တၢ်​သးဟ့​န့ၣ် အ​ကဲဝဲ န​တ​ကၠဲး​ပှၤ​တဂၤ​န့ၣ် နီ​တစဲး​ဘၣ်, န​သးဟ့​ပှၤ​တဂၤ​ဂၤ မ့တမ့ၢ် န​သးဟ့ ပှၤ​တဒူၣ်​ဒူၣ်. တၢ်​တူၢ်ဘၣ်​လၢ အမ့ၢ် တၢ်​သးဟ့​န့ၣ် တ​လီၤမၢ်​ညီ​ညီ​ဘၣ်.

ပှၤ​အါဂၤ စးထီၣ်​သးဟ့​တၢ်​လၢ တၢ်ဂ့ၢ်​အါမံၤ​အဃိ​လီၤ. တဘျီ​တခီၣ် ပှၤတနီၤ သးဟ့​ပှၤ​တဂၤ ဘၣ်ဆၣ် တမ့ၢ်​လၢ ပှၤ​တဂၤ​န့ၣ် မၤ​ကမၣ်​တၢ်​အဃိ​ဘၣ်. အဝဲသ့ၣ်​သးဟ့ဝဲ ခီဖျိ​လၢ ပှၤ​တဂၤ​န့ၣ် ပၣ်ဃုာ်​လၢ ပှၤ​တဒူၣ်​ဒူၣ်​အ​ကျါ​အဃိ. ဒီး​အဝဲသ့ၣ် စးထီၣ် သးဟ့​ပှၤဂၤ ခီဖျိ​လၢ အဝဲသ့ၣ် ဆိကမိၣ်​ဝဲ​လၢ ပှၤ​သ့ၣ်​တဖၣ်​န့ၣ် အ​ကဲ ပှၤ​အၢ​ပှၤသီ, ပှၤလၢ​အ​မၤ​တၢထီၣ်​တၢလီၤ​တၢ်, အဲၣ်ဒိး​မၤ​ဘၣ်ဒိ​ပှၤဂၤ ဒီး​တ​အဲၣ်ဒိး မၤဂ့ၤ​ထီၣ်​အသး​ဘၣ်. ဒီး​အဝဲသ့ၣ် က​ထံၣ်ဝဲ ပှၤ​သ့ၣ်​တဖၣ်​န့ၣ် မ့ၢ်​ပှၤလၢ​အ​ပတီၢ်​ဖုၣ်, ပှၤလၢ​အ​ကဲထီၣ် တၢ်​လီၤ​ဘၣ်ယိၣ်​လၢ အဝဲသ့ၣ်​အဂီၢ် ဒီး​ပှၤလၢ​အ​ဒုးအိၣ်​ထီၣ် တၢ်ကီ​တၢ်ခဲ. ပှၤလၢ​အ​သးဟ့​ပှၤဂၤ​န့ၣ် အဝဲသ့ၣ် အ​နီၢ်ကစၢ် လဲၤခီဖျိ​ဘၣ်​ဝဲ တၢ်​မၤဆူၣ်​မၤစိး, တၢ်​တတီ​တလိၤ​ဘၣ် ဒီး​အဝဲသ့ၣ်​တနီၤ​န့ၣ် ပှၤ​မၤအၢ​မၤသီ​ဘၣ်​အဝဲသ့ၣ် အဃိ အဝဲသ့ၣ်​စ့ၢ်ကီး သးဟ့​ပှၤဂၤ​လီၤ.

ပှၤ​တနီၤ​န့ၣ် သးဟ့ဝဲ ပှၤ​တဂၤ ဘၣ်ဆၣ် အဝဲ​တထံၣ်​ဘၣ်​ဝဲ ပှၤလၢ​အ​သးဟ့ဝဲ​တဂၤ​န့ၣ် နီတဘျီ​ဘၣ်. ပှၤ​တနီၤနီၤ​န့ၣ် အဝဲသ့ၣ်​တၢ်​ထံၣ်​လီၤဂာ်​ဒီး အ​ဟံၣ်ဖိ​ဃီဖိ မ့တမ့ၢ် အ​သကိး. အဒိ အ​ဟံၣ်ဖိ​ဃီဖိ မ့တမ့ၢ် အ​သကိး မ့ၢ်သးဟ့​ပှၤ​တဒူၣ်​ဒူၣ်​န့ၣ် လၢခံ အဝဲသ့ၣ်​စ့ၢ်ကီး သးဟ့ဝဲ ပှၤ​တဒူၣ်​န့ၣ်. အဃိ တၢ်​သးဟ့​တဖၣ် ရၤလီၤ​အသး​ချ့​မး.

ပ​မ့ၢ်​သ့ၣ်ညါ​လၢ တၢ်​သးဟ့ ရၤလီၤ​အသး​ဒ်လဲၣ်​န့ၣ် ပ​က​နၢ်ပၢၢ်​ထီၣ် စ့ၢ်ကီး​လၢ ဘၣ်​မနုၤ​အဃိ ပှၤ​အါဂၤ သးဟ့​ပှၤဂၤ​လဲၣ်. ဘၣ်ဆၣ် ဒ်သိး ပ​မၤ​လီၤမၢ်​ကွံာ် တၢ်​သးဟ့​က​န့ၢ်​အဂီၢ် ပ​ကဘၣ်​သ့ၣ်ညါ​ဆိ ဘၣ်ဃး​ဒီး တၢ်သးဟ့ စးထီၣ်​အိၣ်​ထီၣ်​ဒ်လဲၣ်. ဒီး​တၢ်​သံကွၢ်​တ​ဖျၢၣ်​အံၤ ​အ​တၢ်​စံးဆၢ​န့ၣ် အိၣ်​လၢ လံာ်စီဆှံ​အ​ပူၤ.

တၢ်​သးဟ့​န့ၣ် တ​စးထီၣ်​အသး ခီဖျိ​လၢ ပှၤ​ဟီၣ်ခိၣ်​ဖိ​ဘၣ်. တၢ်​သးဟ့ စးထီၣ်​အသး ခီဖျိ​လၢ မူခိၣ်​ကလူး​တဂၤ. ဒီး​မူခိၣ်​ကလူး​အံၤ ခီဖျိ​လၢ အ​ထီဒါ ကစၢ်​ယွၤ​အဃိ အ​ကဲထီၣ်​ဝဲ မုၣ်ကီၤလံၢ်. ဖဲ​မုၣ်ကီၤလံၢ် စးထီၣ်​ထီဒါ​တၢ်​အခါ အဝဲ​ကဲထီၣ် “ပှၤလၢ အ​မၤသံ​ပှၤကညီ.” ဒီး “အဝဲ မ့ၢ်ပှၤ​လံၣ်တၢ်​လီတၢ်​တဂၤ ဒီး​တၢ်လံၣ်​တၢ်လီ​အပၢ်​လီၤ.” အဃိ အဝဲ​ဒုးအိၣ်​ထီၣ်ဝဲ တၢ်​သးဟ့ ဒီး​တၢ်​သူၣ်ဒိၣ်​သးဖျိး. (ယိၤဟၣ် ၈:၄၄; ၁ ယိၤဟၣ် ၃:​၁၁, ၁၂) လံာ်စီဆှံ ပာ်ဖျါ​ထီၣ်ဝဲ​လၢ မုၣ်ကီၤလံၢ် မ့ၢ်​ပှၤလၢ အ​သးဟ့​တၢ်, သူၣ်​အ့န့​သး​အ့န့ ဒီး​အ​သူၣ်ဒိၣ်​သးဖျိး.​—ယိၤဘး ၂:၇; လီၣ်ဖျါ ၁၂:​၉, ၁၂, ၁၇.

ပှၤ​ဟီၣ်ခိၣ်​ဖိ​တဖၣ် မ့ၢ်ဝဲ​ပှၤ​တလၢ​တ​ပှဲၤ​အဃိ သးဟ့​တၢ် ညီဒိၣ်မး. ပှၤ​ပိာ်ခွါ အဆိ​ကတၢၢ်​တဂၤ​လၢ အမ့ၢ် စီၤ​အၤဒၣ်​န့ၣ် ပိာ်ထီၣ်ဝဲ မုၣ်ကီၤလံၢ်​အခံ. အဃိ ပှၤ​ဟီၣ်ခိၣ်​ဖိ​ခဲလၢာ် ဒိးန့ၢ်​ဘၣ်​ဝဲ တၢ်​ဒဲးဘး ဒီး​တၢ်​တလၢ​တ​ပှဲၤလီၤ. (ရိမ့ၤ ၅:၁၂) စီၤ​အၤဒၣ် အ​ဖိခွါ အဆိ​ကတၢၢ်​တဂၤ​လၢ အမ့ၢ်​စီၤ​ကၤယံၣ်​န့ၣ် အ​သးဟ့ အပုၢ် ​စီၤ​ဟ့းဘ့းလး​အဃိ အမၤသံဝဲ. (၁ ယိၤဟၣ် ၃:၁၂) ဒ်လဲၣ်​ဂ့ၤ ဒ်လဲၣ်​ဂ့ၤ ပှၤ​ဟီၣ်ခိၣ်​ဖိ အါဂၤ ဆဲး​ပာ်ဖျါ​ထီၣ်​ဒံး တၢ်အဲၣ်​ဒီး​တၢ်​သးကညီၤ. ပှၤ​ဟီၣ်ခိၣ်​ဖိ​တဖၣ် ခီဖျိ​လၢ အမ့ၢ် ပှၤတၢ်​ဒဲးဘး​ဖိ​အဃိ အဝဲသ့ၣ် အဲၣ်​လီၤ​ထဲ​အသး, သးက့ၣ်​လိာ်သး, ပာ်ထီၣ်​ထီ​အသး အဃိ အဝဲသ့ၣ် သးဟ့​ပှၤဂၤ.​—၂ တံၤမသ့း ၃:​၁-၅.

ပှၤလၢ​ပ​မ့ၢ်​တ​ကၠဲး​အီၤ​ဘၣ်​န့ၣ် လၢခံ​ပ​သးဟ့​အီၤ. ဟီၣ်ခိၣ်​အံၤ အိၣ်​ထဲ​တၢ်​သးဟ့​အဃိ ပှၤ​ဟီၣ်ခိၣ်​ဖိ​တဖၣ် တၢ်​သးကညီၤ​တအိၣ်​လၢၤဘၣ်. ဒီး​ပှၤ​ဟီၣ်ခိၣ်​ဖိ​သ့ၣ်​တဖၣ် အ​တၢ်​ပာ်သူၣ်​ပာ်သး ဒီး​အ​လုၢ်လၢ်​သကဲာ်ပဝး​န့ၣ် အၢ​သီ​ဒိၣ်မး. ခီဖျိ​လၢ “ဟီၣ်ခိၣ်​ခဲလၢာ်​န့ၣ် အိၣ်ဝဲ​လၢ မုၣ်ကီၤလံၢ် ​အ​စု​ပူၤ” အဃိ ပှၤ​ဟီၣ်ခိၣ်​ဖိ တ​နာ်န့ၢ်​လိာ်သး​လၢၤဘၣ်, သးဟ့​လိာ်သး, ကွၢ်ဒိၣ်​ဆံး​အါ​စှၤ​ပှၤဂၤ, တဲဆါ​ပှၤဂၤ ဒီး​တဲ​ဟးဂီၤ​ပှၤဂၤ.​—၁ ယိၤဟၣ် ၅:၁၉.

လံာ်စီဆှံ​ပာ်ဖျါ​ထီၣ်​န့ၢ်​ပှၤ တၢ်​သးဟ့ စးထီၣ်​အသး​ဒ်လဲၣ်. တကး​ဒံးဘၣ် ပာ်ဖျါ​ထီၣ်​န့ၢ်​စ့ၢ်ကီး​ပှၤလၢ ပ​မၤ​လီၤမၢ်​ကွံာ် တၢ်​သးဟ့ က​သ့​ဒ်လဲၣ်.