤန့ၣ်လီၤ. (စံၣ်တဲၤတဲလီၤတၢ် ၃:၁၁) လံာ်စီဆှံပာ်ဖျါထီၣ်စ့ၢ်ကီးလၢ “ယွၤမ့ၢ်တၢ်အဲၣ်တၢ်ကွံလီၤ.” (၁ ယိၤဟၣ် ၄:၈) အဃိ ကစၢ်ယွၤလၢ အပှဲၤဒီးတၢ်အဲၣ်တၢ်ကွံတဂၤန့ၣ် အတ့လီၤပှၤဃုာ်ဒီးတၢ်မိၣ်န့ၢ်သးလီလၢ ပကအိၣ်မူဘၣ် လီၤထူလီၤယိာ်အဂီၢ် ဘၣ်ဆၣ်အမ့ၢ်တမၤလၢပှဲၤဝဲန့ၣ် မ့ၢ်အခီပညီကအိၣ်ဧါ.
နီၢ်နီၢ်န့ၣ် ပှၤတအဲၣ်ဒိးသံ နီတဂၤဘၣ်. လံာ်စီဆှံပာ်ဖျါထီၣ်ဝဲလၢ တၢ်သံန့ၣ်လီၤဂာ်ဒ်သိး “ဒုၣ်ဒါ” လၢပှၤတအဲၣ်ဒိး ထံၣ်အီၤနီတဂၤဘၣ်လီၤ. (၁ ကရံၣ်သူး ၁၅:၂၆) ပှၤတနီၤနီၤန့ၣ်ကသံဝဲလၢ အသးစၢ်အခါ ဒီးတနီၤနီၤန့ၣ်ကသံဝဲလၢ အသးပှၢ်ထီၣ်အခါန့ၣ်လီၤ. တမံၤဂ့ၤတမၠိဂ့ၤ တၢ်သံန့ၣ်ပှၤဟးဆှဲးဝဲ တန့ၢ်နီတဂၤဘၣ်. ဒီးပှၤအါတက့ၢ်မ့ၢ်ဆိကမိၣ်ထီၣ်ဝဲ တၢ်သံအဂ့ၢ်န့ၣ် အဝဲသ့ၣ်ပျံၤတၢ်လီၤ. အဃိဒုၣ်ဒါလၢ အမ့ၢ်တၢ်သံန့ၣ် မ့ၢ်အကလီၤမၢ်ကွံာ်တဘျီဘျီဧါ. ဒီးလီၤမၢ်ကွံာ်ဝဲကသ့ဧါ.
ပတၢ်မုၢ်လၢ်အိၣ်န့ၣ် တၢ်အုၣ်သးအိၣ်ဝဲ
နမ့ၢ်သ့ၣ်ညါထီၣ်လၢ ကစၢ်ယွၤတတိာ်ပာ်ဝဲလၢ ပှၤဟီၣ်ခိၣ်ဖိတဖၣ် ကသံနီတဘျီဘၣ်န့ၣ် နကကမၢကမၣ်ဧါ. လံာ် ၁ မိၤၡ့ ပာ်ဖျါထီၣ်န့ၢ်ပှၤတၢ်အုၣ်သးလၢ ကစၢ်ယွၤတိာ်ပာ်ဝဲလၢ ပှၤကညီတဖၣ် ကအိၣ်မူဘၣ်လီၤထူလီၤယိာ်လၢ ဟီၣ်ခိၣ်ချၢန့ၣ်လီၤ. ယဟိဝၤယွၤတ့လီၤဝဲ ဟီၣ်ခိၣ်အံၤ ဃံဃံလၤလၤ ဒ်သိးပှၤဟီၣ်ခိၣ်ဖိတဖၣ် ကအိၣ်မူဘၣ်လီၤထူလီၤယိာ် ပှဲၤဒီးတၢ်သူၣ်ဖှံသးညီန့ၣ်လီၤ. ဝံၤဒီးကစၢ်ယွၤ တ့လီၤပိာ်ခွါအဆိကတၢၢ်တဂၤ လၢအမ့ၢ်စီၤအၤဒၣ် ဒီးပာ်အီၤလၢ ဧ့ၤဒ့ၣ်တၤသၣ်လီၢ်န့ၣ်လီၤ. ဒီး “ယွၤကွၢ်အတ့လီၤတၢ်တမံၤလၢ်လၢ်န့ၣ်, ဒီးထံၣ်ဝဲလၢအဂ့ၤမးလီၤ.”—၁ မိၤၡ့ ၁:၂၆, ၃၁.
ကစၢ်ယွၤ တ့လီၤဝဲ စီၤအၤဒၣ် ဒ်ပှၤလၢ ပှၤပှဲၤတဂၤအသိးလီၤ. (၅ မိၤၡ့ ၃၂:၄) စီၤအၤဒၣ်အမါ နီၢ်အံၣ်အုစ့ၢ်ကီး ဖဲတၢ်တ့လီၤအီၤအခါန့ၣ် အတၢ်ဆိကမိၣ် ဒီးအနီၢ်ခိန့ၣ်လၢပှဲၤဝဲလီၤ. ယဟိဝၤယွၤ တဲဘၣ်အဝဲသ့ၣ်လၢ “မ်သုသၣ်ထီၣ်, ဒီးအါထီၣ်, ဒီးမၤပှဲၤထီၣ်ဟီၣ်ခိၣ်ဒီးမၤနၢၤအီၤ, ဒီးပၢဒ့ၣ်ဧိၤညၣ်ဧိၤလၢပီၣ်လဲၣ်ပူၤ, ဒီးထိၣ်ဧိၤလံၣ်ဧိၤလၢ တၢ်ဖးဖီ, ဒီးကယဲၢ်တၢ်အသး လၢအဟူးအဂဲၤလၢဟီၣ်ခိၣ်ချၢန့ၣ်တက့ၢ်.”—၁ မိၤၡ့ ၁:၂၈.
ဒ်သိးနီၢ်အံၣ်အုဒီးစီၤအၤဒၣ် ကမၤပှဲၤဟီၣ်ခိၣ်အဂီၢ် အဝဲသ့ၣ်ကလိၣ်ဘၣ်တၢ်ဆၢကတီၢ်န့ၣ်လီၤ. ဒ်ယွၤတိာ်ပာ်ဝဲအသိး နီၢ်အံၣ်အုန့ၣ် ကဘၣ်အိၣ်ဖျဲၣ်ထီၣ်ဝဲအဖိတဖၣ် ဒီးအဖိတဖၣ်စ့ၢ်ကီး ကဘၣ်အိၣ်ဖျဲၣ်ထီၣ်ကဒီးဝဲအဖိတဖၣ် တုၤလၢဟီၣ်ခိၣ်ပှဲၤဝဲတစုန့ၣ်လီၤ. (ယၡါယၤ ၄၅:၁၈) မ့ၢ်နဆိကမိၣ်လၢ ယဟိဝၤယွၤတ့လီၤ နီၢ်အံၣ်အုဒီးစီၤအၤဒၣ်လၢ ကအိၣ်မူဘၣ်ထဲလၢ ကထံၣ်ဘၣ်တၢ်ကမၤအသး ဒီးအဖိအလံၤတဖၣ်န့ၣ်လီၤဧါ.
ဆိကမိၣ်ကွၢ် ကစၢ်ယွၤဟ့ၣ်လီၤဝဲ စီၤအၤဒၣ်အမူဒါလၢ ကဘၣ်ကွၢ်ထွဲဝဲ ဆၣ်ဖိကီၢ်ဖိတဖၣ်န့ၣ်တက့ၢ်. ကစၢ်ယွၤတဲဘၣ်အီၤလၢ ကဘၣ်ယုၢ်န့ၢ်ဝဲ ဆၣ်ဖိကီၢ်ဖိခဲလၢာ်အမံၤ အဃိ အဝဲကလိၣ်ဘၣ်တၢ်ဆၢကတီၢ်ဖးယံာ်ညါလီၤ. (၁ မိၤၡ့ ၂:၁၉) စီၤအၤဒၣ် ကွၢ်ထွဲဝဲဆၣ်ဖိကီၢ်ဖိဒီး ကဟုကယာ်ဝဲကသ့ဂ့ၤဂ့ၤအဂီၢ် ကဘၣ်မၤလိဝဲ ဆၣ်ဖိကီၢ်ဖိတဖၣ်အဂ့ၢ်လီၤ. အဃိ အဝဲကလိၣ်ဘၣ်တၢ်ဆၢကတီၢ်အါန့ၢ်ဒံးလၢ အယုၢ်န့ၢ်ဝဲအမံၤန့ၣ်လီၤ.
ကစၢ်ယွၤမၤလိာ်ဝဲ ပှၤနီၢ်ဒီမါဝၤအဆိကတၢၢ်ခံဂၤ လၢကဘၣ်မၤပှဲၤဟီၣ်ခိၣ် ဒီးကကွၢ်ထွဲဝဲဆၣ်ဖိကီၢ်ဖိ အဃိပသ့ၣ်ညါဘၣ်လၢ အဝဲသ့ၣ်ဘၣ်တၢ်တ့လီၤအီၤ လၢကအိၣ်မူဘၣ်ဝဲဖးယံာ်အဂီၢ်လီၤ. ဒီးစီၤအၤဒၣ်န့ၣ်အိၣ်မူဘၣ်စ့ၢ်ကီး ဖးယံာ်ညါလီၤ.
ကစၢ်ယွၤတိာ်ပာ်ဝဲလၢ ပှၤဟီၣ်ခိၣ်ဖိတဖၣ် ကအိၣ်မူဘၣ်လီၤထူလီၤယိာ် လၢဟီၣ်ခိၣ်ပၤရဒံစူးအပူၤ
ပှၤလၢအသးသမူထီဝဲတဖၣ်
စီၤအၤဒၣ် အနံၣ် ၉၃၀
စီၤမသူၤၡလၤ အနံၣ် ၉၆၉
စီၤနိအၤ အနံၣ် ၉၅၀
မုၢ်မဆါတနံၤအံၤ ပှၤသးအနံၣ် ၇၀-၈၀
လံာ်စီဆှံပာ်ဖျါထီၣ်ဝဲလၢ ပှၤဟီၣ်ခိၣ်ဖိလၢညါတဖၣ် အသးသမူထီန့ၢ်ဒံး ပှၤလၢအအိၣ်မူဘၣ်လၢ ဆၢကတီၢ်ခဲအံၤတဖၣ်လီၤ. လံာ်စီဆှံတဲဝဲလၢ “စီၤအၤဒၣ်အမုၢ်နံၤခဲလၢာ်န့ၣ် မ့ၢ်အနံၣ် ၉၃၀” န့ၣ်လီၤ. တကးဒံးဘၣ် ပာ်ဖျါထီၣ်စ့ၢ်ကီးဝဲလၢ ပှၤအဂၤဃုဂၤန့ၣ် အိၣ်မူဘၣ်ဝဲ ယံာ်န့ၢ်ဒံးအနံၣ် ၉၀၀ န့ၣ်လီၤ. ဒီးပှၤသ့ၣ်တဖၣ်န့ၣ်မ့ၢ်ဝဲ စီၤၡ့သး, စီၤအနိၣ်, စီၤက့ၤနၣ်, စီၤယၤရ့း, စီၤမသူၤၡလၤ ဒီးစီၤနိအၤန့ၣ်လီၤ. အဝဲသ့ၣ်ခဲလၢာ် အိၣ်မူဘၣ်ဝဲလၢ တချုးဖဲထံၣ်လုၢ်ဘၢတၢ်အခါန့ၣ်လီၤ. ဖဲထံလုၢ်ဘၢတၢ်အခါန့ၣ် စီၤနိအၤအသးအိၣ် ၆၀၀ လံ. (၁ မိၤၡ့ ၅:၅-၂၇; ၇:၆; ၉:၂၉) ဘၣ်မနုၤအဃိအဝဲသ့ၣ် သးသမူထီဝဲလဲၣ်.
ဖဲန့ၣ်အခါ အဝဲသ့ၣ်အိၣ်မူဝဲ ဘူးဒီးတၢ်လၢတၢ်ပှဲၤ အဃိအဝဲသ့ၣ်အသးသမူထီဝဲလီၤ. တၢ်လၢတၢ်ပှဲၤဒီး တၢ်သးသမူထီန့ၣ် ဘၣ်ထွဲလိာ်အသးဒ်လဲၣ်. ပမၤနၢၤကွံာ် တၢ်သံကသ့ဒ်လဲၣ်. ဒ်သိးပကသ့ၣ်ညါတၢ်စံးဆၢအံၤအဂီၢ် ပကဘၣ်နၢ်ပၢၢ်ဆိလၢ ဘၣ်မနုၤအဃိပသးပှၢ်ထီၣ် ဒီးပဘၣ်သံလဲၣ်.
တၢ်ဂ့ၤအဂၤလၢ နကဘၣ်သး
လံာ်စီဆှံ အတၢ်သိၣ်လိလၢ အရ့ဒိၣ်တဖၣ်
ဘၣ်မနုၤအဃိ ကစၢ်ယွၤတ့လီၤဟီၣ်ခိၣ်လဲၣ်.
ဟီၣ်ခိၣ်လၢပအိၣ်အံၤ ပှဲၤဝဲဒီးတၢ်ဃံတၢ်လၤလီၤ. ကစၢ်ယွၤပာ်လီၤဝဲဟီၣ်ခိၣ်ဒီး မုၢ်အတၢ်ဒ့ၣ်စၢၤန့ၣ် တယံၤတလၢ ဒီးတဘူးတလၢဘၣ်. ဒီးယွၤဒုးဒ့ခံဝဲဟီၣ်ခိၣ်အံၤ ဖဲအကြၢးအဘၣ်. ဒီးဟီၣ်ခိၣ်အံၤ တရံးဝဲမုၢ်န့ၣ် တချ့တလၢ ဒီးတကဘှၢတလၢ စ့ၢ်ကီးဘၣ်. ဘၣ်မနုၤအဃိ ကစၢ်ယွၤ တ့လီၤဝဲဟီၣ်ခိၣ်အံၤ ဂ့ၤထဲအံၤညါလဲၣ်.
