၁. တယံာ်လၢၤဘၣ်န့ၣ် ယ့ၣ်ၡူး ကမၤမနုၤလဲၣ်.

 ပအိၣ်မူဘၣ်လၢ ဆၢကတီၢ်ကီခဲ အတီၢ်ပူၤ ဒီးတယံာ်ဘၣ်န့ၣ် ယ့ၣ်ၡူး ကစံၣ်ညီၣ် ပှၤအိၣ်လၢ ဟီၣ်ခိၣ်ချၢခဲလၢာ်. တချုးလၢ ယ့ၣ်ၡူးစံၣ်ညီၣ်တၢ် ဒံးဘၣ်န့ၣ် အဒုးသ့ၣ်ညါဆိ အပျဲၢ်အဘီၣ် ဘၣ်ဃးဒီး တၢ်ကကဲထီၣ်သးလၢ ဟီၣ်ခိၣ် ဒီး “တၢ်အစိၤလၢ အလီၢ်ခံကတၢၢ် . . . အတၢ်ပနီၣ်.” (မး ၂၄:၃) တၢ်ပနီၣ်အံၤ ပထံၣ်ဘၣ်အီၤဖဲ မးသဲ အဆၢဒိၣ် ၂၄, ၂၅ ဒီးဖဲ မၢ်ကူး အဆၢဒိၣ် ၁၃ ဒီးလူၤကၣ် အဆၢဒိၣ် ၂၁.

၂. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ် ဒီးအကမၤစၢၤပှၤဒ်လဲၣ်.

^၂ ယ့ၣ်ၡူး တဲဖျါထီၣ်ဝဲ တၢ်အဒိသၢခါလၢ ကမၤစၢၤပှၤဒ်သိး ပကအိၣ် ကတီၤသးအဂီၢ်. တၢ်အဒိတဖၣ်န့ၣ် မ့ၢ်ဝဲ သိဒီးမဲာ်တဲးလဲး, ပိာ်မုၣ်လၢ အကူၣ်တၢ်သ့ ဒီးပိာ်မုၣ်လၢ အသးတဆးဘၣ် ဒီးစ့တၤလၣ်. တၢ်အဒိ တခါဘၣ်တခါန့ၣ် ကမၤစၢၤပှၤလၢ ပကနၢ်ပၢၢ်ထီၣ် ဘၣ်ဃးဒီး ပှၤတဂၤ ကဘၣ်တၢ်စံၣ်ညီၣ်အီၤ ဒ်အတၢ်ပာ်သူၣ်ပာ်သး အိၣ်ဝဲအသိး. လၢတၢ်မၤလိတခါအံၤ ပကတဲသကိး တၢ်အဒိသၢခါအံၤ ဒီးပမၤထွဲအီၤ ကသ့ဒ်လဲၣ်. ခဲအံၤ ပကတဲသကိး တၢ်အဒိ တၢတခါ လၢအဘၣ်ဃး သိဒီးမဲာ်တဲးလဲး.

သိဒီးမဲာ်တဲးလဲး

၃. ယ့ၣ်ၡူး ကစံၣ်ညီၣ် ပှၤဟီၣ်ခိၣ်ဖိ လၢအခါဖဲလဲၣ်.

^၃ ယ့ၣ်ၡူး တဲတၢ်အဒိ ဘၣ်ဃး သိဒီးမဲာ်တဲးလဲးန့ၣ် အဲၣ်ဒိး တဲဝဲလၢ အကစံၣ်ညီၣ် ပှၤဟီၣ်ခိၣ်ဖိန့ၣ် ကဒိးသန့ၤထီၣ်သးလၢ အဝဲသ့ၣ်တူၢ်လိာ် တၢ်သးခုကစီၣ်ဧါ ဒီးအဝဲသ့ၣ်ဆီၣ်ထွဲ ပှၤလၢအဘၣ်တၢ်ဒိးဖှူအီၤဧါ. (မး ၂၅:၃၁-၄၆) ဖဲ “တၢ်နးတၢ်ဖှီၣ်ဖးဒိၣ်” အဆၢကတီၢ်, တချုးအၢ်မက့းဒိၣ် စးထီၣ်ဒံးဘၣ်န့ၣ် ယ့ၣ်ၡူး ကစံၣ်ညီၣ် ပှၤဟီၣ်ခိၣ်ဖိ. (မး ၂၄:၂၁) ဒ်ပှၤကွၢ်သိ နီၤဖးဝဲ သိဒီးမဲာ်တဲးလဲးအသိး ယ့ၣ်ၡူး ကနီၤဖးဝဲ ပှၤလၢအဆီၣ်ထွဲ ပှၤလၢအဘၣ်တၢ်ဒိးဖှူအီၤ ဒီးပှၤလၢတဆီၣ်ထွဲ အဝဲသ့ၣ်ဘၣ်.

၄. ဒ်ယၡါယၤ ၁၁:၃, ၄ ပာ်ဖျါထီၣ်ဝဲအသိး ယ့ၣ်ၡူး ကစံၣ်ညီၣ်တၢ်ဒ်လဲၣ်. (ကွၢ်စ့ၢ်ကီးတၢ်ဂီၤ .)

^၄ လံာ်စီဆှံ ပာ်ဖျါထီၣ်ဝဲလၢ ဖဲယ့ၣ်ၡူး စံၣ်ညီၣ်တၢ်လၢ ယဟိဝၤယွၤ အခၢၣ်စးအခါ အကစံၣ်ညီၣ်တၢ် တီတီလိၤလိၤထီဘိ. (ဖး ယၡါယၤ ၁၁:၃, ၄.) ဒီးဖဲအစံၣ်ညီၣ်  ပှၤဟီၣ်ခိၣ်ဖိအခါ အကွၢ်အဝဲသ့ၣ် လုၢ်လၢ်သကဲာ်ပဝး, အတၢ်ပာ်သူၣ်ပာ်သး, အတၢ်စံးတၢ်ကတိၤ ဒီးကွၢ်စ့ၢ်ကီးလၢ မ့ၢ်အဝဲသ့ၣ် ဆီၣ်ထွဲမၤစၢၤ ပှၤလၢအဘၣ်တၢ်ဒိးဖှူအီၤဧါ. (မး ၁၂:၃၆, ၃၇; ၂၅:၄၀) ဖဲန့ၣ်န့ၣ် ယ့ၣ်ၡူး ကသ့ၣ်ညါဝဲ ပှၤလၢအဆီၣ်ထွဲ ပှၤလၢအဘၣ်တၢ်ဒိးဖှူအီၤ ဒီးပှၤလၢအဘၣ်တၢ်ဒိးဖှူအီၤ အတၢ်မၤ. a ကျဲအရ့ဒိၣ်ကတၢၢ် တဘိလၢ ပဆီၣ်ထွဲ ပှၤလၢအဘၣ်တၢ်ဒိးဖှူအီၤန့ၣ် မ့ၢ်ဝဲပစံၣ်တဲၤတဲလီၤတၢ်. ပမ့ၢ်ဆီၣ်ထွဲ အဝဲသ့ၣ်ဒ်အံၤန့ၣ် ယ့ၣ်ၡူး ကပာ်ပနီၣ်ပှၤဒ် “ပှၤတီပှၤလိၤ” ဒီးပကအိၣ်ဒီး တၢ်ခွဲးတၢ်ယာ်လၢ ပကအိၣ်မူဘၣ် လီၤထူလီၤယိာ် လၢဟီၣ်ခိၣ်. (မး ၂၅:၄၆; လီၣ် ၇:၁၆, ၁၇) တၢ်ဆိၣ်ဂ့ၤ တခါအံၤ အဂ့ၤဒိၣ်မး. ဖဲတၢ်နးတၢ်ဖှီၣ်ဖးဒိၣ် အဆၢကတီၢ် ဒီးဖဲတၢ်နးတၢ်ဖှီၣ်ဖးဒိၣ် ဝံၤအလီၢ်ခံ ပမ့ၢ်ဆဲးအိၣ်ဒီး တၢ်သးတီန့ၣ် ပမံၤကဆဲးအိၣ်လၢ “လံာ်မူ” အပူၤ.—လီၣ် ၂၀:၁၅.

၅. တၢ်အဒိ ဘၣ်ဃး သိဒီးမဲာ်တဲးလဲးန့ၣ် ပန့ၢ်ဘၣ် တၢ်မၤလိဒ်လဲၣ် ဒီးလၢတၢ်အဒိအံၤန့ၣ် မတဂၤ ကန့ၢ်ဘၣ်အဘျုးလဲၣ်.

^၅ ပာ်ဖျါထီၣ်လၢ နအိၣ်ဒီး တၢ်သးတီ. ယ့ၣ်ၡူး တဲတၢ်အဒိ ဘၣ်ဃး သိဒီးမဲာ်တဲးလဲးန့ၣ် အဘၣ်ထွဲ အါတက့ၢ်လၢ ပှၤလၢအအိၣ်ဒီး တၢ်မုၢ်လၢ်လၢ ကအိၣ်မူဘၣ် လီၤထူလီၤယိာ် လၢဟီၣ်ခိၣ်. အဝဲသ့ၣ် ပာ်ဖျါထီၣ်တၢ်နာ်န့ၣ် တမ့ၢ်ထဲ အဆီၣ်ထွဲ ခရံာ်အဒီပုၢ်ဝဲၢ် လၢတၢ်စံၣ်တဲၤတဲလီၤတၢ်မၤ တခါဘၣ်. ဘၣ်ဆၣ် အဝဲသ့ၣ် ပာ်ဖျါထီၣ်စ့ၢ်ကီး တၢ်သးတီခီဖျိ မၤထွဲဝဲ ကုၢ်လၢအတီ ဒီးအကူၣ်တၢ်သ့ လၢယ့ၣ်ၡူး ဃုထၢထီၣ်ဝဲန့ၣ် အတၢ်ဟံးစုနဲၣ်ကျဲ. (မး ၂၄:၄၅) သနာ်က့ ပှၤလၢ အအိၣ်ဒီး တၢ်မုၢ်လၢ်လၢ ကလဲၤထီၣ်လၢ မူခိၣ်န့ၣ် အဝဲသ့ၣ် ကဘၣ်သးစၢၢ်ဆၢ တၢ်အဒိတခါအံၤစ့ၢ်ကီး. ဘၣ်မနုၤအဃိလဲၣ်. ခီဖျိလၢ ယ့ၣ်ၡူးကွၢ်စ့ၢ်ကီး အဝဲသ့ၣ် အတၢ်အိၣ်ထီၣ်အိၣ်လီၤ, အတၢ်ပာ်သူၣ်ပာ်သး ဒီးအတၢ်စံးတၢ်ကတိၤ. အဃိ အဝဲသ့ၣ် ကဘၣ်ပာ်ဖျါထီၣ် တၢ်သးတီစ့ၢ်ကီး. တကးဒံးဘၣ် ယ့ၣ်ၡူး တဲတၢ်အဒိ အဂၤခံခါလၢ အကဲထီၣ် တၢ်ဟ့ၣ်ပလီၢ်လၢ ပှၤလၢအဘၣ်တၢ်ဒိးဖှူအီၤအဂီၢ်. တၢ်အဒိခံခါအံၤ ပထံၣ်ဘၣ် စ့ၢ်ကီးဖဲ မးသဲ အဆၢဒိၣ် ၂၅ အပူၤ. ခဲအံၤ ပကတဲသကိး တၢ်အဒိ ဘၣ်ဃး မုၣ်ကနီၤလၢ အကူၣ်တၢ်သ့ ဒီးမုၣ်ကနီၤလၢ အသးတဆးဘၣ်.

မုၣ်ကနီၤလၢ အကူၣ်တၢ်သ့ ဒီးမုၣ်ကနီၤလၢ အသးတဆးဘၣ်

၆. မုၣ်ကနီၤယဲၢ်ဂၤန့ၣ် အပာ်ဖျါထီၣ်လၢ အကူၣ်တၢ်သ့ဒ်လဲၣ်. (မးသဲ ၂၅:၆-၁၀)

^၆ ယ့ၣ်ၡူး တဲဝဲတၢ်အဒိ ဘၣ်ဃး မုၣ်ကနီၤ အဂၤတဆံ လၢအလဲၤသဂၢၢ်ဝဲ တလးမူးပိာ်ခွါ. (မး ၂၅:၁-၄) အဝဲသ့ၣ်ခဲလၢာ် မုၢ်လၢ်ဝဲလၢ ကလဲၤနုာ်လီၤဘၣ်လၢ တလးမူးပိာ်ခွါ အတၢ်ဖျီအမူး. လၢမုၣ်ကနီၤ အဂၤတဆံအကျါ ယ့ၣ်ၡူးတဲဝဲလၢ ယဲၢ်ဂၤန့ၣ် အကဲပှၤလၢ “အကူၣ်တၢ်သ့” ဒီးမ့မ့ၢ် အဂၤယဲၢ်ဂၤန့ၣ် အကဲပှၤလၢ “အသးတဆးဘၣ်.” မုၣ်ကနီၤလၢ အကူၣ်တၢ်သ့ ယဲၢ်ဂၤန့ၣ် အအိၣ်ကတီၤသး ဒီးအအိၣ်ပလီၢ်သး. တလးမူးပိာ်ခွါ မ့ၢ်ဟဲတုၤ ဆိမ့ၢ်ဂ့ၤ မ့ၢ်ဟဲတုၤလၢ ဖးဖီမုၢ်မ့ၢ်ဂ့ၤ မုၣ်ကနီၤလၢ အကူၣ်တၢ်သ့ ယဲၢ်ဂၤန့ၣ် အိၣ်ကတီၤသး လၢလၢပှဲၤပှဲၤ လၢကအိၣ်ခိးအီၤ. အဃိ အဝဲသ့ၣ် ဟဲစိာ်မ့ၣ်အူဒၢအသိ လၢကဒွဲၣ်ကပီၤထီၣ် မ့ၣ်အူအဂီၢ်. တကးဒံးဘၣ် တလးမူးပိာ်ခွါ မ့ၢ်ဟဲစဲၤခံဘၣ်ဖုး သနာ်က့ ဒ်သိး အမ့ၣ်အူဒၢ တလီၤပံာ်တဂ့ၤအဂီၢ် အဝဲသ့ၣ် ဟဲစိာ်ဃုာ်ဒီး သိအပိၣ်. (ဖး မးသဲ ၂၅:၆-၁၀.) ဒီးဖဲတလးမူးပိာ်ခွါ ဟဲတုၤအခါ မုၣ်ကနီၤလၢ အကူၣ်တၢ်သ့ ယဲၢ်ဂၤန့ၣ် လဲၤနုာ်ဒီးအီၤလၢ တၢ်ဖျီအမူး. ဒ်န့ၣ်အသိး ခရံာ်ဖိလၢ အဘၣ်တၢ်ဒိးဖှူအီၤတဖၣ် မ့ၢ်အိၣ်ကတီၤသး ခီဖျိ ဆဲးအိၣ်ပလီၢ်သး ဒီးအိၣ်ဒီး တၢ်သးတီ တုၤလၢ ယ့ၣ်ၡူးခရံာ် ဟဲတုၤန့ၣ် အဝဲသ့ၣ် ကန့ၢ်ဘၣ်ခိၣ်ဖးလၢ ကပၢတၢ်ဒီးယ့ၣ်ၡူး လၢယွၤအဘီအမုၢ်အပူၤ. b (လီၣ် ၇:၁-၃) မ့မ့ၢ် မုၣ်ကနီၤလၢ အသးတဆးဘၣ် ယဲၢ်ဂၤမီၤ.

၇. ပိာ်မုၣ်လၢ အသးတဆးဘၣ် ယဲၢ်ဂၤန့ၣ် တၢ်ကဲထီၣ်သးဒီး အဝဲသ့ၣ်ဒ်လဲၣ် ဒီးဘၣ်မနုၤ အဃိလဲၣ်.

^၇ မုၣ်ကနီၤလၢ အသးတဆးဘၣ် ယဲၢ်ဂၤန့ၣ် ဖဲတလးမူးပိာ်ခွါ  ဟဲတုၤအခါ အဝဲသ့ၣ် တအိၣ်ကတီၤသးဘၣ်အဃိ အဝဲသ့ၣ် တလီၤဂာ်ဒီး မုၣ်ကနီၤလၢ အကူၣ်တၢ်သ့ ယဲၢ်ဂၤန့ၣ်ဘၣ်. အဝဲသ့ၣ် မ့ၣ်အူဒၢ ဘူးကလီၤပံာ် ဒီးအသိပိၣ် တအိၣ်စ့ၢ်ကီးဘၣ်. ဖဲအဝဲသ့ၣ် သ့ၣ်ညါဝဲလၢ တလးမူးပိာ်ခွါ ဟဲဘူးကတုၤအခါ အဝဲသ့ၣ် ဘၣ်လဲၤပှ့ၤ မ့ၣ်အူဒၢအသိ. ဒီးဖဲတလးမူးပိာ်ခွါ ဟဲတုၤအခါ အဝဲသ့ၣ် ဟဲက့ၤတတုၤဒံးဘၣ်. ဖဲန့ၣ်အခါ “ပှၤမုၣ်ကနီၤလၢ အအိၣ်ကတဲာ်ကတီၤပာ်စၢၤ အသးတဖၣ်န့ၣ် လဲၤနုာ်လီၤပိာ်အခံဆူ တၢ်ဖျီအမူးအပူၤ ဝံၤဒီးတြဲၤဘၣ်တၢ် ကးပံးဃာ်အီၤ.” (မး ၂၅:၁၀) လၢခံ ဖဲမုၣ်ကနီၤလၢ အသးတဆးဘၣ် ယဲၢ်ဂၤ ဟဲက့ၤတုၤအခါ အဝဲသ့ၣ် ဘၣ်သးလဲၤနုာ်လီၤလၢမူးပူၤ ဘၣ်ဆၣ် တလးမူးပိာ်ခွါ တဲအဝဲသ့ၣ်လၢ “ယတသ့ၣ်ညါသုဘၣ်.” (မး ၂၅:၁၁, ၁၂) မုၣ်ကနီၤလၢ အသးတဆးဘၣ် ယဲၢ်ဂၤန့ၣ် အဝဲသ့ၣ် ကသဂၢၢ် တလးမူးပိာ်ခွါအဂီၢ် အဝဲသ့ၣ် တအိၣ်ကတီၤသး ဂ့ၤဂ့ၤဘၣ်. ဘၣ်ဃးဒီး တၢ်အဒိအံၤ ပှၤလၢအဘၣ်တၢ်ဒိးဖှူအီၤတဖၣ် န့ၢ်ဘၣ်တၢ်မၤလိဒ်လဲၣ်.

၈-၉. တၢ်အဒိ ဘၣ်ဃးဒီး မုၣ်ကနီၤတဖၣ်န့ၣ် ပှၤလၢအဘၣ်တၢ်ဒိးဖှူအီၤတဖၣ် ဟံးန့ၢ်တၢ်မၤလိ သ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၈ ပာ်ဖျါထီၣ်လၢ နအိၣ်ကတီၤသး ဒီးအိၣ်ပလီၢ်သး. ယ့ၣ်ၡူး တအဲၣ်ဒိး တဲဝဲလၢ ပှၤဘၣ်တၢ်ဒိးဖှူအီၤ အိၣ်ဝဲခံဖု လၢအမ့ၢ် တဖုန့ၣ် အအိၣ်ကတီၤသး တုၤလၢ တၢ်အကတၢၢ် ဒီးအဂၤတဖုန့ၣ် တအိၣ်ကတီၤသးန့ၣ်ဘၣ်. နီၢ်ကီၢ်န့ၣ် အအဲၣ်ဒိးတဲ ဘၣ်ဃး တၢ်ကကဲထီၣ်သးဒီး ပှၤလၢအဘၣ်တၢ်ဒိးဖှူအီၤလၢ အတအိၣ်ကတီၤသး ဒီးတတီတုၤလၢ တၢ်အကတၢၢ်ဘၣ်တဖၣ်. အဝဲသ့ၣ် မ့ၢ်တအိၣ်ကတီၤသးဘၣ်န့ၣ် အဝဲသ့ၣ် တန့ၢ်ဘၣ်ခိၣ်ဖးဘၣ်. (ယိၤ ၁၄:၃, ၄) တၢ်ဂ့ၢ်တခါအံၤ အရ့ဒိၣ်ဒိၣ်မး. အဃိ ပတၢ်မုၢ်လၢ် မ့ၢ်အိၣ်လၢ ပကအိၣ်မူဘၣ်လၢ မူခိၣ်မ့ၢ်ဂ့ၤ ဟီၣ်ခိၣ်မ့ၢ်ဂ့ၤ ပဝဲခဲလၢာ် ပကဘၣ်သးစၢၢ်ဆၢ တၢ်ဟ့ၣ်ပလီၢ် လၢတၢ်အဒိ ဘၣ်ဃးမုၣ်ကနီၤတဖၣ်အံၤ. ပကဘၣ် ဆဲးအိၣ်ပလီၢ်သး ဒီးအိၣ်ကတီၤသးထီဘိ. တကးဒံးဘၣ် ပကဘၣ်ဆဲးအိၣ်ဒီး တၢ်တူၢ်န့ၢ်ခီၣ်ကဲ တုၤလၢအကတၢၢ်.—မး ၂၄:၁၃.

^၉ တၢ်အဒိလၢ ယ့ၣ်ၡူးတဲဝဲ ဘၣ်ဃးဒီး မုၣ်ကနီၤတဖၣ်အံၤ ပာ်ဖျါန့ၢ်ပှၤလၢ ပကဘၣ်အိၣ်ကတီၤသး ဒီးအိၣ်ပလီၢ်သး. ဝံၤဒီး ယ့ၣ်ၡူး တဲတၢ်အဒိ ဘၣ်ဃး စ့တၤလၣ်. တၢ်အဒိ ဘၣ်ဃး စ့တၤလၣ်န့ၣ် ပာ်ဖျါန့ၢ်ပှၤလၢ ပကဘၣ်မၤ ကစၢ်ယွၤ အတၢ်မၤဆူၣ်ဆူၣ်.

 စ့တၤလၣ်

၁၀. ကုၢ်အဆိကတၢၢ်ခံဂၤ ပာ်ဖျါထီၣ်လၢ အဝဲသ့ၣ် အိၣ်ဒီးတၢ်သးတီဒ်လဲၣ်. (မးသဲ ၂၅:၁၉-၂၃)

^၁၀ လၢတၢ်အဒိ ဘၣ်ဃးဒီး စ့တၤလၣ်န့ၣ် ယ့ၣ်ၡူးတဲဝဲလၢ ကုၢ်အဆိကတၢၢ်ခံဂၤ တီဒီးအကစၢ် ဒီးသၢဂၤတဂၤန့ၣ် တတီဒီးအကစၢ်ဘၣ်. (မး ၂၅:၁၄-၁၈) ကုၢ်လၢအတီခံဂၤန့ၣ် အဝဲသ့ၣ် မၤတၢ်ဆူၣ်ဆူၣ် ဒီးမၤအါထီၣ်ဝဲစ့လၢ အကစၢ်ဟ့ၣ်အဝဲသ့ၣ်. တချုးလၢ အကစၢ်လဲၤလၢ ထံဂၤကီၢ်ဂၤ ဒံးဘၣ်န့ၣ် အဟ့ၣ်ဝဲ အကုၢ်တဖၣ်လၢ စ့အတၤလၣ် လၢအလုၢ်အပှ့ၤအါမး. ကုၢ်လၢအတီခံဂၤ မၤတၢ်ဆူၣ်ဆူၣ် ဒီးသူစ့ သ့သ့ဘၣ်ဘၣ်အဃိ အဝဲသ့ၣ် န့ၢ်ဘၣ်အဘျုးဒ်လဲၣ်. ဖဲအကစၢ်ဟဲက့ၤအခါ စ့လၢအဝဲသ့ၣ် မၤအါထီၣ်ဝဲ ခံစးန့ၣ် အကစၢ် ဟ့ၣ်က့ၤအဝဲသ့ၣ်. တကးဒံးဘၣ် အကစၢ် ပတြၢၤအဝဲသ့ၣ် ဒီးအဝဲသ့ၣ် “သးခုဃုာ်ဒီး [အ] ကစၢ်.” (ဖး မးသဲ ၂၅:၁၉-၂၃.) မ့မ့ၢ် ကုၢ်သၢဂၤတဂၤမီၤ. စ့လၢအကစၢ် ဟ့ၣ်အီၤန့ၣ် အမၤဝဲဒ်လဲၣ်.

၁၁. ကုၢ်လၢ “အကၢၣ်” တဂၤန့ၣ် တၢ်ကဲထီၣ်သးဒီးအီၤဒ်လဲၣ်.

^၁၁ ကုၢ်သၢဂၤတဂၤလၢ အဒိးန့ၢ်ဘၣ် စ့တတၤလၣ်န့ၣ် အကဲကုၢ်လၢ “အကၢၣ်.” အကစၢ်ဘၣ်သးလၢ အကသူစ့ သ့သ့ဘၣ်ဘၣ်. ဘၣ်ဆၣ် ကုၢ်တဂၤအံၤ လဲၤပာ်ခူသူၣ်စ့ လၢတၢ်ပူၤ. ဖဲအကစၢ် ဟဲက့ၤအခါ ကုၢ်တဂၤအံၤ အစ့တအါထီၣ် နီတတၤလၣ်ဘၣ် ဒီးဟ့ၣ်က့ၤ စ့တတၤလၣ်န့ၣ် လၢအကစၢ်အအိၣ်. ပထံၣ်ဘၣ် စ့ၢ်ကီးလၢ ကုၢ်တဂၤအံၤ အတၢ်ပာ်သူၣ်ပာ်သး တဂ့ၤဘၣ်. ကုၢ်တဂၤအံၤ တမၤအါထီၣ်စ့ဘၣ် ဒီးအတဃ့ဝံသးစူၤ အကစၢ်စ့ၢ်ကီးဘၣ်. ဒီးအကိး အကစၢ်လၢ “ပှၤလၢအကီတဂၤ.” အဃိ ကုၢ်တဂၤအံၤ အကစၢ် တဘၣ်သူၣ်ဘၣ်သးအီၤဘၣ်. တကးဒံးဘၣ် အကစၢ် ဟံးန့ၢ်က့ၤ စ့တတၤလၣ်အံၤ လၢအအိၣ် ဒီးနီဟးထီၣ်အီၤ လၢဟံၣ်ပူၤ.—မး ၂၅:၂၄, ၂၆-၃၀.

၁၂. ကုၢ်လၢအတီခံဂၤန့ၣ် ဒိလီၤဝဲ မတဂၤ သ့ၣ်တဖၣ်လဲၣ်.

^၁၂ ကုၢ်လၢအတီခံဂၤန့ၣ် ဒိလီၤဝဲ ခရံာ်ဖိလၢ အဘၣ်တၢ်ဒိးဖှူအီၤ လၢအအိၣ်ဒီးတၢ်သးတီ. ကုၢ်အကစၢ်လၢ အကဲယ့ၣ်ၡူးန့ၣ် ကွဲမုာ်အဝဲသ့ၣ်လၢ က “သးခုဃုာ်ဒီး [အ] ကစၢ်.” ဒီးပှၤလၢအဘၣ်တၢ်ဒိးဖှူအီၤတဖၣ်အံၤ ကဒိးန့ၢ်ဘၣ် ခိၣ်ဖးလၢအမ့ၢ် တၢ်ဂဲၤဆၢထၢၣ် သမူထီၣ်က့ၤ အဆိကတၢၢ်တတီၤ. (မး ၂၅:၂၁, ၂၃; လီၣ် ၂၀:၅) မ့မ့ၢ် ကုၢ်လၢအကၢၣ်တဂၤန့ၣ် အကဲဝဲ တၢ်ဟ့ၣ်ပလီၢ်လၢ ပှၤလၢအဘၣ် တၢ်ဒိးဖှူအီၤတဖၣ်အဂီၢ်. ဘၣ်မနုၤအဃိ ပတဲဒ်န့ၣ်လဲၣ်.

၁၃-၁၄. တၢ်အဒိ ဘၣ်ဃးဒီး စ့တၤလၣ်န့ၣ် ပှၤလၢအဘၣ်တၢ်ဒိးဖှူအီၤတဖၣ် ဟံးန့ၢ်တၢ်မၤလိ သ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

 ^၁၃ ဂုာ်ကျဲးစၢး မၤကစၢ်ယွၤ အတၢ်မၤဆူၣ်ဆူၣ်. တၢ်အဒိ ဘၣ်ဃးဒီး မုၣ်ကနီၤ ဒီးစ့တၤလၣ်န့ၣ် ယ့ၣ်ၡူး တအဲၣ်ဒိး တဲဝဲအခီပညီလၢ ပှၤလၢအဘၣ်တၢ်ဒိးဖှူအီၤတဖၣ် ကကဲထီၣ် ပှၤလၢအကၢၣ်ဘၣ်. အအဲၣ်ဒိးတဲဝဲလၢ အဝဲသ့ၣ် တၢ်သးဆူၣ် မ့ၢ်တအိၣ်လၢၤဘၣ်န့ၣ် တၢ်ကကဲထီၣ်သးဒီး အဝဲသ့ၣ်ဒ်လဲၣ်အဂ့ၢ်. ဒ်အဝဲသ့ၣ် “မ့ၢ်ပှၤလၢ အဘၣ်တၢ်ကိးန့ၢ်အီၤ ဒီးဃုထၢထီၣ်အီၤ တဖၣ်အသိး” အဝဲသ့ၣ် တၢ်သးဆူၣ် မ့ၢ်တအိၣ်လၢၤဘၣ်န့ၣ် အဝဲသ့ၣ် တနုာ်လီၤဘၣ်လၢ ကစၢ်ယွၤ အဘီအမုၢ်ပူၤဘၣ်.—၂ ပ့း ၁:၁၀.

^၁၄ ယ့ၣ်ၡူး တဲဝဲတၢ်အဒိ ဘၣ်ဃးဒီး မုၣ်ကနီၤ ဒီးစ့တၤလၣ်န့ၣ် ပာ်ဖျါထီၣ်ဝဲ ၡဲၡဲလၢ ပှၤလၢအဘၣ်တၢ်ဒိးဖှူအီၤတဖၣ် ကဘၣ်အိၣ်ကတီၤသး, အိၣ်ပလီၢ်အသး ဒီးကဘၣ်မၤ ကစၢ်ယွၤ အတၢ်မၤဆူၣ်ဆူၣ်. ပှၤလၢအဘၣ်တၢ်ဒိးဖှူအီၤတဖၣ်န့ၣ် ယ့ၣ်ၡူး ဟ့ၣ်ပလီၢ် အဝဲသ့ၣ်လၢ တၢ်အဂၤ တမံၤမံၤဒံးဧါ. ယ့ၣ်ၡူးဟ့ၣ်ပလီၢ် အဝဲသ့ၣ်ဒံး ဒီးအတၢ်ဟ့ၣ်ပလီၢ်န့ၣ် ပထံၣ်ဘၣ်ဖဲ မးသဲ ၂၄:၄၀, ၄၁.

“တၢ်ကဟံးန့ၢ်” မတဂၤလဲၣ်

၁၅-၁၆. ဒ် မးသဲ ၂၄:၄၀, ၄၁ ပာ်ဖျါထီၣ်ဝဲအသိး ဘၣ်မနုၤအဃိ ပှၤလၢအဘၣ်တၢ်ဒိးဖှူအီၤတဖၣ် ကဘၣ်အိၣ်ပလီၢ်သးလဲၣ်.

^၁၅ တချုးလၢ ယ့ၣ်ၡူး တဲတၢ်အဒိ သၢခါတခါဒံးဘၣ်န့ၣ် အတဲဖျါထီၣ်ဝဲ ဘၣ်ဃးဒီး လၢခံကတၢၢ်န့ၣ် ကစၢ်ယွၤ ကဃုထၢ ပှၤလၢအဘၣ်တၢ်ဒိးဖှူအီၤ ဖဲလဲၣ်တဂၤလဲၣ်. ယ့ၣ်ၡူး တဲတၢ်အဒိ ဘၣ်ဃးဒီး ပိာ်ခွါခံဂၤလၢ အအိၣ်လၢ တၢ်ပျီပူၤ ဒီးပိာ်မုၣ်ခံဂၤလၢ အဂူာ်ဆၢၣ်ဂူာ်. လၢတၢ်အဒိအံၤ ဖျါလၢပိာ်ခွါခံဂၤ မၤတၢ်မၤတမံၤဃီ ဒီးပိာ်မုၣ်ခံဂၤစ့ၢ်ကီး မၤတၢ်မၤတမံၤဃီ. ဘၣ်ဆၣ် ယ့ၣ်ၡူးတဲဝဲလၢ “တၢ်ကဟံးန့ၢ်အီၤတဂၤ ဒီးတၢ်ကပာ်တ့ၢ်ကွံာ် အီၤတဂၤ.” (ဖး မးသဲ ၂၄:၄၀, ၄၁.) ဝံၤဘျီ အဟ့ၣ်ပလီၢ် အပျဲၢ်အဘီၣ်လၢ “မ့ၢ်လၢ သုကစၢ်ကဟဲတုၤလၢ မုၢ်နံၤဖဲလဲၣ်တနံၤလဲၣ်န့ၣ် သုတသ့ၣ်ညါဘၣ်အဃိ အိၣ်ပလီၢ်သး ထီဘိ.” (မး ၂၄:၄၂) ဖဲယ့ၣ်ၡူး တဲတၢ်အဒိ ဘၣ်ဃး မုၣ်ကနီၤတဖၣ် ဝံၤအလီၢ်ခံ အတဲ တၢ်ကတိၤဒ်န့ၣ်စ့ၢ်ကီး. (မး ၂၅:၁၃) ယ့ၣ်ၡူး အတၢ်ကတိၤတဖၣ်အံၤ ဘၣ်ထွဲလိာ်သးဧါ. ဖျါလၢ အဘၣ်ထွဲလိာ်သး. ထဲဒၣ် ပှၤလၢအဘၣ်တၢ်ဒိးဖှူအီၤ နီၢ်ကီၢ် ဒီးအအိၣ်ဒီး တၢ်သးတီနီၢ်ကီၢ်န့ၣ် “တၢ်ကဟံးန့ၢ်အီၤ.” ဒီးအဝဲသ့ၣ် ကပၢတၢ်ဒီး ယ့ၣ်ၡူးလၢမူခိၣ် လၢယွၤအဘီမုၢ်ပူၤ.—ယိၤ ၁၄:၃.

^၁၆ နကဘၣ် အိၣ်ပလီၢ်သး. ပှၤလၢအဘၣ်တၢ်ဒိးဖှူအီၤ တဂၤဂ့ၤတဂၤဂ့ၤ မ့ၢ်တဆဲး အိၣ်ပလီၢ်သးဘၣ်န့ၣ် အတဘၣ် “တၢ်ဃုထၢအီၤ” လၢၤဘၣ်. (မး ၂၄:၃၁) တကးဒံးဘၣ် ကစၢ်ယွၤ အပှၤဂီၢ်မုၢ်လၢ အအိၣ်ဒီး တၢ်မုၢ်လၢ်လၢ အကအိၣ်မူဘၣ် လီၤထူလီၤယိာ် လၢဟီၣ်ခိၣ်စ့ၢ်ကီး ခီဖျိလၢ အဝဲသ့ၣ် ကဘၣ်ဆဲးအိၣ်ပလီၢ်သး ဒီးဆဲးအိၣ်ဒီး တၢ်သးတီအဃိ အဝဲသ့ၣ် ကဘၣ်သးစၢၢ်ဆၢဝဲ ယ့ၣ်ၡူး အတၢ်ဟ့ၣ်ပလီၢ်.

၁၇. ဆၢကတီၢ်ခဲအံၤ ယဟိဝၤယွၤ မ့ၢ်ဒိးဖှူ ပှၤတဂၤဂ့ၤ တဂၤဂ့ၤန့ၣ် ဘၣ်မနုၤအဃိ ပတလိၣ် သးဒ့ဒီဘၣ်လဲၣ်.

^၁၇ ပသ့ၣ်ညါထီၣ် ယဟိဝၤယွၤအဂ့ၢ် ဂ့ၤဂ့ၤအဃိ ပနာ်သပှၢ်တၢၢ်လၢ တၢ်ကိးမံၤဒဲးလၢ အမၤဝဲန့ၣ် အမၤဝဲတီတီလိၤလိၤ. အဃိ လၢဆၢကတီၢ်ခဲအံၤ ယဟိဝၤယွၤ မ့ၢ်ဒိးဖှူ ပှၤသးတီ တဂၤဂ့ၤတဂၤဂ့ၤန့ၣ် ပတလိၣ် သးဒ့ဒီဘၣ်. c ပကဘၣ် သ့ၣ်နီၣ်ထီၣ် ယ့ၣ်ၡူး တဲတၢ်အဒိ ဘၣ်ဃး ပှၤမၤတၢ်ဖိတဖၣ်လၢ အစးထီၣ်မၤတၢ်ဖဲ ၁၁ နၣ်ရံၣ် လၢစပံးကျီးအပူၤ. (မး ၂၀:၁-၁၆) ဖဲပှၤဟ့ၣ်စ့လၢ ဟါလီၤခီအခါ ပှၤမၤတၢ်ဖိလၢ ပှၤငါအီၤလၢ အလီၢ်ခံတဖၣ်န့ၣ် န့ၢ်ဘၣ်စ့ ပှဲၤသိးဒီး ပှၤမၤတၢ်ဖိလၢ ပှၤငါအီၤလၢ အဝဲသ့ၣ်မဲာ်ညါ. ဒ်န့ၣ်အသိး ကစၢ်ယွၤ ကဃုထၢထီၣ် ပှၤလၢအဘၣ်တၢ်ဒိးဖှူအီၤ လၢအခါဖဲလဲၣ်န့ၣ် ပတလိၣ် သးဒ့ဒီဘၣ်. အဝဲသ့ၣ် မ့ၢ်ဆဲးအိၣ်ဒီး တၢ်သးတီမး အဝဲသ့ၣ် ကပၢဘၣ်တၢ်ဒီး ယ့ၣ်ၡူးလၢမူခိၣ်.

မၤထွဲ တၢ်ဟ့ၣ်ပလီၢ်

၁၈-၁၉. လၢတၢ်အဒိတဖၣ်အံၤ ပန့ၢ်ဘၣ် တၢ်မၤလိဒ်လဲၣ်.

^၁၈ ပတဲသကိး တၢ်ဂ့ၢ်မနုၤလဲၣ်. တၢ်အဒိ ဘၣ်ဃး သိဒီးမဲာ်တဲးလဲးန့ၣ် ပသ့ၣ်ညါဘၣ်လၢ ပှၤလၢအအိၣ်ဒီး တၢ်မုၢ်လၢ်လၢ ကအိၣ်မူဘၣ် လီၤထူလီၤယိာ် လၢဟီၣ်ခိၣ်ချၢန့ၣ် ခဲအံၤ အဝဲသ့ၣ်ကဘၣ်  ပာ်ဖျါထီၣ်လၢ အအိၣ်ဒီး တၢ်သးတီ ဒီးဆဲးတီဒီး ယဟိဝၤယွၤ တုၤလၢ တၢ်နးတၢ်ဖှီၣ်ဖးဒိၣ် အဆၢကတီၢ်. ဒီးဖဲန့ၣ်အခါ ယ့ၣ်ၡူး ကပာ်ပနီၣ်ဝဲ ပှၤသးတီတဖၣ်လၢ အကြၢး “န့ၢ်ဘၣ် တၢ်မူအထူအယိာ်.”—မး ၂၅:၄၆.

^၁၉ ပတဲသကိးစ့ၢ်ကီး တၢ်အဒိခံခါ လၢအဟ့ၣ်ပလီၢ်ဝဲ ပှၤလၢအဘၣ်တၢ်ဒိးဖှူအီၤတဖၣ်. အဒိ ယ့ၣ်ၡူး တဲတၢ်အဒိ ဘၣ်ဃး မုၣ်ကနီၤလၢ အကူၣ်တၢ်သ့ ယဲၢ်ဂၤ ဒီးမုၣ်ကနီၤလၢ အသးတဆးဘၣ် ယဲၢ်ဂၤ. မုၣ်ကနီၤလၢ အကူၣ်တၢ်သ့ ယဲၢ်ဂၤန့ၣ် အဝဲသ့ၣ် ပာ်ဖျါထီၣ်လၢ အအိၣ်ဒီး တၢ်ကူၣ်သ့ဒ်လဲၣ်. တလးမူးပိာ်ခွါ မ့ၢ်ဟဲတုၤလၢ အခါဖဲလဲၣ်ဖဲလဲၣ် သနာ်က့ အဝဲသ့ၣ် ပာ်ဖျါထီၣ်လၢ အအိၣ်ကတီၤသး ဒီးအိၣ်ပလီၢ်သး. မ့မ့ၢ် မုၣ်ကနီၤလၢ အသးတဆးဘၣ် ယဲၢ်ဂၤန့ၣ် အဝဲသ့ၣ် တအိၣ်ကတီၤအသးဘၣ်. အဃိ တလးမူးပိာ်ခွါ တပျဲနုာ် အဝဲသ့ၣ်လၢ တၢ်ဖျီအမူးဘၣ်. ပသ့ၣ်ညါလၢ ခါဆူညါ ယ့ၣ်ၡူး ကမၤဟးဂီၤကွံာ် ဟီၣ်ခိၣ်လၢ မုၣ်ကီၤလံၢ်ပၢဝဲအံၤအဃိ ပမ့ၢ်ဘၣ်အိၣ်ခိးအီၤ ယံာ်ထဲလဲၣ် သနာ်က့ ပကဘၣ် အိၣ်ကတီၤသးလၢ ပကဆဲးအိၣ်ခိးအီၤ. ဒီးယ့ၣ်ၡူး တဲတၢ်အဒိ ဘၣ်ဃး စ့တၤလၣ်အဂ့ၢ်န့ၣ် ပာ်ဖျါထီၣ်ဝဲ ဘၣ်ဃးဒီး ကုၢ်လၢအတီခံဂၤ လၢအ ဂုာ်ကျဲးစၢး မၤအကစၢ် အတၢ်မၤဆူၣ်ဆူၣ်. ကုၢ်ခံဂၤအံၤ မၤတၢ်ဆူၣ်ဆူၣ်အဃိ အကစၢ် ဘၣ်သူၣ်ဘၣ်သး အဝဲသ့ၣ်. မ့မ့ၢ် ကုၢ်လၢအကၢၣ် တဂၤန့ၣ် အကစၢ် တဘၣ်သူၣ်ဘၣ်သးအီၤဘၣ်. ပန့ၢ်ဘၣ် တၢ်မၤလိဒ်လဲၣ်. ပကဘၣ်ဆဲးမၤ ယဟိဝၤယွၤ အတၢ်မၤဆူၣ်ဆူၣ် တုၤလၢ တၢ်အကတၢၢ်ဟဲ. ဒီးတၢ်အဒိလၢ အလီၢ်ခံကတၢၢ်တခါန့ၣ် ပသ့ၣ်ညါဘၣ်လၢ ဒ်သိး ပှၤလၢအဘၣ်တၢ်ဒိးဖှူအီၤတဖၣ် ကဒိးန့ၢ်ဘၣ် အခိၣ်ဖးလၢ ကပၢတၢ်ဒီး ယ့ၣ်ၡူး လၢမူခိၣ် ဒီးယ့ၣ်ၡူး “ကဟံးန့ၢ်” အဝဲသ့ၣ်အဂီၢ် အဝဲသ့ၣ်ကဘၣ် ဆဲးအိၣ်ပလီၢ်သး. အဃိ အဝဲသ့ၣ် အိၣ်ခိးကွၢ်လၢ်ဝဲလၢ ‘တၢ်ကပာ်ဖှိၣ်အဝဲသ့ၣ် ဒ်သိးအဝဲသ့ၣ်ကအိၣ်ဒီး’ ယ့ၣ်ၡူး လၢမူခိၣ်တပူၤဃီ. ဖဲအၢ်မက့းဒိၣ်တၢ်ဒုး ဝံၤအလီၢ်ခံ အဝဲသ့ၣ် ကကဲထီၣ်ဘၣ် ယ့ၣ်ၡူး အတလးမူးပိာ်မုၣ် လၢသိဖိအတၢ်ဖျီအမူး.—၂ သ့း ၂:၁; လီၣ် ၁၉:၉.

၂၀. ပှၤလၢ အမၤထွဲ တၢ်ဟ့ၣ်ပလီၢ်န့ၣ် ယဟိဝၤယွၤ ကမၤန့ၢ်အဝဲသ့ၣ် မနုၤလဲၣ်.

^၂၀ ယ့ၣ်ၡူး ကစံၣ်ညီၣ်တၢ် အဆၢကတီၢ် ဘူးထီၣ်ဒိၣ်မးလံ. သနာ်က့ ပမ့ၢ်ဆဲးအိၣ်ဒီး တၢ်သးတီန့ၣ် ပပါလၢမူခိၣ် လၢအပှဲၤဒီး တၢ်အဲၣ်တၢ်ကွံန့ၣ် ကဟ့ၣ်ပှၤ “တၢ်ဂံၢ်တၢ်ဘါလီၤဆီ.” အဃိပ “လဲၤခီဖျိ တၢ်သ့ၣ်တဖၣ်အံၤကန့ၢ် . . . ဒီးဆၢထၢၣ်လၢ ပှၤကညီဖိခွါအံၤ အမဲာ်ညါကန့ၢ်.” (၂ ကရံၣ် ၄:၇; လူၤ ၂၁:၃၆) ပတၢ်မုၢ်လၢ် မ့ၢ်အိၣ်လၢ ပကအိၣ်မူဘၣ်လၢ မူခိၣ်မ့ၢ်ဂ့ၤ ဟီၣ်ခိၣ်မ့ၢ်ဂ့ၤ ပမ့ၢ်မၤထွဲ တၢ်ဟ့ၣ်ပလီၢ် ဒ်ယ့ၣ်ၡူး တဲဖျါထီၣ်ဝဲလၢ တၢ်အဒိအသိးန့ၣ် ပကမၤသးခု ယဟိဝၤယွၤအသး. ဒီးခီဖျိလၢ ယဟိဝၤယွၤ အတၢ်သးကညီၤ ဒိၣ်ဒိၣ်မုၢ်မုၢ်အဃိ ပမံၤကအိၣ် ကွဲးအသးလၢ “လံာ်တၢ်မူအပူၤ.”—ဒၤ ၁၂:၁; လီၣ် ၃:၅.