ယဟိဝၤယွၤဟ့ၣ်နၤ တၢ်ဟ့ၣ်အါမးအဃိ နသးခုဒိၣ်မး ဒီးနကသူတၢ်ဟ့ၣ်တဖၣ်အံၤ ဒ်လဲၣ်န့ၣ် ယဟိဝၤယွၤ ဟ့ၣ်နၤတၢ်သဘျ့အဃိ နသးခုစ့ၢ်ကီး. လံာ်စီဆှံ ပာ်ဖျါထီၣ်ဝဲလၢ သံးန့ၣ် အကဲဝဲ ယဟိဝၤယွၤ အတၢ်ဟ့ၣ်တခါ. အတဲစ့ၢ်ကီးဝဲလၢ “တၢ်အီၣ်န့ၣ် မ့ၢ်ဝဲလၢ ကမၤသးခု ပှၤသးအဂီၢ် ဒီးစပံးထံန့ၣ် မၤဖှံထီၣ် ပှၤသး.” (စံၣ် ၁၀:၁၉; စံး ၁၀၄:၁၅) ဘၣ်ဆၣ် ဘၣ်သ့ၣ်သ့ၣ် နကထံၣ်ဘၣ်လၢ ပှၤတနီၤန့ၣ် အအိၣ်ဒီး တၢ်ကီတၢ်ခဲ ဘၣ်ဃးဒီး တၢ်အီသံး. တကးဒံးဘၣ် ဘၣ်ဃးဒီး တၢ်အီသံးန့ၣ် ပှၤအါဂၤ လၢဟီၣ်ခိၣ်ဒီဘ့ၣ်ညါန့ၣ် အတၢ်ထံၣ် တဒ်သိးလိာ်သးဘၣ်. အဃိ ဘၣ်ဃးဒီးတၢ်အီသံးန့ၣ် ခရံာ်ဖိတဂၤ ကဆၢတဲာ်တၢ်လၢ တၢ်ကူၣ်သ့အပူၤအဂီၢ် တၢ်မနုၤကမၤစၢၤအီၤလဲၣ်.

ဖဲပဆၢတဲာ်တၢ်အခါ ပကဘၣ်အိၣ်ဒီးတၢ်ထံၣ် ဒ်ယဟိဝၤယွၤအသိး ဒီးတဘၣ်မ့ၢ်ဒ် ပှၤဟီၣ်ခိၣ်ဖိ အတၢ်ထံၣ်အသိးဘၣ်. ပမ့ၢ်အိၣ်ဒီးတၢ်ထံၣ် ဒ်ယဟိဝၤယွၤအသိးန့ၣ် ကကဲဘျုးလၢပဂီၢ် ဒီးပကအိၣ်ဒီး တၢ်သးခု.

ဘၣ်သ့ၣ်သ့ၣ် နကပလီၢ်ဘၣ်သးလၢ ပှၤအါဂၤန့ၣ် အဝဲသ့ၣ်အီသံးဆူၣ်မး ဒီးအီဝဲအါမးစ့ၢ်ကီး. ပှၤတနီၤန့ၣ် အဝဲသ့ၣ်တူၢ်ဘၣ်ဝဲလၢ အမ့ၢ်အီသံးန့ၣ် အအိၣ်မုာ်ထီၣ်. ပှၤအဂၤတနီၤန့ၣ် အဝဲသ့ၣ်အီသံး ဒ်သိး အကသးပ့ၤနီၣ်ကွံာ် အတၢ်ကိၢ်တၢ်ဂီၤ. ဒီးလၢတၢ်လီၢ်တနီၤန့ၣ် ပှၤတနီၤဆိကမိၣ်ဝဲလၢ ပှၤလၢအအီသံးန့ၣ် အကဲပိာ်ခွါနီၢ်ကီၢ် ဒီးအတပျံၤတၢ်ဘၣ်.

မ့မ့ၢ်လၢ ခရံာ်ဖိတဖၣ်န့ၣ် အတၢ်ဘၣ်တ့ကစၢ် အဲၣ်အဝဲသ့ၣ် ဒီးဟံးစုနဲၣ်ကျဲ အဝဲသ့ၣ်. အဒိ ပတၢ်ဘၣ်တ့ကစၢ် ဟ့ၣ်ပလီၢ်ပှၤ ဘၣ်ဃးဒီး တၢ်ကီတၢ်ခဲလၢ အကဲထီၣ်သး ခီဖျိလၢ တၢ်အီသံးအါတလၢအဃိ. ဖဲကတိၤဒိ ၂၃:၂၉-၃၅ န့ၣ်ပဖးဘၣ် ဘၣ်ဃးဒီး ပှၤအီမူၤသံးတဂၤ ဒီးတၢ်ကီတၢ်ခဲ လၢအထံၣ်ဘၣ်ဝဲတဖၣ်အဂ့ၢ်. a ဒီပုၢ်ဝဲၢ်ခွါဒဲနံးယၢၤ လၢအကဲတၢ်အိၣ်ဖှိၣ်သးပှၢ် ဒီးအအိၣ်လၢ ကီၢ်ယူရပၤန့ၣ် အနီၣ်ဘၣ်က့ၤဝဲ အတၢ်အိၣ်မူဖဲ တချုးအကဲထီၣ် ယဟိဝၤပှၤအုၣ်အသး ဒံးဘၣ်အခါ. အတဲဝဲဒ်အံၤ. “လၢညါန့ၣ် ယအီသံးဆူၣ်မး ဒီးယဆၢတဲာ်ကမၣ်ဘၣ်တၢ်ဒီဒူၣ်. အဃိ ယထံၣ်ဘၣ် တၢ်ကီတၢ်ခဲဒီဒူၣ် ဒီးယမ့ၢ်ဆိကမိၣ်ထီၣ်က့ၤ တဘျီဘျီန့ၣ် ယသးတမုာ်ဘၣ်.”

ဘၣ်ဃးဒီး တၢ်အီသံးန့ၣ် ပဆၢတဲာ်တၢ်လၢ တၢ်ကူၣ်သ့အပူၤ ကသ့ဒ်လဲၣ်. ဒီးပဟးဆှဲး တၢ်ကီတၢ်ခဲလၢ အကဲထီၣ်သး ခီဖျိတၢ်အီသံးအါတလၢ ကသ့ဒ်လဲၣ်. တၢ်ဂ့ၢ်လၢ အရ့ဒိၣ်န့ၣ် မ့ၢ်ဝဲ ပကဘၣ်ဆၢတဲာ်တၢ်လၢ အဒိးသန့ၤထီၣ်သးလၢ ကစၢ်ယွၤအတၢ်ထံၣ်.

ဘၣ်ဃးဒီးသံးန့ၣ် လံာ်စီဆှံ တဲဝဲဒ်လဲၣ်. ဘၣ်မနုၤအဃိ ပှၤတနီၤ အီသံးလဲၣ်. ပကကွၢ်သကိး.

ပအီသံးန့ၣ် လံာ်စီဆှံတတြီဝဲဘၣ် ဒီးလံာ်စီဆှံ ပာ်ဖျါထီၣ်ဝဲလၢ သံးန့ၣ်အမၤဖှံထီၣ်ပှၤသး. လံာ်စီဆှံ တဲဝဲလၢ “အီၣ်တၢ်လၢ တၢ်သးခုအပူၤ ဒီးအီစပံးထံလၢ တၢ်သူၣ်ဖှံသးညီ အပူၤတက့ၢ်.” (စံၣ် ၉:၇) တဘျီတခီၣ် ယဟိဝၤယွၤအခ့အပှၤ လၢအသးတီလၢညါတဖၣ် ဒီးယ့ၣ်ၡူးအနီၢ်ကစၢ်စ့ၢ်ကီး အီဝဲသံး.—မး ၂၆:၂၇-၂၉; လူၤ ၇:၃၄; ၁ တံၤ ၅:၂၃.

လံာ်စီဆှံတတြီဝဲ တၢ်အီသံးဘၣ်, ဘၣ်ဆၣ် အတြီဝဲ တၢ်အီမူၤသံး. လံာ်စီဆှံ တဲဝဲလၢ “အီမူၤသုသးလၢ စပံးထံတဂ့ၤ.” (အ့း ၅:၁၈) တကးဒံးဘၣ် အတဲစ့ၢ်ကီးလၢ “ပှၤလၢ အအီမူၤသံး . . . တန့ၢ်သါဘၣ် ကစၢ်ယွၤအဘီအမုၢ်ဘၣ်.” (၁ ကရံၣ် ၆:၁၀) ဖဲအံၤ ပသ့ၣ်ညါဘၣ်လၢ ယဟိဝၤယွၤတြီဝဲ တၢ်အီသံးအါတလၢ ဒီးတၢ်အီမူၤသံး. အဃိ ဖဲပဆၢတဲာ်တၢ် ဘၣ်ဃးဒီး တၢ်အီသံးအခါ ပကဘၣ်အိၣ်ဒီးတၢ်ထံၣ်ဒ် ယဟိဝၤယွၤအသိး ဒီးပတဘၣ် အိၣ်ဒီးတၢ်ထံၣ်ဒ် ပှၤလၢအအိၣ်လၢ ပခိၣ်ပဃၢၤအသိးဘၣ်.

ပှၤတနီၤ ဆိကမိၣ်ဝဲလၢ အမ့ၢ်အီသံးအါအါ သနာ်က့ အတမူၤဘၣ်. တၢ်ဆိကမိၣ်တခါအံၤ အလီၤဘၣ်ယိၣ်ဒိၣ်မး. လံာ်စီဆှံ ပာ်ဖျါထီၣ်ဝဲ လီၤတံၢ်လီၤဆဲးလၢ ပှၤပိာ်မုၣ်မ့ၢ်ဂ့ၤ ပှၤပိာ်ခွါမ့ၢ်ဂ့ၤ မ့ၢ်ကဲ “စပံးထံအကုၢ် ခီဖျိလၢအအီဝဲ အါအါအဃိ” န့ၣ်အကမၤဘၣ် တၢ်ကမၣ်ဖးဒိၣ် ဒီးမၤဟးဂီၤ အတၢ်ရ့လိာ်သးဒီး ယဟိဝၤယွၤ. (တံ ၂:၃; ကတိၤ ၂၀:၁) ယ့ၣ်ၡူး ဟ့ၣ်ပလီၢ်ဝဲလၢ ပှၤတဂၤမ့ၢ် “အီတၢ် အါတလၢ” န့ၣ်အတအိၣ်ဘၣ်လၢ ဟီၣ်ခိၣ်သီအပူၤဘၣ်. (လူၤ ၂၁:၃၄-၃၆) အဃိ ဖဲခရံာ်ဖိတဂၤ အီသံးအခါ ဒ်သိးတၢ်ကီတၢ်ခဲ တအိၣ်ထီၣ်တဂ့ၤအဂီၢ် တၢ်မနုၤကမၤစၢၤအီၤလဲၣ်.

ဖဲပဆၢတဲာ်တၢ် ဘၣ်ဃးဒီး တၢ်အီသံးအခါ ပမ့ၢ်ဆၢတဲာ်တၢ် ဒ်ပကလုာ်ဒူၣ် အလုၢ်အလၢ် ဒီးပှၤလၢအအိၣ်လၢ ပခိၣ်ပဃၢၤအတၢ်ထံၣ် အိၣ်ဝဲအသိးန့ၣ် အလီၤဘၣ်ယိၣ်ဒိၣ်မး. ဘၣ်ဃးဒီး တၢ်အီၣ်တၢ်အီန့ၣ် ခရံာ်ဖိအမ့ၢ်အတီတဖၣ် ကဘၣ်ဆၢတဲာ်တၢ် လၢတၢ်ကူၣ်သ့အပူၤ ဒ်ကစၢ်ယွၤအတၢ်ဘၣ်သး အိၣ်ဝဲအသိး. တကးဒံးဘၣ် လံာ်စီဆှံ ဟ့ၣ်ပလီၢ်ပှၤလၢ “သုအီၣ်တၢ်မ့ၢ်ဂ့ၤ, သုအီတၢ်မ့ၢ်ဂ့ၤ, သုမၤတၢ်လၢအဂၤ တမံၤမံၤမ့ၢ်ဂ့ၤ မၤတၢ်ခဲလၢာ် လၢကစၢ်ယွၤ အလၤကပီၤ အဂီၢ်တက့ၢ်.” (၁ ကရံၣ် ၁၀:၃၁) ခဲအံၤ ပကဆိကမိၣ်ကွၢ်သကိး တၢ်သံကွၢ် ဒီးလံာ်စီဆှံ အတၢ်ဟံးစုနဲၣ်ကျဲတနီၤ.

မ့ၢ်ယအဲၣ်ဒိးလၢ ပှၤကဘၣ်သူၣ်ဘၣ်သးယၤအဃိ ယအီသံးဧါ. ၂ မိၤၡ့ ၂၃:၂ တဲဝဲလၢ “နတဘၣ် မၤပိာ် ပှၤဂီၢ်မုၢ်အခံ” တဂ့ၤ. ဖဲအံၤန့ၣ် ယဟိဝၤယွၤ ဟ့ၣ်ပလီၢ်ဝဲ ပှၤအံၣ်စရ့လးဖိလၢ ပှၤဂီၢ်မုၢ်လၢ အတမၤတၢ်ဘၣ် ကစၢ်ယွၤအသးဘၣ်န့ၣ် ပှၤအံၣ်စရ့လးဖိ တဘၣ်မၤပိာ်ဝဲအခံဘၣ်. တၢ်ဟ့ၣ်ကူၣ်တခါအံၤ ကဲဘျုးဒံးလၢ ခရံာ်ဖိလၢဆၢကတီၢ်ခဲအံၤ အဂီၢ်စ့ၢ်ကီး. ဖဲပဆၢတဲာ်တၢ် ဘၣ်ဃးဒီး တၢ်အီသံးအခါ ပမ့ၢ်ပျဲလၢ ပှၤဂၤအတၢ်ထံၣ် ဒီးအတၢ်ဆၢတဲာ် ကဒိၣ်စိလၢ ပဖီခိၣ်န့ၣ် လၢခံကယီကယီန့ၣ် ပတမၤထွဲ ယဟိဝၤယွၤ အတၢ်ဘျၢလၢၤဘၣ် ဒီးပတၢ်ရ့လိာ်သးဒီး ယဟိဝၤယွၤ ကဟးဂီၤကွံာ်ဝဲ.—ရိ ၁၂:၂.

မ့ၢ်ယအဲၣ်ဒိးလၢ ပှၤကဆိကမိၣ်ဒိၣ်ယၤအဃိ ယအီသံးဧါ. ဘၣ်ဃးဒီး တၢ်အီသံးထီဘိ ဒီးအီသံးအါအါန့ၣ် ကလုာ်ဒူၣ်တနီၤ ထံၣ်ဝဲဒ် တၢ်လၢပှၤမၤညီနုၢ်ဝဲ ဒီးအဝဲသ့ၣ် တဆိကမိၣ်ဝဲလၢ တၢ်နီတမံၤဘၣ်. (၁ ပ့း ၄:၃) ဘၣ်ဆၣ် ၁ ကရံၣ်သူး ၁၆:၁၃ ဟ့ၣ်ကူၣ်ပှၤလၢ “စီၣ်မဲာ်စီၣ်နါ, အိၣ်ဆၢထၢၣ် ဂၢၢ်ဂၢၢ်ကျၢၤကျၢၤ လၢတၢ်စူၢ်တၢ်နာ်အပူၤ, မၤသုသးဒ် ပိာ်ခွါအသိး ဒီးကဲထီၣ်ပှၤလၢ အဂံၢ်ဆူၣ်ဘါဆူၣ်တက့ၢ်.” သံးန့ၣ်အမၤစၢၤပှၤတဂၤ ဒ်သိး အဂံၢ်အဘါဆူၣ်ထီၣ် ကသ့ဧါ. တသ့နီတစဲးဘၣ်. တၢ်လၢသံးန့ၣ် အမၤစှၤလီၤ ပှၤတဂၤအတၢ်သ့တၢ်ဘၣ်လၢ အကဆိကမိၣ်ထံတၢ် ဒီးကဆၢတဲာ်တၢ် လၢအဘၣ်. အဃိ ပှၤတဂၤမ့ၢ်အီသံးအါအါန့ၣ် အတကဲပှၤလၢ အဂံၢ်အဘါဆူၣ်ဘၣ်, အကဲပှၤလၢ အဂံၢ်စၢ်ဘါစၢ်ဟီ. တကးဒံးဘၣ် ယၡါယၤ ၂၈:၇ တဲဝဲလၢ ခီဖျိလၢသံးအဃိန့ၣ် ပှၤတဂၤ ဟးကနူၤကပၤ ဒီးအဆၢတဲာ်တၢ်လၢအဘၣ် တသ့လၢၤဘၣ်.

ဒ်သိးပကမၤ တၢ်လၢအဘၣ်အဂီၢ် ယဟိဝၤယွၤ ဟ့ၣ်ပှၤတၢ်ဂံၢ်တၢ်ဘါ လၢပလိၣ်ဘၣ် ဒီးပကအိၣ်ဒီး တၢ်ဂံၢ်တၢ်ဘါအဂီၢ် ပကဘၣ် ‘စီၣ်မဲာ်စီၣ်နါ, အိၣ်ဆၢထၢၣ် ဂၢၢ်ဂၢၢ်ကျၢၤကျၢၤ လၢတၢ်စူၢ်တၢ်နာ်အပူၤ.’ (စံး ၁၈:၃၂) ပစီၣ်မဲာ်စီၣ်နါ ဒီးအိၣ်ဆၢထၢၣ် ဂၢၢ်ဂၢၢ်ကျၢၤကျၢၤ သ့ခီဖျိ ပဟးဆှဲး တၢ်လီၤဘၣ်ယိၣ် ဒီးပတဘၣ် ဆၢတဲာ်တၢ်လၢ အကမၤဟးဂီၤပ တၢ်ရ့လိာ်သးဒီး ယဟိဝၤယွၤဘၣ်. အဒိ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အအိၣ်ဒီး တၢ်ရ့လိာ်သးဒီး ယဟိဝၤယွၤလၢအဂ့ၤ. ဒီးခီဖျိလၢ အအိၣ်ဒီး တၢ်သးဒူ ဒီးအမၤတၢ်လၢအဘၣ်ထီဘိအဃိ ပှၤအါဂၤ ပာ်ကဲအီၤ.

မ့ၢ်ယအီသံး ဒ်သိးယကသးပ့ၤနီၣ်ကွံာ် ယတၢ်ကီတၢ်ခဲဧါ. ပှၤကွဲးထါစံးထီၣ်ပတြၢၤတဂၤ ကွဲးဝဲလၢ “ဖဲယသူၣ်ကိၢ်သးဂီၤတၢ် အါတလၢအခါ န [ယဟိဝၤယွၤ] မၤမုာ်ထီၣ်ယသး ဒီးမၤသးခုယၤ.” (စံး ၉၄:၁၉) ဖဲနသူၣ်ကိၢ်သးဂီၤတၢ်အခါ ဃ့ယဟိဝၤယွၤလၢ အတၢ်မၤစၢၤ ဒီးတဘၣ်ဆိကမိၣ်လၢ သံးကမၤစၢၤနၤတဂ့ၤ. ဒီးဒ်သိး နတၢ်သူၣ်ကိၢ်သးဂီၤ ကစှၤလီၤအဂီၢ် ဃ့ထုကဖၣ်လၢ ယဟိဝၤယွၤအအိၣ် ခဲအံၤခဲအံၤ. ပှၤအါဂၤ ထံၣ်ဘၣ်ဝဲလၢ အဝဲသ့ၣ် ဃ့တၢ်ဟ့ၣ်ကူၣ် လၢဒီပုၢ်ဝဲၢ်မုၣ်ခွါလၢ အဒိၣ်တုာ်ခိၣ်ပှဲၤတဖၣ် အအိၣ်အဃိ အဝဲသ့ၣ် န့ၢ်ဘၣ်အဘျုးအါမး. သံးန့ၣ် အတမၤစၢၤ ပှၤတဂၤလၢ အကသးပ့ၤနီၣ်ကွံာ် အတၢ်ကီတၢ်ခဲဘၣ်. နီၢ်ကီၢ်န့ၣ် သံးကမၤစှၤလီၤ အတၢ်သ့တၢ်ဘၣ်လၢ အကမၤ တၢ်လၢအဘၣ်ဟီ. (ဟိၤ ၄:၁၁) အဒိ ဒီပုၢ်ဝဲၢ်ခွါဒဲနံးယၢၤ လၢပဖးဘၣ်အဂ့ၢ် လၢအခီၣ်ထံးန့ၣ် အတဲဝဲလၢ “ယသူၣ်ကိၢ်သးဂီၤတၢ် ဒီးယတူၢ်ဘၣ်လၢ ယတၢ်ကမၣ်အိၣ်. ဒ်သိး ယတၢ်တူၢ်ဘၣ်တဖၣ်အံၤ ကလီၤမၢ်အဂီၢ် ယအီသံး. ဘၣ်ဆၣ် ခီဖျိလၢယအီသံးအဃိ ယထံၣ်ဘၣ်တၢ်ကီတၢ်ခဲအါထီၣ်. ယသကိးတအိၣ်လၢၤဘၣ် ဒီးယတၢ်ပာ်ကဲလီၤနီၢ်ကစၢ်သး တအိၣ်လၢၤဘၣ်.” လၢခံ တၢ်မနုၤမၤစၢၤ ဒီပုၢ်ဝဲၢ်ခွါဒဲနံးယၢၤလဲၣ်. ဒီပုၢ်ဝဲၢ်ခွါဒဲနံးယၢၤ တဲဝဲလၢ “ယသ့ၣ်ညါလီၤသးလၢ ယတလိၣ်ဘၣ်သံးဘၣ်, ယလိၣ်ဘၣ်လၢ ယဟိဝၤယွၤ အတၢ်မၤစၢၤဟီ. ခီဖျိလၢ ယဟိဝၤယွၤ မၤစၢၤယၤအဃိ ယလဲၤခီဖျိ တၢ်ကီတၢ်ခဲန့ၢ်ဝဲ.” ပမ့ၢ်ဆိကမိၣ်လၢ ပအိၣ်ဒီး တၢ်ကီတၢ်ခဲဒိၣ်မး သနာ်က့ ပကဘၣ် သ့ၣ်နီၣ်ထီၣ်လၢ ယဟိဝၤယွၤ သးအိၣ်မၤစၢၤပှၤထီဘိ.—ဖံလံး ၄:၆, ၇; ၁ ပ့း ၅:၇.

ဒ်သိးနကသ့ၣ်ညါလီၤနသးလၢ နအီသံးအါထဲလဲၣ်အဂီၢ် သံကွၢ်လီၤနသးလၢ တၢ်သံကွၢ်တဖၣ်အံၤ. ‘ဘၣ်ဃးဒီး ယအီသံးန့ၣ် မ့ၢ်ယဟံၣ်ဖိဃီဖိ မ့တမ့ၢ် ယသကိးတဂၤဂၤ ဘၣ်ဟ့ၣ်ပလီၢ်ယၤဧါ.’ အဝဲသ့ၣ် မ့ၢ်ဘၣ်ဟ့ၣ်ပလီၢ်နၤန့ၣ် ဘၣ်သ့ၣ်သ့ၣ် နအိၣ်ဒီးတၢ်ကီတၢ်ခဲ ဘၣ်ဃးဒီး တၢ်အီသံးန့ၣ် နတသ့ၣ်ညါဘၣ်. ‘ယအီသံးအါန့ၢ်ဒံးလၢညါဧါ.’ ဘၣ်သ့ၣ်သ့ၣ် နစွဲထီၣ်သံးလံ. ‘ယမ့ၢ်တအီဘၣ်သံးတသီ မ့တမ့ၢ် အါန့ၢ်တသီန့ၣ် ယအိၣ်တမုာ်ဘၣ်ဧါ.’ နအိၣ်မ့ၢ်တမုာ်ဘၣ်န့ၣ် နဘၣ်သ့ၣ်ညါလၢ နစွဲထီၣ်သံးလံ. ဒီးဒ်သိး နဖၠးတၢ်စွဲထီၣ်သံးကန့ၢ်အဂီၢ် နကလိၣ်ဘၣ် ကသံၣ်သရၣ်အတၢ်မၤစၢၤ.

တၢ်အီသံးအါတလၢန့ၣ် အဒုးအိၣ်ထီၣ် တၢ်ကီတၢ်ခဲ အါမးအဃိ ခရံာ်ဖိတနီၤန့ၣ် အဝဲသ့ၣ် တအီသံး နီတစဲးဘၣ်. ပှၤအဂၤတနီၤန့ၣ် အီဝဲတဝံၣ်ဘၣ်အဃိ အဝဲသ့ၣ်တအီဝဲဘၣ်. နသကိးတဂၤ မ့ၢ်ဆၢတဲာ်လီၤသး လၢ အတအီသံးဘၣ်န့ၣ် ပာ်ကဲအတၢ်ဆၢတဲာ် ဒီးတဘၣ်တဲဆါအီၤတဂ့ၤ.

ဘၣ်သ့ၣ်သ့ၣ် နဆိကမိၣ်လၢ နမ့ၢ်ဆၢတဲာ်လီၤနသးလၢ နကအီသံးထဲလဲၣ်န့ၣ် ကဂ့ၤလၢနဂီၢ်. အဃိ နကဆၢတဲာ်လီၤနသးလၢ နကအီသံး တနွံမၣ်တဘျီ မ့တမ့ၢ် ဖဲနအီၣ်တၢ်အခါ နကအီသံး ထဲတစဲးဖိ. မ့မ့ၢ်ပှၤအဂၤတနီၤန့ၣ် အဝဲသ့ၣ်ပာ်လီၤသးလၢ သံးမ့တမ့ၢ် တၢ်ထံတၢ်နိလၢ အပၣ်ဃုာ်ဒီးသံးတနီၤန့ၣ် အဝဲသ့ၣ် ကအီဝဲဖဲအကြၢး. အဒိ အဝဲသ့ၣ် ကအီသံး မ့တမ့ၢ် ကအီဘံၤယၤ ဖဲအကြၢး ဘၣ်ဆၣ် အဝဲသ့ၣ်တအီဝဲ သံးလၢအသဟီၣ်ဆူၣ် မ့တမ့ၢ် တၢ်ထံတၢ်နိလၢ အပၣ်ဃုာ်ဒီးသံးဘၣ်. ဒီးအမ့ၢ်ပာ်လီၤသး လၢအကမၤဝဲဒ်န့ၣ်န့ၣ် အမၤထွဲဝဲကညီ. ခီဖျိလၢ အဆၢတဲာ်လီၤသး ဒ်အံၤအဃိ အတလိၣ်မဲာ်ဆှး ဒီးဘၣ်ယိၣ်လၢ ပှၤကထံၣ်အီၤဒ်လဲၣ်န့ၣ်ဘၣ်.

ဖဲပဆၢတဲာ်တၢ် ဘၣ်ဃးဒီး တၢ်အီသံးအခါ ပကဘၣ် ဆိကမိၣ်န့ၢ်တၢ်လၢ ပှၤဂၤအဂီၢ်စ့ၢ်ကီး. ရိမ့ၤ ၁၄:၂၁ တဲဝဲလၢ “နမ့ၢ်တအီၣ် တၢ်ဖံးတၢ်ညၣ် ဒီးတအီ စပံးထံဘၣ် ဒီးနမ့ၢ်တမၤတၢ်အဂၤလၢ အကကဲထီၣ် တၢ်လီၤဃံၢ်အလီၢ်လၢ နဒီပုၢ်ဝဲၢ်အဂီၢ် နီတမံၤဘၣ်န့ၣ် မ့ၢ်တၢ်လၢ အဂ့ၤကတၢၢ်လီၤ.” နမၤထွဲ လံာ်စီဆှံ အတၢ်ဟ့ၣ်ကူၣ်တခါအံၤ ကသ့ဒ်လဲၣ်. နမၤထွဲသ့ခီဖျိ နပာ်ဖျါထီၣ် ဒီပုၢ်ဝဲၢ်တၢ်အဲၣ်. အဒိ နအီသံးန့ၢ် ဘၣ်ဆၣ် နမ့ၢ်သ့ၣ်ညါလၢ အကကဲထီၣ် တၢ်လီၤဃံၢ်အလီၢ်လၢ ပှၤဂၤအဂီၢ်န့ၣ် နပာ်ဖျါထီၣ်တၢ်အဲၣ် လၢပှၤဂၤအဖီခိၣ်သ့ခီဖျိ နတအီသံးလၢအမဲာ်ညါဘၣ်. နမ့ၢ်မၤဒ်န့ၣ်န့ၣ် နပာ်ဖျါထီၣ်လၢ နနၢ်ပၢၢ်စၢၤ ပှၤဂၤအတၢ်တူၢ်ဘၣ် ဒီးနဆိကမိၣ်န့ၢ်တၢ် လၢပှၤဂၤအဂီၢ် ဒီးနတကွၢ်တၢ်ထဲ နနီၢ်ကစၢ်အဂီၢ်ဘၣ်.—၁ ကရံၣ် ၁၀:၂၄.

တကးဒံးဘၣ် ဘၣ်ဃးဒီးသံးန့ၣ် ပဒိၣ်ပာ်လီၤဝဲ တၢ်သိၣ်တၢ်သီစ့ၢ်ကီး ဒီးခရံာ်ဖိတဖၣ်န့ၣ် ကဘၣ်ဒိကနၣ်မၤထွဲဝဲ တၢ်သိၣ်တၢ်သီတဖၣ်အံၤ. အဒိ ပဒိၣ်ပာ်လီၤဝဲ တၢ်သိၣ်တၢ်သီလၢ ပှၤသးနံၣ် မ့ၢ်ပှဲၤမၣ် ပှၤအီသံးန့ၢ်. ဒီးတၢ်သိၣ်တၢ်သီ အိၣ်လၢ ပှၤမ့ၢ်နီကါ မ့တမ့ၢ် ဖဲပှၤမၤတၢ် တမံၤမံၤလၢ အဘၣ်ဃးဒီးစဲးန့ၣ် ပှၤတဘၣ်အီသံးဘၣ်.—ရိ ၁၃:၁-၅.

ယဟိဝၤယွၤ ဟ့ၣ်ပှၤတၢ်ဟ့ၣ် လၢအဂ့ၤအါမး ဒီးလၢအကျါန့ၣ် အပၣ်ဃုာ်ဒီး တၢ်သဘျ့လၢ ပကဆၢတဲာ်တၢ်လၢ ပနီၢ်ကစၢ်အဂီၢ်. ဒီးပဃုထၢလၢ ပကအီၣ် တၢ်အီၣ်တၢ်အီ မနုၤလဲၣ်သ့. အဃိ ဖဲပဆၢတဲာ်တၢ်အခါ ပကဘၣ် ပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်သဘျ့လၢ ပကဃုထၢတၢ်လၢ ပနီၢ်ကစၢ်အဂီၢ် ဒီးမၤသးခု ပပါအိၣ်လၢမူခိၣ်အသး.