တၢ်ပှ့ၤက့ၤန့ၣ် မ့ၢ် “တၢ်ဟ့ၣ်အလၢ အပှဲၤ” လၢအဟဲလၢပၢ်အအိၣ်
“ကယဲၢ်တၢ်ဟ့ၣ်အဂ့ၤအဝါ, ဒီးကယဲၢ်တၢ်ဟ့ၣ်အလၢအပှဲၤ တမံၤလၢ်လၢ်န့ၣ်, ဟဲလီၤလၢ . . . ပၢ်လၢထးန့ၣ်လီၤ.” — ယၤကိာ် ၁:၁၇.
၁. တၢ်ပှ့ၤက့ၤ ကဲဘျုးလၢ ပဂီၢ်ဒ်လဲၣ်.
ယၣ်ၡူးအတၢ်ဟ့ၣ်လုၢ်ထီၣ်သးန့ၣ် ဒုးအိၣ်ထီၣ်တၢ်ခွဲးတၢ်ယာ်လၢ ပကဒိးန့ၢ်ဘၣ် တၢ်ဆိၣ်ဂ့ၤအါမးလီၤ. အဒိ တၢ်ပှ့ၤက့ၤအံၤ အိးဟိထီၣ်ကျဲဒ်သိး စီၤအၤဒၣ်အဖိအလံၤလၢ အအဲၣ်တၢ်တီတၢ်လိၤတဖၣ် ကကဲထီၣ်ယွၤအဟံၣ်ဖိဃီဖိတဖၣ်လီၤ. ဒီးခါဆူညါ ပှၤကအိၣ်မူဘၣ်လီၤထူလီၤယိာ်လၢ တၢ်သးခုအပူၤန့ၣ် မ့ၢ်တၢ်ဆိၣ်ဂ့ၤအဂၤတမံၤလၢ ပဒိးန့ၢ်ဘၣ်အီၤသ့ဝဲလီၤ. တကးဒံးဘၣ် တၢ်ပှ့ၤက့ၤန့ၣ် ဘၣ်ထွဲလိာ်သးဒီး ကယဲၢ်ပှၤအိၣ်လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤန့ၣ်လီၤ.—ဧ့ၤဘြံၤ ၁:၈, ၉.
၂. (က) ဖဲယ့ၣ်ၡူးဃ့ဘါထုကဖၣ်တၢ်အခါ အဝဲပာ်ဖျါထီၣ် တၢ်ဂ့ၢ်လၢအရ့ဒိၣ်လၢ ဘၣ်ဃးမူခိၣ်ဒီး ဟီၣ်ခိၣ်အဂ့ၢ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ)လၢတၢ်မၤလိအံၤအပူၤ ပကမၤလိသကိး တၢ်ဂ့ၢ်မနုၤလဲၣ်.
၂ တချုးလၢ ယ့ၣ်ၡူးသံဒံးဘၣ် ခံနံၣ်ဃၣ်ဃၣ်န့ၣ် အဝဲသိၣ်လိ အပျဲၢ်အဘီၣ်တဖၣ်လၢ ကဃ့ဘါထုကဖၣ်တၢ်ဒ်အံၤ- “အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံတက့ၢ်. နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဖဲဒၣ်နသးတက့ၢ်.” (မးသဲ ၆:၉, ၁၀) တၢ်ပှ့ၤက့ၤန့ၣ် ဘၣ်ထွဲလိာ်အသးဒီး ယဟိဝၤယွၤအမံၤ ကဘၣ်တၢ်ပာ်စီဆှံအီၤ, ယွၤအဘီအမုၢ် ဒီးယွၤအတၢ်ဘၣ်သးဒ်လဲၣ်န့ၣ် ခဲအံၤပကတဲသကိးတၢ်ဂ့ၢ်တဖၣ်အံၤလီၤ.
“မ်နမံၤဘၣ်တၢ်ပာ်စီဆှံအီၤတက့ၢ်”
၃. ယဟိဝၤယွၤအမံၤန့ၣ် ပာ်ဖျါထီၣ်ဝဲတၢ်မနုၤလဲၣ်ဒီး မုၣ်ကီၤလံၢ် ဒုၣ်ဒွဲၣ်ယွၤအမံၤဒ်လဲၣ်.
၃ အဆိကတၢၢ်န့ၣ် ယ့ၣ်ၡူးဃ့ဝဲလၢ ယဟိဝၤယွၤအမံၤကဘၣ် တၢ်ပာ်စီဆှံအီၤလီၤ. ယွၤအမံၤန့ၣ် ပာ်ဖျါထီၣ်ဝဲ ယဟိဝၤယွၤမ့ၢ် ကစၢ်ဒ်လဲၣ်တဂၤလဲၣ်န့ၣ်လီၤ. အဝဲမ့ၢ်ယွၤလၢ အစိအကမီၤဒိၣ်ကတၢၢ် ဒီးအတီအလိၤကတၢၢ်လၢ မူဟီၣ်ကယၢအပူၤန့ၣ်လီၤ. ယ့ၣ်ၡူးစ့ၢ်ကီး ကိးအီၤလၢ “ပၢ်စီဆှံ” လီၤ. (ယိၤဟၣ် ၁၇:၁၁) မ့ၢ်လၢယဟိဝၤယွၤန့ၣ်စီဆှံဝဲအဃိ တၢ်လၢအမၤဝဲခဲလၢာ်ဒီး တၢ်သိၣ်တၢ်သီလၢ အဝဲဒုးအိၣ်ထီၣ်ဝဲတဖၣ်န့ၣ် စီဆှံဝဲလီၤ. ဘၣ်ဆၣ် လၢဧ့ၤဒ့ၣ်တၤသၣ်လီၢ်အပူၤန့ၣ် မုၣ်ကီၤလံၢ် ထုးထီၣ်ဝဲတၢ်သံကွၢ်လၢအဘၣ်ဃးဒီး ယွၤအတၢ်ခွဲးတၢ်ယာ်လၢ ကပာ်လီၤဝဲ တၢ်သိၣ်တၢ်သီလၢ ပှၤဟီၣ်ခိၣ်ဖိအဂီၢ်န့ၣ်လီၤ. အဝဲတဲလံၣ်တဲလီဝဲယဟိဝၤယွၤအဂ့ၢ် ဒီးတဲဟးဂီၤယွၤအမံၤလၤသၣ်ကပီၤလီၤ.—၁ မိၤၡ့ ၃:၁-၅.
၄. ယ့ၣ်ၡူးပာ်စီဆှံယွၤအမံၤဒ်လဲၣ်.
၄ မ့မ့ၢ်ယ့ၣ်ၡူးန့ၣ် အဝဲအဲၣ် ယဟိဝၤယွၤအမံၤနီၢ်နီၢ်ဒီး ဂုာ်ကျဲးစၢးမၤဝဲဒ်သိး ယွၤအမံၤ ကဘၣ်တၢ်ပာ်စီဆှံအီၤအဂီၢ်လီၤ. (ယိၤဟၣ် ၁၇:၂၅, ၂၆) အဝဲမၤဝဲဒ်လဲၣ်. ခီဖျိလၢ အတၢ်ဖံးတၢ်မၤဒီး အတၢ်သိၣ်လိနဲၣ်လိန့ၣ်လီၤ. ယ့ၣ်ၡူးမၤစၢၤပှၤဂၤဒ်သိး အဝဲသ့ၣ်ကထံၣ်လၢ ယဟိဝၤအတၢ်သိၣ်တၢ်သီန့ၣ် မ့ၢ်တၢ်လၢအဘၣ်ဒီး တၢ်လၢယွၤမၢပမၤတဖၣ်န့ၣ် ကဲဘျုးလၢ ပနီၢ်ကစၢ်အဂီၢ်လီၤ. (ဖး စံးထီၣ်ပတြၢၤ ၄၀:၈-၁၀ တက့ၢ်.) မုၣ်ကီၤလံၢ် မၤအၢမၤသီအီၤတုၤအသံတစု ဘၣ်ဆၣ် အဝဲတီဒီး ယဟိဝၤယွၤတုၤအကတၢၢ်လီၤ. အဝဲပာ်ဖျါထီၣ်ဝဲလၢ ပှၤဟီၣ်ခိၣ်ဖိလၢ အလၢအပှဲၤတဂၤ ဒိကနၣ်ယဟိဝၤယွၤအကလုၢ် လီၤတံၢ်လီၤဆဲးသ့ဝဲလီၤ.
၅. ပပာ်စီဆှံ ယဟိဝၤယွၤအမံၤ ကသ့ဒ်လဲၣ်.
၅ ပပာ်ဖျါထီၣ်လၢ ပအဲၣ်ယဟိဝၤယွၤအမံၤ ကသ့ဒ်လဲၣ်. ပပာ်ဖျါထီၣ်သ့ခီဖျိလၢ ပတၢ်ဖံးတၢ်မၤတဖၣ်လီၤ. ယဟိဝၤယွၤအဲၣ်ဒိးဝဲလၢ ပကအိၣ်စီဆှံလီၤ. (ဖး ၁ ပ့းတရူး ၁:၁၅, ၁၆ တက့ၢ်.) တၢ်အံၤအဲၣ်ဒိးတဲဝဲ ယဟိဝၤယွၤဘၣ်သးလၢ ပဘူၣ်ထီၣ်ဘါထီၣ်ထဲဒၣ်အီၤ ဒီးဒိကနၣ်အကလုၢ်လၢ ပသူၣ်ဒီဖျၢၣ်ပသးဒီဖျၢၣ်န့ၣ်လီၤ. ဖဲပှၤဂၤမၤအၢမၤသီပှၤအခါဒၣ်လဲာ် ပဂုာ်ကျဲးစၢးအိၣ်မူဒ် ယဟိဝၤယွၤသိၣ်လိနဲၣ်လိပှၤအသိးလီၤ. ပမ့ၢ်အိၣ်မူဒ် ယွၤအတၢ်သိၣ်တၢ်သီအသိးန့ၣ် ယဟိဝၤယွၤအမံၤကဘၣ် တၢ်မၤလၤကပီၤအီၤလီၤ. (မးသဲ ၅:၁၄-၁၆) ပပာ်ဖျါထီၣ်လၢ ယဟိဝၤယွၤအတၢ်သိၣ်တၢ်သီန့ၣ် ဂ့ၤဝဲဒီး မုၣ်ကီၤလံၢ်မ့ၢ် ပှၤလံၣ်တၢ်လီတၢ်တဂၤန့ၣ်လီၤ. ပတမ့ၢ် ပှၤလၢပှၤပှဲၤအဃိ ပမၤကမၣ်ဘၣ်တၢ်သ့လီၤ. ဘၣ်ဆၣ် ဖဲပမၤကမၣ်ဘၣ်တၢ်အခါ ပပီၢ်ယၢ်လီၤက့ၤပသးဒီး ပဂုာ်ကျဲးစၢးဟးဆှဲးတၢ်လၢ ယွၤသးဟ့ဝဲတဖၣ်န့ၣ်လီၤ.—စံးထီၣ်ပတြၢၤ ၇၉:၉.
၆. ပကဲပှၤတလၢတပှဲၤဘၣ်ဆၣ် ဘၣ်မနုၤအဃိ ယဟိဝၤယွၤ ထံၣ်ပှၤဒ်ပှၤတီပှၤလိၤအသိးသ့ဝဲလဲၣ်.
၆ ပမ့မ့ၢ် ပှၤလၢအဘၣ် တၢ်ဒိးဖှူအီၤမ့ၢ်ဂ့ၤ “သိလၢအဂုၤအဂၤ” မ့ၢ်ဂ့ၤ ပမ့ၢ်နာ်တၢ်ပှ့ၤက့ၤန့ၣ် ယဟိဝၤယွၤ ကပျၢ်ကွံာ် ပတၢ်ဒဲးဘးလီၤ. ပှၤလၢ ဟ့ၣ်လုၢ်ထီၣ်အသးဆူယဟိဝၤယွၤအအိၣ်န့ၣ် ကစၢ်ယွၤတူၢ်လိာ်ဝဲလၢ အဝဲသ့ၣ်ကကဲထီၣ် ပှၤလၢ အဘူၣ်ထီၣ်ဘါထီၣ်အီၤတဖၣ်လီၤ. အဝဲပာ်ပနီၣ်ဝဲ ခရံာ်ဖိလၢဘၣ်တၢ်ဒိးဖှူအီၤတဖၣ်လၢ ပှၤတီပှၤလိၤဒ်အဖိခွါအသိး ဒီးအဝဲပာ်ပနီၣ်ဝဲ “သိလၢအဂုၤအဂၤ” တဖၣ်လၢပှၤတီပှၤလိၤ ဒ်အတံၤသကိးတဖၣ်အသိးလီၤ. (ယိၤဟၣ် ၁၀:၁၆; ရိမ့ၤ ၅:၁, ၂; ယၤကိာ်၂:၂၁-၂၅) လၢတၢ်န့ၣ်အဃိ ခဲအံၤဒၣ်လဲာ် တၢ်ပှ့ၤက့ၤန့ၣ် အိးဟိထီၣ်န့ၢ်ပှၤကျဲလၢ ပကရ့ဘၣ်ဒီးပပၢ်ဒီး ပာ်စီဆှံအမံၤလီၤ.
“နဘီနမုၢ်န့ၣ် မ်အဟဲတက့ၢ်”
၇. လၢတၢ်ပှ့ၤက့ၤအဃိ ပဒိးန့ၢ်ဘၣ်တၢ်ဆိၣ်ဂ့ၤမနုၤတဖၣ်လဲၣ်.
၇ လၢယ့ၣ်ၡူးအတၢ်ထုကဖၣ်အပူၤ အဝဲစံးဝဲလၢ– “နဘီနမုၢ်န့ၣ် မ်အဟဲတက့ၢ်.” တၢ်ပှ့ၤက့ၤန့ၣ် ဘၣ်ထွဲလိာ်အသးဒီး ယွၤအဘီအမုၢ်ဒ်လဲၣ်. ယွၤအဘီအမုၢ် မ့တမ့ၢ် အတၢ်ပၢတၢ်ပြးန့ၣ် မ့ၢ်ဝဲ ယ့ၣ်ၡူးဒီးပှၤ ၁၄၄,၀၀၀ လၢ ဘၣ်တၢ်ဃုထၢထီၣ်အီၤလၢ ပှၤဟီၣ်ခိၣ်ဖိအကျါန့ၣ်လီၤ. တၢ်ပှ့ၤက့ၤန့ၣ် အိးဟိထီၣ်န့ၢ် ပှၤသ့ၣ်တဖၣ်အံၤ အကျဲလၢအဝဲသ့ၣ် ကဂဲၤဆၢထၢၣ်သမူထီၣ်က့ၤလၢ မူခိၣ်န့ၣ်လီၤ (လီၣ်ဖျါ ၅: ၉, ၁၀; ၁၄:၁) အဝဲသ့ၣ်ကကဲထီၣ် စီၤပၤဒီး ပှၤလုၢ်တၢ်အဒိၣ်တဖၣ်ဒီး ကပၢဃုာ်တၢ်ဒီးယ့ၣ်ၡူးအနံၣ် ၁,၀၀၀ လီၤ. ဖဲန့ၣ်အဆၢကတီၢ် ယဟိဝၤယွၤ ကသူဝဲ ဘီမုၢ်အံၤဒ်သိးကမၤကဲထီၣ် ဟီၣ်ခိၣ်လၢပၤရဒံစူး ဒီးကမၤစၢၤ ပှၤဟီၣ်ခိၣ်ဖိလၢ ကကဲထီၣ် ပှၤလၢပှၤပှဲၤအဂီၢ်လီၤ. ဒီးလၢခံန့ၣ် ယဟိဝၤယွၤအခ့အပှၤလၢ မူခိၣ်ဒီး လၢဟီၣ်ခိၣ်ခဲလၢာ် ကကဲထီၣ်ဟံၣ်ဖိဃီဖိတဒူၣ်ဃီလီၤ. (လီၣ်ဖျါ ၅:၁၃;၂၀:၆) ဝံၤဒီးယ့ၣ်ၡူးကမၤဟးဂီၤကွံာ်မုၣ်ကီၤလံၢ်ဒီး ကမၤလီၤမၢ်ကွံာ်တၢ်ကီတၢ်ခဲလၢမုၣ်ကီၤလံၢ် ဒုးအိၣ်ထီၣ်ဝဲခဲလၢာ်န့ၣ်လီၤ.—၁ မိၤၡ့ ၃:၁၅.
၈. (က) ဒ်သိးယ့ၣ်ၡူးအပျဲၢ်အဘီၣ်သ့ၣ်တဖၣ် ကနၢ်ပၢၢ်ထီၣ်ဝဲလၢ ယွၤအဘီအမုၢ် မ့ၢ်တၢ်လၢအရ့ဒိၣ်အဂီၢ် အဝဲမၤစၢၤအဝဲသ့ၣ်ဒ်လဲၣ်. (ခ) ပဆီၣ်ထွဲမၤစၢၤ ယွၤအဘီမုၢ်ကသ့ဒ်လဲၣ်.
၈ ဘၣ်ဃးဒီး ယွၤအဘီအမုၢ် အရ့ဒိၣ်ထဲလဲၣ်အဂ့ၢ်န့ၣ် ဒ်သိးယ့ၣ်ၡူးအပျဲၢ်အဘီၣ်သ့ၣ်တဖၣ် ကနၢ်ပၢၢ်ထီၣ်ဝဲအဂီၢ် ယ့ၣ်ၡူးမၤစၢၤအဝဲသ့ၣ်လီၤ. မၤစၢၤဝဲလၢကျဲဒ်လဲၣ်. ယ့ၣ်ၡူးဒိးဘျၢထံဝံၤန့ၣ် အဝဲစံၣ်တဲၤတဲလီၤ “ယွၤအဘီအမုၢ်အတၢ်သးခုကစီၣ်” ဖဲတၢ်လီၢ်တပူၤလၢ်လၢ်လၢ အလဲၤဝဲန့ၣ်လီၤ. (လူၤကၣ် ၄:၄၃) တကးဒံးဘၣ် အဝဲမၢအပျဲၢ်အဘီၣ်တဖၣ် စံၣ်တဲၤတဲလီၤတၢ် “ပၢၢ်လၢဟီၣ်ခိၣ်အကတၢၢ်လီၤ.” (မၤတၢ် ၁:၆-၈) မုၢ်မဆါတနံၤအံၤ မ့ၢ်လၢတၢ်စံၣ်တဲၤတဲလီၤဘီမုၢ်တၢ်သးခုကစီၣ်အဃိ ပှၤအါဂၤဒိးန့ၢ်ဘၣ်တၢ်ခွဲးတၢ်ယာ်လၢ ကမၤလိဘၣ် တၢ်ပှ့ၤက့ၤအဂ့ၢ်ဒီး ကအိၣ်ဘၣ်လၢ ယွၤအဘီအမုၢ်တၢ်ပၢအဖီလာ်န့ၣ်လီၤ. ပဒိးပၢပသးလၢ ယွၤအဘီအမုၢ်အတၢ်ပၢအဖီလာ်န့ၣ် ပပာ်ဖျါထီၣ်အီၤသ့ခီဖျိ ပဆီၣ်ထွဲမၤစၢၤ ပှၤလၢအဘၣ်တၢ်ဒိးဖှူအီၤတဖၣ် လၢ တၢ်စံၣ်တဲၤတဲလီၤတၢ်မၤန့ၣ်လီၤ.—မးသဲ ၂၄:၁၄; ၂၅:၄၀.
“ဖဲဒၣ်နသးတက့ၢ်”
၉. ယဟိဝၤယွၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ် ကဟဲလၢထီၣ်ပှဲၤထီၣ်ဝဲနီၢ်နီၢ်န့ၣ် ဘၣ်မနုၤအဃိ ပနာ်သ့လဲၣ်.
၉ ယ့ၣ်ၡူးတဲဝဲ– “မ်တၢ်မၤအသး . . . ဖဲဒၣ်နသးတက့ၢ်” န့ၣ် အဲၣ်ဒိးစံးဝဲတၢ်မနုၤလဲၣ်. ယဟိဝၤယွၤမ့ၢ်တဲဝဲလၢ တၢ်ကဟဲကဲထီၣ်အသးန့ၣ် ကဟဲကဲထီၣ်ဝဲသပှၢ်ကတၢၢ်လီၤ. (ယၡါယၤ ၅၅:၁၁) မုၣ်ကီၤလံၢ်ဂုာ်ကျဲးစၢး မၤဟးဂီၤယဟိဝၤယွၤ အတၢ်တိာ်ပာ်ထဲလဲၣ် ဘၣ်ဆၣ် လ့ၤတက့ၤမၤဝဲတန့ၢ်ဘၣ်. ယဟိဝၤယွၤအတၢ်တိာ်ပာ်လၢ ဟီၣ်ခိၣ်န့ၣ် မ့ၢ်မနုၤလဲၣ်. အဝဲအဲၣ်ဒိးလၢ ဟီၣ်ခိၣ်ဒီဘ့ၣ်ပှဲၤဝဲဒီး နီၢ်အံၣ်အုဒီး စီၤအၤဒၣ် အဖိအလံၤလၢ အလၢအပှဲၤတဖၣ်န့ၣ်လီၤ. (၁ မိၤၡ့ ၁:၂၈) နီၢ်အံၣ်အုဒီး စီၤအၤဒၣ် မ့ၢ်သံဖဲတချုးအဖိအိၣ်ဒံးဘၣ်အခါန့ၣ် ယွၤအတၢ်တိာ်ပာ်အံၤ ဟဲလၢထီၣ်ပှဲၤထီၣ် တသ့လၢၤဘၣ်. လၢတၢ်န့ၣ်အဃိ ယဟိဝၤယွၤ ဟ့ၣ်အဝဲသ့ၣ်အခွဲးလၢ အကထီၣ်ဖိထီၣ်လံၤလီၤ. ဒီးတၢ်ပှ့ၤက့ၤန့ၣ် ဟ့ၣ်ဝဲပှၤလၢ အစူၢ်က့ၤနာ်က့ၤတၢ်တဖၣ် အတၢ်ခွဲးတၢ်ယာ်လၢ ကကဲထီၣ်ပှၤလၢပှၤပှဲၤ ဒီးကအိၣ်မူလီၤထူလီၤယိာ်န့ၣ်လီၤ. ယဟိဝၤယွၤအဲၣ်ပှၤကိးဂၤဒဲးဒီး အဲၣ်ဒိးဝဲလၢ ပကအိၣ်မူဘၣ်မုာ်မုာ်ခုၣ်ခုၣ်ဒ် အတိာ်ပာ်ဝဲအသိးန့ၣ်လီၤ.
၁၀. တၢ်ပှ့ၤက့ၤန့ၣ် ကဲဘျုးလၢ ပှၤလၢအသံတ့ၢ်တဖၣ်အဂီၢ်ဒ်လဲၣ်.
၁၀ ဘၣ်ဆၣ် ပှၤသံလၢ အကကွဲၢ်လၢအကထိတဖၣ်လၢ အတသ့ၣ်ညါဘၣ် ယဟိဝၤယွၤနီတဘျီဒံးဘၣ်န့ၣ် တၢ်မုၢ်လၢ်လၢအဝဲသ့ၣ်အဂီၢ် ကအိၣ်ဒံးဧါ. ယဟိဝၤယွၤအဲၣ်ဒိးဝဲလၢ ပှၤဟီၣ်ခိၣ်ဖိ ကမူဝဲအဃိ အဝဲကမၤသမူထီၣ်က့ၤ ပှၤလၢအသံတ့ၢ်တဖၣ်န့ၣ်လီၤ. တၢ်ပှ့ၤက့ၤန့ၣ် ဒုးအိၣ်ထီၣ်တၢ်ခွဲးတၢ်ယာ်လၢ အဝဲသ့ၣ်ကဟဲက့ၤသမူထီၣ်ကဒါက့ၤလီၤ. ဒီးဖဲန့ၣ် အဝဲသ့ၣ်ကမၤလိဘၣ်ယဟိဝၤယွၤအဂ့ၢ်ဒီး အိၣ်မူဘၣ်လီၤထူလီၤယိာ်သ့ဝဲလီၤ. (မၤတၢ် ၂၄:၁၅) ယဟိဝၤယွၤန့ၣ် မ့ၢ်ယွၤလၢ အဟ့ၣ်ပှၤသးသမူလီၤ. လၢတၢ်န့ၣ်အဃိ ဖဲပှၤသံသ့ၣ်တဖၣ် ဘၣ်တၢ်မၤသမူထီၣ်က့ၤအီၤအခါ ယဟိဝၤယွၤကကဲထီၣ် အဝဲသ့ၣ်အပၢ်လီၤ. (စံးထီၣ်ပတြၢၤ ၃၆:၉) လၢယ့ၣ်ၡူးအတၢ်ထုကဖၣ်အပူၤန့ၣ် အဝဲကိးယဟိဝၤယွၤလၢ “ပပၢ်” အိၣ်လၢမူခိၣ်န့ၣ်လီၤ. (မးသဲ ၆:၉) ယဟိဝၤယွၤဟ့ၣ်လီၤ ယ့ၣ်ၡူး မူဒါလၢအရ့ဒိၣ်တခါလၢအမ့ၢ် ကဘၣ်မၤသမူထီၣ်က့ၤ ပှၤလၢအသံတဖၣ်န့ၣ်လီၤ. ယ့ၣ်ၡူးစံးဝဲလၢ– “ယမ့ၢ် တၢ်ဂဲၤဆၢထၢၣ်က့ၤ ဒီးတၢ်မူလီၤ.”—ယိၤဟၣ် ၆:၄၀, ၄၄; ၁၁:၂၅.
၁၁. ယွၤအတၢ်တိာ်ပာ်လၢ “ပှၤဂီၢ်မုၢ်ဖးဒိၣ်” တဖၣ်အဂီၢ် အိၣ်ဝဲဒ်လဲၣ်.
၁၁ ယ့ၣ်ၡူးစံးဝဲလၢ– “ဖဲဒၣ်ပှၤလၢအမၤ တၢ်ဘၣ်ယွၤအသးတဂၤဂၤန့ၣ်, အဝဲဒၣ်မ့ၢ်ယဒီပုၢ်ဝဲၢ်မုၣ်, ဒီးယဒီပုၢ်ဝဲၢ်ခွါ, ဒီးယမိၢ်လီၤ.” (မၢ်ကူး ၃:၃၅) ယွၤအဲၣ်ဒိးဝဲလၢ ပှၤကိးကလုာ်ဒဲး ဒီးပှၤကတိၤတၢ် ကျိာ်အကလုာ်ကလုာ် ကကဲထီၣ် ပှၤလၢဘူၣ်ထီၣ်ဘါထီၣ်အီၤလီၤ. အဝဲသ့ၣ်န့ၣ်ဘၣ်တၢ်ကိးအီၤလၢ “ပှၤဂီၢ်မုၢ်ဖးဒိၣ်လၢ ပှၤဂံၢ်ထီၣ်တသ့ဘၣ်နီတဂၤဘၣ်.” အဝဲသ့ၣ်နာ်တၢ်ပှ့ၤက့ၤဒီး ဒိကနၣ် ယွၤအကလုၢ်လီၤ. အဝဲသ့ၣ်စံးထီၣ်ပတြၢၤယွၤဒီး စံးဝဲလၢ– “မ်တၢ်အုၣ်က့ၤခီၣ်က့ၤအိၣ်ဒီးပကစၢ်လၢ အဆ့ၣ်နီၤလၢလီၢ်ပစိာ်အဖီခိၣ်, ဒီးသိဖိန့ၣ်တက့ၢ်.”—လီၣ်ဖျါ ၇:၉, ၁၀.
၁၂. ဘၣ်ဃးဒီး ယဟိဝၤယွၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်န့ၣ် ပဟံးန့ၢ်တၢ်မၤလိလၢ ခရံာ်အတၢ်ထုကဖၣ်အပူၤသ့ဒ်လဲၣ်.
၁၂ ဘၣ်ဃးဒီးယဟိဝၤယွၤအဂ့ၢ်ဒီး အတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်န့ၣ် ခရံာ်အတၢ်ထုကဖၣ်ပာ်ဖျါထီၣ်န့ၢ်ပှၤ တၢ်ဂ့ၢ်အါမးလီၤ. အဆိကတၢၢ်န့ၣ် ဒ်သိးယဟိဝၤယွၤအမံၤ ကဘၣ်တၢ်ပာ်စီဆှံဒီးကဘၣ်တၢ်မၤလၤကပီၤအီၤအဂီၢ် ပကမၤအဂ့ၤကတၢၢ်လီၤ. (ယၡါယၤ ၈:၁၃) ယ့ၣ်ၡူးအတၢ်ဟ့ၣ်လုၢ်ထီၣ်သးန့ၣ် ဟ့ၣ်ပှၤတၢ်အုၣ်က့ၤခီၣ်က့ၤသ့ဝဲဒီး မၤလၤကပီၤယွၤအမံၤလီၤ. ဒီးယ့ၣ်ၡူးအမံၤအခီပညီ မ့ၢ်ဝဲ “ယဟိဝၤယွၤ မ့ၢ်တၢ်အုၣ်က့ၤခီၣ်က့ၤ” လီၤ. ဒီးခံထံၣ်တထံၣ်န့ၣ် ယဟိဝၤယွၤကသူဝဲအဘီအမုၢ်ဒ်သိး ပှၤဟီၣ်ခိၣ်ဖိလၢ ဒိကနၣ်အကလုၢ်တဖၣ် ကန့ၢ်ဘၣ်တၢ်အဘျုးအဖှိၣ်လၢ တၢ်ပှ့ၤက့ၤအဂီၢ်လီၤ. ဒီးသၢထံၣ်တထံၣ်န့ၣ် ပနာ်လၢ ဒ်သိးယွၤအတၢ်ဘၣ်သးကလၢထီၣ်ပှဲၤထီၣ်အဂီၢ် တၢ်တြီအီၤတန့ၢ်နီတမံၤဘၣ်.—စံးထီၣ်ပတြၢၤ ၁၃၅:၆; ယၡါယၤ ၄၆:၉, ၁၀.
ပာ်ဖျါထီၣ်န့ၢ်ယဟိဝၤယွၤလၢ နပာ်လုၢ်ပာ်ပှ့ၤ တၢ်ပှ့ၤက့ၤ
၁၃. ဘၣ်မနုၤအဃိ ပဒိးဘျၢထံလဲၣ်.
၁၃ ကျဲအဂ့ၤကတၢၢ်တဘိလၢ ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ပှ့ၤက့ၤန့ၣ် မ့ၢ်ဝဲ ပဟ့ၣ်လုၢ်ထီၣ်ပသးဆူယွၤအအိၣ်ဒီး ပဒိးဘျၢပသးလၢထံန့ၣ်လီၤ. ပမ့ၢ်မၤဒ်အံၤန့ၣ် မ့ၢ်ဒၣ်ပပာ်ဖျါထီၣ် ပတၢ်နာ်ဘၣ်ဃးတၢ်ပှ့ၤက့ၤ ဒီး “ပမ့ၢ်ကစၢ်အတၢ်လီၤ.” (ရိမ့ၤ ၁၄:၈) ဒီးဖဲပဒိးဘျၢထံအခါ ပဃ့လၢ ယဟိဝၤယွၤကဟ့ၣ်ပှၤ ‘ပသးလၢအသ့ၣ်ညါဒၣ်တၢ်လၢအဂ့ၤ’ လီၤ. (၁ ပ့းတရူး ၃:၂၁) လၢတၢ်ပှ့ၤက့ၤအဃိ ပအိၣ်ဒီး သးလၢအသ့ၣ်ညါဒၣ်တၢ်လၢအဂ့ၤန့ၣ်လီၤ. ဒီးပနာ်သ့သပှၢ်ကတၢၢ်လၢ အဝဲကဟ့ၣ်ပှၤ တၢ်လၢအအၢၣ်လီၤဝဲတဖၣ်န့ၣ်လီၤ.—ရိမ့ၤ ၈:၃၂.
ယဟိဝၤယွၤ ကတဲာ်ကတီၤန့ၣ်ပှၤ တၢ်ပှ့ၤက့ၤအဃိ ပပာ်ဖျါထီၣ် ပတၢ်စံးဘျုးစံးဖှိၣ်က့ၤအီၤကသ့ဒ်လဲၣ် (ကွၢ်လံာ်အဆၢ ၁၃, ၁၄)
၁၄. ဘၣ်မနုၤအဃိ ယဟိဝၤယွၤ မၤလိာ်ပှၤလၢ ပကဘၣ်အဲၣ်ပှၤလၢပဃၢၤန့ၣ်လဲၣ်.
၁၄ တၢ်ခဲလၢာ်လၢ ယဟိဝၤယွၤမၤန့ၢ်ပှၤန့ၣ် မ့ၢ်လၢအဝဲအဲၣ်ပှၤအဃိလီၤ. ဒီးအဝဲအဲၣ်ဒိးဝဲလၢ ပှၤလၢအဘူၣ်ထီၣ်ဘါထီၣ်အီၤတဖၣ် ကကွၢ်လိမၤဒိးအီၤဒီး ကအဲၣ်လိာ်သးတဂၤဒီးတဂၤလီၤ. (၁ ယိၤဟၣ် ၄:၈-၁၁) ပမ့ၢ်အဲၣ်ပှၤဂၤန့ၣ် ပပာ်ဖျါထီၣ်လၢ ပအဲၣ်ဒိးကဲထီၣ် ပ “ပၢ်အိၣ်လၢမူခိၣ်အဖိခွါတဖၣ်န့ၣ်လီၤ.” (မးသဲ ၅:၄၃-၄၈) တၢ်မၤလိာ်အဒိၣ်ကတၢၢ် အိၣ်ဝဲခံထံၣ်လီၤ. ဒီးအဆိကတၢၢ်တထံၣ်န့ၣ် မ့ၢ်ဝဲ ပဘၣ်အဲၣ်ယဟိဝၤယွၤဒီး ခံထံၣ်တထံၣ်န့ၣ် ပဘၣ်အဲၣ်ပှၤလၢပဃၢၤလီၤ. (မးသဲ ၂၂:၃၇-၄၀) ကျဲတဘိလၢ ပပာ်ဖျါထီၣ် ပအဲၣ်ပှၤလၢပဃၢၤန့ၣ်မ့ၢ်ဝဲ ပသိၣ်လိပှၤဂၤလၢ ယွၤအဘီအမုၢ်တၢ်သးခုကစီၣ်အဂ့ၢ်လီၤ. ပမ့ၢ်မၤပိာ်ထွဲယွၤ အတၢ်မၤလိာ်လၢ ပကဘၣ်အဲၣ်ပှၤလၢပဃၢၤ လီၤဆီဒၣ်တၢ်ပဒီပုၢ်ဝဲၢ်တဖၣ်န့ၣ် ပတၢ်အဲၣ်ယဟိဝၤယွၤစ့ၢ်ကီးက “လၢထီၣ်ပှဲၤထီၣ်” ဝဲလီၤ.—၁ ယိၤဟၣ် ၄:၁၂, ၂၀.
ခီဖျိလၢတၢ်ပှ့ၤက့ၤအဃိ ပဒိးန့ၢ်ဘၣ် တၢ်ဆိၣ်ဂ့ၤလၢ ယဟိဝၤယွၤအအိၣ်
၁၅. (က) ခဲအံၤ ပဒိးန့ၢ်ဘၣ် တၢ်ဆိၣ်ဂ့ၤလၢ ယဟိဝၤယွၤအအိၣ် မနုၤတဖၣ်လဲၣ်. (ခ) ခါဆူညါန့ၣ် ပကဒိးန့ၢ်ဘၣ်တၢ်ဆိၣ်ဂ့ၤ မနုၤတဖၣ်လဲၣ်.
၁၅ ယဟိဝၤယွၤ အၢၣ်လီၤပှၤလၢ ပမ့ၢ်နာ်တၢ်ပှ့ၤက့ၤန့ၣ် အဝဲက “တြူာ်ကွံာ်” ပတၢ်ဒဲးဘးဒီး ကပျၢ်ကွံာ်ဝဲလၢာ်လၢာ်ဆ့ဆ့လီၤ. (ဖး မၤတၢ် ၃:၁၉-၂၁ တက့ၢ်.) ဒ်ပတဲသကိးလၢ ထးအသိး တၢ်ပှ့ၤက့ၤန့ၣ် အိးဟိထီၣ်န့ၢ်ပှၤဟီၣ်ခိၣ်ဖိတနီၤ အကျဲလၢ ကကဲထီၣ်ယွၤအဖိလၢ မူခိၣ်န့ၣ်လီၤ. ပှၤသ့ၣ်တဖၣ်အံၤ မ့ၢ်ဝဲ ပှၤလၢဘၣ်တၢ်ဒိးဖှူအီၤတဖၣ်လီၤ. (ရိမ့ၤ ၈:၁၅-၁၇) ကစၢ်ယွၤကွဲမုာ်စ့ၢ်ကီးဝဲ “သိလၢအဂုၤအဂၤ” တဖၣ်လၢ ကကဲထီၣ်အဟံၣ်ဖိဃီဖိလၢ ဟီၣ်ခိၣ်ချၢလီၤ. အဝဲသ့ၣ်ကဲထီၣ်ပှၤလၢပှၤပှဲၤ မ့ၢ်ဝံၤ ကဘၣ်လဲၤခီဖျိဝဲ တၢ်မၤကွၢ်လၢအလီၢ်ခံကတၢၢ်တခါလီၤ. ဖဲန့ၣ်အဝဲသ့ၣ်မ့ၢ်တီဒီး ယဟိဝၤယွၤန့ၣ် အဝဲသ့ၣ်ကကဲထီၣ်ဝဲ ယွၤအဖိစ့ၢ်ကီးလီၤ. (ရိမ့ၤ ၈:၂၀, ၂၁; လီၣ်ဖျါ ၂၀:၇-၉) ယဟိဝၤယွၤ အဲၣ်အဖိအလံၤခဲလၢာ်လီၤ. တၢ်ပှ့ၤက့ၤ ကဆဲးဟ့ၣ်ပှၤ တၢ်ဆိၣ်ဂ့ၤလီၤထူလီၤယိာ်လီၤ. (ဧ့ၤဘြံၤ ၉:၁၂) ယဟိဝၤယွၤဟ့ၣ်ပှၤ တၢ်ဟ့ၣ်လၢအလုၢ်ဒိၣ်ပှ့ၤဒိၣ်အံၤ ပှၤဟံးန့ၢ်ဆူၣ်ပတၢ် တန့ၢ်နီတဂၤဘၣ်.
၁၆. တၢ်ပှ့ၤက့ၤ မၤထူၣ်ဖျဲးထီၣ်ပှၤလၢတၢ်မနုၤလဲၣ်
၁၆ ပမ့ၢ်ပီၢ်ယၢ်လီၤက့ၤပသးန့ၣ် ပကကဲထီၣ် ယဟိဝၤယွၤအဟံၣ်ဖိဃီဖိဒီး မုၣ်ကီၤလံၢ် တြီပှၤတန့ၢ်နီတစဲးဘၣ်. ယ့ၣ်ၡူးဟဲတူၢ်သံအသးထဲ “တဘျီ” ဒီးလၢခံပှၤတလိၣ်ဟ့ၣ် တၢ်ပှ့ၤက့ၤနီတဘျီလၢၤဘၣ်. (ဧ့ၤဘြံၤ ၉:၂၄-၂၆) လၢစီၤအၤဒၣ်အဃိ ပဘၣ်သံဘၣ်ဆၣ် လၢယ့ၣ်ၡူးအတၢ်ဟ့ၣ်လုၢ်ထီၣ်သးအဃိ ပဒိးန့ၢ်ဘၣ် တၢ်မူအထူအယိာ်သ့ဝဲလီၤ. တၢ်ပှ့ၤက့ၤအံၤ မၤထူၣ်ဖျဲးထီၣ်ပှၤလၢ မုၣ်ကီၤလံၢ်အတၢ်ပၢအဖီလာ်ဒီး တၢ်ပျံၤတၢ်သံသ့ဝဲလီၤ.—ဧ့ၤဘြံၤ ၂:၁၄, ၁၅.
၁၇. ယဟိဝၤယွၤအတၢ်အဲၣ်န့ၣ် အလုၢ်အပှ့ၤ အိၣ်လၢနဂီၢ်ထဲလဲၣ်.
၁၇ ယွၤအတၢ်အၢၣ်လီၤန့ၣ် ကဟဲလၢထီၣ်ပှဲၤထီၣ်ထီဘိလီၤ. ဒ်ယွၤအတၢ်သိၣ်တၢ်သီဘၣ်ဃးဒီး န့ဆၢၣ်တဖၣ် တဆီတလဲဘၣ်အသိး ယဟိဝၤယွၤအနီၢ်ကစၢ်စ့ၢ်ကီး တဆီတလဲဝဲဘၣ်. ဒီးပနာ်အီၤသ့ထီဘိလီၤ. (မၤလကံ ၃:၆) ယဟိဝၤယွၤဟ့ၣ်ပှၤ သးသမူတကးဒံးဘၣ် အဝဲဟ့ၣ်လီၤပှၤအတၢ်အဲၣ်လီၤ. လံာ်စီဆှံတဲဝဲလၢ “ပသ့ၣ်ညါလံ, ဒီးပနာ်သပှၢ်ပှၢ်ယွၤအတၢ်အဲၣ်တၢ်ကွံလၢ အအိၣ်ဝဲလၢပပူၤလံ. ယွၤမ့ၢ်တၢ်အဲၣ်တၢ်ကွံ” လီၤ. (၁ ယိၤဟၣ် ၄:၁၆) ဒီးယွၤအတၢ်အၢၣ်လီၤန့ၣ် ဟဲလၢထီၣ်ပှဲၤထီၣ်ဝဲထီဘိလီၤ. တယံာ်လၢၤဘၣ်န့ၣ် ဟီၣ်ခိၣ်ကကဲထီၣ် ပၤရဒံစူးလီၤ. ပှၤလၢအအိၣ်မူကိးဂၤဒဲးကကွၢ်လိမၤဒိး ယဟိဝၤယွၤဒီး ကအဲၣ်လိာ်သး တဂၤဒီးတဂၤလီၤ. ဒီးဖဲန့ၣ်အဆၢကတီၢ် ယွၤအခ့အပှၤလၢ မူခိၣ်မ့ၢ်ဂ့ၤ ဟီၣ်ခိၣ်မ့ၢ်ဂ့ၤ ကစံးဝဲလၢ– “တၢ်စံးထီၣ်ပတြၢၤ, ဒီးတၢ်လၤကပီၤ, ဒီးတၢ်ကူၣ်ဘၣ်ကူၣ်သ့, ဒီးတၢ်စံးထီၣ်ပတြၢၤအဘျုးအဖှိၣ်, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤ, ဒီးတၢ်ဂံၢ်တၢ်ဘါန့ၣ်, မ်အအိၣ်ဒီးပကစၢ်လီၤထူလီၤယိာ်တက့ၢ်, အၤမ့ၣ်.”—လီၣ်ဖျါ ၇:၁၂.