တၢ်မၢဖိပီလူး ကွဲးန့ၢ် စီၤတံၤမသ့း လၢအကဲစ့ၢ်ကီး တၢ်အိၣ်ဖှိၣ်သးပှၢ်တဂၤ ဒ်အံၤ. “လၢကစၢ်ယွၤ, ယ့ၣ်ၡူးခရံာ် ဒီးမူခိၣ်ကလူးလၢ အဘၣ်တၢ်ဃုထၢအီၤတဖၣ် အမဲာ်ညါန့ၣ် ယမၤလိာ်နၤသပှၢ်တၢၢ်လၢ နကမၤထွဲ တၢ်ဟံးစုနဲၣ်ကျဲတဖၣ်အံၤ ဒီးတဘၣ် စံၣ်ညီၣ်ဆိပာ်စၢၤတၢ် ဒီးကွၢ်ဒိၣ်ဆံးအါစှၤတၢ်တဂ့ၤ.”—၁ တံၤ ၅:၂၁.

အဆိကတၢၢ် ဒ်သိး ပကသ့ၣ်ညါဘၣ် မူခိၣ်ကလူးလၢ အဘၣ်တၢ်ဃုထၢအီၤ တဖုအံၤအဂီၢ် ပကတဲသကိး ဘၣ်ဃးဒီး မူခိၣ်ကလူးလၢ အတပၣ်ဃုာ်လၢ မူခိၣ်ကလူးတဖုအံၤဘၣ်အကျါ. မူခိၣ်ကလူးလၢ အဘၣ်တၢ်ဃုထၢအီၤ တဖုအံၤ တမ့ၢ်ဝဲ ပှၤ ၁၄၄,၀၀၀ ဘၣ်. ဖဲစီၤပီလူး ကွဲးလံာ်လၢ စီၤတံၤမသ့း အအိၣ်အခါ ပှၤဘၣ်တၢ်ဒိးဖှူအီၤတဖၣ် တဂဲၤဆၢထၢၣ် သမူထီၣ်က့ၤ လၢမူခိၣ် နီတဂၤဒံးဘၣ်. တၢ်မၢဖိတဖၣ် ဒီးပှၤဘၣ်တၢ်ဒိးဖှူအီၤ လၢအဂၤန့ၣ် တကဲထီၣ် ပှၤနီၢ်သးဖိဒံးဘၣ်အဃိ အဝဲသ့ၣ် တကဲ “မူခိၣ်ကလူးလၢ အဘၣ်တၢ်ဃုထၢအီၤတဖၣ်” ဘၣ်.—၁ ကရံၣ် ၁၅:၅၀-၅၄; ၁ သ့း ၄:၁၃-၁၇; ၁ ယိၤ ၃:၂.

တကးဒံးဘၣ် ဖဲထံလုၢ်ဘၢတၢ်အစိၤန့ၣ် မူခိၣ်ကလူးတနီၤ တအိၣ်ဒီးတၢ်ဒိကနၣ်ဘၣ်. အဝဲသ့ၣ် ပိာ်ဝဲမုၣ်ကီၤလံၢ်အခံ, ကဲထီၣ်တၢ်ဝံတၢ်နါ ဒီးကဲထီၣ် ယ့ၣ်ၡူးအဒုၣ်အဒါ. အဃိ အဝဲသ့ၣ် တပၣ်ဃုာ်လၢ “မူခိၣ်ကလူးလၢ အဘၣ်တၢ်ဃုထၢအီၤတဖၣ်” အကျါဘၣ်. (၁ မိၤ ၆:၂; လူၤ ၈:၃၀, ၃၁; ၂ ပ့း ၂:၄) ဒီးခါဆူညါန့ၣ် ယ့ၣ်ၡူး ကကွံာ်လီၤအဝဲသ့ၣ်လၢ တၢ်ပူၤယိာ် ဒီးစၢဃာ်အဝဲသ့ၣ် အနံၣ် ၁,၀၀၀. ဖဲန့ၣ်ဝံၤအလီၢ်ခံ တၢ်ဝံတၢ်နါတဖၣ်အံၤ ကဟးဂီၤကွံာ် တပူၤဃီဒီး မုၣ်ကီၤလံၢ်.—ယူ ၆; လီၣ် ၂၀:၁-၃, ၁၀.

အဃိ “မူခိၣ်ကလူးလၢ အဘၣ်တၢ်ဃုထၢအီၤတဖၣ်” လၢစီၤပီလူး ကွဲးဖျါထီၣ်ဝဲန့ၣ် ကဘၣ်မ့ၢ် မူခိၣ်ကလူးလၢ အသးတီဒီး “ကစၢ်ယွၤ ဒီးယ့ၣ်ၡူးခရံာ်.”

မူခိၣ်ကလူးလၢ အသးတီန့ၣ် အိၣ်ဝဲလၢ အကလးတဖၣ်ညါ. (ဧ့ၤ ၁၂:၂၂, ၂၃) ဒီးဖျါလီၤဂာ်လၢ ယဟိဝၤယွၤ ဟ့ၣ်အဝဲသ့ၣ် မူဒါတဂၤတမံၤ တဂၤတမၠိ. (လီၣ် ၁၄:၁၇, ၁၈) အဒိ ယဟိဝၤယွၤ မၢဝဲမူခိၣ်ကလူး ထဲတဂၤ မၤသံကွံာ်ဝဲ အၤၡူၢ်အသုးဖိ အဂၤ ၁၈၅,၀၀၀. (၂ စီၤပၤ ၁၉:၃၅) ဒီးမူခိၣ်ကလူးလၢ အဒိးန့ၢ်ဘၣ်မူဒါလၢ “ကထုးထီၣ်ကွံာ် ကယဲၢ်တၢ်အိၣ်လၢ [ယ့ၣ်ၡူး] အဘီမုၢ်အပူၤ လၢအကဲထီၣ် တၢ်လီၤဃံၢ်အလီၢ် ဒီးပှၤလၢအမၤ တၢ်အၢတၢ်သီတဖၣ်” န့ၣ် ကအိၣ်ဝဲ တဘျုးဂၤညါ. (မး ၁၃:၃၉-၄၁) မ့မ့ၢ် မူခိၣ်ကလူး အဂၤတဖၣ်န့ၣ် ဘၣ်သ့ၣ်သ့ၣ် အဒိးန့ၢ်ဘၣ်မူဒါလၢ က “ပာ်ဖှိၣ်ဝဲ ပှၤလၢအဘၣ် တၢ်ဃုထၢအီၤတဖၣ်” ဆူမူခိၣ်. (မး ၂၄:၃၁) ဒီးမူခိၣ်ကလူး အဂၤတဖၣ်န့ၣ် ဒိးန့ၢ်ဘၣ်မူဒါလၢ က ‘ဒီသဒၢပှၤ ဖဲပလဲၤတပူၤဂ့ၤ တပူၤဂ့ၤ.’—စံး ၉၁:၁၁; မး ၁၈:၁၀; ထိၣ်သတြီၤဒီး မးသဲ ၄:၁၁; လူၤကၣ် ၂၂:၄၃.

အဃိ “မူခိၣ်ကလူးလၢ အဘၣ်တၢ်ဃုထၢအီၤတဖၣ်” ဖဲ ၁ တံၤမသ့း ၅:၂၁ ပာ်ဖျါထီၣ်ဝဲန့ၣ် ဖျါလၢ အဲၣ်ဒိးတဲဝဲ မူခိၣ်ကလူးလၢ အဒိးန့ၢ်ဘၣ်မူဒါ လီၤလီၤဆီဆီလၢ ကကွၢ်ထွဲမၤစၢၤ တၢ်အိၣ်ဖှိၣ်. ဒီးပမ့ၢ်ကွၢ် တၢ်ဂ့ၢ်အလီၢ်ခံမဲာ်ညါန့ၣ် ပထံၣ်ဘၣ်လၢ စီၤပီလူး ဟ့ၣ်ကူၣ်ဝဲ တၢ်အိၣ်ဖှိၣ်သးပှၢ်တဖၣ်လၢ ကဘၣ်မၤ အမူဒါဒ်လဲၣ် ဒီးတၢ်အိၣ်ဖှိၣ်ဖိ ကဘၣ်ပာ်ကဲအဝဲသ့ၣ်. စီၤပီလူး တဲဝဲလၢ တၢ်အိၣ်ဖှိၣ်သးပှၢ်တဖၣ်န့ၣ် “တဘၣ် စံၣ်ညီၣ်ဆိပာ်စၢၤတၢ် ဒီးကွၢ်ဒိၣ်ဆံးအါစှၤတၢ်” ဘၣ်. အဝဲသ့ၣ် ကဘၣ်ဆိကမိၣ်ထံတၢ် လီၤတံၢ်လီၤဆဲး ဝံၤမး ကဘၣ်ဆၢတဲာ်တၢ်. ဒီးခီဖျိလၢ တၢ်အိၣ်ဖှိၣ်သးပှၢ်တဖၣ် မၤအမူဒါလၢ “ကစၢ်ယွၤ, ယ့ၣ်ၡူးခရံာ် ဒီးမူခိၣ်ကလူးလၢ အဘၣ်တၢ်ဃုထၢအီၤတဖၣ် အမဲာ်ညါ” အဃိ အရ့ဒိၣ် ဒိၣ်မးလၢ အဝဲသ့ၣ် ကမၤထွဲ စီၤပီလူး အတၢ်ဟ့ၣ်ကူၣ်အံၤ. အဃိ ပထံၣ်ဘၣ်လၢ မူခိၣ်ကလူးတနီၤန့ၣ် ဒိးန့ၢ်ဘၣ်မူဒါလၢ ကကွၢ်ထွဲမၤစၢၤ တၢ်အိၣ်ဖှိၣ် ဒ်သိးဒီး အဒီသဒၢဝဲ ကစၢ်ယွၤ အခ့အပှၤ, မၤစၢၤ အဝဲသ့ၣ်လၢ တၢ်စံၣ်တဲၤတဲလီၤတၢ်မၤ ဒီးက့ၤတဲဘၣ် ယဟိဝၤယွၤ တၢ်လၢအဝဲသ့ၣ် ထံၣ်ဘၣ်ဝဲ လၢတၢ်အိၣ်ဖှိၣ်အပူၤ.—မး ၁၈:၁၀; လီၣ် ၁၄:၆.