ပာ်ဖျါထီၣ်တၢ်နာ် ဒီးဆၢတဲာ်တၢ်လၢ တၢ်ကူၣ်သ့အပူၤ
“ဃ့တၢ်လၢတၢ်နာ်တက့ၢ်. မ်အသးသုတဒ့ဒီနီတမံၤတဂ့ၤ.”—ယၤကိာ် ၁:၆.
၁. ဘၣ်မနုၤအဃိ စီၤကၤယံၣ် မၤတၢ်ဆၢတဲာ်လၢအကမၣ်လဲၣ်, ဒီးတၢ်ကဲထီၣ်အသးဒ်လဲၣ်.
စီၤကၤယံၣ် ကဘၣ်မၤတၢ်ဆၢတဲာ်လၢ အရ့ဒိၣ်တခါန့ၣ်လီၤ. မ့ၢ်အဝဲကဃုထၢဝဲလၢ ကတြီဆၢအတၢ်သးက့ၣ်ဧါ. အဝဲမ့ၢ်မၤဝဲဒ်န့ၣ်န့ၣ် အကဒိးန့ၢ်ဘၣ်အဘျုးလီၤ. မ့တမ့ၢ် မ့ၢ်အဝဲကဟ့ၣ်အခွဲးလၢ အသးအတၢ်တူၢ်ဘၣ် ကဒိၣ်စိလၢအဖီခိၣ် ဒီးမၤဝဲဒ်အတၢ်တူၢ်ဘၣ် ဆှၢအီၤအသိးဧါ. အဝဲမ့ၢ်မၤဒ်န့ၣ်န့ၣ် ကထံၣ်ဘၣ်ဝဲတၢ်ကီတၢ်ခဲလီၤ. လံာ်စီဆှံပာ်ဖျါထီၣ်န့ၢ်ပှၤလၢ စီၤကၤယံၣ်မၤဝဲ တၢ်ဆၢတဲာ်လၢအကမၣ်န့ၣ်လီၤ. ခီဖျိမၤဝဲဒ်န့ၣ်အဃိ အပုၢ်ဘၣ်သံဝဲ ဒီးအတၢ်ရ့လိာ်သးဒီး တၢ်ဘၣ်တ့ကစၢ် စ့ၢ်ကီးဟးဂီၤဝဲလီၤ.—၁ မိၤၡ့ ၄:၃-၁၆.
၂. ဘၣ်မနုၤအဃိ အရ့ဒိၣ်လၢ ပကမၤတၢ်ဆၢတဲာ်လၢအဘၣ်လဲၣ်.
၂ ဒ်န့ၣ်အသိး ပဝဲစ့ၢ်ကီးပကဘၣ်မၤ တၢ်ဆၢတဲာ်လၢ ပတၢ်အိၣ်မူအပူၤလီၤ. တၢ်ဆၢတဲာ်လၢ ပကဘၣ်မၤတနီၤနီၤန့ၣ် မ့ၢ်တၢ်ဆၢတဲာ်လၢအရ့ဒိၣ် ဒီးတနီၤနီၤန့ၣ် အရ့တဒိၣ်အါအါဘၣ်. ဘၣ်ဆၣ် ပတၢ်ဆၢတဲာ်တဖၣ်န့ၣ် မၤဘၣ်ဒိပှၤ မ့တမ့ၢ် ကဲဘျုးလၢပဂီၢ်သ့ဝဲလီၤ. ပမ့ၢ်မၤတၢ်ဆၢတဲာ်လၢအဘၣ်န့ၣ် လၢပတၢ်အိၣ်မူအပူၤ တၢ်ကီတၢ်ခဲတအိၣ်အါအါဘၣ်. ဘၣ်ဆၣ် ပမ့ၢ်မၤတၢ်ဆၢတဲာ်လၢအကမၣ်န့ၣ် လၢပတၢ်အိၣ်မူပူၤပကထံၣ်ဘၣ် တၢ်ကီတၢ်ခဲဒီး တၢ်သူၣ်ဟးဂီၤသးဟးဂီၤအါမးလီၤ.—ကတိၤဒိ ၁၄:၈.
၃. (က) ဒ်သိးပဆၢတဲာ်တၢ်လၢ တၢ်ကူၣ်သ့ကသ့အဂီၢ် ပကဘၣ်နာ်တၢ်မနုၤလဲၣ်. (ခ) ပကတဲသကိးတၢ်သံကွၢ် မနုၤတဖၣ်လဲၣ်.
၃ ဒ်သိးပကဆၢတဲာ်တၢ်လၢ တၢ်ကူၣ်သ့အဂီၢ် တၢ်မနုၤကမၤစၢၤပှၤလဲၣ်. ပကဘၣ်အိၣ်ဒီး တၢ်နာ်ယွၤ, ဒီးနာ်လၢယွၤအဲၣ်ဒိးမၤစၢၤပှၤ ဒီးကဟ့ၣ်ပှၤတၢ်ကူၣ်သ့ဒ်သိး ပကမၤတၢ်ဆၢတဲာ်လၢအဘၣ်အဂီၢ်လီၤ. တကးဒံးဘၣ် ပကဘၣ်နာ် အကလုၢ်ကထါ ဒီးနာ်န့ၢ်အတၢ်ဟ့ၣ်ကူၣ်ပှၤန့ၣ်လီၤ. (ဖး ယၤကိာ် ၁:၅-၈ တက့ၢ်.) ပမ့ၢ်သုးဘူးပသးဆူ ယဟိဝၤယွၤအအိၣ်ဒီး အဲၣ်အကလုၢ်ကထါ ဒံးယံာ်ဒံးအါထီၣ်န့ၣ် ကမၤစၢၤပှၤဒ်သိး ပကနာ်လၢ ကစၢ်ယွၤသ့ၣ်ညါတၢ်လၢ အဂ့ၤကတၢၢ်လၢပဂီၢ်လီၤ. ဒီးပမ့ၢ်နာ်ဒ်န့ၣ်န့ၣ် တချုးလၢ ပမၤတၢ်ဆၢတဲာ်ဒံးဘၣ်အခါ ပကဆိကမိၣ်ထံ လံာ်စီဆှံတၢ်ဟံးစုနဲၣ်ကျဲန့ၣ်လီၤ. ဘၣ်ဆၣ် ဒ်သိးပဆၢတဲာ်တၢ်လၢ အဘၣ်ကသ့အဂီၢ် တၢ်မနုၤကမၤစၢၤပှၤလဲၣ်. ဒီးတၢ်ဆၢတဲာ်လၢ ပမၤတ့ၢ်လံတဖၣ် လၢခံမ့ၢ်ပကြၢးဆီတလဲအီၤစ့ၢ်ကီးဧါ.
ပဝဲခဲလၢာ်ပဘၣ်မၤ တၢ်ဆၢတဲာ်လီၤ
၄. စီၤအၤဒၣ် ဘၣ်မၤတၢ်ဆၢတဲာ်မနုၤလဲၣ်, ဒီးလၢစီၤအၤဒၣ် အတၢ်ဆၢတဲာ်အဃိ တၢ်ကဲထီၣ်အသးဒ်လဲၣ်.
၄ စးထီၣ်လၢ ကစၢ်ယွၤတ့လီၤပှၤဟီၣ်ခိၣ်ဖိ တုၤလီၤလၢ ပစိၤခဲအံၤန့ၣ် ပှၤဘၣ်မၤတၢ်ဆၢတဲာ်လၢ အရ့ဒိၣ်ကိးဂၤဒဲးလီၤ. အဒိ, ပှၤဟီၣ်ခိၣ်ဖိအဆိကတၢၢ်တဂၤ လၢအမ့ၢ်စီၤအၤဒၣ်န့ၣ် ကဘၣ်ဆၢတဲာ်ဝဲလၢ မ့ၢ်ကဒိကနၣ် ယဟိဝၤယွၤလၢ အတ့လီၤအီၤတဂၤ အကလုၢ်ဧါ မ့တမ့ၢ် ကဒိကနၣ် အမါနီၢ်အံၣ်အုအကလုၢ်ဧါန့ၣ်လီၤ. စီၤအၤဒၣ်ဃုထၢဝဲလၢ ကဒိကနၣ် နီၢ်အံၣ်အုအကလုၢ်န့ၣ်လီၤ. မ့ၢ်လၢအဝဲဃုထၢဝဲလၢ ကမၤတၢ်ဆၢတဲာ်လၢ အကမၣ်အဃိ ယဟိဝၤယွၤနီဟးထီၣ်ကွံာ်အီၤလၢ ဧ့ၤဒ့ၣ်တၤသၣ်အလီၢ် ဒီးလၢခံအဝဲဘၣ်သံဝဲလီၤ. မ့ၢ်လၢစီၤအၤဒၣ် ဃုထၢတၢ်လၢအကမၣ်အဃိ မုၢ်မဆါတနံၤအံၤ ပဝဲစ့ၢ်ကီး ပတူၢ်ဘၣ်တၢ်ကီတၢ်ခဲလီၤ.
ဒ်သိးပကမၤ တၢ်ဆၢတဲာ်လၢ အဘၣ်အဂီၢ် ယွၤဟ့ၣ်ပှၤ အကလုၢ်ကထါလၢ ကမၤစၢၤပှၤလီၤ
၅. ပအိၣ်ဒီးမူဒါလၢ ပကဘၣ်မၤတၢ်ဆၢတဲာ်န့ၣ် ပကြၢးထံၣ်အီၤဒ်လဲၣ်.
၅ ပှၤတနီၤနီၤဆိကမိၣ်ဝဲလၢ အဝဲသ့ၣ်မ့ၢ်တဘၣ်မၤ တၢ်ဆၢတဲာ်တဖၣ်န့ၣ် အတၢ်အိၣ်မူကညီဝဲလီၤ. ဘၣ်သ့ၣ်သ့ၣ် နကတူၢ်ဘၣ်ဒ်န့ၣ်စ့ၢ်ကီးလီၤ. ဘၣ်ဆၣ် ပကဘၣ်သ့ၣ်နီၣ်ထီၣ်လၢ ယဟိဝၤယွၤ တတ့လီၤပှၤဒ် တၢ်ဂီၤဖိလၢ အဆိကမိၣ်တၢ်တသ့ ဒီးမၤတၢ်ဆၢတဲာ်တသ့ဘၣ်န့ၣ်ဘၣ်. ဒ်သိးပမၤတၢ်ဆၢတဲာ်လၢ အဘၣ်ကသ့အဂီၢ် ယွၤဟ့ၣ်ပှၤအကလုၢ်ကထါ လၢကမၤစၢၤပှၤလီၤ. ယဟိဝၤယွၤအဲၣ်ဒိးဝဲလၢ ပကမၤတၢ်ဆၢတဲာ်ဒီး ပမ့ၢ်မၤဒ်န့ၣ်န့ၣ် ကကဲဘျုးလၢပဂီၢ်လီၤ. ပကဆိကမိၣ်ကွၢ် တၢ်အဒိတနီၤလီၤ.
၆, ၇. ပှၤအံၣ်စရ့လးဖိတဖၣ် ဘၣ်မၤတၢ်ဆၢတဲာ်မနုၤလဲၣ်, ဒီးအဝဲသ့ၣ်ကမၤတၢ်ဆၢတဲာ်အဂီၢ် ဘၣ်မနုၤအဃိ ကီဝဲလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၆ ဖဲပှၤအံၣ်စရ့လးဖိတဖၣ် အိၣ်လၢကီၢ်တၢ်စံးပာ်အခါ အဝဲသ့ၣ် ဘၣ်ဃုထၢဝဲလၢ ကဘူၣ်ထီၣ်ဘါထီၣ် ယဟိဝၤယွၤဧါ မ့တမ့ၢ် ယွၤလၢအဂၤတဖၣ်န့ၣ်ဧါ. (ဖး ယိၤၡူ ၂၄:၁၅ တက့ၢ်.) ဘၣ်သ့ၣ်သ့ၣ် ပကဆိကမိၣ်လၢ တၢ်ဆၢတဲာ်လၢ အဝဲသ့ၣ်ကဘၣ်မၤဝဲန့ၣ် မ့ၢ်တၢ်ညီညီဖိလီၤ. ဘၣ်ဆၣ် အဝဲသ့ၣ်အသးသမူန့ၣ် ဒိးသန့ၤထီၣ်အသးလၢ အတၢ်ဃုထၢအံၤ အဖီခိၣ်လီၤ. ဖဲပှၤစံၣ်ညီၣ်ကွီၢ်ပၢတၢ်အစိၤန့ၣ် ပှၤအံၣ်စရ့လးဖိတဖၣ် မၤဝဲတၢ်ဆၢတဲာ်လၢ အကမၣ်တဖၣ်တလီၢ်လီၢ်လီၤ. လၢတၢ်န့ၣ်အဃိအဝဲသ့ၣ် တဘူၣ်ထီၣ်ဘါထီၣ် ယဟိဝၤယွၤလၢၤဘၣ် ဒီးစးထီၣ်ဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်လီၤ. (စံၣ်ညီၣ်ကွီၢ် ၂:၃, ၁၁-၂၃) လၢခံ ဖဲဝံအ့ၤလံယၤအစိၤန့ၣ် ယွၤအပှၤဂီၢ်မုၢ်တဖၣ် ကဘၣ်ဃုထၢဝဲလၢ မ့ၢ်အဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤဧါ မ့တမ့ၢ် ယွၤလၢအကမၣ်လၢအမ့ၢ် ဘဧၤလးဧါန့ၣ်လီၤ. (၁ စီၤပၤ ၁၈:၂၁) ပသ့ၣ်ညါလၢ တၢ်မၤယဟိဝၤယွၤအတၢ်မၤန့ၣ် မ့ၢ်တၢ်ဃုထၢလၢအဂ့ၤကတၢၢ်အဃိ ဘၣ်သ့ၣ်သ့ၣ် ပကဆိကမိၣ်လၢ တၢ်ဆၢတဲာ်လၢ အဝဲသ့ၣ်ကဘၣ်မၤဝဲန့ၣ် မ့ၢ်တၢ်ညီညီဖိလီၤ. ဘဧၤလးမ့ၢ်ယွၤလၢ အသးသမူတအိၣ်ဘၣ်အဃိ ပှၤလၢအိၣ်ဒီးတၢ်ကူၣ်သ့န့ၣ် တမ့ၢ်လၢကအဲၣ်ဒိး ဘူၣ်ထီၣ်ဘါထီၣ်အီၤဘၣ်. ဘၣ်ဆၣ် ပှၤအံၣ်စရ့လးဖိတဖၣ် ဆၢတဲာ်ဝဲတဘၣ်ဘၣ်. လံာ်စီဆှံတဲဝဲလၢ အဝဲသ့ၣ် “လဲၤတကျဲၢ်တကျဲၢ်လၢ တၢ်ခံမံၤအဘၢၣ်စၢၤ” လီၤ. လၢတၢ်ကူၣ်သ့အပူၤ ဝံအ့ၤလံယၤ ဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကဃုထၢဝဲလၢကဘူၣ်ထီၣ်ဘါထီၣ် ယွၤအမ့ၢ်အတီလၢအမ့ၢ် ယဟိဝၤယွၤန့ၣ်လီၤ.
၇ ဘၣ်မနုၤအဃိ ကီလၢပှၤအံၣ်စရ့လးဖိတဖၣ် ကမၤတၢ်ဆၢတဲာ်လၢအဘၣ်န့ၣ်လဲၣ်. အဆိကတၢၢ်တထံၣ်န့ၣ် အဝဲသ့ၣ်အတၢ်နာ် ယဟိဝၤယွၤတအိၣ်ဘၣ် ဒီးတအဲၣ်ဒိးဒိကနၣ် ယွၤအကလုၢ်ဘၣ်အဃိလီၤ. အဝဲသ့ၣ် တနာ်န့ၢ်ယဟိဝၤယွၤဘၣ် ဒီးတဟံးန့ၢ်တၢ်ဆၢကတီၢ်လၢ ကမၤလိအါထီၣ်ကစၢ်ယွၤဒီး ကစၢ်အတၢ်ကူၣ်သ့အဂ့ၢ်ဘၣ်. အဝဲသ့ၣ်မ့ၢ်ဟံးန့ၢ် တၢ်ဆၢကတီၢ်ဒီး မၤလိအါထီၣ်ကစၢ်ယွၤအဂ့ၢ်န့ၣ် ကမၤစၢၤအဝဲသ့ၣ် ဒ်သိးကဆၢတဲာ်တၢ်လၢ တၢ်ကူၣ်သ့အပူၤလီၤ. (စံးထီၣ်ပတြၢၤ ၂၅:၁၂) တၢ်ဂ့ၢ်ခံထံၣ်တထံၣ်န့ၣ် ပှၤတခီဘီမုၢ်ဖိတဖၣ် အတၢ်ထံၣ်ဒိၣ်စိဝဲလၢ ပှၤအံၣ်စရ့လးဖိတဖၣ်အဖီခိၣ် တုၤဒၣ်လဲာ် အဝဲသ့ၣ်ဆၢတဲာ်န့ၢ်တၢ်လၢ ပှၤအံၣ်စရ့လးဖိအတဖၣ်အဂီၢ်လီၤ. လၢတၢ်န့ၣ်အဃိ ပှၤအံၣ်စရ့လးဖိတဖၣ် မၤဝဲဒ်ပှၤတခီဘီမုၢ်ဖိအသိးဒီး ဘူၣ်ထီၣ်ဘါထီၣ်ဝဲ ပှၤတခီဘီမုၢ်ဖိအယွၤတဖၣ်န့ၣ်လီၤ. ဘၣ်ဃးဒီးတၢ်ဂ့ၢ်အဝဲအံၤ ယဟိဝၤယွၤဟ့ၣ်ပလီၢ်ဆိဝဲ ပှၤအံၣ်စရ့လးဖိတဘျုးနံၣ်လံ.—၂ မိၤၡ့ ၂၃:၂.
မ့ၢ်ပှၤဂၤ ကြၢးဆၢတဲာ်န့ၢ်တၢ်လၢပဂီၢ်ဧါ
၈. ပဟံးန့ၢ်တၢ်မၤလိလၢ ပှၤအံၣ်စရ့လးဖိတဖၣ်အအိၣ် ကသ့ဒ်လဲၣ်.
၈ ပှၤအံၣ်စရ့လးဖိတဖၣ် အဒိအတဲာ်အံၤ ပာ်ဖျါထီၣ်န့ၢ်ပှၤလၢ ပမ့ၢ်အဲၣ်ဒိးမၤတၢ်ဆၢတဲာ်လၢ တၢ်ကူၣ်သ့အပူၤန့ၣ် ပကဘၣ်ဟံးန့ၢ် တၢ်ဟံးစုနဲၣ်ကျဲလၢ လံာ်စီဆှံအပူၤလီၤ. ကလၤတံ ၆:၅ ဒုးသ့ၣ်နီၣ်ထီၣ်ပှၤလၢ ပဝဲတဂၤစုာ်စုာ် ပကဘၣ်ဆၢတဲာ်တၢ်လၢ ပနီၢ်ကစၢ်န့ၣ်လီၤ. အဃိ ပသ့ၣ်ညါဘၣ်လၢ ပတကြၢးမၢပှၤဂၤ ဆၢတဲာ်န့ၢ်တၢ်လၢပဂီၢ်ဘၣ်. လၢတၢ်န့ၣ်အလီၢ် ပဝဲတဂၤစုာ်စုာ် ပကြၢးဃုသ့ၣ်ညါ တၢ်လၢအဘၣ်ယွၤအသးဒီး ဆၢတဲာ်လီၤပသးလၢ ပကမၤပိာ်ထွဲအီၤန့ၣ်လီၤ.
ပမ့ၢ်ပျဲပှၤဂၤ ဆၢတဲာ်န့ၢ်တၢ်လၢပဂီၢ်န့ၣ် မ့ၢ်ဒၣ်ပဃုထၢလၢ ပကပိာ်အဝဲသ့ၣ်အခံန့ၣ်လီၤ
၉. ပမ့ၢ်မၢပှၤဂၤ ဆၢတဲာ်န့ၢ်တၢ်လၢပဂီၢ်န့ၣ် ဘၣ်မနုၤအဃိ တၢ်ဘၣ်ယိၣ်အိၣ်ဝဲလဲၣ်.
၉ ပပျဲပှၤဂၤ ဆၢတဲာ်န့ၢ်တၢ်လၢပဂီၢ်န့ၣ် ကဲထီၣ်အသးကသ့လၢကျဲဒ်လဲၣ်. ပမ့ၢ်ပျဲပှၤဂၤဆီၣ်သနံးပှၤ တုၤလၢပဆၢတဲာ်တၢ်လၢအကမၣ်န့ၣ် မ့ၢ်ဒၣ်ပပျဲပှၤဂၤ ဆၢတဲာ်န့ၢ်တၢ်လၢပဂီၢ်လီၤ. (ကတိၤဒိ ၁:၁၀, ၁၅) ပမ့ၢ်မၤဒ်န့ၣ်န့ၣ် မ့ၢ်တၢ်လၢအလီၤဘၣ်ယိၣ်လီၤ. ပမူဒါအိၣ်လၢ ပကဃုသ့ၣ်ညါ လံာ်စီဆှံအတၢ်ဟံးစုနဲၣ်ကျဲဝံၤ မၤထွဲဒ်ပသးလၢ အသ့ၣ်ညါဒၣ်တၢ်အသိးန့ၣ်လီၤ. ပမ့ၢ်ပျဲပှၤဂၤ ဆၢတဲာ်န့ၢ်တၢ်လၢပဂီၢ်န့ၣ် မ့ၢ်ဒၣ်ပဃုထၢလၢ ပကပိာ်အဝဲသ့ၣ်အခံန့ၣ်လီၤ. ဒီးပတၢ်ဃုထၢအံၤ ဆှၢပှၤဆူတၢ်ဟးဂီၤသ့ဝဲလီၤ.
၁၀. စီၤပီလူးဟ့ၣ်ပလီၢ်ဝဲ ပှၤကလၤတံဖိတဖၣ်ဒ်လဲၣ်.
၁၀ တၢ်မၢဖိပီလူး ဟ့ၣ်ပလီၢ် ပှၤကလၤတံဖိတဖၣ်လၢ တဘၣ်ပျဲပှၤဂၤ ကဆၢတဲာ်န့ၢ်တၢ်လၢ အဝဲသ့ၣ်အဂီၢ်ဘၣ်. (ဖး ကလၤတံ ၄:၁၇ တက့ၢ်.) ဒီပုၢ်ဝဲၢ်တနီၤလၢ ကလၤတံတၢ်အိၣ်ဖှိၣ်အပူၤန့ၣ် အဲၣ်ဒိးဆၢတဲာ်န့ၢ်တၢ်လၢ ဒီပုၢ်ဝဲၢ်အဂၤတဖၣ်အဂီၢ်န့ၣ်လီၤ. ဘၣ်မနုၤအဃိ အဝဲသ့ၣ်မၤဝဲဒ်န့ၣ်လဲၣ်. မ့ၢ်လၢပှၤလၢ အအဲၣ်လီၤထဲဒၣ်အသးတဖၣ်အံၤ တအဲၣ်ဒိးလၢ ပှၤကပိာ်တၢ်မၢဖိတဖၣ်အခံဘၣ် မ့မ့ၢ်အဲၣ်ဒိးဝဲလၢ ပှၤကပိာ်အဝဲသ့ၣ်အခံလီၤ. ပှၤသ့ၣ်တဖၣ်အံၤ တအိၣ်ဒီးတၢ်ဆီၣ်လီၤသးဘၣ် ဒီးအဝဲသ့ၣ်တပာ်ကဲ ဒီပုၢ်ဝဲၢ်တဖၣ်အတၢ်ခွဲးတၢ်ယာ်လၢ ကမၤတၢ်ဆၢတဲာ်လၢ အနီၢ်ကစၢ်န့ၣ်ဘၣ်.
၁၁. ဖဲပှၤဂၤလိၣ်ဘၣ် တၢ်မၤစၢၤလၢ ကမၤတၢ်ဆၢတဲာ်အခါ ပမၤစၢၤအဝဲသ့ၣ်ကသ့ဒ်လဲၣ်.
၁၁ ပဝဲခဲလၢာ် ပဟံးန့ၢ်တၢ်မၤလိလၢ တၢ်မၢဖိပီလူးအဒိအတဲာ်သ့ဝဲလီၤ. စီၤပီလူးသ့ၣ်ညါဝဲလၢ အဒီပုၢ်ဝဲၢ်တဖၣ် အိၣ်ဒီးတၢ်ခွဲးတၢ်ယာ်လၢ ကမၤတၢ်ဆၢတဲာ်လၢအနီၢ်ကစၢ် ဒီးအဝဲပာ်ကဲဝဲဒီပုၢ်ဝဲၢ်တဖၣ် အတၢ်ခွဲးတၢ်ယာ်အံၤလီၤ. (ဖး ၂ ကရံၣ်သူး ၁:၂၄ တက့ၢ်.) မုၢ်မဆါတနံၤအံၤ တၢ်အိၣ်ဖှိၣ်သးပှၢ်တဖၣ်စ့ၢ်ကီး ဖဲအဝဲသ့ၣ်ဘၣ်ဟ့ၣ်ကူၣ်ဝဲ ဒီပုၢ်ဝဲၢ်တဖၣ်အခါ ကွၢ်လိမၤဒိးဝဲ စီၤပီလူးအဒိအတဲာ်သ့လီၤ. အဝဲသ့ၣ်ဟ့ၣ်ကူၣ်ဝဲ ဒီပုၢ်ဝဲၢ်တဖၣ် ဒ်လံာ်စီဆှံ အတၢ်ဟံးစုနဲၣ်ကျဲအိၣ်ဝဲအသိးလီၤ. ဘၣ်ဆၣ် တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ ခရံာ်ဖိတဂၤစုာ်စုာ် ဒ်အဝဲသ့ၣ်ဆၢတဲာ်ဝဲအသိး တၢ်မ့ၢ်ဟဲကဲထီၣ်အသး ဒ်လဲၣ်ဂ့ၤဒ်လဲၣ်ဂ့ၤန့ၣ် အနီၢ်ကစၢ်ကဘၣ်တူၢ်ဝဲလီၤ. လၢတၢ်န့ၣ်အဃိ တၢ်အိၣ်ဖှိၣ်သးပှၢ်တဖၣ် ကဘၣ်ပျဲဝဲ ခရံာ်ဖိတဂၤစုာ်စုာ် ကမၤတၢ်ဆၢတဲာ်လၢ အနီၢ်ကစၢ်လီၤ. ပကဘၣ်သ့ၣ်နီၣ်ထီၣ် တၢ်ဂ့ၢ်လၢအရ့ဒိၣ်တမံၤအံၤလီၤ. ပမၤစၢၤပှၤဂၤဒ်သိး ကနၢ်ပၢၢ်ထီၣ်လံာ်စီဆှံ အတၢ်ဟ့ၣ်ကူၣ်လၢ အဘၣ်ထွဲလိာ်သးဒီး အဝဲသ့ၣ်အတၢ်အိၣ်သးသ့ဝဲလီၤ. ဘၣ်ဆၣ် အဝဲသ့ၣ်အိၣ်ဒီးမူဒါလၢ ကမၤတၢ်ဆၢတဲာ်လၢ အနီၢ်ကစၢ်လီၤ. အဝဲသ့ၣ် မ့ၢ်မၤတၢ်ဆၢတဲာ်လၢအဂ့ၤန့ၣ် ကကဲဘျုးလၢအဂီၢ်လီၤ. ပတကြၢးဆိကမိၣ်လၢ ပအိၣ်ဒီးတၢ်ခွဲးတၢ်ယာ်လၢ ပကဆၢတဲာ်န့ၢ်တၢ်လၢ ပဒီပုၢ်ဝဲၢ်အဂၤတဖၣ်အဂီၢ်ဘၣ်.
တၢ်အိၣ်ဖှိၣ်သးပှၢ်လၢ အိၣ်ဒီးတၢ်အဲၣ်တၢ်ကွံတဖၣ် ကမၤစၢၤပှၤအဂၤတဖၣ်ဒ်သိး အဝဲသ့ၣ်ကမၤ တၢ်ဆၢတဲာ်လၢ အနီၢ်ကစၢ်အဂီၢ် (ကွၢ် လံာ်အဆၢ ၁၁)
ဖဲနမၤတၢ်ဆၢတဲာ်အခါ တဘၣ်ပျဲ နတၢ်တူၢ်ဘၣ် ဒိၣ်စိလၢနဖီခိၣ်တဂ့ၤ
၁၂, ၁၃. ဖဲပသးဒိၣ်ထီၣ်တၢ် မ့တမ့ၢ် ပသးလီၤစၢ်အခါ ဘၣ်မနုၤအဃိ ကီဝဲလၢပကမၤ တၢ်ဆၢတဲာ်လၢအဂ့ၤလဲၣ်.
၁၂ မုၢ်မဆါတနံၤအံၤ ပှၤအါဂၤန့ၣ် ဖဲအဝဲသ့ၣ်မၤတၢ်ဆၢတဲာ်အခါ ပျဲဝဲအတၢ်တူၢ်ဘၣ် ဒိၣ်စိလၢအဖီခိၣ် ဒီးမၤဝဲဒ်အတၢ်တူၢ်ဘၣ် ဆှၢအီၤအသိးလီၤ. ဘၣ်ဆၣ် ပမ့ၢ်မၤဒ်န့ၣ်န့ၣ် မ့ၢ်တၢ်လၢအလီၤဘၣ်ယိၣ်လီၤ. လံာ်စီဆှံဟ့ၣ်ပလီၢ်ပှၤလၢ ဖဲပမၤတၢ်ဆၢတဲာ်အခါ ပတဘၣ်မၤထွဲ ဒ်ပသးအတၢ်တူၢ်ဘၣ် ဆှၢပှၤအသိးဘၣ်. (ကတိၤဒိ ၂၈:၂၆) မ့ၢ်လၢ “ပှၤကညီအသးန့ၣ်လီန့ၢ်တၢ် ဒိၣ်န့ၢ်အါန့ၢ်တၢ်ခဲလၢာ်တက့ၢ်, ဒီးအၢဝဲဒိၣ်မး” အဃိ ပနာ်န့ၢ်လီၤပသးတသ့ဘၣ်. (ယံးရမံယၤ ၁၇:၉) လံာ်စီဆှံ ပာ်ဖျါထီၣ်န့ၢ်ပှၤလၢ ပှၤတနီၤပျဲဝဲ အတၢ်တူၢ်ဘၣ်ဒိၣ်စိလၢ အဖီခိၣ်ဒီးမၤဝဲဒ်အတၢ်တူၢ်ဘၣ် ဆှၢအီၤအသိးအဃိ ထံၣ်ဘၣ်ဝဲတၢ်ကီတၢ်ခဲတဖၣ်လီၤ. (၁ စီၤပၤ ၁၁:၉; ယံးရမံယၤ ၃:၁၇; ၁၃:၁၀) လၢတၢ်န့ၣ်အဃိ ဖဲပမၤတၢ်ဆၢတဲာ်အခါ ပမ့ၢ်မၤထွဲဒ် ပသးအတၢ်တူၢ်ဘၣ် အိၣ်ဝဲအသိးန့ၣ် တၢ်မနုၤကဲထီၣ်အသးသ့ဝဲလဲၣ်.
၁၃ ယဟိဝၤယွၤမၤလိာ်ပှၤလၢ ပကဘၣ်အဲၣ်အီၤလၢ ပသူၣ်ဒီဖျၢၣ်ပသးဒီဖျၢၣ် ဒီးပဘၣ်အဲၣ်ပှၤလၢပဃၢၤ ဒ်ပအဲၣ်လီၤပသးအသိးလီၤ. (မးသဲ ၂၂:၃၇-၃၉) ဘၣ်ဆၣ် ပဘၣ်ပလီၢ်ပသးလၢ တၢ်ဂ့ၢ်တခါလီၤ. လံာ်စီဆှံအဆၢလၢ တၢ်မၤလိအံၤအပူၤ ပာ်ဖျါထီၣ်န့ၢ်ပှၤလၢ ဖဲပမၤတၢ်ဆၢတဲာ်အခါ ပမ့ၢ်ပျဲပသးအတၢ်တူၢ်ဘၣ် ဒိၣ်စိလၢပဖီခိၣ် ဒီးမၤဒ်ပတၢ်တူၢ်ဘၣ်အိၣ်ဝဲအသိးန့ၣ် မ့ၢ်တၢ်လၢအလီၤဘၣ်ယိၣ်လီၤ. အဒိ, ပှၤလၢအသးဒိၣ်ထီၣ်တၢ်တဂၤ ကမၤတၢ်ဆၢတဲာ်လၢအဘၣ်န့ၣ် ကကီဝဲလီၤ. (ကတိၤဒိ ၁၄:၁၇; ၂၉:၂၂) တကးဒံးဘၣ် ဒ်သိးပှၤလၢအသးလီၤစၢ်တဂၤ ကမၤတၢ်ဆၢတဲာ်လၢအဘၣ်အဂီၢ် တမ့ၢ်တၢ်လၢအညီဘၣ်. (၄ မိၤၡ့ ၃၂:၆-၁၂; ကတိၤဒိ ၂၄:၁၀) ပကြၢးပျဲယွၤအတၢ်သိၣ်တၢ်သီ ဟံးစုနဲၣ်ကျဲပှၤလီၤ. (ရိမ့ၤ ၇:၂၅) ဖဲပမၤတၢ်ဆၢတဲာ်လၢ အရ့ဒိၣ်အခါ ပတကြၢးပျဲပတၢ်တူၢ်ဘၣ် ဒိၣ်စိလၢပဖီခိၣ်ဒီး မၤဒ်ပတၢ်တူၢ်ဘၣ်ဆှၢပှၤအသိးဘၣ်.
ပကဘၣ်ဆီတလဲ ပတၢ်ဆၢတဲာ်လၢ ဆၢကတီၢ်ဖဲလဲၣ်
၁၄. တဘျီတခီၣ် ပကြၢးဆီတလဲ ပတၢ်ဆၢတဲာ်န့ၣ် ပသ့ၣ်ညါသ့ဒ်လဲၣ်.
၁၄ ပကဘၣ်မၤတၢ်ဆၢတဲာ်လၢ တၢ်ကူၣ်သ့အပူၤလီၤ. ဘၣ်ဆၣ် ပှၤလၢအိၣ်ဒီး တၢ်ကူၣ်သ့တဂၤန့ၣ် တဘျီတခီၣ် အဝဲကဆိကမိၣ်ထံက့ၤ အတၢ်ဆၢတဲာ်လၢအမၤတ့ၢ်ဝဲ ဒီးဘၣ်သ့ၣ်သ့ၣ် အဝဲကဆီတလဲအတၢ်ဆၢတဲာ်လီၤ. ယဟိဝၤယွၤပာ်လီၤန့ၢ်ပှၤ တၢ်အဒိလၢအဂ့ၤကတၢၢ်လီၤ. အဒိ, ဖဲစီၤယိၤနါအစိၤန့ၣ် တၢ်မၤအသးဒီး ပှၤနံၤနဝ့ဖိတဖၣ်ဒ်လဲၣ်. “ကစၢ်ယွၤထံၣ်တၢ်လၢ . . . အဝဲသ့ၣ် ညိကွံာ်အသးလၢ ကျဲအအၢအသီ” အဃိ ကစၢ်ယွၤ “လဲလိာ်ကွံာ် အတၢ်ပာ်လီၤအသး ဒီးတစံၣ်ညီၣ်ဘၣ် အဝဲသ့ၣ်ဒ် အစံးတ့ၢ်လၢကမၤဝဲအသိးန့ၣ်ဘၣ်.” (ယိၤနါ ၃:၁၀, ခ့ခါစှီၤကျိာ်) ဖဲပှၤနံၤနဝ့ဖိသ့ၣ်တဖၣ် ဆီတလဲအသးဒီး တမၤတၢ်အၢလၢၤဘၣ်အခါ ယွၤဆီတလဲကွံာ် အတၢ်ဆၢတဲာ်စ့ၢ်ကီးလီၤ. ကစၢ်ယွၤမၤဝဲဒ်အံၤအဃိ ပသ့ၣ်ညါဘၣ်လၢ အဝဲမ့ၢ်ပှၤလၢ အသ့ပဲာ်ထံနီၤဖးတၢ်, အိၣ်ဒီးတၢ်ဆီၣ်လီၤသး ဒီးအိၣ်ဒီးတၢ်သးကညီၤန့ၣ်လီၤ. အဝဲတလီၤဂာ်ဒီး ပှၤဟီၣ်ခိၣ်ဖိတဖၣ်ဘၣ်. ယဟိဝၤယွၤန့ၣ် ဖဲအဝဲသးဒိၣ်ထီၣ်တၢ်အခါဒၣ်လဲာ် တဆၢတဲာ်နါစိၤတၢ်ဘၣ်.
ဖဲပှၤနံၤနဝ့ဖိသ့ၣ်တဖၣ် ဆီတလဲအသးဒီး တမၤတၢ်အၢလၢၤဘၣ်အခါ ယွၤဆီတလဲကွံာ် အတၢ်ဆၢတဲာ်စ့ၢ်ကီးလီၤ
၁၅. ဘၣ်မနုၤအဃိ တဘျီတခီၣ် ပဘၣ်ဆီတလဲ ပတၢ်ဆၢတဲာ်လဲၣ်.
၁၅ လီၤဆီဒၣ်တၢ် ဖဲပတၢ်အိၣ်သးဆီတလဲအခါ ပမ့ၢ်က့ၤဆိကမိၣ်ထံက့ၤ တၢ်ဆၢတဲာ်လၢ ပမၤတ့ၢ်တဖၣ်န့ၣ် ကဂ့ၤဝဲလီၤ. သ့ၣ်နီၣ်ထီၣ်လၢ ယဟိဝၤယွၤစ့ၢ်ကီး တဘျီတခီၣ် အဝဲဆီတလဲအတၢ်ဆၢတဲာ်လီၤ. (၁ စီၤပၤ ၂၁:၂၀, ၂၁, ၂၇-၂၉; ၂ စီၤပၤ ၂၀:၁-၅) ဘၣ်သ့ၣ်သ့ၣ် ခီဖျိလၢပဒိးန့ၢ်ဘၣ် တၢ်ဂ့ၢ်တၢ်ကျိၤအသီအဃိ ပကဘၣ်ဆီတလဲ ပတၢ်ဆၢတဲာ်စ့ၢ်ကီးလီၤ. ဆိကမိၣ်ကွၢ် စီၤဒၤဝံးအဒိအတဲာ်တက့ၢ်. ခီဖျိလၢအဝဲဒိးန့ၢ် တၢ်ကစီၣ်လၢအကမၣ်လၢ အဘၣ်ဃးဒီး စီၤစီလူးအလံၤခွါ စီၤမဖံဘိၤၡ့းအဃိ အဝဲဆၢတဲာ်တၢ်ကမၣ်ဝဲလီၤ. ဘၣ်ဆၣ်လၢခံ ဖဲစီၤဒၤဝံး သ့ၣ်ညါဝဲတၢ်မ့ၢ်တၢ်တီအခါ အဝဲဆီတလဲကွံာ် အတၢ်ဆၢတဲာ်န့ၣ်လီၤ. (၂ ၡမူၤအ့လး ၁၉:၂၄-၂၉) တဘျီတခီၣ် ပဝဲစ့ၢ်ကီး ပကဘၣ် ဆီတလဲပတၢ်ဆၢတဲာ်ကအိၣ်ဝဲလီၤ.
၁၆. (က) ဒ်သိးပကမၤတၢ်ဆၢတဲာ်လၢ အဘၣ်အဂီၢ် တၢ်ဟံးစုနဲၣ်ကျဲတနီၤလၢ အကဲဘျုးန့ၣ် မ့ၢ်မနုၤလဲၣ်. (ခ) ဘၣ်မနုၤအဃိ ပဘၣ်က့ၤဆိကမိၣ်ထံက့ၤ တၢ်ဆၢတဲာ်လၢ ပမၤတ့ၢ်တဖၣ်လဲၣ် ဒီးပမၤသ့ဒ်လဲၣ်.
၁၆ လံာ်စီဆှံတဲဝဲလၢ ဖဲပကဘၣ်မၤတၢ်ဆၢတဲာ်လၢ အရ့ဒိၣ်အခါ ပတကြၢးဆၢတဲာ်ကရီတၢ်ဘၣ်. (ကတိၤဒိ ၂၁:၅) ဒ်သိးပကမၤတၢ်ဆၢတဲာ်လၢ တၢ်ကူၣ်သ့အပူၤအဂီၢ် ပကြၢးဟံးန့ၢ်တၢ်ဆၢကတီၢ် ဒီးဆိကမိၣ်ထံတၢ်ဂ့ၢ်တၢ်ကျိၤ ခဲလၢာ်လီၤတံၢ်လီၤဆဲးလီၤ. (၁ သ့းစၤလနံ ၅:၂၁) ဟံၣ်ခိၣ်တဖၣ် တချုးလၢ အဆၢတဲာ်တၢ်ဒံးဘၣ်အခါ ကြၢးဟံးန့ၢ်တၢ်ဆၢကတီၢ်လၢ ကဃုကွၢ်လံာ်စီဆှံတၢ်ဟ့ၣ်ကူၣ် ဒီးဖးလံာ်လဲၢ်လၢ တၢ်ကရၢကရိထုးထီၣ်ဝဲတဖၣ်လီၤ. တကးဒံးဘၣ် အဝဲသ့ၣ်မ့ၢ်ဒိကနၣ်ဝဲ အဟံၣ်ဖိဃီဖိတဖၣ် အတၢ်ထံၣ်ဒီး အတၢ်ဟ့ၣ်ကူၣ်န့ၣ် ကဂ့ၤဝဲစ့ၢ်ကီးလီၤ. သ့ၣ်နီၣ်ထီၣ်လၢ ယွၤမၢစီၤအၤဘြၤဟၣ် ဒိကနၣ်အမါအကလုၢ်န့ၣ်တက့ၢ်. (၁ မိၤၡ့ ၂၁:၉-၁၂) တၢ်အိၣ်ဖှိၣ်သးပှၢ်တဖၣ် ကြၢးဟံးန့ၢ်တၢ်ဆၢကတီၢ်လၢ ကဃုသ့ၣ်ညါလံာ်စီဆှံ တၢ်ဟ့ၣ်ကူၣ်စ့ၢ်ကီးလီၤ. ဖဲတၢ်ဂ့ၢ်တၢ်ကျိၤအသီ ပာ်ဖျါထီၣ်ဝဲလၢ အဝဲသ့ၣ်ကဘၣ်ဆီတလဲ အတၢ်ဆၢတဲာ်အခါ အဝဲသ့ၣ်ဆီတလဲဝဲလီၤ. ဒီးအဝဲသ့ၣ်တပျံၤဝဲလၢ ပှၤပာ်ကဲအဝဲသ့ၣ်ကလီၤစှၤဘၣ်. တၢ်အိၣ်ဖှိၣ်သးပှၢ်လၢ အသ့ပဲာ်ထံနီၤဖးတၢ် ဒီးအိၣ်ဒီးတၢ်ဆီၣ်လီၤသးန့ၣ် ဖဲအဝဲသ့ၣ်ဘၣ်ဆီတလဲ အတၢ်ထံၣ်ဒီး တၢ်ဆၢတဲာ်အခါ ကြၢးမၤဝဲလီၤ. ဒီးပဝဲစ့ၢ်ကီး ပကြၢးကွၢ်လိမၤဒိး အဝဲသ့ၣ်လီၤ. ပမ့ၢ်မၤဒ်န့ၣ်န့ၣ် လၢပတၢ်အိၣ်ဖှိၣ်အပူၤ ကပှဲၤဝဲဒီးတၢ်မုာ်တၢ်ခုၣ်ဒီး တၢ်ဃူတၢ်ဖိးလီၤ.—မၤတၢ် ၆:၁-၄.
မၤဒ်နဆၢတဲာ်တၢ်အသိး
၁၇. ဒ်သိးနကဆၢတဲာ်တၢ်လၢ တၢ်ကူၣ်သ့အပူၤအဂီၢ် တၢ်မနုၤကမၤစၢၤနၤလဲၣ်.
၁၇ တၢ်ဆၢတဲာ်တနီၤနီၤန့ၣ် အရ့ဒိၣ်န့ၢ်ဒံးတၢ်ဆၢတဲာ်လၢ အဂၤတဖၣ်လီၤ. အဒိ, နဆၢတဲာ်လၢ နကဖျီနသး မ့တမ့ၢ် နကဖျီနသးဒီးမတၤတဂၤလဲၣ်န့ၣ် မ့ၢ်ဝဲတၢ်ဆၢတဲာ်လၢအရ့ဒိၣ်လီၤ. တၢ်ဆၢတဲာ်လၢအရ့ဒိၣ် လၢအဂၤတခါန့ၣ် မ့ၢ်ဝဲနကြၢးစးထီၣ်မၤ ယွၤအတၢ်မၤလၢ ဆၢကတီၢ်လၢပှဲၤလၢ အခါဖဲလဲၣ်န့ၣ်လီၤ. တချုးလၢ ပမၤတၢ်ဆၢတဲာ်လၢ အရ့ဒိၣ်ဒံးဘၣ်အခါ ပဘၣ်ဆိကမိၣ်ထံ တၢ်အိၣ်သးလီၤတံၢ်လီၤဆဲး ဒီးဃ့ဘါထုကဖၣ်ဆူ ယဟိဝၤယွၤအအိၣ်လီၤ. ပမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် တၢ်ဆၢကတီၢ်ကယံာ်ဝဲတစဲး ဘၣ်ဆၣ် ပမ့ၢ်အဲၣ်ဒိးမၤတၢ်ဆၢတဲာ်လၢ တၢ်ကူၣ်သ့အပူၤန့ၣ် ပကဘၣ်နာ်န့ၢ်ယဟိဝၤယွၤ, ဒိကနၣ်အတၢ်ဟံးစုနဲၣ်ကျဲ ဒီးမၤထွဲအီၤလီၤ. (ကတိၤဒိ ၁:၅) ယဟိဝၤယွၤဟ့ၣ်ပှၤ တၢ်ဟ့ၣ်ကူၣ်လၢ အဂ့ၤကတၢၢ်လၢ အကလုၢ်ကထါလံာ်စီဆှံအပူၤန့ၣ်လီၤ. လၢတၢ်န့ၣ်အဃိ ပကဘၣ်ဖးဒီးဃုသ့ၣ်ညါ အကလုၢ်ကထါ ဒီးဃ့ဘါထုကဖၣ်ဒ်သိး ပကဒိးန့ၢ်ဘၣ် အတၢ်ဟံးစုနဲၣ်ကျဲန့ၣ်လီၤ. ပမ့ၢ်မၤတၢ်ဆၢတဲာ်လၢ အဘၣ်ယွၤအသးန့ၣ် အဝဲကမၤစၢၤပှၤဒီး ဟ့ၣ်ပှၤတၢ်သ့တၢ်ဘၣ်ဒီး တၢ်ဂ့ၤတၢ်ဝါလၢပလိၣ်ဘၣ် ဒ်သိးပတၢ်ဆၢတဲာ် ကကဲထီၣ်လိၣ်ထီၣ်အဂီၢ်န့ၣ်လီၤ. တချုးလၢ ပမၤတၢ်ဆၢတဲာ်လၢ အရ့ဒိၣ်ဒံးဘၣ်အခါ ပကြၢးသံကွၢ်လီၤပသးလၢ– ‘မ့ၢ်ယတၢ်ဆၢတဲာ်န့ၣ် ပာ်ဖျါထီၣ်ဝဲလၢ ယမ့ၢ်ပှၤလၢအအဲၣ် ယဟိဝၤယွၤဧါ. ယတၢ်ဆၢတဲာ်န့ၣ် မ့ၢ်အကဒုးအိၣ်ထီၣ် တၢ်သူၣ်ခုသးခု ဒီးတၢ်ဃူတၢ်ဖိးလၢ ယဟံၣ်ဖိဃီဖိအကျါစ့ၢ်ကီးဧါ. ဒီးမ့ၢ်ယတၢ်ဆၢတဲာ်န့ၣ် ပာ်ဖျါထီၣ်လၢ ယမ့ၢ်ပှၤလၢအသးစူၤဒီး အိၣ်ဒီးတၢ်သူၣ်ကညီၤသးကညီၤတဂၤဧါ.’
၁၈. ဘၣ်မနုၤအဃိ ယဟိဝၤယွၤအဲၣ်ဒိးဝဲလၢ ပကမၤတၢ်ဆၢတဲာ်လၢ ပနီၢ်ကစၢ်လဲၣ်.
၁၈ ယဟိဝၤယွၤတမၢဆူၣ်ပှၤလၢ ပကဘၣ်အဲၣ်အီၤ ဒီးမၤအတၢ်မၤဘၣ်. လၢတၢ်န့ၣ်အလီၢ် အဝဲဟ့ၣ်ပှၤတၢ်ခွဲးတၢ်ယာ်လၢ ပကဃုထၢတၢ်လၢ တၢ်သဘျ့အပူၤလီၤ. ပကမၤအတၢ်မၤဧါ တမၤဘၣ်ဧါန့ၣ် အဝဲပာ်ကဲဝဲပတၢ်ခွဲးတၢ်ယာ်လၢ ပကဃုထၢတၢ်အဂီၢ်လီၤ. (ယိၤၡူ ၂၄:၁၅; စံၣ်တဲၤတဲလီၤတၢ် ၅:၄) ဘၣ်ဆၣ် ပမ့ၢ်မၤတၢ်ဆၢတဲာ်ဒ် ယွၤအကလုၢ်ကထါ ဟံးစုနဲၣ်ကျဲပှၤအသိးန့ၣ် အဝဲမုၢ်လၢ်ဝဲလၢ ပကဂုာ်ကျဲးစၢးမၤဒ် ပဆၢတဲာ်တၢ်အသိးလီၤ. ပမ့ၢ်နာ်ယဟိဝၤယွၤ အတၢ်ဟံးစုနဲၣ်ကျဲဒီး မၤထွဲအီၤန့ၣ် ပမၤတၢ်ဆၢတဲာ်လၢ တၢ်ကူၣ်သ့အပူၤသ့ဝဲလီၤ. ဒီးပမ့ၢ်မၤဒ်န့ၣ်န့ၣ် ဖဲပမၤတၢ်ဆၢတဲာ်အခါ ပသးတဒ့ဒီလၢၤဘၣ်.—ယၤကိာ် ၁:၅-၈; ၄:၈.
