တၢ်မၤလိ ၅၃
ဒီပုၢ်ဝဲၢ်ခွါသးစၢ်တဖၣ်—ကျဲးစၢးကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ
“ပာ်ဆူၣ်နသးဒီး အိၣ်ဒီးတၢ်သူၣ်ဒူသးဒူတက့ၢ်.”—၁ စီၤပၤ ၂:၂.
တၢ်သးဝံၣ် ၁၃၅ ယဟိဝၤယွၤ အတၢ်ဃ့ကညးလၢ “ဖိခွါဧၢ, အိၣ်ဒီးတၢ်ကူၣ်သ့”
တၢ်မၤလိအံၤ အတၢ်တိာ်ပာ် a
၁. ဒ်သိး ဒီပုၢ်ဝဲၢ်ခွါတဂၤ ကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် အကဘၣ် မၤမနုၤလဲၣ်.
စီၤပၤဒၤဝံး တဲဘၣ်စီၤၡလိၤမိၤလၢ “ပာ်ဆူၣ်နသးဒီး အိၣ်ဒီးတၢ်သူၣ်ဒူသးဒူတက့ၢ်.” (၁ စီၤပၤ ၂:၁-၃) တၢ်ဟ့ၣ်ကူၣ်တခါအံၤ အရ့ဒိၣ်လၢ ဒီပုၢ်ဝဲၢ်ခွါကိးဂၤဒဲး ကဘၣ်မၤထွဲဝဲ. ဒ်သိး အဝဲသ့ၣ် မၤထွဲဝဲ တၢ်ဟ့ၣ်ကူၣ်အံၤကသ့အဂီၢ် အဝဲသ့ၣ်ကဘၣ်ဃုသ့ၣ်ညါ ကစၢ်ယွၤ အတၢ်သိၣ်တၢ်သီ ဒီးအိၣ်မူမၤထွဲ အတၢ်ဟံးစုနဲၣ်ကျဲ လၢအတၢ်အိၣ်မူ ကိးသနၢၣ်ဒဲး. (လူၤ ၂:၅၂) ဘၣ်မနုၤအဃိ အရ့ဒိၣ်လၢ ဒီပုၢ်ဝဲၢ်ခွါသးစၢ်တဖၣ် ကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီလဲၣ်.
၂-၃. ဘၣ်မနုၤအဃိ အရ့ဒိၣ်လၢ ဒီပုၢ်ဝဲၢ်ခွါသးစၢ်တဖၣ် ကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီလဲၣ်.
၂ လၢဟံၣ်ပူၤဃီပူၤမ့ၢ်ဂ့ၤ လၢတၢ်အိၣ်ဖှိၣ်အပူၤမ့ၢ်ဂ့ၤ ဒီပုၢ်ဝဲၢ်ခွါတဖၣ်န့ၣ် ကဘၣ် မၤလၢပှဲၤမူဒါ အိၣ်ဝဲအါမး. ဘၣ်ဃးဒီး မူဒါတဖၣ်အံၤန့ၣ် ဘၣ်သ့ၣ်သ့ၣ် သုဝဲဒီပုၢ်ဝဲၢ်ခွါ သးစၢ်တဖၣ် ကဆိကမိၣ်ပာ်စၢၤလံ. ဘၣ်သ့ၣ်သ့ၣ် နအိၣ်ဒီးဖီတၢၣ်လၢ နကကဲ ပှၤမၤကစၢ်ယွၤတၢ်မၤ လၢဆၢကတီၢ်လၢပှဲၤ, နကကဲ တၢ်အိၣ်ဖှိၣ်အပှၤမၤစၢၤတၢ် ဒီးလၢခံန့ၣ် တၢ်အိၣ်ဖှိၣ်သးပှၢ်. ဒီးဘၣ်သ့ၣ်သ့ၣ် နကဘၣ်သး ဆီဟံၣ်ဆီဃီ ဒီးဟံဖိဟံလံၤ. (အ့း ၆:၄; ၁ တံၤ ၃:၁) ဘၣ်ဆၣ် ဒ်သိးနတုၤထီၣ်ထီၣ်ဘးလၢ နဖီတၢၣ် ဒီးမၤလၢပှဲၤမူဒါတဖၣ်အံၤ ကန့ၢ်အဂီၢ် နကဘၣ် ဒိၣ်တုာ်ခိၣ်ပှဲၤဆိလၢ နီၢ်သးတခီ. b
၃ ဒ်သိး နကဒိၣ်တုာ်ခိၣ်ပှဲၤ လၢနီၢ်သးတခီအဂီၢ် တၢ်လၢနကဘၣ်မၤန့ၣ် မ့ၢ်မနုၤလဲၣ်. နကဘၣ် မၤလိထီၣ်နသးလၢ တၢ်သ့တၢ်ဘၣ် အရ့ဒိၣ်တနီၤ. နမၤလိထီၣ်ပာ်စၢၤနသး ခဲအံၤ ဒီးမၤလၢပှဲၤနမူဒါ လၢခါဆူညါအဂီၢ် ကသ့ဒ်လဲၣ်.
တၢ်လၢနကဘၣ်မၤ ဒ်သိးနကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ
နမ့ၢ်ကွၢ်လိ ယ့ၣ်ၡူး အတၢ်ဂ့ၤတၢ်ဝါန့ၣ် ကမၤစၢၤနၤလၢ နကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ (ကွၢ်လံာ်အဆၢ ၄)
၄. ဒီပုၢ်ဝဲၢ်ခွါသးစၢ်တဖၣ် ကွၢ်လိပှၤလၢအအိၣ်ဒီး တၢ်ဒိဂ့ၤတဲာ်ဘၣ် ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၄ ဃုထၢ ပှၤလၢအအိၣ်ဒီး တၢ်ဒိဂ့ၤတဲာ်ဘၣ်လၢ နကကွၢ်လိအီၤအဂီၢ်. လၢလံာ်စီဆှံပူၤန့ၣ် ပှၤဒိဂ့ၤတဲာ်ဘၣ်လၢ ဒီပုၢ်ဝဲၢ်ခွါသးစၢ်တဖၣ် ကွၢ်လိဝဲသ့န့ၣ် အိၣ်ဝဲအါမး. ပိာ်ခွါလၢ အဒိဂ့ၤတဲာ်ဘၣ် လၢအပူၤကွံာ်တဖၣ်န့ၣ် အဲၣ်ဝဲကစၢ်ယွၤ ဒီးမၤလၢပှဲၤဝဲအမူဒါလၢ ကကွၢ်ထွဲဝဲ ကစၢ်ယွၤ အပှၤဂီၢ်မုၢ်ဂ့ၤဂ့ၤ. တကးဒံးဘၣ် ဒီပုၢ်ဝဲၢ်ခွါသးစၢ်တဖၣ် ကွၢ်လိဝဲ ဒီပုၢ်ဝဲၢ်ခွါလၢ အဒိၣ်တုာ်ခိၣ်ပှဲၤ လၢအဟံၣ်ပူၤဃီပူၤ ဒီးလၢအတၢ်အိၣ်ဖှိၣ်အပူၤသ့. (ဧ့ၤ ၁၃:၇) ထဲန့ၣ်တကးဒံးဘၣ် အဝဲသ့ၣ် ကွၢ်လိဝဲ ယ့ၣ်ၡူးအဒိအတဲာ် သ့စ့ၢ်ကီး. (၁ ပ့း ၂:၂၁) ဖဲနမၤလိပှၤတဖၣ်အံၤ အဂ့ၢ်အခါ ဆိကမိၣ်ဘၣ်ဃးဒီး အဝဲသ့ၣ် အတၢ်ဂ့ၤတၢ်ဝါ လၢနဘၣ်သးကွၢ်လိ. (ဧ့ၤ ၁၂:၁, ၂) ဝံၤဒီး ဆိကမိၣ်ထီၣ်လၢ နကကွၢ်လိအီၤဒ်လဲၣ်.
၅. နမၤအိၣ်ထီၣ် တၢ်သ့ဆိကမိၣ် ပဲာ်ထံနီၤဖးတၢ် ကသ့ဒ်လဲၣ် ဒီးဘၣ်မနုၤအဃိ တၢ်ဂ့ၤတၢ်ဝါတခါအံၤ အရ့ဒိၣ်လဲၣ်. (စံးထီၣ်ပတြၢၤ ၁၁၉:၉)
၅ မၤအိၣ်ထီၣ် ဒီး “ပၢၤဃာ် . . . တၢ်သ့ဆိကမိၣ် ပဲာ်ထံနီၤဖးတၢ်.” (ကတိၤ ၃:၂၁) ဒီပုၢ်ဝဲၢ်ခွါလၢ အအိၣ်ဒီး တၢ်သ့ဆိကမိၣ် ပဲာ်ထံနီၤဖးတၢ်န့ၣ် တချုးလၢ အဆၢတဲာ်တၢ် တမံၤမံၤဒံးဘၣ်န့ၣ် အဆိကမိၣ်ထံတၢ် လီၤတံၢ်လီၤဆဲး. အဃိ နကဘၣ် မၤအိၣ်ထီၣ် တၢ်သ့တၢ်ဘၣ်တခါအံၤ ဒီးဆဲးပၢၤဃာ်အီၤ. ဘၣ်မနုၤအဃိလဲၣ်. ပမ့ၢ်ကွၢ်လၢ ဆၢကတီၢ်ခဲအံၤ ပိာ်ခွါသးစၢ် အါတက့ၢ်န့ၣ် အဝဲသ့ၣ်ဆၢတဲာ်တၢ်လၢ အဒိးသန့ၤထီၣ်သးလၢ အတၢ်ဆိကမိၣ် ဒီးအတၢ်တူၢ်ဘၣ်. (ကတိၤ ၇:၇; ၂၉:၁၁) တကးဒံးဘၣ် တၢ်လၢပဖး, ပကွၢ် ဒီးပနၢ်ဟူဘၣ်လၢ အ့ၤထၢၤနဲၣ်အပူၤန့ၣ် အကဲဘျုး မ့တမ့ၢ် အမၤဘၣ်ဒိဝဲ ပတၢ်ဆိကမိၣ်သ့. အဃိ ဒ်သိးနကအိၣ်ဒီး တၢ်သ့ဆိကမိၣ် ပဲာ်ထံနီၤဖးတၢ်အဂီၢ် နကဘၣ်မၤဒ်လဲၣ်. အဆိကတၢၢ်န့ၣ် မၤလိလံာ်စီဆှံ အတၢ်ဟံးစုနဲၣ်ကျဲ ဒီးဆိကမိၣ်ထီၣ်လၢ တၢ်ဟံးစုနဲၣ်ကျဲတဖၣ်အံၤ ကဲဘျုးလၢ နဂီၢ်ဒ်လဲၣ်. ဝံၤဒီး မၤထွဲ တၢ်ဟံးစုနဲၣ်ကျဲတဖၣ်အံၤ ဒ်သိးကမၤစၢၤနၤလၢ နကဆၢတဲာ်တၢ်လၢ အဘၣ်ယဟိဝၤယွၤအသး. (ဖး စံးထီၣ်ပတြၢၤ ၁၁၉:၉.) နမ့ၢ်မၤအိၣ်ထီၣ် တၢ်သ့တၢ်ဘၣ် လၢအရ့ဒိၣ်တခါအံၤန့ၣ် အကမၤစၢၤနၤဒ်သိး နကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ. (ကတိၤ ၂:၁၁, ၁၂; ဧ့ၤ ၅:၁၄) တၢ်သ့ဆိကမိၣ် ပဲာ်ထံနီၤဖးတၢ်န့ၣ် ကမၤစၢၤနၤလၢ (၁) နကရ့ဒီး ဒီပုၢ်ဝဲၢ်မုၣ်ဒ်လဲၣ်. (၂) နကဆၢတဲာ်တၢ် ဘၣ်ဃးဒီး နတၢ်ကူတၢ်ကၤ ဒီးတၢ်ခွံခိၣ်ခွံနၢ်ဒ်လဲၣ်.
၆. တၢ်သ့ဆိကမိၣ် ပဲာ်ထံနီၤဖးတၢ်န့ၣ် ကမၤစၢၤဒီပုၢ်ဝဲၢ်ခွါလၢ ကရ့ဒီး ဒီပုၢ်ဝဲၢ်မုၣ်တဖၣ် ဒ်လဲၣ်.
၆ တၢ်သ့ဆိကမိၣ် ပဲာ်ထံနီၤဖးတၢ်န့ၣ် ကမၤစၢၤနၤဒ်သိး နကရ့ဒီး ဒီပုၢ်ဝဲၢ်မုၣ်တဖၣ် လၢတၢ်ပာ်ကဲအပူၤ. အဒိ ဒီပုၢ်ဝဲၢ်ခွါတဂၤ မ့ၢ်သးအိၣ်ဒီပုၢ်ဝဲၢ်မုၣ်တဂၤ ဒီးအဲၣ်ဒိး သ့ၣ်ညါအါထီၣ်အဂ့ၢ်န့ၣ် အကမၣ်ဘၣ်. ဘၣ်ဆၣ် ဒီပုၢ်ဝဲၢ်ခွါလၢ အအိၣ်ဒီး တၢ်သ့ဆိကမိၣ် ပဲာ်ထံနီၤဖးတၢ်န့ၣ် အမ့ၢ်တဆိကမိၣ်လၢ အကဘၣ်သး ဆီဟံၣ်ဆီဃီဒီး ဒီပုၢ်ဝဲၢ်မုၣ်တဂၤဘၣ်န့ၣ် အတဘၣ် ကွဲးန့ၢ်အီၤလံာ်, တဲတၢ်ဒီးအီၤ ဒီးမၤတၢ်တမံၤမံၤလၢ ဒီပုၢ်ဝဲၢ်မုၣ် ကဆိကမိၣ်ကမၣ်အီၤဘၣ်. (၁ တံၤ ၅:၁, ၂) အမ့ၢ်ပာ်တၢ်အဲၣ်တီဒီး ဒီပုၢ်ဝဲၢ်မုၣ်ဟီန့ၣ် အကဘၣ် ဒီသဒၢဝဲ ဒီပုၢ်ဝဲၢ်မုၣ်အံၤ အမံၤဂ့ၤသၣ်ဂ့ၤ ဒီးအဝဲသ့ၣ် တဘၣ်အိၣ်ထဲခံဂၤနီတဘျီဘၣ် ဒီးကဘၣ်အိၣ်ဒီး ပှၤလၢကကွၢ်ထွဲအဝဲသ့ၣ်ထီဘိ.—၁ ကရံၣ် ၆:၁၈.
၇. ဖဲဒီပုၢ်ဝဲၢ်ခွါသးစၢ် ဆၢတဲာ်တၢ် ဘၣ်ဃးဒီး တၢ်ကူတၢ်ကၤ ဒီးတၢ်ခွံခိၣ်ခွံနၢ်အခါ တၢ်သ့ဆိကမိၣ် ပဲာ်ထံနီၤဖးတၢ် ကမၤစၢၤအီၤဒ်လဲၣ်.
၇ ဒီပုၢ်ဝဲၢ်ခွါသးစၢ်လၢ အအိၣ်ဒီး တၢ်သ့ဆိကမိၣ် ပဲာ်ထံနီၤဖးတၢ်န့ၣ် အကဆၢတဲာ်တၢ် ဘၣ်ဃးဒီး တၢ်ကူတၢ်ကၤ ဒီးတၢ်ခွံခိၣ်ခွံနၢ် ဒ်ယဟိဝၤယွၤ အတၢ်ထံၣ်အိၣ်ဝဲအသိး. ဆၢကတီၢ်ခဲအံၤ ပှၤလၢအဒုးအိၣ်ထီၣ် တၢ်ကူတၢ်ကၤအသီတဖၣ်န့ၣ် အဝဲသ့ၣ် တပာ်ကဲ ယဟိဝၤယွၤဘၣ်. ဒီးဘၣ်သ့ၣ်သ့ၣ် အဝဲသ့ၣ် အိၣ်ဒီးလုၢ်လၢ်လၢအတဂ့ၤဘၣ်. တၢ်ကူတၢ်ကၤ လၢအဝဲသ့ၣ် ဒုးအိၣ်ထီၣ်ဝဲန့ၣ် အဃံး မ့တမ့ၢ် ပှၤပိာ်မုၣ် မ့ၢ်ကူကၤဝဲန့ၣ် လီၤဂာ်လၢ ပှၤပိာ်ခွါ ဒီးပှၤပိာ်ခွါ မ့ၢ်ကူကၤဝဲန့ၣ် လီၤဂာ်လၢ ပှၤပိာ်မုၣ်. အဃိ ဒီပုၢ်ဝဲၢ်ခွါသးစၢ်လၢ အကျဲးစၢး ကဲထီၣ် ပှၤဒိၣ်တုာ်ခိၣ်ပှဲၤလၢ နီၢ်သးတခီန့ၣ် ဖဲအဝဲသ့ၣ် ဆၢတဲာ်တၢ် ဘၣ်ဃးဒီး အတၢ်ကူတၢ်ကၤအခါ အဝဲသ့ၣ် ကဘၣ်ဆိကမိၣ် ဘၣ်ဃးဒီး ယဟိဝၤယွၤ အတၢ်ထံၣ် ဒီးကကွၢ်လိဝဲ ပှၤဒိဂ့ၤတဲာ်ဘၣ် လၢအအိၣ်လၢ တၢ်အိၣ်ဖှိၣ်အပူၤ. အကဘၣ် သံကွၢ်လီၤအသးလၢ ‘ယတၢ်ဃုထၢတဖၣ်န့ၣ် မ့ၢ်အပာ်ဖျါထီၣ်လၢ ယကဲပှၤလၢ အဆိကမိၣ်ထံတၢ် သ့ဂ့ၤဂ့ၤ ဒီးကွၢ်န့ၢ်တၢ်လၢ ပှၤဂၤအဂီၢ်ဧါ. ယတၢ်ကူတၢ်ကၤန့ၣ် မ့ၢ်အပာ်ဖျါထီၣ်လၢ ယကဲ ကစၢ်ယွၤ အခ့အပှၤတဂၤဧါ.’ (၁ ကရံၣ် ၁၀:၃၁-၃၃; တံ ၂:၆) ဒီပုၢ်ဝဲၢ်ခွါသးစၢ်လၢ အအိၣ်ဒီး တၢ်သ့ဆိကမိၣ် ပဲာ်ထံနီၤဖးတၢ်န့ၣ် ဒီပုၢ်ဝဲၢ်မုၣ်ခွါ ကပာ်ကဲအီၤ ဒီးအကန့ၢ်ဘၣ်စ့ၢ်ကီး ယဟိဝၤယွၤ အတၢ်ဘၣ်သး.
၈. ဒ်သိး ဒီပုၢ်ဝဲၢ်ခွါသးစၢ်တဂၤ ကဲထီၣ်ပှၤလၢ ပှၤနာ်န့ၢ်အီၤကသ့အဂီၢ် အကဘၣ် မၤဝဲဒ်လဲၣ်.
၈ ကဲထီၣ် ပှၤလၢ ပှၤနာ်န့ၢ်အီၤသ့. ဒီပုၢ်ဝဲၢ်ခွါသးစၢ်လၢ ပှၤနာ်န့ၢ်အီၤသ့န့ၣ် အမၤတၢ်ဆူၣ်ဆူၣ် ဒီးမၤလၢပှဲၤဝဲ အမူဒါတဖၣ် လီၤတံၢ်လီၤဆဲး. (လူၤ ၁၆:၁၀) ခဲအံၤ ပကဆိကမိၣ်ကွၢ် ယ့ၣ်ၡူး အဒိအတဲာ်. ယ့ၣ်ၡူးန့ၣ် အမၤအမူဒါလၢ တၢ်သူၣ်အိၣ်သးအိၣ် ဒီးအမၤလၢပှဲၤ အမူဒါထီဘိ. တကးဒံးဘၣ် မူဒါတဖၣ်လၢ ယဟိဝၤယွၤဟ့ၣ်အီၤန့ၣ် မ့ၢ်ကီဘၣ်ဆၣ် အမၤလၢပှဲၤဝဲခဲလၢာ်. ယ့ၣ်ၡူး အဲၣ်ပှၤဟီၣ်ခိၣ်ဖိ ဒီးအသးအိၣ် ဟ့ၣ်လီၤအသးသမူ လၢအဝဲသ့ၣ်အဂီၢ် လီၤဆီဒၣ်တၢ် လၢအပျဲၢ်အဘီၣ်တဖၣ်အဂီၢ်. (ယိၤ ၁၃:၁) အဃိ နမ့ၢ်အဲၣ်ဒိး ကွၢ်လိယ့ၣ်ၡူးန့ၣ် မူဒါလၢ ပှၤဟ့ၣ်နၤန့ၣ် ကျဲးစၢးမၤလၢပှဲၤအီၤ လီၤတံၢ်လီၤဆဲး. ဒီးနမၤမူဒါတဖၣ်အံၤ မ့ၢ်တသ့ဂ့ၤဂ့ၤဘၣ်န့ၣ် အိၣ်ဒီးတၢ်ဆီၣ်လီၤသး ဒီးဃ့တၢ်မၤစၢၤလၢ ဒီပုၢ်ဝဲၢ်ခွါလၢ အဒိၣ်တုာ်ခိၣ်ပှဲၤတဖၣ်အအိၣ်. ကျဲးစၢးမၤတၢ်ဆူၣ်ဆူၣ် ဒီးတဘၣ်မၤထဲ မူဒါလၢအညီတဖၣ်တဂ့ၤ. (ရိ ၁၂:၁၁) ကျဲးစၢး မၤဝံၤနမူဒါ ဒီးမၤအီၤလၢ “ယဟိဝၤယွၤ အဂီၢ် . . . ဒီးတဘၣ်မၤအီၤ ဒ်သိးသုမၤအီၤလၢ ပှၤဟီၣ်ခိၣ်ဖိအဂီၢ် အသိးတဂ့ၤ.” (ကလီး ၃:၂၃) နတကဲပှၤလၢပှၤပှဲၤဘၣ် အဃိ ဖဲနမၤကမၣ်တၢ်အခါ အိၣ်ဒီးတၢ်ဆီၣ်လီၤသး ဒီးအၢၣ်လီၤနတၢ်ကမၣ်.—ကတိၤ ၁၁:၂.
မၤလိန့ၢ် တၢ်သ့တၢ်ဘၣ် လၢအကဲဘျုး
၉. ဘၣ်မနုၤအဃိ ဒီပုၢ်ဝဲၢ်ခွါသးစၢ်တဖၣ် ကဘၣ်မၤလိန့ၢ် တၢ်သ့တၢ်ဘၣ် လၢအကဲဘျုးလဲၣ်.
၉ ဒ်သိး နကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် နကဘၣ်မၤလိန့ၢ် တၢ်သ့တၢ်ဘၣ် လၢအကဲဘျုး. နမ့ၢ်မၤဒ်န့ၣ်န့ၣ် အကမၤစၢၤနၤလၢ နကတူၢ်လိာ် မူဒါတဖၣ်လၢ တၢ်အိၣ်ဖှိၣ်အပူၤ, နကအိၣ်ဒီးတၢ်မၤလၢ နကလုၢ်အီၣ်နသး ဒီးနဟံၣ်ဖိဃီဖိအဂီၢ်. တကးဒံးဘၣ် နကအိၣ်ဒီး တၢ်ရ့လိာ်သးဒီးပှၤဂၤလၢအဂ့ၤ. ခဲအံၤ ပကတဲသကိး တၢ်သ့တၢ်ဘၣ် အရ့ဒိၣ်တနီၤလၢ နကဘၣ်မၤလိအီၤ.
နဖးလံာ်ဒီးကွဲးလံာ် မ့ၢ်သ့ဂ့ၤဂ့ၤန့ၣ် ကကဲဘျုးလၢနဂီၢ် ဒီးလၢတၢ်အိၣ်ဖှိၣ်အဂီၢ် (ကွၢ်လံာ်အဆၢ ၁၀-၁၁)
၁၀-၁၁. ဒီပုၢ်ဝဲၢ်ခွါသးစၢ်တဂၤ ဖးလံာ်ဒီးကွဲးလံာ် မ့ၢ်သ့ဂ့ၤဂ့ၤန့ၣ် ကကဲဘျုးလၢ အနီၢ်ကစၢ်အဂီၢ် ဒီးတၢ်အိၣ်ဖှိၣ်အဂီၢ်ဒ်လဲၣ်. (စံးထီၣ်ပတြၢၤ ၁:၁-၃) (ကွၢ်စ့ၢ်ကီးတၢ်ဂီၤ.)
၁၀ မၤလိသးလၢ နဖးလံာ်ဒီးကွဲးလံာ်ကသ့ဂ့ၤဂ့ၤ. လံာ်စီဆှံ တဲဝဲလၢ ပှၤလၢ အပာ်လီၤတၢ်ဆၢကတီၢ်လၢ အကဖး ကစၢ်ယွၤအကလုၢ်ကထါ ဒီးဆိကမိၣ်ထံအီၤ ကိးနံၤဒဲးန့ၣ် အကအိၣ်ဒီး တၢ်သးခု ဒီးအမၤတၢ် ကကဲထီၣ်လိၣ်ထီၣ်. (ဖး စံးထီၣ်ပတြၢၤ ၁:၁-၃.) အဃိ ဒီပုၢ်ဝဲၢ်ခွါတဂၤ မ့ၢ်ဖးလံာ်စီဆှံ ကိးနံၤဒဲးန့ၣ် အကသ့ၣ်ညါထီၣ် ယဟိဝၤယွၤ အတၢ်ထံၣ် ဒီးကမၤစၢၤအီၤလၢ အဆိကမိၣ်တၢ် ကသ့ဂ့ၤဂ့ၤ ဒီးမၤထွဲ လံာ်စီဆှံ အတၢ်ဟံးစုနဲၣ်ကျဲ. (ကတိၤ ၁:၃, ၄) ပလိၣ်ဘၣ်အါထီၣ် ဒီပုၢ်ဝဲၢ်ခွါလၢ အအိၣ်ဒီးတၢ်သ့တၢ်ဘၣ်ဒ်န့ၣ် လၢတၢ်အိၣ်ဖှိၣ်အပူၤ. ဘၣ်မနုၤအဃိလဲၣ်.
၁၁ ဒီပုၢ်ဝဲၢ်မုၣ်ခွါတဖၣ် လိၣ်ဘၣ်ဝဲ ဒီပုၢ်ဝဲၢ်ခွါလၢ အသိၣ်လိတၢ်သ့ ဒီးအဟ့ၣ်ကူၣ်တၢ် လၢအဒိးသန့ၤထီၣ်သးလၢ လံာ်စီဆှံအပူၤ အတၢ်မၤစၢၤ. (တံ ၁:၉) အဃိ နဖးလံာ် ဒီးကွဲးလံာ် မ့ၢ်သ့ဂ့ၤဂ့ၤန့ၣ် နကတဲာ်ကတီၤ နတၢ်စံၣ်တဲၤတဲလီၤ ဒီးဟ့ၣ်ထီၣ်တၢ်စံးဆၢ လၢအကဲဘျုး ဒီးမၤဂၢၢ်ကျၢၤ ပှၤဂၤအတၢ်နာ်သ့. ဒီးဖဲနမၤ နီၢ်ကစၢ်တၢ်မၤလိလံာ်စီဆှံ, နကနၣ် တၢ်စံၣ်တဲၤတဲလီၤ လၢတၢ်အိၣ်ဖှိၣ်, ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်အခါ နကွဲးနီၣ်ဃာ် တၢ်ဂ့ၢ်လၢအကဲဘျုး သ့စ့ၢ်ကီး. တၢ်ဂ့ၢ်လၢ နကွဲးနီၣ်ဃာ်တဖၣ်န့ၣ် ကမၤစၢၤနၤဒ်သိး နကမၤဂၢၢ်ကျၢၤထီၣ် နတၢ်နာ် ဒီးဟ့ၣ်ဂံၢ်ဟ့ၣ်ဘါပှၤဂၤ.
၁၂. ဒ်သိးနကကဲထီၣ် ပှၤလၢအဒိကနၣ်တၢ်ထံထံ ဒီးတဲတၢ်ဒီးပှၤဂၤမုာ်မုာ်အဂီၢ် နကဘၣ်မၤဒ်လဲၣ်.
၁၂ မၤလိသးလၢ နကဒိကနၣ်တၢ်ထံထံ ဒီးတဲတၢ်ဒီးပှၤဂၤမုာ်မုာ်. ဒီပုၢ်ဝဲၢ်ခွါတဖၣ်န့ၣ် အဝဲသ့ၣ် ကဘၣ်အိၣ်ဒီး တၢ်ဂ့ၤတၢ်ဝါလၢ ကဒိကနၣ်တၢ်ထံထံ ဒီးတဲတၢ်ဒီးပှၤဂၤမုာ်မုာ်. အဃိ အကဘၣ် ဒိကနၣ်န့ၢ်ပှၤဂၤ ဒီးနၢ်ပၢၢ်စၢၤ ပှၤဂၤအတၢ်ဆိကမိၣ် ဒီးတၢ်တူၢ်ဘၣ်တဖၣ်. (ကတိၤ ၂၀:၅) ဒီးဒ်သိး နကသ့ၣ်ညါဘၣ် ပှၤတဂၤ အတၢ်ပာ်သူၣ်ပာ်သးအဂီၢ် နကဘၣ် သ့ၣ်ညါစ့ၢ်ကီး ပှၤတဂၤ တဲတၢ်အကလုၢ်အိၣ်ဒ်လဲၣ်, အတၢ်ပာ်မဲာ်ပာ်နါ ဒီးတၢ်အိၣ်ထီၣ်အိၣ်လီၤ အိၣ်ဒ်လဲၣ်. သနာ်က့ နမ့ၢ်တရ့ဒီး ပှၤတဂၤန့ၣ်ဘၣ်န့ၣ် နကသ့ၣ်ညါ အတၢ်ပာ်သူၣ်ပာ်သးအဂီၢ် တညီဘၣ်. ဒီးနမ့ၢ် ဆဲးကျိးလိာ်သးလၢ အံၣ်လဲးထြီနံးအပူၤ ဒ်သိးဒီး နကွဲး အံမ့ မ့တမ့ၢ် ဆှၢလံာ်ထီဘိန့ၣ် ဖဲနထံၣ်ပှၤဂၤလၢ မဲာ်သကိးမဲာ်အခါ ကကီလၢ နကရ့လိာ်သးဒီးအဝဲသ့ၣ်. အဃိ နကဘၣ်ကျဲးစၢး ရ့လိာ်သးဒီးပှၤဂၤလၢ မဲာ်သကိးမဲာ်.—၂ ယိၤ ၁၂.
မၤလိန့ၢ် တၢ်သ့တၢ်ဘၣ်တခါခါ လၢကမၤစၢၤနၤဒ်သိး နဃုတၢ်မၤကန့ၢ်ညီညီ (ကွၢ်လံာ်အဆၢ ၁၃)
၁၃. ဒီပုၢ်ဝဲၢ်ခွါသးစၢ်တဖၣ် ကဘၣ်မၤလိ တၢ်သ့တၢ်ဘၣ် မနုၤလဲၣ်. (၁ တံၤမသ့း ၅:၈) (ကွၢ်စ့ၢ်ကီးတၢ်ဂီၤ.)
၁၃ မၤလိသးလၢ နကွၢ်ထွဲလီၤနသး ကသ့အဂီၢ်. ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အကွၢ်ထွဲလီၤအသးကဘၣ်သ့ ဒီးအလုၢ်အီၣ်လုၢ်အီ အဟံၣ်ဖိဃီဖိ ကဘၣ်သ့ဂ့ၤဂ့ၤ. (ဖး ၁ တံၤမသ့း ၅:၈.) လၢထံကီၢ်တနီၤန့ၣ် ဒီပုၢ်ဝဲၢ်ခွါသးစၢ်တဖၣ် မၤလိန့ၢ်ဝဲ တၢ်မၤတခါခါ လၢအပါ မ့တမ့ၢ် အဘူးအတံၢ် တဂၤဂၤအအိၣ်. ဒီးလၢတၢ်လီၢ်အဂၤတနီၤန့ၣ် ဒီပုၢ်ဝဲၢ်ခွါသးစၢ်တဖၣ် မၤလိန့ၢ်ဝဲ တၢ်မၤတခါခါ ဖဲအထီၣ် တီၤထီကၠိအခါ. နမ့ၢ်မၤလိသ့နသးလၢ တၢ်မၤတခါခါန့ၣ် ကမၤစၢၤနၤလၢ နဃုတၢ်မၤကန့ၢ်ညီ. (မၤတၢ် ၁၈:၂, ၃; ၂၀:၃၄; အ့း ၄:၂၈) မၤတၢ်ဆူၣ်ဆူၣ် ဒီးနမ့ၢ်စးထီၣ်မၤ တၢ်တမံၤမံၤန့ၣ် မၤအီၤတုၤအဝံၤ. နမ့ၢ်မၤဒ်န့ၣ်န့ၣ် ပှၤဂၤကပာ်သူၣ်ပာ်သးဝဲ တၢ်လၢနမၤ ဒီးနဃုတၢ်မၤကန့ၢ်ညီ. တၢ်ဂ့ၤတၢ်ဝါ ဒီးတၢ်သ့တၢ်ဘၣ် လၢပတဲသကိးတဖၣ်န့ၣ် အရ့ဒိၣ်လၢ ဒီပုၢ်ဝဲၢ်ခွါသးစၢ်တဖၣ်အဂီၢ် ဒ်သိးအဝဲသ့ၣ် ကမၤလၢပှဲၤ အမူဒါလၢခါဆူညါအဂီၢ်. ခဲအံၤ ပကတဲသကိး မူဒါလၢ ခါဆူညါအဂီၢ်တနီၤ.
အိၣ်ကတီၤသးလၢ နမူဒါလၢခါဆူညါအဂီၢ်
၁၄. ဒ်သိးဒီပုၢ်ဝဲၢ်ခွါသးစၢ်တဂၤ ကဲထီၣ် ပှၤမၤကစၢ်ယွၤတၢ်မၤ လၢဆၢကတီၢ်လၢပှဲၤ ကသ့အဂီၢ် အအိၣ်ကတဲာ်ကတီၤသး သ့ဒ်လဲၣ်.
၁၄ ကဲထီၣ် ပှၤမၤကစၢ်ယွၤတၢ်မၤ လၢဆၢကတီၢ်လၢပှဲၤ. ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးအါဂၤန့ၣ် ဖဲအဝဲသ့ၣ်သးစၢ်အခါ အစးထီၣ်မၤဝဲ ကစၢ်ယွၤတၢ်မၤ လၢဆၢကတီၢ်လၢပှဲၤ. ဒီပုၢ်ဝဲၢ်ခွါသးစၢ်တဖၣ် မ့ၢ်မၤပှၤလဲၤလၢညါန့ၣ် ကမၤစၢၤအဝဲသ့ၣ် ဒ်သိးအဝဲသ့ၣ် ကမၤသကိးဘၣ်တၢ်ဒီး ဒီပုၢ်ဝဲၢ်မုၣ်ခွါလၢ အအိၣ်ဒီး တၢ်ပာ်သူၣ်ပာ်သး အကလုာ်ကလုာ် အဃိ အရ့ဒီးပှၤဂၤ ကသ့ဂ့ၤဂ့ၤ. တကးဒံးဘၣ် အကဘၣ်သ့ၣ်ညါသူစ့ ဂ့ၤဂ့ၤဘၣ်ဘၣ်. (ဖံလံး ၄:၁၁-၁၃) ဒ်သိး အဝဲသ့ၣ် ကကဲထီၣ် ပှၤမၤကစၢ်ယွၤတၢ်မၤ လၢဆၢကတီၢ်လၢပှဲၤအဂီၢ် အစးထီၣ်မၤဆိ ပှၤလဲၤလၢညါမၤစၢၤတၢ်သ့. ပှၤအါဂၤန့ၣ် စးထီၣ်မၤဆိ ပှၤလဲၤလၢညါမၤစၢၤတၢ် ဒီးလၢခံန့ၣ် အဝဲသ့ၣ် မၤက့ၤဝဲ ပှၤလဲၤလၢညါ. နမ့ၢ်မၤပှၤလဲၤလၢညါလံန့ၣ် လၢခံကယီကယီ နကဒိးန့ၢ်ဘၣ် တၢ်ခွဲးတၢ်ယာ်လၢ နကကဲထီၣ် ပှၤမၤကစၢ်ယွၤတၢ်မၤ လၢဆၢကတီၢ်လၢပှဲၤ ဒ်သိးဒီး နလဲၤမၤစၢၤတၢ်လၢ တၢ်သူၣ်ထီၣ်ဘှီထီၣ် မ့တမ့ၢ် လဲၤမၤစၢၤတၢ်လၢ ဘ့ၤသ့လး.
၁၅-၁၆. ဒ်သိးဒီပုၢ်ဝဲၢ်ခွါသးစၢ်တဂၤ ကတုၤထီၣ်ထီၣ်ဘး လၢကမၤစၢၤတၢ်လၢ တၢ်အိၣ်ဖှိၣ်အပူၤအဂီၢ် တၢ်မနုၤကမၤစၢၤအီၤလဲၣ်.
၁၅ ကဲထီၣ် တၢ်အိၣ်ဖှိၣ်အပှၤမၤစၢၤတၢ် မ့တမ့ၢ် တၢ်အိၣ်ဖှိၣ်သးပှၢ်. ဒီပုၢ်ဝဲၢ်ခွါတဖၣ်န့ၣ် ကဘၣ်အိၣ်ဒီး ဖီတၢၣ်လၢ ကကဲထီၣ် တၢ်အိၣ်ဖှိၣ်သးပှၢ် ဒီးမၤစၢၤ ဒီပုၢ်ဝဲၢ်မုၣ်ခွါတဖၣ် လၢတၢ်အိၣ်ဖှိၣ်အပူၤ. လံာ်စီဆှံ တဲဝဲလၢ ပိာ်ခွါတဂၤဂၤ မ့ၢ်ဂုာ်ကျဲးစၢး ဒ်သိးကကဲထီၣ် ပှၤကွၢ်ထွဲတၢ်န့ၣ် မ့ၢ်အ “လီကီ တၢ်မၤလၢအဂ့ၤတမံၤ.” (၁ တံၤ ၃:၁) သနာ်က့ တချုးလၢ ဒီပုၢ်ဝဲၢ်ခွါတဂၤ ကဲထီၣ်ဘၣ် တၢ်အိၣ်ဖှိၣ်သးပှၢ်ဒံးဘၣ်န့ၣ် အကဘၣ် တုၤထီၣ်ထီၣ်ဘးလၢ အကကဲထီၣ် တၢ်အိၣ်ဖှိၣ်အပှၤမၤစၢၤတၢ်. တၢ်အိၣ်ဖှိၣ်အပှၤမၤစၢၤတၢ်န့ၣ် မၤစၢၤဝဲ တၢ်အိၣ်ဖှိၣ်သးပှၢ် လၢကျဲအါဘိ. တကးဒံးဘၣ် တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်န့ၣ် အဝဲသ့ၣ် မၤစၢၤ ဒီပုၢ်ဝဲၢ်မုၣ်ခွါလၢ တၢ်ဆီၣ်လီၤသးအပူၤ ဒီးစံၣ်တဲၤတဲလီၤတၢ်လၢ တၢ်သးဆူၣ်အပူၤ. ဒီပုၢ်ဝဲၢ်ခွါသးစၢ်တဂၤ မ့ၢ်ကဲပှၤသးစၢ်သနာ်က့ အကဲထီၣ် တၢ်အိၣ်ဖှိၣ်အပှၤမၤစၢၤတၢ်သ့. ဒီးတၢ်အိၣ်ဖှိၣ်အပှၤမၤစၢၤတၢ် လၢအသးအိၣ် အနံၣ် ၂၀ ဘျဲၣ်ဘျဲၣ်ဖိန့ၣ် ပှၤပာ်ထီၣ်အီၤလၢ ကကဲထီၣ် တၢ်အိၣ်ဖှိၣ်သးပှၢ်သ့.
၁၆ နတုၤထီၣ်ထီၣ်ဘးလၢ မူဒါတဖၣ်အံၤ ကသ့ဒ်လဲၣ်. ဒ်သိး နကတုၤထီၣ်ထီၣ်ဘးအဂီၢ် နကဘၣ်အိၣ်ဒီး တၢ်ဂ့ၤတၢ်ဝါတနီၤလၢ လံာ်စီဆှံပာ်ဖျါထီၣ်ဝဲ. တကးဒံးဘၣ် နကဘၣ်အဲၣ် ယဟိဝၤယွၤ, အဲၣ်နဟံၣ်ဖိဃီဖိ ဒီးဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ. (၁ တံၤ ၃:၁-၁၃; တံ ၁:၆-၉; ၁ ပ့း ၅:၂, ၃) ကျဲးစၢးဃုသ့ၣ်ညါ တၢ်ဂ့ၤတၢ်ဝါတဖၣ်အံၤ လီၤတံၢ်လီၤဆဲး ဒီးဒ်သိးနမၤအိၣ်ထီၣ် တၢ်ဂ့ၤတၢ်ဝါတဖၣ်အံၤ ကသ့အဂီၢ် ဃ့ယဟိဝၤယွၤ အတၢ်မၤစၢၤ. c
ယဟိဝၤယွၤ ဘၣ်သးဝဲလၢ ဝၤတဂၤ ကအဲၣ်အမါဒီးအဖိ, ကကွၢ်ထွဲအဝဲသ့ၣ် ဒီးမၤလၢပှဲၤန့ၢ် အနီၢ်ခိဒီးအနီၢ်သး တၢ်လိၣ်ဘၣ် (ကွၢ်လံာ်အဆၢ ၁၇)
၁၇. ဒ်သိးဒီပုၢ်ဝဲၢ်ခွါသးစၢ်တဂၤ ကကဲထီၣ် ဝၤဒီးဟံၣ်ခိၣ် လၢအဂ့ၤအဂီၢ် အအိၣ်ကတီၤအသး ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၇ ကဲထီၣ် ဝၤဒီးဟံၣ်ခိၣ်. ဒ်ယ့ၣ်ၡူးတဲဝဲအသိး ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သး တနီၤန့ၣ် အဝဲသ့ၣ်အိၣ်သဘျ့. (မး ၁၉:၁၂) သနာ်က့ နမ့ၢ်ဆၢတဲာ်လီၤသးလၢ နကဆီဟံၣ်ဆီဃီန့ၣ် နကအိၣ်ဒီး ဝၤအမူဒါ ဒီးဟံၣ်ခိၣ်အမူဒါ. (၁ ကရံၣ် ၁၁:၃) ယဟိဝၤယွၤ ဘၣ်သးဝဲလၢ ဝၤတဂၤ ကအဲၣ်အမါ, ကကွၢ်ထွဲအီၤ ဒီးမၤလၢပှဲၤန့ၢ် အနီၢ်ခိ ဒီးအနီၢ်သးတၢ်လိၣ်ဘၣ်. (အ့း ၅:၂၈, ၂၉) လၢတၢ်မၤလိအံၤ အခီၣ်ထံးန့ၣ် ပတဲသကိး တၢ်ဂ့ၤတၢ်ဝါ ဒီးတၢ်သ့တၢ်ဘၣ် လၢနကဘၣ် မၤအိၣ်ထီၣ်. နမ့ၢ်ကဲပှၤလၢ အအိၣ်ဒီး တၢ်သ့ဆိကမိၣ် ပဲာ်ထံနီၤဖးတၢ်, ပာ်ကဲ ဒီပုၢ်ဝဲၢ်မုၣ် ဒီးကဲပှၤလၢ ပှၤနာ်န့ၢ်အီၤသ့န့ၣ် ကမၤစၢၤနၤဒ်သိး နကကဲထီၣ် ဝၤလၢအဂ့ၤတဂၤ. တကးဒံးဘၣ် နကအိၣ်ကတီၤသးလၢ နကမၤလၢပှဲၤနမူဒါ ဒ်ဝၤဒီးဟံၣ်ခိၣ်အသိး.
၁၈. ဒ်သိးဒီပုၢ်ဝဲၢ်ခွါသးစၢ်တဂၤ ကကဲထီၣ် ပါလၢအဂ့ၤအဂီၢ် အအိၣ်ကတီၤအသး ကသ့ဒ်လဲၣ်.
၁၈ ကဲထီၣ်ပါ. နဆီဟံၣ်ဆီဃီ ဝံၤအလီၢ်ခံ ဘၣ်သ့ၣ်သ့ၣ် နကဘၣ်သးကဲထီၣ်ပါ. အဃိ ဒ်သိးနကကဲထီၣ် ပါလၢအဂ့ၤတဂၤအဂီၢ် နဟံန့ၢ်တၢ်မၤလိ လၢယဟိဝၤယွၤ အအိၣ်ကသ့ဒ်လဲၣ်. နဟံန့ၢ်တၢ်မၤလိ သ့ဒီဒူၣ်. (အ့း ၆:၄) အဒိ ယဟိဝၤယွၤ တဲဘၣ်အဖိခွါယ့ၣ်ၡူးလၢ အအဲၣ်အီၤ ဒီးအဘၣ်သူၣ်ဘၣ်သးအီၤ. (မး ၃:၁၇) အဃိ နမ့ၢ်ကဲထီၣ်ပါတဂၤန့ၣ် တဲဘၣ်နဖိလၢ နအဲၣ်အီၤထီဘိ. ဒီးပတြၢၤအဝဲသ့ၣ်လၢ တၢ်ဂ့ၤလၢအဝဲသ့ၣ်မၤဝဲတဖၣ်. နမ့ၢ်ကဲပါ လၢအကွၢ်လိ ယဟိဝၤယွၤန့ၣ် နကမၤစၢၤနဖိ ဒ်သိးအကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ. အဃိ ခဲအံၤန့ၣ် နအိၣ်ကတီၤနသး လၢနကကဲထီၣ် ပါလၢအဂ့ၤတဂၤ သ့ခီဖျိ နပာ်ဖျါထီၣ်တၢ်အဲၣ် ဒီးသးအိၣ်ကွၢ်ထွဲ နဟံၣ်ဖိဃီဖိ ဒီးဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်အပူၤ. တကးဒံးဘၣ် မၤလိနသး ဒ်သိးနကတဲအဝဲသ့ၣ်လၢ နအဲၣ်အီၤ ဒီးပာ်လုၢ်ပာ်ပှ့ၤအီၤ. (ယိၤ ၁၅:၉) နမ့ၢ်မၤဒ်အံၤန့ၣ် ကမၤစၢၤနၤလၢ ခါဆူညါန့ၣ် နကကဲထီၣ် ဝၤဒီးပါလၢအဂ့ၤတဂၤ. မ့မ့ၢ်ခဲအံၤန့ၣ် နကကဲထီၣ် ပှၤလၢအလုၢ်ဒိၣ်ပှ့ၤဒိၣ် လၢယဟိဝၤယွၤအဂီၢ်, ကဲထီၣ်တၢ်မၤစၢၤလၢ နဟံၣ်ဖိဃီဖိ ဒီးလၢတၢ်အိၣ်ဖှိၣ်အဂီၢ်.
ခဲအံၤ နကမၤဒ်လဲၣ်
ဒီပုၢ်ဝဲၢ်ခွါသးစၢ်အါဂၤ လၢအမၤလိန့ၢ် တၢ်သိၣ်လိ လၢလံာ်စီဆှံအပူၤ ဒီးအိၣ်မူမၤထွဲဝဲန့ၣ် အဝဲသ့ၣ် ကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ (ကွၢ်လံာ်အဆၢ ၁၉-၂၀)
၁၉-၂၀. ဒ်သိးဒီပုၢ်ဝဲၢ်ခွါသးစၢ်တဖၣ် ကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် တၢ်မနုၤကမၤစၢၤ အဝဲသ့ၣ်လဲၣ်. (ကွၢ်တၢ်ဂီၤလၢ လံာ်ကုခိၣ်.)
၁၉ ဒီပုၢ်ဝဲၢ်ခွါသးစၢ်တဖၣ် မ့ၢ်ဘၣ်သး ကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီန့ၣ် အဝဲသ့ၣ် ကဘၣ်ထဲးဂံၢ်ထဲးဘါ. နကဘၣ်ဃုထၢ ပှၤလၢအအိၣ်ဒီး တၢ်ဒိဂ့ၤတဲာ်ဘၣ် လၢနကကွၢ်လိအီၤအဂီၢ်, နကဘၣ် မၤအိၣ်ထီၣ် တၢ်သ့ဆိကမိၣ် ပဲာ်ထံနီၤဖးတၢ် ဒီးနကဘၣ် ကဲထီၣ်ပှၤလၢ ပှၤနာ်န့ၢ်အီၤသ့. တကးဒံးဘၣ် နကဘၣ် မၤလိန့ၢ် တၢ်သ့တၢ်ဘၣ် လၢအကဲဘျုး ဒီးအိၣ်ကတီၤသးလၢ နမူဒါလၢခါဆူညါအဂီၢ်.
၂၀ ဖဲနဆိကမိၣ်ဘၣ်ဃး တၢ်လၢနကဘၣ်မၤတဖၣ်အခါ ဘၣ်သ့ၣ်သ့ၣ် နဆိကမိၣ်လၢ နမၤတန့ၢ်ဘၣ်. သနာ်က့ နမၤန့ၢ်. နကဘၣ် သ့ၣ်နီၣ်ထီၣ်လၢ ယဟိဝၤယွၤ ဘၣ်သးမၤစၢၤနၤ သပှၢ်တၢၢ်. (ၡါ ၄၁:၁၀, ၁၃) တကးဒံးဘၣ် ဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်ပူၤန့ၣ် ကမၤစၢၤနၤစ့ၢ်ကီး. ဒီးနမ့ၢ်ကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတဂၤန့ၣ် နကအိၣ်ဒီး တၢ်သးခု ဒီးတၢ်သူၣ်မံသးမုာ် လၢနတၢ်အိၣ်မူအပူၤ. ဒီပုၢ်ဝဲၢ်ခွါသးစၢ်သ့ၣ် ပအဲၣ်သုဒိၣ်မး. ခဲအံၤ ဖဲသုကျဲးစၢးကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးအခါ မ်ယဟိဝၤယွၤ မၤစၢၤသု ဒီးဆိၣ်ဂ့ၤသု.—ကတိၤ ၂၂:၄.
တၢ်သးဝံၣ် ၆၅ လဲၤဆူညါ
a လၢတၢ်အိၣ်ဖှိၣ်အပူၤန့ၣ် ပလိၣ်ဘၣ် ဒီပုၢ်ဝဲၢ်ခွါလၢ အဒိၣ်တုာ်ခိၣ်ပှဲၤ လၢနီၢ်သးတခီ. အဃိ လၢတၢ်မၤလိ တခါအံၤန့ၣ် ပကတဲသကိး ဘၣ်ဃးဒီး ဒီပုၢ်ဝဲၢ်ခွါသးစၢ်တဖၣ် ကဲထီၣ်ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီ ကသ့ဒ်လဲၣ်အဂ့ၢ်.
b ကွၢ် “တၢ်ကတိၤအခီပညီ” လၢတၢ်မၤလိလၢ အပူၤကွံာ်တခါ.
