တဘၣ်ဃုဆိ တၢ်လၢနအဲၣ်ဒိးတဂ့ၤ, မ့မ့ၢ် ဃုဆိယွၤအဘီအမုၢ်တက့ၢ်
“မ့မ့ၢ်ဃုယွၤအဘီအမုၢ်တက့ၢ်. ဒီးတၢ်ကပာ်ဖှိၣ်တၢ်တဖၣ်န့ၣ်ခဲလၢာ်ဒီးသုလီၤ.”—လူၤကၣ် ၁၂:၃၁.
၁. တၢ်လၢပလိၣ်ဘၣ်ဒီး ပအဲၣ်ဒိးန့ၣ် လီၤဆီလိာ်အသးဒ်လဲၣ်.
ဒ်သိး ပအိၣ်မူကသ့အဂီၢ် တၢ်လၢပလိၣ်ဘၣ်အိၣ်ဝဲတနီၤလီၤ. အဒိ ပလိၣ်ဘၣ်တၢ်အီၣ်တၢ်အီ, တၢ်ကူတၢ်သိးဒီး တၢ်အိၣ်တၢ်ဆိးအလီၢ်လီၤ. ဘၣ်ဆၣ် တၢ်လၢပသးလီတဖၣ်န့ၣ် ပယၢၤထီၣ်အီၤတလၢာ်ဘၣ်. ဒီးတၢ်လၢပှၤအါဂၤ သးလီဝဲကိးမံၤဒဲးန့ၣ် တမ့ၢ်တၢ်လၢအဝဲသ့ၣ်လိၣ်ဘၣ်ဝဲအနီၢ်ကီၢ်ဘၣ်.
၂. တၢ်လၢပှၤဟီၣ်ခိၣ်ဖိတဖၣ် သးလီဝဲန့ၣ် မ့ၢ်မနုၤလဲၣ်.
၂ ပှၤလၢအိၣ်လၢ ထံကီၢ်အထူးအတီၤ ဒီးပှၤလၢအိၣ်လၢထံကီၢ် အဖှီၣ်အယာ်အပူၤန့ၣ် အတၢ်သးလီ တဒ်သိးလိာ်အသးဘၣ်. ပှၤတနီၤန့ၣ် လီကီဝဲလီတဲစိ (phone), ဆဲးကဲာ်, မ့တမ့ၢ် ဟီၣ်ခိၣ်လီၢ်တက့ဖိလီၤ. မ့မ့ၢ် ပှၤအဂၤတနီၤန့ၣ် သးလီဝဲ တၢ်ကူတၢ်သိးလၢ အပှ့ၤဒိၣ်, ဟံၣ်ဖးဒိၣ် မ့တမ့ၢ် ကါလၢအပှ့ၤဒိၣ်န့ၣ်လီၤ. ပမ့ၢ်အိၣ်တၢ်လီၢ် ဖဲလဲၣ်ဂ့ၤဖဲလဲၣ်ဂ့ၤ, ပစ့မ့ၢ်အိၣ် ထဲလဲၣ်ဂ့ၤထဲလဲၣ်ဂ့ၤ ပလီကီအါထီၣ် တၢ်လၢပတလိၣ်ဘၣ် မ့တမ့ၢ် တၢ်လၢပပှ့ၤတန့ၢ်တဖၣ်သ့ဝဲလီၤ.
ဟီၣ်ခိၣ်အတၢ်သူၣ်လီသးကွံန့ၣ် မၤဘၣ်ဒိပှၤသ့
၃. ဟီၣ်ခိၣ်အတၢ်သူၣ်လီသးကွံန့ၣ် မ့ၢ်မနုၤလဲၣ်.
၃ ဟီၣ်ခိၣ်အတၢ်သူၣ်လီသးကွံန့ၣ် မ့ၢ်မနုၤလဲၣ်. ဟီၣ်ခိၣ်တၢ်သူၣ်လီသးကွံန့ၣ် မ့ၢ်ဝဲတၢ်ပာ်ဒိၣ် တၢ်ထူးတၢ်တီၤ အါန့ၢ်ဒံး တၢ်ပာ်ဒိၣ်တၢ်ရ့လိာ်သးဒီးယွၤန့ၣ်လီၤ. ပှၤလၢအိၣ်ဒီး ဟီၣ်ခိၣ်အတၢ်သူၣ်လီသးကွံတဖၣ်န့ၣ် တသူၣ်မံသးမံဒီး တၢ်လၢအိၣ်ဒီးအဝဲသ့ၣ်ဘၣ်. လၢတၢ်န့ၣ်အလီၢ် အဝဲသ့ၣ်ဆဲးဃုအါထီၣ်ဝဲ တၢ်ထူးတၢ်တီၤကွ့ၢ်ကွ့ၢ်လီၤ. ပှၤလၢအဖှီၣ် မ့တမ့ၢ် ပှၤလၢတပှ့ၤတၢ်လၢအပှ့ၤဒိၣ်ဒၣ်လဲာ် ကဲထီၣ်ပှၤလၢ အိၣ်ဒီး ဟီၣ်ခိၣ်အတၢ်သူၣ်လီသးကွံသ့ဝဲလီၤ. အဝဲသ့ၣ်မ့ၢ်အိၣ်ဒီး တၢ်သးကွံဒ်န့ၣ်န့ၣ် တပာ်လၢၤ ယွၤအဘီအမုၢ်လၢ နီၣ်ဂံၢ်တၢလၢၤဘၣ်.—ဧ့ၤဘြံၤ ၁၃:၅.
၄. မုၣ်ကီၤလံၢ်သူဝဲ “ပမဲာ်ချံအတၢ်သးကွံ” ဒ်လဲၣ်.
၄ မုၣ်ကီၤလံၢ်လီန့ၢ်ပှၤလၢ ပကျိၣ်စ့မ့ၢ်တအိၣ်အါအါဘၣ်န့ၣ် ပသးဖှံတသ့ဘၣ်. လၢတၢ်န့ၣ်အဃိ မုၣ်ကီၤလံၢ်သူဝဲ တၢ်အိၣ်လၢဟီၣ်ခိၣ်ဒီး “ပမဲာ်အတၢ်သကွံ” ဒ်သိးကကွဲန့ၢ်လွဲန့ၢ်ပှၤလီၤ. (၁ ယိၤဟၣ် ၂:၁၅-၁၇; ၁ မိၤၡ့ ၃:၆; ကတိၤဒိ ၂၇:၂၀) ပထံၣ်ဒီး ပနၢ်ဟူဘၣ် တၢ်ဘိးဘၣ်သ့ၣ်ညါ (advertisements) ဒ်သိးပကပှ့ၤတၢ်လၢအသီတဖၣ်အဂီၢ်လီၤ. မ့ၢ်နပှ့ၤဘၣ်တၢ်လၢ နထံၣ်ဒီးနကွၢ်အီၤဂ့ၤ မ့တမ့ၢ် ခီဖျိလၢပှၤကၠီၣ်ညၣ်ဝဲအဃိန့ၣ်ဧါ. နမ့ၢ်ပှ့ၤဘၣ်န့ၣ်, ဘၣ်သ့ၣ်သ့ၣ် လၢခံ နကတူၢ်ဘၣ်လၢ တၢ်လၢနပှ့ၤန့ၣ် နတလိၣ်ဘၣ်အီၤဘၣ်. ပမ့ၢ်ပှ့ၤတၢ်လၢ ပတလိၣ်ဘၣ်တဖၣ်န့ၣ် မ့ၢ်ဒၣ်ပမၤအါထီၣ်ပတၢ်မၤလီၤ. အဒိ တၢ်သ့ၣ်တဖၣ်အံၤန့ၣ် ကမၤတံာ်တာ်ပှၤဒီး ပဟ့ၣ်တၢ်ဆၢကတီၢ်လၢ တၢ်ဖးလံာ်စီဆှံ, တၢ်ကတဲာ်ကတီၤလၢ တၢ်အိၣ်ဖှိၣ်ရိဖှိၣ်အဂီၢ်, ဒီးတၢ်ဟးစံၣ်တဲၤတဲလီၤတၢ်အဂီၢ် တန့ၢ်လၢၤဘၣ်. သ့ၣ်နီၣ်ထီၣ်က့ၤ တၢ်မၢဖိယိၤဟၣ်အတၢ်ဟ့ၣ်ပလီၢ်လၢအမ့ၢ် “ဟီၣ်ခိၣ်, ဒီးဟီၣ်ခိၣ်အတၢ်သးကွံန့ၣ်ဒံကွံာ်ဝဲ” န့ၣ်တက့ၢ်.
၅. ပှၤလၢအထဲးဂံၢ်ထဲးဘါဒ်သိး ကမၤန့ၢ်ထဲတၢ်လၢအလီကီဝဲတဖၣ်န့ၣ် တၢ်ကကဲထီၣ်အသးဒီး အဝဲသ့ၣ်ဒ်လဲၣ်.
၅ မုၣ်ကီၤလံၢ် တအဲၣ်ဒိးဝဲလၢ ပကသူပဂံၢ်ပဘါလၢ ပကမၤယဟိဝၤယွၤ အတၢ်မၤအဂီၢ်ဘၣ်. အဝဲအဲၣ်ဒိးဝဲလၢ ပကဃုအါထီၣ် ကျိၣ်စ့ဒီးတၢ်ထူးတၢ်တီၤလီၤ. (မးသဲ ၆:၂၄) ပမ့ၢ်သးစၢၢ်ဆၢ တၢ်လၢပလီကီအါထီၣ်တဖၣ်န့ၣ် ပတၢ်အိၣ်မူ ကပှဲၤဒီးတၢ်ကီတၢ်ခဲလီၤ. ဒီးပကအိၣ်ဒီး တၢ်သူၣ်ကိၢ်သးဂီၤ ဒီးကျိၣ်စ့တၢ်ကီတၢ်ခဲလီၤ. တကးဒံးဘၣ် ပတၢ်နာ် ယဟိဝၤယွၤ ဒီးအဘီအမုၢ်န့ၣ် လီၤမၢ်ကွံာ်သ့ဝဲလီၤ. (၁ တံၤမသ့း ၆:၉, ၁၀; လီၣ်ဖျါ ၃:၁၇) ယ့ၣ်ၡူးတဲဝဲလၢ “တၢ်သးကွံအဂုၤအဂၤတဖၣ်” န့ၣ်မၤအသးဒ်သိး တၢ်ဆှုၣ်လၢ အဒိၣ်ဘၢတၢ်ချံဒ်သိး သုတမဲထီၣ်သၣ်ထီၣ်တဂ့ၤအဂီၢ်န့ၣ်လီၤ.—မၢ်ကူး ၄:၁၄, ၁၈, ၁၉.
၆. လၢစီၤဘၤရူးအအိၣ်န့ၣ် ပမၤလိန့ၢ်တၢ်မနုၤသ့လဲၣ်.
၆ ဆိကမိၣ်ကွၢ် စီၤယံးရမံယၤ အပှၤကွဲးလံာ်ဖိ စီၤဘၤရူးအဂ့ၢ်န့ၣ်တက့ၢ်. ဖဲစီၤဘၤရူး “ဃုတၢ်အဒိၣ်တဖၣ်” လၢအဂီၢ်အခါ ယဟိဝၤယွၤဒုးသ့ၣ်နီၣ်အီၤလၢ တယံာ်လၢၤဘၣ်န့ၣ် ဝ့ၢ်ယရူၤၡလ့ၣ်ကဘၣ်တၢ်မၤဟးဂီၤကွံာ်အီၤလီၤ. ဘၣ်ဆၣ် ကစၢ်ယွၤအၢၣ်လီၤ စီၤဘၤရူးလၢ ကမၤပူၤဖျဲးထဲအသးသမူလီၤ. (ယံးရမံယၤ ၄၅:၁-၅) လၢတၢ်န့ၣ်အဃိ စီၤဘၤရူး တကြၢးဃုတၢ်ထူးတၢ်တီၤဘၣ်. ယဟိဝၤယွၤ တမၤပူၤဖျဲးဝဲ ပှၤဟီၣ်ခိၣ်ဖိ အတၢ်ထူးတၢ်တီၤဘၣ်. (ယံးရမံယၤ ၂၀:၅) တယံာ်လၢၤဘၣ် ကစၢ်ယွၤ ကမၤဟးဂီၤကွံာ်ဝဲ ဟီၣ်ခိၣ်လၢမုၢ်ကီၤလံၢ်ပၢဝဲအံၤလီၤ. လၢတၢ်န့ၣ်အဃိ အခဲအံၤန့ၣ် ပတကြၢးဃုအါထီၣ် တၢ်ထူးတၢ်တီၤဘၣ်. ပတကြၢးမုၢ်လၢ်လၢ တၢ်နးတၢ်ဖှီၣ်ဖးဒိၣ်မ့ၢ်ဝံၤန့ၣ် ပတၢ်ဖိတၢ်လံၤ မ့တမ့ၢ် တၢ်လၢပပာ်လုၢ်ပာ်ပှ့ၤအီၤတဖၣ် ကအိၣ်ဒံးဒီးပှၤန့ၣ်ဘၣ်.—ကတိၤဒိ ၁၁:၄, မးသဲ၂၄:၂၁, ၂၂; လူၤကၣ် ၁၂:၁၅.
၇. ပကတဲသကိး တၢ်ဂ့ၢ်မနုၤလဲၣ်, ဒီးဘၣ်မနုၤအဃိလဲၣ်.
၇ မ့မ့ၢ်ဒ်န့ၣ်န့ၣ် ပလုၢ်အီၣ်လုၢ်အီ ပနီၢ်ကစၢ်ဒီး ပဟံၣ်ဖိဃီဖိ ဒီးတကတီၢ်ဃီန့ၣ် ပဃုဆိယွၤအဘီအမုၢ်ကသ့ဒ်လဲၣ်. ပဟးဆှဲး တၢ်အိၣ်ဒီး ဟီၣ်ခိၣ်အတၢ်သူၣ်လီသးကွံကသ့ဒ်လဲၣ်. ဒ်သိးပတၢ်ကိၢ်တၢ်ဂီၤ ဘၣ်ဃးပတၢ်လိၣ်ဘၣ်တဖၣ် ကစှၤလီၤအဂီၢ် တၢ်မနုၤမၤစၢၤပှၤကသ့လဲၣ်. ယ့ၣ်ၡူး အတၢ်စံၣ်တဲၤတဲလီၤတၢ်လၢ တၢ်လူၢ်ခိၣ်န့ၣ် မ့ၢ်တၢ်ဟ့ၣ်ကူၣ်အဂ့ၤကတၢၢ် လၢပဂီၢ်လီၤ. (မးသဲ ၆:၁၉-၂၁) ပကဖးဒီးသမံသမိးကွၢ်သကိး မးသဲ ၆:၂၅-၃၄ န့ၣ်လီၤ. လံာ်စီဆှံအဆၢတဖၣ်အံၤ ကမၤဂၢၢ်ကျၢၤထီၣ်ပတၢ်နာ် လၢပကဃုဆိယွၤအဘီအမုၢ်အဂီၢ်လီၤ.—လူၤကၣ် ၁၂:၃၁.
တၢ်လၢပလိၣ်ဘၣ်တဖၣ် ယဟိဝၤယွၤဟ့ၣ်လီၤပှၤ
၈, ၉. (က) ဘၣ်မနုၤအဃိ ပတဘၣ်သူၣ်ကိၢ်သးဂီၤ ဘၣ်ဃးဒီး တၢ်လၢပလိၣ်ဘၣ်တဖၣ်န့ၣ်လဲၣ်. (ခ) ဘၣ်ဃးဒီး ပှၤဟီၣ်ခိၣ်ဖိ ဒီးအဝဲသ့ၣ် အတၢ်လိၣ်ဘၣ်န့ၣ် ယ့ၣ်ၡူးသ့ၣ်ညါတၢ်မနုၤလဲၣ်.
၈ ဖး မးသဲ ၆:၂၅ တက့ၢ်. ယ့ၣ်ၡူးသ့ၣ်ညါဝဲလၢ အပျဲၢ်အဘီၣ်တဖၣ် သူၣ်ကိၢ်သးဂီၤတၢ်ဘၣ်ဃးဒီး အဝဲသ့ၣ်ကအီၣ်ဘၣ်ဒ်လဲၣ်, ကအီဘၣ်ဒ်လဲၣ်, ဒီးကကူဘၣ်သိးဘၣ်ဒ်လဲၣ်အဂ့ၢ်န့ၣ်လီၤ. လၢတၢ်န့ၣ်အဃိ ဖဲယ့ၣ်ၡူးစံၣ်တဲၤတဲလီၤတၢ်လၢ တၢ်လူၢ်ခိၣ်အခါန့ၣ် အဝဲတဲဘၣ်အပျဲၢ်အဘီၣ်တဖၣ်လၢ “သုတဘၣ်ယိၣ်လၢ သုသးသမူအဂီၢ်တဂ့ၤ.” ယ့ၣ်ၡူးအဲၣ်ဒိးမၤစၢၤအဝဲသ့ၣ် ဒ်သိး အသုတဘၣ်ယိၣ်ဘၣ်ဘှီ လၢတၢ်ဂ့ၢ်တဖၣ်အံၤအဃိတဂ့ၤလီၤ. ယ့ၣ်ၡူးသ့ၣ်ညါဝဲလၢ အဝဲသ့ၣ်မ့ၢ်ဘၣ်ယိၣ်တၢ် အါတလၢန့ၣ် ကသးပ့ၤနီၣ်ကွံာ် တၢ်လၢအရ့ဒိၣ်လၢအတၢ်အိၣ်မူအပူၤလီၤ. ခီဖျိလၢ ယ့ၣ်ၡူးအဲၣ်အပျဲၢ်အဘီၣ်အဃိ ဖဲအစံၣ်တဲၤတဲလီၤတၢ်လၢ တၢ်လူၢ်ခိၣ်အခါ ဟ့ၣ်ပလီၢ်အါထီၣ် အဝဲသ့ၣ် ဘၣ်ဃးဒီးတၢ်ဂ့ၢ်အံၤလွံၢ်ဘျီညါလီၤ.—မးသဲ ၆:၂၇, ၂၈, ၃၁, ၃၄.
၉ ဘၣ်မနုၤအဃိ ယ့ၣ်ၡူးတဲဘၣ်ပှၤလၢ တဘၣ်ဘၣ်ယိၣ်ဘၣ်ဘှီတၢ် ဘၣ်ဃးဒီး တၢ်လၢပကအီၣ်, ပကအီ, မ့တမ့ၢ် တၢ်လၢပကကူကသိးန့ၣ်လဲၣ်. မ့ၢ်ပတလိၣ်ဘၣ် တၢ်အီၣ်တၢ်အီဒီး တၢ်ကူတၢ်သိးဘၣ်ဧါ. ပလိၣ်ဘၣ်လီၤ. ဒီးပစ့မ့ၢ်တအိၣ် လၢပကပှ့ၤတၢ်သ့ၣ်တဖၣ်အံၤန့ၣ် ပသူၣ်ကိၢ်သးဂီၤသ့လီၤ. ယ့ၣ်ၡူးသ့ၣ်ညါ ပတၢ်လိၣ်ဘၣ်သ့ၣ်တဖၣ်အံၤဂ့ၤဂ့ၤလီၤ. ဒီးယ့ၣ်ၡူးသ့ၣ်ညါဝဲလၢ “မုၢ်နံၤအခံကတၢၢ်တဖၣ်အပူၤန့ၣ်” အပျဲၢ်အဘီၣ်တဖၣ် ကဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲလီၤ. (၂ တံၤမသ့း ၃:၁) မုၢ်မဆါတနံၤအံၤ ပှၤအါဂၤဃုတၢ်ဖံးတၢ်မၤတဘၣ်ဘၣ်. တကးဒံးဘၣ် တၢ်အပှ့ၤဒိၣ်ထီၣ်ရုၢ်ရုၢ်အဃိ ပှၤကလုၢ်အီၣ်လုၢ်အီ ဟံၣ်ဖိဃီဖိအဂီၢ်ကကီခဲဝဲလီၤ. လၢတၢ်လီၢ်အါတီၤန့ၣ် ပှၤဖှီၣ်ဝဲယာ်ဝဲဒိၣ်မး ဒီးအီၣ်ဘၣ်အီဘၣ် တလၢတလီၢ် မ့တမ့ၢ် တၢ်အီၣ်တအိၣ်နီတမံၤဘၣ်. ဘၣ်ဆၣ် ယ့ၣ်ၡူးသ့ၣ်ညါစ့ၢ်ကီးဝဲလၢ ပှၤအသးသမူန့ၣ် အရ့ဒိၣ်န့ၢ်ဒံး “တၢ်အီၣ်တၢ်အီ, ဒီးပနီၢ်ခိအံၤဂ့ၤန့ၢ်တၢ်ကူတၢ်သိး” လီၤ.
၁၀. ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ တၢ်လၢအရ့ဒိၣ်လၢ အဝဲသ့ၣ်ကဘၣ်ဃ့န့ၣ် မ့ၢ်မနုၤလဲၣ်.
၁၀ ယ့ၣ်ၡူးအိၣ်မူလၢ ဟီၣ်ခိၣ်ချၢအခါ သိၣ်လိဝဲအပျဲၢ်အဘီၣ်တဖၣ်လၢ အဝဲသ့ၣ်မ့ၢ်ဃ့ဘါထုကဖၣ်တၢ်န့ၣ် ကြၢးဃ့တၢ်ဆူ အပၢ်အိၣ်လၢမူခိၣ် ဒ်သိးကဟ့ၣ်လီၤ အဝဲသ့ၣ်အတၢ်လိၣ်ဘၣ်တဖၣ်န့ၣ်လီၤ. အဝဲသ့ၣ် ဃ့ဝဲသ့လၢ “ကိၣ်လၢတနံၤအဂီၢ် တနံၤအဂီၢ်န့ၣ်ဟ့ၣ်လီၤလၢ်ပှၤလၢ မုၢ်မဆါတနံၤအံၤတက့ၢ်.” (မးသဲ ၆:၁၁) အဂၤတဘျီန့ၣ် ယ့ၣ်ၡူးမၢအဝဲသ့ၣ် ဃ့တၢ်ဒ်အံၤ “ဟ့ၣ်ပှၤတနံၤဘၣ်တနံၤ အတၢ်အီၣ်လၢပလိၣ်ဘၣ်အီၤန့ၣ်တက့ၢ်.” (လူၤကၣ် ၁၁:၃, ခ့ခါစှီၤကျိာ်) ဘၣ်ဆၣ် ပတကြၢးသးစၢၢ်ဆၢထဲလၢ တၢ်လၢပလိၣ်ဘၣ်တဖၣ်န့ၣ်ဘၣ်. ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ တၢ်ဃ့ယွၤအဘီအမုၢ် ကဟဲန့ၣ် အရ့ဒိၣ်န့ၢ်ဒံး တၢ်ဃ့လၢနီၢ်ခိအတၢ်လိၣ်ဘၣ်အဂီၢ်လီၤ. (မးသဲ ၆:၁၀; လူၤကၣ် ၁၁:၂) ဒ်သိးအပျဲၢ်အဘီၣ်တဖၣ် သုတသူၣ်ကိၢ်သးဂီၤတၢ်တဂ့ၤအဂီၢ် ယ့ၣ်ၡူးဟ့ၣ်ဂံၢ်ဟ့ၣ်ဘါအဝဲသ့ၣ် ခီဖျိဒုးသ့ၣ်နီၣ်ထီၣ်က့ၤဝဲလၢ ယဟိဝၤယွၤသးအိၣ် အတၢ်ဘၣ်တ့ခဲလၢာ်လီၤ.
၁၁, ၁၂. ကျဲလၢယဟိဝၤယွၤကဟုကယာ် ထိၣ်ဖိလံၣ်ဖိတဖၣ်န့ၣ် ပမၤလိန့ၢ်တၢ်မၤလိမနုၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၁ ဖး မးသဲ ၆:၂၆ တက့ၢ်. ပကြၢး “ကွၢ်ထိၣ်ဖိလံၣ်ဖိလၢတၢ်ဖးဖီ” န့ၣ်လီၤ. ထိၣ်မ့ၢ်ဆၣ်ဖိကီၢ်ဖိလၢ အဆံးဘၣ်ဆၣ် အအီၣ်တၢ်လၢာ်အါမးလီၤ. ဆိကမိၣ်ကွၢ် ထိၣ်မ့ၢ်ဒိၣ်ထဲသိးဒီး ပှၤဟီၣ်ခိၣ်ဖိတဂၤန့ၣ် အကအီၣ်တၢ်အီၣ်လၢာ်အါန့ၢ်ဒံး ပဝဲသ့ၣ်တဖၣ်လီၤ. ထိၣ်တဖၣ်အီၣ်ဝဲ တၤသူတၤသၣ်, တၢ်ချံ, တၢ်ဖိဃၢ်ဒီး ထိးကလဲာ်လီၤ. ဘၣ်ဆၣ် ထိၣ်တဖၣ် တသူၣ်အီၣ်ဖျးအီၣ်တၢ်ဘၣ်. ယဟိဝၤယွၤလုၢ်အီၣ်လုၢ်အီအဝဲသ့ၣ်လီၤ. (စံးထီၣ်ပတြၢၤ ၁၄၇:၉) ဘၣ်ဆၣ် ယဟိဝၤယွၤတပာ်လီၤန့ၢ် ထိၣ်တဖၣ်အဆၣ်လၢအကိာ်ပူၤဘၣ်. လၢတၢ်န့ၣ်အလီၢ် ထိၣ်သ့ၣ်တဖၣ် ဘၣ်ဃုအီၣ်အဆၣ်ဒၣ်ဝဲလီၤ.
၁၂ ယ့ၣ်ၡူးသ့ၣ်ညါဝဲလၢ အပၢ်မ့ၢ်ကဟုကယာ် ထိၣ်ဖိလံၣ်ဖိတဖၣ်န့ၣ် ကကဟုကယာ်စ့ၢ်ကီး ပှၤဟီၣ်ခိၣ်ဖိလီၤ. [၁] (ကွၢ်တၢ်ဂ့ၢ်လၢ တၢ်မၤလိအကတၢၢ်တက့ၢ်.) (၁ ပ့းတရူး ၅:၆, ၇) ပကဘၣ်ခု ဒ်ထိၣ်ဖိလံၣ်ဖိအသိးလီၤ. ပကဘၣ်ဖံးဘၣ်မၤ ဒ်သိးပကအီၣ်ဘၣ်အီဘၣ်ဒီး ဒိးန့ၢ်ဘၣ်ကျိၣ်စ့အဂီၢ်လီၤ. ပမ့ၢ်ထဲးဂံၢ်ထဲးဘါဒ်န့ၣ်န့ၣ် ယဟိဝၤယွၤကဆိၣ်ဂ့ၤပှၤလီၤ. ဖဲပစ့ မ့တမ့ၢ် တၢ်အီၣ်တၢ်အီ မ့ၢ်တအိၣ်လၢလၢပှဲၤပှဲၤဘၣ်အခါ ကစၢ်ယွၤကဆဲးမၤလၢပှဲၤပတၢ်လိၣ်ဘၣ်လီၤ. အဒိ ဘၣ်သ့ၣ်သ့ၣ် ပှၤဂၤတနီၤ ကနီၤလီၤဟ့ၣ်ပှၤတၢ်လၢ အိၣ်ဒီးအဝဲသ့ၣ်တဖၣ်လီၤ. ယဟိဝၤယွၤကတဲာ်ကတီၢ်န့ၢ် ထိၣ်ဖိလံၣ်ဖိတဖၣ် ကအိၣ်တၢ်အလီၢ်စ့ၢ်ကီးလီၤ. ကစၢ်ယွၤဟ့ၣ်အဝဲသ့ၣ် တၢ်သ့ၣ်ညါလၢ ကတ့ထီၣ်အသွံ ဒီးဟ့ၣ်အီၤတၢ်ပီးတၢ်လီလၢ တ့အသွံကန့ၢ်အဂီၢ်လီၤ. ဒ်န့ၣ်အသိး ယဟိဝၤယွၤ ကမၤစၢၤပှၤ ဒ်သိးပကအိၣ်ဒီးဟံၣ်လၢ ပအိၣ်သ့အိၣ်ဘၣ်န့ၣ်လီၤ.
၁၃. ပလုၢ်ပပှ့ၤအိၣ်ဒိၣ်န့ၢ်ဒံး ထိၣ်ဖိလံၣ်ဖိတဖၣ်န့ၣ် တၢ်အုၣ်အသးမနုၤအိၣ်ဝဲလဲၣ်.
၁၃ ဖဲယ့ၣ်ၡူးဒုးသ့ၣ်နီၣ်ထီၣ်က့ၤ အပျဲၢ်အဘီၣ်ဘၣ်ဃးဒီး ယဟိဝၤယွၤလုၢ်အီၣ်လုၢ်အီ ထိၣ်ဖိလံၣ်ဖိဝံၤအလီၢ်ခံ ယ့ၣ်ၡူးသံကွၢ်အဝဲသ့ၣ်လၢ “သုဝဲဒၣ်အံၤသုဂ့ၤန့ၢ် အီၤဒိၣ်ဒၣ်တၢ်တက့ၢ်, တမ့ၢ်ဘၣ်ဧါ.” (ထိၣ်သတြီၤဒီး လူၤကၣ် ၁၂:၆, ၇) ဖဲယ့ၣ်ၡူးတဲဝဲဒ်န့ၣ်အခါ ကမ့ၢ် ယ့ၣ်ၡူးဆိကမိၣ်ထီၣ်ဝဲလၢ တယံာ်လၢၤဘၣ် အဝဲကဟ့ၣ်လီၤအသးသမူလၢ ပှၤဟီၣ်ခိၣ်ဖိခဲလၢာ်အဂီၢ်လီၤ. ယ့ၣ်ၡူးတသံလၢ ထိၣ်ဖိလံၣ်ဖိ မ့တမ့ၢ် ဆၣ်ဖိကီၢ်ဖိအဂီၢ်ဘၣ်. ယ့ၣ်ၡူးသံလၢပဂီၢ် ဒ်သိးပကအိၣ်မူဘၣ် လီၤထူလီၤယိာ်အဂီၢ်လီၤ.—မးသဲ ၂၀:၂၈.
၁၄. ပှၤလၢအသူၣ်ကိၢ်သးဂီၤတၢ်န့ၣ် မၤတၢ်မနုၤတသ့ဘၣ်လဲၣ်.
၁၄ ဖး မးသဲ ၆:၂၇ တက့ၢ်. ဖဲယ့ၣ်ၡူးစံးဝဲလၢ ပဘၣ်ယိၣ်ဘၣ်ဘှီတၢ်အဃိ ပထုးထီထီၣ်ပယုာ်တပျၢ်ဧိၤတန့ၢ်ဘၣ်အခါ အဝဲအဲၣ်ဒိးစံးဝဲ တၢ်မနုၤလဲၣ်. အဲၣ်ဒိးစံးဝဲလၢ ပသူၣ်ကိၢ်သးဂီၤတၢ်အဃိ ပမၤထီထီၣ်ပသးသမူတန့ၢ်ဘၣ်. ဆိကမိၣ်ကွၢ် ပမ့ၢ်သူၣ်ကိၢ်သးဂီၤတၢ်အါတလၢန့ၣ် ပကဆိးက့ တုၤဒၣ်လဲာ်ပသံသ့လီၤ.
၁၅, ၁၆. (က) ယဟိဝၤယွၤ မ့ၢ်ကဟုကယာ် ဖီဒ့ၣ်ညါလၢတၢ်ပျီပူၤန့ၣ် ပနာ်န့ၢ်သ့တၢ်မနုၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) ပဘၣ်သံကွၢ်လီၤပသးလၢ တၢ်သံကွၢ်မနုၤတဖၣ်လဲၣ်, ဒီးဘၣ်မနုၤအဃိလဲၣ်.
၁၅ ဖး မးသဲ ၆:၂၈-၃၀ တက့ၢ်. ပမ့ၢ်ကူဘၣ်သိးဘၣ်တၢ်ဂ့ၤဂ့ၤ လီၤဆီဒၣ်တၢ် ဖဲပလဲၤစံၣ်တဲၤတဲလီၤတၢ် ဒီးပလဲၤထီၣ်တၢ်အိၣ်ဖှိၣ်ရိဖှိၣ်တဖၣ်အခါ ပသးခုဒိၣ်မးလီၤ. ဘၣ်ဆၣ် မ့ၢ်ပကဘၣ် ‘ဘၣ်ယိၣ်တၢ်လၢ ပကူပသိးအဂီၢ်ဒံးဧါ.’ ယ့ၣ်ၡူးဒုးသ့ၣ်နီၣ်ထီၣ်ကဒီး အပျဲၢ်အဘီၣ်တဖၣ်လၢ ယဟိဝၤယွၤ အံၤက့ၤကွၢ်က့ၤ အတၢ်ဘၣ်တ့ခဲလၢာ်လီၤ. ယ့ၣ်ၡူးသူဝဲ တၢ်အဒိဘၣ်ဃးဒီး “ဖီဒ့ၣ်ညါ အိၣ်လၢတၢ်ပျီပူၤ”န့ၣ်လီၤ. ဘၣ်သ့ၣ်သ့ၣ် “ဖီဒ့ၣ်ညါ” န့ၣ်အဲၣ်ဒိးစံးဝဲ ဖီကျဲးဒံၢ်အိလး, ဖီပိာ်လီမ့ၣ်, ဖီအါရံး ဒီးဖီထူလ့ၣ်လီၤ. ဖီသ့ၣ်တဖၣ်အံၤ တဆးဆ့ကၤလၢ အနီၢ်ကစၢ်အဂီၢ်ဘၣ်. ဘၣ်ဆၣ် အဝဲသ့ၣ်ဃံလၤဒိၣ်မးအဃိ ယ့ၣ်ၡူးစံးဝဲလၢ “စီၤၡလိၤမိၤအိၣ်ဒီး အကဟုအကညီၢ်ခဲလၢာ်န့ၣ် တကူတသိးဘၣ်ဂ့ၤထဲသိးဒီး ဖီဒ့ၣ်ညါအံၤနီတဖိးဘၣ်.”
၁၆ ဆိကမိၣ်ကွၢ် တၢ်လၢယ့ၣ်ၡူးစံးဝဲန့ၣ်တက့ၢ်. “ယွၤမ့ၢ်ဒုးကူဒုးသိးနီၣ်ဧိၤမံၤဧိၤ လၢတၢ်ပျီပူၤထဲထဲန့ၣ်, . . . ကဒုးကူဒုးသိးသုအါန့ၢ်အန့ၣ်တက့ၢ်, တမ့ၢ်ဘၣ်ဧါ.” ဒ်န့ၣ်အသိး ကစၢ်ယွၤကဒုးကူဒုးသိးပှၤလီၤ. ဘၣ်ဆၣ်ယ့ၣ်ၡူးအပျဲၢ်အဘီၣ်တဖၣ် လိၣ်ဘၣ်အါထီၣ်တၢ်နာ်လီၤ. (မးသဲ ၈:၂၆; ၁၄:၃၁; ၁၆:၈; ၁၇:၂၀) အဝဲသ့ၣ်ကဘၣ်နာ်လၢ ယဟိဝၤယွၤ ကကဟုကယာ်ဒီးသးအိၣ်မၤစၢၤအဝဲသ့ၣ်လီၤ. မ့မ့ၢ်ပဝဲမီၣ် မ့ၢ်ပနာ်လၢ ယဟိဝၤယွၤကကဟုကယာ်ပှၤ စ့ၢ်ကီးဧါ.
၁၇. တၢ်လၢကမၤဘၣ်ဒိ ပတၢ်ရ့လိာ်သးဒီး ယဟိဝၤယွၤန့ၣ် မ့ၢ်မနုၤလဲၣ်.
၁၇ ဖး မးသဲ ၆:၃၁, ၃၂ တက့ၢ်. ပှၤလၢအတဘူၣ်ထီၣ်ဘါထီၣ် ယဟိဝၤယွၤန့ၣ် သးစၢၢ်ဆၢဝဲလၢ ကဖံးတၢ်မၤတၢ် ဒ်သိးကဃုအါထီၣ်စ့ ဒီးတၢ်ထူးတၢ်တီၤန့ၣ်လီၤ. ဘၣ်ဆၣ် ပမ့ၢ်မၤဒ်သိးအဝဲသ့ၣ်န့ၣ် ပတၢ်ရ့လိာ်သးဒီး ယဟိဝၤယွၤကဘဲၣ်ဒိဝဲလီၤ. ပသ့ၣ်ညါလၢ ယဟိဝၤယွၤမ့ၢ်ပပၢ်ဒီး အဲၣ်ပှၤဒိၣ်မးလီၤ. တကးဒံးဘၣ် ပမ့ၢ်မၤအတၢ်ဘၣ်သးဒီး ဃုဆိယွၤအဘီအမုၢ်န့ၣ် ပနာ်သ့လၢအဝဲကဟ့ၣ်ပှၤတၢ်လၢ ပလိၣ်ဘၣ်တဖၣ်န့ၣ်လီၤ. ခီဖျိလၢ ပတၢ်ရ့လိာ်သးဒီးယဟိဝၤယွၤ ဂ့ၤဝဲအဃိ ပဒိးန့ၢ်ဘၣ်တၢ်သးခုနီၢ်နီၢ်ဒီး ပကသးမံဒီး ‘တၢ်အီၣ်ဒီး တၢ်ကူတၢ်သိး’ လၢအအိၣ်ဒီးပှၤလီၤ.—၁ တံၤမသ့း ၆:၆-၈.
မ့ၢ်နဃုဆိယွၤအဘီအမုၢ်လၢ နတၢ်အိၣ်မူအပူၤဧါ
၁၈. ယဟိဝၤယွၤ သ့ၣ်ညါပဝဲဒၣ်တဂၤစုာ်စုာ် အတၢ်လိၣ်ဘၣ်ဒ်လဲၣ်, ဒီးကစၢ်ယွၤကမၤန့ၢ်ပှၤဒ်လဲၣ်.
၁၈ ဖး မးသဲ ၆:၃၃ တက့ၢ်. ပမ့ၢ်ဃုဆိယွၤအဘီအမုၢ်လၢ ပတၢ်အိၣ်မူအပူၤန့ၣ် ယဟိဝၤယွၤကဟ့ၣ်လီၤပှၤ တၢ်လၢပလိၣ်ဘၣ်ခဲလၢာ်လီၤ. ဘၣ်မနုၤအဃိ ပနာ်တၢ်အၢၣ်လီၤအံၤသ့လဲၣ်န့ၣ် ယ့ၣ်ၡူးတဲနၢ်ပၢၢ်ပှၤလီၤ. အဝဲစံးဝဲလၢ– “သုန့ၢ်ဘၣ်တၢ်ခဲလၢာ်အလီၢ်အိၣ်ဝဲန့ၣ် သုပၢ်အိၣ်လၢမူခိၣ်သ့ၣ်ညါဝဲလီၤ.” တၢ်လၢပလိၣ်ဘၣ်န့ၣ် ယဟိဝၤယွၤသ့ၣ်ညါဆိန့ၢ်ဒံးပှၤလီၤ. (ဖံလံးပံၤ ၄:၁၉) ပကလိၣ်ဘၣ်တၢ်ကူတၢ်ကၤဒ်လဲၣ်န့ၣ် ကစၢ်ယွၤသ့ၣ်ညါဝဲလီၤ. ဒီးပလိၣ်ဘၣ်တၢ်အီၣ်တၢ်အီ မနုၤလဲၣ်န့ၣ် ကစၢ်ယွၤသ့ၣ်ညါစ့ၢ်ကီးဝဲလီၤ. အဝဲသ့ၣ်ညါဝဲလၢ နၤဒီးနဟံၣ်ဖိဃီဖိလိၣ်ဘၣ်တၢ်လီၢ်လၢ သုကအိၣ်ကဆိးဝဲအဂီၢ်လီၤ. ကယဲၢ်တၢ်လၢနလိၣ်ဘၣ်ခဲလၢာ်န့ၣ် ယဟိဝၤယွၤကမၤစၢၤနၤလီၤ.
၁၉. တၢ်ကမၤအသးခါဆူညါအဂီၢ်န့ၣ် ဘၣ်မနုၤအဃိ ပတကြၢးဘၣ်ယိၣ်တၢ်လဲၣ်.
၁၉ ဖး မးသဲ ၆:၃၄ တက့ၢ်. ယ့ၣ်ၡူးတဲကဒီးအပျဲၢ်အဘီၣ်တဖၣ်လၢ– “ဘၣ်ယိၣ်တၢ်လၢခဲဂီၤအဂီၢ်တဂ့ၤ.” တၢ်လၢပလိၣ်ဘၣ် တနံၤအဂီၢ်တနံၤအဂီၢ်န့ၣ် ယဟိဝၤယွၤကဟ့ၣ်လီၤပှၤလီၤ. လၢတၢ်န့ၣ်အဃိ ခါဆူညါတၢ်ကမၤအသးဒ်လဲၣ်န့ၣ် ပဘၣ်ယိၣ်တၢ်ဒိၣ်ဒိၣ်အလီၢ်တအိၣ်ဘၣ်. ဖဲပကွၢ်ဆၢၣ်မဲာ်ဒီးတၢ်ကီတၢ်ခဲအခါ ပမ့ၢ်ဘၣ်ယိၣ်တၢ်အါတလၢန့ၣ် ပကဂုာ်ကျဲးစၢးဃုကျဲလၢ ပနီၢ်ကစၢ်ဒီးပတသန့ၤပသးဒီး ယဟိဝၤယွၤလၢၤဘၣ်အဃိ ပတၢ်ရ့လိာ်သးဒီးအီၤန့ၣ် ကဘၣ်ဒိဝဲလီၤ. လၢတၢ်န့ၣ်အဃိ ပကဘၣ်နာ်န့ၢ် ယဟိဝၤယွၤလၢလၢပှဲၤပှဲၤလီၤ.—ကတိၤဒိ ၃:၅, ၆; ဖံလံးပံၤ ၄:၆, ၇.
ဃုဆိယွၤအဘီအမုၢ် ဒီးယဟိဝၤယွၤကကွၢ်ထွဲနၤ
ဒ်သိးနကမၤအါထီၣ် ဘီမုၢ်အတၢ်မၤအဂီၢ် နပာ်နတၢ်အိၣ်မူယိယိဖိကသ့ဧါ (ကွၢ်လံာ်အဆၢ ၂၀)
၂၀. (က) ဒ်သိးနမၤအါထီၣ် ယဟိဝၤယွၤအတၢ်မၤကသ့အဂီၢ် နပာ်လီၤဖီတၢၣ်မနုၤသ့လဲၣ်. (ခ) ဒ်သိးနပာ်နတၢ်အိၣ်မူယိယိဖိကသ့အဂီၢ် နမၤတၢ်မနုၤသ့လဲၣ်.
၂၀ ခီဖျိလၢပဃုတၢ်ထူးတၢ်တီၤအဃိ ပကမၤကစၢ်ယွၤအတၢ်မၤအဂီၢ် ပဂံၢ်ပဘါမ့ၢ်တအိၣ်လၢၤဘၣ်န့ၣ် ကလီၤသးအုးထဲလဲၣ်. လၢတၢ်န့ၣ်လီၢ် ယဟိဝၤယွၤကြၢးဒိးန့ၢ်တၢ်လၢ အဂ့ၤကတၢၢ်လၢပအိၣ်လီၤ. အဒိ မ့ၢ်နသုးနလီၢ်နကျဲဆူ တၢ်အိၣ်ဖှိၣ်လၢအလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိန့ၣ် ကသ့ဧါ. မ့ၢ်နမၤပှၤလဲၤလၢညါအတၢ်မၤ ကသ့ဧါ. မ့တမ့ၢ် နမ့ၢ်တ့ၢ်ပှၤလဲၤလၢညါတဂၤလံအဃိ မ့ၢ်နဆိကမိၣ်လၢ နကတီၣ်ထီၣ် ပှၤစိာ်ဘီမုၢ်တၢ်သးခုကစီၣ်ဖိအကၠိဧါ. မ့ၢ်နသူတၢ်ဆၢကတီၢ် တနွံခံသီသၢသီလၢနကမၤစၢၤတၢ်လၢ ဘ့ၤသ့လး မ့တမ့ၢ် လၢတၢ်ကွဲးကျိာ်ထံအရူန့ၣ် ကသ့ဧါ. ဒီးမ့ၢ်နမၤစၢၤတၢ်လၢ တၢ်သူၣ်ထီၣ်ဘှီထီၣ်တၢ်မၤ ကသ့ဧါ. ဒ်သိးနဟ့ၣ်တၢ်ဆၢကတီၢ်, နတၢ်ဂံၢ်တၢ်ဘါလၢ ဘီမုၢ်အတၢ်မၤဒီး နပာ်က့ၤနတၢ်အိၣ်မူယိယိဖိကသ့အဂီၢ် ဆိကမိၣ်ထီၣ်တၢ်လၢ နကဘၣ်မၤန့ၣ်တက့ၢ်. တၢ်လွံၢ်နၢၣ်လၢ “ နပာ်နတၢ်အိၣ်မူယိယိဖိ ကသ့ဒ်လဲၣ်”န့ၣ် ပာ်ဖျါထီၣ်ဝဲ တၢ်ဟ့ၣ်ကူၣ်တနီၤလီၤ. အဆိကတၢၢ်န့ၣ် ဃ့ဘါထုကဖၣ်တၢ်ဆူ ယဟိဝၤယွၤအအိၣ်ဒ်သိး ကမၤစၢၤနၤလၢ နကမၤတၢ်ဆၢတဲာ်လၢအဘၣ်တက့ၢ်. ဒီးလၢခံ မၤတၢ်လၢနကဘၣ်မၤတဖၣ်န့ၣ်တက့ၢ်.
၂၁. ဒ်သိးနတၢ်ရ့လိာ်သးဒီး ယဟိဝၤယွၤကဂ့ၤထီၣ်အဂီၢ် တၢ်မနုၤကမၤစၢၤနၤလဲၣ်.
၂၁ ယ့ၣ်ၡူးသိၣ်လိပှၤလၢ ပကဘၣ်ဃုဆိယွၤအဘီအမုၢ်လီၤ. ဖဲပဃုဆိယွၤအဘီအမုၢ်အခါ ပဟးဆှဲးတၢ်ဘၣ်ယိၣ်ဘၣ်ဘှီဘၣ်ဃးဒီး တၢ်လၢပလိၣ်ဘၣ်တဖၣ်န့ၣ်လီၤ. ပတၢ်ရ့လိာ်သးဒီး ယဟိဝၤယွၤကဂ့ၤထီၣ်ဝဲ မ့ၢ်လၢပနာ်လၢ အဝဲကလုၢ်အီၣ်လုၢ်အီပှၤအဃိလီၤ. ပသ့ၣ်ညါလၢပကဘၣ်ပၢၤပသးဒီး ပပှ့ၤမ့ၢ်န့ၢ်ဒၣ်လဲာ် ပတပှ့ၤတၢ်လၢ ပသးလီအီၤကိးမံၤဒဲးဘၣ်. ခဲအံၤ ပမ့ၢ်ပာ်ပတၢ်အိၣ်မူယိယိဖိန့ၣ် ပကသးတီဒီးယဟိဝၤယွၤဒီးပ “ကဂုာ်ဟံးန့ၢ်တၢ်မူအထူအယိာ်” လၢအအၢၣ်လီၤပှၤန့ၣ်လီၤ.—၁ တံၤမသ့း ၆:၁၉.
^ [၁] (လံာ်အဆၢ ၁၂) တဘျီတခီၣ် ယဟိဝၤယွၤ အခ့အပှၤတနီၤ တအီၣ်ဘၣ်တၢ် လၢအီၣ်လၢအီဘၣ်. ဒ်သိးပကနၢ်ပၢၢ်လၢ ဘၣ်မနုၤအဃိ ကစၢ်ယွၤပျဲဝဲ တၢ်သ့ၣ်တဖၣ်အံၤလဲၣ်အဂီၢ် ကွၢ်လၢ “Questions From Readers” in the September 15 2014 issue of The Watchtower page 22 တက့ၢ်.
