မုၢ်မဆါတနံၤအံၤ မတၤတီခိၣ်ရိၤမဲ ယွၤအပှၤဂီၢ်မုၢ်တဖၣ်လဲၣ်
“ပှၤလၢအကဲတ့ၢ် သုခိၣ်လၢအစံၣ်တဲၤတဲလီၤ သုလၢယွၤအကလုၢ်အကထါတဖၣ်န့ၣ်, သ့ၣ်နီၣ်ထီၣ်အီၤတက့ၢ်.”—ဧ့ၤဘြံၤ ၁၃:၇.
၁, ၂. ယ့ၣ်ၡူးက့ၤထီၣ်လၢ မူခိၣ်ဝံၤအလီၢ်ခံ တၢ်မၢဖိတဖၣ် ကဆိကမိၣ်ဘၣ်ဝဲတၢ်ဂ့ၢ်မနုၤလဲၣ်.
ယ့ၣ်ၡူးအတၢ်မၢဖိတဖၣ်ဆၢထၢၣ်လၢ ကစၢၢ်သ့ၣ်စၤယံးအဒီခိၣ်ဒီး ကွၢ်ဝဲတၢ်အၢၣ်စိာ်ထီၣ် အဝဲသ့ၣ်အတံၤသကိးလၢအမ့ၢ် ကစၢ်ယ့ၣ်ၡူးခရံာ်န့ၣ်လီၤ. (မၤတၢ် ၁:၉, ၁၀) ယ့ၣ်ၡူးသိၣ်လိနဲၣ်လိ, ဟ့ၣ်ဂံၢ်ဟ့ၣ်ဘါ ဒီးဟံးစုနဲၣ်ကျဲအဝဲသ့ၣ် ကအိၣ်လၢခံနံၣ်ဃၣ်ဃၣ်လီၤ. ဘၣ်ဆၣ်ခဲအံၤယ့ၣ်ၡူး က့ၤထီၣ်လၢမူခိၣ်လံအဃိ အဝဲသ့ၣ်ကမၤဒ်လဲၣ်.
၂ တချုးလၢ ယ့ၣ်ၡူးက့ၤထီၣ်လၢ မူခိၣ်ဒံးဘၣ်န့ၣ် တဲအပျဲၢ်အဘီၣ်တဖၣ်လၢ– “သုကကဲထီၣ် ယပှၤအုၣ်အသးတဖၣ်လၢ ယရူၤၡလ့ၣ်, ဒီးကီၢ်ယူဒၤဒီကီၢ်ညါ, ဒီးၡၤမရံ, ဒီးပၢၢ်လၢဟီၣ်ခိၣ်အကတၢၢ်လီၤ.” (မၤတၢ် ၁:၈) အဝဲသ့ၣ်မၤဝဲတၢ်မၤအံၤ ကသ့ဒ်လဲၣ်. ယ့ၣ်ၡူးအၢၣ်လီၤအဝဲသ့ၣ်လၢ ယွၤအသးစီဆှံကမၤစၢၤအီၤလီၤ. (မၤတၢ် ၁:၅) ဘၣ်ဆၣ် မတၤကတီခိၣ်ရိၤမဲအဝဲသ့ၣ်ဒီး ဟီၣ်ခိၣ်ဒီဘ့ၣ်တၢ်စံၣ်တဲၤတဲလီၤတၢ်မၤန့ၣ်လဲၣ်. တၢ်မၢဖိသ့ၣ်တဖၣ်သ့ၣ်ညါဝဲ လၢအပူၤကွံာ်န့ၣ် ယဟိဝၤယွၤသူဝဲ ပှၤဟီၣ်ခိၣ်ဖိလၢကတီခိၣ်ရိၤမဲ ပှၤအံၣ်စရ့လးဖိတဖၣ်လီၤ. အဃိဘၣ်သ့ၣ်သ့ၣ်အဝဲသ့ၣ် ကအဲၣ်ဒိးသ့ၣ်ညါဝဲလၢ ယဟိဝၤယွၤကသူမတၤလၢ ကတီခိၣ်ရိၤမဲတၢ်မၤအံၤလဲၣ်န့ၣ်လီၤ.
၃. (က) ယ့ၣ်ၡူးက့ၤထီၣ်လၢ မူခိၣ်ဝံၤအလီၢ်ခံ တၢ်မၢဖိတဖၣ် မၤဝဲတၢ်ဆၢတဲာ်လၢအရ့ဒိၣ်မနုၤလဲၣ်. (ခ) လၢတၢ်မၤလိအံၤအပူၤ ပကတဲသကိးတၢ်သံကွၢ်မနုၤတဖၣ်လဲၣ်.
၃ ယ့ၣ်ၡူးက့ၤထီၣ်လၢမူခိၣ် ဝံၤအလီၢ်ခံ အပျဲၢ်အဘီၣ်တဖၣ် ဆိကမိၣ်ထံဝဲ လံာ်စီဆှံအဆၢတဖၣ် ဒီးဃ့ဘါထုကဖၣ်လၢ ယဟိဝၤယွၤ ကမၤစၢၤ အဝဲသ့ၣ်အဂီၢ် ဝံၤဒီးဃုထၢထီၣ်ဝဲ စီၤမးသံလၢ စီၤယူဒၤအံၣ်စကၤရံၤအိာ် အလီၢ်န့ၣ်လီၤ. (မၤတၢ် ၁:၁၅-၂၆) ဘၣ်မနုၤအဃိ တၢ်ဃုထၢအံၤ မ့ၢ်တၢ်လၢအရ့ဒိၣ်လၢ အဝဲသ့ၣ်ဒီး ယဟိဝၤယွၤအဂီၢ်န့ၣ်လဲၣ်. ယ့ၣ်ၡူးအပျဲၢ်အဘီၣ်တဖၣ် သ့ၣ်ညါဘၣ်ဝဲလၢ တၢ်မၢဖိန့ၣ်ကဘၣ်အိၣ်ဝဲ ၁၂ ဂၤလီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ယ့ၣ်ၡူးဃုထၢထီၣ်ဝဲ တၢ်မၢဖိတဖၣ်ဒီး ဟ့ၣ်အဝဲသ့ၣ်တၢ်သိၣ်လိ ဒ်သိးကဟံးထီၣ်ဖီၣ်ထီၣ်မူဒါလၢအရ့ဒိၣ်လၢ ယွၤအပှၤဂီၢ်မုၢ်အဂီၢ်န့ၣ်လီၤ. အဝဲသ့ၣ်အမူဒါန့ၣ် မ့ၢ်မနုၤလဲၣ်. ယဟိဝၤယွၤဒီး ယ့ၣ်ၡူးမၤစၢၤအဝဲသ့ၣ် ဒ်သိးကကတဲာ်ကတီၤအသးလၢ ကဟံးထီၣ်ဖီၣ်ထီၣ် မူဒါအံၤအဂီၢ်ဒ်လဲၣ်. မုၢ်မဆါတနံၤညါအံၤစ့ၢ်ကီး တၢ်ရဲၣ်တၢ်ကျဲၤအိၣ်ဝဲဒ်လဲၣ်. ဒီးပသ့ၣ်နီၣ်ထီၣ် ‘ပှၤလၢအကဲတ့ၢ်ပခိၣ်’ လီၤဆီဒၣ်တၢ် “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့”တဖၣ်န့ၣ် ကသ့ဒ်လဲၣ်.—ဧ့ၤဘြံၤ ၁၃:၇; မးသဲ ၂၄:၄၅.
ယ့ၣ်ၡူး ဟံးစုနဲၣ်ကျဲဝဲ ပှၤပၢဆှၢတၢ်ကမံးတံာ်
၄. တၢ်မၢဖိဒီး တၢ်အိၣ်ဖှိၣ်သးပှၢ်လၢဝ့ၢ်ယရူၤၡလ့ၣ်အပူၤန့ၣ် အမူဒါအိၣ်ဒ်လဲၣ်.
၄ ဖဲ ခ.န ၃၃ ဘူၣ်ယဲၢ်ဆံန့ၣ် တၢ်မၢဖိတဖၣ်စးထီၣ်တီခိၣ်ရိၤမဲဝဲ ခရံာ်ဖိတၢ်အိၣ်ဖှိၣ်လီၤ. လံာ်စီဆှံတဲဝဲလၢ “စီၤပ့းတရူးဆၢထၢၣ် ဝဲဒီးပှၤတဆံတဂၤန့ၣ်” ဒီး သိၣ်လိဝဲ ပှၤဂီၢ်မုၣ်ဖးဒိၣ် ဘၣ်ဃးတၢ်မ့ၢ်တၢ်တီန့ၣ်လီၤ. (မၤတၢ် ၂:၁၄, ၁၅) ဒီးပှၤဂီၢ်မုၢ်ဖဲန့ၣ်အါဂၤ ကဲထီၣ်ဝဲခရံာ်ဖိလီၤ. ဒီးဖဲန့ၣ်ဝံၤအလီၢ်ခံ ခရံာ်ဖိအသီတဖၣ်အံၤ “အိၣ်ဝဲတဘိယူၢ်ဃီလၢ ပှၤတၢ်မၢဖိ အတၢ်သိၣ်တၢ်သီအပူၤ” လီၤ. (မၤတၢ် ၂:၄၂) တၢ်မၢဖိတဖၣ်အံၤ အဝဲသ့ၣ်ဘၣ်ဟံးန့ၢ်မူဒါလၢ ကကွၢ်ထွဲဝဲ ကျိၣ်ဖိစ့ဖိလၢ တၢ်အိၣ်ဖှိၣ်အဂီၢ်န့ၣ်လီၤ. (မၤတၢ် ၄:၃၄, ၃၅) တကးဒံးဘၣ်အဝဲသ့ၣ် သိၣ်လိနဲၣ်လိ ယွၤအခ့အပှၤတဖၣ်ဒီး ဃ့ဘါထုကဖၣ်န့ၢ်တၢ်လၢအဝဲသ့ၣ်အဂီၢ်လီၤ. ဒီးအဝဲသ့ၣ်စံးဝဲလၢ– “ပဝဲဒၣ်အံၤ, ပကဘါထုကဖၣ်တၢ်, ဒီးမၤတၢ်အကလုၢ်အကထါအတၢ်မၤတထံၣ်ဃီလီၤ.” (မၤတၢ် ၆:၄) ဒီးအဝဲသ့ၣ်ဆှၢလီၤဝဲ ခရံာ်ဖိလၢအအိၣ်ဒီးတၢ်လဲၤခီဖျိတဖၣ်လၢ ကလဲၤစံၣ်တဲၤတဲလီၤတၢ်လၢ တၢ်လီၢ်လၢအသီန့ၣ်လီၤ. (မၤတၢ် ၈:၁၄, ၁၅) လၢခံ တၢ်အိၣ်ဖှိၣ်သးပှၢ်အဂၤတဖၣ် လၢအဘၣ်တၢ်ဒိးဖှူအီၤလၢသးစီဆှံန့ၣ် မၤသကိးတၢ်ဒီး တၢ်မၢဖိလၢ ကတီခိၣ်ရိၤမဲလၢ တၢ်အိၣ်ဖှိၣ်အပူၤန့ၣ်လီၤ. ဒ်ပှၤပၢဆှၢတၢ်ကမံးတံာ်အသိး ပှၤတဖၣ်အံၤ ဟ့ၣ်လီၤဝဲတၢ်ဟံးစုနဲၣ်ကျဲ လၢတၢ်အိၣ်ဖှိၣ်တဖၣ်အဂီၢ်လီၤ.—မၤတၢ် ၁၅:၂.
ခရံာ်ဖိလၢ တၢယၤဖှိၣ်အစိၤတဖၣ် သ့ၣ်ညါဝဲလၢ ယဟိဝၤယွၤ ဟံးစုနဲၣ်ကျဲ ပှၤပၢဆှၢတၢ်ကမံးတံာ် ခီဖျိ ယ့ၣ်ၡူး
၅, ၆. (က) သးစီဆှံမၤစၢၤ ပှၤပၢဆှၢတၢ်ကမံးတံာ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံး တက့ၢ်.) (ခ) မူခိၣ်ကလူးမၤစၢၤ ပှၤပၢဆှၢတၢ်ကမံးတံာ် လၢကျဲဒ်လဲၣ်. (ဂ) ကစၢ်ယွၤအကလုၢ်ကထါ လံာ်စီဆှံ ဟံးစုနဲၣ်ကျဲဝဲ ပှၤပၢဆှၢတၢ်ကမံးတံာ်ဒ်လဲၣ်.
၅ ခရံာ်ဖိလၢ တၢယၤဖှိၣ်အစိၤတဖၣ် သ့ၣ်ညါဝဲလၢ ယဟိဝၤယွၤ ဟံးစုနဲၣ်ကျဲ ပှၤပၢဆှၢတၢ်ကမံးတံာ်ခီဖျိ ယ့ၣ်ၡူးန့ၣ်လီၤ. အဝဲသ့ၣ် သ့ၣ်ညါဝဲလီၤတံၢ်လီၤဆဲးဒ်လဲၣ်. အဆိကတၢၢ်န့ၣ် သးစီဆှံ ဟ့ၣ်စိဟ့ၣ်ကမီၤဝဲ ပှၤပၢဆှၢတၢ်ကမံးတံာ်လီၤ. (ယိၤဟၣ် ၁၆:၁၃) ပှၤလၢ ဘၣ်တၢ်ဒိးဖှူအီၤခဲလၢာ် ဒိးန့ၢ်ဘၣ်ဝဲ သးစီဆှံလီၤ. ဘၣ်ဆၣ် သးစီဆှံဟ့ၣ်စိဟ့ၣ်ကမီၤဝဲ လီၤဆီဒၣ်တၢ် တၢ်မၢဖိဒီး တၢ်အိၣ်ဖှိၣ်သးပှၢ်တဖၣ်လၢ အတီခိၣ်ရိၤမဲတၢ် လၢအအိၣ်လၢ ယရူၤၡလ့ၣ်အပူၤ ဒ်သိးကမၤလၢပှဲၤအမူဒါအဂီၢ်လီၤ. အဒိ ဖဲ ခ.န ၄၉ နံၣ်န့ၣ် သးစီဆှံ ဟံးစုနဲၣ်ကျဲဝဲ ပှၤပၢဆှၢတၢ်ကမံးတံာ်လၢ ကမၤဝဲတၢ်ဆၢတဲာ် ဘၣ်ဃးဒီး တၢ်ကူးတရံးန့ၣ်လီၤ. ဒီးတၢ်အိၣ်ဖှိၣ်တဖၣ် မၤပိာ်ထွဲဝဲဒ် တၢ်ဟံးစုနဲၣ်ကျဲအသိးန့ၣ်လီၤ. လၢတၢ်န့ၣ်အဃိ အဝဲသ့ၣ် “ဂၢၢ်ထီၣ်ကျၢၤထီၣ်လၢ တၢ်စူၢ်တၢ်နာ်အပူၤ, ဒီးအါထီၣ်ဂီၢ်ထီၣ် ကိးမုၢ်နံၤမုၢ်နၤဒဲးလီၤ.” (မၤတၢ် ၁၆:၄, ၅) လံာ်ပရၢလၢဘၣ်တၢ်ဆှၢအီၤဆူ တၢ်အိၣ်ဖှိၣ်တဖၣ်အအိၣ် လၢအဘၣ်ဃးဒီးတၢ်ကူးတရံးအဂ့ၢ်န့ၣ် ပထံၣ်ဘၣ်လၢ ပှၤပၢဆှၢတၢ်ကမံးတံာ် ပာ်ဖျါထီၣ်ဝဲ တၢ်ဂ့ၤတၢ်ဝါဒ်သိးဒီး တၢ်အဲၣ်တၢ်ကွံဒီး တၢ်နာ်လီၤ. ဒီးပထံၣ်ဘၣ်စ့ၢ်ကီးလၢ ဖဲအဝဲသ့ၣ်မၤတၢ်ဆၢတဲာ်အခါ ယွၤအသးစီဆှံမၤစၢၤအီၤလီၤ.—မၤတၢ် ၁၅:၁၁, ၂၅-၂၉; ကလၤတံ ၅:၂၂, ၂၃.
၆ ခံထံၣ်တထံၣ်န့ၣ် မူခိၣ်ကလူးတဖၣ် မၤစၢၤဝဲ ပှၤပၢဆှၢတၢ်ကမံးတံာ်လီၤ. အဒိ မူခိၣ်ကလူး မၢဝဲစီၤကန့လံးလဲၤဃုတၢ်မၢဖိ ပ့းတရူးန့ၣ်လီၤ. ဖဲစီၤပ့းတရူးတဲဘၣ် စီၤကန့လံး ဒီးအဘူးအတံၢ်တဖၣ် ဘၣ်ဃးဒီးလံာ်စီဆှံဝံၤအလီၢ်ခံ အဝဲသ့ၣ်မ့ၢ်ပှၤလၢ တဒိးဘၣ်တၢ်ကူးတရံးဘၣ် သနာ်က့ဒိးန့ၢ်ဘၣ်ဝဲ သးစီဆှံလီၤ. လၢပှၤတခီဘီမုၢ်ဖိအကျါန့ၣ် စီၤကန့လံး မ့ၢ်ပှၤအဆိကတၢၢ်တဂၤလၢ အတဒိးဘၣ်တၢ်ကူးတရံးသနာ်က့ ကဲထီၣ်ခရံာ်ဖိန့ၣ်လီၤ. ဖဲတၢ်မၢဖိဒီး ဒီပုၢ်ဝဲၢ်လၢအဂၤတဖၣ် နၢ်ဟူဝဲအခါ အဝဲသ့ၣ်တူၢ်လိာ်ဝဲ ကစၢ်ယွၤအတၢ်ရဲၣ်တၢ်ကျဲၤအံၤဒီး တူၢ်လိာ်မုာ်ဝဲ ပှၤတခီဘီမုၢ်ဖိလၢ တဒိးတၢ်ကူးတရံးဒံးတဖၣ် လၢခရံာ်ဖိတၢ်အိၣ်ဖှိၣ်အပူၤန့ၣ်လီၤ. (မၤတၢ် ၁၁:၁၃-၁၈) လၢတၢ်န့ၣ်အဃိ ပသ့ၣ်ညါဘၣ်လၢ မူခိၣ်ကလူးတဖၣ် ဆီၣ်ထွဲမၤစၢၤဝဲ တၢ်စံၣ်တဲၤတဲလီၤတၢ်မၤလၢ ပှၤပၢဆှၢတၢ်ကမံးတံာ်တီခိၣ်ရိၤမဲဝဲန့ၣ်လီၤ. (မၤတၢ် ၅:၁၉, ၂၀) သၢထံၣ်တထံၣ်န့ၣ် ယွၤအကလုၢ်ကထါ ဟံးစုနဲၣ်ကျဲပှၤပၢဆှၢတၢ်ကမံးတံာ်န့ၣ်လီၤ. အဝဲသ့ၣ်သူဝဲ လံာ်စီဆှံဒ်သိးကမၤစၢၤအဝဲသ့ၣ်လၢ ကမၤတၢ်ဆၢတဲာ်လၢအဘၣ်ဃးဒီး ခရံာ်ဖိတၢ်စူၢ်တၢ်နာ်ဒီး တၢ်ဟံးစုနဲၣ်ကျဲလၢတၢ်အိၣ်ဖှိၣ်အဂီၢ်န့ၣ်လီၤ.—မၤတၢ် ၁:၂၀-၂၂; ၁၅:၁၅-၂၀.
၇. ဘၣ်မနုၤအဃိ ပတဲသ့လၢ ယ့ၣ်ၡူးတီခိၣ်ရိၤမဲဝဲခရံာ်ဖိလၢ တၢယၤဖှိၣ်အစိၤန့ၣ်လဲၣ်.
၇ ပှၤပၢဆှၢတၢ်ကမံးတံာ် မ့ၢ်ပှၤတီခိၣ်ရိၤမဲတၢ်လၢ တၢ်အိၣ်ဖှိၣ်ပူၤဘၣ်ဆၣ် အဝဲသ့ၣ်သ့ၣ်ညါဝဲလၢ ယ့ၣ်ၡူးမ့ၢ်ဝဲအဝဲသ့ၣ်အခိၣ်န့ၣ်လီၤ. ပသ့ၣ်ညါဒ်လဲၣ်. တၢ်မၢဖိ ပီလူးတဲဝဲလၢ ခရံာ်မ့ၢ်ပှၤလၢ အဃုထၢထီၣ် “တၢ်မၢဖိ” န့ၣ်လီၤ. တကးဒံးဘၣ် အဝဲတဲဝဲလၢခရံာ်မ့ၢ် “တၢ်ခိၣ်” မ့တမ့ၢ် တၢ်အိၣ်ဖှိၣ်အခိၣ်န့ၣ်လီၤ. (အ့းဖ့းစူး ၄:၁၁, ၁၅) အဝဲသ့ၣ် တကိးလီၤအသးလၢ တၢ်မၢဖိတဂၤဂၤအမံၤဘၣ်. လၢတၢ်န့ၣ်အလီၢ် ယ့ၣ်ၡူး “အပျဲၢ်အဘီၣ်” တဖၣ် ဘၣ်တၢ်ကိးအီၤလၢ “ပှၤခရံာ်ဖိ” လီၤ. (မၤတၢ် ၁၁:၂၆) စီၤပီလူးသ့ၣ်ညါဝဲလၢ အကဘၣ်လူၤပိာ်ထွဲဝဲ လံာ်စီဆှံအတၢ်ဟံးစုနဲၣ်ကျဲလၢ တၢ်မၢဖိဒီးပှၤလၢ တီခိၣ်ရိၤမဲတၢ်တဖၣ် ဟ့ၣ်လီၤဝဲန့ၣ် မ့ၢ်တၢ်လၢအရ့ဒိၣ်လီၤ. စီၤပီလူးတဲဝဲလၢ– “ဘၣ်ဆၣ်ဒီး ယသးအိၣ်လၢသုကသ့ၣ်ညါလၢ ကယဲၢ်ပိာ်ခွါတဂၤလၢ်လၢ်အခိၣ်မ့ၢ်ခရံာ်” လီၤ. စီၤပီလူးအတၢ်ကတိၤအံၤ ပာ်ဖျါထီၣ်ဝဲလၢ ပှၤလၢအပၣ်ဃုာ်လၢ ပှၤပၢဆှၢတၢ်ကမံးတံာ်အကျါကိးဂၤဒဲးန့ၣ် အိၣ်ဝဲလၢယ့ၣ်ၡူးအဖီလာ်လီၤ. တကးဒံးဘၣ် စီၤပီလူးတဲစ့ၢ်ကီးဝဲလၢ “ခရံာ်အခိၣ်မ့ၢ်ယွၤလီၤ.” (၁ ကရံၣ်သူး ၁၁:၂, ၃) လၢတၢ်န့ၣ်အဃိ ပသ့ၣ်ညါလီၤတံၢ်လၢ ယဟိဝၤယွၤ ပာ်ထီၣ်အဖိခွါယ့ၣ်ၡူးခရံာ်လၢ ကကဲဝဲတၢ်အိၣ်ဖှိၣ်အခိၣ်န့ၣ်လီၤ.
“တမ့ၢ်ပှၤဟီၣ်ခိၣ်ဖိအတၢ်မၤဘၣ်”
၈, ၉. ဒီပုၢ်ဝဲၢ်ရးစၢၤ ကဘၣ်တီခိၣ်ရိၤမဲဝဲ မနုၤလဲၣ်.
၈ စးထီၣ်ဖဲ ၁၈၇၀ နံၣ်န့ၣ် ခၠါ(ရ်)ထ့(စ်)ရးစၢၤ ဒီးအတံၤသကိးတနီၤ ဂုာ်ကျဲးစၢး ဘူၣ်ထီၣ်ဘါထီၣ်ယွၤ ဒ်လံာ်စီဆှံတၢ်သိၣ်တၢ်သီအိၣ်ဝဲအသိးဒီး မၤစၢၤပှၤအဂၤတဖၣ်လၢ ကမၤဝဲဒ်န့ၣ်စ့ၢ်ကီးလီၤ. ဒီးပှၤလၢအဝဲသ့ၣ်အဲၣ်ဒိးမၤစၢၤဝဲတဖၣ်န့ၣ် ပၣ်ဃုာ်ဒီးပှၤလၢ ကတိၤကျိာ်အကလုာ်ကလုာ်လီၤ. ဒီးစံယိၣ် တၢးထီခိးတၢ် လံာ်ဖိအတၢ်ကရၢကရိန့ၣ် မ့ၢ်ဝဲတၢ်ကရၢကရိတခါလၢ ပဒိၣ်ပာ်ပနီၣ်အီၤဖဲ ၁၈၈၄ နံၣ်န့ၣ်လီၤ. ဒီးဒီပုၢ်ဝဲၢ် ရးစၢၤ မ့ၢ်ပှၤလၢအတီခိၣ်ရိၤမဲတၢ်န့ၣ်လီၤ. * (ကွၢ်တၢ်ဂ့ၢ်အဘျဲၣ် တက့ၢ်.) အဝဲဃုသ့ၣ်ညါဝဲ လံာ်စီဆှံလီၤတံၢ်လီၤဆဲး ဒီးအဝဲတဲဝဲ သရိာ်အဂၤတဖၣ် ဒူဒူလၢအဝဲသ့ၣ်အတၢ်သိၣ်လိနဲၣ်လိဒ်သိးဒီး ယွၤသၢဂၤတဂၤဃီဒီး သးလၢသံတသ့ဘၣ်န့ၣ် တအိၣ်လၢ လံာ်စီဆှံအပူၤဘၣ်. အဝဲနၢ်ပၢၢ်စ့ၢ်ကီးဝဲလၢ ယ့ၣ်ၡူးမ့ၢ်ဟဲက့ၤကဒါက့ၤန့ၣ် ပထံၣ်အီၤတသ့ဘၣ် ဒီး “ပှၤကလုာ်အဂၤအမုၢ်အလါ” ကကတၢၢ်ကွံာ်ဝဲဖဲ ၁၉၁၄ နံၣ်န့ၣ်လီၤ. (လူၤကၣ် ၂၁:၂၄) ဒီပုၢ်ဝဲၢ် ရးစၢၤ သူဝဲ အတၢ်ဆၢကတီၢ်, အဂံၢ်အဘါ ဒီးအကျိၣ်အစ့တဖၣ်လၢ ကသိၣ်လိပှၤဂၤလၢ တၢ်မ့ၢ်တၢ်တီတဖၣ်အဂီၢ်လီၤ. ပတဲသ့လၢ ယဟိဝၤယွၤဒီးယ့ၣ်ၡူး သူဝဲဒီပုၢ်ဝဲၢ် ရးစၢၤ လၢကတီခိၣ်ရိၤမဲတၢ်ဖဲ ဆၢကတီၢ်အဝဲန့ၣ်လီၤ.
၉ ဒီပုၢ်ဝဲၢ် ရးစၢၤ တအဲၣ်ဒိးဝဲလၢ ပှၤကပာ်ဒိၣ်အီၤဘၣ်. ဖဲ ၁၈၉၆ နံၣ်န့ၣ် ဒီပုၢ်ဝဲၢ်ရးစၢၤကွဲးဝဲလၢ အဝဲဒီးပှၤအဂၤလၢ အတီခိၣ်ရိၤမဲတၢ်တဖၣ် တအဲၣ်ဒိးလၢ ပှၤကမၤလၤကပီၤအဝဲသ့ၣ်ဘၣ်. အဝဲသ့ၣ်တအဲၣ်ဒိးပှၤကိးအီၤလၢ မံၤလၤသၣ်ကပီၤလၢ လီၤလီၤဆီဆီဘၣ်. ဒီးအဝဲသ့ၣ်တအဲၣ်ဒိးလၢ ပှၤကကိးတၢ်ကရၢကရိလၢ အဝဲသ့ၣ်အမံၤစ့ၢ်ကီးဘၣ်. ဒီးလၢခံဒီပုၢ်ဝဲၢ်ရးစၢၤတဲဝဲလၢ– “တၢ်မၤအဝဲအံၤ တမ့ၢ်ပှၤဟီၣ်ခိၣ်ဖိအတၢ်မၤဘၣ်.”
“တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” န့ၣ် မ့ၢ်ဒီပုၢ်ဝဲၢ်ခွါလၢ အဘၣ်တၢ်ဒိးဖှူအီၤတဖၣ် အကျါ စှၤကိာ်ဂၤတကရူၢ်လၢ အမၤသကိးတၢ် ဒီးဘၣ်တၢ်ကိးအီၤလၢ ပှၤပၢဆှၢတၢ်ကမံးတံာ်
၁၀. (က) ယ့ၣ်ၡူးဃုထၢထီၣ် “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” လၢအခါဖဲလဲၣ်. (ခ) ပှၤပၢဆှၢတၢ်ကမံးတံာ် လီၤဆီဒီး ပှၤလၢအတီခိၣ်ရိၤမဲတၢ်လၢ တၢးထီခိးတၢ် တၢ်ကရၢကရိအပူၤဒ်လဲၣ်န့ၣ် တဲဖျါထီၣ်တက့ၢ်.
၁၀ ဒီပုၢ်ဝဲၢ်ရးစၢၤ သံဝဲဖဲ ၁၉၁၆ နံၣ်န့ၣ်လီၤ. ဒီးဖဲ ၁၉၁၉ နံၣ်န့ၣ် ယ့ၣ်ၡူးဃုထၢထီၣ်ဝဲ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” လီၤ. ဘၣ်မနုၤအဃိ ယ့ၣ်ၡူးဃုထၢထီၣ်ဝဲလဲၣ်. ဒ်သိး “အကဒုးအီၣ်ဒုးအီ” အပျဲၢ်အဘီၣ် “လၢအဆၢအကတီၢ်ဘၣ်” အဂီၢ်လီၤ. (မးသဲ ၂၄:၄၅) ဖဲန့ၣ်အဆၢကတီၢ် ဒီပုၢ်ဝဲၢ်ခွါစှၤကိးဂၤလၢ ဘၣ်တၢ်ဒိးဖှူအီၤ လၢအအိၣ်လၢ ဝဲၤလီၢ်ခိၣ်သ့ၣ်လၢ Brooklyn, New York န့ၣ် ကတဲာ်ကတီၤဝဲ နီၢ်သးတၢ်အီၣ်တၢ်အီလၢ ယ့ၣ်ၡူးအခ့အပှၤတဖၣ်အဂီၢ်လီၤ. ဒီးဖဲ ၁၉၄၀ နံၣ်ဝံၤအလီၢ်ခံ တၢ်ကတိၤလၢအမ့ၢ် “ပှၤပၢဆှၢတၢ်ကမံးတံာ်” န့ၣ်ဘၣ်တၢ်စးထီၣ်သူအီၤလၢ ပလံာ်လဲၢ်တဖၣ်အပူၤလီၤ. ဖဲန့ၣ်အဆၢကတီၢ် ပှၤအါတက့ၢ်လၢဖီၣ်ဝဲမူဒါ ဘၣ်ဃးဒီး တၢ်မူးတၢ်ရၢ်လၢ တၢးထီခိးတၢ် လံာ်စီဆှံဒီးလံာ်ဖိတၢ်ကရၢကရိအပူၤန့ၣ် ပၣ်ဃုာ်လၢပှၤပၢဆှၢတၢ်ကမံးတံာ်အကျါစ့ၢ်ကီးလီၤ. ဘၣ်ဆၣ်ဖဲ ၁၉၇၁ နံၣ်န့ၣ် ပသ့ၣ်ညါဘၣ်လၢ တၢးထီခိးတၢ် လံာ်စီဆှံဒီးလံာ်ဖိတၢ်ကရၢကရိလၢ ဖဲစဲၣ်ဘ့နံယါ န့ၣ်လီၤဆီလိာ်အသးဒီး ပှၤပၢဆှၢတၢ်ကမံးတံာ်လီၤ. လၢတၢ်န့ၢ်အဃိ ပှၤလၢအတီခိၣ်ရိၤမဲတၢ်လၢ တၢးထီခိးတၢ် အတၢ်ကရၢကရိန့ၣ် အဝဲသ့ၣ် ဟံးန့ၢ်မူဒါထဲလၢ တၢ်မူးတၢ်ရၢ်အဂီၢ်လီၤ. စးထီၣ်ဖဲန့ၣ်န့ၣ် ဒီပုၢ်ဝဲၢ်ခွါလၢ အဘၣ်တၢ်ဒိးဖှူအီၤတဖၣ် အဝဲသ့ၣ်မ့တမ့ၢ်ပှၤလၢ အတီခိၣ်ရိၤမဲတၢ်လၢ တၢးထီခိးတၢ်အတၢ်ကရၢကရိအပူၤ သနာ်က့ ကဲထီၣ် ပှၤပၢဆှၢတၢ်ကမံးတံာ်သ့ဝဲလီၤ. ဒီးပူၤကွံာ်တယံာ်ဒံးဘၣ်န့ၣ် ဒီပုၢ်ဝဲၢ်ခွါလၢ အပၣ်ဃုာ်လၢ “သိလၢအဂုၤအဂၤ” တဖၣ်အကျါ ကဲထီၣ်ပှၤတီခိၣ်ရိၤမဲတၢ်လၢ တၢးထီခိးတၢ် တၢ်ကရၢကရိဒီး တၢ်ကရၢကရိအဂၤလၢ ကစၢ်ယွၤအပှၤဂီၢ်မုၢ် သူဝဲတဖၣ်အပူၤလီၤ. လၢတၢ်န့ၣ်အဃိ ပှၤပၢဆှၢတၢ်ကမံးတံာ်န့ၣ် သူအါထီၣ်အတၢ်ဆၢကတီၢ်လၢ ကကတဲာ်ကတီၤ လံာ်စီဆှံအတၢ်ဟံးစုနဲၣ်ကျဲဒီး တၢ်သိၣ်လိနဲၣ်လိသ့ဝဲလီၤ. (ယိၤဟၣ် ၁၀:၁၆; မၤတၢ် ၆:၄) July 15, 2013, issue of The Watchtower တဲနၢ်ပၢၢ်ပှၤလၢ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” န့ၣ် မ့ၢ်ဒီပုၢ်ဝဲၢ်ခွါလၢအဘၣ်တၢ်ဒိးဖှူအီၤတဖၣ် အကျါစှၤကိာ်ဂၤတကရူၢ်လၢအ မၤသကိးတၢ် ဒီးဘၣ်တၢ်ကိးအီၤလၢ ပှၤပၢဆှၢတၢ်ကမံးတံာ်လီၤ.
ပှၤပၢဆှၢတၢ်ကမံးတံာ်, ၁၉၅၀ နံၣ်အလီၢ်ခံ
၁၁. ပှၤပၢဆှၢတၢ်ကမံးတံာ်မၤတၢ်ဆၢတဲာ်ဒ်လဲၣ်.
၁၁ တနွံတဘျီ ဖဲပှၤပၢဆှၢတၢ်ကမံးတံာ် ထံၣ်ဖှိၣ်လိာ်သးအခါ အဝဲသ့ၣ်မၤဝဲ တၢ်ဆၢတဲာ်လၢ အရ့ဒိၣ်တဖၣ်လီၤ. အဝဲသ့ၣ်ထံၣ်ဖှိၣ်လိာ်အသးဒ်အံၤန့ၣ် မၤစၢၤအဝဲသ့ၣ်ဒ်သိး ကရ့လိာ်သးဘူးဘူးတံၢ်တံၢ်ဒီး ကအိၣ်ဃူအိၣ်ဖိးအဂီၢ်လီၤ. (ကတိၤဒိ ၂၀:၁၈) ပှၤပၢဆှၢတၢ်ကမံးတံာ် တဂၤဂ့ၤတဂၤဂ့ၤ တပာ်လီၤသးလၢအမ့ၢ်ပှၤလၢအရ့ဒိၣ်န့ၢ် ပှၤအဂၤလၢအပၣ်ဃုာ်လၢ ပှၤပၢဆှၢတၢ်ကမံးတံာ်အကျါတဖၣ်န့ၣ်ဘၣ်. လၢတၢ်န့ၣ်အဃိ ပှၤပၢဆှၢတၢ်ကမံးတံာ် အတၢ်အိၣ်ဖှိၣ်န့ၣ် အဝဲသ့ၣ်တီခိၣ်ရိၤမဲဝဲ တနံၣ်တဂၤတနံၣ်တဂၤန့ၣ်လီၤ. (၁ ပ့းတရူး ၅:၁) ဒီးလၢကမံးတံာ် အဂၤဃုခါအကျါစ့ၢ်ကီး အဝဲသ့ၣ်မၤဝဲဒ်န့ၣ်လီၤ. အဝဲသ့ၣ်တဂၤဂ့ၤတဂၤဂ့ၤ တပာ်လီၤအသးလၢ အကဲခိၣ်ကဲနၢ်လၢ အဒီပုၢ်ဝဲၢ်အဖီခိၣ်ဘၣ်. အဝဲသ့ၣ်တဂၤစုာ်စုာ် ပၣ်ဃုာ်စ့ၢ်ကီးလၢ ယ့ၣ်ၡူးအပှၤဟံၣ်ဖိအပူၤ ဒီး ဒိးန့ၢ်ဘၣ်ဝဲနီၢ်သးတၢ်အီၣ်တၢ်အီလၢ တၢ်အကုၢ်အပှၤလၢ အကလုၢ်တီ အတၢ်ဟံးစုနဲၣ်ကျဲန့ၣ်လီၤ.
ဖဲ ၁၉၁၉ နံၣ်န့ၣ် တၢ်အကုၢ်အပှၤလၢ အကလုၢ်တီ ဘၣ်တၢ်ဃုထၢထီၣ်အီၤလီၤ. ဒီးစးထီၣ်ဖဲန့ၣ်န့ၣ် ကုၢ်အံၤကတဲာ်ကတီၤဝဲနီၢ်သးတၢ်အီၣ်တၢ်အီလၢ ယွၤအပှၤဂီၢ်မုၢ်တဖၣ်အဂီၢ် (ကွၢ် လံာ်အဆၢ ၁၀, ၁၁)
“တၢ်အကုၢ်အပှၤလၢ အကလုၢ်တီဒီး အကူၣ်တၢ်သ့န့ၣ်. . . မ့ၢ်မတၤတဂၤလဲၣ်”
၁၂. ပကတဲသကိး တၢ်သံကွၢ်မနုၤတဖၣ်လဲၣ်.
၁၂ ပှၤပၢဆှၢတၢ်ကမံးတံာ်န့ၣ် မ့ၢ်ပှၤလၢအတလၢတပှဲၤဘၣ်. ဒီးပစိၤခဲအံၤ ကစၢ်ယွၤတထိးဘၣ် ပှၤပၢဆှၢတၢ်ကမံးတံာ်အသးလၢ သးစီဆှံ ဒ်ပှၤကွဲးလံာ်စီဆှံလၢပျၢၤတဖၣ်အသိးဘၣ်. အဃိ ဖဲပှၤပၢဆှၢတၢ်ကမံးတံာ် တဲနၢ်ပၢၢ်လံာ်စီဆှံအဂ့ၢ် မ့တမ့ၢ် ဟံးစုနဲၣ်ကျဲတၢ်ကရၢကရိအခါ တၢ်ကမၣ်အိၣ်ထီၣ်သ့ဝဲလီၤ. အဒိ လၢ Watch Tower Publications Index အပူၤ တၢ်ဂ့ၢ်ခိၣ်တီလၢအမ့ၢ် “Beliefs Clarified” န့ၣ် ပာ်ဖျါထီၣ်ဝဲ ပတၢ်နၢ်ပၢၢ် ဘၣ်ဃးဒီးလံာ်စီဆှံအဂ့ၢ် ဘၣ်တၢ်ဆီတလဲအီၤစးထီၣ်ဖဲ ၁၈၇၀ န့ၣ်လီၤ. ယ့ၣ်ၡူးတတဲဝဲလၢ အကုၢ်လၢအကလုၢ်တီ ကကတဲာ်ကတီၤန့ၢ်ပှၤ နီၢ်သးတၢ်အီၣ်တၢ်အီလၢ အဘၣ်လီၤတံၢ်လီၤဆဲးကိးဘျီဒဲးဘၣ်. လၢတၢ်န့ၣ်အဃိ ယ့ၣ်ၡူးအတၢ်သံကွၢ်လၢမ့ၢ်ဝဲ “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့. . . မ့ၢ်မတၤတဂၤလဲၣ်” န့ၣ် ပကစံးဆၢအီၤဒ်လဲၣ်. (မးသဲ ၂၄:၄၅) ပှၤပၢဆှၢတၢ်ကမံးတံာ် မ့ၢ်ဝဲကုၢ်လၢအကလုၢ်တီန့ၣ် တၢ်အုၣ်အသးအိၣ်ဒ်လဲၣ်. ပကသမံသမိးသကိး တၢ်ဂ့ၢ်သၢမံၤလၢ အမၤစၢၤဝဲ ပှၤပၢဆှၢတၢ်ကမံးတံာ်လၢ တၢ်မၢဖိအစိၤန့ၣ်လီၤ.
၁၃. သးစီဆှံမၤစၢၤဝဲ ပှၤပၢဆှၢတၢ်ကမံးတံာ်လၢကျဲဒ်လဲၣ်.
၁၃ သးစီဆှံမၤစၢၤဝဲ ပှၤပၢဆှၢတၢ်ကမံးတံာ်. သးစီဆှံမၤစၢၤဝဲ ပှၤပၢဆှၢတၢ်ကမံးတံာ်ဒ်သိး ကနၢ်ပၢၢ်ထီၣ်ဝဲ လံာ်စီဆှံတၢ်မ့ၢ်တၢ်တီလၢ လၢညါပှၤတနၢ်ပၢၢ်ဝဲဒံးဘၣ်န့ၣ်လီၤ. အဒိ, သမံသမိးကွၢ် ပတၢ်နၢ်ပၢၢ်လၢ ဘၣ်တၢ်ဆီတလဲအီၤဒ် လံာ်အဆၢလၢအမဲာ်ညါတဆၢ ပာ်ဖျါအသိးန့ၣ် တက့ၢ်. မ့တမ့ၢ်လၢ သးစီဆှံအတၢ်မၤစၢၤန့ၣ် ပှၤဟီၣ်ခိၣ်ဖိနၢ်ပၢၢ်ဝဲဒီး တဲနၢ်ပၢၢ်ပှၤဂၤလၢ “တၢ်ယိာ်ဘၣ်ဃးဒီး ယွၤ” အံၤ လၢအနီၢ်ကစၢ်တသ့နီတဂၤဘၣ်. (ဖး ၁ ကရံၣ်သူး ၂:၁၀ တက့ၢ်.) ပှၤပၢဆှၢတၢ်ကမံးတံာ်တူၢ်ဘၣ်ဝဲဒ် တၢ်မၢဖိပီလူးကွဲးဝဲအသိးလီၤ. တၢ်မၢဖိပီလူးကွဲးဝဲလၢ “တၢ်န့ၣ်တဖၣ်ပစံၣ်တဲၤတဲလီၤလၢ တၢ်ကတိၤလၢပှၤကညီအတၢ်ကူၣ်သ့ သိၣ်လိဝဲန့ၣ်တမ့ၢ်ဘၣ်. မ့ၢ်လၢသးစီဆှံသိၣ်လိဝဲတဖၣ်လီၤ.” (၁ ကရံၣ်သူး ၂:၁၃) ပှၤသိၣ်လိကမၣ်တၢ် အိၣ်ဝဲအနံၣ်လၢ အကယၤတဖၣ်လံဘၣ်ဆၣ် ဘၣ်မနုၤအဃိ ဖဲ ၁၉၁၉ နံၣ်န့ၣ် ပှၤနၢ်ပၢၢ်လံာ်စီဆှံအနီၣ်ဂံၢ်အါထီၣ်ဝဲလဲၣ်. မ့ၢ်လၢယွၤအသးစီဆှံ အတၢ်မၤစၢၤအဃိန့ၣ်လီၤ.
၁၄. ဒ်လီၣ်ဖျါ ၁၄:၆, ၇ ပာ်ဖျါထီၣ်ဝဲအသိး မုၢ်မဆါတနံၤအံၤ မူခိၣ်ကလူးသ့ၣ်တဖၣ် မၤစၢၤဝဲ ပှၤပၢဆှၢတၢ်ကမံးတံာ် ဒီးကစၢ်ယွၤအခ့အပှၤတဖၣ်ဒ်လဲၣ်.
၁၄ မူခိၣ်ကလူးတဖၣ်မၤစၢၤဝဲ ပှၤပၢဆှၢတၢ်ကမံးတံာ်. ပှၤပၢဆှၢတၢ်ကမံးတံာ်အိၣ်ဒီးမူဒါဖးဒိၣ်လၢ ကဘၣ်ဟံးစုနဲၣ်ကျဲဝဲ ပှၤစံၣ်တဲၤတဲလီၤတၢ်ဖိ ဃိးကကွဲၢ်ဘျဲၣ် လၢတၢ်စံၣ်တဲၤတဲလီၤဘီမုၢ်တၢ်သးခုကစီၣ်လၢ ဟီၣ်ခိၣ်ဒီဘ့ၣ်န့ၣ်လီၤ. ဘၣ်မနုၤအဃိ တၢ်မၤအံၤကဲထီၣ်လိၣ်ထီၣ်ဝဲလဲၣ်. မ့ၢ်လၢမူခိၣ်ကလူးတဖၣ် အတၢ်ဆီၣ်ထွဲမၤစၢၤအဃိလီၤ. (ဖး လီၣ်ဖျါ ၁၄:၆, ၇ တက့ၢ်.) အါဘျီန့ၣ်မူခိၣ်ကလူးတဖၣ်မၤစၢၤ ဒီးဟံးစုနဲၣ်ကျဲပှၤစံၣ်တဲၤတဲလီၤတၢ်ဖိလၢ ကလဲၤလၢ ပှၤလၢ အဃ့ဘါထုကဖၣ်ဒီးဃ့တၢ်မၤစၢၤလၢ ယွၤအအိၣ်န့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) တၢ်လီၢ်လၢတၢ်ထီဒါအိၣ်ဝဲအါမးသနာ်က့ တၢ်စံၣ်တဲၤတဲလီၤဒီး တၢ်သိၣ်လိနဲၣ်လိအတၢ်မၤန့ၣ် ဆဲးဒိၣ်ထီၣ်ထီထီၣ်ဝဲလီၤ. တၢ်မၤအံၤ ကဲထီၣ်အသးသ့ခီဖျိ မူခိၣ်ကလူးတဖၣ်အတၢ်မၤစၢၤအဃိလီၤ.
၁၅. ပှၤပၢဆှၢတၢ်ကမံးတံာ် လီၤဆီလိာ်အသးဒီး ခရံာ်ဖိတၢ်ဘူၣ်တၢ်ဘါခိၣ်နၢ်တဖၣ်ဒ်လဲၣ်. ဟ့ၣ်တၢ်အဒိတက့ၢ်.
၁၅ ယွၤအကလုၢ်ကထါ ဟံးစုနဲၣ်ကျဲဝဲ ပှၤပၢဆှၢတၢ်ကမံးတံာ်. (ဖး ယိၤဟၣ် ၁၇:၁၇ တက့ၢ်.) ဖဲ ၁၉၇၃ နံၣ်န့ၣ် တၢ်မနုၤကဲထီၣ်အသးလဲၣ်. လါယူၤ ၁ တၢးထီခိးတၢ်အပူၤ အိၣ်ဒီးတၢ်သံကွၢ်လၢ “ပှၤတဂၤမ့ၢ် အီမီာ်ဒံးန့ၣ် မ့ၢ်အဝဲတုၤထီၣ်ထီၣ်ဘးလၢကဒိးဘျၢထံဧါ.” တၢ်သံကွၢ်အံၤ အတၢ်စံးဆၢမ့ၢ်ဝဲလၢ အဝဲသ့ၣ်ဒိးဘျၢထံတန့ၢ်ဒံးဘၣ်. ဒီးအတၢ်စံးဆၢအံၤ ဒိးသန့ၤထီၣ်အသးလၢ လံာ်စီဆှံတၢ်ဟံးစုနဲၣ်ကျဲလီၤ. တၢးထီခိးတၢ်တဘ့ၣ်အံၤ ပာ်ဖျါထီၣ်ဝဲ လံာ်စီဆှံအဆၢတနီၤဒီး တဲနၢ်ပၢၢ်ပှၤလၢ ဘၣ်မနုၤအဃိ ပှၤတဂၤမ့ၢ်ဆဲးအီမီာ်န့ၣ် ကဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤလဲၣ်. (၁ ကရံၣ်သူး ၅:၇; ၂ ကရံၣ်သူး ၇:၁) ဒီးတဲဖျါဝဲ ပျီပျီလၢ တၢ်သိၣ်တၢ်သီအံၤ တဟဲလၢ ပှၤဟီၣ်ခိၣ်ဖိအအိၣ်ဘၣ်, ဟဲလၢ “ယွၤအအိၣ် ခီဖျိအကလုၢ်ကထါလံာ်စီဆှံန့ၣ်လီၤ.” တၢ်ဘူၣ်တၢ်ဘါအဂၤလၢ ကမၤထွဲလံာ်စီဆှံ အတၢ်ဟံးစုနဲၣ်ကျဲလၢာ်လၢာ်ဆ့ဆ့န့ၣ် တအိၣ်နီတဖုဘၣ်. မ့ၢ်လၢအကကဲထီၣ်တၢ်ကီတၢ်ခဲလၢ တၢ်အိၣ်ဖှိၣ်ဖိတဖၣ်အဂီၢ် အဃိလီၤ. တယံာ်ဒံးဘၣ်န့ၣ် လံာ်တဘ့ၣ်လၢအဘၣ်ဃးဒီး တၢ်ဘူၣ်တၢ်ဘါလၢ အမဲရကၤကီၢ်အပူၤ တဲဝဲလၢ– “ထီဘိန့ၣ် ခရံာ်ဖိတၢ်ဘူၣ်တၢ်ဘါခိၣ်နၢ်တဖၣ် ဆီတလဲဝဲ အတၢ်သိၣ်လိနဲၣ်လိ ဒ်သိးကလီၤပလိာ်အသးဒီး အတၢ်အိၣ်ဖှိၣ်ဖိ ဒီးတၢ်ကရၢကရိဖးဒိၣ်တဖၣ် အတၢ်ဘၣ်သးဒီးအတၢ်နာ်လီၤ. အဝဲသ့ၣ်မၤဝဲဒ်န့ၣ် မ့ၢ်လၢ အဲၣ်ဒိးဝဲလၢ ပှၤတဖၣ်အံၤ ကဆီၣ်ထွဲအဝဲသ့ၣ်အဃိလီၤ.” မ့မ့ၢ်ပှၤပၢဆှၢတၢ်ကမံးတံာ်န့ၣ် အဝဲသ့ၣ်တမၤတၢ်ဆၢတဲာ် ဒ်သိး ကလူၤဝဲပှၤအါဂၤအတၢ်ဘၣ်သးဘၣ်. လၢတၢ်န့ၣ်အလီၢ် အဝဲသ့ၣ်မၤတၢ်ဆၢတဲာ်လၢ အဒိးသန့ၤထီၣ်အသးလၢ လံာ်စီဆှံအတၢ်ဟံးစုနဲၣ်ကျဲန့ၣ်လီၤ. လၢတၢ်န့ၣ်အဃိ ယဟိဝၤယွၤမ့ၢ်ပှၤလၢ ဟံးစုနဲၣ်ကျဲအခ့အပှၤလၢ မုၢ်မဆါတနံၤအံၤန့ၣ် ဖျါဝဲလီၤတံၢ်လီၤဆဲးလီၤ.
“ပှၤလၢအကဲတ့ၢ်သုခိၣ်တဖၣ်န့ၣ် သ့ၣ်နီၣ်ထီၣ်က့ၤအီၤတက့ၢ်”
၁၆. ပသ့ၣ်နီၣ်ထီၣ် ပှၤပၢဆှၢတၢ်ကမံးတံာ်သ့လၢ ကျဲဒ်လဲၣ်.
၁၆ ဖး ဧ့ၤဘြံၤ ၁၃:၇ တက့ၢ်. လံာ်စီဆှံတဲဝဲလၢ “ပှၤလၢအကဲတ့ၢ်သုခိၣ် . . . တဖၣ်န့ၣ် သ့ၣ်နီၣ်ထီၣ်က့ၤအီၤတက့ၢ်.” ကျဲတဘိလၢ ပမၤဒ်အံၤသ့န့ၣ် မ့ၢ်ဝဲခီဖျိပဃ့ဘါထုကဖၣ်တၢ်လၢ ပှၤပၢဆှၢတၢ်ကမံးတံာ်အဂီၢ်လီၤ. (အ့းဖ့းစူး ၆:၁၈) ပှၤပၢဆှၢတၢ်ကမံးတံာ်အိၣ်ဒီးမူဒါအါမး ဒ်သိးဒီး ကဘၣ်ကတဲာ်ကတီၤဝဲ နီၢ်သးတၢ်အီၣ်တၢ်အီ, ဟံးစုနဲၣ်ကျဲလၢ ဟီၣ်ခိၣ်ဒီဘ့ၣ်တၢ်စံၣ်တဲၤတဲလီၤတၢ်အတၢ်မၤ ဒီးကဘၣ်ကွၢ်ထွဲဝဲ တၢ်မၤဘူၣ်လၢပှၤဟ့ၣ်လီၤလၢ တၢ်ကရၢကရိအဂီၢ်န့ၣ်လီၤ. လၢတၢ်န့ၣ်အဃိ ပှၤပၢဆှၢတၢ်ကမံးတံာ် လိၣ်ဘၣ် ပတၢ်ဃ့ဘါထုကဖၣ်လၢအဂီၢ်ထီဘိန့ၣ်လီၤ.
၁၇, ၁၈. (က) ပမၤထွဲ ပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲသ့ဒ်လဲၣ်. (ခ)ပတၢ်စံၣ်တဲၤတဲလီၤတၢ်မၤန့ၣ် ဆီၣ်ထွဲမၤစၢၤဝဲ ပှၤပၢဆှၢတၢ်ကမံးတံာ်ဒီး ယ့ၣ်ၡူးဒ်လဲၣ်.
၁၇ တကးဒံးဘၣ် ပသ့ၣ်နီၣ်ထီၣ် ပှၤပၢဆှၢတၢ်ကမံးတံာ်သ့ခီဖျိ ပမၤပိာ်ထွဲအတၢ်ဟံးစုနဲၣ်ကျဲန့ၣ်လီၤ. ပှၤပၢဆှၢတၢ်ကမံးတံာ် ဟံးစုနဲၣ်ကျဲပှၤခီဖျိ လံာ်လဲၢ်တဖၣ်, တၢ်အိၣ်ဖှိၣ်ရိဖှိၣ်တဖၣ်, ကဝီၤတၢ်အိၣ်ဖှိၣ်တဖၣ် ဒီးတၢ်အိၣ်ဖှိၣ်ဖးဒိၣ်တဖၣ်န့ၣ်လီၤ. ဒီးပှၤပၢဆှၢတၢ်ကမံးတံာ်ဃုထၢထီၣ်ဝဲ ကဝီၤအပှၤကွၢ်တၢ် ဒီးကဝီၤအပှၤကွၢ်တၢ်ဃုထၢထီၣ်ဝဲ တၢ်အိၣ်ဖှိၣ်သးပှၢ်တဖၣ်လီၤ. ကဝီၤအပှၤကွၢ်တၢ်ဒီး တၢ်အိၣ်ဖှိၣ်သးပှၢ်တဖၣ် မ့ၢ်လူၤပိာ်ထွဲဝဲ တၢ်ဟံးစုနဲၣ်ကျဲလၢ အဝဲသ့ၣ်ဒိးန့ၢ်ဘၣ်ဝဲတဖၣ် လီၤတံၢ်လီၤဆဲးန့ၣ် မ့ၢ်ဒၣ်အဝဲသ့ၣ် သ့ၣ်နီၣ်ထီၣ်ပှၤပၢဆှၢတၢ်ကမံးတံာ်န့ၣ်လီၤ. ဒီးပဝဲခဲလၢာ်ပပာ်ဖျါထီၣ်လၢ ပပာ်ကဲ ပခိၣ်ပနၢ်ယ့ၣ်ၡူးခီဖျိ ပဒိကနၣ် ဒီပုၢ်ဝဲၢ်ခွါလၢ အဝဲသူဝဲလၢ မုၢ်မဆါတနံၤအံၤတဖၣ်အကလုၢ်န့ၣ်လီၤ.—ဧ့ၤဘြံၤ ၁၃:၁၇.
၁၈ ဒီးကျဲအဂၤတဘိလၢ ပသ့ၣ်နီၣ်ထီၣ် ပှၤပၢဆှၢတၢ်ကမံးတံာ်သ့န့ၣ် ပဂုာ်ကျဲးစၢးဆူၣ်ဆူၣ်လၢ တၢ်စံၣ်တဲၤတဲလီၤတၢ်မၤအပူၤလီၤ. ဧ့ၤဘြံၤ ၁၃:၇ ဟ့ၣ်ဂံၢ်ဟ့ၣ်ဘါခရံာ်ဖိတဖၣ်လၢ ကကွၢ်လိမၤဒိး ပှၤလၢအတီခိၣ်ရိၤမဲတၢ်တဖၣ် အတၢ်နာ်န့ၣ်လီၤ. ပှၤပၢဆှၢတၢ်ကမံးတံာ် ပာ်ဖျါထီၣ်အတၢ်စူၢ်တၢ်နာ်လၢအဂၢၢ်ကျၢၤခီဖျိ အသးဆူၣ်လၢ တၢ်စံၣ်တဲၤတဲလီၤတၢ်မၤအပူၤ ဒီး တၢ်ရၤလီၤတၢ်သးခုကစီၣ်န့ၣ်လီၤ. မ့ၢ်ပဆီၣ်ထွဲမၤစၢၤ ဒီပုၢ်ဝဲၢ်ခွါတဖၣ်အံၤလၢ တၢ်မၤလၢအရ့ဒိၣ်အံၤစ့ၢ်ကီးဧါ. ပမ့ၢ်မၤန့ၣ် ဖဲပနၢ်ဟူဘၣ်ယ့ၣ်ၡူးအတၢ်ကတိၤလၢ– “မ့ၢ်သုမၤပှၤအဆံး ကတၢၢ်တဂၤ လၢယဒီပုၢ်ဝဲၢ်အကျါအံၤဒီး, မ့ၢ်သုမၤယၤလီၤ” အခါ ပကသးခုလီၤ.—မးသဲ ၂၅:၃၄-၄၀.
၁၉. ဘၣ်မနုၤအဃိ နပာ်လီၤနသးဂၢၢ်ဂၢၢ်ကျၢၤကျၢၤလၢ နကပိာ်ယ့ၣ်ၡူးအခံလဲၣ်.
၁၉ ဖဲယ့ၣ်ၡူးက့ၤထီၣ်လၢ မူခိၣ်အခါ အဝဲတပာ်တ့ၢ် အပျဲၢ်အဘီၣ်တဖၣ် နီတဘျီဘၣ်. (မးသဲ ၂၈:၂၀) ယ့ၣ်ၡူးသ့ၣ်ညါဝဲလၢ ဖဲအဝဲအိၣ်လၢ ဟီၣ်ခိၣ်အခါ သးစီဆှံ, မူခိၣ်ကလူးတဖၣ် ဒီးယွၤအကလုၢ်ကထါ ဟံးစုနဲၣ်ကျဲအီၤလၢ ကတီခိၣ်ရိၤမဲတၢ်အဂီၢ်လီၤ. ဒ်န့ၣ်အသိး မုၢ်မဆါတနံၤအံၤ အဝဲမၤစၢၤဝဲ တၢ်အကုၢ်အပှၤလၢ အကလုၢ်တီဒ်န့ၣ်လီၤ. ဒီးပှၤပၢဆှၢတၢ်ကမံးတံာ်န့ၣ်ဆဲး “ပိာ်သိဖိ [ယ့ၣ်ၡူး] အခံ, ဖဲအဆှၢအီၤတပူၤလၢ်လၢ်” န့ၣ်လီၤ. (လီၣ်ဖျါ ၁၄:၄) လၢတၢ်န့ၣ်အဃိ ဖဲပမၤထွဲ ပှၤပၢဆှၢတၢ်ကမံးတံာ် အတၢ်ဟံးစုနဲၣ်ကျဲအခါ မ့ၢ်ဒၣ်ပပိာ် ပခိၣ်လၢအမ့ၢ်ယ့ၣ်ၡူးအခံန့ၣ်လီၤ. ဒီးလၢခံအဝဲကဆှၢပှၤတုၤ တၢ်မူအထူအယိာ်လီၤ. (လီၣ်ဖျါ ၇:၁၄-၁၇) ဒီးပှၤဟီၣ်ခိၣ်ဖိအခိၣ်အနၢ်တဖၣ် ဆှၢပှၤဆူတၢ်မူအထူအယိာ် တသ့နီတဂၤဘၣ်.
^ လံာ်အဆၢ. 3 လီၤဂာ်လၢ ယဟိဝၤယွၤအဲၣ်ဒိးဃုထၢထီၣ်ဝဲ တၢ်မၢဖိ ၁၂ ဂၤဒ်သိး ကသူၣ်ထီၣ်ဝဲ “လၢၢ်အခီၣ်ထံးတဆံခံဖျၢၣ်” လၢဝ့ၢ်ယရူၤၡလ့ၣ်အသီအဂီၢ်လီၤ. (လီၣ်ဖျါ ၂၁:၁၄, ခ့ခါစှီၤကျိာ်) လၢတၢ်န့ၣ်အဃိ တၢ်မၢဖိလၢအသးတီတဖၣ် မ့ၢ်သံကွံာ်တဂၤဂၤသနာ်က့ တလိၣ်ပှၤဃုထၢထီၣ် တၢ်မၢဖိလၢအလီၢ်လၢၤဘၣ်.
^ လံာ်အဆၢ. 8 စးထီၣ်ဖဲ ၁၉၅၅ နံၣ်န့ၣ် တၢ်ကရၢကရိအံၤ ဘၣ်တၢ်သ့ၣ်ညါအီၤလၢ တၢးထီခိးတၢ် လံာ်စီဆှံဒီးလံာ်ဖိတၢ်ကရၢကရိလၢ ဖဲစဲၣ်ဘ့နံယါ န့ၣ်လီၤ.
^ လံာ်အဆၢ. 14 ကွၢ် “Bearing Thorough Witness” About God’s Kingdom, pages 58-59 တက့ၢ်.
