၁-၂. (က) ဖဲတၢ်မၢဖိပီလူး ကွဲးလံာ်ပရၢလၢ ခရံာ်ဖိလၢအအိၣ်လၢ ကီၢ်ယူဒၤအခါ အဝဲသ့ၣ်တၢ်အိၣ်သး အိၣ်ဒ်လဲၣ်. (ခ) ဘၣ်မနုၤအဃိ တၢ်မၢဖိပီလူး အလံာ်ပရၢအံၤ ကကဲဘျုးလၢ အဝဲသ့ၣ်အဂီၢ်လဲၣ်.

 ဖဲ ခ.န ၃၃, ယ့ၣ်ၡူး သံဝံၤအလီၢ်ခံန့ၣ် ခရံာ်ဖိလၢ အအိၣ်လၢ ဝ့ၢ်ယရူၤၡလ့ၣ် ဒီးလၢကီၢ်ယူဒၤန့ၣ် ထံၣ်ဘၣ်ဒီး တၢ်ကီတၢ်ခဲအါမး. ခရံာ်ဖိအတၢ်အိၣ်ဖှိၣ် အိၣ်ထီၣ်ဝံၤ တယံာ်ဘၣ်ဒီး ခရံာ်ဖိတဖၣ် ထံၣ်ဘၣ် တၢ်မၤနးမၤဖှီၣ်. (မၤတၢ် ၈:၁) လၢခံအနံၣ် ၂၀ ဝံၤအလီၢ်ခံ ခီဖျိလၢ တၢ်သၣ်ဝံၤလီၤဒိ အိၣ်ထီၣ်အဃိ ခရံာ်ဖိတဖၣ် ထံၣ်ဘၣ်ဒီး တၢ်ဖှီၣ်တၢ်ယာ်. (မၤတၢ် ၁၁:၂၇-၃၀) ဘၣ်ဆၣ် ကဘၣ်ဖဲ ခ.န ၆၁ နံၣ်န့ၣ် ခရံာ်ဖိတဖၣ် တထံၣ်ဘၣ်ဒီး တၢ်မၤနးမၤဖှီၣ်အါအါ ဒ်သိးဒီး တၢ်လၢအဝဲသ့ၣ် ကထံၣ်ဘၣ်ဝဲ လၢခါဆူညါဘၣ်. ဖဲန့ၣ်အဆၢကတီၢ် ယဟိဝၤယွၤထိးဘၣ် တၢ်မၢဖိပီလူးအသးလၢ အကကွဲးန့ၢ် ခရံာ်ဖိတဖၣ် လံာ်ပရၢ. ဒီးတၢ်ဟ့ၣ်ကူၣ်လၢ လံာ်ပရၢအပူၤန့ၣ် ကမၤစၢၤ အဝဲသ့ၣ်ဒ်သိး အဝဲသ့ၣ် ကအိၣ်ကတီၤသး လၢခါဆူညါအဂီၢ်.

^၂ ခရံာ်ဖိတဖၣ် အိၣ်ဘၣ်မုာ်မုာ်ခုၣ်ခုၣ် ဘၣ်ဆၣ် တယံာ်လၢၤဘၣ်န့ၣ် အဝဲသ့ၣ် ကထံၣ်ဘၣ်ဒီး တၢ်နးတၢ်ဖှီၣ်အဃိ လံာ်ပရၢလၢ တၢ်မၢဖိပီလူး ကွဲးန့ၢ်အဝဲသ့ၣ်န့ၣ် ကကဲဘျုးလၢ အဝဲသ့ၣ် အဂီၢ်ဒိၣ်မး. တၢ်ဟ့ၣ်ကူၣ်လၢ လံာ်ပရၢအပူၤန့ၣ် ကမၤစၢၤ အဝဲသ့ၣ် ဒ်သိး အဝဲသ့ၣ်ကအိၣ်ဒီး တၢ်တူၢ်န့ၢ်ခီၣ်ကဲ. ဒီးယ့ၣ်ၡူး တဲဆိပာ်စၢၤ ဘၣ်ဃးဒီး တၢ်ကမၤဟးဂီၤ ဝ့ၢ်ယရူၤၡလ့ၣ်န့ၣ် ဘူးထီၣ်ဝဲလံ. (လူၤ ၂၁:၂၀) တကးဒံးဘၣ် ပှၤကမၤဟးဂီၤ ဝ့ၢ်ယရူၤၡလ့ၣ် အခါဖဲလဲၣ်န့ၣ် တၢ်မၢဖိပီလူး ဒီးခရံာ်ဖိလၢ အအိၣ်လၢ ကီၢ်ယူဒၤစ့ၢ်ကီး တသ့ၣ်ညါဝဲ လီၤတံၢ်လီၤဆဲးဘၣ်. အဃိ ဖဲတၢ်ဆၢကတီၢ် အိၣ်ဒံးအခါ ခရံာ်ဖိတဖၣ် ကဘၣ်မၤဂၢၢ်ကျၢၤထီၣ် အတၢ်နာ် ဒီးတၢ်တူၢ်န့ၢ်ခီၣ်ကဲ.—ဧ့ၤ ၁၀:၂၅; ၁၂:၁, ၂.

၃. ဘၣ်မနုၤအဃိ ခရံာ်ဖိခဲအံၤ ကဘၣ်ပာ်သူၣ်ပာ်သး တၢ်ဂ့ၢ်လၢ လံာ်ဧ့ၤဘြံၤ အပူၤလဲၣ်.

^၃ တယံာ်လၢၤဘၣ် တၢ်နးတၢ်ဖှီၣ်ဖးဒိၣ်လၢ ပကထံၣ်ဘၣ်န့ၣ် ကနးဒိၣ်န့ၢ် တၢ်နးတၢ်ဖှီၣ်လၢ ခရံာ်ဖိလၢညါတဖၣ် ထံၣ်ဘၣ်ဝဲ စၢၢ်တလၢၢ်ဒံး. (မး ၂၄:၂၁; လီၣ် ၁၆:၁၄, ၁၆) ဒီး တၢ်ဟ့ၣ်ကူၣ်တနီၤလၢ ယဟိဝၤယွၤ ကတဲာ်ကတီၤန့ၢ် ခရံာ်ဖိလၢညါတဖၣ်န့ၣ် ကကဲဘျုး လၢပဂီၢ်စ့ၢ်ကီး. အဃိ ခဲအံၤ ပကတဲသကိး တၢ်ဟ့ၣ်ကူၣ်တနီၤ.

“လဲၤဆူညါတုၤလၢ တၢ်ဒိၣ်တုာ်ခိၣ်ပှဲၤ”

၄. ပှၤယူဒၤဖိလၢ အကဲထီၣ် ခရံာ်ဖိန့ၣ် အဝဲသ့ၣ် ထံၣ်ဘၣ် တၢ်မၤကွၢ် မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၄ ပှၤယူဒၤဖိလၢ အကဲထီၣ် ခရံာ်ဖိတဖၣ်န့ၣ် အဝဲသ့ၣ် ထံၣ်ဘၣ် တၢ်မၤကွၢ်အဃိ တညီလၢ အဝဲသ့ၣ်အဂီၢ်ဘၣ်. လၢညါ ပှၤယူဒၤဖိတဖၣ်န့ၣ် ယဟိဝၤယွၤ ဃုထၢထီၣ် အဝဲသ့ၣ် ဒ်အပှၤဂီၢ်မုၢ်. ဒီးလၢညါ ဝ့ၢ်ယရူၤၡလ့ၣ်န့ၣ် ကဲဝဲတၢ်လီၢ်လၢ အရ့ဒိၣ်တတီၤ တဘျုးနံၣ်ညါ. တကးဒံးဘၣ် စီၤပၤလၢ အပၢတၢ်လၢ ယဟိဝၤယွၤ အခၢၣ်စးန့ၣ် အဝဲသ့ၣ် အိၣ်လၢ ဝ့ၢ်ယရူၤၡလ့ၣ်. ဒီးပှၤယူဒၤဖိလၢ အသးတီတဖၣ်န့ၣ် အဝဲသ့ၣ် မၤထွဲဝဲ စီၤမိၤၡ့ အတၢ်သိၣ်တၢ်သီ ဒ်အတၢ်ဘူၣ်တၢ်ဘါ ခိၣ်နၢ်တဖၣ် သိၣ်လိအဝဲသ့ၣ်အသိး. အဝဲသ့ၣ် တၢ်သိၣ်တၢ်သီန့ၣ် ဘၣ်ဃးဒီး တၢ်အီၣ်တၢ်အီ, တၢ်ကူးတရံး ဒီးကဘၣ်ရ့ဒီး ပှၤလၢအတကဲ ပှၤယူဒၤဖိတဖၣ်ဘၣ် ဒ်လဲၣ်အဂ့ၢ်. ဘၣ်ဆၣ် ဖဲယ့ၣ်ၡူး သံဝံၤအလီၢ်ခံ စီၤမိၤၡ့ အတၢ်သိၣ်တၢ်သီ ကတၢၢ်ကွံာ် ဒီးပှၤတလိၣ်လုၢ်ထီၣ်တၢ်လၢ တၢ်လုၢ်ဟံၣ်လၢၤဘၣ်. အဃိ ပှၤယူဒၤဖိ လၢအကဲထီၣ် ခရံာ်ဖိန့ၣ် အဝဲသ့ၣ် ကမၤထွဲ တၢ်ဘူၣ်ထီၣ်ဘါထီၣ် အကျိၤအကျဲ လၢအသီအဂီၢ် တညီလၢ အဝဲသ့ၣ်အဂီၢ်ဘၣ်. (ဧ့ၤ ၁၀:၁, ၄, ၁၀) ခရံာ်ဖိလၢ အဒိၣ်တုာ်ခိၣ်ပှဲၤ ဒ်သိးဒီး တၢ်မၢဖိပ့းတရူးစ့ၢ်ကီး ကမၤထွဲ တၢ်ဘူၣ်ထီၣ်ဘါထီၣ် အကျိၤအကျဲ လၢအသီအံၤန့ၣ် တညီလၢအဂီၢ် စ့ၢ်ကီးဘၣ်. (မၤတၢ် ၁၀:၉-၁၄; ကလၤ ၂:၁၁-၁၄) ဒီးပှၤယူဒၤဖိလၢ အကဲထီၣ် ခရံာ်ဖိတဖၣ်န့ၣ် အတၢ်ဘူၣ်တၢ်ဘါ ခိၣ်နၢ်လၢညါတဖၣ် မၤကီမၤခဲ အဝဲသ့ၣ် ခီဖျိလၢ အတၢ်စူၢ်တၢ်နာ် အသီအဃိ.

၅. ပှၤယူဒၤဖိလၢ အကဲထီၣ် ခရံာ်ဖိတဖၣ်န့ၣ် ဘၣ်ပလီၢ်အသးလၢ မတဂၤ သ့ၣ်တဖၣ်လဲၣ်.

^၅ ပှၤယူဒၤဖိလၢ အကဲထီၣ် ခရံာ်ဖိတဖၣ်န့ၣ် ဘၣ်ပလီၢ်အသးလၢ ပှၤထီဒါတၢ်ခံဒူၣ်. တၢ, ပှၤယူဒၤဖိ အတၢ်ဘူၣ်တၢ်ဘါ ခိၣ်နၢ်တဖၣ် ထံၣ်အဝဲသ့ၣ်ဒ် ပှၤလၢအထီဒါက့ၤ ပှၤယူဒၤဖိ အတၢ်ဘူၣ်တၢ်ဘါ. ခံ, ခရံာ်ဖိလၢ တၢ်အိၣ်ဖှိၣ်ပူၤတနီၤ ဘၣ်သးမၤထွဲဒံး စီၤမိၤၡ့ အတၢ်သိၣ်တၢ်သီန့ၣ် ကမ့ၢ်လၢ အဝဲသ့ၣ် တအဲၣ်ဒိးလၢ ပှၤကမၤနးမၤဖှီၣ် အဝဲသ့ၣ်ဘၣ်. (ကလၤ ၆:၁၂) ဘၣ်ဆၣ် ဒ်သိး ခရံာ်ဖိလၢ အသးတီတဖၣ် ကဆဲးတီဒီး ယဟိဝၤယွၤအဂီၢ် တၢ်မနုၤ ကမၤစၢၤ အဝဲသ့ၣ်လဲၣ်.

၆. စီၤပီလူး ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ် လၢကမၤမနုၤလဲၣ်. (ဧ့ၤဘြံၤ ၅:၁၄–၆:၁)

 ^၆ လံာ်ပရၢလၢ စီၤပီလူးကွဲးန့ၢ် ဒီပုၢ်ဝဲၢ်မုၣ်ခွါတဖၣ်န့ၣ် ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ အဝဲသ့ၣ် ကမၤလိ ကစၢ်ယွၤ အကလုၢ်ကထါ ဒီးကဆိကမိၣ်ထံဝဲ. (ဖး ဧ့ၤဘြံၤ ၅:၁၄–၆:၁.) စီၤပီလူး တဲဖျါထီၣ်ဝဲ တၢ်ဂ့ၢ်လၢ အအိၣ်လၢ လံာ်စီဆှံလၢ ဧ့ၤဘြံၤတကတြူၢ်အပူၤ ဒီးပာ်ဖျါထီၣ်ဝဲလၢ ခရံာ်ဖိ အတၢ်ဘူၣ်ထီၣ်ဘါထီၣ် ယဟိဝၤယွၤ အကျိၤအကျဲန့ၣ် ဂ့ၤဒိၣ်န့ၢ် ပှၤယူဒၤဖိ အတၢ်ဘူၣ်ထီၣ်ဘါထီၣ် အကျိၤအကျဲဒံး. a အဃိ ဒ်သိး ခရံာ်ဖိတဖၣ် နီၤဖးဝဲ တၢ်သိၣ်လိလၢ အကမၣ် ဒီးတြီဆၢဝဲ ကသ့အဂီၢ် စီၤပီလူး ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဃုသ့ၣ်ညါအါထီၣ် တၢ်မ့ၢ်တၢ်တီ လီၤတံၢ်လီၤဆဲး.

၇. ဆၢကတီၢ်ခဲအံၤ ပထံၣ်ဘၣ် တၢ်ကီတၢ်ခဲ မနုၤလဲၣ်.

^၇ ဒ်ခရံာ်ဖိလၢညါတဖၣ်အသိး ပဝဲစ့ၢ်ကီး ပထံၣ်ဘၣ် တၢ်ကစီၣ်လၢ ပှၤရၤလီၤဝဲ ဒီးတၢ်ထံၣ်လၢ အထီဒါလိာ်သးဒီး ယဟိဝၤယွၤ အတၢ်သိၣ်တၢ်သီအါမး. ပှၤတနီၤတဲဝဲလၢ ယဟိဝၤပှၤအုၣ်အသးတဖၣ် မၤထွဲဝဲ လံာ်စီဆှံ အတၢ်ဟံးစုနဲၣ်ကျဲ ဘၣ်ဃးဒီး တၢ်မံဃုာ်အဃိ အဝဲသ့ၣ်အိၣ်ဒီး တၢ်ထံၣ်လၢအကမၣ်. ပမ့ၢ်ကွၢ် ပှၤဟီၣ်ခိၣ်ဖိ အတၢ်ထံၣ်န့ၣ် ဒံးယံာ် ဒံးထီဒါလိာ်သးဒီး ယဟိဝၤယွၤ အတၢ်ထံၣ်. (ကတိၤ ၁၇:၁၅) တကးဒံးဘၣ် ဒ်သိး ပတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤအဂီၢ် ပှၤထီဒါတၢ်တဖၣ် ဂုာ်ကျဲးစၢး ရၤလီၤဝဲတၢ်ကစီၣ် လၢအကမၣ်. အဃိ ပကဘၣ်အိၣ်ဒီး တၢ်ပလီၢ်သး ဒီးတဘၣ်ကွၢ် တၢ်ဂ့ၢ်လၢ ကဆှၢကမၣ် ပတၢ်ထံၣ်ဘၣ်.—ဧ့ၤ ၁၃:၉.

၈. ဒ်သိး ပကဒိၣ်ထီၣ်ထီထီၣ်လၢ နီၢ်သးတခီအဂီၢ် ပကဘၣ် မၤဒ်လဲၣ်.

^၈ စီၤပီလူး ဟ့ၣ်ဂံၢ်ဟ့ၣ်ဘါ ခရံာ်ဖိလၢညါတဖၣ်လၢ အဝဲသ့ၣ် ကဘၣ် ဆဲးဒိၣ်ထီၣ်ထီထီၣ်လၢ နီၢ်သးတခီအဃိ ပဝဲစ့ၢ်ကီး ပကဘၣ်မၤဒ်န့ၣ်. ဒီးဒ်သိး ပကဒိၣ်တုာ်ခိၣ်ပှဲၤ လၢနီၢ်သးတခီအဂီၢ် ပကဘၣ် မၤလိလံာ်စီဆှံ လီၤတံၢ်လီၤဆဲး, မၤလိအါထီၣ် ယဟိဝၤယွၤအဂ့ၢ် ဒီးဃုသ့ၣ်ညါ အတၢ်ဆိကမိၣ်. ပဟ့ၣ်လုၢ်ထီၣ်သး ဒီးပဒိးဘျၢထံ မ့ၢ်ဝံၤသနာ်က့ ပကဘၣ် ဆဲးမၤလိ လံာ်စီဆှံထီဘိ. ဒီးပအိၣ်လၢ တၢ်မ့ၢ်တၢ်တီအပူၤ မ့ၢ်ယံာ်ထဲလဲၣ် သနာ်က့ ပကဘၣ် ဆဲးဖးဒီးမၤလိ ကစၢ်ယွၤ အကလုၢ်ကထါဒံး. (စံး ၁:၂) စီၤပီလူး ဟ့ၣ်ဂံၢ်ဟ့ၣ်ဘါ ခရံာ်ဖိလၢညါတဖၣ်လၢ အဝဲသ့ၣ် ကဘၣ် မၤဂၢၢ်ကျၢၤထီၣ် အတၢ်နာ်. အဃိ ပဝဲစ့ၢ်ကီး ဒ်သိးပတၢ်နာ် ကဂၢၢ်ကျၢၤထီၣ်အဂီၢ် ပကဘၣ်မၤလိ လံာ်စီဆှံထီဘိ.—ဧ့ၤ ၁၁:၁, ၆.

ပမ့ၢ်အိၣ်ဒီး တၢ်နာ်လၢ အဂၢၢ်ကျၢၤန့ၣ် “ပသးသမူ” ကပူၤဖျဲး

၉. ဘၣ်မနုၤအဃိ ခရံာ်ဖိတဖၣ် ကဘၣ်အိၣ်ဒီး တၢ်နာ်လၢ အဂၢၢ်ကျၢၤလဲၣ်.

^၉ လၢညါ ဖဲပှၤမၤဟးဂီၤ ကီၢ်ယူဒၤအခါ ဒ်သိးခရံာ်ဖိတဖၣ် ကပူၤဖျဲးအဂီၢ် အရ့ဒိၣ်ဒိၣ်မးလၢ အဝဲသ့ၣ် ကအိၣ်ဒီး တၢ်နာ်လၢ အဂၢၢ်ကျၢၤ. (ဧ့ၤ ၁၀:၃၇-၃၉) ယ့ၣ်ၡူး ဟ့ၣ်ပလီၢ်တ့ၢ် အပျဲၢ်အဘီၣ်တဖၣ်လၢ ဖဲအဝဲသ့ၣ် ထံၣ်သုးမုၢ်သံၣ်ဘိ ဟဲကဝီၤဃာ် ဝ့ၢ်ယရူၤၡလ့ၣ်အခါ အဝဲသ့ၣ် ကဘၣ်ဃ့ၢ်ထီၣ်ကွံာ် လၢကစၢၢ်ခိၣ်. အဃိ ခရံာ်ဖိလၢ အအိၣ်လၢ ဝ့ၢ်ပူၤမ့ၢ်ဂ့ၤ ဝ့ၢ်ချၢမ့ၢ်ဂ့ၤ အဝဲသ့ၣ် ကဘၣ်မၤထွဲ ယ့ၣ်ၡူး အတၢ်ဟ့ၣ်ပလီၢ်. (လူၤ ၂၁:၂၀-၂၄) လၢညါ ဖဲသုးမုၢ်သံၣ်ဘိ ဟဲဒုးတၢ်အခါ ညီနုၢ် ပှၤအိၣ်လၢ ဝ့ၢ်ချၢန့ၣ် ဟဲအိၣ်သဒၢအသးလၢ ဝ့ၢ်ဖးဒိၣ် လၢအအိၣ်ဒီးအဒူၣ် လၢအကျၢၤ ဒ်သိးဒီး ဝ့ၢ်ယရူၤၡလ့ၣ်. အဃိ ဖဲခရံာ်ဖိတဖၣ် န့ၢ်ဘၣ် တၢ်ဟံးစုနဲၣ်ကျဲလၢ ကဘၣ်ဃ့ၢ်ထီၣ်လၢ ကစၢၢ်ခိၣ်အခါ ဒ်သိးအဝဲသ့ၣ် ကမၤထွဲ ယ့ၣ်ၡူး အတၢ်ဟ့ၣ်ပလီၢ်အဂီၢ် အဝဲသ့ၣ် ကဘၣ်အိၣ်ဒီး တၢ်နာ်လၢ အဂၢၢ်ကျၢၤ.

၁၀. ခရံာ်ဖိတဂၤ အိၣ်ဒီးတၢ်နာ်လၢ အဂၢၢ်ကျၢၤန့ၣ် အကပာ်ဖျါထီၣ်ဝဲဒ်လဲၣ်. (ဧ့ၤဘြံၤ ၁၃:၁၇)

^၁၀ ခရံာ်ဖိလၢညါတဖၣ် ကဘၣ်နာ်န့ၢ်ဝဲ ပှၤလၢယ့ၣ်ၡူး ဃုထၢထီၣ်လၢ ကတီခိၣ်ရိၤမဲ တၢ်အိၣ်ဖှိၣ်. ဒီးခရံာ်ဖိတဖၣ် ကဘၣ်ဃ့ၢ်ထီၣ် လၢဝ့ၢ်ပူၤ လၢအခါဖဲလဲၣ် ဒီးကဘၣ် ဃ့ၢ်ထီၣ်ဒ်လဲၣ်န့ၣ် ပှၤတီခိၣ်ရိၤမဲတၢ်တဖၣ် ကမၤစၢၤ အဝဲသ့ၣ်လၢ ကမၤထွဲ ယ့ၣ်ၡူးအတၢ်ဟံးစုနဲၣ်ကျဲ လီၤတံၢ်လီၤဆဲး. (ဖး ဧ့ၤဘြံၤ ၁၃:၁၇.) ကြံးအတၢ်ကတိၤ လၢအမ့ၢ် “ဒိကနၣ်” လၢဧ့ၤဘြံၤ ၁၃:၁၇ ပာ်ဖျါဝဲန့ၣ် အဲၣ်ဒိးတဲဝဲ  ပှၤတဂၤဂၤ လၢအနာ်န့ၢ် ပှၤလၢအတီခိၣ်ရိၤမဲတၢ်န့ၣ် အဂုာ်ကျဲးစၢး ဒိကနၣ် ဒီးမၤထွဲဝဲ အတၢ်ဟံးစုနဲၣ်ကျဲ. အမၤထွဲ ပှၤတဂၤန့ၣ် အတၢ်ဟံးစုနဲၣ်ကျဲန့ၣ် တမ့ၢ်ထဲလၢ အကဘၣ် ဒိကနၣ်ပှၤတဂၤန့ၣ် အကလုၢ်အဃိဘၣ်. ဘၣ်ဆၣ် အမၤထွဲဝဲ ခီဖျိလၢ အနာ်န့ၢ်ပှၤတဂၤန့ၣ် နီၢ်ကီၢ်. အဃိ တချုးလၢ ခရံာ်ဖိလၢညါတဖၣ် ထံၣ်ဘၣ် တၢ်နးတၢ်ဖှီၣ်ဒံးဘၣ်န့ၣ် အဝဲသ့ၣ် ဘၣ်ပာ်ဖျါထီၣ်လၢ အနာ်န့ၢ် တၢ်အိၣ်ဖှိၣ်သးပှၢ်တဖၣ်. ဖဲတၢ်အိၣ်သး ဂ့ၤဒံးအခါ ခရံာ်ဖိတဖၣ် မ့ၢ်မၤထွဲ တၢ်အိၣ်ဖှိၣ်သးပှၢ် အတၢ်ဟံးစုနဲၣ်ကျဲန့ၣ် ဖဲတၢ်အိၣ်သး ကီထီၣ်အခါ ကညီလၢ အဝဲသ့ၣ် ကမၤထွဲ တၢ်အိၣ်ဖှိၣ်သးပှၢ် အတၢ်ဟံးစုနဲၣ်ကျဲ.

၁၁. ဘၣ်မနုၤအဃိ အရ့ဒိၣ်လၢ ခရံာ်ဖိလၢ ဆၢကတီၢ်ခဲအံၤ ကပာ်ဖျါထီၣ် တၢ်နာ်လၢ အဂၢၢ်ကျၢၤလဲၣ်.

^၁၁ ခဲအံၤ ခရံာ်ဖိတဖၣ် ကဘၣ်ပာ်ဖျါထီၣ် တၢ်နာ်လၢ အဂၢၢ်ကျၢၤ ဒ်သိးဒီး ခရံာ်ဖိလၢညါတဖၣ်. ပအိၣ်မူဘၣ် တၢ်ဆၢကတီၢ်လၢ ပှၤအါတက့ၢ် တနာ်ဝဲ လံာ်စီဆှံ တၢ်ဟ့ၣ်ပလီၢ် ဘၣ်ဃးဒီး တၢ်အကတၢၢ် ကဟဲဝဲအဂ့ၢ်ဘၣ်အဃိ အဝဲသ့ၣ် တဲဆါပှၤ. (၂ ပ့း ၃:၃, ၄) ဒီးလံာ်စီဆှံ ပာ်ဖျါထီၣ်န့ၢ်ပှၤ တၢ်ဂ့ၢ်တနီၤလၢ အဘၣ်ဃးဒီး တၢ်နးတၢ်ဖှီၣ်ဖးဒိၣ်. ဘၣ်ဆၣ် တၢ်ဂ့ၢ်လၢ ပတသ့ၣ်ညါဘၣ်န့ၣ် အိၣ်ဒံးအါမး. အဃိ ပကဘၣ် နာ်နီၢ်ကီၢ်လၢ တၢ်အကတၢၢ်န့ၣ် ကဟဲဝဲသပှၢ်ကတၢၢ် ဒ်ယဟိဝၤယွၤ ပာ်ပနီၣ်ဝဲအသိး. ဒီးဖဲန့ၣ်အခါ ပကဘၣ်နာ် သပှၢ်တၢၢ်လၢ ယဟိဝၤယွၤ ကကွၢ်ထွဲပှၤ.—ဃဘး ၂:၃.

၁၂. ဒ်သိး ပကပူၤဖျဲးလၢ တၢ်နးတၢ်ဖှီၣ်ဖးဒိၣ်အဂီၢ် ပကဘၣ်မၤဒ်လဲၣ်.

^၁၂ ပကဘၣ် နာ်နီၢ်ကီၢ်လၢ ယဟိဝၤယွၤ သူဝဲ “ကုၢ်လၢအတီ ဒီးအကူၣ်တၢ်သ့” လၢကဟံးစုနဲၣ်ကျဲပှၤ. (မး ၂၄:၄၅) အဒိ ဖဲရိမ့ၤသုးဖိတဖၣ် ဟဲကဝီၤဃာ် ဝ့ၢ်ယရူၤၡလ့ၣ်အခါ ဒ်သိး ခရံာ်ဖိလၢညါတဖၣ် ကပူၤဖျဲးအဂီၢ် အဝဲသ့ၣ် န့ၢ်ဘၣ်တၢ်ဟံးစုနဲၣ်ကျဲ လၢကဘၣ်မၤထွဲဝဲ. အဃိ ပဝဲစ့ၢ်ကီး ဒ်သိး ပကပူၤဖျဲးလၢ တၢ်နးတၢ်ဖှီၣ်ဖးဒိၣ်အဂီၢ် ပကန့ၢ်ဘၣ် တၢ်ဟံးစုနဲၣ်ကျဲ လီၤတံၢ်လီၤဆဲး လၢပကဘၣ် မၤထွဲအီၤ. ခဲအံၤန့ၣ် အရ့ဒိၣ်ဒိၣ်မးလၢ ပကနာ်န့ၢ် ပှၤလၢအတီခိၣ်ရိၤမဲတၢ်လၢ ယဟိဝၤယွၤ အတၢ်ကရၢကရိအပူၤ. ဒီးခဲအံၤ မ့ၢ်ကီလၢ ပကမၤထွဲ ပှၤလၢအတီခိၣ်ရိၤမဲတၢ် အတၢ်ဟံးစုနဲၣ်ကျဲန့ၣ် ဖဲတၢ်နးတၢ်ဖှီၣ်ဖးဒိၣ် ဟဲအခါ ပမၤထွဲ ပှၤလၢအတီခိၣ်ရိၤမဲပှၤ အတၢ်ဟံးစုနဲၣ်ကျဲ တညီဘၣ်.

၁၃. ဘၣ်မနုၤအဃိ ပကဘၣ် မၤထွဲ တၢ်ဟ့ၣ်ကူၣ်လၢ ဧ့ၤဘြံၤ ၁၃:၅ ပာ်ဖျါဝဲလဲၣ်.

^၁၃ ဖဲခရံာ်ဖိလၢညါတဖၣ် အိၣ်ခိးဝဲလၢ ကဃ့ၢ်ထီၣ်ကွံာ်လၢ ဝ့ၢ်ယရူၤၡလ့ၣ်အခါ ဒ်သိးအဝဲသ့ၣ် ဆဲးဘူၣ်ထီၣ်ဘါထီၣ် ယဟိဝၤယွၤ ကန့ၢ်အဂီၢ် အဝဲသ့ၣ် ကဘၣ်ဟးဆှဲး “တၢ်အဲၣ်ကျိၣ်အဲၣ်စ့.” (ဖး ဧ့ၤဘြံၤ ၁၃:၅.) လၢအပူၤကွံာ်န့ၣ် အဝဲသ့ၣ်တနီၤ ထံၣ်ဘၣ်ဒီး တၢ်နးတၢ်ဖှီၣ် ဒီးတၢ်သၣ်ဝံၤလီၤဒိ. (ဧ့ၤ ၁၀:၃၂-၃၄) ဒီးပမ့ၢ်ကွၢ်န့ၣ် အဝဲသ့ၣ် သးအိၣ်တူၢ်ဆါအသး လၢတၢ်သးခုကစီၣ်အါမး. သနာ်က့ ပှၤလၢအဝဲသ့ၣ် အကျါတနီၤ ဆိကမိၣ်ဝဲလၢ ဖဲတၢ်လီၤဘၣ်ယိၣ် အိၣ်ထီၣ်အခါ ဒ်သိး အဒီသဒၢလီၤ အနီၢ်ကစၢ်သး ကန့ၢ်အဂီၢ် အကဘၣ် ဃုကျိၣ်စ့. ဘၣ်ဆၣ် ဖဲပှၤမၤဟးဂီၤ ဝ့ၢ်ယရူၤၡလ့ၣ်အခါ ကျိၣ်စ့ ဒီးတၢ်ထူးတၢ်တီၤ တမၤပူၤဖျဲး အဝဲသ့ၣ်ဘၣ်. (ယၤ ၅:၃) ပထံၣ်ဘၣ်လၢ ပှၤလၢအအဲၣ် တၢ်ထူးတၢ်တီၤ အါတလၢန့ၣ် ဖဲအဝဲသ့ၣ် ဘၣ်ဃ့ၢ်ထီၣ် လၢဝ့ၢ်ယရူၤၡလ့ၣ်အခါ အဝဲသ့ၣ် ကပာ်တ့ၢ်ကွံာ် အဟံၣ်အဃီ ဒီးတၢ်ထူးတၢ်တီၤအဂီၢ် တညီလၢ အဝဲသ့ၣ်အဂီၢ်ဘၣ်.

၁၄. ပမ့ၢ်အိၣ်ဒီး တၢ်နာ်လၢ အဂၢၢ်ကျၢၤန့ၣ် ကမၤစၢၤပှၤလၢ ပကဆၢတဲာ်တၢ် ဘၣ်ဃးဒီး ကျိၣ်စ့ ဒီးတၢ်လၢအအိၣ်ဒီးပှၤဒ်လဲၣ်.

^၁၄ ပမ့ၢ်နာ် သပှၢ်တၢၢ်လၢ တယံာ်လၢၤဘၣ် ယဟိဝၤယွၤ ကမၤဟးဂီၤကွံာ် ပှၤအၢပှၤသီန့ၣ် ကမၤစၢၤပှၤလၢ ပကဟးဆှဲး တၢ်အဲၣ်ကျိၣ်အဲၣ်စ့. ဒီးဖဲတၢ်နးတၢ်ဖှီၣ်ဖးဒိၣ်အခါန့ၣ် ကျိၣ်စ့ တကဲဘျုးလၢ ပှၤဟီၣ်ခိၣ်ဖိအဂီၢ်လၢၤဘၣ်. လံာ်စီဆှံ တဲဝဲလၢ ပှၤဟီၣ်ခိၣ်ဖိတဖၣ် ကသ့ၣ်ညါဘၣ်ဝဲလၢ “ဖဲယဟိဝၤယွၤ အတၢ်သးထီၣ် အမုၢ်နံၤန့ၣ် အဝဲသ့ၣ်အထူမ့ၢ်ဂ့ၤ အစ့မ့ၢ်ဂ့ၤ မၤပူၤဖျဲး အဝဲသ့ၣ် တန့ၢ်ဘၣ်.” အဃိ အဝဲသ့ၣ်တလီကီ အစ့လၢၤဘၣ် ဒီး “ကတၢၤကွံာ် အစ့လၢကျဲပူၤ.” (ဃ့း ၇:၁၉) အဃိ ဒ်သိး ပကဆဲး ဘူၣ်ထီၣ်ဘါထီၣ်ဘၣ် ယဟိဝၤယွၤ ဒီးပဟံၣ်ဖိဃီဖိ တပူၤဃီအဂီၢ် ပကဘၣ် ဆၢတဲာ်တၢ်လၢအဘၣ် ဒီးပတဘၣ်ဃုစ့ အါတလၢဘၣ်. ပတဘၣ် သူစ့ အါတလၢ တုၤလၢ ပကမၢ်ထီၣ် မ့တမ့ၢ် သူတၢ်ဆၢကတီၢ် အါတလၢ လၢပကကွၢ်ထွဲ တၢ်လၢအအိၣ်ဒီးပှၤ တဖၣ်ဘၣ်. ဒ်သိး တၢ်လၢအအိၣ်ဒီးပှၤတဖၣ် တကဲထီၣ် တၢ်အရ့ဒိၣ်ကတၢၢ်လၢ ပတၢ်အိၣ်မူအပူၤ တဂ့ၤအဂီၢ် ပကဘၣ် ပလီၢ်သးဒိၣ်မး. (မး ၆:၁၉, ၂၄) ဒီးဖဲပအိၣ်ခိးလၢ ယဟိဝၤယွၤ ကမၤကတၢၢ်ကွံာ် တၢ်အၢတၢ်သီအခါ ပကနာ်န့ၢ် ယဟိဝၤယွၤဧါ, ပကနာ်န့ၢ် တၢ်လၢအအိၣ်ဒီးပှၤဧါန့ၣ် ပကဘၣ် ဆၢတဲာ်လီၤပသး.

 “သုလိၣ်ဘၣ် တၢ်တူၢ်န့ၢ်ခီၣ်ကဲ”

၁၅. ဘၣ်မနုၤအဃိ ခရံာ်ဖိလၢညါတဖၣ် ကဘၣ်အိၣ်ဒီး တၢ်တူၢ်န့ၢ်ခီၣ်ကဲလဲၣ်.

^၁၅ တယံာ်လၢၤဘၣ် ခရံာ်ဖိလၢအအိၣ်လၢ ကီၢ်ယူဒၤန့ၣ် ကထံၣ်ဘၣ် တၢ်ကီတၢ်ခဲအဃိ အဝဲသ့ၣ် ကဘၣ်အိၣ်ဒီး တၢ်တူၢ်န့ၢ်ခီၣ်ကဲ. (ဧ့ၤ ၁၀:၃၆) ခရံာ်ဖိလၢညါတနီၤန့ၣ် အဝဲသ့ၣ်ထံၣ်ဘၣ် တၢ်မၤနးမၤဖှီၣ် ဘၣ်ဆၣ် လၢအဝဲသ့ၣ် အကျါတနီၤန့ၣ် တထံၣ်ဘၣ် တၢ်မၤနးမၤဖှီၣ်ဘၣ်. အဃိ စီၤပီလူး ဟ့ၣ်ပလီၢ် အဝဲသ့ၣ်ဒ်သိး ကအိၣ်ကတီၤသးလၢ တၢ်မၤနးမၤဖှီၣ်လၢ အဝဲသ့ၣ် ကထံၣ်ဘၣ်ဝဲ ဒီးကအိၣ်ဒီး တၢ်သးတီ ဒ်ယ့ၣ်ၡူးအသိး တုၤလၢအကတၢၢ်. (ဧ့ၤ ၁၂:၄) ခီဖျိလၢ ပှၤယူဒၤဖိတဖၣ် ကဲထီၣ်ခရံာ်ဖိ အါမးအဃိ ပှၤယူၤဒၤဖိလၢ အထီဒါတၢ်တဖၣ် သးဒိၣ်ထီၣ်တၢ်ဒိၣ်မး. ပူၤကွံာ်စှၤကိာ်နံၣ် တချုးလၢ စီၤပီလူး ကွဲးလံာ်ပရၢ ဒံးဘၣ်န့ၣ် ဖဲအစံၣ်တဲၤတဲလီၤတၢ်လၢ ဝ့ၢ်ယရူၤၡလ့ၣ်အခါ ပှၤထီဒါတၢ်တဖၣ် ထီဒါအီၤနးမး. ပှၤယူၤဒၤဖိလၢ အထီဒါတၢ်အဂၤ ၄၀ ဘျဲၣ်န့ၣ် “အဝဲသ့ၣ် ဆိၣ်လီၤအသး လၢတချုးလၢ အဝဲသ့ၣ်မၤသံ စီၤပီလူးဒံးဘၣ်န့ၣ် အဝဲသ့ၣ် တအီၣ်တၢ်အီတၢ်ဘၣ်.” (မၤတၢ် ၂၂:၂၂; ၂၃:၁၂-၁၄) ခရံာ်ဖိလၢညါတဖၣ်န့ၣ် ပှၤသးဟ့ ဒီးမၤနးမၤဖှီၣ်အဝဲသ့ၣ် သနာ်က့ ဒ်သိး အဝဲသ့ၣ်တၢ်နာ် ကဂၢၢ်ကျၢၤအဂီၢ် အဝဲသ့ၣ် ဘူၣ်ထီၣ်ဘါထီၣ်တၢ် တပူၤဃီ ဒီးစံၣ်တဲၤတဲလီၤသကိး တၢ်သးခုကစီၣ်.

၁၆. လံာ်ပရၢလၢ စီၤပီလူးကွဲးန့ၢ် ခရံာ်ဖိလၢညါတဖၣ်န့ၣ် ကဲဘျုးလၢပဂီၢ်ဒ်လဲၣ်. (ဧ့ၤဘြံၤ ၁၂:၇)

^၁၆ ဖဲခရံာ်ဖိလၢညါတဖၣ် ထံၣ်ဘၣ် တၢ်ထီဒုၣ်ထီဒါအခါ ဒ်သိးအဝဲသ့ၣ် ကအိၣ်ဒီး တၢ်တူၢ်န့ၢ်ခီၣ်ကဲအဂီၢ် တၢ်မနုၤမၤစၢၤ အဝဲသ့ၣ်လဲၣ်. ဖဲအဝဲသ့ၣ် ထံၣ်ဘၣ် တၢ်မၤကွၢ်အခါ စီၤပီလူး အဲၣ်ဒိးလၢ အဝဲသ့ၣ် ကအိၣ်ဒီး တၢ်ထံၣ်လၢအဂ့ၤ. အဃိ စီၤပီလူး ၡဲပၠးဝဲလၢ ကစၢ်ယွၤ ပျဲဝဲလၢ ခရံာ်ဖိတဖၣ် ကထံၣ်ဘၣ် တၢ်ကီတၢ်ခဲန့ၣ် မ့ၢ်ဒ်သိး အကမၤစၢၤ အဝဲသ့ၣ်လၢ ကဆဲးအိၣ်ဒီး တၢ်တူၢ်န့ၢ်ခီၣ်ကဲ. (ဖး ဧ့ၤဘြံၤ ၁၂:၇.) တၢ်မၤကွၢ်တဖၣ်အံၤ ကမၤစၢၤ ခရံာ်ဖိတဖၣ်လၢ အဝဲသ့ၣ် ကဆဲးမၤဂ့ၤထီၣ် အတၢ်ဂ့ၤတၢ်ဝါ ဒ်သိး ကမၤတၢ်ဘၣ် ယဟိဝၤယွၤ အသး. ခီဖျိလၢ ခရံာ်ဖိလၢညါတဖၣ် အိၣ်ဒီး တၢ်ထံၣ်လၢအဂ့ၤအဃိ မၤစၢၤအဝဲသ့ၣ်လၢ ကအိၣ်ဒီး တၢ်တူၢ်န့ၢ်ခီၣ်ကဲ.—ဧ့ၤ ၁၂:၁၁.

၁၇. ဘၣ်ဃးဒီး တၢ်တူၢ်န့ၢ်ခီၣ်ကဲန့ၣ် စီၤပီလူး န့ၢ်ဘၣ်တၢ်မၤလိဒ်လဲၣ်.

 ^၁၇ ဖဲခရံာ်ဖိလၢညါတဖၣ် ထံၣ်ဘၣ် တၢ်မၤကွၢ်အခါ စီၤပီလူး ဟ့ၣ်ဂံၢ်ဟ့ၣ်ဘါ အဝဲသ့ၣ် လၢကအိၣ်ဒီး တၢ်တူၢ်န့ၢ်ခီၣ်ကဲ ဒီးတဘၣ်ဟ့ၣ်အၡူဘၣ်. စီၤပီလူး အနီၢ်ကစၢ်ဒၣ်ဝဲ ထံၣ်ဘၣ် တၢ်မၤကွၢ်အဃိ အဟ့ၣ်ကူၣ် အဝဲသ့ၣ်ဒ်န့ၣ်န့ၣ် ဖးဘၣ်ညါ. တချုးလၢ စီၤပီလူး ကဲထီၣ်ခရံာ်ဖိဒံးဘၣ်န့ၣ် အမၤနးမၤဖှီၣ် ခရံာ်ဖိတဖၣ်အဃိ အဝဲသ့ၣ် ကတူၢ်ဘၣ်တၢ် နးထဲလဲၣ်န့ၣ် စီၤပီလူး သ့ၣ်ညါဝဲ. ဒီးဖဲစီၤပီလူး ကဲထီၣ်ခရံာ်ဖိ ဝံၤအလီၢ်ခံ အထံၣ်ဘၣ် တၢ်မၤကွၢ် အကလုာ်ကလုာ်. (၂ ကရံၣ် ၁၁:၂၃-၂၅) အဃိ အကဘၣ် လဲၤခီဖျိ တၢ်မၤနးမၤဖှီၣ် ဒ်လဲၣ်န့ၣ် အသ့ၣ်ညါဝဲစ့ၢ်ကီး. ဒီးဒ်သိး အကအိၣ်ဒီး တၢ်တူၢ်န့ၢ်ခီၣ်ကဲအဂီၢ် အကဘၣ်မၤ ဒ်လဲၣ်န့ၣ် အသ့ၣ်ညါဝဲဂ့ၤဂ့ၤ. တကးဒံးဘၣ် အတဲဘၣ် ခရံာ်ဖိတဖၣ်လၢ ဖဲအဝဲသ့ၣ် ထံၣ်ဘၣ် တၢ်မၤကွၢ်အခါ အဝဲသ့ၣ်ကဘၣ် သန့ၤသးလၢ ယဟိဝၤယွၤ ဒီးတဘၣ် သန့ၤသးလၢ အနီၢ်ကစၢ်ဘၣ်. အဃိ စီၤပီလူးတဲဝဲ ဒူဒူလၢ “ယဟိဝၤယွၤ မ့ၢ်ပှၤလၢ အမၤစၢၤယၤအဃိ ယတပျံၤတၢ်ဘၣ်.”—ဧ့ၤ ၁၃:၆.

၁၈. ခါဆူညါန့ၣ် ဒ်သိးပလဲၤခီဖျိ တၢ်မၤနးမၤဖှီၣ် ကန့ၢ်အဂီၢ် တၢ်မနုၤ ကမၤစၢၤပှၤလဲၣ်.

^၁၈ ဆၢကတီၢ်ခဲအံၤ ဒီပုၢ်ဝဲၢ်မုၣ်ခွါတနီၤ ထံၣ်ဘၣ် တၢ်မၤနးမၤဖှီၣ်. အဃိ ပပာ်ဖျါထီၣ် တၢ်အဲၣ်လၢ အဝဲသ့ၣ်ဖီခိၣ် ခီဖျိ ပဃ့ထုကဖၣ်လၢ အဝဲသ့ၣ်အဂီၢ် ဒီးမၤစၢၤအဝဲသ့ၣ်လၢ တၢ်လၢအလိၣ်ဘၣ်ဝဲသ့. (ဧ့ၤ ၁၀:၃၃) လံာ်စီဆှံ တဲဝဲလၢ “ပှၤလၢအအဲၣ်ဒိး တီဒီးကစၢ်ယွၤ ဒ်ယ့ၣ်ၡူးခရံာ်အပျဲၢ်တဂၤအသိးန့ၣ် ကဘၣ်တၢ်မၤနးမၤဖှီၣ် အဝဲသ့ၣ်ကိးဂၤဒဲး.” (၂ တံၤ ၃:၁၂) ခီဖျိလၢ တၢ်ဂ့ၢ်အံၤအဃိ ပဝဲကိးဂၤဒဲး ကဘၣ် အိၣ်ကတီၤသးလၢ တၢ်မၤနးမးဖှီၣ် လၢပကထံၣ်ဘၣ်တဖၣ်. ဒီးဖဲပထံၣ်ဘၣ် တၢ်မၤနးမၤဖှီၣ်အခါ ပကဘၣ် သန့ၤပသးလၢ ယဟိဝၤယွၤ ဒီးနာ်နီၢ်ကီၢ်လၢ အကမၤစၢၤပှၤ. ဖဲတၢ်ဆၢကတီၢ် ဘၣ်အခါ ယဟိဝၤယွၤ ကမၤပူၤဖျဲး ပှၤလၢအတီဒီးအီၤတဖၣ်.—၂ သ့း ၁:၇, ၈.

၁၉. ဒ်သိး ပကအိၣ်ကတီၤသးလၢ တၢ်နးတၢ်ဖှီၣ်ဖးဒိၣ်အဂီၢ် ပကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၉ လံာ်ပရၢလၢ စီၤပီလူးကွဲးန့ၢ် ခရံာ်ဖိလၢ အအိၣ်လၢ ဝ့ၢ်ယရူၤၡလ့ၣ် ဒီးလၢကီၢ်ယူဒၤန့ၣ် ကဲဘျုးလၢ ခရံာ်ဖိလၢ တၢ်မၢဖိအစိၤတဖၣ် အဂီၢ်စ့ၢ်ကီး. တကးဒံးဘၣ် ဖဲအဝဲသ့ၣ် ထံၣ်ဘၣ် တၢ်မၤနးမၤဖှီၣ်အခါ အဝဲသ့ၣ်ကဘၣ် အိၣ်ကတီၤသး ဒ်လဲၣ်န့ၣ် လံာ်ပရၢအံၤ မၤစၢၤအဝဲသ့ၣ်ဒိၣ်မး. ဒီးဒ်သိး ဒီပုၢ်ဝဲၢ်တဖၣ် ကနၢ်ပၢၢ် လံာ်စီဆှံဂ့ၤဂ့ၤအဂီၢ် စီၤပီလူး ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကမၤလိလံာ်စီဆှံ လီၤတံၢ်လီၤဆဲး. အဝဲသ့ၣ် မ့ၢ်မၤလိလံာ်စီဆှံ လီၤတံၢ်လီၤဆဲးန့ၣ် ကမၤစၢၤအဝဲသ့ၣ်လၢ ကဟးဆှဲး တၢ်သိၣ်လိလၢ ကမၤလီၤစှၤ အဝဲသ့ၣ်တၢ်နာ်. စီၤပီလူး ဟ့ၣ်ဂံၢ်ဟ့ၣ်ဘါစ့ၢ်ကီး ဒီပုၢ်ဝဲၢ်တဖၣ်လၢ ကမၤထွဲ ယ့ၣ်ၡူး အတၢ်ဟံးစုနဲၣ်ကျဲ ဒီးကဒိကနၣ် ပှၤလၢအတီခိၣ်ရိၤမဲတၢ်လၢ တၢ်အိၣ်ဖှိၣ်ပူၤတဖၣ် အကလုၢ်. တကးဒံးဘၣ် စီၤပီလူး မၤစၢၤခရံာ်ဖိတဖၣ်လၢ ဖဲအဝဲသ့ၣ် ထံၣ်ဘၣ် တၢ်မၤကွၢ်အခါ ဒ်သိးအဝဲသ့ၣ် ကအိၣ်ဒီး တၢ်တူၢ်န့ၢ်ခီၣ်ကဲအဂီၢ် အဝဲသ့ၣ် ကဘၣ်အိၣ်ဒီး တၢ်ထံၣ်လၢအဂ့ၤ ဒီးထံၣ်ဝဲဒ် ယဟိဝၤယွၤ သိၣ်လိအဝဲသ့ၣ်. ပဝဲစ့ၢ်ကီး ပကဘၣ်မၤထွဲ တၢ်ဟ့ၣ်ကူၣ်လၢ အအိၣ်လၢ လံာ်စီဆှံပူၤ. ပမ့ၢ်မၤထွဲန့ၣ် ပကအိၣ်ဒီး တၢ်သးတီ တုၤလၢအကတၢၢ်.—ဧ့ၤ ၃:၁၄.