ယူးယီၣ်ပာ်ကဲပှၤလၢ အကြၢးဒိးန့ၢ်ဘၣ် တၢ်ယူးယီၣ်ပာ်ကဲန့ၣ်တက့ၢ်
“တၢ်စံးထီၣ်ပတြၢၤ, ဒီးတၢ်ယူးတၢ်ယီၣ်, ဒီးတၢ်လၤကပီၤ, ဒီးတၢ်ဂံၢ်တၢ်ဘါတဖၣ်န့ၣ်, မ်အအိၣ်ဒီးပှၤလၢ အဆ့ၣ်နီၤလၢလီၢ်ပစိာ်အဖီခိၣ်, ဒီးသိဖိန့ၣ်အစိၤစိၤအဃၣ်ဃၣ်တက့ၢ်.” —လီၣ်ဖျါ ၅:၁၃.
၁. ဘၣ်မနုၤအဃိ ပှၤတနီၤနီၤ ကြၢးဒိးန့ၢ်တၢ်ယူးယီၣ်ပာ်ကဲလဲၣ်, ဒီးလၢတၢ်မၤလိအံၤအပူၤ ပကမၤလိဘၣ်မနုၤလဲၣ်.
ပပာ်ဖျါထီၣ် တၢ်ယူးယီၣ်ပာ်ကဲပှၤဂၤကသ့ဒ်လဲၣ်. အါဒၣ်တက့ၢ် ပယူးယီၣ်ပာ်ကဲပှၤလၢ အကြၢးဒိးန့ၢ် တၢ်ယူးယီၣ်ပာ်ကဲ ဒီးပှၤလၢအတၢ်ဖံးတၢ်မၤ မ့တမ့ၢ် အလီၢ်အလၤအပတီၢ်ထီတဖၣ်လီၤ. လၢတၢ်မၤလိအံၤအပူၤ ပကမၤလိဘၣ်လၢ ပကြၢးယူးယီၣ်ပာ်ကဲ မတၤသ့ၣ်တဖၣ်လဲၣ်ဒီး ဘၣ်မနုၤအဃိ ပကြၢးယူးယီၣ်ပာ်ကဲ အဝဲသ့ၣ်လဲၣ်န့ၣ်လီၤ.
၂, ၃. (က) ဘၣ်မနုၤအဃိ ယဟိဝၤယွၤကြၢးဒိးန့ၢ်ဘၣ် တၢ်ယူးယီၣ်ပာ်ကဲလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) သိဖိလၢ လီၣ်ဖျါ ၅:၁၃ ပာ်ဖျါထီၣ်ဝဲန့ၣ် မ့ၢ်မတၤတဂၤလဲၣ်, ဘၣ်မနုၤအဃိ ပကြၢးယူးယီၣ်ပာ်ကဲအီၤလဲၣ်.
၂ လီၣ်ဖျါ ၅:၁၃ စံးဝဲလၢ “ပှၤလၢအဆ့ၣ်နီၤလၢ လီၢ်ပစိာ်အဖီခိၣ်” ဒီး “သိဖိ” န့ၣ် ကြၢးဒိးန့ၢ်ဘၣ်ဝဲ တၢ်ယူးယီၣ်ပာ်ကဲလီၤ. “ပှၤလၢအဆ့ၣ်နီၤလၢ လီၢ်ပစိာ်အဖီခိၣ်” န့ၣ်မ့ၢ်ဝဲယဟိဝၤယွၤလီၤ. ဒီးလၢလီၣ်ဖျါ အဆၢဒိၣ် ၄ အပူၤန့ၣ် ပှၤနီၢ်သးဖိလၢ မူခိၣ်တဖၣ်တဲဖျါထီၣ်ဝဲလၢ ဘၣ်မနုၤအဃိ ယဟိဝၤယွၤကြၢးဒိးန့ၢ် တၢ်ယူးယီၣ်ပာ်ကဲလဲၣ်. အဝဲသ့ၣ်တဲဝဲလၢ– “ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်, ဒီးမ့ၢ်နသးအိၣ်ဒီး, ကဲထီၣ်ဝဲ, ဒီးဘၣ်တၢ်တ့လီၤအီၤလီၤ.”—လီၣ်ဖျါ ၄:၉-၁၁.
၃ “သိဖိ” လၢလီၣ်ဖျါ ၅:၁၃ ပာ်ဖျါထီၣ်ဝဲန့ၣ် မ့ၢ်ဝဲယ့ၣ်ၡူးလီၤ. ပသ့ၣ်ညါသ့ဒ်လဲၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ဘၣ်တၢ်ကိးအီၤလၢ “ယွၤအသိဖိလၢ အစိာ်ထီၣ်ကွံာ်ပှၤဟီၣ်ခိၣ်ဖိ အတၢ်ဒဲးဘးလီၤ.” (ယိၤဟၣ် ၁:၂၉) စီၤပၤလၢ အသးအိၣ်ဟ့ၣ်လီၤကွံာ်အသးသမူလၢ အထံဖိကီၢ်ဖိအဂီၢ်ဒ်အံၤ တအိၣ်နီတဂၤဘၣ်. လၢတၢ်န့ၣ်အဃိ အဝဲမ့ၢ်ပှၤလၢ အကြၢးဒိးန့ၢ်ဘၣ် တၢ်လၤတၢ်ကပီၤလီၤ. ယ့ၣ်ၡူးမ့ၢ်ဝဲ “စီၤပၤတဖၣ်အစီၤပၤ, ကစၢ်တဖၣ်အကစၢ်” အဃိ အဝဲကြၢးဒိးန့ၢ်ဘၣ်ဝဲ တၢ်ယူးယီၣ်ပာ်ကဲလီၤ. (၁ တံၤမသ့း ၆:၁၄-၁၆) ဘၣ်သ့ၣ်သ့ၣ် နကတူၢ်ဘၣ်ဒ်သိးဒီး ပှၤနီၢ်သးဖိတဖၣ်လၢမူခိၣ်လၢ အသးဝံၣ်ထီၣ်ဝဲလၢ– “သိဖိလၢအဒိးသံအသးန့ၣ်, ဂ့ၤဒိးန့ၢ်တၢ်စိတၢ်ကမီၤ, ဒီးတၢ်ထူးတၢ်တီၤ, ဒီးတၢ်ကူၣ်ဘၣ်ကူၣ်သ့, ဒီးတၢ်အဂံၢ်အဘါ, ဒီးတၢ်ယူးတၢ်ယီၣ်, ဒီးတၢ်လၤကပီၤ, ဒီးတၢ်စံးထီၣ်ပတြၢၤအီၤလီၤ.” —လီၣ်ဖျါ ၅:၁၂.
၄. ပမ့ၢ်ယူးယီၣ်ပာ်ကဲ ယဟိဝၤယွၤဒီးယ့ၣ်ၡူးန့ၣ် ကကဲဘျုးလၢပဂီၢ်ဒ်လဲၣ်.
၄ ယိၤဟၣ် ၅:၂၂, ၂၃ စံးဝဲလၢ ယဟိဝၤယွၤပာ်ထီၣ် ယ့ၣ်ၡူးခရံာ်လၢ ပှၤဟီၣ်ခိၣ်ဖိခဲလၢာ် အပှၤစံၣ်ညီၣ်ကွီၢ်လီၤ. လၢတၢ်န့ၣ်အဃိ ပကြၢးယူးယီၣ်ပာ်ကဲယ့ၣ်ၡူးလီၤ. ဒီးပမ့ၢ်မၤဒ်န့ၣ်န့ၣ် မ့ၢ်ပယူးယီၣ်ပာ်ကဲ ယဟိဝၤယွၤစ့ၢ်ကီးလီၤ. ပမ့ၢ်ဃုထၢလၢ ပကယူးယီၣ်ပာ်ကဲ ယ့ၣ်ၡူးဒီးအပၢ်ယဟိဝၤယွၤန့ၣ် ပကဒိးန့ၢ်ဘၣ်တၢ်မူအထူအယိာ်သ့ဝဲလီၤ.—ဖး စံးထီၣ်ပတြၢၤ ၂:၁၁, ၁၂ တက့ၢ်.
၅. ဘၣ်မနုၤအဃိ ပှၤကိးဂၤဒဲးကြၢးဒိးန့ၢ်ဘၣ် တၢ်ယူးယီၣ်ပာ်ကဲ ဖဲအကြၢးအဘၣ်န့ၣ်လဲၣ်.
၅ ပှၤဟီၣ်ခိၣ်ဖိတဖၣ် ဘၣ်တၢ်တ့လီၤအီၤဒ် “ယွၤအဂီၤ” အသိးလီၤ. (၁ မိၤၡ့ ၁:၂၇) တၢ်ကတိၤတဖျၢၣ်အံၤ အဲၣ်ဒိးစံးဝဲလၢ ပှၤအါတက့ၢ်ပာ်ဖျါထီၣ် တၢ်ဂ့ၤတၢ်ဝါတဖၣ် ဒ်ယွၤအသိးလီၤ. အဒိ, ပှၤဟီၣ်ခိၣ်ဖိန့ၣ် ပာ်ဖျါထီၣ်တၢ်အဲၣ်တၢ်ကွံ, တၢ်သူၣ်ဂ့ၤသးဝါ ဒီးတၢ်သးကညီၤသ့ဝဲလီၤ. တကးဒံးဘၣ် ပှၤဟီၣ်ခိၣ်ဖိန့ၣ် ဘၣ်တၢ်တ့လီၤအီၤဃုာ်ဒီး သးလၢအသ့ၣ်ညါဒၣ်တၢ်န့ၣ်လီၤ. သးလၢအသ့ၣ်ညါဒၣ်တၢ်န့ၣ် မၤစၢၤပှၤဒ်သိး ပကသ့ၣ်ညါနီၤဖးတၢ်အဘၣ်ဒီး တၢ်အကမၣ်, တၢ်အတီအလိၤ ဒီးတၢ်တတီတလိၤ ဒီးတၢ်လၢအကြၢးဒီး တၢ်လၢအတကြၢးတဘၣ်န့ၣ်လီၤ. (ရိမ့ၤ ၂:၁၄, ၁၅) တကးဒံးဘၣ် ယဟိဝၤယွၤမ့ၢ်ဝဲယွၤလၢ အရဲၣ်လီၤကျဲၤလီၤတၢ်ဂ့ၤဂ့ၤဒီး မ့ၢ်ဝဲတၢ်ဃူတၢ်ဖိးအကစၢ်လီၤ. လၢတၢ်န့ၣ်အဃိ ပထံၣ်ဘၣ်လၢ ပှၤအါဂၤအဲၣ်တၢ်ကဆှဲကဆှီ, တၢ်ဃံတၢ်လၤဒီး အဲၣ်ဒိးအိၣ်ဃူဃူဖိးဖိးဒီးပှၤအဂၤလီၤ. ပသ့ၣ်ညါလၢပှၤဟီၣ်ခိၣ်ဖိတဖၣ် ဘၣ်တၢ်တ့လီၤအီၤဃုာ်ဒီး တၢ်သ့တၢ်ဘၣ်လၢကကွၢ်လိမၤဒိး ယဟိဝၤယွၤလၢ ကျဲတဘိဘိလီၤ. လၢတၢ်န့ၣ်အဃိ အဝဲသ့ၣ်ကြၢးဒိးန့ၢ်ဘၣ် တၢ်ယူးယီၣ်ပာ်ကဲစ့ၢ်ကီးလီၤ.—စံးထီၣ်ပတြၢၤ ၈:၅.
ပာ်ဖျါထီၣ် တၢ်ယူးယီၣ်ပာ်ကဲလၢ ကျဲလၢအဘၣ်
၆, ၇. ဘၣ်ဃးဒီး တၢ်ယူးယီၣ်ပာ်ကဲ ပှၤဂၤန့ၣ် ယဟိဝၤပှၤအုၣ်အသးတဖၣ် လီၤဆီလိာ်အသးဒီး ပှၤအဂၤတဖၣ်ဒ်လဲၣ်.
၆ ပသ့ၣ်ညါလၢ ပှၤဟီၣ်ခိၣ်ဖိတနီၤစ့ၢ်ကီး ကြၢးဒိးန့ၢ်ဘၣ်တၢ်ယူးယီၣ်ပာ်ကဲလီၤ. ဘၣ်ဆၣ် ပကဘၣ်ယူးယီၣ်ပာ်ကဲအီၤဒ်လဲၣ်ဒီး ယူးယီၣ်ပာ်ကဲအီၤထဲလဲၣ်န့ၣ် တဘျီတခီၣ် ပပဲာ်ဖးနီၤဖးဘၣ်အီၤကီဝဲလီၤ. မ့ၢ်လၢမုၣ်ကီၤလံၢ်ပၢဟီၣ်ခိၣ်အဃိ ပှၤဟီၣ်ခိၣ်ဖိအါတက့ၢ် အိၣ်ဒီး တၢ်ပာ်သူၣ်ပာ်သးလၢ အတကြၢးတဘၣ် ဒီးအဲၣ်ဒိးပာ်ဒိၣ်ပာ်ကဲပှၤအဂၤတဖၣ် အါတလၢကွံာ်အခၢးလီၤ. အဝဲသ့ၣ်တမၤလၤကပီၤဒီး ယူးယီၣ်ပာ်ကဲယဟိဝၤယွၤ ဒ်အကြၢးမၤဝဲအသိးဘၣ်, လၢတၢ်န့ၣ်အလီၢ် အဝဲသ့ၣ်မၤလၤမၤကပီၤဒီး ယူးယီၣ်ပာ်ကဲဝဲ ပှၤဟီၣ်ခိၣ်ဖိအါတလၢကွံာ်အခၢး တုၤဒၣ်လဲာ် လီၤဂာ်ဒ် ပှၤသ့ၣ်တဖၣ်အံၤ ကဲဝဲအယွၤန့ၣ်လီၤ. အဒိ, ဘၣ်သ့ၣ်သ့ၣ် အဝဲသ့ၣ်ကကူကသိး, ကဖံးကမၤ, ကအိၣ်ထီၣ်အိၣ်လီၤဒ် ပဒိၣ်ပပှၢ်, တၢ်ဘူၣ်တၢ်ဘါခိၣ်နၢ်, ပှၤလိၣ်ကွဲဖိလၢအမံၤဒိၣ်, ပှၤဂဲၤဒိတၢ်ဖိလၢအမံၤဒိၣ် မ့တမ့ၢ် ပှၤလၢအမံၤဟူသၣ်ဖျါလၢ အဂၤတဖၣ်အသိးလီၤ.
၇ ခရံာ်ဖိလၢအမ့ၢ်အတီတဖၣ် သ့ၣ်ညါဝဲလၢ ပမ့ၢ်ယူးယီၣ်ပာ်ကဲ ပှၤဟီၣ်ခိၣ်ဖိ အါတလၢဒ်အံၤန့ၣ် မ့ၢ်တၢ်လၢအကမၣ်လီၤ. လၢကယဲၢ်ပှၤဟီၣ်ခိၣ်ဖိခဲလၢာ်အကျါန့ၣ် ပှၤလၢအပာ်လီၤအဒိအတဲာ်လၢ အဂ့ၤကတၢၢ်လၢ ပကကွၢ်လိမၤဒိးအဂီၢ်န့ၣ် မ့ၢ်ထဲယ့ၣ်ၡူးတဂၤလီၤ. (၁ ပ့းတရူး ၂:၂၁) ပကဘၣ်သ့ၣ်နီၣ်ထီၣ်လၢ “ပှၤခဲလၢာ်မၤတၢ်ဒဲးဘးဒီးတချုးန့ၢ်ဘၣ် ယွၤအလၤအကပီၤဘၣ်.” (ရိမ့ၤ ၃:၂၃) လၢတၢ်န့ၣ်အဃိ ပတကြၢးဘူၣ်ထီၣ်ဘါထီၣ် ပှၤဟီၣ်ခိၣ်ဖိနီတဂၤဘၣ်. ပမ့ၢ်ယူးယီၣ်ပာ်ကဲ ပှၤဟီၣ်ခိၣ်ဖိအါတလၢကွံာ်အခၢးန့ၣ် ယဟိဝၤယွၤအသးကအုးဝဲလီၤ.
၈, ၉. (က) ယဟိဝၤပှၤအုၣ်အသးတဖၣ် ထံၣ်ဝဲပဒိၣ်ပပှၢ်တဖၣ်ဒ်လဲၣ်. (ခ) ပတကြၢးဒိကနၣ် ပဒိၣ်ပပှၢ်တဖၣ်အကလုၢ်လၢ အဆၢကတီၢ်ဖဲလဲၣ်.
၈ ပှၤတနီၤနီၤန့ၣ်ခီဖျိလၢ အဝဲသ့ၣ်အိၣ်ဒီးအလီၢ်အလၤအဃိ ကြၢးဒိးန့ၢ်ဘၣ်ဝဲတၢ်ယူးယီၣ်ပာ်ကဲလီၤ. အဒိ, ဆိကမိၣ်ကွၢ် ပဒိၣ်ပပှၢ်ဒီး တၢ်လၢအဝဲသ့ၣ် မၤန့ၢ်ပှၤတဖၣ်န့ၣ်တက့ၢ်. အဝဲသ့ၣ်မၤစၢၤပှၤ ဒ်သိးပကအိၣ်ဘၣ် ဘံၣ်ဘံၣ်ဘၢဘၢဒီး ကွၢ်ထွဲဝဲထံဖိကီၢ်ဖိ အတၢ်လိၣ်ဘၣ်သ့ၣ်တဖၣ်လီၤ. အဝဲသ့ၣ်အတၢ်မၤန့ၣ် ကဲဘျုးဝဲအါမးလီၤ. တၢ်မၢဖိပီလူးတဲဝဲလၢ ပကဘၣ်ထံၣ် ပဒိၣ်ပပှၢ်တဖၣ်အံၤ ဒ်ပှၤလၢအိၣ်ဒီး “တၢ်စိတၢ်ကမီၤအဒိၣ်” အသိးလီၤ. အဝဲတဲစ့ၢ်ကီးဝဲလၢ ပကြၢးဒိကနၣ်အဝဲသ့ၣ် အတၢ်သိၣ်တၢ်သီန့ၣ်လီၤ. အဝဲစံးဝဲလၢ– “လိးက့ၤသုကမၢ်လၢ ပှၤကိးဂၤဒဲးတက့ၢ်. ပှၤလၢအဂ့ၤဒိးသွဲန့ၣ်, ဟ့ၣ်သွဲတက့ၢ်” ဒီး “ပှၤလၢပဂ့ၤယူးယီၣ်အီၤန့ၣ်, ယူးယီၣ်အီၤတက့ၢ်.” —ရိမ့ၤ ၁၃:၁, ၇.
၉ ဒ်ပမ့ၢ်ယဟိဝၤပှၤအုၣ်အသးအသိး ပဂုာ်ကျဲးစၢးပာ်ဖျါထီၣ် တၢ်ယူးယီၣ်ပာ်ကဲ ပဒိၣ်ပပှၢ်တဖၣ်လီၤ. ဘၣ်ဆၣ် ထံကီၢ်တဘ့ၣ်ဒီးတဘ့ၣ်န့ၣ် အဝဲသ့ၣ်အလုၢ်အလၢ် တဒ်သိးလိာ်အသးဘၣ်. လၢတၢ်န့ၣ်အဃိ ပဒိၣ်ပပှၢ်လၢ တၢ်လီၢ်တတီၤဒီးတတီၤ အဲၣ်ဒိးပှၤယူးယီၣ်ပာ်ကဲအီၤ ကလီၤဆီလိာ်အသးလီၤ. ဒ်လဲၣ်ဂ့ၤဒ်လဲၣ်ဂ့ၤ ပဆဲးဒိကနၣ် ပဒိၣ်ပပှၢ်တဖၣ်အကလုၢ်လီၤ. ဘၣ်ဆၣ် အဝဲသ့ၣ်မ့ၢ်မၢပမၤတၢ်မၤလၢ အထီဒါလိာ်သးဒီး ယဟိဝၤယွၤ အတၢ်သိၣ်တၢ်သီန့ၣ် ပဒိကနၣ်အီၤတသ့လၢၤဘၣ်. ဖဲန့ၣ်အခါ ပကဘၣ်ဒိကနၣ်ဒီးယူးယီၣ်ပာ်ကဲ ယဟိဝၤယွၤ အါန့ၢ်ပှၤကညီန့ၣ်လီၤ.—ဖး ၁ ပ့းတရူး ၂:၁၃-၁၇ တက့ၢ်.
၁၀. ယဟိဝၤယွၤအခ့အပှၤလၢပျၢၤတဖၣ် ပာ်ဖျါထီၣ်တၢ်ဒိဂ့ၤတဲာ်ဘၣ်လၢ ပဂီၢ်လၢကျဲဒ်လဲၣ်.
၁၀ ယဟိဝၤယွၤအခ့အပှၤ လၢပျၢၤသ့ၣ်တဖၣ် ပာ်ဖျါထီၣ်တၢ်ယူးယီၣ်ပာ်ကဲ ပဒိၣ်ပပှၢ်တဖၣ်ဒ်လဲၣ်န့ၣ် ပဟံးန့ၢ်တၢ်မၤလိလၢ အဝဲသ့ၣ်အအိၣ်သ့ဝဲလီၤ. စီၤယိၤသးဒီး နီၢ်မၤရံမ့ၢ်ဝဲ ပှၤလၢအဒိဂ့ၤတဲာ်ဘၣ်လီၤ. ဖဲရိမ့ၤပဒိၣ်အဲၣ်ဒိးသ့ၣ်ညါဝဲလၢ ပှၤအိၣ်လၢအထံကီၢ်အပူၤ ပှဲၤဂၤလဲၣ်အခါ ဘၣ်လၢနီၢ်မၤရံဒၢပှၢ်ထီၣ်ဘူးလၢ အဖိကအိၣ်ဖျဲၣ်ထီၣ်လံ ဘၣ်ဆၣ်အဝဲဒီးစီၤယိၤသး လဲၤဆူဝ့ၢ်ဘ့ၤသလ့ဃ့ၣ် ဒ်သိးကဆဲးလီၤအမံၤအဂီၢ်လီၤ. (လူၤကၣ် ၂:၁-၅) တၢ်မၢဖိပီလူးစ့ၢ်ကီး မ့ၢ်ဝဲပှၤလၢအဒိဂ့ၤတဲာ်ဘၣ်လၢ အိၣ်ဒီးတၢ်ယူးယီၣ်ပာ်ကဲ ပဒိၣ်ပပှၢ်န့ၣ်လီၤ. ဖဲပှၤပာ်ဒ့ၣ်ပာ်ကမၣ်အီၤအခါ လၢတၢ်ယူးယီၣ်ပာ်ကဲအပူၤ အဝဲတဲတၢ်ဒီးစီၤပၤအကြံးပၤဒီး စီၤဖ့စတူး လၢအမ့ၢ်ပဒိၣ်တဂၤန့ၣ်လီၤ.—မၤတၢ် ၂၅:၁-၁၂; ၂၆:၁-၃.
၁၁, ၁၂. (က) ဘၣ်မနုၤအဃိ ပတယူးယီၣ်ပာ်ကဲ တၢ်ဘူၣ်တၢ်ဘါခိၣ်နၢ်တဖၣ် အါန့ၢ်ဒံးပှၤဂၤလဲၣ်. (ခ) ယဟိဝၤပှၤအုၣ်အသးလၢ ကီၢ်အီးစတြံယါတဂၤ ပာ်ဖျါထီၣ်တၢ်ယူးယီၣ်ပာ်ကဲ ပဒိၣ်ပပှၢ်အဃိကဲဘျုးဝဲဒ်လဲၣ်.
၁၁ မ့မ့ၢ်တၢ်ဘူၣ်တၢ်ဘါ ခိၣ်နၢ်တဖၣ်န့ၣ် မ့ၢ်ပကြၢးပာ်ကဲအဝဲသ့ၣ် အါန့ၢ်ဒံးပှၤအဂၤဧါ. တမ့ၢ်ဘၣ်, ပပာ်ကဲအဝဲသ့ၣ်ဒ် ပပာ်ကဲပှၤအဂၤတဖၣ်အသိးလီၤ. အဝဲသ့ၣ်မ့ၢ်မုၢ်လၢ်လၢ ပကပာ်ဖျါထီၣ် တၢ်ယူးယီၣ်ပာ်ကဲအီၤ အါအါသနာ်က့ ပမ့ၢ်ယူးယီၣ်ပာ်ကဲ အဝဲသ့ၣ်အါန့ၢ်ဒံးပှၤဂၤန့ၣ် ကမၣ်ဝဲလီၤ. ဘၣ်မနုၤအဃိလဲၣ်. မ့ၢ်လၢ တၢ်ဘူၣ်တၢ်ဘါလၢ အကမၣ်အခိၣ်အနၢ်တဖၣ်န့ၣ် အဝဲသ့ၣ်တသိၣ်လိဝဲ တၢ်မ့ၢ်တၢ်တီဘၣ်ဃးဒီးယွၤ ဒီးတသိၣ်လိဝဲ တၢ်မ့ၢ်တၢ်တီလၢ လံာ်စီဆှံအပူၤဘၣ်. ယ့ၣ်ၡူးပာ်ဒ့ၣ်ပာ်ကမၣ် တၢ်ဘူၣ်တၢ်ဘါလၢ အကမၣ်အခိၣ်အနၢ်တဖၣ်ဒီး ကိးအဝဲသ့ၣ်လၢပှၤလီတၢ်ဒီး ခိၣ်နၢ်လၢအအၢအသီတဖၣ်လီၤ. (မးသဲ ၂၃:၂၃, ၂၄) ဘၣ်ဆၣ် ပမ့ၢ်ယူးယီၣ်ပာ်ကဲ ပဒိၣ်ပပှၢ်အါန့ၢ်ဒံး ပှၤဂၤန့ၣ်တကမၣ်ဘၣ်. ခီဖျိလၢ ပမၤဒ်န့ၣ်အဃိ တဘျီတခီၣ်အဝဲသ့ၣ်မၤစၢၤပှၤလီၤ.
၁၂ အဒိ, ကီၢ်အီးစတြံယါ အပဒိၣ်တဂၤလၢအမ့ၢ် ဒီးကထၢၤ ဟဲနရ့ၣ် ကျ့စနၢၤန့ၣ် ပှၤနးစံၣ်ဖီၣ်န့ၢ်အီၤ ဖဲဟီၣ်ခိၣ်တၢ်ဒုးခံဘျီတဘျီ အဆၢကတီၢ်န့ၣ်လီၤ. ဖဲအအိၣ်လၢ လ့ၣ်မ့ၣ်အူအပူၤ ဒီးလဲၤဆူဃိာ် (concentration camp) အပူၤအခါ အဝဲထံၣ်လိာ်သးဒီး လံၤအိၤဖိၤ အဲၤကလံၤနၢၤ လၢအမ့ၢ်ယဟိဝၤပှၤအုၣ်အသးလၢ အသူၣ်ဆူၣ်သးဆူၣ်တဂၤ လၢကီၢ်အီးစတြံယါအပူၤန့ၣ်လီၤ. လၢတၢ်ယူးယီၣ်ပာ်ကဲအပူၤ ဖဲဒီပုၢ်ဝဲၢ်ခွါ အဲၤကလံၤနၢၤ တဲနၢ်ပၢၢ်ဝဲ ဒီးကထၢၤ ကျ့စနၢၤ ဘၣ်ဃးအတၢ်စူၢ်တၢ်နာ်အဂ့ၢ်အခါ ဒီးကထၢၤ ကျ့စနၢၤ ဒိကနၣ်ဝဲဂ့ၤဂ့ၤလီၤ. ဖဲတၢ်ဒုးဝံၤအလီၢ်ခံ ဒီးကထၢၤ ကျ့စနၢၤ သူဝဲအလီၢ်အလၤဒ်သိးကမၤစၢၤဝဲ ယဟိဝၤပှၤအုၣ်အသးတဖၣ်လၢ အအိၣ်လၢကီၢ်အီးစတြံယါန့ၣ်လီၤ. ဘၣ်သ့ၣ်သ့ၣ် နကသ့ၣ်ညါဘၣ်လၢ တၢ်လီၢ်တတီၤတီၤန့ၣ် ခီဖျိလၢခရံာ်ဖိတဖၣ် ပာ်ဖျါထီၣ်တၢ်ယူးယီၣ်ပာ်ကဲ ပဒိၣ်ပပှၢ်အဃိ ကဲဘျုးဝဲလၢ အဝဲသ့ၣ်အဂီၢ်လီၤ.
ပာ်ဖျါထီၣ် တၢ်ယူးယီၣ်ပာ်ကဲပှၤအဂၤ
၁၃. လီၤဆီဒၣ်တၢ်မတၤသ့ၣ်တဖၣ် ကြၢးဒိးန့ၢ်ဘၣ် ပတၢ်ယူးယီၣ်ပာ်ကဲလဲၣ်, ဒီးဘၣ်မနုၤအဃိလဲၣ်.
၁၃ ပဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် ကြၢးဒိးန့ၢ်ဘၣ် ပတၢ်ယူးယီၣ်ပာ်ကဲလီၤ. လီၤဆီဒၣ်တၢ် ဒီပုၢ်ဝဲၢ်ခွါလၢအတီခိၣ်ရိၤမဲတၢ် ဒ်သိးဒီးတၢ်အိၣ်ဖှိၣ်သးပှၢ်, ကဝီၤအပှၤကွၢ်တၢ်, ဝဲၤတြၢ်ကမံးတံာ်, ဒီးပှၤပၢဆှၢတၢ်ကမံးတံာ်တဖၣ်န့ၣ် ကြၢးဒိးန့ၢ်ဘၣ် ပတၢ်ယူးယီၣ်ပာ်ကဲလီၤ. (ဖး ၁ တံၤမသ့း ၅:၁၇ တက့ၢ်.) အဝဲသ့ၣ်ခဲလၢာ်အံးထွဲကွၢ်ထွဲ ယွၤအပှၤဂီၢ်မုၢ်တဖၣ်အတၢ်လိၣ်ဘၣ်ဒီး လံာ်စီဆှံပာ်ဖျါထီၣ်ဝဲလၢ အဝဲသ့ၣ်မ့ၢ် “တၢ်ဘျုးတၢ်ဖှိၣ်လၢပှၤကညီ” အဂီၢ်လီၤ. (အ့းဖ့းစူး ၄:၈) လၢတၢ်န့ၣ်အဃိ အဝဲသ့ၣ်အိၣ်ဟဲဖဲလဲၣ်မ့ၢ်ဂ့ၤ အတၢ်ကူၣ်ဘၣ်ကူၣ်သ့ အိၣ်ထဲလဲၣ်မ့ၢ်ဂ့ၤ, အဝဲသ့ၣ်အပတီၢ်အိၣ်ထဲလဲၣ်မ့ၢ်ဂ့ၤ ဒီးအကျိၣ်အစ့အိၣ်ထဲလဲၣ်မ့ၢ်ဂ့ၤ ပကြၢးယူးယီၣ်ပာ်ကဲအဝဲသ့ၣ်လီၤ. ခရံာ်ဖိလၢ တၢ်မၢဖိအစိၤတဖၣ် ပာ်လီၤဝဲတၢ်ဒိဂ့ၤတဲာ်ဘၣ်လၢပဂီၢ်လီၤ. အဝဲသ့ၣ်ပာ်ကဲဝဲပှၤလၢ အတီခိၣ်ရိၤမဲတၢ်တဖၣ်ဒီး မုၢ်မဆါတနံၤအံၤ စ့ၢ်ကီးပမၤဒ်န့ၣ်လီၤ. ဖဲပအိၣ်ဒီးပှၤတဖၣ်အံၤအခါ ပတရ့ဒီးအဝဲသ့ၣ်ဒ် မူခိၣ်ကလူးတဖၣ်အသိးဘၣ်, အဝဲသ့ၣ်စ့ၢ်ကီးမ့ၢ်ဝဲ ပှၤတလၢတပှဲၤတဖၣ်လီၤ. ဘၣ်ဆၣ် အဝဲသ့ၣ်မၤတၢ်ဆူၣ်ဆူၣ်ဒီး အိၣ်ဒီးတၢ်ဆီၣ်လီၤသးအဃိ ပယူးယီၣ်ပာ်ကဲအဝဲသ့ၣ်လီၤ.—ဖး ၂ ကရံၣ်သူး ၁:၂၄; လီၣ်ဖျါ ၁၉:၁၀ တက့ၢ်.
၁၄, ၁၅. ခရံာ်ဖိတၢ်အိၣ်ဖှိၣ်သးပှၢ်တဖၣ် လီၤဆီလိာ်အသးဒီး တၢ်ဘူၣ်တၢ်ဘါခိၣ်နၢ်တဖၣ်ဒ်လဲၣ်.
၁၄ တၢ်အိၣ်ဖှိၣ်သးပှၢ်တဖၣ်အံၤ လီၤဂာ်ဒ်သိးဒီး ပှၤကွၢ်သိလၢ အအိၣ်ဒီးတၢ်ဆီၣ်လီၤသးန့ၣ်လီၤ. အဝဲသ့ၣ်တအဲၣ်ဒိးလၢ ပကရ့အီၤဒ်ပှၤမံၤဟူသၣ်ဖျါအသိးဘၣ်. လၢတၢ်န့ၣ်အဃိ အဝဲသ့ၣ်န့ၣ် လီၤဆီလိာ်အသးဒီး တၢ်ဘူၣ်တၢ်ဘါခိၣ်နၢ်လၢ စိၤခဲအံၤမ့ၢ်ဂ့ၤ လၢယ့ၣ်ၡူးအစိၤမ့ၢ်ဂ့ၤန့ၣ်လီၤ. ဘၣ်ဃးဒီးတၢ်ဘူၣ်တၢ်ဘါ ခိၣ်နၢ်တဖၣ်အံၤန့ၣ် ယ့ၣ်ၡူးစံးဝဲလၢ အဝဲသ့ၣ် “အဲၣ်ဒိးအလီၢ်လၢအဂ့ၤကတၢၢ်. လၢပှၤအီၣ်တၢ်အီတၢ်အကျါ, ဒီးအလီၢ်ဆ့ၣ်နီၤ အဂ့ၤကတၢၢ်လၢဘူၣ်ဘျီၣ်ပူၤ, ဒီးတၢ်ကတိၤဒိၣ်အီၤလၢဖၠါပူၤ” လီၤ.—မးသဲ ၂၃:၆, ၇.
တၢ်အိၣ်ဖှိၣ်သးပှၢ်တဖၣ် မ့ၢ်အိၣ်ဒီးတၢ်ဆီၣ်လီၤသးဒီး ဒိကနၣ်ယ့ၣ်ၡူးအတၢ်ကတိၤန့ၣ် ဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် ကအဲၣ်အီၤဒီး ကယူးယီၣ်ပာ်ကဲအီၤလီၤ
၁၅ မုၢ်မဆါတနံၤအံၤ ခရံာ်ဖိတၢ်အိၣ်ဖှိၣ်သးပှၢ်တဖၣ် မၤထွဲဝဲယ့ၣ်ၡူး အတၢ်ကတိၤလၢအမ့ၢ်– “သုတပျဲပှၤကိးသုလၢရၤဘံဧၢန့ၣ်တဂ့ၤ. အဂ့ၢ်ဒ်အံၤ, သုသရၣ်အိၣ်ဝဲတဂၤဃီ, ဒီးသုဝဲသ့ၣ်ခဲလၢာ်အံၤ, သုမ့ၢ်ဒီပုၢ်ဝဲၢ်လီၤ. ဒီးသုတကိးပှၤလၢဟီၣ်ခိၣ်ချၢအံၤ လၢပၢ်နီတဂၤတဂ့ၤ. အဂ့ၢ်ဒ်အံၤ, သုပၢ်အိၣ်တဂၤဃီလၢမူခိၣ်လီၤ. ဒီးသုတပျဲပှၤကိးသုလၢအခိၣ်တဂ့ၤ. အဂ့ၢ်ဒ်အံၤ, သုခိၣ်အိၣ်တဂၤဃီခရံာ်န့ၣ်လီၤ. ဒီးပှၤလၢအဒိၣ်ကတၢၢ်လၢ သုကျါတဂၤန့ၣ်, ကကဲထီၣ်လၢသုခ့သုပှၤလီၤ. ဒီးဖဲဒၣ်ပှၤလၢ အပာ်ထီၣ်ထီအသးတဂၤဂၤန့ၣ်, ကဘၣ်တၢ်ဆီၣ်လီၤအီၤ, ဒီးဖဲဒၣ်ပှၤလၢအဆီၣ်လီၤအသး တဂၤဂၤန့ၣ်, ကဘၣ်တၢ်ပာ်ထီၣ်ထီအီၤလီၤ.” (မးသဲ ၂၃:၈-၁၂) လၢဟီၣ်ခိၣ်ဒီဘ့ၣ်န့ၣ် တၢ်အိၣ်ဖှိၣ်သးပှၢ်တဖၣ် မ့ၢ်အိၣ်ဒီးတၢ်ဆီၣ်လီၤသးဒီး ဒိကနၣ်ယ့ၣ်ၡူးအတၢ်ကတိၤန့ၣ် ဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် ကအဲၣ်အီၤဒီး ကယူးယီၣ်ပာ်ကဲအီၤလီၤ.
တၢ်အိၣ်ဖှိၣ်သးပှၢ်တဖၣ် မ့ၢ်မၤယွၤအတၢ်မၤလၢ တၢ်ဆီၣ်လီၤသးအပူၤန့ၣ် ဒီပုၢ်ဝဲၢ်တဖၣ် ကအဲၣ်အီၤ ဒီးကယူးယီၣ်ပာ်ကဲအီၤလီၤ (ကွၢ်လံာ်အဆၢ ၁၃-၁၅)
၁၆. ဘၣ်မနုၤအဃိ ပကဘၣ်ဂုာ်ကျဲးစၢးပာ်ဖျါထီၣ် တၢ်ယူးယီၣ်ပာ်ကဲလဲၣ်.
၁၆ ဒ်သိး ပကသ့ၣ်ညါထီၣ်လၢ ပဘၣ်ယူးယီၣ်ပာ်ကဲ ပှၤဂၤဒ်လဲၣ်အဂီၢ်န့ၣ် ဘၣ်သ့ၣ်သ့ၣ် ပကလိၣ်ဘၣ်တၢ်ဆၢကတီၢ်လီၤ. ခရံာ်ဖိလၢညါတဖၣ်စ့ၢ်ကီး အဝဲသ့ၣ်လိၣ်ဘၣ်ဝဲ တၢ်ဆၢကတီၢ်စ့ၢ်ကီးလီၤ. (မၤတၢ် ၁၀:၂၂-၂၆; ၃ ယိၤဟၣ် ၉, ၁၀) ဘၣ်ဆၣ် ပမ့ၢ်ဂုာ်ကျဲးစၢးမၤဒ်အံၤန့ၣ် ကဲဘျုးဝဲလီၤ. ပမ့ၢ်ယူးယီၣ်ပာ်ကဲပှၤဂၤဒ် ယဟိဝၤယွၤအဲၣ်ဒိးဝဲအသိးန့ၣ် ပကဒိးန့ၢ်ဘၣ်အဘျုးအါမးလီၤ.
ပမ့ၢ်ပာ်ဖျါထီၣ် တၢ်ယူးယီၣ်ပာ်ကဲန့ၣ် ကကဲဘျုးဒ်လဲၣ်
၁၇. ပမ့ၢ်ပာ်ဖျါထီၣ် တၢ်ယူးယီၣ်ပာ်ကဲ ပှၤလၢအိၣ်ဒီးတၢ်စိတၢ်ကမီၤန့ၣ် ကဲဘျုးဒ်လဲၣ်.
၁၇ ပမ့ၢ်ယူးယီၣ်ပာ်ကဲ ပှၤလၢအိၣ်ဒီး တၢ်စိတၢ်ကမီၤလၢ ပဟီၣ်ကဝီၤအပူၤန့ၣ် အါဒၣ်တက့ၢ်အဝဲသ့ၣ် ကအဲၣ်ဒိးဆီၣ်ထွဲ ပတၢ်ခွဲးတၢ်ယာ်လၢ ပကစံၣ်တဲၤတဲလီၤတၢ်အဂီၢ်လီၤ. တကးဒံးဘၣ် ဘၣ်သ့ၣ်သ့ၣ် အဝဲသ့ၣ်ကဘၣ်သူၣ်ဘၣ်သးဝဲ ပတၢ်စံၣ်တဲၤတဲလီၤတၢ်မၤန့ၣ်လီၤ. အပူၤကွံာ်စှၤကိာ်နံၣ် လၢကီၢ်ကၠၢမနံၣ်န့ၣ် ဖဲပှၤလဲၤလၢညါလၢအမံၤမ့ၢ် ဘဲရက့ၣ်(ထ်) လဲၤလၢအဖိ အတၢ်ဖျိထီၣ်ကၠိအမူးအခါ တၢ်ကဲထီၣ်အသးဒ်အံၤလီၤ. သရၣ်တဖၣ်တဲဘၣ် ဘဲရက့ၣ်(ထ်) လၢအဝဲသ့ၣ်သးခုဒိၣ်မးလၢ အသိၣ်လိဘၣ်ဝဲ ယဟိဝၤပှၤအုၣ်အသးအဖိတဖၣ်လီၤ. အဝဲသ့ၣ်တူၢ်ဘၣ်ဝဲလၢ ယဟိဝၤပှၤအုၣ်အသးအဖိတဖၣ် အနၢ်လိၤအဃိ ကဲဘျုးလၢ သရၣ်ဒီး ကၠိဖိလၢအဂၤတဖၣ်အဂီၢ်လီၤ. ဘဲရက့ၣ်(ထ်) တဲဘၣ်အီၤလၢ “ပဖိသ့ၣ်တဖၣ် အဝဲသ့ၣ်ဂုာ်ကျဲးစၢး အိၣ်မူမၤထွဲဝဲ ယွၤအတၢ်သိၣ်တၢ်သီအဃိ ယူးယီၣ်ပာ်ကဲ သရၣ်တဖၣ်န့ၣ်လီၤ.” သရၣ်တဂၤစံးကဒီးဝဲ ပှၤဖိသၣ်ခဲလၢာ် မ့ၢ်အိၣ်ဒ်သိးဒီး ယဟိဝၤပှၤအုၣ်အသးအဖိတဖၣ်ဒု ပသိၣ်လိဘၣ်တၢ်ကညီထီၣ်ဝဲလီၤ. အဝဲသ့ၣ်အိၣ်ဒီး တၢ်ထံၣ်လၢအဂ့ၤလၢ ယဟိဝၤပှၤအုၣ်အသးအဖိတဖၣ် အဖီခိၣ်အဃိ ပူၤကွံာ်စှၤနွံဝံၤအလီၢ်ခံ သရၣ်တဂၤ လဲၤထီၣ်ဝဲတၢ်အိၣ်ဖှိၣ်ဖးဒိၣ်န့ၣ်လီၤ.
၁၈, ၁၉. ပယူးယီၣ်ပာ်ကဲ တၢ်အိၣ်ဖှိၣ်သးပှၢ်တဖၣ် ဘၣ်ဆၣ် ပကြၢးသ့ၣ်နီၣ်ထီၣ်တၢ်မနုၤလဲၣ်.
၁၈ လံာ်စီဆှံ အတၢ်ဟံးစုနဲၣ်ကျဲ ကမၤစၢၤပှၤဒ်သိး ပကနၢ်ပၢၢ်ထီၣ်လၢ ပကဘၣ်ယူးယီၣ်ပာ်ကဲ တၢ်အိၣ်ဖှိၣ်သးပှၢ်တဖၣ်ဒ်လဲၣ်န့ၣ်လီၤ. (ဖး ဧ့ၤဘြံၤ ၁၃:၇, ၁၇ တက့ၢ်.) အဝဲသ့ၣ်မၤတၢ်ဆူၣ်ဆူၣ်အဃိ ပကြၢးစံးပတြၢၤအီၤလီၤ. ဖဲပမၤထွဲ တၢ်အိၣ်ဖှိၣ်သးပှၢ်တဖၣ် အတၢ်ဟံးစုနဲၣ်ကျဲအခါ ကမၤစၢၤအဝဲသ့ၣ်ဒ်သိး အကဆဲးမၤယွၤအတၢ်မၤလၢ တၢ်သူၣ်ခုသးခုအပူၤအဂီၢ်လီၤ. လံာ်စီဆှံတဲဝဲလၢ ပကြၢးကွၢ်လိမၤဒိး အဝဲသ့ၣ်အတၢ်နာ်လီၤ. ဘၣ်ဆၣ် တမ့ၢ်လၢပဘၣ်မၤပိာ် အဝဲသ့ၣ်အခံလၢ တၢ်ခဲလၢာ်အပူၤဘၣ်. အဒိ, တၢ်အိၣ်ဖှိၣ်သးပှၢ် ကူတၢ်သိးတၢ်, ကတိၤတၢ် ဒီးသိၣ်လိနဲၣ်လိတၢ်ဒ်လဲၣ်ဒ်လဲၣ်န့ၣ် ပတလိၣ်ကွၢ်လိမၤဒိးအဝဲသ့ၣ် လီၤတံၢ်လီၤဆဲးဘၣ်. ပမ့ၢ်မၤဒ်န့ၣ်န့ၣ် ကဖျါလၢပပိာ်ပှၤကညီအခံဒီး တမ့ၢ်ပပိာ်ယ့ၣ်ၡူးအခံလၢၤဘၣ်. ပကဘၣ်သ့ၣ်နီၣ်ထီၣ်လၢ တၢ်အိၣ်ဖှိၣ်သးပှၢ်တဖၣ်န့ၣ် မ့ၢ်ဝဲပှၤတလၢတပှဲၤဒ်သိးဒီးပဝဲလီၤ.
၁၉ နကြၢးပာ်ဖျါထီၣ် တၢ်ယူးယီၣ်ပာ်ကဲ တၢ်အိၣ်ဖှိၣ်သးပှၢ် ဘၣ်ဆၣ် တဘၣ်ရ့အီၤဒ် ပှၤမံၤဟူသၣ်ဖျါအသိးတဂ့ၤ. နမ့ၢ်မၤဒ်န့ၣ်န့ၣ် ကကဲထီၣ်တၢ်မၤစၢၤလၢ အဝဲသ့ၣ်အဂီၢ်လီၤ. ဘၣ်မနုၤအဃိလဲၣ်. ပမ့ၢ်မၤဒ်န့ၣ်န့ၣ် ကမၤစၢၤအဝဲသ့ၣ်ဒ်သိး အကအိၣ်ဒီးတၢ်ဆီၣ်လီၤသးဒီး ကဟးဆှဲး တၢ်ဆိကမိၣ်ဒိၣ်လီၤအသး မ့တမ့ၢ် ဟးဆှဲးတၢ်ဆိကမိၣ်လၢ အဝဲသ့ၣ်အတၢ်ဘၣ်ထီဘိန့ၣ်လီၤ.
၂၀. ပမ့ၢ်ယူးယီၣ်ပာ်ကဲ ပှၤဂၤန့ၣ်ကဲဘျုးဒ်လဲၣ်.
၂၀ ပမ့ၢ်ယူးယီၣ်ပာ်ကဲပှၤဂၤန့ၣ် ကမၤစၢၤပှၤဒ်သိး ပကဟးဆှဲး တၢ်အဲၣ်လီၤဒၣ်ထဲပသးန့ၣ်လီၤ. ဒီးဖဲပှၤဂၤယူးယီၣ်ပာ်ကဲပှၤအခါစ့ၢ်ကီး ကမၤစၢၤပှၤလၢ ပကဆဲးအိၣ်ဒီး တၢ်ဆီၣ်လီၤသးအဂီၢ်လီၤ. ဒီးကကဲထီၣ်တၢ်ဒီသဒၢလၢ ပဂီၢ်လၢကျဲအဂၤတဘိစ့ၢ်ကီးလီၤ. အဒိ, ခီဖျိလၢ ပတပာ်ကဲပှၤဂၤ အါတလၢကွံာ်အခၢးအဃိ ပှၤလၢပပာ်ကဲအီၤတဂၤ မ့ၢ်မၤတၢ်တမံၤမံၤလၢ အမၤဘၣ်ဒိပသးဒၣ်လဲာ် တကဲထီၣ် တၢ်လီၤဃံၢ်လၢပဂီၢ်ဘၣ်. တကးဒံးဘၣ် တၢ်ယူးယီၣ်ပာ်ကဲပှၤဂၤန့ၣ် ကမၤစၢၤပှၤဒ်သိး ပကဆဲးမၤတၢ်ဃူဃူဖိးဖိးဒီး ယဟိဝၤယွၤအတၢ်ကရၢကရိန့ၣ်လီၤ. ပှၤဟီၣ်ခီၣ်ဖိလၢအမ့ၢ် ပှၤလၢအစူၢ်က့ၤနာ်က့ၤတၢ်မ့ၢ်ဂ့ၤ တစူၢ်က့ၤနာ်က့ၤတၢ်မ့ၢ်ဂ့ၤ ယဟိဝၤယွၤအတၢ်ကရၢကရိ တဟ့ၣ်လီၤအဝဲသ့ၣ် တၢ်ယူးယီၣ်ပာ်ကဲ အါတလၢကွံာ်အခၢးဘၣ်.
၂၁. ခီဖျိလၢ ပယူးယီၣ်ပာ်ကဲပှၤဂၤအဃိ တၢ်အဘျုးလၢအဒိၣ်ကတၢၢ်လၢ ပဒိန့ၢ်ဘၣ်အီၤန့ၣ် မ့ၢ်မနုၤလဲၣ်.
၂၁ ခီဖျိလၢ ပယူးယီၣ်ပာ်ကဲပှၤဂၤအဃိ တၢ်အဘျုးအဒိၣ်ကတၢၢ်တမံၤလၢ ပဒိးန့ၢ်ဘၣ်အီၤန့ၣ် မ့ၢ်ဒၣ်ပမၤသးခု ကစၢ်ယွၤအသးလီၤ. ဒီးကကဲထီၣ်တၢ်မၤစၢၤဒ်သိး ပကဆဲးတီဒီးအီၤ တုၤလၢအကတၢၢ်န့ၣ်လီၤ. မုၣ်ကီၤလံၢ်တဲဝဲလၢ ပှၤလၢအကတီဒီး ယဟိဝၤယွၤန့ၣ် တအိၣ်နီတဂၤဘၣ်. ဘၣ်ဆၣ် မ့ၢ်လၢပပာ်ကဲပှၤဂၤဒီး ပဆဲးတီဒီးယဟိဝၤယွၤ လၢကျဲဒ်အံၤအဃိ ယဟိဝၤယွၤ စံးဆၢက့ၤမုၣ်ကီၤလံၢ်ကသ့ဝဲလီၤ. (ကတိၤဒိ ၂၇:၁၁) ပကြၢးပာ်ကဲ ပှၤအဂၤတဖၣ်လၢကျဲဒ်လဲၣ်န့ၣ် ပှၤအါတက့ၢ်တသ့ၣ်ညါဝဲဘၣ်. မ့မ့ၢ်ပဝဲသ့ၣ်တဖၣ်အံၤ ပသ့ၣ်ညါလၢပကဘၣ် ပာ်ကဲပှၤဂၤဒ်ယဟိဝၤယွၤ အဲၣ်ဒိးဝဲအသိးအဃိ ပသးခုဒိၣ်မးလီၤ.
