ယဟိဝၤယွၤ အတၢ်စံၣ်ညီၣ်တီန့ၣ် မ့ၢ်နထံၣ်အီၤဒ်လဲၣ်
“ယဒုးဟူထီၣ်ယွၤအမံၤ . . . , မ့ၢ်တၢ်မ့ၢ်တၢ်တီအကစၢ်, ဒီးတၢ်အၢတအိၣ်လၢအီၤ, တၢ်တီဒီးတၢ်လိၤမ့ၢ်အဝဲဒၣ်လီၤ.”—၅ မိၤၡ့ ၃၂:၃, ၄.
၁, ၂. (က) စီၤနၤဘိးဒီးအဖိခွါတဖၣ် တူၢ်ဘၣ်ဝဲတၢ်စံၣ်ညီၣ်လၢ အတတီတလိၤဘၣ်ဒ်လဲၣ်. (ခ) တၢ်မၤလိအံၤအပူၤ ပကတဲသကိးတၢ်ဂ့ၤတၢ်ဝါ မနုၤခံခါလဲၣ်.
ပှၤအၢပှၤသီခံဂၤ ပာ်ဒ့ၣ်ပာ်ကမၣ် ပှၤတဂၤလၢအမၤတၢ်ကမၣ်ဖးဒိၣ်တခါလီၤ. ဘၣ်ဆၣ်ပှၤခံဂၤအံၤ အတၢ်ကတိၤန့ၣ် တမ့ၢ်တၢ်မ့ၢ်တၢ်တီဘၣ်. ပှၤတဂၤန့ၣ် ပှၤပာ်ဒ့ၣ်ပာ်ကမၣ်အီၤအဃိ ကဘၣ်တၢ်မၤသံအီၤလီၤ. ဆိကမိၣ်ကွၢ် ဖဲပှၤဒီဖိပၢ်တဖၣ်အံၤ ဘၣ်တၢ်ကွံာ်သံအီၤလၢလၢၢ်အခါ ပှၤလၢအအဲၣ်တၢ်စံၣ်ညီၣ်တီတဖၣ် ကတူၢ်ဘၣ်ဝဲဒ်လဲၣ်. တၢ်ကဲထီၣ်အသးတခါအံၤ တမ့ၢ်တၢ်တဲမုာ်နၢ်ဘၣ်. တၢ်ဂ့ၢ်အံၤကဲထီၣ်အသးဖဲ စီၤပၤအၤဃာ် ပၢဝဲအံၣ်စရ့လးထံကီၢ်အဆၢကတီၢ်လီၤ. ဒီးပှၤလၢအဘၣ် တၢ်မၤသံအီၤတဖၣ်န့ၣ် မ့ၢ်ဝဲစီၤနၤဘိးဒီးအဖိခွါတဖၣ်လီၤ. ဒီးအဝဲသ့ၣ်န့ၣ် မ့ၢ်ဝဲယဟိဝၤယွၤ အခ့အပှၤလၢအိၣ်ဒီးတၢ်သးတီလီၤ.—၁ စီၤပၤ ၂၁:၁၁-၁၃; ၂ စီၤပၤ ၉:၂၆.
၂ လၢတၢ်မၤလိအံၤအပူၤ ပကတဲသကိး ဘၣ်ဃးတၢ်လၢအကဲထီၣ်အသး ဒီးစီၤနၤဘိးန့ၣ်လီၤ. တကးဒံးဘၣ် ပကမၤလိစ့ၢ်ကီး လၢတၢယၤဖှိၣ်အစိၤန့ၣ် တၢ်အိၣ်ဖှိၣ်သးပှၢ်လၢ အမၤဘၣ်တၢ်ကမၣ် ဖးဒိၣ်တဂၤအဂ့ၢ်လီၤ. ယဟိဝၤယွၤန့ၣ် မ့ၢ်ယွၤလၢအစံၣ်ညီၣ်တၢ်တီတီလိၤလိၤလီၤ. လၢတၢ်န့ၣ်အဃိ တၢ်အဒိခံခါအံၤ ပာ်ဖျါထီၣ်ဝဲလၢ ဒ်သိးပကအိၣ်ဒီးတၢ်ထံၣ်ဒ် ယဟိဝၤယွၤအဂီၢ် ပလိၣ်ဘၣ် တၢ်ဆီၣ်လီၤသးဒီး တၢ်ပျၢ်ပှၤဂၤတတၢ်ကမၣ်န့ၣ်လီၤ.
တၢ်စံၣ်ညီၣ်လၢအတတီတလိၤ
၃, ၄. စီၤနၤဘိး မ့ၢ်ပှၤဒ်လဲၣ်တဂၤလဲၣ်. ဘၣ်မနုၤအဃိ အဝဲတဆါန့ၢ် စီၤပၤအၤဃာ်လၢ အစပံးကျိးလဲၣ်.
၃ စီၤနၤဘိး မ့ၢ်ပှၤလၢအတီဒီး ယဟိဝၤယွၤဘၣ်ဆၣ် ပှၤအံၣ်စရ့လးဖိအါဂၤန့ၣ် ပိာ်ဝဲစီၤပၤအၤဃာ်ဒီး နီၢ်ပၤမုၣ်အံၤစ့ဘ့ၤလးအခံလီၤ. ဒီးအဝဲသ့ၣ်ဘူၣ်ထီၣ်ဘါထီၣ်ဝဲ ယွၤလၢအမ့ၢ် ဘဧၤလးဒီးတပာ်ကဲ ယဟိဝၤယွၤဒီးအတၢ်သိၣ်တၢ်သီလၢၤဘၣ်. မ့မ့ၢ်စီၤနၤဘိးတခီ ပာ်လုၢ်ပာ်ပှ့ၤဝဲ အတၢ်ရ့လိာ်သးဒီး ယဟိဝၤယွၤ ဒိၣ်န့ၢ်ဒံးအသးသမူလီၤ.
၄ ဖး ၁ စီၤပၤ ၂၁:၁-၃ တက့ၢ်. ဖဲစီၤအၤဃာ် ဃ့ဆီတလဲ မ့တမ့ၢ် ဃ့ပှ့ၤဝဲ စီၤနၤဘိးအစပံးကျိးအခါ စီၤနၤဘိးတတူၢ်လိာ်ဝဲဘၣ်. ဘၣ်မနုၤအဃိလဲၣ်. လၢတၢ်ယူးယီၣ်ပာ်ကဲအပူၤ စီၤနၤဘိးတဲနၢ်ပၢၢ်အီၤလၢ– “ယွၤအသုတဒုးဟ့ၣ်ယၤလၢ ယပၢ်အတၢ်ဟ့ၣ်သါလၢနၤတဂ့ၤ.” စီၤနၤဘိးဂ့ၢ်လိာ်ကွံာ် စီၤအၤဃာ်န့ၣ် မ့ၢ်လၢယဟိဝၤယွၤ အတၢ်သိၣ်တၢ်သီအိၣ်လၢ ပှၤအံၣ်စရ့လးဖိတဖၣ် တဘၣ်ဆါကွံာ်အတၢ်န့ၢ်သါ ဆူပှၤဂၤအအိၣ် လီၤထူလီၤယိာ်ဘၣ်အဃိလီၤ. (၃ မိၤၡ့ ၂၅:၂၃; ၄ မိၤၡ့ ၃၆:၇) ဖဲအံၤပသ့ၣ်ညါဘၣ်လၢ စီၤနၤဘိးမ့ၢ်ပှၤလၢ အဒိကနၣ် ယဟိဝၤယွၤအကလုၢ်လီၤ.
၅. ဒ်သိးနီၢ်အံၤစ့ဘ့ၤလးကန့ၢ်ဘၣ် စီၤနၤဘိးအစပံးကျိးအဂီၢ် အဝဲမၤဝဲဒ်လဲၣ်.
၅ ဖဲစီၤနၤဘိး တဆါန့ၢ် စီၤပၤအၤဃာ်ဒီးအမါ လၢအစပံးကျိးအခါ အဝဲသ့ၣ်မၤအီၤဒ်လဲၣ်. နီၢ်အံၤစ့ဘ့ၤလးန့ၣ် ဒ်သိးအဝဲကန့ၢ်ဘၣ် စပံးကျိးအဂီၢ် မၢလီၤပှၤခံဂၤ လၢကပာ်ဒ့ၣ်ပာ်ကမၣ် စီၤနၤဘိးလီၤ. လၢတၢ်န့ၣ်အဃိ စီၤနၤဘိးဒီးအဖိခွါတဖၣ် ဘၣ်တၢ်မၤသံအီၤလီၤ. ဘၣ်ဃးဒီးအဝဲသ့ၣ်အတၢ်စံၣ်ညီၣ်လၢ အတတီတလိၤအံၤန့ၣ် ယဟိဝၤယွၤ ထံၣ်ဝဲဒ်လဲၣ်.
ယွၤအတၢ်စံၣ်ညီၣ်လၢ အတီအလိၤ
၆, ၇. ယဟိဝၤယွၤ အဲၣ်တၢ်စံၣ်ညီၣ်တီန့ၣ် ပသ့ၣ်ညါဘၣ်ဒ်လဲၣ်. ဒီးဘၣ်မနုၤအဃိ ကဲထီၣ်တၢ်သူၣ်မံသးမုာ်လၢ စီၤနၤဘိးအဟံၣ်ဖိဃီဖိဒီး အတံၤသကိးတဖၣ်အဂီၢ်လဲၣ်.
၆ တၢ်ကဲထီၣ်အသးဝံၤအလီၢ်ခံ ယဟိဝၤယွၤ မၢလီၤဝံအ့ၤလံယၤလၢ ကလဲၤဆူစီၤပၤအၤဃာ် အအိၣ်တဘျီဃီလီၤ. ဝံအ့ၤလံယၤတဲဘၣ် စီၤအၤဃာ်လၢ အဝဲမ့ၢ်ပှၤလၢအမၤသံတၢ် ဒီးဟုၣ်တၢ်လီၤ. ဘၣ်ဃးဒီးတၢ်ဂ့ၢ်အံၤန့ၣ် ယဟိဝၤယွၤ ကမၤဝဲဒ်လဲၣ်. စီၤအၤဃာ်, အမါ ဒီးအဖိခွါတဖၣ်န့ၣ် ကဘၣ်တၢ်မၤသံအီၤ ဒ်စီၤနၤဘိးဒီးအဖိခွါတဖၣ် ဘၣ်တၢ်မၤသံအီၤအသိးန့ၣ်လီၤ.—၁ စီၤပၤ ၂၁:၁၇-၂၅
၇ မ့ၢ်လၢစီၤအၤဃာ် မၤဝဲဒ်န့ၣ်အဃိ စီၤနၤဘိးအဟံၣ်ဖိဃီဖိ ဒီးအတံၤသကိးတဖၣ် အသးအုးဝဲဒိၣ်မးလီၤ. ဘၣ်ဆၣ် ဖဲယဟိဝၤယွၤ ထံၣ်ဝဲတၢ်စံၣ်ညီၣ် တတီတလိၤအံၤအခါ အဝဲဆှၢလီၤဝဲ အဝံတဘျီဃီလီၤ. လၢတၢ်န့ၣ်အဃိ စီၤနၤဘိးအဟံၣ်ဖိဃီဖိဒီး အတံၤသကိးတဖၣ် အသးကမုာ်ထီၣ်ဒိၣ်မးလီၤ. ဘၣ်ဆၣ် တၢ်ကမၤအသးလၢခံတခါန့ၣ် ကကဲထီၣ်တၢ်မၤကွၢ်လၢ အဝဲသ့ၣ်အတၢ်ဆီၣ်လီၤသး ဒီးအတၢ်နာ်လၢ ယဟိဝၤယွၤအဖီခိၣ်န့ၣ်လီၤ.
ဝံအ့ၤလံယၤ တဲဘၣ် စီၤအၤဃာ်လၢ အအိၣ်ဒီး တၢ်ဆီၣ်လီၤသးအဃိ ယဟိဝၤယွၤ တစံၣ်ညီၣ်အီၤဘၣ်
၈. ဖဲစီၤအၤဃာ် နၢ်ဟူဝဲလၢ ယဟိဝၤယွၤကစံၣ်ညီၣ်အီၤအခါ အဝဲမၤဝဲဒ်လဲၣ်. ဒီးတၢ်ကဲထီၣ်အသးဒီးအီၤဒ်လဲၣ်.
၈ ဖဲစီၤအၤဃာ် နၢ်ဟူဝဲလၢ ယွၤကစံၣ်ညီၣ်အီၤ အခါ အဝဲ “ဖှီဝဲအဆ့, ဒီးပာ်ထၢၣ်တၢ်ကံးညာ်လၢ အညၣ်လိၤ, ဒီးလဲၤဝဲကဒုကဒုလီၤ.” စီၤအၤဃာ် ပာ်ဖျါထီၣ်တၢ်ဆီၣ်လီၤသးလီၤ. အဝဲမၤဝဲဒ်န့ၣ်အဃိ တၢ်ကဲထီၣ်အသးဒီးအီၤဒ်လဲၣ်. ယဟိဝၤယွၤ ဆှၢလီၤကဒီးဝံအ့ၤလံယၤ ဒီးတဲဝဲလၢ– “မ့ၢ်အဆီၣ်လီၤသးလၢ ယမဲာ်ညါဒီး, ယတဒုးဟဲဘၣ်တၢ်အၢလၢ အမုၢ်နံၤတဖၣ်အပူၤဘၣ်. လၢအဖိခွါအမုၢ်နံၤတဖၣ်န့ၣ် ယကဒုးဟဲဘၣ်တၢ်အၢန့ၣ်လၢအဟံၣ်လီၤ.” (၁ စီၤပၤ ၂၁:၂၇-၂၉; ၂ စီၤပၤ ၁၀:၁၀, ၁၁, ၁၇) ယဟိဝၤယွၤ မ့ၢ်ယွၤလၢအ “မၤကွၢ်ပှၤအသး” အဃိထံၣ်တၢ်လၢ ပှၤအသးပူၤခဲလၢာ်လီၤ. လၢတၢ်န့ၣ်အဃိ အဝဲပာ်ဖျါထီၣ် တၢ်သးကညီၤလၢ စီၤအၤဃာ်အဖီခိၣ်လီၤ.—ကတိၤဒိ ၁၇:၃.
တၢ်ဆီၣ်လီၤသး မ့ၢ်တၢ်ဒီသဒၢ
၉. ဘၣ်မနုၤအဃိ တၢ်ဆီၣ်လီၤသးန့ၣ် ကမၤစၢၤ စီၤနၤဘိးအဟံၣ်ဖိဃီဖိဒီး အတံၤသကိးတဖၣ်လဲၣ်.
၉ စီၤနၤဘိးအဟံၣ်ဖိဃီဖိဒီး အတံၤသကိးတဖၣ် နၢ်ဟူဝဲလၢ ဖဲစီၤအၤဃာ် အိၣ်မူဒံးဝဲအဆၢကတီၢ်န့ၣ် အဝဲဒီးအဟံၣ်ဖိဃီဖိတဖၣ် တဘၣ်တၢ်စံၣ်ညီၣ်သံအီၤ ဒံးဘၣ်အဃိ ဘၣ်သ့ၣ်သ့ၣ် အဝဲသ့ၣ်အတၢ်နာ်ယွၤ ကဘၣ်တၢ်မၤကွၢ်အီၤလီၤ. ဘၣ်ဆၣ် တၢ်ဆီၣ်လီၤသးန့ၣ် ကမၤစၢၤအဝဲသ့ၣ်လၢ အတၢ်နာ်ယွၤ သုတလီၤစှၤတဂ့ၤအဂီၢ်လီၤ. ဘၣ်မနုၤအဃိလဲၣ်. အဝဲသ့ၣ်မ့ၢ်အိၣ်ဒီးတၢ်ဆီၣ်လီၤသးန့ၣ် ကဆဲးဘူၣ်ထီၣ်ဘါထီၣ် ယဟိဝၤယွၤဒီး ကနာ်ဝဲလၢ ယွၤကစံၣ်ညီၣ်တၢ်တီတီလိၤလိၤ ထီဘိလီၤ. (ဖး ၅ မိၤၡ့ ၃၂:၃, ၄ တက့ၢ်.) ခါဆူညါန့ၣ် စီၤနၤဘိးအဟံၣ်ဖိဃီဖိ ကဒိးန့ၢ်ဘၣ်က့ၤ ယွၤအတၢ်ဆိၣ်ဂ့ၤလၢ ကထံၣ်ဘၣ်ဝဲ ပှၤလၢအဝဲသ့ၣ်အဲၣ်ဘၣ်ဝဲတဖၣ် ကဂဲၤဆၢထၢၣ်သမူထီၣ်က့ၤဝဲန့ၣ်လီၤ. တၢ်ရဲၣ်တၢ်ကျဲၤအံၤ မ့ၢ်ဝဲတၢ်စံၣ်ညီၣ်တီလၢ စီၤနၤဘိးဒီး အဖိခွါတဖၣ်အဂီၢ်လီၤ. (ယိၤဘး ၁၄:၁၄, ၁၅; ယိၤဟၣ် ၅:၂၈, ၂၉) ပှၤလၢအိၣ်ဒီး တၢ်ဆီၣ်လီၤသးန့ၣ် ကသ့ၣ်ညါဝဲလၢ “ယွၤကဒုးဟဲကယဲၢ် တၢ်မၤအိၣ်ဒီးတၢ်ခူသူၣ်ခဲလၢာ်, ဂ့ၤမ့ၢ်ဂ့ၤ, အၢမ့ၢ်ဂ့ၤ, ဆူတၢ်စံၣ်ညီၣ်အပူၤန့ၣ်လီၤ.” (စံၣ်တဲၤတဲလီၤတၢ် ၁၂:၁၄) တချုးလၢယဟိဝၤယွၤ မၤတၢ်ဆၢတဲာ်ဒံးဘၣ်အခါ အဝဲဆိကမိၣ်ထံဝဲ တၢ်ဂ့ၢ်ကိးမံၤဒဲးလီၤ. လၢတၢ်န့ၣ်အဃိ တၢ်ဆီၣ်လီၤသးန့ၣ် ကမၤစၢၤပှၤဒ်သိး ပတၢ်နာ်ယဟိဝၤယွၤ သုတလီၤစှၤတဂ့ၤအဂီၢ်လီၤ.
တၢ်ဆီၣ်လီၤသးန့ၣ် ကမၤစၢၤပှၤဒ်သိး ပတၢ်နာ်ယွၤ သုတလီၤစှၤတဂ့ၤအဂီၢ်
၁၀, ၁၁. (က) တၢ်အိၣ်သးတဖၣ်လၢ ကကဲထီၣ်တၢ်မၤကွၢ်လၢ ပတၢ်နာ်အဂီၢ်န့ၣ် မ့ၢ်မနုၤလဲၣ်. (ခ) တၢ်ဆီၣ်လီၤသးန့ၣ် ကမၤစၢၤပှၤလၢ ကျဲဒ်လဲၣ်.
၁၀ တၢ်ဆၢတဲာ်လၢ တၢ်အိၣ်ဖှိၣ်သးပှၢ်တဖၣ်မၤဝဲန့ၣ် နမ့ၢ်တနၢ်ပၢၢ်ဘၣ် မ့တမ့ၢ် နသးမ့ၢ်တလီၤပလိာ်ဘၣ်န့ၣ် နကမၤဒ်လဲၣ်. အဒိ, နၤ မ့တမ့ၢ် ပှၤလၢနအဲၣ်ဘၣ်အီၤတဂၤ အမူဒါလၢ တၢ်အိၣ်ဖှိၣ်ပူၤမ့ၢ်လီၤမၢ်ကွံာ်ဝဲန့ၣ် နကမၤဒ်လဲၣ်. နသးသမူတံၤသကိး မ့တမ့ၢ် နဖိတဂၤဂၤ မ့တမ့ၢ် နတံၤသကိးတဂၤဂၤ မ့ၢ်ဘၣ်တၢ်ဟီထီၣ်ကွံာ်အီၤဒီး နသးမ့ၢ်တလီၤပလိာ်ဒီး တၢ်အိၣ်ဖှိၣ်သးပှၢ်တဖၣ် အတၢ်ဆၢတဲာ်န့ၣ် နကမၤဒ်လဲၣ်. နမ့ၢ်ဆိကမိၣ်လၢ တၢ်အိၣ်ဖှိၣ်သးပှၢ်တဖၣ် ပာ်ဖျါထီၣ်တၢ်သးကညီၤ အါတလၢကွံာ်အခၢးလၢ ပှၤမၤတၢ်ကမၣ်တဂၤအဖီခိၣ်န့ၣ် နကမၤဒ်လဲၣ်. တၢ်အိၣ်သးဒ်အံၤ မ့ၢ်ကဲထီၣ်အသးဒီးနၤ တခါခါန့ၣ် ကကဲထီၣ်တၢ်မၤကွၢ်လၢ နတၢ်နာ်ယဟိဝၤယွၤ ဒီးအတၢ်ကရၢကရိ အတၢ်ရဲၣ်တၢ်ကျဲၤအဖီခိၣ်လီၤ. နမ့ၢ်ဘၣ်သဂၢၢ်ဒီး တၢ်အိၣ်သးဒ်အံၤန့ၣ် တၢ်ဆီၣ်လီၤသး ကမၤစၢၤနၤဒ်လဲၣ်. ပကကွၢ်သကိးကျဲခံဘိလီၤ.
ဖဲတၢ်အိၣ်ဖှိၣ်သးပှၢ် ဘိးဘၣ်သ့ၣ်ညါဝဲ တၢ်စံၣ်ညီၣ်တဲာ်အခါ နသးမ့ၢ်တလီၤပလိာ်ဘၣ်န့ၣ် နကမၤဒ်လဲၣ်. (ကွၢ်လံာ်အဆၢ ၁၀, ၁၁)
၁၁ ကျဲအဆိကတၢၢ်တဘိ, တၢ်ဆီၣ်လီၤသးန့ၣ် ကမၤစၢၤပှၤဒ်သိး ပကတူၢ်လိာ်လၢ ပတသ့ၣ်ညါ တၢ်ဂ့ၢ်ခဲလၢာ်ဘၣ်. ပမ့ၢ်ဆိကမိၣ်လၢ ပသ့ၣ်ညါတၢ်ဂ့ၢ်ခဲလၢာ် ဘၣ်ဆၣ် ပကဘၣ်သ့ၣ်နီၣ်ထီၣ်လၢ ပှၤလၢအထံၣ်ပှၤသးန့ၣ် မ့ၢ်ထဲယဟိဝၤယွၤ တဂၤဧိၤလီၤ. (၁ ၡမူၤအ့လး ၁၆:၇) ပမ့ၢ်သ့ၣ်နီၣ်ထီၣ်တၢ်ဂ့ၢ်တဖၣ်အံၤန့ၣ် ပကတူၢ်လိာ်လၢ ပတသ့ၣ်ညါတၢ်ဂ့ၢ်ခဲလၢာ်ဘၣ် ဒီးပကဆီတလဲ ပတၢ်ထံၣ်န့ၣ်လီၤ. ကျဲခံဘိတဘိ, ဖဲပဘၣ်သဂၢၢ်ဒီးတၢ်တတီတလိၤအခါ တၢ်ဆီၣ်လီၤသးန့ၣ် ကမၤစၢၤပှၤဒ်သိး ပကအိၣ်ဒီးတၢ်ဒိကနၣ် ဒီးတၢ်သးစူၤ ဒီးအိၣ်ခိးယဟိဝၤယွၤလၢ ကမၤဘၣ်လိာ်က့ၤပတၢ်ဂ့ၢ်န့ၣ်လီၤ. လံာ်စီဆှံ စံးဝဲလၢ– “တၢ်ဂ့ၤကအိၣ်လၢပှၤပျံၤယွၤအဂီၢ်” ဒီး “မ့မ့ၢ်တၢ်ဂ့ၤတဘၣ်ဘၣ် ပှၤတတီတလိၤဘၣ်, ဒီးအမုၢ်နံၤလၢအမၤအသး ဒ်တၢ်ကဒုအသိး တအါထီၣ်ဘၣ်.” (စံၣ်တဲၤတဲလီၤတၢ် ၈:၁၂, ၁၃) ပမ့ၢ်အိၣ်ဒီး တၢ်ဆီၣ်လီၤသးထီဘိန့ၣ် ကကဲဘျုးလၢပဂီၢ် တကးဒံးဘၣ် ကကဲဘျုးလၢ ပှၤဂၤအဂီၢ်စ့ၢ်ကီးလီၤ.—ဖး ၁ ပ့းတရူး ၅:၅ တက့ၢ်.
တၢ်ပာ်မၤသးလၢ တၢ်အိၣ်ဖှိၣ်ပူၤ
၁၂. ပကတဲသကိး တၢ်ဂ့ၢ်မနုၤလဲၣ်. ဒီးဘၣ်မနုၤအဃိလဲၣ်.
၁၂ လၢတၢယၤဖှိၣ်အစိၤ ခရံာ်ဖိလၢအၣ်တံၤအီာ်တဖၣ် ထံၣ်ဘၣ်ဝဲတၢ်အိၣ်သးလၢ အကဲထီၣ်တၢ်မၤကွၢ်လၢ အဝဲသ့ၣ်အတၢ်ဆီၣ်လီၤသးဒီး တၢ်ပျၢ်ပှၤဂၤအတၢ်ကမၣ်အဂီၢ်န့ၣ်လီၤ. ပကမၤလိသကိးအဝဲသ့ၣ်အဂ့ၢ်ဒီး သူအီၤလၢပကသမံသမိး ပတၢ်ပာ်သူၣ်ပာ်သးလၢ ဘၣ်ဃးဒီးတၢ်ပျၢ်ပှၤဂၤအတၢ်ကမၣ်န့ၣ်လီၤ. ပမ့ၢ်မၤဒ်န့ၣ်န့ၣ် ကမၤစၢၤပှၤဒ်သိး ပကနၢ်ပၢၢ်ထီၣ်လၢ ဘၣ်မနုၤအဃိ ယဟိဝၤယွၤ သူဝဲပှၤတလၢတပှဲၤတဖၣ်လဲၣ်န့ၣ်လီၤ.
၁၃, ၁၄. စီၤပ့းတရူးဒိးန့ၢ်ဘၣ် မူဒါမနုၤလဲၣ်. ဒီးအဝဲပာ်ဖျါထီၣ် တၢ်သူၣ်ဆူၣ်သးဆူၣ်ဒ်လဲၣ်.
၁၃ တၢ်မၢဖိပ့းတရူး မ့ၢ်ဝဲတၢ်အိၣ်ဖှိၣ်သးပှၢ်တဂၤ လၢခရံာ်ဖိလၢညါတဖၣ် သ့ၣ်ညါအီၤဂ့ၤဂ့ၤန့ၣ်လီၤ. အဝဲမ့ၢ်စ့ၢ်ကီး ယ့ၣ်ၡူးအသကိး ဒီးဒိးန့ၢ်ဘၣ် မူဒါလၢအရ့ဒိၣ်တဖၣ်န့ၣ်လီၤ. (မးသဲ ၁၆:၁၉) အဒိ, ဖဲ ခ.န. ၃၆ န့ၣ် အဝဲဒိးန့ၢ်ဘၣ်မူဒါလၢ အကဘၣ်လဲၤစံၣ်တဲၤတဲလီၤတၢ်လၢ စီၤကန့လံး ဒီးအဟံၣ်ဖိဃီဖိတဖၣ်အအိၣ်န့ၣ်လီၤ. ဘၣ်မနုၤအဃိ အမူဒါအံၤမ့ၢ်တၢ်လၢအရ့ဒိၣ်လဲၣ်. မ့ၢ်လၢစီၤကန့လံးန့ၣ် မ့ၢ်ဝဲပှၤတခီဘီမုၢ်ဖိအဃိလီၤ. ဖဲစီၤကန့လံးဒီးအဟံၣ်ဖိဃီဖိတဖၣ် ဒိးန့ၢ်ဘၣ်ဝဲသးစီဆှံအခါ စီၤပ့းတရူး သ့ၣ်ညါဝဲလၢအဝဲသ့ၣ်ဒိးဘျၢထံဒ် ခရံာ်ဖိတဂၤအသိးသ့ဝဲလီၤ. အဝဲစံးဝဲလၢ– “ပှၤလၢအဒိးန့ၢ်သးစီဆှံ ဒ်ပဝဲအသိးတဖၣ်အံၤ, ဒ်သိးအသုတဒိးဘျၢအသးတဂ့ၤဒီး, ပှၤတြီထံသ့တဂၤဂၤဧါ.”—မၤတၢ် ၁၀:၄၇.
၁၄ ဖဲ ခ.န. ၄၉ နံၣ်န့ၣ် တၢ်မၢဖိတဖၣ်ဒီး ပှၤသးပှၢ်တဖၣ်လၢ ယရူၤၡလ့ၣ်န့ၣ် မၤတၢ်အိၣ်ဖှိၣ်ဘၣ်ဃး ပှၤတခီဘီမုၢ်ဖိလၢ အကဲထီၣ်ခရံာ်ဖိတဖၣ် ကဘၣ်ဒိးတၢ်ကူးတရံးဧါ, တဘၣ်ဒိးဘၣ်ဧါန့ၣ်လီၤ. လၢတၢ်အိၣ်ဖှိၣ်အံၤအပူၤန့ၣ် စီၤပ့းတရူး တဲဖျါထီၣ်တၢ်ဂ့ၢ်ဒူဒူလၢ အဘၣ်ဃးဒီး ပှၤတခီဘီမုၢ်ဖိလၢ အတဒိးဘၣ်တၢ်ကူးတရံးတဖၣ် ဒိးန့ၢ်ဘၣ်ဝဲယွၤအသးစီဆှံအဂ့ၢ်လီၤ. စီၤပ့းတရူးအတၢ်လဲၤခီဖျိအံၤ မၤစၢၤဝဲပှၤပၢဆှၢတၢ်ကမံးတံာ်လၢ ကမၤတၢ်ဆၢတဲာ်အဂီၢ်လီၤ. (မၤတၢ် ၁၅:၆-၁၁, ၁၃, ၁၄, ၂၈, ၂၉) ဖဲပှၤယူဒၤဖိဒီး ပှၤတခီဘီမုၢ်ဖိလၢ အကဲထီၣ်ခရံာ်ဖိတဖၣ် သ့ၣ်ညါဘၣ်ဝဲလၢ စီၤပ့းတရူးတဲဖျါထီၣ်တၢ်ဂ့ၢ်ဒူဒူအဃိ အဝဲသ့ၣ်ကသူၣ်ခုသးခုဝဲဒိၣ်မးလီၤ. လၢတၢ်န့ၣ်အဃိ ခရံာ်ဖိလၢညါတဖၣ်ကနာ်န့ၢ်ဝဲ ခရံာ်ဖိလၢအဒိၣ်တုာ်ခိၣ်ပှဲၤ တဂၤအံၤန့ၣ်လီၤ.—ဧ့ၤဘြံၤ ၁၃:၇.
၁၅. ဖဲစီၤပ့းတရူးအိၣ်လၢ ဝ့ၢ်အၣ်တံၤအီာ်အခါ အဝဲမၤဘၣ်တၢ်ကမၣ် မနုၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၅ အဝဲသ့ၣ်မၤတၢ်အိၣ်ဖှိၣ်လၢ ဝ့ၢ်ယရူၤၡလ့ၣ် ဝံၤတယံာ်ဘၣ်ဒီး စီၤပ့းတရူးလဲၤဝဲလၢ ဝ့ၢ်အၣ်တံၤအီာ် လၢကီၢ်စူၤရံန့ၣ်လီၤ. ဖဲအဝဲအိၣ်ဖဲန့ၣ်အဆၢကတီၢ် ရ့ဝဲဒီးပှၤတခီဘီမုၢ်ဖိလၢ အကဲထီၣ်ခရံာ်ဖိတဖၣ် ဂ့ၤဂ့ၤလီၤ. ထံၣ်တမှံကွၢ်လၢ ဖဲန့ၣ်အဆၢကတီၢ် ဒီပုၢ်ဝဲၢ်တဖၣ် ကမၤလိန့ၢ်တၢ်အါမးလၢ စီၤပ့းတရူးအတၢ်လဲၤခီဖျိန့ၣ်လီၤ. ဘၣ်ဆၣ် လၢသတူၢ်ကလာ်အတီၢ်ပူၤ စီၤပ့းတရူး တအီၣ်ဃုာ်တၢ်ဒီးအဝဲသ့ၣ် လၢၤဘၣ်အဃိ ဒီပုၢ်ဝဲၢ်သ့ၣ်တဖၣ် ကကမၢကမၣ်ဝဲ ဒီးအသးကဘၣ်ဒိဝဲလီၤ. ပှၤယူဒၤဖိလၢအကဲထီၣ်ခရံာ်ဖိတနီၤ တကးဒံးဘၣ် စီၤဘၢ်နါဘၤစ့ၢ်ကီး မၤပိာ်စီၤပ့းတရူးအခံလီၤ. ဘၣ်မနုၤအဃိ တၢ်အိၣ်ဖှိၣ်သးပှၢ်လၢ အဒိၣ်တုာ်ခိၣ်ပှဲၤအံၤ မၤဝဲတၢ်ကမၣ်ဖးဒိၣ်လၢ အမၤလီၤဖးတၢ်အိၣ်ဖှိၣ်သ့ဝဲန့ၣ်လဲၣ်. ဒ်စီၤပ့းတရူးအတၢ်ကမၣ်အသိး တၢ်အိၣ်ဖှိၣ်သးပှၢ်တဂၤ အတၢ်ကတိၤ မ့တမ့ၢ် အတၢ်မၤ မ့ၢ်မၤဘၣ်ဒိနသးန့ၣ် နကမၤဒ်လဲၣ်.
စီၤပ့းတရူးမၤဝဲဒ်အံၤအဃိ ပှၤတခီဘီမုၢ်ဖိလၢ အကဲထီၣ် ခရံာ်ဖိတဖၣ် အသးဘၣ်ဒိဝဲလီၤ. ဘၣ်ဆၣ်အဝဲသ့ၣ်မၤဝဲဒ်လဲၣ်.
၁၆. စီၤပီလူး သိၣ်စီၤပ့းတရူးဒ်လဲၣ်. တၢ်သံကွၢ် အိၣ်ထီၣ်ဝဲဒ်လဲၣ်.
၁၆ ဖး ကလၤတံ ၂:၁၁-၁၄ တက့ၢ်. စီၤပ့းတရူး ပျံၤပှၤကညီလီၤ. (ကတိၤဒိ ၂၉:၂၅) ယဟိဝၤယွၤ ထံၣ်ဝဲပှၤတခီဘီမုၢ်ဖိတဖၣ် ဒ်လဲၣ်န့ၣ် စီၤပ့းတရူးသ့ၣ်ညါဝဲလီၤ. ဘၣ်ဆၣ် စီၤပ့းတရူး ဘၣ်ယိၣ်ဝဲလၢ ပှၤယူဒၤဖိလၢ အဒိးတၢ်ကူးတရံးတဖၣ် မ့ၢ်ထံၣ်လၢအဝဲရ့ဒီး ပှၤတခီဘီမုၢ်ဖိလၢ တဒိးတၢ်ကူးတရံးဘၣ်တဖၣ်န့ၣ် အဝဲသ့ၣ်ကထံၣ်ဆံးအီၤလီၤ. တၢ်မၢဖိပီလူး တဲဘၣ်စီၤပ့းတရူးလၢ အမ့ၢ်ပှၤလၢ အပာ်မၤအသးလီၤ. ဘၣ်မနုၤအဃိ တဲဝဲဒ်န့ၣ်လဲၣ်. မ့ၢ်လၢအပူၤကွံာ် ဖဲ ခ.န. ၄၉ နံၣ်ပှၤမၤတၢ်အိၣ်ဖှိၣ်လၢ ဝ့ၢ်ယရူၤၡလ့ၣ်အခါ စီၤပီလူးထံၣ်ဘၣ်ဝဲ စီၤပ့းတရူး ဆၢထၢၣ်တဲတၢ်လၢ ပှၤတခီဘီမုၢ်ဖိတဖၣ် အဂီၢ်အဃိလီၤ. (မၤတၢ် ၁၅:၁၂; ကလၤတံ ၂:၁၃) စီၤပ့းတရူးမၤဝဲဒ်န့ၣ်အဃိ ပှၤတခီဘီမုၢ်ဖိလၢ အကဲထီၣ်ခရံာ်ဖိတဖၣ် အသးဘၣ်ဒိဝဲလီၤ. ဘၣ်ဆၣ်အဝဲသ့ၣ်မၤဝဲဒ်လဲၣ်. မ့ၢ်အဝဲသ့ၣ် ကလီၤဃံၢ်လၢ စီၤပ့းတရူးအဃိဧါ. စီၤပ့းတရူး မၤဘၣ်တၢ်ကမၣ်အဃိ မ့ၢ်အမူဒါ ကလီၤမၢ်ကွံာ်ဝဲဧါ.
ပျၢ်ပှၤဂၤ အတၢ်ကမၣ်တက့ၢ်
၁၇. ယဟိဝၤယွၤပျၢ် စီၤပ့းတရူးအတၢ်ကမၣ်အဃိ စီၤပ့းတရူးဒိးန့ၢ်ဘၣ် တၢ်ခွဲးတၢ်ယာ်မနုၤလဲၣ်.
၁၇ စီၤပ့းတရူးအိၣ်ဒီး တၢ်ဆီၣ်လီၤသးအဃိ တူၢ်လိာ်ဝဲ စီၤပီလူးအတၢ်သိၣ်ဃီၣ်အီၤန့ၣ်လီၤ. လံာ်စီဆှံတပာ်ဖျါထီၣ်ဝဲလၢ စီၤပ့းတရူး အမူဒါလီၤမၢ်ကွံာ်ဝဲဘၣ်. လၢတၢ်န့ၣ်အလီၢ် စီၤပ့းတရူး ဒိးန့ၢ်ဘၣ် တၢ်ခွဲးတၢ်ယာ်လၢ အကွဲးဝဲလံာ်စီဆှံခံကတြူၢ်န့ၣ်လီၤ. လၢအလံာ်ခံကတြူၢ်တကတြူၢ်အပူၤန့ၣ် အဝဲတဲဝဲလၢ စီၤပီလူးမ့ၢ် “ပဒီပုၢ်ဝဲၢ်သးဘိ” လီၤ. (၂ ပ့းတရူး ၃:၁၅) စီၤပ့းတရူး အတၢ်ကမၣ်န့ၣ် မၤဘၣ်ဒိဝဲ ပှၤတခီဘီမုၢ်ဖိလၢ အကဲထီၣ်ခရံာ်ဖိတဖၣ်အသးဒိၣ်မးလီၤ. ဘၣ်ဆၣ် ယ့ၣ်ၡူးလၢအမ့ၢ် တၢ်အိၣ်ဖှိၣ်အခိၣ်န့ၣ် ဆဲးသူအီၤဒံးလီၤ. (အ့းဖ့းစူး ၁:၂၂) ဒီပုၢ်ဝဲၢ်မုၣ်ဒီး ဒီပုၢ်ခွါဖဲန့ၣ်တဖၣ် ဒိးန့ၢ်ဘၣ်တၢ်ခွဲးတၢ်ယာ်လၢ ကကွၢ်လိမၤဒိး ယ့ၣ်ၡူးဒီးအပၢ်ခီဖျိ ပျၢ်ကွံာ်ဝဲစီၤပ့းတရူးအတၢ်ကမၣ်န့ၣ်လီၤ. မ်ပှၤသုတလီၤဃံၢ်လၢ ပှၤတလၢတပှဲၤအဃိ နီတဂၤတဂ့ၤ.
၁၈. ပကြၢးကွၢ်လိမၤဒိး ယဟိဝၤယွၤလၢ ဆၢကတီၢ်ဖဲလဲၣ်.
၁၈ ဒ်တၢ်အိၣ်ဖှိၣ်သးပှၢ်လၢညါတဖၣ် တလၢပှဲၤဘၣ်အသိး မုၢ်မဆါတနံၤအံၤ တၢ်အိၣ်သးပှၢ်တဖၣ်စ့ၢ်ကီး တလၢပှဲၤဘၣ်. လံာ်စီဆှံ စံးဝဲလၢပဝဲခဲလၢာ်– “ပမၤကမၣ်တၢ်အါမံၤ” လီၤ. (ယၤကိာ် ၃:၂) လံာ်စီဆှံတဆၢအံၤ ပသ့ၣ်ညါအီၤလီၤတံၢ်လီၤဆဲးသနာ်က့ ဖဲပှၤတဂၤဂၤမၤကမၣ်ဘၣ်ပှၤအခါ ပတူၢ်ဘၣ်အီၤကီဒိၣ်မးလီၤ. ဒီပုၢ်ဝဲၢ်တဖၣ် မ့ၢ်မၤကမၣ်ဘၣ်နၤန့ၣ် မ့ၢ်နကအိၣ်ဒီးတၢ်ထံၣ်ဒ် ယဟိဝၤယွၤအသိးဧါ. အဒိ, တၢ်အိၣ်ဖှိၣ်သးပှၢ်တဂၤ အတၢ်ကတိၤ မ့ၢ်မၤဘၣ်ဒိနၤန့ၣ် နကမၤဒ်လဲၣ်. မ့ၢ်နကပျဲ တၢ်အိၣ်ဖှိၣ်သးပှၢ် အတၢ်ကတိၤအံၤ မၤလီၤဃံၢ်နၤဧါ. မ့ၢ်နကဆိကမိၣ်လၢ ဒီပုၢ်ဝဲၢ်တဂၤအံၤ တကြၢးကဲတၢ်အိၣ်ဖှိၣ်သးပှၢ်ဘၣ်ဧါ. မ့တမ့ၢ် လၢတၢ်သူၣ်စူၤသးစူၤအပူၤ နကအိၣ်ခိး တၢ်အိၣ်ဖှိၣ်အခိၣ်ယ့ၣ်ၡူး လၢကမၤဘၣ်လိာ်က့ၤ တၢ်ဂ့ၢ်အံၤဧါ. လၢပကထံၣ်ပဒီပုၢ်ဝဲၢ်တဖၣ် အတၢ်ကမၣ်အလီၢ် ဃုထံၣ်န့ၢ်အဝဲသ့ၣ် အတၢ်ဂ့ၤတၢ်ဝါတက့ၢ်. ဒီပုၢ်ဝဲၢ်လၢအမၤကမၣ် နၤတဂၤ မ့ၢ်ဆဲးကဲဒံးတၢ်အိၣ်ဖှိၣ်သးပှၢ် ဒီးမ့ၢ်ဒိးန့ၢ်အါထီၣ်မူဒါန့ၣ် မ့ၢ်နကသးခု ဃုာ်ဒီးအီၤဧါ. နမ့ၢ်သးအိၣ်ပျၢ်ပှၤဂၤအတၢ်ကမၣ်န့ၣ် မ့ၢ်ဒၣ်နပာ်ဖျါထီၣ်လၢ နအိၣ်ဒီးတၢ်ထံၣ်ဒ် ယဟိဝၤယွၤအသိးန့ၣ်လီၤ.—ဖး မးသဲ ၆:၁၄, ၁၅ တက့ၢ်.
၁၉. ပကဘၣ်ပာ်လီၤပသး ဂၢၢ်ဂၢၢ်ကျၢၤကျၢၤလၢ ပကမၤ တၢ်မနုၤလဲၣ်.
၁၉ မ့ၢ်လၢပအဲၣ်တၢ်စံၣ်ညီၣ်တီအဃိ ပခိးကွၢ်လၢ်မုၢ်နံၤလၢ ယဟိဝၤယွၤကမၤလီၤမၢ်ကွံာ်တၢ်တတီတလိၤလၢ ဟီၣ်ခိၣ်ချၢန့ၣ်လီၤ. (ယၡါယၤ ၆၅:၁၇) ဘၣ်ဆၣ်ခဲအံၤပမ့ၢ်တူၢ်ဘၣ်တၢ်တတီတလိၤန့ၣ် လၢတၢ်ဆီၣ်လီၤသးအပူၤ မ်ပကတူၢ်လိာ်လၢ ပတသ့ၣ်ညါတၢ်ဂ့ၢ်ခဲလၢာ်ဘၣ် ဒီးပျၢ်ပှၤလၢအမၤကမၣ်ပှၤတဖၣ် အတၢ်ကမၣ်လၢာ်လၢာ်ဆ့ဆ့တက့ၢ်. ပမ့ၢ်မၤဒ်န့ၣ်န့ၣ် မ့ၢ်ဒၣ်ပအိၣ်ဒီးတၢ်ထံၣ်ဒ် ယဟိဝၤယွၤအသိးလီၤ.
