1. ၁. မုၣ်ကီၤလံၢ်. တၢ်​သးဟ့​လၢ ပ​ထံၣ်ဘၣ်​အီၤ​လၢ မုၢ်မဆါ​တနံၤ​အံၤန့ၣ် မုၣ်ကီၤလံၢ် ဒုးအိၣ်​ထီၣ်ဝဲ​လီၤ. မုၣ်ကီၤလံၢ်​ဒီး ပှၤလၢ​အိၣ်ဒီး တၢ်​ပာ်သူၣ်​ပာ်သး ဒ်သိး​ဒီး​အီၤ ဒီး​သးဟ့​ပှၤဂၤ​န့ၣ် ကစၢ်​ယွၤ ကမၤ​ဟးဂီၤ​ကွံာ် အဝဲသ့ၣ်​ခဲလၢာ်.​—စံးထီၣ်​ပတြၢၤ ၃၇:၃၈; ရိမ့ၤ ၁၆:၂၀.

2. ၂. ဟီၣ်ခိၣ်​လၢ မုၣ်ကီၤလံၢ်​ပၢဝဲ​န့ၣ် အိၣ်​ထဲ​တၢ်အၢ​တၢ်သီ. ကစၢ်​ယွၤ က​မၤ​လီၤမၢ်​ကွံာ် ပှၤလၢ​အ​ဒုးအိၣ်​ထီၣ် တၢ်အၢ​တၢ်သီ​တဖၣ်. တကး​ဒံးဘၣ် ပှၤလၢ​အ​ပၣ်ဃုာ်​လၢ ထံဂ့ၢ်​ကီၢ်ဂ့ၢ် ဒီး​တၢ်ဘူၣ်​တၢ်ဘါ​ခိၣ်နၢ်​တဖၣ်​လၢ အ​ဒုးအိၣ်​ထီၣ် တၢ်​သးဟ့, ပှၤ​မၤ​မုၢ်ကျိၤဝဲၤကွာ် (စံပွါယ့) လၢ​အ​သူၣ်လီ​သး​ကွံာ်​တၢ်, ပှၤလၢ​အ​မၤ​ဟးဂီၤ​တၢ် ဒီး​ပှၤလၢ​အ​လံၣ်အီၣ်​လီအီၣ်​ပှၤဂၤ​တဖၣ်​န့ၣ် ကစၢ်​ယွၤ က​မၤ​ဟးဂီၤ​ကွံာ်​အဝဲသ့ၣ် စ့ၢ်ကီး.​—၂ ပ့းတရူး ၃:၁၃.

3. ၃. ပှၤ​ဟီၣ်ခိၣ်​ဖိ​တဖၣ် တလၢ​တ​ပှဲၤ​ဘၣ်. လံာ်စီဆှံ ပာ်ဖျါ​ထီၣ်ဝဲ​လၢ ပဝဲ​ပှၤ​ဟီၣ်ခိၣ်​ဖိ​ခဲလၢာ်​န့ၣ် ဒိးန့ၢ်​ဘၣ်​ဝဲ တၢ်​တလၢ​တ​ပှဲၤ အဃိ ညီဒိၣ်မး​လၢ ပ​က​ဆိကမိၣ် ဒီး​မၤတၢ်​လၢ​အ​ကမၣ်. (ရိမ့ၤ ၅:၁၂) ပ​မ့ၢ်​ဟံးဃာ်​ပှၤဂၤ အ​တၢ်​ကမၣ် ဒီး​သးဟ့​ပှၤဂၤ​န့ၣ် ပ​အိၣ်ဒီး တၢ်​ပာ်သူၣ်​ပာ်သးလၢ အ​ကမၣ်. ကစၢ်​ယွၤ က​မၤ​လီၤမၢ်​ကွံာ် တၢ်​ပာ်သူၣ်​ပာ်သး​လၢ အတဂ့ၤ​ဘၣ်​တဖၣ်​ခဲလၢာ်. ဝံၤ​အလီၢ်​ခံ တၢ်​သးဟ့​လိာ်သး​န့ၣ် က​လီၤမၢ်​ကွံာ်ဝဲ လီၤထူ​လီၤယိာ်.​—ယၡါယၤ ၅၄:၁၃.

1. ၁. တၢ်​တတီ​တလိၤ တအိၣ်​လၢၤဘၣ်. ယွၤ​အဘီ​အမုၢ် က​ပၢဝဲ ဟီၣ်ခိၣ်​ဒီဘ့ၣ်. ဒီး​ဘီမုၢ်​အံၤ ကအိၣ်​လၢ​မူခိၣ် ဒီး​က​ပၢ​လီၤ​ဆိ​တၢ် လၢဟီၣ်ခိၣ်​ချၢ ဒီး​ဘီမုၢ်​အံၤ က​ပၢတၢ်​တီတီ​လိၤလိၤ လီၤထူ​လီၤယိာ်. (ဒၤနံးယ့လး ၂:၄၄) ပှၤလၢ​အ​သးဟ့ ကလုာ်ဒူၣ်​အဂၤ ဒီး​ပှၤ​ခိၣ်ကိၤ​လၢ တ​အဲၣ်ဒိး​တူၢ်လိာ်​ပှၤဂၤ အ​တၢ်​ထံၣ်ဘၣ်​န့ၣ် တအိၣ်​လၢၤဘၣ်. ကစၢ်​ယွၤ က​မၤ​လီၤမၢ်​ကွံာ် တၢ်​တတီ​တလိၤ​ခဲလၢာ်​လၢ ပှၤ​ဟီၣ်ခိၣ်​ဖိ​ထံၣ်ဘၣ်​ဝဲ.​—လူၤကၣ် ၁၈:၇.

2. ၂. ပှၤ​ခဲလၢာ် ကအိၣ်​ဘၣ် ဃူဃူ​ဖိးဖိး. ပှၤ​တထံၣ်​ဘၣ် တၢ်​မၤဆူၣ်​မၤစိး ဒီး​တၢ်ဒုး​တၢ်ယၤ နီ​တဂၤ​လၢၤဘၣ်. (စံးထီၣ်​ပတြၢၤ ၄၆:၉) ပှၤဟီၣ်ခိၣ်​ဖိ ကိးဂၤ​ဒဲး က​အိၣ်ဃူ​အိၣ်ဖိး​အဃိ တၢ်လီၢ်​ကိး​တီၤ​ဒဲး​န့ၣ် တၢ်ဘၣ်ယိၣ်​တအိၣ်​လၢၤဘၣ်​.​—စံးထီၣ်​ပတြၢၤ ၇၂:၇.

3. ၃. ပှၤ​ကိးဂၤ​ဒဲး က​အိၣ်မူ​ဘၣ် မုာ်မုာ်​ခုၣ်ခုၣ် လီၤထူ​လီၤယိာ်. ပှၤ​ကိးဂၤ​ဒဲး က​အဲၣ်လိာ်​သး တဂၤ​ဒီး​တဂၤ. (မးသဲ ၂၂:၃၉) ပှၤ​တထံၣ်​ဘၣ် တၢ်နး​တၢ်ဖှီၣ် နီ​တဂၤ​လၢၤဘၣ်. ဒီး​အဝဲသ့ၣ် အ​တၢ်​လဲၤ​ခီဖျိ လၢ​အ​ပူၤကွံာ်​လၢ အ​မၤ​သးအုး​အီၤ​တဖၣ်​န့ၣ် အဝဲသ့ၣ် တ​သ့ၣ်နီၣ်​ထီၣ်​က့ၤဝဲ နီတဘျီ​လၢၤဘၣ်. (ယၡါယၤ ၆၅:၁၇) ဖဲန့ၣ်​အဆၢ​ကတီၢ် ပှၤ​ဟီၣ်ခိၣ်​ဖိ​ခဲလၢာ် “က​မုာ်လၤ​တၢ်​လၢ တၢ်ဃူ​တၢ်ဖိး​အါအါ​ကလဲာ်​အ​ပူၤ​လီၤ.”​—စံးထီၣ်​ပတြၢၤ ၃၇:၁၁.

န​အဲၣ်ဒိး​အိၣ်မူ​ဘၣ် ဖဲန့ၣ်​စ့ၢ်ကီး​ဧါ. ခဲအံၤ ပှၤ​အါဂၤ ဂုာ်ကျဲးစၢး​မၤထွဲ​လံာ်စီဆှံ တၢ်​ဟံးစု​နဲၣ်ကျဲ​အဃိ အဝဲသ့ၣ် တ​သးဟ့ ပှၤဂၤ​လၢၤဘၣ်. (စံးထီၣ်​ပတြၢၤ ၃၇:၈) ယဟိဝၤ​ပှၤအုၣ်​အသး​လၢ ဟီၣ်ခိၣ်​ဒီဘ့ၣ်​န့ၣ် အဝဲသ့ၣ် အ​တၢ်ဆဲး​တၢ်လၤ, ကလုာ်ဒူၣ် တ​ဒ်သိး​လိာ်သး​ဘၣ် သနာ်က့ အဝဲသ့ၣ် အိၣ်ဃူ​အိၣ်ဖိး​ဒီး အဲၣ်လိာ်​သး တဂၤ​ဒီး​တဂၤ.​—ယၡါယၤ ၂:​၂-၄.

ဒ်သိး န​လဲၤ​ခီဖျိ တၢ်​တတီ​တလိၤ ဒီး​တၢ်​မၤအၢ​မၤနး က​သ့ဝဲအဂီၢ် ယဟိဝၤ​ပှၤအုၣ်​အသး​တဖၣ် မၤစၢၤ​နၤ​သ့. တၢ်​လၢ န​မၤလိ​ဘၣ်​တဖၣ်​န့ၣ် က​မၤစၢၤ​နၤ​လၢ န​တၢ်​သးဟ့ က​လီၤမၢ်​ကွံာ်​ဒီး န​က​ကဲထီၣ်​ပှၤလၢ အ​အိၣ်ဒီး​တၢ်အဲၣ်​တၢ်ကွံ. ဃု​သ့ၣ်ညါ​အါထီၣ်​ဘၣ်ဃး ပှၤ​မ့ၢ်​တ​ရ့​ဒီး​နၤ​လၢ တၢ်အဲၣ်​တၢ်ကွံ​အ​ပူၤ​ဘၣ် မ့တမ့ၢ် ပှၤ​မ့ၢ်​သးဟ့​နၤ​သနာ်က့ န​ဆဲး​ရ့​ဒီး​အဝဲသ့ၣ်​လၢ တၢ်အဲၣ်​တၢ်ကွံ​အ​ပူၤ က​သ့​ဒ်လဲၣ်. န​မ့ၢ်​မၤ​ဒ်န့ၣ်​န့ၣ် ခဲအံၤ န​က​သးခု ဒီး​န​တၢ်​ရ့လိာ်သး​ဒီး ပှၤဂၤ​တဖၣ်​စ့ၢ်ကီး က​ဂ့ၤထီၣ်​ဝဲ. ဒီး​လၢ​ကစၢ်​ယွၤ အဘီ​အမုၢ် တၢ်ပၢ​ဖီလာ်​န့ၣ် တၢ်​သးဟ့ က​လီၤမၢ်​ကွံာ်ဝဲ လီၤထူ​လီၤယိာ်. အဃိ ဒ်သိး​န​က​အိၣ်မူ​ဘၣ် ဖဲန့ၣ်​အဂီၢ် န​ကဘၣ်​မၤ​ဒ်လဲၣ်​န့ၣ် န​က​သ့ၣ်ညါ​ဘၣ်​စ့ၢ်ကီး.​—စံးထီၣ်​ပတြၢၤ ၃၇:၂၉.