ဘၣ်မနုၤအဃိ ပသးပှၢ်ထီၣ်ဒီးပဘၣ်သံလဲၣ်
ကစၢ်ယွၤတတိာ်ပာ်ဝဲလၢ ပှၤဟီၣ်ခိၣ်ဖိတဖၣ် ကဘၣ်သံဝဲဘၣ်. ဖဲအတ့လီၤဝဲ မိၢ်ပၢ်အဆိကတၢၢ်ခံဂၤလၢအမ့ၢ် နီၢ်အံၣ်အုဒီးစီၤအၤဒၣ်အခါ ဟ့ၣ်လီၤအဝဲသ့ၣ်နီၢ်ခိ ဒီးတၢ်ဆိကမိၣ်လၢအလၢအပှဲၤလီၤ. ဒီးအဝဲသ့ၣ်မ့ၢ်ဆဲးအိၣ်မူဝဲတုၤလၢ မုၢ်မဆါတနံၤအံၤန့ၣ်သ့ဝဲလီၤ. ပမ့ၢ်ကွၢ် ယဟိဝၤယွၤတဲတ့ၢ်ဝဲ စီၤအၤဒၣ်ဘၣ်ဃးဒီး သ့ၣ်တထူၣ်လၢအအိၣ်လၢ ဧ့ၤဒ့ၣ်တၤသၣ်လီၢ်အပူၤန့ၣ် ပသ့ၣ်ညါအီၤလီၤ.
ကစၢ်ယွၤစံးဘၣ် စီၤအၤဒၣ်လၢ “မုၢ်တနံၤလၢနအီၣ်အီၤန့ၣ် သံဒီးနကသံလီၤ.” (၁ မိၤၡ့ ၂:၁၇) ကစၢ်ယွၤမ့ၢ်တ့လီၤစီၤအၤဒၣ်ထဲလၢ ကဘၣ်သးပှၢ်ထီၣ်ဒီးသံဝဲန့ၣ် အတၢ်မၤလိာ်အံၤ တမ့ၢ်လၢအခီပညီကအိၣ်ဘၣ်. ဒီးစီၤအၤဒၣ်သ့ၣ်ညါဝဲလၢ အမ့ၢ်တအီၣ်သ့ၣ်အံၤအသၣ်ဘၣ်န့ၣ် တမ့ၢ်လၢအကသံဝဲဘၣ်.
ကစၢ်ယွၤတတိာ်ပာ်ဝဲလၢ ပှၤဟီၣ်ခိၣ်ဖိတဖၣ် ကဘၣ်သံဝဲဘၣ်
နီၢ်အံၣ်အုဒီးစီၤအၤဒၣ် ဒ်သိးကဆဲးအိၣ်မူဝဲအဂီၢ် တလိၣ်လၢကဘၣ်အီၣ် သ့ၣ်အံၤအသၣ်ဘၣ်. မ့ၢ်လၢကရၢၢ်အပူၤန့ၣ် အိၣ်ဝဲဒီးတၤသူတၤသၣ်လၢလၢပှဲၤပှဲၤအဃိန့ၣ်လီၤ. (၁ မိၤၡ့ ၂:၉) ပှၤဒီမါဝၤအဆိကတၢၢ်ခံဂၤအံၤ မ့ၢ်တအီၣ်ဝဲသ့ၣ်အံၤအသၣ်ဘၣ်န့ၣ် ပာ်ဖျါထီၣ်လၢ အဝဲသ့ၣ်ဒိကနၣ်ဝဲ ပှၤလၢအဟ့ၣ်လီၤအီၤသးသမူတဂၤအံၤန့ၣ်လီၤ. တကးဒံးဘၣ် ပာ်ဖျါထီၣ်လၢကစၢ်ယွၤန့ၣ် အိၣ်ဒီးတၢ်ခွဲးတၢ်ယာ်လၢလၢပှဲၤပှဲၤ လၢကဟံးစုနဲၣ်ကျဲအဝဲသ့ၣ်န့ၣ်လီၤ.
ဘၣ်မနုၤအဃိ နီၢ်အံၣ်အုဒီးစီၤအၤဒၣ် ဘၣ်သံဝဲလဲၣ်
ဒ်သိး ပကနၢ်ပၢၢ် ဘၣ်မနုၤအဃိ နီၢ်အံၣ်အုဒီး စီၤအၤဒၣ် ဘၣ်သံဝဲလဲၣ်န့ၣ် ပကဘၣ် သမံသမိးကွၢ်အီၤလီၤ. ဖဲမုၣ်ကီၤလံၢ်သူဝဲဂုၢ်တဘိလၢ ကတဲလံၣ်တဲလီတၢ်အၢအၢသီသီတခါလၢ ကမၤဘၣ်ဒိပဝဲခဲလၢာ်ဒ်လဲၣ်န့ၣ်လီၤ. လံာ်စီဆှံတဲဝဲလၢ “ဒီးတၢ်လၢဂုၢ်န့ၣ် ကူၣ်တၢ်သ့န့ၢ်ကယဲၢ် ဆၣ်ဖိကီၢ်ဖိလၢပှၢ်လၢ်ကျါလၢ ကစၢ်ယွၤတ့လီၤအီၤန့ၣ်တက့ၢ်လီၤ. ဒီးစံးဘၣ်ပိာ်မုၣ်န့ၣ်, ကယဲၢ်သ့ၣ်အိၣ်လၢ တၤသၣ်အလီၢ်ပူၤ တထံးလၢ်လၢ်န့ၣ်ယွၤမၤလိာ်သု, အီၣ်အီၤတဂ့ၤန့ၣ်, သပှၢ်တၢၢ်ဧါ.”—၁ မိၤၡ့ ၃:၁.
နီၢ်အံၣ်အု စံးဆၢက့ၤအီၤလၢ “သ့ၣ်အသၣ်လၢတၤသၣ်အလီၢ်ပူၤန့ၣ်, ပအီၣ်ဘၣ်သၢၣ်. မ့မ့ၢ်သ့ၣ်အိၣ်လၢ တၤသၣ်အလီၢ်အသးကံၢ်ပူၤတထံးန့ၣ်, ယွၤစံးဝဲဒၣ်, အီၣ်အီၤတဂ့ၤ, ထိးအီၤတဂ့ၤ, သုကသံဘၣ်ဖုးလီၤ.” ဝံၤဒီးဂုၢ်န့ၣ် တဲက့ၤအီၤလၢ “သုတသံဒီး သုတသံဘၣ်ဘၣ်လီၤ. မ့ၢ်ယွၤသ့ၣ်ညါလၢ မုၢ်တနံၤလၢသုအီၣ်အီၤန့ၣ် သုမဲာ်ကအိးထီၣ်အသး, ဒီးသုကလီၤဂာ်ယွၤ, ဒီးကသ့ၣ်ညါတၢ်ဂ့ၤ ဒီးတၢ်အၢန့ၣ်လီၤ.” ဒီးမုၣ်ကီၤလံၢ်န့ၣ်ပာ်ဖျါထီၣ်လၢ ယဟိဝၤယွၤမ့ၢ်ပှၤလၢ အလံၣ်တၢ်လီတၢ်တဂၤဒီး တအဲၣ်ဒိးဝဲလၢနီၢ်အံၣ်အု ဒီးစီၤအၤဒၣ်ကဒိးန့ၢ်ဘၣ် တၢ်အဂ့ၤကတၢၢ်ဘၣ်န့ၣ်လီၤ.—၁ မိၤၡ့ ၃:၂-၅.
နီၢ်အံၣ်အုနာ်ဝဲ တၢ်လၢအနၢ်ဟူဘၣ်တဖၣ် ဒီးကွၢ်ထံဝဲသ့ၣ်န့ၣ် ဒီးဖျါဃံလၤဘၣ်အမဲာ် ဒီးမိၣ်န့ၢ်သးလီဝဲအဃိ ဒဲးအီၣ်ဝဲသ့ၣ်တထူၣ်န့ၣ်အသၣ်လီၤ. ဒီးလံာ်စီဆှံတဲဝဲလၢ “ဒီးဟ့ၣ်စ့ၢ်ကီးအဝၤ အိၣ်ဒီးအီၤ, ဒီးအဝဲဒၣ်အီၣ်ဝဲလီၤ.”—၁ မိၤၡ့ ၃:၆.
ကစၢ်ယွၤတဲဘၣ် စီၤအၤဒၣ်လၢ “မုၢ်တနံၤလၢနအီၣ်အီၤန့ၣ် သံဒီးနကသံလီၤ.”—၁ မိၤၡ့ ၂:၁၇
ဖဲကစၢ်ယွၤထံၣ်ဝဲ အဖိလၢအအဲၣ်ဘၣ်ဝဲသ့ၣ်တဖၣ် တဒိကနၣ်လၢၤအီၤအခါ အကသးဘၣ်ဒိဝဲထဲလဲၣ်. အဃိအဝဲမၤဝဲဒ်လဲၣ်. ယဟိဝၤယွၤတဲဘၣ် စီၤအၤဒၣ်လၢ “တုၤနက့ၤက့ၤဆူဟီၣ်ခိၣ်လာ်လီၤ. အဂ့ၢ်ဒ်အံၤ, တၢ်ဟံးန့ၢ်နၤလၢအီၤလီၤ. အဂ့ၢ်ဒ်အံၤ, နမ့ၢ်ဟီၣ်ခိၣ်ကမူၣ်, ဒီးနကက့ၤက့ၤဆူဟီၣ်ခိၣ်ကမူၣ်လီၤ.” (၁ မိၤၡ့ ၃:၁၇-၁၉) လၢတၢ်န့ၢ်အဃိ “ဒီးစီၤအၤဒၣ်အမုၢ်နံၤခဲလၢာ်န့ၣ် မ့ၢ်အနံၣ် ၉၃၀ ဒီးသံဝဲလီၤ.” (၁ မိၤၡ့ ၅:၅) အဃိစီၤအၤဒၣ်တလဲၤထီၣ်ဆူမူခိၣ်ဘၣ်ဒီး တအိၣ်မူစ့ၢ်ကီးလၢ တၢ်လီၢ်အဂၤတတီၤတီၤလၢၤဘၣ်. တချုးလၢ ယဟိဝၤယွၤတ့လီၤစီၤအၤဒၣ်လၢ ဟီၣ်ခိၣ်အကမူၣ်ဒံးဘၣ်န့ၣ် အဝဲတအိၣ်လၢ တၢ်လီၢ်အဂၤနီတပူၤဘၣ်. အဃိဖဲအသံအခါ အသးသမူတအိၣ်လၢၤဘၣ် ဒီးကဲထီၣ်က့ၤဟီၣ်ခိၣ်ကမူၣ် ဒ်လၢညါအသိးန့ၣ်လီၤ. လီၤသးအုးထဲလဲၣ်, စီၤအၤဒၣ်န့ၣ်သံဝဲဒီး လီၤမၢ်ကွံာ်ဝဲလီၤ.
ဘၣ်မနုၤအဃိ ပတလၢတပှဲၤဘၣ်လဲၣ်
နီၢ်အံၣ်အုဒီး စီၤအၤဒၣ် တဒိကနၣ်တၢ်ဘၣ်အဃိ အဝဲသ့ၣ်တၢ်လၢတၢ်ပှဲၤ ဒီးလၢကအိၣ်မူဘၣ်လီၤထူလီၤယိာ်အဂီၢ် လီၤမၢ်ကွံာ်ဝဲခဲလၢာ်လီၤ. အဝဲသ့ၣ်တဒိကနၣ်တၢ်ဘၣ်န့ၣ် တဘၣ်ဒိထဲအဝဲသ့ၣ်ခံဂၤဧိၤဘၣ်. မ့ၢ်လၢအဝဲသ့ၣ်မၤဘၣ် တၢ်ဒဲးဘးအဃိ ကဲထီၣ်က့ၤပှၤတလၢတပှဲၤဒီး အဖိအလံၤခဲလၢာ် ဒိးန့ၢ်ဘၣ်ဝဲတၢ်ဒဲးဘးန့ၣ်လီၤ. ရိမ့ၤ ၅:၁၂ န့ၣ်တဲဝဲလၢ “မ်ဒ်န့ၣ်ဒီး ဒ်တၢ်ဒဲးဘးဟဲနုာ် ဆူဟီၣ်ခိၣ်ချၢလၢပှၤတဂၤအဃိ, ဒီးတၢ်သံတၢ်ပှၢ်လၢ တၢ်ဒဲးဘးအဃိ အသိးန့ၣ်, ဒီးဒ်န့ၣ်အသိး ပှၤခဲလၢာ် မၤတ့ၢ် တၢ်ဒဲးဘးသတးဒီး, ပှၤခဲလၢာ်ဘၣ်တၢ်သံတၢ်ပှၢ်” န့ၣ်လီၤ.
လံာ်စီဆှံပာ်ဖျါထီၣ်ဝဲ တၢ်ဒဲးဘးဒီးတၢ်သံန့ၣ် လီၤဂာ်ဒ်သိး “တၢ်မၤဘၢမဲာ်လၢအအိၣ်လၢ ပှၤကိးကလုာ်ဒဲးအဖီခိၣ်, ဒီးထၣ်တဘ့ၣ်လၢ အထါထၣ်အသးလၢ ပှၤကိးကလုာ်ဒဲးအဖီခိၣ်လီၤ.” (ယၡါယၤ ၂၅:၇) တၢ်မၤဘၢမဲာ်တခါအံၤ လၢအလုၢ်ဘၢဝဲပှၤဟီၣ်ခိၣ်ဖိခဲလၢာ် ဒ်တၢ်ကသွံ (ဘှ့ၣ်) လၢအအိၣ်ဒီး အစုၣ်အပျၢ်အသိး ပဃ့ၢ်ပူၤဖျဲးဝဲပသးလၢတၢ်သံတသ့နီတဂၤဘၣ်. လၢတၢ်န့ၢ်အဃိ “ပှၤခဲလၢာ်သံဝဲလၢ စီၤအၤဒၣ်” အဃိန့ၣ်လီၤ. (၁ ကရံၣ်သူး ၁၅:၂၂) ဒ်တၢ်မၢဖိစီၤပီလူးတဲဝဲအသိး “မ့ၢ်မတၤ ကထုးထီၣ်ကွံာ်ယၤလၢ တၢ်သံအံၤအကစၢ်မိၢ်ပှၢ်တဂၤလဲၣ်.” အဃိပှၤမၤပူၤဖျဲးထီၣ်ပှၤလၢ တၢ်သံအံၤသ့န့ၣ် အိၣ်တဂၤဂၤဧါ.—ရိမ့ၤ ၇:၂၄.