စီၤ​ဃဘးကူာ် မ့ၢ်​ပှၤလၢ​အဂ့ၤ​တဂၤ ဒီး​ကစၢ်​ယွၤ​ဘၣ်သူၣ်​ဘၣ်သး​အီၤ​လီၤ. ဘၣ်ဆၣ်​ ဘၣ်​တဘျီ​န့ၣ်​ အဝဲ​တဲဝဲ​လၢ “ယွၤ​ဧၢ, ယ​ဘၣ်​ကိးထီၣ်​တၢ်, ဒီး​န​တ​နၢ်ဟူ​ဘၣ်​ဆံးယံာ်​လဲၣ်. ယ​ဘၣ်​ကိးပသူ​ထီၣ်​လၢ တၢ်​မၤအၢ​ဆူၣ်​အဃိ, ဒီး​န​တ​အုၣ်က့ၤ​ခီၣ်က့ၤ​ဘၣ်​န့ၣ်​ မ့ၢ်​ဆံးယံာ်​လဲၣ်.” (ဃဘးကူာ် ၁:၂, ၃) စီၤ​ဃဘးကူာ် တဲဝဲ​ဒ်​န့ၣ်​န့ၣ်​ မ့ၢ်​လၢ​အ​တၢ်နာ်​စှၤ​အဃိ​ဧါ. တမ့ၢ်​ဘၣ်. ကစၢ်​ယွၤ​ဒုး​နာ်န့ၢ် စီၤ​ဃဘးကူာ် လီၤတံၢ်​လီၤဆဲး​လၢ အ​က​မၤ​ကတၢၢ်​ကွံာ် တၢ်အၢ​တၢ်သီ​လီၤ.—ဃဘးကူာ် ၂:၂, ၃.

ဖဲ​ပ​နီၢ်ကစၢ် မ့တမ့ၢ် ပှၤလၢ​ပ​အဲၣ်ဘၣ်​တဂၤဂၤ တူၢ်ဘၣ်​တၢ်ကီ​တၢ်ခဲ​အခါ ပ​က​ဆိကမိၣ်​ဘၣ်​လၢ ကစၢ်​ယွၤ​ကြၢး​မၤစၢၤ​ပှၤ ဘၣ်ဆၣ်​ အဝဲ​မၤယံာ်မၤနီၢ်​အသး​လီၤ. လံာ်စီဆှံ​တဲဝဲ​လၢ “ကစၢ်​တ​မၤယံာ်မၤနီၢ်​တၢ်​လၢ အ​တၢ်စံးပာ်​အဂ့ၢ်​အကျိၤ, ဒ်​ပှၤကညီ​တနီၤနီၤ ပာ်​တၢ်​မၤယံာ်မၤနီၢ်​အသိး​န့ၣ်​ဘၣ်. မ့မ့ၢ်​မ့ၢ်​အ​ဝံသးစူၤ​သု​ဃဲးဃဲး​လီၤ. အဂ့ၢ်ဒ်အံၤ, တဘၣ်​ဘၣ်​အသး​လၢ ပှၤ​က​တုၤလၢ​တၢ်​ဟးဂူာ်​ဟးဂီၤ နီ​တဂၤ​ဘၣ်. မ့ၢ်​လၢ​ပှၤ​ခဲလၢာ် က​န့ၢ်ဘၣ်​တၢ်​ပီၢ်ယၢ်​လီၤ​က့ၤ​အသး​လီၤ.”—၂ ပ့းတရူး ၃:၉.

တ​ယံာ်လၢၤဘၣ်​န့ၣ်​ ကစၢ်​ယွၤ​က​မၤ​လီၤမၢ်​ကွံာ်ဝဲ​လီၤ. ယ့ၣ်ၡူး​တဲဖျါထီၣ်​ဝဲ​လၢ ပှၤ​က​အိၣ်ဝဲ​တစိၤ​လၢ က​ထံၣ်ဘၣ်​တၢ်​ပနီၣ်​လၢ က​ပာ်ဖျါ​ထီၣ်ဝဲ​လၢ ပ​အိၣ်မူ​ဘၣ်​လၢ မုၢ်နံၤခံကတၢၢ်​န့ၣ်​လီၤ. (မးသဲ ၂၄:၃-၄၂) မုၢ်မဆါ​တနံၤ​အံၤ ပ​ထံၣ်ဘၣ်​တၢ်အိၣ်သး လီၤ​လီၤဆီ​ဆီ​တဖၣ်​လၢ ယ့ၣ်ၡူး​တဲဆိ​ပာ်စၢၤ​ဝဲ​န့ၣ်​ ဟဲ​လၢထီၣ်​ပှဲၤထီၣ်​ တ​ကတီၢ်ဃီ​အဃိ ပ​သ့ၣ်ညါ​လၢ တယံာ်တမီၢ် ကစၢ်​ယွၤ​က​မၤ​လီၤမၢ်​ကွံာ် တၢ်ကီ​တၢ်ခဲ​ခဲလၢာ်​လီၤ. *

ဘၣ်ဆၣ်​ ကစၢ်​ယွၤ​က​မၤ​ကတၢၢ်​ကွံာ် တၢ်အၢ​တၢ်သီ​လၢ​ကျဲ​ဒ်လဲၣ်. ဖဲ​ယ့ၣ်ၡူး​အိၣ်​လၢ ဟီၣ်ခိၣ်​ချၢ​အခါ ကစၢ်​ယွၤ​ဟ့ၣ်​အီၤ တၢ်စိ​တၢ်ကမီၤ ဒ်သိး​အ​က​မၤ​လီၤမၢ်​ကွံာ် ပှၤ​ဟီၣ်ခိၣ်​ဖိ အ​တၢ်ကီ​တၢ်ခဲ​အဂီၢ်​လီၤ. ပ​ကကွၢ်​သကိး​တၢ်အဒိ​တနီၤ​လီၤ.

န့ဆၢၣ်​တၢ်​ဘၣ်ဒိ​ဘၣ်ထံး. ဖဲ​ယ့ၣ်ၡူး​ဒီး​အ​တၢ်မၢဖိ​တဖၣ်​ လဲၤတၢ်​လၢ ပီၣ်လဲၣ်​ကၤလံၤလါ​အခါ ကလံၤမုၢ်​လီၤ ဒီး​ဟဲ​မၤဘၣ်ဒိ​ဘၣ်ထံး​ချံ​လီၤ. ဖဲ​န့ၣ်​အခါ ယ့ၣ်ၡူး​ပာ်ဖျါ​ထီၣ်ဝဲ​လၢ အဝဲ​ဒီး​အ​ပၢ်​န့ၣ်​ ပၢၤဃာ်​ဝဲ​မူခိၣ်​ကလံၤသီၣ်ဂီၤ, ကလံၤမုၢ် ဒီး​တၢ်​အဂၤ​တဖၣ်​သ့ဝဲ​လီၤ. (ကလီးစဲ ၁:၁၅, ၁၆) ဖဲ​ယ့ၣ်ၡူး​တဲဝဲ​လၢ “အိၣ်ဘှီၣ်​ဒီး​အိၣ်ဂၢၢ်​တက့ၢ်” အခါ တၢ်မၤ​အသး​ဒ်လဲၣ်. လံာ်စီဆှံ​တဲဝဲ​လၢ “ဒီး​ကလံၤမုၢ်​န့ၣ်​တုာ်​ဝဲ​ဒီး တၢ်​ခဲလၢာ်​အိၣ်​က့ၤ​ဂၢၢ်​တ​ပၢၢ်​လီၤ.”—မၢ်ကူး ၄:၃၅-၃၉, ခ့ခါစှီၤကျိာ်.

တၢ်ဆူး​တၢ်ဆါ. ပှၤ​အါဂၤ​သ့ၣ်ညါ​ဝဲ​လၢ ယ့ၣ်ၡူး​မၤဘျါ​က့ၤ ပှၤမဲာ်ဘျီၣ်, ပှၤ​စု​တဂ့ၤ​ခီၣ်​တဂ့ၤ, ပှၤလၢ​အိၣ်ဒီး​ထိး​ပျုၢ်​တၢ်ဆါ, ပှၤဘၣ်​တၢ်ဆါအၢ ဒီး​တၢ်ဆါ​အ​ကလုာ်​ကလုာ်​သ့ဝဲ​လီၤ. ဒ်​လံာ်စီဆှံ​တဲဝဲ​အသိး အဝဲ “မၤဘျါ​က့ၤ ကယဲၢ်​တၢ်ဆူး​တၢ်ဆါ ဒီး​ကယဲၢ်​တၢ်​အက့​အကွဲၣ်​ လၢ​ပှၤ​ဂီၢ်မုၢ်​အကျါ​ကိးမံၤဒဲး​လီၤ.”—မးသဲ ၄:၂၃, ၂၄; ၈:၁၆; ၁၁:၂-၅.

တၢ်​သၣ်​ဝံၤ​လီၤဒိ. လံာ်စီဆှံ​ပာ်ဖျါ​ထီၣ်ဝဲ​လၢ ကစၢ်​ယွၤ​ဟ့ၣ်လီၤ ယ့ၣ်ၡူး​တၢ်စိ​တၢ်ကမီၤ ဒ်သိး​က​မၤ​အါထီၣ်​ဝဲ တၢ်အီၣ်​တၢ်အီ​လၢ က​လုၢ်အီၣ်​လုၢ် အီဝဲ ပှၤ​ဂီၢ်မုၢ်​လၢ​အ​ကထိ​တဖၣ်​န့ၣ်​ အိၣ်ဝဲ​ခံ​ဘျီ​လီၤ.—မးသဲ ၁၄:၁၄-၂၁; ၁၅:၃၂-၃၈.

တၢ်သံ. ယ့ၣ်ၡူး​မၤ​သမူထီၣ်​က့ၤ ပှၤသံ​သၢ​ဂၤန့ၣ်​ ပာ်ဖျါ​ထီၣ်ဝဲ​လီၤတံၢ်​လီၤဆဲး​လၢ ယဟိဝၤ​ယွၤ အိၣ်ဒီး​တၢ်စိ​တၢ်ကမီၤ​လၢ က​မၤ​သမူထီၣ်​က့ၤ ပှၤသံ​သ့ၣ်​တဖၣ်​လီၤ. ဒီး​ပှၤလၢ​ယ့ၣ်ၡူး​မၤ​သမူထီၣ်​ဝဲ အကျါ​တဂၤ​န့ၣ်​ သံ​အိၣ်​လွံၢ်သီ​လံ.—မၢ်ကူး ၅:၃၅-၄၂; လူၤကၣ်​ ၇:၁၁-၁၆; ယိၤဟၣ်​ ၁၁:၃-၄၄.