ဖဲ​ပှၤ​တဂၤ​ဂၤ ​မ့ၢ်​မၤဆါ​ပှၤ​န့ၣ် ညီ​ဒိၣ်မး​လၢ ပ​က​အဲၣ်ဒိး မၤဆၢ​က့ၤ​အဝဲသ့ၣ်. ဘၣ်ဆၣ် ကစၢ်​ယွၤ​တ​အဲၣ်ဒိးဝဲ​လၢ ပ​က​က့ၤ​မၤကၣ်​က့ၤ​တၢ်ဘၣ်. ကစၢ်​ယွၤ အဲၣ်ဒိးဝဲ​လၢ ပ​ကအိၣ်​ဒီး​တၢ်​သးစူၤ. ခီဖျိ​လၢ တယံာ်​လၢၤဘၣ်​န့ၣ် အ​အၢၣ်လီၤ​ပှၤလၢ အ​က​မၤ​ဘၣ်ဂီၢ်က့ၤ​ဝဲ တၢ်​တတီ​တလိၤ​လၢ အ​ဟဲ​အိၣ်​ထီၣ်​ခဲလၢာ်.​—စံးထီၣ်​ပတြၢၤ ၃၇:​၇, ၁၀.

ပှၤ​ဟီၣ်ခိၣ်​ဖိ​တဖၣ် တလၢ​တ​ပှဲၤ​အဃိ အဝဲသ့ၣ် မ့ၢ်​ဟ့ၣ်ကၣ်​က့ၤ​တၢ်န့ၣ် အိၣ်​ဒၣ်​မၤ​အါထီၣ်​ဝဲ တၢ်​သးဟ့​လီၤ. အဃိ ဖဲ​ပှၤ​တဂၤ​ဂၤ မ့ၢ်​တဲဆါ​ဘၣ်​နၤ မ့မ့ၢ် မၤဆါ​နၤ​အခါ​န့ၣ် တဘၣ် ဟ့ၣ်ကၣ်​က့ၤ အဝဲသ့ၣ်​တဂ့ၤ. ဂုာ်ကျဲးစၢး ပၢၤ​န​သး ဒီး​ရ့​က့ၤ​ဒီး အဝဲသ့ၣ်​ဂ့ၤဂ့ၤ. တဘျီ​တခီၣ်​န့ၣ် ပ​မ့ၢ်​သးပ့ၤနီၣ်​ကွံာ် ​တၢ်​လၢ​အ​ဟဲ​ကဲထီၣ်​လၢ အပူၤကွံာ်​တဖၣ်​န့ၣ် မ့ၢ်ဝဲ တၢ်​လၢ​အဂ့ၤ​ကတၢၢ်​လီၤ. (ကတိၤဒိ ၁၉:၁၁) ဘၣ်ဆၣ် တဘျီ​တခီၣ် တၢ်အိၣ်သး က​အိၣ်ဝဲ​လၢ န​ကဘၣ်​တီၣ်​ဖျါထီၣ် တၢ်ဂ့ၢ်​တၢ်ကျိၤ​လၢ ပှၤဘၣ်​မူ​ဘၣ်ဒါ​တဖၣ်​အအိၣ်. အဒိ န​က​မ့ၢ်​ပှၤလၢ အ​လဲၤ​ခီဖျိ​ဘၣ် ပှၤ​မၤနၤ​တတီ​တလိၤ​ဘၣ်. အဃိ ဖဲန့ၣ်​အခါ န​ဃုထၢ​လၢ န​က​တီၣ်​ဖျါထီၣ် တၢ်ဂ့ၢ်​သ့ၣ်​တဖၣ်​အံၤ​လၢ ပလံး အ​အိၣ် မ့တမ့ၢ် ပှၤဘၣ်​မူ​ဘၣ်ဒါ​တဖၣ် အ​အိၣ်​သ့ဝဲ​လီၤ.

န​က​မၤ​ဘၣ်​ထီၣ်​က့ၤ တၢ်အိၣ်သး​အဂီၢ် ​န​ဃုကျဲ​မ့ၢ်​တဘၣ်​ဘၣ်​ဟီ​မီၤ. န​ဂုာ်ကျဲးစၢး မၤဃူမၤဖိး​တၢ်​လံ သနာ်က့ တၢ်ဃူ​တၢ်ဖိး​မ့ၢ်​တအိၣ်​ဒံးဘၣ်​မီၤ. န​က​မၤ​ဒ်လဲၣ်. တဘၣ်​ဟ့ၣ်ကၣ်​က့ၤ​တၢ်​တဂ့ၤ နမ့ၢ်​ဟ့ၣ်ကၣ်​က့ၤ​တၢ်န့ၣ် ညီနုၢ် အိၣ်​ဒၣ် န​က​မၤနး​ထီၣ်​က့ၤ တၢ်အိၣ်သး​လီၤ. ဘၣ်ဆၣ် န​မ့ၢ်​တ​ဟ့ၣ်ကၣ်​က့ၤ​တၢ်ဘၣ်​န့ၣ် န​မၤ​လီၤမၢ်​ကွံာ်ဝဲ တၢ်​သူၣ်​ဟ့ၣ်​သးဟ့​တဖၣ် သ့ဝဲ​လီၤ. န​မ့ၢ်​မၤထွဲ ကစၢ်​ယွၤ​အ​ဟံးစု​နဲၣ်ကျဲ​န့ၣ် န​နာ်​သ့​လၢ န​မၤ​ဘၣ်​ဂီၢ်​ကွံာ် တၢ်ကီ​တၢ်ခဲ​တဖၣ်​က​န့ၢ်. ဒီး​လံာ်စီဆှံ​တဲဝဲ​လၢ “သန့ၤ​စ့ၢ်ကီး န​သး​လၢ​အီၤ​တက့ၢ်. ဒီး​က​မၤ​ကဲထီၣ်​အီၤ​လီၤ.”​—စံးထီၣ်​ပတြၢၤ ၃၇:​၃-၅.