ဖဲနထံၣ်ဘၣ် တၢ်မၤကွၢ်အခါ အိၣ်ဒီးတၢ်ဆီၣ်လီၤသးတက့ၢ်
“လဲၤတၢ်ဒီးနကစၢ်လၢ နသးစူၤန့ၣ်တက့ၢ်” —မံကၤ ၆:၈.
၁-၃. ဝံလၢအဟဲလၢ ကီၢ်ယူဒၤတဂၤတမၤ တၢ်မနုၤလဲၣ်ဒီး တၢ်ကဲထီၣ်အသးဒီး အီၤဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
ပှၤအံၣ်စရ့လးဖိ အစီၤပၤယၤရၤဘၣ်န့ၣ် တ့ထီၣ်တၢ်လုၢ်လီၢ်လၢ တၢ်ဘူၣ်တၢ်ဘါအကမၣ်အဂီၢ်လၢ ဝ့ၢ်ဘ့ၤသ့လးအပူၤန့ၣ်လီၤ. ယဟိဝၤယွၤဆှၢလီၤဝဲအဝံလၢ အိၣ်လၢကီၢ်ယူဒၤတဂၤ ဒ်သိးကလဲၤတဲဘၣ်ဝဲ စီၤယၤရၤဘၣ် တၢ်စံၣ်ညီၣ်အကစီၣ်န့ၣ်လီၤ. ဝံလၢအအိၣ်ဒီး တၢ်ဆီၣ်လီၤသးတဂၤအံၤ ဒိကနၣ်ဝဲယဟိဝၤယွၤအကလုၢ်ဒီး လဲၤတဲဝဲတၢ်ကစီၣ်န့ၣ်လီၤ. စီၤပၤသူၣ်ဒိၣ်သးဖျိးဝဲ ဝံအံၤဘၣ်ဆၣ် ယဟိဝၤယွၤ ဒီသဒၢအီၤလီၤ.—၁ စီၤပၤ ၁၃:၁-၁၀.
၂ ယဟိဝၤယွၤမၤလိာ်ဝဲ ဝံအံၤလၢတဘၣ်အီၣ်တၢ်အီတၢ်လၢ ယရူၤၡလ့ၣ်အပူၤဘၣ်. ဒီးအဝဲကဘၣ်ဟဲက့ၤဆူအဟံၣ် လၢကျဲလၢအဂၤတဘိလီၤ. ဖဲဝံအံၤက့ၤလၢကျဲအခါ ထံၣ်ဝဲပှၤသးပှၢ်တဂၤဒီး ပှၤသးပှၢ်တဂၤအံၤ ကွဲန့ၢ်လွဲန့ၢ်အီၤဒီး စံးဝဲလၢယဟိဝၤယွၤ မၢယဟဲတဲနၤတၢ်တမံၤလီၤ. ဒီးအဝဲကွဲဝဲဝံအံၤလၢ ကလဲၤအီၣ်လဲၤအီတၢ် ဒီးအီၤလၢအဟံၣ်န့ၣ်လီၤ. ဝံအံၤတဒိကနၣ် ယဟိဝၤယွၤအကလုၢ်ဘၣ် ဒီးပိာ်ထီၣ်ဝဲ ပှၤသးပှၢ်တဂၤအံၤအခံလီၤ. အဝဲမၤဝဲဒ်အံၤန့ၣ် တဘၣ်ယဟိဝၤယွၤအသးဘၣ်. ဖဲအဝဲက့ၤလၢကျဲအခါ ခ့ယုၢ်အ့ၣ်သံကွံာ်အီၤလီၤ.—၁ စီၤပၤ ၁၃:၁၁-၂၄.
၃ ဘၣ်မနုၤအဃိ ဝံအံၤတဒိကနၣ်ယဟိဝၤယွၤ အကလုၢ်ဘၣ်ဒီးဒိကနၣ်ဝဲ ပှၤသးပှၢ်တဂၤအံၤ အကလုၢ်လဲၣ်န့ၣ် ပတသ့ၣ်ညါဘၣ်. ဘၣ်ဆၣ်ပသ့ၣ်ညါလၢ အဝဲတဆဲး လဲၤတၢ်ဒီးယဟိဝၤယွၤလၢ “တၢ်သးစူၤအပူၤဘၣ်.” (ဖး မံကၤ ၆:၈ တက့ၢ်.) လၢလံာ်စီဆှံအပူၤ တၢ်လဲၤတၢ်ဒီးယဟိဝၤယွၤန့ၣ် ပၣ်ဃုာ်ဒီးတၢ်နာ်န့ၢ် ယဟိဝၤယွၤ, တၢ်သန့ၤသးလၢအတၢ်ဟံးစုနဲၣ်ကျဲ ဒီးတၢ်ဒိကနၣ်အကလုၢ်လီၤ. ပှၤလၢအိၣ်ဒီးတၢ်ဆီၣ်လီၤသး တဂၤန့ၣ်အဝဲသ့ၣ်ညါဝဲလၢ အကဘၣ်ဃ့ဘါထုကဖၣ်ထီဘိလီၤ. ဝံတဂၤအံၤမ့ၢ်အိၣ်ဒီး တၢ်ဆီၣ်လီၤသးန့ၣ် အဝဲကသံကွၢ်ယဟိဝၤယွၤလၢ မ့ၢ်အဆီတလဲအတၢ်ဟံးစုနဲၣ်ကျဲဧါ. တဘျီတခီၣ် ပဝဲစ့ၢ်ကီး ပကဘၣ်မၤတၢ်ဆၢတဲာ်လၢ အကီဒိၣ်မးန့ၣ်လီၤ. ဒီးယဟိဝၤယွၤအဲၣ်ဒိးလၢ ပမၤတၢ်မနုၤလဲၣ်န့ၣ် ဘၣ်သ့ၣ်သ့ၣ် ပတသ့ၣ်ညါလီၤတံၢ်လီၤဆဲးဘၣ်. ဘၣ်ဆၣ် ပမ့မ့ၢ်ပှၤလၢအိၣ်ဒီး တၢ်ဆီၣ်လီၤသးန့ၣ် ပကဃ့တၢ်မၤစၢၤလၢ ယဟိဝၤယွၤအအိၣ်ဒ်သိး ပသုတမၤဘၣ်တၢ်ကမၣ် ဒိၣ်ဒိၣ်မုၢ်မုၢ်တဂ့ၤန့ၣ်လီၤ.
၄. လၢတၢ်မၤလိအံၤအပူၤ ပကမၤလိဘၣ်တၢ်ဂ့ၢ် မနုၤလဲၣ်.
၄ တၢ်မၤလိလၢ အပူၤကွံာ်တခါန့ၣ် ပမၤလိဘၣ်လၢ တၢ်ဆီၣ်လီၤသး မ့ၢ်မနုၤလဲၣ်. ဒီး ဘၣ်မနုၤအဃိ အရ့ဒိၣ်လၢပဂီၢ်လဲၣ်န့ၣ်လီၤ. ဘၣ်ဆၣ် ပမၤအါထီၣ် ပတၢ်ဆီၣ်လီၤသးကသ့ဒ်လဲၣ်. ပတၢ်ဆီၣ်လီၤသးအိၣ်ဧါ တအိၣ်ဧါန့ၣ် တၢ်အိၣ်သးမနုၤကပာ်ဖျါထီၣ်ဝဲဒ်လဲၣ်. ပကတဲသကိးတၢ်အိၣ်သး သၢခါအဂ့ၢ်လီၤ.—ကတိၤဒိ ၁၁:၂.
ဖဲပတၢ်အိၣ်သးဆီတလဲအခါ
၅, ၆. စီၤဘၢ်စံးလဲ ပာ်ဖျါထီၣ်ဝဲလၢ အအိၣ်ဒီးတၢ်ဆီၣ်လီၤသးဒ်လဲၣ်.
၅ ဖဲပတၢ်အိၣ်သး မ့တမ့ၢ် ပမူဒါဆီတလဲအခါ ပတၢ်ဆီၣ်လီၤသးအိၣ်ဧါတအိၣ်ဧါန့ၣ် ကဖျါထီၣ်ဝဲလီၤ. ပမၤလိန့ၢ်တၢ်လၢ စီၤပၤဒၤဝံးအတံၤသကိးလၢ အအိၣ်ဒီးတၢ်သးတီ စီၤဘၢ်စံးလဲ အအိၣ်သ့ဝဲလီၤ. ဖဲစီၤဘၢ်စံးလဲ အသးအိၣ် ၈၀ အခါစီၤဒၤဝံးကွဲမုာ်အီၤလၢ ကလဲၤအိၣ်ဒီးအီၤလၢအနီပူၤလီၤ. တၢ်အံၤမ့ၢ်ဝဲတၢ်ခွဲးတၢ်ယာ်ဖးဒိၣ် သနာ်က့စီၤဘၢ်စံးလဲ တဲဝဲလၢတၢ်ခွဲးတၢ်ယာ်အံၤ မ့ၢ်ဟ့ၣ်လီၤ စီၤကံမဟၣ်န့ၣ် ကဂ့ၤဝဲလီၤ. ဘၣ်သ့ၣ်သ့ၣ် စီၤကံမဟၣ်န့ၣ် ကမ့ၢ်စီၤဘၢ်စံးလဲအဖိခွါလီၤ.—၂ ၡမူၤအ့လး ၁၉:၃၁-၃၇.
၆ ဘၣ်မနုၤအဃိ စီၤဘၢ်စံးလဲတတူၢ်လိာ်ဝဲ တၢ်ခွဲးတၢ်ယာ်အံၤလဲၣ်. မ့ၢ်လၢအဝဲ တအဲၣ်ဒိးဟံးန့ၢ်မူဒါအံၤဘၣ် ဒီးအဲၣ်ဒိးအိၣ်ဝဲဘီၣ်ဘီၣ်ညီညီ အဃိဧါ. တမ့ၢ်ဘၣ်, မ့ၢ်လၢအဝဲအိၣ်ဒီး တၢ်ဆီၣ်လီၤသးအဃိလီၤ. အဝဲသ့ၣ်ညါဝဲလၢ အတၢ်အိၣ်သးဆီတလဲဒီး အဝဲမၤတၢ်တကဲဒ်လၢညါအသိးလၢၤဘၣ်. (ဖး ကလၤတံ ၆:၄, ၅ တက့ၢ်.) ပဝဲစ့ၢ်ကီး ပဘၣ်အိၣ်ဒီးတၢ်ဆီၣ်လီၤသး ဒ်စီၤဘၢ်စံးလဲအသိးလီၤ. ပတအဲၣ်ဒိးမၤတၢ်ဖဲပသး မ့တမ့ၢ် ထိၣ်သတြီၤပသးဒီးပှၤဂၤဘၣ်. လၢတၢ်န့ၣ်အလီၢ် ပအဲၣ်ဒိးဟ့ၣ်ယဟိဝၤယွၤ တၢ်လၢအဂ့ၤကတၢၢ်လီၤ. ပဟ့ၣ်ယဟိဝၤယွၤ တၢ်လၢအဂ့ၤကတၢၢ်န့ၣ် ဂ့ၤဒိၣ်န့ၢ်ဒံးပဒိးန့ၢ်ဘၣ် မူဒါလၢအလီၤဆီ မ့တမ့ၢ် တၢ်မံၤဟူသၣ်ဖျါန့ၣ်လီၤ. (ကလၤတံ ၅:၂၆) ပမ့ၢ်အိၣ်ဒီးတၢ်ဆီၣ်လီၤသးန့ၣ် ပကမၤသကိးဃုာ်တၢ်ဒီး ပဒီပုၢ်ဝဲၢ်တဖၣ်ဒ်သိး ပကမၤလၤကပီၤယဟိဝၤယွၤ ဒီးမၤစၢၤပှၤဂၤအဂီၢ်လီၤ.—၁ ကရံၣ်သူး ၁၀:၃၁.
၇, ၈. ဒ်သိးပသုတသန့ၤပသးလၢ ပနီၢ်ကစၢ်အတၢ်လဲၤခီဖျိတဂ့ၤအဂီၢ် တၢ်ဆီၣ်လီၤသးန့ၣ် မၤစၢၤပှၤဒ်လဲၣ်.
၇ ပဒိးန့ၢ်ဘၣ်မူဒါမ့ၢ်အါ မ့တမ့ၢ် ပတၢ်စိတၢ်ကမီၤအိၣ်မ့ၢ်အါန့ၣ် ပကအိၣ်ဒီးတၢ်ဆီၣ်လီၤသးအဂီၢ် ကကီဝဲလီၤ. ပဟံးန့ၢ်တၢ်မၤလိလၢ စီၤနဃ့မယၤ အဒိအတဲာ်သ့ဝဲလီၤ. ဖဲစီၤနဃ့မယၤ နၢ်ဟူဝဲပှၤအိၣ်လၢ ဝ့ၢ်ယရူၤၡလ့ၣ်တဖၣ်အိၣ်ဒီး တၢ်ကီတၢ်ခဲအခါ အဝဲဃ့ကညးဝဲယဟိဝၤယွၤ ဒ်သိးကမၤစၢၤအဝဲသ့ၣ်လီၤ. (နဃ့မယၤ ၁:၄, ၁၁) ယဟိဝၤယွၤစံးဆၢက့ၤ စီၤနဃ့မယၤ အတၢ်ထုကဖၣ်လီၤ. စီၤပၤအၢ်တၤၡါၡတၤ မၢနဃ့မယၤတီခိၣ်ရိၤမဲ ပှၤဖဲန့ၣ်တဖၣ်လီၤ. စီၤနဃ့မယၤ မ့ၢ်ပှၤလၢအအိၣ်ဒီးအစိအကမီၤ ဒီးထူးဝဲတီၤဝဲဘၣ်ဆၣ် အဝဲတဒိးသန့ၤအသးလၢ အနီၢ်ကစၢ်တၢ်ကူၣ်တၢ်ဆးဘၣ်. အဝဲဃုဝဲယွၤအတၢ်ဟံးစုနဲၣ်ကျဲဒီး ဖးယွၤကလုၢ်ကထါထီဘိလီၤ. (နဃ့မယၤ ၈:၁, ၈, ၉) စီၤနဃ့မယၤ အစိအကမီၤဒိၣ်န့ၢ်ပှၤအဂၤတဖၣ် ဘၣ်ဆၣ်အဝဲတသူဝဲ အတၢ်စိတၢ်ကမီၤအံၤ လၢအနီၢ်ကစၢ်အဂီၢ် မ့တမ့ၢ် လၢကမၤနၢၤအီၣ်ဃီၣ်ပှၤဂၤအဂီၢ်ဘၣ်.—နဃ့မယၤ ၅:၁၄-၁၉.
၈ ဒ်နဃ့မယၤအသိး ပမ့ၢ်ဒိးန့ၢ်အါထီၣ်မူဒါ မ့တမ့ၢ် ပမူဒါမ့ၢ်ဆီတလဲအသးန့ၣ် ပကဘၣ်အိၣ်ဒီးတၢ်ဆီၣ်လီၤသးလီၤ. ပတအဲၣ်ဒိးပာ်ဂံၢ်ပာ်ဘါ ပနီၢ်ကစၢ်အတၢ်သ့တၢ်ဘၣ် မ့တမ့ၢ် ပတၢ်လဲၤခီဖျိဘၣ်. ပှၤတဂၤစးထီၣ်သန့ၤအသးလၢ အနီၢ်ကစၢ်အတၢ်သ့တၢ်ဘၣ် သ့လၢကျဲဒ်လဲၣ်. အဒိ တၢ်အိၣ်ဖှိၣ်သးပှၢ်တဂၤ မ့ၢ်စးထီၣ်သန့ၤအသးလၢ အနီၢ်ကစၢ်အတၢ်လဲၤခီဖျိန့ၣ် ဖဲအဝဲမၤတၢ်အိၣ်ဖှိၣ်တၢ်ဖံးတၢ်မၤအခါ အဝဲတဃ့ထုကဖၣ်တၢ်လၢညါဘၣ်. မ့တမ့ၢ် ဒီပုၢ်ဝဲၢ်တဂၤ မၤဝဲတၢ်ဆၢတဲာ်ဝံၤမး ကဃ့ဘါထုကဖၣ်တၢ်လၢ ယဟိဝၤယွၤအအိၣ်ဒ်သိးကဆိၣ်ဂ့ၤ အတၢ်ဆၢတဲာ်န့ၣ်လီၤ. ဘၣ်ဆၣ် ပှၤလၢအိၣ်ဒီးတၢ်ဆီၣ်လီၤသးန့ၣ် မ့ၢ်ဘၣ်ဖီၣ်ဝဲတၢ်ဂ့ၢ်တခါခါလၢ အမၤတ့ၢ်ဝဲဝံၤတဘျုးဘျီလံဘၣ်ဆၣ် ဖဲအဝဲကဘၣ်ဖီၣ်ဒံးဝဲတၢ်ဂ့ၢ်ဒ်အံၤအခါ တဒိးသန့ၤအသးလၢ အတၢ်လဲၤခီဖျိဘၣ်. ထီဘိန့ၣ်အဝဲသ့ၣ်ညါဝဲလၢ ကဘၣ်သန့ၤအသးလၢ ယဟိဝၤယွၤလီၤ. (ဖး ကတိၤဒိ ၃:၅, ၆ တက့ၢ်.) မုၢ်မဆါတနံၤအံၤ ပှၤအါဂၤန့ၣ် အဲၣ်လီၤဒၣ်ထဲအသး ဒီးအဲၣ်ဒိးအိၣ်လၢပှၤဂၤအဖီခိၣ်လီၤ. ဘၣ်ဆၣ် ယဟိဝၤယွၤ အခ့အပှၤတဖၣ် တမ့ၢ်ဒ်န့ၣ်ဘၣ်. ပအိၣ်ဒီးမူဒါအဃိ ပတဆိကမိၣ်လီၤပသးလၢ ပဂ့ၤန့ၢ်ဒံးပဟံၣ်ဖိဃီဖိ မ့တမ့ၢ် ပှၤလၢတၢ်အိၣ်ဖှိၣ်ပူၤတဖၣ်ဘၣ်. လၢတၢ်န့ၣ်အလီၢ် ပသ့ၣ်ညါလၢ လၢကစၢ်ယွၤအတၢ်ရဲၣ်တၢ်ကျဲၤအပူၤန့ၣ် ပမူဒါအိၣ်ဒ်လဲၣ် ဒီးပမၤသကိးဃုာ်တၢ်ဒီး ပဒီပုၢ်ဝဲၢ်တဖၣ်လီၤ.—၁ တံၤမသ့း ၃:၁၅.
ဖဲပှၤဂၤတဲဆါပှၤ မ့တမ့ၢ် ပတြၢၤပှၤအခါ
၉, ၁၀. ဖဲပှၤဂၤတဲဆါပှၤအခါ ပမ့ၢ်အိၣ်ဒီးတၢ်ဆီၣ်လီၤသးန့ၣ် ကမၤစၢၤပှၤဒ်လဲၣ်.
၉ ပှၤမ့ၢ်တဲဆါပှၤန့ၣ် ပသးဘၣ်ဒိဝဲလီၤ. တၢ်အံၤကဲထီၣ်အသးဒီး နီၢ်ဃးနၤလီၤ. နီၢ်ဃးနၤန့ၣ် အဝၤအဲၣ်အီၤဒိၣ်မးသနာ်က့ အတအိၣ်ဒီးတၢ်သးခုဘၣ်. မ့ၢ်လၢနီၢ်ပနံးနၤန့ၣ် ဒုၣ်ဒွဲအီၤထီဘိအဃိလီၤ. နီၢ်ဃးနၤန့ၣ် လီကီအဖိဘၣ်ဆၣ် အဝဲမ့ၢ်ပှၤတူာ်ဖိအဃိ အဖိအိၣ်တန့ၢ်ဘၣ်. ဘၣ်တနံၤနီၢ်ဃးနၤ သူၣ်အုးသးအုးဝဲဒိၣ်မးအဃိ အဝဲလဲၤဃ့ဘါထုကဖၣ်တၢ်လၢ ဒဲစီဆှံအပူၤလီၤ. ဖဲပှၤလုၢ်တၢ်အခိၣ်စီၤဧ့လံၤထံၣ်ဝဲ နီၢ်ဃးနၤဟီၣ်အခါ ပာ်ဒ့ၣ်ပာ်ကမၣ်အီၤလၢ အမူၤသံးလီၤ. ဘၣ်ဆၣ်နီၢ်ဃးနၤန့ၣ် တသးထီၣ်ဝဲပှၤလုၢ်တၢ်အခိၣ်စီၤဧ့လံၤဘၣ်. လၢတၢ်န့ၣ်အလီၢ် အဝဲစံးဆၢက့ၤအီၤလၢ တၢ်ပာ်ကဲအပူၤလီၤ. လၢခံနီၢ်ဃးနၤန့ၣ် ပာ်ဖျါထီၣ်ဝဲအတၢ်နာ် ဒီးအတၢ်အဲၣ်ယဟိဝၤယွၤလၢ အတၢ်ထုကဖၣ်အပူၤလီၤ.—၁ ၡမူၤအ့လး ၁:၅-၇, ၁၂-၁၆; ၂:၁-၁၀.
၁၀ တၢ်ဆီၣ်လီၤသးန့ၣ် မၤစၢၤပှၤဒ်သိးပ “မၤနၢၤတၢ်အၢလၢ တၢ်ဂ့ၤ” ကသ့အဂီၢ်လီၤ. (ရိမ့ၤ ၁၂:၂၁) ဟီၣ်ခိၣ်လၢမုၣ်ကီၤလံၢ်ပၢဝဲအံၤ ပှဲၤဝဲဒီးတၢ်အၢတၢ်သီတဖၣ်လီၤ. လၢတၢ်န့ၣ်အဃိ ဖဲပှၤဂၤမၤပှၤတတီတလိၤအခါ ပတကမၢကမၣ်ဘၣ်. ပှၤမ့ၢ်မၤသးဒိၣ်ထီၣ်ပှၤဒၣ်လဲာ် ပကဘၣ်ပၢၤပသးလီၤ. (စံးထီၣ်ပတြၢၤ ၃၇:၁) လီၤဆီဒၣ်တၢ် ဖဲဒီပုၢ်ဝဲၢ်တဂၤဂၤ မ့ၢ်မၤပှၤတတီတလိၤအခါ ပသးကဘၣ်ဒိနးမးလီၤ. တၢ်မ့ၢ်ကဲထီၣ်အသးဒီးပှၤဒ်အံၤန့ၣ် ပအဲၣ်ဒိးကွၢ်လိမၤဒိး ယ့ၣ်ၡူးအဒိအတဲာ်လီၤ. လံာ်စီဆှံစံးဝဲလၢ– ယ့ၣ်ၡူးန့ၣ် “ဘၣ်တၢ်ဒုၣ်ဒွဲၣ်, ဒီးတဒုၣ်ဒွဲၣ်ဆၢဘၣ်ဝဲဘၣ်.” လၢတၢ်န့ၣ်အလီၢ်အဝဲ “အးလီၤအသးလၢ ပှၤစံၣ်ညီၣ်တၢ်တီတဂၤအစုပူၤလီၤ.” (၁ ပ့းတရူး ၂:၂၃) ယ့ၣ်ၡူးန့ၣ်အိၣ်ဒီးတၢ်ဆီၣ်လီၤသး ဒီးအဝဲသ့ၣ်ညါဝဲလၢ ယဟိဝၤယွၤ ကမၤဘၣ်လိာ်က့ၤ တၢ်တတီတလိၤခဲလၢာ်လီၤ. (ရိမ့ၤ ၁၂:၁၉) ပဝဲစ့ၢ်ကိး ပအဲၣ်ဒိးအိၣ်ဒီးတၢ်ဆီၣ်လီၤသးဒီး ပတ “ဟ့ၣ်ကၣ်တၢ်အၢ” လၢတၢ်အၢဘၣ်.—၁ ပ့းတရူး ၃:၈, ၉.
၁၁, ၁၂. (က) ဖဲပှၤဂၤစံးပတြၢၤပှၤအခါ ပအိၣ်ဒီးတၢ်ဆီၣ်လီၤသးကသ့ဒ်လဲၣ် (ခ) ပအိၣ်ဒီး တၢ်ဆီၣ်လီၤသးန့ၣ် ပပာ်ဖျါထီၣ်လၢ ပတၢ်ကူတၢ်သိးဒီး ပတၢ်အိၣ်ထီၣ်အိၣ်လီၤသ့ဒ်လဲၣ်.
၁၁ ဖဲပှၤပတြၢၤပှၤ မ့တမ့ၢ် ပှၤပတြၢၤပှၤတလၢကွံာ်အခၢးအခါ ပတၢ်ဆီၣ်လီၤသးအိၣ်ဧါတအိၣ်ဧါန့ၣ် ကဖျါထီၣ်ဝဲလီၤ. နီၢ်အ့ၤစတၢ်န့ၣ် ဒိးန့ၢ်ဘၣ်တၢ်စံးပတြၢၤအါမးလီၤ. အဝဲမ့ၢ်ပိာ်မုၣ်လၢ အဃံလၤဒိၣ်ကတၢၢ်လၢ ကီၢ်ပၤရၣ်အပူၤလီၤ. ဒီးလၢတနံၣ်အတီၢ်ပူၤ ပှၤမၤဃံမၤလၤထီၣ်အီၤ ဃုာ်ဒီးပိာ်မုၣ်လၢအဂၤတဖၣ် ဒ်သိးကပြၢလိာ်အသးလၢ စီၤပၤအမဲာ်ညါအဂီၢ်န့ၣ်လီၤ. စီၤပၤန့ၣ်ဃုထၢဝဲ နီၢ်အ့ၤစတၢ်လၢ ကကဲထီၣ်အနီၢ်ပၤမုၣ်လီၤ. အဝဲကဲထီၣ်ဘၣ်နီၢ်ပၤမုၣ်ဘၣ်ဆၣ် အတၢ်ပာ်သူၣ်ပာ်သးတဆီတလဲဘၣ်. နီၢ်အ့ၤစတၢ်တပာ်ထီၣ်ထီအသးဘၣ် ဒီးအိၣ်ဒီးတၢ်ဆီၣ်လီၤသး, တၢ်အဲၣ်တၢ်ကွံဒီး တၢ်ယူးယီၣ်ပာ်ကဲလီၤ.—အ့ၤစတၢ် ၂:၉, ၁၂, ၁၅, ၁၇.
မ့ၢ်ပတၢ်ကူတၢ်သိး ပာ်ဖျါထီၣ်ဝဲလၢ ပပာ်ကဲယဟိဝၤယွၤ ဒီးပှၤဂၤစ့ၢ်ကီးဧါ, မ့တမ့ၢ် တပာ်ဖျါထီၣ်ဘၣ်ဧါ. (ကွၢ်လံာ်အဆၢ ၁၂)
၁၂ ပမ့ၢ်အိၣ်ဒီးတၢ်ဆီၣ်လီၤသးန့ၣ် ပကကူတၢ်သိးတၢ်ဒီး အိၣ်ထီၣ်အိၣ်လီၤလၢ အပာ်ဖျါထီၣ်တၢ်ယူးယီၣ်ပာ်ကဲပှၤဂၤဒီး ပနီၢ်ကစၢ်လီၤ. ပတကတိၤဒိၣ်လီၤပသး မ့တမ့ၢ် ပတမၤဒ်သိး ပှၤကဆိကမိၣ်ဒိၣ်ပှၤအဂီၢ်ဘၣ်. လၢတၢ်န့ၢ်အလီၢ် ပကဂုာ်ကျဲးစၢးဒ်သိး ပကအိၣ်ဒီး “တၢ်သူၣ်စူၤသးစူၤ” လီၤ. (ဖး ၁ ပ့းတရူး ၃:၃, ၄ တက့ၢ်, ယံးရမံယၤ ၉:၂၃, ၂၄) ပတၢ်စံးတၢ်ကတိၤဒီး တၢ်လၢပမၤတဖၣ်န့ၣ် ကပာ်ဖျါထီၣ်ဝဲ လၢပမ့ၢ်ပှၤဒ်လဲၣ်တဂၤလဲၣ်န့ၣ်လီၤ. အဒိ, ခီဖျိပအိၣ်ဒီးတၢ်ခွဲးတၢ်ယာ်လီၤဆီ, ပသ့ၣ်ညါတၢ်ဂ့ၢ်တၢ်ကျိၤတမံၤမံၤ မ့တမ့ၢ် ပသ့ၣ်ညါပှၤလၢ အတီခိၣ်ရိၤမဲတၢ်တဂၤဂၤအဃိ ဘၣ်သ့ၣ်သ့ၣ် ပကမၤဒ်သိးပှၤဂၤ ကဆိကမိၣ်ဒိၣ်ပှၤလီၤ. မ့တမ့ၢ် ပမၤသကိးတၢ်ဒီးပှၤဂၤဘၣ်ဆၣ် တၢ်ကဲထီၣ်လိၣ်ထီၣ် မ့ၢ်အိၣ်ထီၣ်န့ၣ် ပအဲၣ်ဒိးလၢပှၤကထံၣ်လၢ ပမၤထဲတဂၤလီၤ. ဘၣ်ဆၣ်ဆိကမိၣ်ကွၢ် ယ့ၣ်ၡူးအဂ့ၢ်တက့ၢ်. အဝဲမ့ၢ်သူဝဲတၢ်ကတိၤလၢ ပှၤဂၤကထံၣ်ဒိၣ်အီၤဒီး ပတြၢၤအီၤအဂီၢ်န့ၣ် အဝဲမၤဝဲသ့ဘၣ်ဆၣ် အဝဲတတဲတၢ်ဖဲအသးဘၣ်, အဝဲသူဝဲအယွၤအကလုၢ်ကထါလီၤ. ယ့ၣ်ၡူးတအဲၣ်ဒိးလၢ ပှၤကမၤလၤကပီၤအီၤဘၣ်. ထီဘိန့ၣ်အဝဲအဲၣ်ဒိးဝဲလၢ ပှၤကမၤလၤကပီၤယဟိဝၤယွၤလီၤ.— ယိၤဟၣ် ၈:၂၈.
ဖဲပမၤတၢ်ဆၢတဲာ်အခါ
၁၃, ၁၄. ဒ်သိးပမၤတၢ်ဆၢတဲာ်လၢ အဘၣ်ကသ့အဂီၢ် တၢ်ဆီၣ်လီၤသးကမၤစၢၤပှၤဒ်လဲၣ်.
၁၃ ဖဲပမၤတၢ်ဆၢတဲာ်အခါ မ့တမ့ၢ် ဖဲပှၤဂၤမၤတၢ်ဆၢတဲာ်လၢ အဘၣ်ဒိပှၤအခါ ပဘၣ်အိၣ်ဒီးတၢ်ဆီၣ်လီၤသးလီၤ. ဖဲတၢ်မၢဖိပီလူးအိၣ်လၢ ဝ့ၢ်ကဲၤစါရံၤအခါ အဝဲအဲၣ်ဒိးလဲၤလၢ ယရူၤၡလ့ၣ် ဒ်သိးကမၤဝံၤက့ၤ အတၢ်မၤလၢယဟိဝၤယွၤဟ့ၣ်လီၤအီၤန့ၣ်လီၤ. ဘၣ်ဆၣ် ဝံအကၤဘူးတဲစီၤပီလူးလၢ မ့ၢ်လဲၤဖဲန့ၣ်န့ၣ် ပှၤကဖီၣ်အီၤ တကးဒံးဘၣ် ဘၣ်သ့ၣ်သ့ၣ် ပှၤကမၤသံအီၤလီၤ. ဒီပုၢ်ဝဲၢ်တဖၣ် ဃ့ကညးဝဲစီၤပီလူးဒ်သိး အသုတလဲၤတဂ့ၤအဂီၢ်လီၤ. ဘၣ်ဆၣ် စီၤပီလူးဆၢတဲာ်ဝဲလၢ ကလဲၤဆူယရူၤၡလ့ၣ်လီၤ. အဝဲမၤဝဲဒ်အံၤန့ၣ် မ့ၢ်လၢနာ်န့ၢ်လီၤအသးအဃိဧါ. တမ့ၢ်ဘၣ်, စီၤပီလူးန့ၣ်အိၣ်ဒီး တၢ်ဆီၣ်လီၤသးဒီးနာ်ဝဲယဟိဝၤယွၤ လၢလၢပှဲၤပှဲၤလီၤ. ဒီပုၢ်ဝဲၢ်တဖၣ်စ့ၢ်ကီး အိၣ်ဒီးတၢ်ဆီၣ်လီၤသးလီၤ. အဝဲသ့ၣ်တူၢ်လိာ်ဝဲ စီၤပီလူးအတၢ်ဆၢတဲာ်ဒီး ပျဲလဲၤဝဲလီၤ.—မၤတၢ် ၂၁:၁၀-၁၄.
၁၄ တၢ်ကကဲထီၣ်အသးဒီး ပှၤဒ်လဲၣ်န့ၣ် ပမ့ၢ်တသ့ၣ်ညါသနာ်က့ ပမ့ၢ်အိၣ်ဒီးတၢ်ဆီၣ်လီၤသးန့ၣ် ကမၤစၢၤပှၤဒ်သိးပကမၤ တၢ်ဆၢတဲာ်လၢအဘၣ်လီၤ. အဒိ ပကဆိကမိၣ်ထီၣ်လၢ ပကမၤကစၢ်ယွၤအတၢ်မၤလၢ ဆၢကတီၢ်လၢပှဲၤလီၤ. ဘၣ်ဆၣ် လၢခံပတၢ်အိၣ်ဆူၣ်အိၣ်ချ့ မ့ၢ်နးထီၣ်န့ၣ် တၢ်ကကဲထီၣ်အသးဒ်လဲၣ်. ပမိၢ်ပပၢ် အတၢ်အိၣ်ဆူၣ်အိၣ်ချ့ မ့ၢ်နးထီၣ် မ့တမ့ၢ် အဝဲသ့ၣ်မ့ၢ်လိၣ်ဘၣ် ပတၢ်မၤစၢၤန့ၣ် ပကမၤဒ်လဲၣ်. ဖဲပသးပှၢ်ထီၣ်အခါန့ၣ် ပကမၤဒ်လဲၣ်. ပမ့ၢ်ဃ့ဘါထုကဖၣ်ဒီး ဆိကမိၣ်ထံ တၢ်ဂ့ၢ်တဖၣ်အံၤဒၣ်လဲာ် ပတသ့ၣ်ညါတၢ်သံကွၢ်တဖၣ်အံၤ အတၢ်စံးဆၢခဲလၢာ်ဘၣ်. (စံၣ်တဲၤတဲလီၤတၢ် ၈:၁၆, ၁၇) ဘၣ်ဆၣ် ပမ့ၢ်နာ်န့ၢ်ယဟိဝၤယွၤန့ၣ် ပကနၢ်ပၢၢ်လၢ ပမၤတၢ်တသ့ခဲလၢာ်ဘၣ်. ပကဆိကမိၣ်ထံ ပတၢ်အိၣ်သး, ဃ့တၢ်ဟ့ၣ်ကူၣ်ဒီး လီၤဆီဒၣ်တၢ် ပကဃ့တၢ်ဟံးစုနဲၣ်ကျဲလၢ ယဟိဝၤယွၤအအိၣ်လီၤ. ဝံၤဒီးပကြၢးမၤပိာ်ထွဲဒ် ယဟိဝၤယွၤအသးစီဆှံ တၢ်ဟံးစုနဲၣ်ကျဲအသိးလီၤ. (ဖး စံၣ်တဲၤတဲလီၤတၢ် ၁၁:၄-၆ တက့ၢ်.) ယဟိဝၤယွၤကဆိၣ်ဂ့ၤ ပတၢ်ဆၢတဲာ် မ့တမ့ၢ် ဆီတလဲပတၢ်ရဲၣ်တၢ်ကျဲၤသ့ဝဲလီၤ.—ကတိၤဒိ ၁၆:၃, ၉.
ပမၤအါထီၣ် တၢ်ဆီၣ်လီၤသးကသ့ဒ်လဲၣ်
၁၅. ပမ့ၢ်ဆိကမိၣ်ထံ ယဟိဝၤယွၤအဂ့ၢ်န့ၣ် ကမၤစၢၤပှၤလၢပကအိၣ်ဒီး တၢ်ဆီၣ်လီၤသးဒ်လဲၣ်.
၁၅ ပမၤအါထီၣ် တၢ်ဆီၣ်လီၤသး သ့ဒ်လဲၣ်. ပကတဲသကိး ကျဲလွံၢ်ဘိလီၤ. အဆိကတၢၢ်န့ၣ် ပကဘၣ်ဆိကမိၣ်ထံ ယဟိဝၤယွၤအဂ့ၢ် ဒီးအဝဲမ့ၢ် ယွၤဒ်လဲၣ်တဂၤလဲၣ်န့ၣ်လီၤ. ဖဲပထိၣ်သတြီၤပသးဒီး ယဟိဝၤယွၤအခါ ပသ့ၣ်ညါလီၤပသးလၢ ပတမ့ၢ်တၢ်နီတမံၤဘၣ်ဒီး ပတသ့ၣ်ညါတၢ်နီတမံၤဘၣ်န့ၣ်လီၤ. (ယၡါယၤ ၈:၁၃) တမ့ၢ်ပလဲၤတၢ်ဒီး ပှၤဟီၣ်ခိၣ်ဖိ မ့တမ့ၢ် မူခိၣ်ကလူးဘၣ်. သ့ၣ်နီၣ်ထီၣ်လၢပမၤ သ့တၢ်လၢာ်ကစၢ်အတၢ်မၤလီၤ. ပမ့ၢ်ဆိကမိၣ်ထံ တၢ်ဂ့ၢ်သ့ၣ်တဖၣ်အံၤန့ၣ် ကမၤစၢၤပှၤဒ်သိး ပကအိၣ်ဒီးတၢ်ဆီၣ်လီၤသးလၢ “ယွၤအစုကညီၢ်အဖီလာ်” လီၤ.—၁ ပ့းတရူး ၅:၆.
၁၆. ဒ်သိးပကအိၣ်ဒီးတၢ်ဆီၣ်လီၤသးအဂီၢ် ပမ့ၢ်ဆိကမိၣ်ထံယဟိဝၤယွၤ အဲၣ်ပှၤထဲလဲၣ်အဂ့ၢ်န့ၣ် ကမၤစၢၤပှၤဒ်လဲၣ်.
၁၆ ကျဲခံဘိတဘိလၢ ပကမၤအါထီၣ်ပတၢ်ဆီၣ်လီၤသးန့ၣ် မ့ၢ်ဝဲတၢ်ဆိကမိၣ်ထံ ယဟိဝၤယွၤ အဲၣ်ပှၤဒိၣ်ထဲလဲၣ်အဂ့ၢ်န့ၣ်လီၤ. စီၤပီလူးထိၣ်သတြီၤဝဲ တၢ်အိၣ်ဖှိၣ်ဒီး ပှၤနီၢ်ခိက့ၢ်ဂီၤလီၤ. ယဟိဝၤယွၤတ့လီၤဝဲ နီၢ်ခိက့ၢ်ဂီၤတခါစုာ်စုာ်န့ၣ် အဘျုးအဖှိၣ်အိၣ်ဝဲလၢ အသနၢၣ်ဒၣ်ဝဲလီၤ. (၁ ကရံၣ်သူး ၁၂:၂၃, ၂၄) ပဝဲတဂၤစုာ်စုာ် ပမ့ၢ်ပှၤလၢအလုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ. အဝဲတထိၣ်သတြီၤပှၤဒီး ပှၤအဂၤဘၣ် ဒီးပမ့ၢ်မၤဘၣ်တၢ်ကမၣ်ဘၣ်ဆၣ် အဝဲတပာ်တ့ၢ်ကွံာ်ပှၤဘၣ်. ပသ့ၣ်ညါလၢ ယဟိဝၤယွၤအဲၣ်ပှၤအဃိ ပတဘၣ်ယိၣ်ဘၣ်ဘှီတၢ်ဘၣ်.
၁၇. ပမ့ၢ်ကွၢ်လၢ ပှၤဂၤအတၢ်ဂ့ၤန့ၣ် ပကဒိးန့ၢ်ဘၣ်အဘျုးဒ်လဲၣ်.
၁၇ ကျဲသၢဘိတဘိန့ၣ် ဒ်သိးပတၢ်ဆီၣ်လီၤသးကအါထီၣ်အဂီၢ် ပကဘၣ်ကွၢ်လၢ ပှၤဂၤအတၢ်ဂ့ၤ ဒ်ယဟိဝၤယွၤအသိးန့ၣ်လီၤ. ပကအဲၣ်ဒိးလၢပှၤပာ်ဒိၣ်ပှၤ မ့တမ့ၢ် ပကလီာ်သရၣ်ပသးလၢ ပှၤဂၤအဖီခိၣ်အလီၢ် ပကဃ့တၢ်ဟ့ၣ်ကူၣ်လၢ ပှၤဂၤအအိၣ်ဒီးသးအိၣ်တူၢ်လိာ် အဝဲသ့ၣ်အတၢ်ဟ့ၣ်ကူၣ်လီၤ. (ကတိၤဒိ ၁၃:၁၀) ဖဲပဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် ဒိးန့ၢ်ဘၣ်မူဒါအသီအခါ ပကသးခုစၢၤအဝဲသ့ၣ်လီၤ. ဒီးပစံးဘျုးဘၣ် ယဟိဝၤယွၤလၢ အဝဲဟ့ၣ်ပဝဲခဲလၢာ်တၢ်ခွဲးတၢ်ယာ်လၢ ပကမၤအတၢ်မၤအဃိလီၤ.—၁ ပ့းတရူး ၅:၉.
၁၈. ပမ့ၢ်သိၣ်လိ ပသးလၢအသ့ၣ်ညါတၢ်န့ၣ် ကမၤစၢၤပှၤဒ်သိး ပကအိၣ်ဒီးတၢ်ဆီၣ်လီၤသးဒ်လဲၣ်.
၁၈ ဒ်သိးပကအိၣ်ဒီး တၢ်ဆီၣ်လီၤသးအဂီၢ် ကျဲလွံၢ်ဘိတဘိန့ၣ် မ့ၢ်ဝဲဒၣ် ပကဘၣ်သူ လံာ်စီဆှံဒီး သိၣ်လိပသးလၢ အသ့ၣ်ညါဒၣ်တၢ်န့ၣ်လီၤ. လံာ်စီဆှံတၢ်သိၣ်တၢ်သီမိၢ်ပှၢ်တဖၣ်န့ၣ် သိၣ်လိပှၤဘၣ်ဃး ယဟိဝၤယွၤအတၢ်တူၢ်ဘၣ် ဒီးအတၢ်ဆိကမိၣ်လီၤ. ပမ့ၢ်မၤလိပသးဒ်သိး ပကအိၣ်ဒီးတၢ်ထံၣ်ဒ် ယဟိဝၤယွၤအသိးန့ၣ် ပမၤတၢ်ဆၢတဲာ်လၢအဘၣ် ယွၤအသးသ့ဝဲလီၤ. ပမ့ၢ်မၤလိလံာ်စီဆှံ, ဃ့ဘါထုကဖၣ်ဒီး အိၣ်မူပိာ်ထွဲဒ် တၢ်လၢပမၤလိဘၣ်တဖၣ်အသိးန့ၣ် ပသးလၢအသ့ၣ်ညါဒၣ်တၢ် ကမၤတၢ်ဂ့ၤဂ့ၤလီၤ. (၁ တံၤမသ့း ၁:၅) ဒီးပကပာ်ပှၤဂၤ အတၢ်လိၣ်ဘၣ်လၢညါလီၤ. ပမ့ၢ်မၤဒ်န့ၣ်န့ၣ် ယဟိဝၤယွၤအၢၣ်လီၤဝဲလၢ ‘ကမၤလၢထီၣ်ပှဲၤထီၣ်, ဂၢၢ်ထီၣ်ကျၢၤထီၣ်, ဆူၣ်ထီၣ်ချ့ထီၣ်ပှၤ’ တကးဒံးဘၣ် အဝဲကမၤစၢၤပှၤဒ်သိး ပကအိၣ်ဒီးတၢ်ဆီၣ်လီၤသးလီၤ.—၁ ပ့းတရူး ၅:၁၀.
၁၉. ဒ်သိးပကအိၣ်ဒီးတၢ်ဆီၣ်လီၤသး ထီဘိအဂီၢ် တၢ်မနုၤကမၤစၢၤပှၤလဲၣ်.
၁၉ လၢတၢ်မၤလိအခီၣ်ထံးန့ၣ် ပတဲသကိး ဝံလၢအဟဲလၢ ကီၢ်ယူဒၤတဂၤအဂ့ၢ်န့ၣ် နနီၣ်ဘၣ်ဒံးဧါ. အဝဲတအိၣ်ဒီးတၢ်ဆီၣ်လီၤသး တုၤအကတၢၢ်အဃိ အသးသမူဒီး အတၢ်ရ့လိာ်သးဒီးယဟိဝၤယွၤ ဟးဂီၤကွံာ်ဝဲလီၤ. ဘၣ်ဆၣ် ဒ်သိးပကအိၣ်ဒီးတၢ်ဆီၣ်လီၤသးအဂီၢ် မ့ၢ်ကီဝဲလၢပဂီၢ်ဒၣ်လဲာ် ပဆဲးအိၣ်ဒီးတၢ်ဆီၣ်လီၤသးသ့ဝဲလီၤ. ယဟိဝၤယွၤအခ့အပှၤလၢ အသးတီအါဂၤအဒိအတဲာ်န့ၣ် ပာ်ဖျါထီၣ်န့ၢ်ပှၤလၢပအိၣ်ဒီးတၢ်ဆီၣ်လီၤသးသ့ဝဲလီၤ. ပမၤယဟိဝၤယွၤအတၢ်မၤ အနံၣ်ဒံးယံာ်ဒီး ပကြၢးသန့ၤပသးလၢအီၤ ဒံးအါထီၣ်လီၤ. (ကတိၤဒိ ၈:၁၃) ပတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ပလဲၤတၢ်ဒီး ယဟိဝၤယွၤသ့ထီဘိလီၤ. တၢ်အံၤမ့ၢ်ဝဲတၢ်ခွဲးတၢ်ယာ် အဒိၣ်ကတၢၢ်တခါလၢပဂီၢ်လီၤ. လၢတၢ်န့ၣ်အဃိ မ်ပဂုာ်ကျဲးစၢး အိၣ်ဒီးတၢ်ဆီၣ်လီၤသး ဒီးလဲၤတၢ်ဒီးယွၤထီဘိတက့ၢ်.
