ဒ်​ပ​ပာ်ဖျါထီၣ်တ့ၢ်​အသိး ပှၤ​တဲဝဲလၢ ဝံ​အဘျၣ်​တဂၤ လၢ​အိၣ်လၢ​ဝ့ၢ်​ဒဲဖံၤ န့ၣ်​ဒုး​ဆိကမိၣ်​ကမၣ် စီၤပၤ​ခရံာ်စဲၤ လၢ​အဝဲ​မ့ၢ်​လဲၤ​ဒုးတၢ်န့ၣ် က​မၤနၢၤတၢ်​လီၤ. ဘၣ်ဆၣ် ပှၤလၢ​အမၤ​နၢၤ​တၢ်​န့ၣ် မ့ၢ်ဝဲ​စီၤပၤ​ကိရ့ၣ်​လီၤ. ဘၣ်ဃးဒီး စီၤပၤ​ကိရ့ၣ်န့ၣ် လံာ်စီဆှံ​တဲပာ်စၢၤဝဲ​အဂ့ၢ်​တနီၤ, ဒီး​ဟဲ​လၢထီၣ်ပှဲၤထီၣ်ဝဲ ဒ်​လံာ်စီဆှံ​တဲပာ်စၢၤဝဲ​အသိး​လီၤ.

တချုးလၢ စီၤပၤ​ကိရ့ၣ် အိၣ်ဖျဲၣ်ထီၣ်​ဒံးဘၣ်န့ၣ် ဝံ​ယၡါယၤ တဲဆိပာ်စၢၤ​အဂ့ၢ် အိၣ်ဝဲ​အနံၣ် ၂၀၀ ဃၣ်ဃၣ်​န့ၣ်လီၤ. လံာ်စီဆှံ​တဲပာ်စၢၤဝဲလၢ အဝဲ​မ့ၢ်​အိၣ်ဖျဲၣ်ထီၣ်​န့ၣ် ပှၤ​က​ကိးန့ၢ်အမံၤ​လၢ စီၤ​ကိရ့ၣ် ဒီး​က​ဒုး​နၢၤဝဲ ဝ့ၢ်​ဘၤဘူၤလိၣ်​ဒ်လဲၣ်​အဂ့ၢ်​န့ၣ်လီၤ.

ယၡါယၤ ၄၄:၂၄, ၂၇, ၂၈ “ယွၤ . . . စံး​ဒ်အံၤ . . . ပှၤလၢ​အစံး​တၢ်ယိာ်ပူၤ​န့ၣ် လီၤသံး​ကွံာ်​တက့ၢ်, ဒီး​ယ​က​မၤ​လီၤသံး​ကွံာ် သု​ထံမိၢ်ပှၢ်​လီၤ​န့ၣ်, လၢ​အစံး​လၢ​စီၤ​ကိရ့ၣ်​အဂ့ၢ်, ယပှၤ​ကွၢ်သိ, ဒီး​ကမၤဝဲ​လၢ ကယဲၢ်​တၢ်​ဘၣ်ယသး​လီၤ. ဒီး​စံး​လၢ​ယရူၤၡလ့ၣ်​အဂ့ၢ်န့ၣ် န​ကဘၣ်​တၢ်တ့​က့ၤ​နၤ​လီၤ. ဒီး​လၢ​တၢ်လုၢ်​အဟံၣ်​အဂ့ၢ်န့ၣ်, န​ခီၣ်ထံးတဖၣ်​ကဘၣ်​တၢ်​ပာ်လီၤ​အီၤ​လီၤ.”

ကြံး​အပှၤ​ဃုသ့ၣ်ညါ တၢ်စံၣ်စိၤတဲစိၤ​အဂ့ၢ်​တဂၤ လၢအမ့ၢ်ဝဲ ဟရၢဒိထၢးန့ၣ်​တဲဝဲလၢ စီၤ​ကိရ့ၣ် အသုးမုၢ်သံၣ်ဘိတဖၣ် ခူၣ်ဝဲ​ထံကျိၤ​လၢအဂၤ​တဘိ ဒ်သိး​က​မၤ​လီၤသံးဝဲ ထံကျိ​လၢ​အိၣ်လၢ ဝ့ၢ်​ဘၤဘူၤလိၣ်​အပူၤ​အဂီၢ်လီၤ. ခီဖျိလၢ စီၤ​ကိရ့ၣ် မၤဝဲဒ်န့ၣ်​အဃိ အသုးမုၢ်သံၣ်ဘိတဖၣ် ခီဂာ်ဝဲ​ထံကျိ​န့ၢ်ဝဲ​လီၤ. ဝံၤဒီး ဖဲ​စီၤ​ကိရ့ၣ် ဒုး​နၢၤဝဲ​ဝ့ၢ်​ဘၤဘူၤလိၣ် ဝံၤအလီၢ်ခံန့ၣ်, အဝဲ​မၤ​ထူၣ်ဖျဲးထီၣ် ပှၤယူဒၤဖိ​လၢ ပှၤဘၤဘူၤလိၣ်ဖိ ဟဲက့ၤ​ဖီၣ်ဝဲတဖၣ်​လီၤ. ဒီး​အဝဲ​ဟ့ၣ်အခွဲး​လၢ ပှၤယူဒၤဖိတဖၣ်အံၤ က​က့ၤ​တ့ဂ့ၤထီၣ်​ကဒါက့ၤ ဝ့ၢ်​ယရူၤၡလ့ၣ် လၢ​ဘၣ်​တၢ်​မၤဟးဂီၤအီၤ အိၣ်လံ​အနံၣ် ၇၀ လံ​န့ၣ်လီၤ.

ယၡါယၤ ၄၅:၁ “ယွၤ​စံး​လၢ​အပှၤ​ဒိးဖှူ​အသး စီၤ​ကိရ့ၣ်​ဒ်အံၤ, ယ​ဟံးဃာ်​အီၤ​လၢ​ယ​စုထွဲ ဒ်သိး​အက​ယီၢ်​လီၤတံၢ် ပှၤကလုာ်​တဖၣ်လၢ​အမဲာ်ညါ, ဒီး​ယ​က​ဃ့ၣ်လီၤ စီၤပၤတဖၣ်​အယီၢ်တကိး, ဒီး​အိးထီၣ်​တြဲၤ​ခံဘ့ၣ်​လၢ​အမဲာ်ညါ, ဒီး​တြဲၤတဖၣ် တကး​တံာ်ဃာ်​ဘၣ်အသး​ဘၣ်.”

ခီဖျိလၢ ဝ့ၢ်​ဘၤဘူၤလိၣ် အပဲတြီ​ခံဘ့ၣ် အိးထီၣ်​ပာ်အသး​အဃိ ပၤရၣ်​အသုးမုၢ်သံၣ်ဘိတဖၣ် နုာ်လီၤဝဲလၢ ဝ့ၢ်​ပူၤ​န့ၢ်ဝဲ​လီၤ. ပှၤဘၤဘူၤလိၣ်ဖိတဖၣ် မ့ၢ်​သ့ၣ်ညါဝဲ စီၤပၤ​ကိရ့ၣ်​အတၢ်ကူၣ်န့ၣ် အဝဲသ့ၣ် က​ကးတံာ်ဃာ်ဝဲ ဝ့ၢ်​အပဲတြီတဖၣ်​လီၤ. ဘၣ်ဆၣ် ခီဖျိလၢ​အဝဲသ့ၣ် အိးထီၣ်ဃာ်ဝဲ ဝ့ၢ်​အပဲတြီ​အဃိ အဝ့ၢ်န့ၣ်​တၢ်ဒုးနၢၤအီၤန့ၢ် ညီညီဖိလီၤ.

ဝံ​အတၢ်ကတိၤ​လၢ လံာ်စီဆှံ​အပူၤ လၢအဟဲ​လၢထီၣ်ပှဲၤထီၣ်​ဒ်အံၤန့ၣ် အိၣ်ဝဲ​ဒီဒူၣ်ညါ. a ဝံ​အတၢ်ကတိၤ​လၢ လံာ်စီဆှံ​အပူၤန့ၣ် ဟဲ​လၢ​ကစၢ်ယွၤ လၢအမ့ၢ်အတီ​တဂၤ အအိၣ်​န့ၣ်လီၤ. ဖဲ ယၡါယၤ ၄၆:၁၀ န့ၣ်ယဟိဝၤယွၤ တဲဝဲလၢ “လၢ​အခီၣ်ထံး​ယ​ဒုးနဲၣ်​တၢ်​တုၤ​အကတၢၢ်, ဒီး​လၢပျၢၤ​လံၤလံၤန့ၣ် တၢ်လၢ​အတမၤ​ဒံးဘၣ်​အသး​ဘၣ်.” ဘၣ်ဆၣ် မ့မ့ၢ်​ပှၤဒွး​တၢ်​ဖိတဖၣ်န့ၣ် အဝဲသ့ၣ်​မၤ​ဘၣ်ထွဲလိာ်အသး ဒီး​ယွၤ​လၢအကမၣ်တဖၣ်​လီၤ.

ပှၤလၢ​အတဲ​ပာ်စၢၤတၢ်ဘၣ် လီၤတံၢ်လီၤဆဲး​ထီဘိန့ၣ် အိၣ်ထဲ​ယွၤလၢအမ့ၢ်အတီ​တဂၤ လၢ​အမံၤ​မ့ၢ်​ယဟိဝၤ​န့ၣ်လီၤ. ဒီး​ကစၢ်ယွၤ အမံၤ​အခီပညီန့ၣ် မ့ၢ်ဝဲ “အဝဲ​ဒုးကဲထီၣ်​တၢ်” လီၤ. အဃိ ပ​သ့ၣ်ညါဘၣ်​လၢ ကစၢ်ယွၤ​အိၣ်ဒီး အစိအကမီၤ လၢလၢပှဲၤပှဲၤ​ဒ်သိး က​ထံၣ်ဆိပာ်​တၢ်လၢ က​မၤအသး​လၢ ခါဆူညါ​ အဂီၢ်​လီၤ. တကးဒံးဘၣ် ဒ်သိး တၢ်​ကကဲထီၣ်အသး​ဒ် အတၢ်ဘၣ်သး​အသိး​အဂီၢ်န့ၣ် အဝဲ​မၤဝဲ​သ့​လီၤ. အဃိ ပ​နာ်သ့​သပှၢ်ကတၢၢ်​လၢ ကယဲၢ်​တၢ်လၢ ကစၢ်ယွၤ အၢၣ်လီၤ​ပာ်စၢၤဝဲ​တဖၣ်န့ၣ် က​ဟဲ​လၢထီၣ်ပှဲၤထီၣ်ဝဲ သပှၢ်ကတၢၢ်​လီၤ.

လံာ်စီဆှံ​တဲပာ်စၢၤဝဲလၢ တၢ်ကမၤအသး​လၢ ပစိၤ​ခဲအံၤ​ဒ်လဲၣ်န့ၣ် မ့ၢ်​န​အဲၣ်ဒိး​သ့ၣ်ညါ​စ့ၢ်ကီးဧါ. ပူၤကွံာ်​အနံၣ် ၂,၀၀၀ ဃၣ်ဃၣ်​န့ၣ် လံာ်စီဆှံ​တဲပာ်စၢၤဝဲလၢ “လၢ​မုၢ်နံၤအခံကတၢၢ်တဖၣ်​အပူၤန့ၣ်, အဆၢ​အကတီၢ်​လၢ အကီအခဲ​ကဘၣ်​လီၤ.” တၢ်ကတိၤ​လၢ​တဲဝဲ “မုၢ်နံၤ​အခံ​ကတၢၢ်” န့ၣ် အဲၣ်ဒိးတဲဝဲ​အခီပညီ​ဒ်လဲၣ်. မ့ၢ်​အအဲၣ်ဒိး​တဲဝဲလၢ ဟီၣ်ခိၣ် မ့တမ့ၢ် ပှၤဟီၣ်ခိၣ်ဖိ အစိၤ​က​ကတၢၢ်ဧါ. တအဲၣ်ဒိး​တဲဝဲ ဒ်န့ၣ်ဘၣ်. အဲၣ်ဒိးတဲဝဲ​လၢ တၢ်ကီတၢ်ခဲ, တၢ်ဆီၣ်သနံး ဒီး​တၢ်နးတၢ်ဖှီၣ်​လၢ ပှၤဟီၣ်ခိၣ်ဖိ ထံၣ်ဘၣ်ဝဲ​အနံၣ်လၢ အကထိတဖၣ်​န့ၣ် က​ကတၢၢ်ကွံာ်ဝဲ​လီၤ. လံာ်စီဆှံ တဲ​ဆိပာ်ဝဲ​တၢ်ဂ့ၢ်​တနီၤ​လၢ အဘၣ်ဃးဒီး “မုၢ်နံၤ​အခံ​ကတၢၢ်” အတၢ်ပနီၣ်​န့ၣ် ခဲအံၤ​ပ​က​ဃုသ့ၣ်ညါ​အီၤ​လီၤ.

၂ တံၤမသ့း ၃:၁-၅ “လၢ​မုၢ်နံၤအခံကတၢၢ်တဖၣ်​အပူၤန့ၣ် . . . ပှၤကညီ​က​မ့ၢ်​ပှၤ​အဲၣ်​လီၤ​အသး, ပှၤသးကွံစ့, ပှၤခိး​ထဲသိးလိာ်​အသး, ပှၤ​ပာ်ထီၣ်ထီအသး, ပှၤဒုၣ်ဒွဲၣ်တၢ်, ပှၤ​တစူၢ်ဘၣ်​အမိၢ်​အပၢ်​ဘၣ်, ပှၤ​တသ့ၣ်ညါဘၣ်​တၢ်အဘျုးအဖှိၣ်​ဘၣ်, ပှၤ​တစီတဆှံဘၣ်. ပှၤ​တအဲၣ်​ဘၣ်​အဘူးအတံၢ်​ဘၣ်, ပှၤ​အ​သူၣ်တကၢ်​အသးတလီၤဘၣ်, ပှၤ​ပာ်​တၢ်ကမၣ်​လၢ ပှၤဂၤ​အလိၤ​ကလီကလီ, ပှၤလၢ​အတကီၤဘၣ်​အသးဘၣ်, ပှၤဒူတၢ်, ပှၤ​တအဲၣ်ဘၣ်​ပှၤအဂ့ၤဘၣ်, ပှၤ​ဟ့ၣ်လီၤကွံာ်​ပှၤဂၤ, ပှၤလၢ​အတပလီၢ်ဘၣ်​အသးဘၣ်, ပှၤ​ပာ်အသး​ကဖၢလၢ, ပှၤလၢ​အအဲၣ်​တၢ်မုာ်လၤ​ဒိၣ်န့ၢ်​အအဲၣ်​ယွၤ, အိၣ်ဝဲဒီး​တၢ်ယူးယီၣ်ယွၤ​အက့ၢ်အဂီၤ​ဘၣ်ဆၣ်ဒီး, အစိအကမီၤ​န့ၣ်​သမၢဝဲလီၤ.”

မုၢ်မဆါတနံၤအံၤ ပှၤဟီၣ်ခိၣ်ဖိ အတၢ်ပာ်သူၣ်ပာ်သးတဖၣ် ဒံးယံာ်ဒံးအၢထီၣ်ဝဲ ဒ်​လံာ်စီဆှံ​တဲပာ်စၢၤဝဲ​အသိး​လီၤ. အဃိ န​က​တူၢ်ဘၣ်​လၢ ပှၤလၢ​အအဲၣ်​ကျိၣ်စ့ ဒီး​အပာ်ထီၣ်ထီအသး​န့ၣ် အိၣ်ဝးတရံး​နၤ​လီၤ. ဒီး​န​က​ထံၣ်ဘၣ်​စ့ၢ်ကီး​လၢ ပှၤအါတက့ၢ်န့ၣ် အတၢ်​ဝံသးစူၤလိာ်သး တဂၤဒီးတဂၤ​န့ၣ် တအိၣ်​အါအါလၢၤဘၣ်. တကးဒံးဘၣ် ဖိသၣ်​အါတက့ၢ်န့ၣ် တဒိကနၣ် မိၢ်ပၢ်​အကလုၢ်​ဘၣ် ဒီး​ပှၤအါတက့ၢ်န့ၣ် အဲၣ်​တၢ်မုာ်တၢ်ပၠီၣ်​အါန့ၢ်ဒံး အအဲၣ်​ကစၢ်ယွၤ​လီၤ. အဃိ ပထံၣ်ဘၣ်လၢ ပှၤဟီၣ်ခိၣ်ဖိ အတၢ်ပာ်သူၣ်ပာ်သးတဖၣ်အံၤ ဒံးယံာ်ဒံးအၢထီၣ်ဝဲ​လီၤ.

မးသဲ ၂၄:၆, ၇ “ဒီး​သု​က​နၢ်ဟူ​တၢ်ဒုးသုးဒုးသံၣ်​တဖၣ်အဂ့ၢ် . . . ပှၤကညီ​တကလုာ်​က​ထီဒါ​ပှၤကညီ​တကလုာ်, ဒီး​တဘီတမုၢ်​က​ထီဒါ​တဘီတမုၢ်လီၤ.”

ပှၤတနီၤ ဒွး​တယာ်ဝဲ​လၢ စးထီၣ်​ဖဲ ၁၉၁၄ နံၣ် တုၤခဲအံၤန့ၣ် ပှၤလၢ​အသံ​လၢ တၢ်ဒုး​အဃိန့ၣ် အိၣ်ဝဲ​အကကွဲၢ် ၁၀၀ ဘျဲၣ်​န့ၣ်လီၤ. ဒီး​ပ​မ့ၢ်​ထိၣ်သတြီၤ ပှၤသံ​အနီၣ်ဂံၢ်အံၤ ဒီး​ထံကီၢ်​တနီၤ အထံဖိကီၢ်ဖိ​အနီၣ်ဂံၢ်​န့ၣ် ပှၤသံ​အနီၣ်ဂံၢ်​န့ၣ် အါန့ၢ်ဒံး​ထံဖိကီၢ်ဖိ အနီၣ်ဂံၢ်​လီၤ. အဃိ ဆိကမိၣ်ကွၢ် ခီဖျိလၢ ပှၤသံ​အါထဲအံၤ​အဃိ ပှၤအါဂၤန့ၣ် ထံၣ်ဘၣ်ဝဲ တၢ်သူၣ်အုးသးအုး ဒီး​တၢ်ကီတၢ်ခဲ​န့ၣ်လီၤ. မ့ၢ်​ထံကီၢ်​ခိၣ်နၢ်တဖၣ် ဟံးန့ၢ်​တၢ်မၤလိ​ဒီး မၤ​ပတုာ်​ကွံာ် တၢ်ဒုးတၢ်ယၤ​လံဧါ.

မးသဲ ၂၄:၇ “ဒီး​တၢ်အိၣ်ဝံၤအိၣ်ဃဲၤတဖၣ် . . . က​အိၣ်ထီၣ်”

ဟီၣ်ခိၣ်ဒီဘ့ၣ် တၢ်အီၣ်တၢ်အီ တၢ်ကရၢကရိ “တၢ်အီၣ်တၢ်အီ​လၢ ဟီၣ်ခိၣ်ဒီဘ့ၣ်န့ၣ် အိၣ်ဝဲ​လၢလၢပှဲၤပှဲၤ​လၢ ပှၤကိးဂၤဒဲး​အဂီၢ်လီၤ. ဘၣ်ဆၣ် ကိးနံၤဒဲး ပှၤ ၈၁၅ ကကွဲၢ်​န့ၣ် တအီၣ်​ဘၣ်ဝဲ​တၢ်အီၣ် ဘျဲဘျဲ​ဘၣ်. ဒီး​ပှၤ​သၢဂၤ အကျါ​တဂၤန့ၣ် ဒိးန့ၢ်ဘၣ်ဝဲ တၢ်အီၣ်လီၤထုး​တၢ်ဆါလီၤ.” အဃိ တနံၣ်​ဘၣ်တနံၣ်န့ၣ် ဖိသၣ်​သံဝဲ သၢ​ကကွဲၢ်​ဃၣ်ဃၣ် ခီဖျိလၢ တၢ်သၣ်ဝံၤလီၤဒိ​အဃိ​န့ၣ်လီၤ.

လူၤကၣ်​ ၂၁:၁၁ “ဟီၣ်ခိၣ်​က​ဟူးဝးဆှဲးဆှိး​နးနးကလဲာ်”

တနံၣ်​ဘၣ်တနံၣ်န့ၣ် ဟီၣ်ခိၣ်​ဟူးဝဲ​အဘျီ ၅၀,၀၀၀ ဃၣ်ဃၣ်ညါ. ဒီး​လၢ​အကျါ​အဘျီ ၁၀၀ န့ၣ် မၤဟးဂီၤဝဲ တၢ်သူၣ်ထီၣ်တဖၣ်​သ့ဝဲ​လီၤ. ဒီး​တနံၣ်​တဘျီန့ၣ် ဟီၣ်ခိၣ်​ဟူးဝဲ​ဖးဒိၣ်​လီၤ. တၢ်​ကွဲးနီၣ်ကွဲးဃါ​တခါ ပာ်ဖျါဝဲ​လၢ စးထီၣ်​ဖဲ ၁၉၇၅ တုၤလၢ ၂၀၀၀ အဘၢၣ်စၢၤန့ၣ် ပှၤသံ​လၢ ဟီၣ်ခိၣ်ဟူး​အဃိ​အိၣ်ဝဲ ၄၇၁,၀၀၀ န့ၣ်လီၤ.

မးသဲ ၂၄:၁၄ “ဘီမုၢ်​အတၢ်​သးခု​အကစီၣ်အံၤ, ကဘၣ်​တၢ်စံၣ်တဲၤတဲလီၤ​အီၤ​လၢ ဟီၣ်ခိၣ်ဒီဘ့ၣ်ညါ, လၢ​တၢ်အုၣ်အသး​လၢ ပှၤကလုာ်​ခဲလၢာ်​အဂီၢ်လီၤ. တုၤနုၤ​တစု တၢ်အကတၢၢ်န့ၣ် က​ဟဲ​ဘၣ်ဝဲ​လီၤ.”

မုၢ်မဆါတနံၤအံၤ ယဟိဝၤပှၤအုၣ်အသး ဃိး​ကကွဲၢ်ဘျဲၣ် ဟး​စံၣ်တဲၤတဲလီၤဝဲ ယွၤ​အဘီအမုၢ် တၢ်သးခုကစီၣ် လၢ​ဟီၣ်ခိၣ်ဒီဘ့ၣ် လၢ​ထံကီၢ်​အဘ့ၣ် ၂၄၀ ဃၣ်ဃၣ်​န့ၣ်လီၤ. လၢ​တၢ်သးဆူၣ်​အပူၤ ယဟိဝၤ​ပှၤအုၣ်အသးတဖၣ် စံၣ်တဲၤတဲလီၤ​တၢ်လၢ ဝ့ၢ်​တဖျၢၣ်​ဘၣ်​တဖျၢၣ် ဒီး​ဒူ​သဝီ​လၢ အိၣ်လၢ​ခိခိၣ်​တဖၣ်​လီၤ. တကးဒံးဘၣ် အဝဲသ့ၣ်​လဲၤ​စံၣ်တဲၤတဲလီၤ စ့ၢ်ကီး​တၢ်လၢ ပှၤ​သဝီ​ဖိတဖၣ်​လၢ အိၣ်လၢ​ပှၢ်လၢ်ကျါ ဒီး​လၢ​ကစၢၢ်ကလိကျါ​န့ၣ်လီၤ. ​လံာ်စီဆှံ​အတၢ်စံးပာ် ပာ်ဖျါထီၣ်ဝဲ​လၢ တၢ်စံၣ်တဲၤတဲလီၤ​တၢ်မၤ မ့ၢ်​ရၤလီၤအသး​တုၤလၢ ကစၢ်ယွၤ​အသး​မံ​လံ​န့ၣ် “တၢ်အကတၢၢ်န့ၣ် က​ဟဲ​ဘၣ်ဝဲ​လီၤ.” ဖဲအံၤ​အဲၣ်ဒိးတဲဝဲ အခီပညီ​လၢ ပှၤဟီၣ်ခိၣ်ဖိ အတၢ်ပၢ​က​ကတၢၢ်ကွံာ်ဝဲ ဒီး​ကစၢ်ယွၤ​အဘီအမုၢ် က​ပၢက့ၤတၢ်​လီၤ. ဖဲ​ကစၢ်ယွၤ အဘီမုၢ်​ပၢတၢ်​အခါန့ၣ် ကစၢ်ယွၤ အတၢ်​အၢၣ်လီၤအီလီၤ မနုၤတဖၣ် က​ဟဲ​လၢထီၣ်ပှဲၤထီၣ်​လဲၣ်. န​မ့ၢ်​ဆဲးဖးန့ၣ် န​က​သ့ၣ်ညါ​လီၤ.