ပှၤပူၤဖျဲးထီၣ်လၢ တၢ်သံတသ့နီတဂၤဘၣ်
ထံၣ်တမှံကွၢ်လၢ ဖဲနကွၢ် တၢ်ဂီၤမူဘၣ်ဃးဒီး ပှၤမံၤဟူသၣ်ဖျါတဂၤ ဘၣ်သ့ၣ်သ့ၣ် အကမ့ၢ်ပှၤတဂၤလၢ အမံၤဟူသၣ်ဖျါလၢ တၢ်ဒ့တၢ်အူတကပၤဒီး နဘၣ်သူၣ်ဘၣ်သးအီၤလီၤ. တၢ်ဂီၤမူန့ၣ် ကစးထီၣ်သးလၢ ပိာ်မုၣ်ဖိတဂၤ စးထီၣ်မၤလိဝဲ တၢ်ဒ့တၢ်အူလၢ အနီၢ်ဆံးအခါလံၤလံၤ ဒီးအဘၣ်ကၠီးလိအသး အဘျီတဖၣ်အဘျီညါလီၤ. ဝံၤဒီးအကဟးဒ့တၢ်အူတၢ်လၢ တၢ်သူၣ်ဝံၣ်သးဆၢ (Concert) အလီၢ်တဖၣ် ဒီးဟးဘၣ်လၢထံၣ်ကီၢ်အါဘ့ၣ် ဒီးကဲထီၣ်ဝဲပှၤမံၤဟူသၣ်ဖျါ လၢဟီၣ်ခိၣ်ဒီဘ့ၣ်ညါလီၤ. တယံာ်တမီၢ်ဘၣ်ဒီး လၢခံအသးပှၢ်ထီၣ်ဒီး အသံဝဲန့ၣ်လီၤ. ဒီးတၢ်ဂီၤမူန့ၣ် ကတၢၢ်ဝဲဖဲန့ၣ်လီၤ.
တၢ်ဂီၤမူအံၤ တမ့ၢ်တၢ်တဲမုာ်နၢ်ဘၣ် ဘၣ်ဆၣ် အမ့ၢ်ဝဲပှၤတဂၤအဂ့ၢ်နီၢ်ကီၢ်လီၤ. ပှၤလၢအမံၤဟူသၣ်ဖျါလၢ တၢ်ဒ့တၢ်အူ, စဲအ့ၣ်, ဒီးတၢ်လိာ်ကွဲတကပၤ မ့တမ့ၢ် အမံၤဟူသၣ်ဖျါလၢ တၢ်အဂၤမ့ၢ်ဂ့ၤ လၢခံကတၢၢ် အဝဲသ့ၣ်ကိးဂၤဒဲး ဘၣ်သံဝဲလီၤ. အဝဲမ့ၢ်ဖျိးစိဝဲလၢ တၢ်ဂ့ၢ်အါမံၤ သနာ်က့ အသးပှၢ်ထီၣ်ဒီးသံဝဲလီၤ အဃိအမ့ၢ်တသးပှၢ်ထီၣ်ဒီးသံဝဲန့ၣ် အကဆဲးဖျိးစိဒံးထဲလဲၣ်.
တၢ်ကဲထီၣ်သးဒ်အံၤန့ၣ် မ့ၢ်လီၤသးအုးထဲလဲၣ်သနာ်က့ ပဝဲခဲလၢာ်ပကဘၣ်လဲၤခီဖျိအီၤလီၤ. (စံၣ်တဲၤတဲလီၤတၢ် ၉:၅) ပမ့ၢ်ဂုာ်ကျဲးစၢးထဲလဲၣ်သနာ်က့ ဘၣ်ဃးဒီးတၢ်သံတၢ်ပှၢ်န့ၣ် ပဟးဆှဲအီၤတန့ၢ်ဘၣ်. ခီဖျိလၢတၢ်ဆူးတၢ်ဆါ, တၢ်ဘၣ်ဒိဘၣ်ထံး ဟဲဘၣ်ပှၤသတူၢ်ကလာ်အဃိ ပသးသမူန့ၣ်ကဖုၣ်လီၤဝဲလီၤ. ဒ်လံာ်စီဆှံ ပာ်ဖျါထီၣ်ဝဲအသိး ပတၢ်အိၣ်မူန့ၣ် လီၤဂာ်ဒ်ဘှ့ၣ်လၢဂီၤခီလၢ “အအိၣ်ဖျါ တစိၢ်ဖိ, ဒီးလၢအလီၢ်ခံန့ၣ် ဒံကွံာ်ဝဲလီၤ.”—ယၤကိာ် ၄:၁၄.
ခီဖျိလၢတၢ်ကဲထီၣ်သးဒီးပှၤသ့ ကိးဆၢကိးကတီၢ်ဒဲးအဃိ ပှၤဟီၣ်ခိၣ်ဖိတဖၣ်တဲဝဲလၢ ပက “အီၣ်သကိးအီသကိးတၢ်တက့ၢ်. အဂ့ၢ်ဒ်အံၤ ခဲဂီၤပကသံလီၤ.” (၁ ကရံၣ်သူး ၁၅:၃၂) ပှၤဒ်န့ၣ်အသိးတဖၣ် ဖျါလၢအဝဲသ့ၣ်တၢ်မုၢ်လၢ်လၢ ခါဆူညါအဂီၢ်န့ၣ်တအိၣ်ဘၣ်, တမ့ၢ်ဧါ. ဒ်လဲၣ်ဂ့ၤဒ်လဲၣ်ဂ့ၤ မုၢ်ကအိၣ်ဝဲတနံၤ ပမ့ၢ်ဘၣ်သဂၢၢ်ဒီးတၢ်ကီတၢ်ခဲန့ၣ် ပကသံကွၢ်လီၤဘၣ် ပနီၢ်ကစၢ်သးလၢ ‘ပတၢ်အိၣ်မူန့ၣ်မ့ၢ်ထဲ ပဟဲအိၣ်ဖျဲၣ်ထီၣ်, သးပှၢ်ထီၣ်ဒီးသံလီၤဧါ.’ အဃိ အတၢ်စံးဆၢန့ၣ် ပထံၣ်န့ၢ်အီၤကသ့ဖဲလဲၣ်.
ပှၤအါဂၤန့ၣ်မုၢ်လၢ်ဝဲလၢ ကထံၣ်န့ၢ်ဝဲတၢ်စံးဆၢအံၤလၢ ပှၤစဲအ့ၣ်ဖိတဖၣ်အအိၣ်လီၤ. ပှၤစဲအ့ၣ်ဖိ ဒီးကသံၣ်သရၣ်တဖၣ်န့ၣ် ထံၣ်န့ၢ်ဝဲကျဲလၢ ကမၤထီထီၣ်ဝဲပှၤသးသမူန့ၣ်လီၤ. ဒီးပှၤစဲအ့ၣ်ဖိတနီၤ ဂုာ်ကျဲးစၢး မၤထီထီၣ်ပှၤသးသမူအါန့ၢ်ဒံးအလီၢ်လီၤ. ပှၤစဲအ့ၣ်ဖိတဖၣ်မၤဝဲ မ့ၢ်ထီၣ်ဘးဂ့ၤ, တထီၣ်ဘးဂ့ၤ ပှၤဆဲးသံကွၢ်ဒံးဝဲ ဘၣ်မနုၤအဃိပသးပှၢ်ထီၣ် ဒီးပဘၣ်သံဝဲလဲၣ်. မ့ၢ်ပအိၣ်ဒီးတၢ်မုၢ်လၢ်လၢ ပကမၤနၢၤကွံာ်ဒုၣ်ဒါ လၢအမ့ၢ်တၢ်သံန့ၣ်ဧါ. ဘၣ်ဃးဒီး တၢ်သံကွၢ်အံၤန့ၣ် တၢ်စံးဆၢအိၣ်လၢ တၢ်ဂ့ၢ်လၢခံတခါအပူၤ ဒီးအခိၣ်တီမ့ၢ်ဝဲ ပတၢ်အိၣ်မူန့ၣ်မ့ၢ်ထဲ ပဟဲအိၣ်ဖျဲၣ်ထီၣ် သးပှၢ်ထီၣ်ဒီးသံလီၤဧါ.
တၢ်ဂ့ၤအဂၤလၢ နကဘၣ်သး
တၢးထီခိးတၢ်
တၢ်ဃုသ့ၣ်ညါဘၣ်ဃးဒီး သးသမူကထီထီၣ်အဂီၢ်
ပှၤစဲအ့ၣ်ဖိလၢ နီၢ်ခိက့ၢ်ဂီၤတကပၤ ဒီးလၢတၢ်ဟဲလီၤစၢၤလီၤသွဲၣ်တကပၤန့ၣ် ဂုာ်ကျဲးစၢးဃုသ့ၣ်ညါဝဲဘၣ်ဃးဒီး ဘၣ်မနုၤအဃိပှၤကညီ ဘၣ်ပှၢ်ထီၣ်ဝဲလဲၣ်. မ့ၢ်ပှၤစဲအ့ၣ်ဖိတဖၣ်ဃုထံၣ်န့ၢ်ဝဲ တၢ်မနုၤလံလဲၣ်.
