ပ​တၢ်​ဆိကမိၣ်​အိၣ်​ဒ်လဲၣ်​န့ၣ် အရ့ဒိၣ်​လၢ ကစၢ်​ယွၤ​အဂီၢ်. (ယံးရမံယၤ ၁၇:၁၀) အဃိ ပ​ဟး​ဆှဲ တၢ်ကတိၤ ဒီး​တၢ်မၤလၢ အ​ပာ်ဖျါ​ထီၣ် တၢ်​ဟး​ဟ့​န့ၣ် တလၢပှဲၤ​ဒံးဘၣ်. ပကဘၣ်​မၤ တၢ်​လၢ​အဂၤ​အိၣ်ဒံး. တၢ်​သးဟ့​န့ၣ် စးထီၣ်​အသး​ခီဖျိလၢ ပ​တၢ်​ဆိကမိၣ် ဒီး​ပ​တၢ်​တူၢ်ဘၣ်​တဖၣ်. အဃိ တၢ်​တ​မံၤဂ့ၤ​တ​မံၤဂ့ၤ​လၢ အ​ကဒုး​အိၣ်​ထီၣ် တၢ်​သးဟ့ လၢ​ပ​သးပူၤ​န့ၣ် ပ​ကဘၣ်​ထုးထီၣ်​ကွံာ်​အီၤ​လၢ အဆိ​အချ့. ပ​မ့ၢ်​မၤ​ဒ်န့ၣ်​မၣ် ပ “လဲလိာ်​ပသး” ဒီး​ပ​မၤ​လီၤမၢ်​ကွံာ် တၢ်​သးဟ့ လၢ​ပ​သးပူၤ​က​သ့ဝဲ.

​န​တၢ်​ထံၣ်​လၢ ကလုာ်ဒူၣ်​အဂၤ​အ​ဖီခိၣ် အိၣ်​ဒ်လဲၣ်​န့ၣ် ဒ်သိး န​က​သ့ၣ်ညါ​အဂီၢ် နကဘၣ်​သံကွၢ်​လီၤ​န​သး​လၢ ‘ယ​ထံၣ်​အဝဲသ့ၣ်​ဒ်လဲၣ်. ယ​တၢ်​ထံၣ်​န့ၣ် ဒိးသန့ၤ​ထီၣ်​အသး​လၢ ယ​သ့ၣ်ညါ အဝဲသ့ၣ် ဂ့ၤဂ့ၤ​ဧါ. မ့တမ့ၢ် ယ​ထံၣ်​အဝဲသ့ၣ် ဒ်အံၤ​န့ၣ် ခီဖျိ​လၢ အ​ကလုာ်ဒူၣ်​အဃိ​ဧါ.’ တဘၣ်​ကွၢ် ဒီး​ဖး​တၢ်ဂ့ၢ်​အိၣ်​လၢ အ့ထၢၣ်နဲး​အကျိၤ​အကျဲ​တဖၣ်​လၢ ကဒုး​အိၣ်​ထီၣ်ဝဲ တၢ်​သးဟ့​ဒီး တၢ်​မၤဆူၣ်​မၤစိးလၢ ပ​သးပူၤ​တဂ့ၤ.

ပ​က​သမံ​သမိး​လီၤ​က့ၤ ပ​တၢ်​ဆိကမိၣ် ဒီး​ပ​တၢ်​တူၢ်ဘၣ် တီတီ​လိၤလိၤ​အဂီၢ် တညီဝဲ​ထီဘိ​ဘၣ်. ဘၣ်ဆၣ် ကစၢ်​ယွၤ​ကလုၢ်​ကထါ​န့ၣ် မၤစၢၤ​ပှၤလၢ ပ​က​သ့ၣ်ညါ​လီၤ​က့ၤ​ပ “တၢ်​ဆိကမိၣ်​တဖၣ် ဒီး​တၢ်​လၢ​ပ​လီကီ​အီၤ လၢ​ပ​သးပူၤ” တဖၣ်​သ့ဝဲ. (ဧ့ၤဘြံၤ ၄:၁၂) အဃိ ဃု​သ့ၣ်ညါ​အါထီၣ် လံာ်စီဆှံ​ထီဘိ. ထိၣ်သတြီၤ​ကွၢ် လံာ်စီဆှံ​အ​တၢ်​သိၣ်လိ​ဒီး န​တၢ်​ဆိကမိၣ် ဝံၤဒီး ဂုာ်​ကျဲး​စၢၤ​အဂ့ၤ​ကတၢၢ်​ဒ်သိး နတၢ်​ဆိကမိၣ် ကဘၣ်​လိာ်သး​ဒီး လံာ်စီဆှံ. ကစၢ်​ယွၤ​ကလုၢ်​ကထါ က​မၤစၢၤ​ပှၤ​ဒ်သိး ပ​က​မၤ​လီၤမၢ်​ကွံာ် တၢ်​သးဟ့​လၢ လၢ​အမ့ၢ် “တၢ်​လၢ​အ​လီၤဂာ်​ဒီး တၢးထီလၢ အ​ကျၢၤ​တဖၣ်” လၢ​အ​အိၣ်​လၢ ပ​သးပူၤ ဒီး​ပ​တၢ်​ဆိကမိၣ်​အ​ပူၤ.​—၂ ကရံၣ်သူး ၁၀:​၄, ၅.