တချုးလၢ ပမၤလိတၢ်ဒံးဘၣ်န့ၣ် ပကဘၣ် သံကွၢ်လီၤသးလၢ ‘ယကမၤလိဘၣ် တၢ်ဂ့ၢ်အသီ မနုၤလဲၣ်.’ ဖဲပမၤလိတၢ်အခါ ပကသ့ၣ်ညါအါထီၣ် တၢ်ဂ့ၢ်အသီအါမး ဘၣ်ဆၣ် ပတဘၣ်ကွၢ်ကပာ် တၢ်ဂ့ၢ်လၢ ယဟိဝၤယွၤ ဘၣ်သးသိၣ်လိပှၤဘၣ်. အဃိ ဖဲပမၤနီၢ်ကစၢ် တၢ်မၤလိလံာ်စီဆှံအခါ ဒ်သိး ပကအိၣ်ဒီး တၢ်ထံၣ်လၢအလဲၢ်အဂီၢ် ပကဘၣ်မၤဒ်လဲၣ်.

ဃ့ယဟိဝၤယွၤ အတၢ်ကူၣ်သ့. ပကဘၣ် ဃ့ယဟိဝၤယွၤလၢ ကမၤစၢၤပှၤဒ်သိး ပကနၢ်ပၢၢ်ထီၣ် တၢ်ဂ့ၢ်လၢ အဘၣ်သးသိၣ်လိပှၤ ခဲအံၤ. (ယၤ ၁:၅) ပတဘၣ်သးမံထဲလၢ တၢ်ဂ့ၢ်လၢ ပသ့ၣ်ညါပာ်စၢၤတဖၣ်ဘၣ်. ပကဘၣ် ဆဲးဃုသ့ၣ်ညါအါထီၣ် တၢ်ဂ့ၢ်လၢ ယဟိဝၤယွၤ ဘၣ်သးသိၣ်လိပှၤ.—ကတိၤ ၃:၅, ၆.

ပျဲလံာ်စီဆှံ ဆီတလဲနတၢ်အိၣ်မူ. “ကစၢ်ယွၤ အကလုၢ်ကထါန့ၣ်မူဝဲ.” (ဧ့ၤ ၄:၁၂) အဃိ ဖဲပဖးလံာ်စီဆှံ တဘျီဂ့ၤတဘျီဂ့ၤအခါ ကစၢ်ယွၤ “အကလုၢ်ကထါ” ကသိၣ်လိပှၤ တၢ်ဂ့ၢ်လၢအသီ ဒီးကမၤစၢၤပှၤဒ်သိး ပကမၤဂ့ၤထီၣ် ပတၢ်အိၣ်မူ လၢကျဲတဘိဘိ. ဘၣ်ဆၣ် ပမ့ၢ်တူၢ်လိာ် တၢ်ဂ့ၢ်လၢ ယဟိဝၤယွၤ သိၣ်လိပှၤမး အကမၤစၢၤပှၤ.

ပာ်လုၢ်ပာ်ပှ့ၤ တၢ်ခဲလၢာ်လၢ ယဟိဝၤယွၤ ကတဲာ်ကတီၤန့ၢ်ပှၤ. နီၢ်သးတၢ်အီၣ်လၢ ယဟိဝၤယွၤ ကတဲာ်ကတီၤန့ၢ်ပှၤန့ၣ် အလီၤဂာ်ဒီး “တၢ်အီၣ်လၢ အဝံၣ်ကတၢၢ်.” (ၡါ ၂၅:၆) အဃိ တဘၣ်ကွၢ်ကပာ် နီၢ်သးတၢ်အီၣ်လၢ နဆိကမိၣ်လၢ နမၤလိအဂ့ၢ် တမုာ်ဘၣ်န့ၣ်တဂ့ၤ. နီၢ်သး “တၢ်အီၣ်” တဖၣ်အံၤ ကမၤစၢၤနၤ အါမး ဒီးနမၤလိတၢ် ကမုာ်ဒိၣ်ထီၣ်.