၁-၂. ပဝဲယဟိဝၤယွၤ အခ့အပှၤန့ၣ် ပသးခုလၢ တၢ်ဂ့ၢ်မနုၤအဃိလဲၣ်. (ယၤကိာ် ၁:၂၂-၂၅)

 ယဟိဝၤယွၤ ဒီးအဖိခွါ အဲၣ်ဒိးလၢ ပကသးခု. ဒီးပှၤလၢအကွဲး စံးထီၣ်ပတြၢၤ ၁၁၉:၂ န့ၣ်တဲဝဲလၢ “ပှၤလၢ အမၤထွဲ ကစၢ်ယွၤ အတၢ်ဒုးသ့ၣ်နီၣ်ထီၣ်က့ၤတဖၣ် ဒီးပှၤလၢအဃု ကစၢ်ယွၤ အတၢ်ဟံးစုနဲၣ်ကျဲလၢ အသးဒီဖျၢၣ်ညါန့ၣ် ကသးခုဝဲလီၤ.” တကးဒံးဘၣ် ယ့ၣ်ၡူး အနီၢ်ကစၢ်စ့ၢ်ကီး တဲဝဲလၢ “ပှၤလၢအနၢ်ဟူ ကစၢ်ယွၤ အကလုၢ်ကထါဒီး မၤထွဲဝဲန့ၣ် ကသးခုဝဲ.”—လူၤ ၁၁:၂၈.

^၂ ခီဖျိလၢ ပဘူၣ်ထီၣ်ဘါထီၣ် ယဟိဝၤယွၤအဃိ ပသးခု. ဘၣ်မနုၤအဃိ ပတဲဒ်န့ၣ်လဲၣ်. ပသးခု ခီဖျိလၢ တၢ်ဂ့ၢ်အါမံၤအဃိ. ဒီးတၢ်ဂ့ၢ်အရ့ဒိၣ် တခါန့ၣ်မ့ၢ်ဝဲ ပဖးလံာ်စီဆှံ ကိးနံၤဒဲး ဒီးဂုာ်ကျဲးစၢး မၤထွဲ တၢ်ဂ့ၢ်လၢ ပမၤလိဘၣ်.—ဖး ယၤကိာ် ၁:၂၂-၂၅.

၃. ဖဲပမၤထွဲ ကစၢ်ယွၤ အတၢ်ဟံးစုနဲၣ်ကျဲအခါ ပကန့ၢ်ဘၣ် အဘျုးဒ်လဲၣ်.

^၃ ပမ့ၢ် “ကဲထီၣ်ပှၤလၢ အမၤထွဲ ကစၢ်ယွၤ အကလုၢ်ကထါ” န့ၣ် ကကဲဘျုးလၢ ပဂီၢ်အါမး. အဒိ ပမ့ၢ်အိၣ်မူမၤထွဲ ကစၢ်ယွၤ အတၢ်မၤလိာ် လၢပမၤလိဘၣ်န့ၣ် မ့ၢ်ဝဲ ပမၤသးခု ယဟိဝၤယွၤအသး ဒီးပကသးခုစ့ၢ်ကီး. (စံၣ် ၁၂:၁၃) ဖဲပမၤထွဲ ကစၢ်ယွၤ အတၢ်ဟံးစုနဲၣ်ကျဲအခါ ပတၢ်ရ့လိာ်သးဒီး ပဟံၣ်ဖိဃီဖိ ဒီးပဒီပုၢ်ဝဲၢ်မုၣ်ခွါ ဂ့ၤဒိၣ်ထီၣ်. ပမၤဒ်အံၤအဃိ ပဒိးန့ၢ်ဘၣ် အဘျုးနီၢ်ကီၢ်. ဒီးခီဖျိလၢ ပဒိကနၣ် ဒီးမၤထွဲ ကစၢ်ယွၤ အတၢ်သိၣ်တၢ်သီအဃိ ပတထံၣ်ဘၣ် တၢ်ကီတၢ်ခဲအါအါ ဒ်သိးဒီး ပှၤလၢတဒိကနၣ် ယဟိဝၤယွၤ အတၢ်သိၣ်တၢ်သီတဖၣ် ထံၣ်ဘၣ်ဝဲဘၣ်. စီၤဒၤဝံး တဲဝဲလၢ ယဟိဝၤယွၤ အတၢ်သိၣ်တၢ်သီ, အတၢ်ဘျၢ ဒီးအတၢ်စံၣ်ညီၣ်တဖၣ်န့ၣ် တီဝဲလိၤဝဲ ဒီးအတဲစ့ၢ်ကီးဝဲလၢ “ပှၤလၢ အမၤထွဲဝဲန့ၣ် ဒိးန့ၢ်ဘၣ်အဘျုး အါမး.” (စံး ၁၉:၇-၁၁) တၢ်လၢစီၤဒၤဝံး တဲဝဲန့ၣ် အဘၣ်သပှၢ်တၢၢ်.

၄. ပကမၤထွဲ ကစၢ်ယွၤ အကလုၢ်ကထါအဂီၢ် ဘၣ်မနုၤအဃိ အတညီထီဘိဘၣ်လဲၣ်.

 ^၄ ဒ်သိး ပကကဲထီၣ်ပှၤလၢ အမၤထွဲ ကစၢ်ယွၤ အကလုၢ်ကထါအဂီၢ် ပကဘၣ်ဖး ဒီးမၤလိလံာ်စီဆှံ. ပမ့ၢ်မၤဒ်န့ၣ်မး ပကနၢ်ပၢၢ်ထီၣ် တၢ်လၢယဟိဝၤယွၤ ဘၣ်သးလၢပမၤ. သနာ်က့ ပမ့ၢ်ဘၣ်တဲတီတီန့ၣ် ခီဖျိလၢ ပတၢ်မၤအိၣ်အါအဃိ ပကမၤဒ်န့ၣ်အဂီၢ် အတညီထီဘိဘၣ်. အဃိ ဒ်သိး ပကဖးဘၣ် လံာ်စီဆှံ ကိးနံၤဒဲးအဂီၢ် ပကဘၣ် ပာ်လီၤတၢ်ဆၢကတီၢ်. ဒ်သိး ပကဖးဘၣ် လံာ်စီဆှံ ကိးနံၤဒဲးအဂီၢ် ပကဘၣ်မၤဒ်လဲၣ်န့ၣ် ခဲအံၤပကတဲသကိး တၢ်ဟ့ၣ်ကူၣ်တနီၤလၢ ကမၤစၢၤပှၤ. ပကသ့ၣ်ညါဘၣ်စ့ၢ်ကီး တၢ်လၢကမၤစၢၤပှၤ ဒ်သိးပကဆိကမိၣ်ထံ တၢ်ဂ့ၢ်လၢပဖး ဒီးကမၤထွဲအီၤ လၢပတၢ်အိၣ်မူပူၤ.

ပာ်လီၤတၢ်ဆၢကတီၢ်လၢ နကဖးလံာ်စီဆှံ

၅. ပတၢ်မၤအါလၢ မနုၤအဃိလဲၣ်.

^၅ ပဝဲ ယဟိဝၤယွၤ အခ့အပှၤအါတက့ၢ်န့ၣ် ပတၢ်မၤ အိၣ်အါမး. လီၤဆီဒၣ်တၢ် ပဘၣ်မၤ တၢ်အရ့ဒိၣ်လၢ လံာ်စီဆှံ ပာ်ဖျါထီၣ်ဝဲန့ၣ် အိၣ်ဒီဒူၣ်ညါ. အဒိ ပဝဲအါတက့ၢ်န့ၣ် ဒ်သိးပကကွၢ်ထွဲလီၤ ပနီၢ်ကစၢ် ဒီးပဟံၣ်ဖိဃီဖိအဂီၢ် ပဘၣ်လဲၤမၤတၢ်. (၁ တံၤ ၅:၈) ပှၤတနီၤန့ၣ် ဘၣ်ကွၢ်ထွဲ အဟံၣ်ဖိဃီဖိလၢ အသးပှၢ် ဒီးအအိၣ်တဆူၣ်ဘၣ်. ဒီးပကဘၣ် ကွၢ်ထွဲ ပတၢ်အိၣ်ဆူၣ်အိၣ်ချ့အဃိ တၢ်ဆၢကတီၢ် လၢာ်ဝဲအါမး. တကးဒံးဘၣ် လၢတၢ်အိၣ်ဖှိၣ်ပူၤစ့ၢ်ကီး ပအိၣ်ဒီး မူဒါအရ့ဒိၣ်. ပမူဒါလၢ အရ့ဒိၣ်တခါန့ၣ်မ့ၢ်ဝဲ ပဘၣ် စံၣ်တဲၤတဲလီၤတၢ်လၢ တၢ်သးဆူၣ်. မူဒါလၢ ပကဘၣ်မၤန့ၣ် အိၣ်အါမးအဃိ ဒ်သိး ပကဖးဘၣ် လံာ်စီဆှံကိးနံၤဒဲး, ဆိကမိၣ်ထံ တၢ်ဂ့ၢ်လၢပဖး ဒီးမၤထွဲအီၤအဂီၢ် ပကဘၣ်မၤဒ်လဲၣ်.

၆. ဒ်သိး ပကဖးဘၣ် လံာ်စီဆှံ ကိးနံၤဒဲးအဂီၢ် ပကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၆ တၢ်ဖးလံာ်စီဆှံန့ၣ် မ့ၢ်ဝဲ “တၢ်လၢအရ့ဒိၣ်ကတၢၢ်” တခါလၢ ခရံာ်ဖိအဂီၢ် အဃိ ပကဘၣ်ဖး လံာ်စီဆှံ ကိးနံၤဒဲး. (ဖံလံး ၁:၁၀) စံးထီၣ်ပတြၢၤ ၁:၁, ၂ တဲဝဲလၢ ပှၤတဂၤလၢ အ “ဘၣ်သူၣ်ဘၣ်သး ယဟိဝၤယွၤ အတၢ်သိၣ်တၢ်သီ ဒီးအဝဲဖးဝဲ ဒီးဆိကမိၣ်ထံဝဲ ကစၢ်ယွၤ အတၢ်သိၣ်တၢ်သီ လၢမုၢ်ဆါခီ ဒီးလၢမုၢ်နၤခီ” န့ၣ် အကသးခု. အဃိ ပသ့ၣ်ညါဘၣ်လၢ ပကဘၣ် ပာ်လီၤတၢ်ဆၢကတီၢ်လၢ ပကဖးလံာ်စီဆှံ ကိးနံၤဒဲး. တၢ်ဆၢကတီၢ် အဂ့ၤလၢ နကဖးလံာ်စီဆှံန့ၣ် ကမ့ၢ်အဆၢကတီၢ် ဖဲလဲၣ်. ပဝဲတဂၤဒီး တဂၤန့ၣ် ပတၢ်ဖးလံာ်စီဆှံ အဆၢကတီၢ် ကလီၤဆီလိာ်သး. ဘၣ်ဆၣ် တၢ်အရ့ဒိၣ်န့ၣ်မ့ၢ်ဝဲ ပကဘၣ်ပာ်လီၤ တၢ်ဆၢကတီၢ်လၢ ကမၤစၢၤပှၤဒ်သိး ပကဖးဘၣ် လံာ်စီဆှံ ကိးနံၤဒဲး. အဒိ ဒီပုၢ်ဝဲၢ်ခွါဝံးထိ တဲဝဲလၢ “ညီနုၢ်န့ၣ် ယပၢၢ်ထီၣ်ဂီၤဂီၤ တန့ၢ်ဘၣ်. ဘၣ်ဆၣ် ဖဲဂီၤခီန့ၣ် တၢ်ဘှ့ၣ်တၢ်ဘှီၣ် ဒီးယကဖး လံာ်စီဆှံအဂီၢ် တၢ်လၢကမၤတံာ်တာ်ယၤ တအိၣ်အါအါဘၣ်အဃိ ယခိၣ်နူာ်ဆှံ ဒီးယသးစၢၢ်ဆၢတၢ် န့ၢ်အါတစဲး. အဃိ ယဖးလံာ်စီဆှံ လၢဂီၤခီ.” ဘၣ်သ့ၣ်သ့ၣ် နတၢ်အိၣ်သး ကလီၤဂာ်ဒီး ဒီပုၢ်ဝဲၢ်ခွါတဂၤအံၤ. အဃိ သံကွၢ်လီၤနသးလၢ ‘တၢ်ဆၢကတီၢ် အဂ့ၤလၢ ယကဖးလံာ်စီဆှံအဂီၢ်န့ၣ် ကမ့ၢ်အဆၢကတီၢ်ဖဲလဲၣ်.’

ဆိကမိၣ်ထံ တၢ်ဂ့ၢ်လၢနဖး

၇-၈. ဒ်သိး ပတၢ်ဖးလံာ်စီဆှံ ကကဲဘျုးအဂီၢ် ပကဘၣ်မၤဒ်လဲၣ်. တဲဖျါထီၣ် တၢ်အဒိ.

^၇ ပပာ်လီၤ တၢ်ဆၢကတီၢ်လၢ ပကဖးလံာ်စီဆှံ ကိးနံၤဒဲးလံ ဘၣ်ဆၣ် တၢ်အရ့ဒိၣ်လၢ ပကဘၣ်မၤန့ၣ် အိၣ်ဒံး. အဒိ နဖးတၢ်ဂ့ၢ်တမံၤမံၤ ဒီးလၢခံ နတနီၣ်ဘၣ် တၢ်ဂ့ၢ်အါအါ လၢၤဘၣ်န့ၣ် အိၣ်တဘျီဘျီဧါ. ဘၣ်သ့ၣ်သ့ၣ် တၢ်ကဲထီၣ်သးဒီးပှၤ ဒ်န့ၣ် တဘျုးဘျီညါ. ဘၣ်သ့ၣ်သ့ၣ် ပပာ်လီၤ ဖီတၢၣ်လၢ ပကဖးလံာ်စီဆှံ အဆၢဒိၣ် ခံဆၢသၢဆၢ ကိးနံၤဒဲး. ပပာ်လီၤဖီတၢၣ်ဒ်အံၤန့ၣ် အဂ့ၤမး ဒီးပကဘၣ်မၤထွဲအီၤ စ့ၢ်ကီး. (၁ ကရံၣ် ၉:၂၆) ဘၣ်ဆၣ် ဖဲပဖးလံာ်စီဆှံအခါ ဒ်သိး ပကန့ၢ်ဘၣ် အဘျုးအဂီၢ် ပကဘၣ်ဆိမိၣ်ထံ တၢ်ဂ့ၢ်လၢပဖး လီၤတံၢ်လီၤဆဲး.

^၈ အဒိ ဒ်သိး တၢ်မုၢ်တၢ်ဘိ ကမဲထီၣ်ဂ့ၤဂ့ၤအဂီၢ် အလိၣ်ဘၣ်ဝဲ မူခိၣ်စူၤထံ. ဘၣ်ဆၣ် တၢ်စူၤမ့ၢ်ဒိၣ်န့ၣ် ထံနုာ်လီၤလၢ ဟီၣ်ခိၣ်ဖီလာ် တန့ၢ်ချ့ချ့ဘၣ် ဒီးအတကဲဘျုးလၢ တၢ်မုၢ်တၢ်ဘိအဂီၢ်ဘၣ်. အဃိ ဒ်သိး ထံကနုာ်လီၤလၢ ဟီၣ်ခိၣ်ဖီလာ် ဒီးကကဲဘျုးလၢ တၢ်မုၢ်တၢ်ဘိ ကမဲထီၣ်အဂီၢ် မူခိၣ်ကဘၣ် စူၤလီၤကယီကယီ. ဒ်န့ၣ်အသိး ပမ့ၢ်ဖး လံာ်စီဆှံချ့ချ့န့ၣ် အတကဲဘျုးလၢ ပဂီၢ်ဘၣ်. ဒ်သိး တၢ်ဂ့ၢ်လၢပဖးန့ၣ် ကကဲဘျုး ဒီးပမၤထွဲအီၤ ကန့ၢ်အဂီၢ် ပကဘၣ် ဟံးန့ၢ်တၢ်ဆၢကတီၢ်လၢ ပကဆိကမိၣ်ထံတၢ်.—ယၤ ၁:၂၄.

၉. နမ့ၢ်ဆိကမိၣ်လၢ နဖးလံာ်စီဆှံ ချ့တလၢန့ၣ် နကဘၣ်မၤဒ်လဲၣ်.

^၉ တဘျီတခီၣ် ပမ့ၢ်ဆိကမိၣ်လၢ ပဖးလံာ်စီဆှံ ချ့တလၢန့ၣ် ပကဘၣ်မၤဒ်လဲၣ်. ဒ်သိး ပဆိကမိၣ်ထံ တၢ်ဂ့ၢ်လၢပဖး ကန့ၢ်အဂီၢ် ပကဘၣ်ဖးအီၤ ကယီကယီ. ဒီးဖဲပဖး ဝံၤအခါ ပကဘၣ် ဟံးန့ၢ်တၢ်ဆၢကတီၢ်လၢ ပကဆိကမိၣ်ထံက့ၤ တၢ်ဂ့ၢ်လၢပဖး. ပကမၤ ဒ်အံၤအဂီၢ် အတကီဘၣ်. ဖဲပမၤ နီၢ်ကစၢ်တၢ်မၤလိ လံာ်စီဆှံအခါ ပကဘၣ် ပာ်လီၤစ့ၢ်ကီး တၢ်ဆၢကတီၢ်လၢ ပကဆိကမိၣ်ထံ တၢ်ဂ့ၢ်လၢ ပမၤလိဘၣ်တဖၣ်. ဘၣ်ဆၣ် ပသးစၢၢ်ဆၢတၢ် မ့ၢ်တန့ၢ်ယံာ်ယံာ်ဘၣ်န့ၣ် ပဖးလံာ်စီဆှံ အဆၢဖိ ထဲစှၤကိာ်ဆၢ ဝံၤဘျီ ဆိကမိၣ်ထံက့ၤ တၢ်ဂ့ၢ်လၢပဖးသ့. ဒီပုၢ်ဝဲၢ်ခွါဝံးထိ လၢပတဲတ့ၢ်အဂ့ၢ်န့ၣ် အတဲဝဲလၢ “ယတဖးလံာ်စီဆှံ ဖးယံာ်ဘၣ်, ယဖးထဲ တဆၢဒိၣ်ဖိ.” အဆဲးတဲဝဲလၢ “ခီဖျိလၢ ယဂဲၤဆၢထၢၣ် ဖးလံာ်စီဆှံ ဂီၤဂီၤအဃိ လၢတနံၤအတီၢ်ပူၤန့ၣ် ယဆိကမိၣ် တၢ်ဂ့ၢ်လၢ ယဖးဘၣ်အီၤသ့.” ပသ့ၣ်ညါဘၣ်လၢ ပကဖး လံာ်စီဆှံ ယံာ်ထဲလဲၣ်န့ၣ် ပနီၢ်ကစၢ် ဆၢတဲာ်သ့. ဘၣ်ဆၣ် တၢ်လၢအရ့ဒိၣ်န့ၣ် မ့ၢ်ဝဲ ပကဘၣ် ဟံးန့ၢ်တၢ်ဆၢကတီၢ်လၢ ပကဆိကမိၣ်ထံ တၢ်ဂ့ၢ်လၢပဖး.—စံး ၁၁၉:၉၇; ကွၢ်တၢ်လွံၢ်နၢၣ် လၢအမ့ၢ် “ တၢ်သံကွၢ်လၢ နကဘၣ် ဆိကမိၣ်ထံ.”

၁၀. ဒ်သိး နမၤထွဲ တၢ်ဂ့ၢ်လၢနဖး ကသ့အဂီၢ် နကဘၣ်မၤဒ်လဲၣ်. တဲဖျါထီၣ် တၢ်အဒိ. (၁ သ့းစၤလနံ ၅:၁၇, ၁၈)

^၁၀ နဖးလံာ်စီဆှံ လၢဆၢကတီၢ်ဖဲလဲၣ် ဒီးနဖးမ့ၢ်ယံာ် ထဲလဲၣ်သနာ်က့ တၢ်လၢအရ့ဒိၣ်န့ၣ် မ့ၢ်ဝဲ နကဘၣ်ဆိကမိၣ်ထံ တၢ်ဂ့ၢ်လၢ နကမၤထွဲအီၤ လၢနတၢ်အိၣ်မူပူၤ. ဖဲနဖး လံာ်စီဆှံ တဆၢဂ့ၤ တဆၢဂ့ၤအခါ သံကွၢ်လီၤနသးလၢ ‘ခဲအံၤမ့ၢ်ဂ့ၤ ခါဆူညါမ့ၢ်ဂ့ၤ ယမၤထွဲ တၢ်ဂ့ၢ်လၢ ယဖးအံၤ ကသ့ဒ်လဲၣ်.’ အဒိ ဆိကမိၣ်ကွၢ်လၢ နဖး ၁ သ့းစၤလနံ ၅:၁၇, ၁၈. (ဖး.) ဝံၤဒီး ဆိကမိၣ်ထီၣ်လၢ တနံၤန့ၣ် နဃ့ထုကဖၣ် ပှဲၤဘျီလဲၣ် ဒီးနဃ့ဘၣ်ဃးဒီး တၢ်ဂ့ၢ်မနုၤလဲၣ်. နဆိမိၣ်ထီၣ် တၢ်ဂ့ၢ်လၢ နဘၣ်သးစံးဘျုး ယဟိဝၤယွၤ သ့စ့ၢ်ကီး. ဘၣ်သ့ၣ်သ့ၣ် ဖဲနဃ့ထုကဖၣ်အခါ နအဲၣ်ဒိး တဲဖျါထီၣ် တၢ်ဂ့ၢ်သၢခါလၢ နကစံးဘျုး ယဟိဝၤယွၤ. နမ့ၢ်ဆိကမိၣ်ထံ တၢ်ဂ့ၢ်လၢ နမၤလိဘၣ်တဖၣ် ထဲတစိၢ်ဖိ သနာ်က့ အကမၤစၢၤနၤဒ်သိး နကနၢ်ပၢၢ်ထီၣ် ကစၢ်ယွၤ အကလုၢ်ကထါ ဒီးမၤထွဲအီၤ. ဆိကမိၣ်ထီၣ်စ့ၢ်ကီးလၢ နမ့ၢ်ဆဲးမၤဒ်အံၤ ကိးနံၤဒဲးန့ၣ် အကကဲဘျုးလၢ နဂီၢ်ဒ်လဲၣ်. နမ့ၢ်ဆဲးမၤဒ်အံၤန့ၣ် နကကဲထီၣ်ပှၤလၢ အမၤထွဲ ကစၢ်ယွၤ အကလုၢ်ကထါ. ဘၣ်ဆၣ် တၢ်လၢနကဘၣ် မၤဂ့ၤထီၣ်အီၤ မ့ၢ်အိၣ်ဒီဒူၣ်န့ၣ် နကဘၣ်မၤဒ်လဲၣ်.

ပာ်လီၤဖီတၢၣ်လၢ နမၤထွဲအီၤညီ

၁၁. ဘၣ်မနုၤအဃိ တဘျီတခီၣ်န့ၣ် နသးကဟးဂီၤလဲၣ်. တဲဖျါထီၣ် တၢ်အဒိ.

^၁၁ ဖဲနဖး လံာ်စီဆှံအခါ နကထံၣ်ဘၣ် တၢ်လၢနကဘၣ် မၤထွဲအီၤ အိၣ်ဒီဒူၣ်အဃိ တဘျီတခီၣ်န့ၣ် နသးကဟးဂီၤ. အဒိ ဆိကမိၣ်ကွၢ်လၢ နဖးလံာ်စီဆှံ ဘၣ်ဃးဒီး တၢ်ကွၢ်မဲာ်ပှၤဂၤအဂ့ၢ်. (ယၤ ၂:၁-၈) ဒီးနသ့ၣ်ညါထီၣ်လၢ နကဘၣ် မၤဂ့ၤထီၣ် နတၢ်ရ့လိာ်သးဒီး ပှၤဂၤအဃိ နမၤတၢ်ဆီတလဲတနီၤ. နမၤဒ်န့ၣ်န့ၣ် အဂ့ၤမး. လၢခံတနံၤ နဖးလံာ်စီဆှံအဆၢ လၢအဘၣ်ဃးဒီး နကဘၣ်ပလီၢ်သးဘၣ်ဃး တၢ်လၢနတဲ. (ယၤ ၃:၁-၁၂) ဒီးနသ့ၣ်ညါလီၤသးလၢ တဘျီတခီၣ်န့ၣ် နတတဲတၢ်ဒီးပှၤဂၤလၢ တၢ်အဲၣ်တၢ်ကွံဘၣ် မ့တမ့ၢ် နတဲတၢ်လၢ အမၤဘၣ်ဒိ ပှၤသး. အဃိ နပာ်လီၤသးလၢ နကတဲတၢ်ဒီး ပှၤဂၤမုာ်မုာ် ဒီးတဲတၢ်လၢ အကဲထီၣ် တၢ်ဂံၢ်တၢ်ဘါ လၢပှၤဂၤအဂီၢ်. ဒီးလၢခံတဘျီ နဖးလံာ်စီဆှံ အတၢ်ဟ့ၣ်ပလီၢ် ဘၣ်ဃးဒီး ပှၤလၢအဒီသကိးဒီး ဟီၣ်ခိၣ် အဂ့ၢ်. (ယၤ ၄:၄-၁၂) ခဲအံၤစ့ၢ်ကီး နသ့ၣ်ညါလီၤသးလၢ နကဘၣ်ပလီၢ်သး ဘၣ်ဃးဒီး တၢ်လၢနဖး, နကွၢ် ဒီးတၢ်လၢနဒိကနၣ်. နသ့ၣ်ညါလၢ တၢ်လၢနကဘၣ် မၤဂ့ၤထီၣ်န့ၣ် အိၣ်ဒီဒူၣ် ဒီးနကဆိကမိၣ်လၢ နမၤတန့ၢ်ဘၣ်.

၁၂. တၢ်လၢပကဘၣ် မၤဂ့ၤထီၣ် မ့တမ့ၢ် ဆီတလဲအီၤ မ့ၢ်အိၣ်ဒီဒူၣ် သနာ်က့ ဘၣ်မနုၤအဃိ ပတလိၣ် သးဟးဂီၤဘၣ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)

^၁၂ တၢ်လၢပကဘၣ် မၤဂ့ၤထီၣ် မ့တမ့ၢ် ဆီတလဲအီၤ မ့ၢ်အိၣ်ဒီဒူၣ် သနာ်က့ ပတလိၣ် သးဟးဂီၤဘၣ်. ခီဖျိလၢ ပသ့ၣ်ညါ တၢ်လၢပကဘၣ် မၤဂ့ၤထီၣ် အိၣ်ဝဲအဃိ ပပာ်ဖျါထီၣ်လၢ ပအိၣ်ဒီး တၢ်ဆီၣ်လီၤသး ဒီးတၢ်ထံၣ်လၢအဂ့ၤ. အဃိ ပမ့မ့ၢ်ပှၤလၢ အအိၣ်ဒီး တၢ်ဆီၣ်လီၤသးန့ၣ် ဖဲပဖးလံာ်စီဆှံအခါ ပကဆိကမိၣ်ထံ တၢ်လၢပကဘၣ် မၤဂ့ၤထီၣ်အီၤန့ၣ် အိၣ်တမံၤမံၤဧါ. a ဒီးပကဘၣ် သ့ၣ်နီၣ်ထီၣ်လၢ ပကဘၣ် ဆဲးဒုးအိၣ်ထီၣ် “လုၢ်လၢ်သကဲာ်ပဝးအသီ” ထီဘိ. (ကလီး ၃:၁၀) အဃိ ဒ်သိး ပကကဲထီၣ်ပှၤလၢ အမၤထွဲ ကစၢ်ယွၤ အကလုၢ်ကထါအဂီၢ် တၢ်မနုၤ ကမၤစၢၤပှၤလဲၣ်.

၁၃. ဒ်သိး ပမၤထွဲတၢ်လၢ ပဖးကသ့အဂီၢ် ပကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၃ ဖဲနဖးလံာ်စီဆှံအခါ တၢ်လၢနဘၣ် မၤဂ့ၤထီၣ်အီၤ မ့ၢ်အိၣ်ဒီဒူၣ် ဘၣ်ဆၣ် တဘၣ်မၤအီၤ တဘျီဃီခဲလၢာ်တဂ့ၤ. ပာ်လီၤဖီတၢၣ်လၢ နမၤထွဲအီၤညီ ထဲတခါခံခါ. (ကတိၤ ၁၁:၂) မၤကွၢ်ဒ်အံၤ. အဆိကတၢၢ်န့ၣ် ကွဲးလီၤ တၢ်လၢနကဘၣ် မၤဂ့ၤထီၣ်တဖၣ် ဒီးဃုထၢဆိ တၢ်လၢနကမၤအီၤ တခါခံခါ. မ့မ့ၢ် တၢ်အဂၤလၢ နကဘၣ် မၤဂ့ၤထီၣ်အီၤတဖၣ်န့ၣ် နမၤအီၤလၢခံသ့. နကစးထီၣ် မၤဆိ ဖဲလဲၣ်တခါလဲၣ်.

၁၄. နကစးထီၣ် မၤဆိဖီတၢၣ် ဖဲလဲၣ်တခါလဲၣ်.

^၁၄ ဘၣ်သ့ၣ်သ့ၣ် နကစးထီၣ်မၤဆိ ဖီတၢၣ်လၢ နမၤထွဲအီၤ ညီ မ့တမ့ၢ် နကမၤဆိ တၢ်အရ့ဒိၣ်လၢ နကဘၣ် မၤဂ့ၤထီၣ်အီၤ. ဖဲနဆၢတဲာ်လီၤသးလၢ နကမၤဂ့ၤထီၣ် တၢ်လၢနဘၣ်မၤ တမံၤမံၤအခါ ဃုသ့ၣ်ညါအါထီၣ် တၢ်ဂ့ၢ်လၢ လံာ်လဲၢ်လၢ ပတၢ်ကရၢကရိ ထုးထီၣ်ဝဲ. အဒိ နဃုကွၢ် တၢ်ဂ့ၢ်လၢ တၢးထီခိးတၢ် လံာ်ရဲၣ်လီၤလၢ လံာ်လဲၢ်တဖၣ်အဂီၢ် သ့. တကးဒံးဘၣ် ဃ့ထုကဖၣ်လၢ ယဟိဝၤယွၤအအိၣ် ဒီးဃ့အီၤလၢ အကဟ့ၣ်နၤ ‘တၢ်သူၣ်အိၣ်သးအိၣ်တၢ် ဒီးတၢ်ဂံၢ်တၢ်ဘါလၢ နကမၤတၢ် အဂီၢ်.’ (ဖံလံး ၂:၁၃) ဝံၤဘျီ မၤထွဲတၢ်လၢ နမၤလိဘၣ်တဖၣ်. ဒီးဖဲနထံၣ်ဘၣ်လၢ နမၤလၢပှဲၤထီၣ် နဖီတၢၣ် ဒီးမၤအါထီၣ် ခရံာ်ဖိအတၢ်ဂ့ၤတၢ်ဝါ န့ၢ်ဝဲအခါ နကဘၣ်သး ဆဲးမၤ တၢ်လၢနကဘၣ် မၤဂ့ၤထီၣ် လၢခံတခါ. ဒီးတၢ်လၢနကဘၣ်မၤ လၢအဂၤတဖၣ်န့ၣ် နဆဲးမၤအီၤကညီ.

ပျဲကစၢ်ယွၤ “အကလုၢ်ကထါအံၤ မၤတၢ်” လၢနပူၤ

၁၅. ပှၤအါဂၤ ဖးလံာ်စီဆှံအါဘျီ ဘၣ်ဆၣ် အဝဲသ့ၣ် လီၤဆီဒီး ယဟိဝၤယွၤ အခ့အပှၤဒ်လဲၣ်. (၁ သ့းစၤလနံ ၂:၁၃)

^၁၅ ပှၤအါဂၤန့ၣ် အဝဲသ့ၣ် တဲဝဲလၢ အဖးလံာ်စီဆှံ ဝးတဘျုးဘျီလံ. ဘၣ်ဆၣ် အဝဲသ့ၣ် နာ်တၢ်လၢ လံာ်စီဆှံ သိၣ်လိဝဲဧါ. အဝဲသ့ၣ် ဂုာ်ကျဲးစၢးမၤထွဲ တၢ်လၢ လံာ်စီဆှံတဲဝဲ လၢအတၢ်အိၣ်မူအပူၤ စ့ၢ်ကီးဧါ. ပထံၣ်ဘၣ်လၢ ပှၤအါတက့ၢ်န့ၣ် တမၤထွဲ လံာ်စီဆှံ အတၢ်ဟံးစုနဲၣ်ကျဲဘၣ်. မ့မ့ၢ် ယဟိဝၤယွၤ အခ့အပှၤတဖၣ်န့ၣ် တမ့ၢ်ဒ်န့ၣ်ဘၣ်. ဒီးဒ်ခရံာ်ဖိလၢ တၢ်မၢဖိအစိၤအသိး ပတူၢ်လိာ် လံာ်စီဆှံ “ဒ်တၢ်လၢအမ့ၢ် တၢ်အနီၢ်ကီၢ်အသိး လၢအမ့ၢ် ယွၤအကလုၢ်ကထါ.” တကးဒံးဘၣ် ပဂုာ်ကျဲးစၢးမၤထွဲ လံာ်စီဆှံ အတၢ်ဟံးစုနဲၣ်ကျဲ လၢအဂ့ၤကတၢၢ်.—ဖး ၁ သ့းစၤလနံ ၂:၁၃.

၁၆. ဒ်သိး ပမၤထွဲ ကစၢ်ယွၤ အကလုၢ်ကထါ ကန့ၢ်အဂီၢ် ပကဘၣ်မၤဒ်လဲၣ်.

^၁၆ ပကဖး ကစၢ်ယွၤ အကလုၢ်ကထါ ဒီးမၤထွဲအီၤန့ၣ် တညီထီဘိဘၣ်. ဘၣ်သ့ၣ်သ့ၣ် ပကပာ်လီၤ တၢ်ဆၢကတီၢ်လၢ ပကဖးလံာ်စီဆှံ အဂီၢ်န့ၣ် ကကီတစဲး. ဒီးဘၣ်သ့ၣ်သ့ၣ် ပကဖးလံာ်စီဆှံ ချ့ချ့ ဒီးပတဆိကမိၣ်ထံ တၢ်ဂ့ၢ်လၢပဖးအီၤဘၣ်. ဒီးပသ့ၣ်ညါလၢ တၢ်လၢပကဘၣ် မၤဂ့ၤထီၣ်အီၤန့ၣ် အိၣ်ဒီဒူၣ်အဃိ ဘၣ်သ့ၣ်သ့ၣ် ပကဘၣ်ယိၣ်တၢ်. ဒ်သိး ပကဖးဘၣ်လံာ်စီဆှံ ဒီးကမၤထွဲအီၤအဂီၢ် တၢ်ဂ့ၢ်ကီ မ့ၢ်အိၣ်ဒ်လဲၣ် သနာ်က့ ခီဖျိလၢ ယဟိဝၤယွၤ အတၢ်မၤစၢၤအဃိ ပမၤနၢၤကွံာ် တၢ်ဂ့ၢ်ကီကန့ၢ်. အဃိ ပကဘၣ်တူၢ်လိာ် ယဟိဝၤယွၤ အတၢ်မၤစၢၤ ဒီးပတဘၣ် ကဲပှၤလၢ အနၢ်ဟူတၢ်ဝံၤဒီး သးပ့ၤနီၣ်ကွံာ်တၢ်ဘၣ်. ပကဘၣ် ကဲထီၣ်ပှၤလၢ အမၤထွဲ ကစၢ်ယွၤ အကလုၢ်ကထါ. ပမ့ၢ်ဖး လံာ်စီဆှံ ဒီးမၤထွဲအီၤလၢ ပတၢ်အိၣ်မူပူၤန့ၣ် ပကန့ၢ်ဘၣ် တၢ်သးခုနီၢ်ကီၢ်.—ယၤ ၁:၂၅.