တၢ်မၤလိ ၄၉
တၢ်သးဝံၣ် ၁၄၇ တၢ်အၢၣ်လီၤလၢ တၢ်မူအထူအယိာ်
ဒ်သိးနကအိၣ်မူဘၣ်လီၤထူလီၤယိာ်အဂီၢ် နကဘၣ် မၤမနုၤလဲၣ်
“ပှၤကိးဂၤဒဲးလၢ အတူၢ်လိာ်ဖိခွါ ဒီးစူၢ်က့ၤနာ်က့ၤအီၤန့ၣ် ကန့ၢ်ဘၣ် တၢ်မူအထူအယိာ်.”—ယိၤ ၆:၄၀.
တၢ်ဂ့ၢ်မိၢ်ပှၢ်
ခီဖျိလၢ ယ့ၣ်ၡူးခရံာ် အတၢ်ဟ့ၣ်လုၢ်ထီၣ်သးအဃိ ပှၤလၢအဘၣ်တၢ်ဒိးဖှူအီၤ ဒီးသိလၢအဂၤတဖၣ် ဒိးန့ၢ်ဘၣ်အဘျုးဒ်လဲၣ်.
၁. ဘၣ်မနုၤအဃိ ပှၤတနီၤဆိကမိၣ်ဝဲလၢ ပအိၣ်မူ လီၤထူလီၤယိာ် တသ့ဘၣ်လဲၣ်.
ပှၤအါဂၤန့ၣ် ဒ်သိး အကအိၣ်ဆူၣ်အိၣ်ချ့အဂီၢ် အဝဲသ့ၣ် ဂုာ်ကျဲးစၢးအီၣ်တၢ်လၢ အန့ၢ်ဂံၢ်န့ၢ်ဘါ ဒီးမၤနီၢ်ခိတၢ်ဟူးတၢ်ဂဲၤထီဘိ. ဘၣ်ဆၣ် အဝဲသ့ၣ် တဆိကမိၣ်ဝဲလၢ အကအိၣ်မူဘၣ် လီၤထူလီၤယိာ်ဘၣ်. ပှၤတနီၤန့ၣ် ဆိကမိၣ်ဝဲလၢ တၢ်အိၣ်မူ လီၤထူလီၤယိာ်န့ၣ် အကဲတၢ်မံမီၢ်. ဒီးအဂၤတနီၤန့ၣ် ခီဖျိလၢ အဝဲသ့ၣ် သးပှၢ်ထီၣ် ဒီးထံၣ်ဘၣ် တၢ်ကီတၢ်ခဲအါမံၤအဃိ အတအဲၣ်ဒိးအိၣ်မူ လီၤထူလီၤယိာ် စ့ၢ်ကီးဘၣ်. ဘၣ်ဆၣ် ဖဲ ယိၤဟၣ် ၃:၁၆ ဒီး ၅:၂၄ န့ၣ် ယ့ၣ်ၡူး တဲဝဲလၢ ပှၤဟီၣ်ခိၣ်ဖိ ကဒိးန့ၢ်ဘၣ် “တၢ်မူအထူအယိာ်.”
၂. ဘၣ်ဃးဒီး တၢ်မူလီၤထူလီၤယိာ်န့ၣ် ယိၤဟၣ် အဆၢဒိၣ် ၆ ပာ်ဖျါထီၣ်ဝဲဒ်လဲၣ်. (ယိၤဟၣ် ၆:၃၉, ၄၀)
၂ ဘၣ်တနံၤ ယ့ၣ်ၡူး မၤတၢ်လီၤလး ခီဖျိ အဒုးအီၣ် ပှၤဂီၢ်မုၢ်လၢအကထိတဖၣ် လၢကိၣ်ဒီးညၣ်. a တၢ်လၢအမၤဝဲန့ၣ် လီၤကမၢကမၣ်ဒိၣ်မး ဘၣ်ဆၣ် တၢ်လၢအတဲဝဲ လၢခံတနံၤန့ၣ် အလီၤကမၢကမၣ် ဒိၣ်န့ၢ်ဒံးအလီၢ်. ပှၤဂီၢ်မုၢ် လဲၤပိာ်အခံလၢ ဝ့ၢ်ကပ့းရနီၣ် လၢအဘူးဒီး ပီၣ်လဲၣ် ကၤလံၤလါအကၢၢ်နံၤ ဒီးဖဲန့ၣ်အတဲဘၣ် အဝဲသ့ၣ်လၢ ပှၤမ့ၢ်သံသနာ်က့ အမၤဂဲၤဆၢထၢၣ် သမူထီၣ်က့ၤဝဲသ့ ဒီးအကဟ့ၣ် အဝဲသ့ၣ် တၢ်မူအထူအယိာ်. (ဖး ယိၤဟၣ် ၆:၃၉, ၄၀.) ဘၣ်ဃးဒီးတၢ်ဂ့ၢ်အံၤ ဆိကမိၣ်ကွၢ် နတံၤသကိး ဒီးပှၤလၢနအဲၣ်လၢ အသံသဒၣ်နၤအဂ့ၢ်. ယ့ၣ်ၡူးအတၢ်ကတိၤန့ၣ် ဟ့ၣ်ပှၤတၢ်မုၢ်လၢ်လၢ ပှၤလၢအသံသဒၣ်ပှၤ တဖၣ်န့ၣ် ကဂဲၤဆၢထၢၣ် သမူထီၣ်က့ၤ ဒီးကအိၣ်မူဘၣ် လီၤထူလီၤယိာ် ဃုာ်ဒီးပှၤ. ဘၣ်ဆၣ် တၢ်လၢ ယ့ၣ်ၡူးဆဲးတဲဝဲဖဲ ယိၤဟၣ် အဆၢဒိၣ် ၆ န့ၣ် လၢညါမ့ၢ်ဂ့ၤ ခဲအံၤမ့ၢ်ဂ့ၤ ပှၤအါဂၤ တနၢ်ပၢၢ်ဝဲ အခီပညီဘၣ်. ယ့ၣ်ၡူးတဲဝဲ တၢ်ဂ့ၢ်မနုၤလဲၣ်.
၃. ဖဲ ယိၤဟၣ် ၆:၅၁ န့ၣ် ယ့ၣ်ၡူးတဲဖျါထီၣ် တၢ်ဂ့ၢ်မနုၤလဲၣ်.
၃ ဖဲပှၤဂီၢ်မုၢ်လၢ ဝ့ၢ်ကပ့းရနီၣ် ထံၣ်ဘၣ်ဝဲ ယ့ၣ်ၡူး မၤတၢ်လီၤလး ခီဖျိလၢ အဒုးအီၣ် အဝဲသ့ၣ် လၢကိၣ်အခါ အဝဲသ့ၣ်နီၣ်ဘၣ်က့ၤဝဲလၢ ယဟိဝၤယွၤ လုၢ်အီၣ်လုၢ်အီ အမိၢ်ပၢ်ဖံဖု လၢပျၢၤတဖၣ်လၢ ကိၣ်မၤနၤလၢ ပှၢ်မုၢ်ကနၢအပူၤ. ကိၣ်မၤနၤန့ၣ် လံာ်စီဆှံကိးဝဲလၢ “ကိၣ်လၢမူခိၣ်.” (စံး ၁၀၅:၄၀; ယိၤ ၆:၃၁) ယ့ၣ်ၡူးတဲဝဲ တၢ်ဂ့ၢ်လၢပှၤသ့ၣ်ညါပာ်စၢၤ လၢအမ့ၢ် ကိၣ်မၤနၤ ဒ်သိးကသိၣ်လိအဝဲသ့ၣ် တၢ်ဂ့ၢ်လၢအရ့ဒိၣ်တခါ. ကစၢ်ယွၤ မၤတၢ်လီၤလးခီဖျိ အလုၢ်အီၣ်ပှၤဂီၢ်မုၢ်လၢ ကိၣ်မၤနၤ ဘၣ်ဆၣ် လၢခံန့ၣ် အဝဲသ့ၣ် ဘၣ်သံစ့ၢ်ကီး. (ယိၤ ၆:၄၉) ဝံၤဒီး ယ့ၣ်ၡူး ဒိလီၤအသးလၢ အမ့ၢ် “ကိၣ်နီၢ်ကီၢ် လၢမူခိၣ်,” “ကစၢ်ယွၤ အကိၣ်,” ဒီး “တၢ်မူ အကိၣ်.” (ယိၤ ၆:၃၂, ၃၃, ၃၅) ယ့ၣ်ၡူး တဲဖျါထီၣ်ဝဲလၢ အမ့ၢ်ကိၣ်လၢ အဂ့ၤဒိၣ်န့ၢ်ဒံး ကိၣ်မၤနၤ. ယ့ၣ်ၡူးတဲဝဲ “ယမ့ၢ်ကိၣ်မူလၢ အဟဲလီၤလၢ မူခိၣ်လီၤ. ပှၤမ့ၢ်အီၣ်ကိၣ်အံၤန့ၣ် အကအိၣ်မူဘၣ် လီၤထူလီၤယိာ်.” (ဖး ယိၤဟၣ် ၆:၅၁.) ဖဲပှၤယူဒၤဖိတဖၣ် နၢ်ဟူဝဲအခါ အဝဲသ့ၣ်ဖုးဘၣ်အသးဒိၣ်မး. ဒီးဖဲယ့ၣ်ၡူးတဲလၢ အမ့ၢ် “ကိၣ်” လၢအဟဲလီၤလၢ မူခိၣ် ဒီးအဂ့ၤဒိၣ်န့ၢ်ဒံး ကိၣ်မၤနၤလၢ အမိၢ်ပၢ်ဖံဖု လၢပျၢၤတဖၣ် အီၣ်ဘၣ်ဝဲအခါ အဝဲသ့ၣ် ခိၣ်နူာ်ဘံဘူ. ဝံၤဒီး ယ့ၣ်ၡူးတဲ အဝဲသ့ၣ်လၢ “ကိၣ်လၢ ယကဟ့ၣ်လီၤန့ၣ်မ့ၢ်ဝဲ ယညၣ်.” ယ့ၣ်ၡူး အဲၣ်ဒိးတဲဝဲ မနုၤလဲၣ်. ဒ်သိးပဝဲ ဒီးပှၤလၢ ပအဲၣ်တဖၣ် ဒိးန့ၢ်ဘၣ် တၢ်အိၣ်မူ လီၤထူလီၤယိာ် ကသ့အဂီၢ် အရ့ဒိၣ်ဒိၣ်မးလၢ ပကဘၣ်နၢ်ပၢၢ်တၢ်ဂ့ၢ်တခါအံၤ. ယ့ၣ်ၡူးအဲၣ်ဒိးတဲဝဲ မနုၤလဲၣ်န့ၣ် ပကဆဲးကွၢ်သကိး.
ဖဲယ့ၣ်ၡူး တဲဘၣ်ဃးဒီး ကိၣ်မူ ဒီးအညၣ်အခါ အအဲၣ်ဒိးတဲဝဲ မနုၤလဲၣ်
၄. တၢ်ဂ့ၢ်လၢ ယ့ၣ်ၡူးတဲဝဲန့ၣ် ဘၣ်မနုၤအဃိ ပှၤတနီၤ ဖုးဘၣ်အသးဒိၣ်မးလဲၣ်.
၄ ဖဲယ့ၣ်ၡူး တဲလီၤအသးလၢ အကဟ့ၣ်အ “ညၣ်ဒ်သိး ပှၤဟီၣ်ခိၣ်ဖိ ကမူဝဲ အဂီၢ်” အခါ ပှၤတနီၤ ဖုးဘၣ်သးဒိၣ်မး. ဘၣ်သ့ၣ်သ့ၣ် အဝဲသ့ၣ် ကနၢ်ပၢၢ်လၢ ယ့ၣ်ၡူး မၢအဝဲသ့ၣ် အီၣ်အညၣ်နီၢ်ကီၢ်. (ယိၤ ၆:၅၂) ဒီးယ့ၣ်ၡူး ဆဲးတဲဝဲလၢ “သုမ့ၢ်တအီၣ် ပှၤကညီဖိခွါ အညၣ်ဘၣ် ဒီးမ့ၢ်တအီ အသွံၣ်ဘၣ်န့ၣ် တၢ်မူတအိၣ်လၢ သုပူၤဘၣ်.” (ယိၤ ၆:၅၃) အဃိ တၢ်လၢယ့ၣ်ၡူးတဲဝဲအံၤ ဒုးကမၢကမၣ် အဝဲသ့ၣ် ဒိၣ်န့ၢ်အလီၢ်ဒံး.
၅. ဘၣ်မနုၤအဃိ ပနာ်သ့သပှၢ်တၢၢ်လၢ ယ့ၣ်ၡူးတအဲၣ်ဒိးတဲဝဲလၢ ပှၤကဘၣ်အီ အသွံၣ် နီၢ်ကီၢ်ဘၣ်လဲၣ်.
၅ လၢစီၤနိအၤအစိၤန့ၣ် ကစၢ်ယွၤတြီဝဲလၢ ပှၤဟီၣ်ခိၣ်ဖိတဖၣ် တဘၣ်အီၣ်တၢ်သွံၣ်ဘၣ်. (၁ မိၤ ၉:၃, ၄) လၢခံ ယဟိဝၤယွၤမၤလိာ်ဝဲ ပှၤအံၣ်စရ့လးဖိတဖၣ်လၢ တဘၣ်အီၣ် တၢ်သွံၣ်စ့ၢ်ကီးဘၣ်. ပှၤတဂၤဂၤမ့ၢ်အီၣ် တၢ်သွံၣ်န့ၣ် “အကဘၣ် တၢ်မၤသံအီၤ.” (၃ မိၤ ၇:၂၇) ယ့ၣ်ၡူးမၤထွဲဝဲ တၢ်မၤလိာ်တခါအံၤစ့ၢ်ကီး. (မး ၅:၁၇-၁၉) အဃိ တမ့ၢ်လၢယ့ၣ်ၡူး ကမၢပှၤဂီၢ်မုၢ်တဖၣ် အီၣ်အညၣ် ဒီးအီအသွံၣ် နီၢ်ကီၢ်ဘၣ်. ဘၣ်ဆၣ် ယ့ၣ်ၡူး အဲၣ်ဒိး သိၣ်လိအဝဲသ့ၣ်လၢ ဒ်သိးအဝဲသ့ၣ် ကဒိးန့ၢ်ဘၣ် “တၢ်မူအထူအယိာ်” အဂီၢ် အဝဲသ့ၣ်ကဘၣ်မၤဒ်လဲၣ်. အဃိ ယ့ၣ်ၡူး တဲဝဲ တၢ်ကတိၤလၢ အတတဲညီနုၢ်ဝဲဘၣ်.—ယိၤ ၆:၅၄.
၆. ဘၣ်မနုၤအဃိ ပတဲလၢ တၢ်လၢယ့ၣ်ၡူးတဲဝဲ ဖဲ ယိၤဟၣ် ၆:၅၃ န့ၣ် အိၣ်ဒၣ် အသူတၢ်အဒိလဲၣ်.
၆ ယ့ၣ်ၡူး အဲၣ်ဒိးတဲဝဲ မနုၤလဲၣ်. ဖဲယ့ၣ်ၡူး တဲဝဲဒ်န့ၣ်အခါ အိၣ်ဒၣ် အသူတၢ်အဒိ ဒ်အသူတ့ၢ်ဝဲဖဲ အတဲတၢ်ဒီး ပှၤၡၤမရံမုၣ်အခါ. အတဲပှၤၡၤမရံမုၣ်လၢ “ပှၤလၢအအီထံလၢ ယကဟ့ၣ်လီၤအီၤန့ၣ် တအဲၣ်ဒိး အီကဒီးထံ နီတဘျီလၢၤဘၣ်. ဒီးထံလၢ ယဟ့ၣ်အီၤန့ၣ် ကလီၤဂာ်ဒ်သိးဒီး ထံထီၣ်ပၢၢ်လၢ အိၣ်လၢအပူၤလၢ အကဟ့ၣ်အီၤ တၢ်မူအထူအယိာ်.” (ယိၤ ၄:၇, ၁၄) b မ့ၢ်ယ့ၣ်ၡူး အဲၣ်ဒိးတဲဝဲလၢ ပှၤၡၤမရံမုၣ်တဂၤအံၤ မ့ၢ်အီဘၣ်ထံလၢ ထံကမျၢ တဖျၢၣ်ဖျၢၣ်အပူၤမး အကအိၣ်မူဘၣ် လီၤထူလီၤယိာ်ဧါ. အတအဲၣ်ဒိး တဲဝဲဒ်န့ၣ်ဘၣ်. ဒ်န့ၣ်အသိး ဖဲအတဲတၢ်ဒီးပှၤဂီၢ်မုၢ်လၢ ဝ့ၢ်ကပ့းရနီၣ်အခါ မ့ၢ်အအဲၣ်ဒိးတဲဝဲလၢ အဝဲသ့ၣ် မ့ၢ်အီၣ်အညၣ် ဒီးအီအသွံၣ်နီၢ်ကီၢ်မး အကန့ၢ်ဘၣ် တၢ်မူအထူအယိာ်ဧါ. တအဲၣ်ဒိးတဲဝဲ ဒ်န့ၣ်စ့ၢ်ကီးဘၣ်.
တၢ်ဂ့ၢ်ခံခါလၢ အလီၤဆီလိာ်သး
၇. တၢ်လၢ ယ့ၣ်ၡူးတဲဝဲဖဲ ယိၤဟၣ် ၆:၅၃ န့ၣ် ပှၤတနီၤနၢ်ပၢၢ်ဝဲဒ်လဲၣ်.
၇ ပှၤတနီၤ တဲဝဲလၢ ယ့ၣ်ၡူး အတၢ်ကတိၤလၢ အတဲဝဲလၢ ပှၤကဘၣ် အီၣ်အညၣ် ဒီးအီအသွံၣ်န့ၣ် အလီၤဂာ်လိာ်သးဒီး တၢ်လၢအတဲဝဲဖဲ အမၤကစၢ်ဟါတၢ်အီၣ်အခါ. အဃိ ပှၤတနီၤနၢ်ပၢၢ်ဝဲလၢ ဖဲပှၤမၤ ကစၢ်ဟါတၢ်အီၣ်အခါ ပှၤကဘၣ်မၤဝဲ ဒ်ယ့ၣ်ၡူးတဲဝဲဖဲ ယိၤဟၣ် ၆:၅၃ အသိး. (မး ၂၆:၂၆-၂၈) အဝဲသ့ၣ် တဲဝဲလၢ ဖဲပှၤတဂၤဂ့ၤ တဂၤဂ့ၤ လဲၤထီၣ် ကစၢ်ဟါတၢ်အီၣ်အမူးအခါ ပှၤမ့ၢ်ဟ့ၣ်နီၤလီၤ ကိၣ်ဒီးစပံးထံန့ၣ် အဝဲသ့ၣ်ကဘၣ်အီၣ်ဝဲ. အဝဲသ့ၣ် တဲဝဲဒ်န့ၣ်န့ၣ် အဘၣ်ဧါ. ကိးနံၣ်ဒဲး ပှၤအကကွဲၢ်တဖၣ်လၢ ဟီၣ်ခိၣ်ချၢန့ၣ် ပာ်ဖှိၣ်ထီၣ်သး တပူၤဃီလၢ မူးပွဲအံၤအဂီၢ်. အဃိ တၢ်လၢပှၤတဲဝဲအံၤ အဘၣ်ဧါ တဘၣ်ဧါန့ၣ် အရ့ဒိၣ်ဒိၣ်မးလၢ ပကဃုသ့ၣ်ညါအီၤ လီၤတံၢ်လီၤဆဲး. ဘၣ်ဆၣ် တၢ်လၢ ယိၤဟၣ် ၆:၅၃ တဲဝဲ ဒီးတၢ်လၢ ယ့ၣ်ၡူးတဲဝဲဖဲ အမၤကစၢ်ဟါတၢ်အီၣ်အခါန့ၣ် အလီၤဆီလိာ်သးဒ်လဲၣ်. ပကဆဲးကွၢ်သကိး.
၈. တၢ်ဂ့ၢ်ခံခါလၢ ယ့ၣ်ၡူးတဲဝဲန့ၣ် အလီၤဆီလိာ်သးဒ်လဲၣ်. (ကွၢ်စ့ၢ်ကီးတၢ်ဂီၤ.)
၈ တၢ်ဂ့ၢ်ခံခါအံၤ အလီၤဆီလိာ်သးဒ်လဲၣ်န့ၣ် ပကကွၢ်သကိး. တၢ, တၢ်ကတိၤလၢ ယ့ၣ်ၡူးတဲဝဲဖဲ ယိၤဟၣ် ၆:၅၃-၅၆ န့ၣ် အတဲဝဲ အခါဖဲလဲၣ် ဒီးလၢတၢ်လီၢ်ဖဲလဲၣ်. ယ့ၣ်ၡူးတဲဘၣ် ပှၤယူဒၤဖိလၢ တၢ်ကတိၤတဖၣ်အံၤ ဖဲ ခ.န ၃၂, ဖဲအအိၣ်လၢ ကၤလံၤလါအခါ. အဃိ အတဲဝဲ တၢ်ကတိၤတဖၣ်အံၤ တနံၣ်ဝံၤမး အစးထီၣ်မၤဝဲ ကစၢ်ဟါတၢ်အီၣ် လၢဝ့ၢ်ယရူၤၡလ့ၣ်အပူၤ. ခံ, တၢ်ကတိၤတဖၣ်အံၤ အတဲဘၣ် မတဂၤလဲၣ်. ပှၤလၢအဒိကနၣ်တၢ် အါတက့ၢ်န့ၣ် အိၣ်လၢကၤလံၤလါ ဒီးပှၤတဖၣ်အံၤ အဝဲသ့ၣ်လီကီ နီၢ်ခိတၢ်လိၣ်ဘၣ် အါန့ၢ် နီၢ်သးတၢ်လိၣ်ဘၣ်ဒံး. (ယိၤ ၆:၂၆) အဃိ ဖဲယ့ၣ်ၡူး တဲတၢ်လၢအဝဲသ့ၣ် နၢ်ပၢၢ်ဘၣ်ဝဲကီအခါ အဝဲသ့ၣ် တနာ်န့ၢ် ယ့ၣ်ၡူးလၢၤဘၣ် ဒီးအပျဲၢ်အဘီၣ်တနီၤ တပိာ်အခံလၢၤဘၣ်. (ယိၤ ၆:၁၄, ၃၆, ၄၂, ၆၀, ၆၄, ၆၆) ပှၤဂီၢ်မုၢ်လၢ ကၤလံၤလါန့ၣ် အလီၤဆီဒီး တၢ်မၢဖိလၢအသးတီ ၁၁ ဂၤ လၢအမၤကစၢ်ဟါတၢ်အီၣ်ဒီးယ့ၣ်ၡူး ဖဲ ခ.န ၃၃ န့ၣ်ဖးဒိၣ်ညါ. ယ့ၣ်ၡူး အတၢ်ကတိၤန့ၣ် တၢ်မၢဖိလၢအသးတီ ၁၁ ဂၤ တနၢ်ပၢၢ်ဝဲခဲလၢာ်ဘၣ် သနာ်က့ အဝဲသ့ၣ် နာ်ဝဲသပှၢ်တၢၢ်လၢ ယ့ၣ်ၡူးန့ၣ်မ့ၢ်ဝဲ ကစၢ်ယွၤအဖိခွါလၢ အဟဲလီၤလၢမူခိၣ်. (မး ၁၆:၁၆) ယ့ၣ်ၡူး ပတြၢၤအဝဲသ့ၣ် ဒီးတဲဝဲလၢ “ဖဲယထံၣ်ဘၣ် တၢ်မၤကွၢ်တဖၣ်အခါ သုမ့ၢ်ပှၤလၢ အဆဲးအိၣ်ဒီးယၤ.” (လူၤ ၂၂:၂၈) အဃိ တၢ်ဂ့ၢ်လီၤဆီလိာ်သး ခံခါအံၤ ပာ်ဖျါထီၣ်ဝဲလၢ တၢ်ကတိၤဖဲ ယိၤဟၣ် ၆:၅၃ န့ၣ် တအဲၣ်ဒိးတဲဝဲ ဘၣ်ဃးဒီး ပှၤကဘၣ်မၤ ကစၢ်ဟါတၢ်အီၣ် ဒ်လဲၣ်အဂ့ၢ်ဘၣ်. ဒီးတၢ်ဂ့ၢ်လၢ အလီၤဆီလိာ်သးန့ၣ် အိၣ်ဒံး.
ဖဲယိၤဟၣ် အဆၢဒိၣ် ၆ န့ၣ် ယ့ၣ်ၡူးတဲတၢ်ဒီး ပှၤယူဒၤဖိအါဂၤ လၢအအိၣ်လၢ ကၤလံၤလါ (အစ့ၣ်). တနံၣ်ဝံၤအလီၢ်ခံ ယ့ၣ်ၡူး တဲတၢ်ဒီး အတၢ်မၢဖိ လၢအသးတီ ၁၁ ဂၤ လၢဝ့ၢ်ယရူၤၡလ့ၣ်အပူၤ (အထွဲ) (ကွၢ်လံာ်အဆၢ ၈)
ယ့ၣ်ၡူးအတၢ်ကတိၤအံၤ အခီပညီအိၣ်လၢ နဂီၢ်ဒ်လဲၣ်
၉. တၢ်လၢယ့ၣ်ၡူးတဲဝဲဖဲ အမၤကစၢ်ဟါတၢ်အီၣ် အခါန့ၣ် အအဲၣ်ဒိးတဲဝဲလၢ မတဂၤအဂီၢ်လဲၣ်.
၉ ဖဲယ့ၣ်ၡူးမၤဝဲ ကစၢ်ဟါတၢ်အီၣ်အခါ အဟ့ၣ်လီၤ အတၢ်မၢဖိတဖၣ်လၢ ကိၣ်လၢ အတပၣ်ဃုာ်ဒီးကိၣ်မံၣ်ဘၣ် ဒီးအတဲအဝဲသ့ၣ်လၢ ကိၣ်အံၤ ဒိလီၤဝဲ အနီၢ်ခိ. ဝံၤဒီး အဟ့ၣ်လီၤ အဝဲသ့ၣ်လၢ စပံးထံ ဒီးတဲဝဲလၢ စပံးထံအံၤ ဒိလီၤဝဲ အ “သွံၣ်လၢ အဘၣ်ဃးဒီး တၢ်အၢၣ်လီၤအီလီၤ.” (မၢ် ၁၄:၂၂-၂၅; လူၤ ၂၂:၂၀; ၁ ကရံၣ် ၁၁:၂၄) တၢ်ကတိၤလၢ ယ့ၣ်ၡူး တဲဝဲအံၤ အရ့ဒိၣ်ဒိၣ်မး. ယ့ၣ်ၡူး ကိးဝဲ တၢ်အၢၣ်လီၤအီလီၤအံၤလၢ “တၢ်အၢၣ်လီၤအီလီၤအသီ.” ပှၤဟီၣ်ခိၣ်ဖိ တပၣ်ဃုာ်လၢ တၢ်အၢၣ်လီၤအီလီၤအသီ တခါအံၤအကျါ ကိးဂၤဒဲးဘၣ်. ပှၤလၢအပၣ်ဃုာ်လၢ တၢ်အၢၣ်လီၤအီလီၤအသီအံၤန့ၣ် မ့ၢ်ဝဲ ယဟိဝၤယွၤ ဒီး “[နီၢ်သး] အံၣ်စရ့လးအပှၤဂီၢ်မုၢ်” လၢအကပၢဘၣ်တၢ်ဒီး ယ့ၣ်ၡူးလၢ “ယွၤအဘီမုၢ်အပူၤ.” (ဧ့ၤ ၈:၆, ၁၀; ၉:၁၅) ဖဲယ့ၣ်ၡူး တဲတၢ်ဂ့ၢ် ဘၣ်ဃးဒီး တၢ်အၢၣ်လီၤအီလီၤအသီအခါ တၢ်မၢဖိတဖၣ် တနၢ်ပၢၢ်ဝဲခဲလၢာ်ဘၣ်. ဘၣ်ဆၣ် တယံာ်လၢၤဘၣ်န့ၣ် တၢ်မၢဖိတဖၣ် ကဘၣ်တၢ်ဒိးဖှူအီၤဒီးသးစီဆှံ ဒီးအဝဲသ့ၣ် ကပၢဃုာ်ဘၣ်တၢ်ဒီးယ့ၣ်ၡူး လၢမူခိၣ်.—ယိၤ ၁၄:၂, ၃.
၁၀. တၢ်လၢယ့ၣ်ၡူးတဲဝဲဖဲ အမၤကစၢ်ဟါတၢ်အီၣ်အခါ ဒီးတၢ်လၢအတဲဘၣ် ပှၤဂီၢ်မုၢ်လၢ ကၤလံၤလါအခါန့ၣ် အလီၤဆီလိာ်သးဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၀ တၢ်လၢယ့ၣ်ၡူးတဲဝဲဖဲ အမၤကစၢ်ဟါတၢ်အီၣ် အခါန့ၣ် အဘၣ်ထွဲလိာ်သးဒီး “သိလၢအစှၤတဖု.” ပှၤနီၣ်ဂံၢ်လၢ အစှၤတဖုအံၤ စးထီၣ်အသးလၢ ယ့ၣ်ၡူးအတၢ်မၢဖိ လၢအသးတီ လၢအအိၣ်ဒီးအီၤ ဖဲအမၤ ကစၢ်ဟါတၢ်အီၣ်အခါ. (လူၤ ၁၂:၃၂) အဝဲသ့ၣ် ဒီးပှၤအဂၤလၢ ကပၣ်ဃုာ်လၢ ပှၤနီၣ်ဂံၢ်လၢ အစှၤတဖုအံၤ အကျါန့ၣ် ဖဲအဝဲသ့ၣ် မၤဝဲကစၢ်ဟါတၢ်အီၣ် အမူးအခါ အဝဲသ့ၣ်ကဘၣ် အီၣ်ကိၣ် ဒီးအီစပံးထံ. ပှၤတဖၣ်အံၤ အကဲပှၤလၢ ကပၢဘၣ်တၢ်ဒီး ယ့ၣ်ၡူးလၢမူခိၣ်. အဃိ တၢ်လၢယ့ၣ်ၡူးတဲဝဲ အတၢ်မၢဖိတဖၣ် ဖဲအမၤကစၢ်ဟါတၢ်အီၣ် အခါန့ၣ် လီၤဆီလိာ်သးဒီး တၢ်လၢအတဲဝဲ လၢအပူၤကွံာ်တနံၣ် ဖဲအအိၣ်လၢ ကၤလံၤလါအခါ. တၢ်လၢယ့ၣ်ၡူးတဲဝဲဖဲ အမၤကစၢ်ဟါတၢ်အီၣ် အခါန့ၣ် အဘၣ်ထွဲလိာ်သးဒီး ပှၤနီၣ်ဂံၢ်လၢ အစှၤတဖု. မ့မ့ၢ် တၢ်လၢအတဲဝဲ ဖဲအအိၣ်လၢ ကၤလံၤလါ အခါန့ၣ် အဘၣ်ထွဲလိာ်သးဒီး ပှၤအါဂၤ.
ပှၤလၢအအီၣ်ကိၣ် ဒီးအီစပံးထံန့ၣ် အကဲဝဲထဲ ပှၤနီၣ်ဂံၢ်လၢ အစှၤတဖု သနာ်က့ ပှၤဟီၣ်ခိၣ်ဖိခဲလၢာ် လၢအစူၢ်က့ၤနာ်က့ၤ ယ့ၣ်ၡူးန့ၣ် အဒိးန့ၢ်ဘၣ် တၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ်သ့ (ကွၢ်လံာ်အဆၢ ၁၀)
၁၁. ဖဲယ့ၣ်ၡူးအိၣ်လၢ ကၤလံၤလါအခါ တၢ်ဆိၣ်ဂ့ၤလၢအတဲဝဲန့ၣ် ဘၣ်မနုၤအဃိ ပတဲလၢ အတဘၣ်ထွဲဒီး ပှၤနီၣ်ဂံၢ်လၢ အစှၤတဖုဘၣ်လဲၣ်.
၁၁ ဖဲယ့ၣ်ၡူးအိၣ်လၢ ကၤလံၤလါ ဖဲ ခ.န ၃၂ အခါ အတဲတၢ်ဒီး ပှၤယူဒၤဖိ လၢအဘၣ်သးလၢ ယ့ၣ်ၡူးကဒုးအီၣ် အဝဲသ့ၣ်တၢ်အီၣ်. ဘၣ်ဆၣ် ယ့ၣ်ၡူးဂုာ်ကျဲးစၢး တဲနၢ်ပၢၢ်အဝဲသ့ၣ်လၢ တၢ်လၢ အရ့ဒိၣ်န့ၢ်ဒံးတၢ်အီၣ်န့ၣ် အိၣ်ဝဲတခါ. တၢ်လၢ အရ့ဒိၣ်တခါန့ၣ် ကဟ့ၣ်အဝဲသ့ၣ် တၢ်မူအထူအယိာ်. တကးဒံးဘၣ် ယ့ၣ်ၡူးတဲဝဲလၢ ကစၢ်ယွၤ ကမၤဂဲၤဆၢထၢၣ် သမူထီၣ်က့ၤ ပှၤသံတဖၣ် လၢမုၢ်နံၤအကတၢၢ် ဒီးအဝဲသ့ၣ် ကအိၣ်မူဘၣ် လီၤထူလီၤယိာ်. ဖဲယ့ၣ်ၡူး တဲဝဲဒ်န့ၣ်အခါ အတအဲၣ်ဒိးတဲဝဲ ဘၣ်ဃးဒီး တၢ်ဆိၣ်ဂ့ၤလၢ ပှၤနီၣ်ဂံၢ်လၢ အစှၤတဖု ကဒိးန့ၢ်ဘၣ်ဝဲဘၣ်. တၢ်လၢယ့ၣ်ၡူးတဲဝဲဖဲ ကၤလံၤလါန့ၣ် အဲၣ်ဒိးတဲဝဲ တၢ်ဆိၣ်ဂ့ၤလၢ ပှၤအါဂၤ ကဒိးန့ၢ်ဘၣ်ဝဲ. အဃိ ယ့ၣ်ၡူးတဲဝဲလၢ “ကိၣ်လၢ ယကဟ့ၣ်လီၤန့ၣ်မ့ၢ်ဝဲ ယညၣ်ဒ်သိး ပှၤဟီၣ်ခိၣ်ဖိ ကမူဝဲ အဂီၢ်.”—ယိၤ ၆:၅၁.
၁၂. ဒ်သိး ပကဒိးန့ၢ်ဘၣ် တၢ်မူအထူအယိာ်အဂီၢ် ပကဘၣ်မၤ မနုၤလဲၣ်.
၁၂ တၢ်လၢယ့ၣ်ၡူးတဲဝဲ ဖဲအအိၣ်လၢ ကၤလံၤလါ အခါန့ၣ် အဲၣ်ဒိးတဲဝဲလၢ ပှၤကိးဂၤဒဲး ကန့ၢ်ဘၣ် တၢ်မူအထူအယိာ်ဧါ. တမ့ၢ်ဒ်န့ၣ်ဘၣ်. ပှၤလၢကန့ၢ်ဘၣ် တၢ်မူအထူအယိာ်န့ၣ် မ့ၢ်ဒၣ်ထဲ ‘ပှၤလၢအအီၣ်ကိၣ်.’ ပမ့ၢ်တဲလၢ အဂၤတမံၤန့ၣ် ပှၤတဂၤ မ့ၢ်စူၢ်က့ၤနာ်က့ၤ ယ့ၣ်ၡူးမး အကဒိးန့ၢ်ဘၣ်ဝဲ တၢ်ဆိၣ်ဂ့ၤအံၤ. ဆၢကတီၢ်ခဲအံၤ ပှၤအါဂၤတဲဝဲလၢ အနာ်ယ့ၣ်ၡူး ဒီးယ့ၣ်ၡူးမ့ၢ် အတၢ်အုၣ်က့ၤခီၣ်က့ၤကစၢ်. (ယိၤ ၆:၂၉) ဘၣ်ဆၣ် ထဲအဝဲသ့ၣ် နာ်ယ့ၣ်ၡူးန့ၣ် တလၢပှဲၤဒံးဘၣ်. ပမ့ၢ်ဘၣ်ကွၢ် ပှၤဂီၢ်မုၢ်တနီၤလၢ ကၤလံၤလါန့ၣ် ခီၣ်ထံးခါ အဝဲသ့ၣ် နာ်ယ့ၣ်ၡူး ဘၣ်ဆၣ်လၢခံန့ၣ် အဝဲသ့ၣ် တနာ်အီၤ ဒီးတပိာ်အခံလၢၤဘၣ်. ဘၣ်မနုၤအဃိလဲၣ်.
၁၃. ပကကဲထီၣ် ယ့ၣ်ၡူးအပျဲၢ်အဘီၣ် နီၢ်ကီၢ်တဂၤအဂီၢ် ပကဘၣ်မၤ မနုၤလဲၣ်.
၁၃ ပှၤဂီၢ်မုၢ်လၢ အပိာ်ယ့ၣ်ၡူးအခံ အါတက့ၢ်န့ၣ် အဝဲသ့ၣ် ဘၣ်သးလၢ ယ့ၣ်ၡူး ကဟ့ၣ်အဝဲသ့ၣ် တၢ်လၢအလီကီဝဲ. ပှၤဂီၢ်မုၢ်တဖၣ် အဲၣ်ဒိးလၢ ယ့ၣ်ၡူးကမၤဘျါက့ၤ အတၢ်ဆါ, ကလုၢ်အီၣ်လုၢ်အီအီၤ ဒီးတဲထဲတၢ်လၢ အဝဲသ့ၣ်အဲၣ်ဒိးနၢ်ဟူဝဲ. ဘၣ်ဆၣ် ယ့ၣ်ၡူး အတၢ်တိာ်ပာ်လၢ အဟဲလီၤလၢ ဟီၣ်ခိၣ်ချၢန့ၣ် တမ့ၢ်ထဲလၢ အကမၤလၢပှဲၤန့ၢ် တၢ်လၢအဝဲသ့ၣ်လီကီဝဲဘၣ်. ယ့ၣ်ၡူးဟဲလီၤလၢ ဟီၣ်ခိၣ်ချၢ ဒ်သိးကသိၣ်လိ ပှၤဂီၢ်မုၢ်လၢ အဝဲသ့ၣ် ကကဲထီၣ် အပျဲၢ်အဘီၣ် နီၢ်ကီၢ်တဂၤအဂီၢ် အကဘၣ်မၤ မနုၤလဲၣ်. ပှၤဂီၢ်မုၢ် ကဘၣ် “ဟဲလၢ” အအိၣ် လၢအအဲၣ်ဒိးတဲဝဲ အဝဲသ့ၣ် ကဘၣ်ဒိကနၣ် ဒီးမၤထွဲတၢ်လၢ ယ့ၣ်ၡူး သိၣ်လိဝဲခဲလၢာ်.—ယိၤ ၅:၄၀; ၆:၄၄.
၁၄. ပကဒိးန့ၢ်ဘၣ် တၢ်ဆိၣ်ဂ့ၤခီဖျိ ယ့ၣ်ၡူးတၢ်ပှ့ၤက့ၤအဂီၢ် ပကဘၣ်မၤ မနုၤလဲၣ်.
၁၄ ယ့ၣ်ၡူး သိၣ်လိ ပှၤဂီၢ်မုၢ်လၢ ခီဖျိလၢ အဟ့ၣ်လုၢ်ထီၣ် အညၣ် ဒီး အသွံၣ် အဃိ ပှၤအါဂၤ ကဒိးန့ၢ်ဘၣ် တၢ်ဆိၣ်ဂ့ၤလၢ ကအိၣ်မူဘၣ် လီၤထူလီၤယိာ်. ဘၣ်ဆၣ် ဒ်သိးအဝဲသ့ၣ် ကဒိးန့ၢ်ဘၣ် တၢ်ဆိၣ်ဂ့ၤအံၤအဂီၢ် အဝဲသ့ၣ်ကဘၣ် စူၢ်က့ၤနာ်က့ၤအီၤ. ဒ်ပှၤယူဒၤဖိလၢညါတဖၣ်အသိး ပဝဲစ့ၢ်ကီး အရ့ဒိၣ်လၢ ပကဘၣ် စူၢ်က့ၤနာ်က့ၤယ့ၣ်ၡူး. (ယိၤ ၆:၄၀) အဃိ တၢ်လၢယ့ၣ်ၡူးတဲဝဲ ဖဲ ယိၤဟၣ် ၆:၅၃ န့ၣ် အဲၣ်ဒိးတဲဝဲလၢ ဒ်သိးပကဒိးန့ၢ်ဘၣ် တၢ်ဆိၣ်ဂ့ၤလၢ ကအိၣ်မူဘၣ် လီၤထူလီၤယိာ်အဂီၢ် ပကဘၣ်နာ် ယ့ၣ်ၡူးအတၢ်ပှ့ၤက့ၤ. ဒီးတၢ်ဆိၣ်ဂ့ၤအံၤ ပှၤအါဂၤ ကဒိးန့ၢ်ဘၣ်ဝဲ.—အ့း ၁:၇.
၁၅-၁၆. ဖဲ ယိၤဟၣ် အဆၢဒိၣ် ၆ န့ၣ် ပမၤလိန့ၢ်ဘၣ် တၢ်ဂ့ၢ်အရ့ဒိၣ် မနုၤလဲၣ်.
၁၅ ဖဲ ယိၤဟၣ် အဆၢဒိၣ် ၆ န့ၣ် ပမၤလိန့ၢ်ဘၣ် တၢ်လၢ အရ့ဒိၣ်အါမံၤ ဒီးအကဲဘျုးလၢပဂီၢ် ဒီးပှၤလၢ ပအဲၣ်အီၤအဂီၢ်ဒိၣ်မး. ပသ့ၣ်ညါထီၣ်ဘၣ်စ့ၢ်ကီးလၢ ယ့ၣ်ၡူး သးအိၣ်ပှၤဒိၣ်မး. ဖဲယ့ၣ်ၡူးအိၣ်လၢ ကၤလံၤလါအခါ အမၤဘျါက့ၤ ပှၤဆူးပှၤဆါ, အသိၣ်လိအဝဲသ့ၣ် ဘၣ်ဃးယွၤအဘီအမုၢ်အဂ့ၢ် ဒီးမၤလၢပှဲၤန့ၢ် အဝဲသ့ၣ် နီၢ်ခိတၢ်လိၣ်ဘၣ် ခီဖျိ အလုၢ်အီၣ်လုၢ်အီအဝဲသ့ၣ်. (လူၤ ၉:၁၁; ယိၤ ၆:၂, ၁၁, ၁၂) တၢ်အရ့ဒိၣ်ကတၢၢ်လၢ အသိၣ်လိဝဲန့ၣ် မ့ၢ်ဝဲ အဝဲမ့ၢ် “တၢ်မူ အကိၣ်.”—ယိၤ ၆:၃၅, ၄၈.
၁၆ ဖဲပှၤမၤ ကစၢ်ဟါတၢ်အီၣ်အမူး ကိးနံၣ်ဒဲးအခါ ပှၤလၢအပၣ်ဃုာ်လၢ “သိလၢအဂၤတဖၣ်” အကျါန့ၣ် အဝဲသ့ၣ် တဘၣ်အီၣ်ကိၣ် ဒီးအီစပံးထံဘၣ်. (ယိၤ ၁၀:၁၆) သနာ်က့ အဝဲသ့ၣ် အီၣ်ဝဲ “တၢ်မူ အကိၣ်” လၢအဒိလီၤဝဲ ယ့ၣ်ၡူး အညၣ် ဒီးအသွံၣ်ဒံး. အဝဲသ့ၣ် အီၣ်ဝဲခီဖျိ အစူၢ်က့ၤနာ်က့ၤ ယ့ၣ်ၡူးအတၢ်ပှ့ၤက့ၤ ဒီးနာ်ဝဲလၢ ကဒိးန့ၢ်ဘၣ် တၢ်ဆိၣ်ဂ့ၤ လၢအမ့ၢ် တၢ်မူအထူအယိာ်. (ယိၤ ၆:၅၃) မ့မ့ၢ် ပှၤလၢ အပၣ်ဃုာ်လၢ တၢ်အၢၣ်လီၤအီလီၤအသီ ဒီးအိၣ်ဒီးတၢ်မုၢ်လၢ်လၢ ကပၢဘၣ်တၢ်လၢ ယွၤအဘီအမုၢ်အပူၤန့ၣ် အဝဲသ့ၣ်ကဘၣ် အီၣ်ကိၣ် ဒီးအီစပံးထံ. ပမ့ၢ်ပၣ်ဃုာ်လၢ ပှၤလၢအဘၣ် တၢ်ဒိးဖှူအီၤအကျါမ့ၢ်ဂ့ၤ ပမ့ၢ်ပၣ်ဃုာ်လၢ သိလၢအဂၤတဖၣ် အကျါမ့ၢ်ဂ့ၤ အရ့ဒိၣ်ဒိၣ်မးလၢ ပကဘၣ်နၢ်ပၢၢ် တၢ်ဂ့ၢ်ဖဲ ယိၤဟၣ် အဆၢဒိၣ် ၆ အပူၤ လီၤတံၢ်လီၤဆဲး. တၢ်ဂ့ၢ်အံၤ သိၣ်လိပှၤလၢ ဒ်သိး ပကဒိးန့ၢ်ဘၣ် တၢ်မူအထူအယိာ်အဂီၢ် ပဝဲကိးဂၤဒဲးန့ၣ် ပကဘၣ် စူၢ်က့ၤနာ်က့ၤ ယ့ၣ်ၡူးအတၢ်ပှ့ၤက့ၤ.
တၢ်သးဝံၣ် ၁၅၀ ဃုယွၤဒ်သိး နကန့ၢ်တၢ်အုၣ်က့ၤခီၣ်က့ၤ
a ယိၤဟၣ် ၆:၅-၃၅ န့ၣ် ပတဲသကိးလၢ တၢ်မၤလိလၢ အပူၤကွံာ်တခါဝံၤလံ.
b ထံလၢ ယ့ၣ်ၡူးတဲဝဲန့ၣ် ဒိလီၤဝဲ တၢ်ခဲလၢာ်လၢ ယဟိဝၤယွၤ မၤတ့ၢ်ဝဲ ဒီးအမၤဒံးဝဲ ဒ်သိး ပှၤဟီၣ်ခိၣ်ဖိ ကဒိးန့ၢ်ဘၣ် တၢ်မူအထူအယိာ်အဂီၢ်.
