ဒီပုၢ်ဝဲၢ်ခွါဖီ တဲဝဲ– ဖဲလါနိၣ်ဝ့ဘၢၣ် ၁၉၈၅ န့ၣ် ပန့ၢ်ဘၣ်မူဒါလၢ ပကလဲၤမၤ မံၤၡၢၤနရံၤ အဆိကတၢၢ် တဘျီလၢ ကီၢ်လဲးဘံရံယါ လၢအအိၣ်လၢ အၤဖြံၤကၤမုၢ်နုာ်တခီ အဃိ ပသးခုဒိၣ်မး. ပဒိးထီၣ်ကဘီယူၤ ဒီးလဲၤအိၣ်ပတုာ်ဖဲ ကီၢ်စဲနံကိ တတီၤဖိ. ဒီးယမါတဲယၤလၢ “တနၣ်ရံၣ်ဒီးန့ၣ် ပလဲၤကတုၤလၢ ကီၢ်လဲးဘံရံယါ.” ဖဲန့ၣ်အခါ ပှၤတဲလီၤလၢ “ပှၤကလဲၤလၢ ကီၢ်လဲးဘံရံယါန့ၣ် ကဘၣ်စံၣ်လီၤလၢ ကဘီယူၤပူၤကိးဂၤဒဲး. ပှၤတနီၤလၢ အအိၣ်လၢ ကီၢ်လဲးဘံရံယါန့ၣ် ထီဒါက့ၤပဒိၣ်အဃိ ကဘီယူၤ လဲၤစီၢ်လီၤလၢ လီၢ်ကဝီၤဖဲန့ၣ် တန့ၢ်ဘၣ်.” အဃိ ပအိၣ်ပတုာ်ဖဲ ကီၢ်စဲနံကိ ဒီးပလဲၤအိၣ်လၢ မံၤၡၢၤနရံၤအဟံၣ် အသီတဆံ. ပနၢ်ဟူဘၣ်လၢ ဖဲကီၢ်လဲးဘံရံယါန့ၣ် ပှၤမၤသံလိာ်သးအါမး ဒီးပဒိၣ်တဟ့ၣ်အခွဲးလၢ ပှၤကဟးထီၣ်လၢ ဟံၣ်ပူၤနီတဂၤဘၣ်. ပှၤမ့ၢ်ဟးထီၣ်လၢ တၢ်ချၢန့ၣ် ပှၤကခးသံကွံာ်ဝဲခဲလၢာ်.

ဒီပုၢ်ဝဲၢ်မုၣ်အဲ တဲဝဲ– ပမ့ၢ်လဲၤ ဖဲလဲၣ်ဂ့ၤဖဲလဲၣ်ဂ့ၤ ပပလီၢ်ပသးဒိၣ်မး. ယၤန့ၣ်ယပျံၤတၢ်သ့ လၢယနီၢ်ဆံးခါလံ. ယမ့ၢ်ဘၣ်ခီ ကါကျဲစ့ၢ်ကီးန့ၣ် ယဘၣ်ယိၣ်တၢ်. လၢကီၢ်လဲးဘံရံယါန့ၣ် တၢ်လီၤဘၣ်ယိၣ် မ့ၢ်အိၣ်သနာ်က့ ပပာ်လီၤသးလၢ ပကဆဲးလဲၤဖဲန့ၣ် ဒီးမၤလၢပှဲၤပမူဒါ.

ဒီပုၢ်ဝဲၢ်ခွါဖီ တဲဝဲ– ယၤဒီးယမါန့ၣ် ပဒိၣ်ထီၣ်ဘၣ် ဒ်သိးသိးလၢ ကီၢ်အဲကလံး မုၢ်နုာ်တခီ. ပမိပပါ ဟ့ၣ်ဂံၢ်ဟ့ၣ်ဘါပှၤလၢ ပကမၤ ပှၤလဲၤလၢညါ အဃိ ပဖျိထီၣ်ကၠိ ဝံၤအလီၢ်ခံ ပစးထီၣ်မၤ ပှၤလဲၤလၢညါ. ခီဖျိလၢ ပအဲၣ်ဒိးမၤ ကစၢ်ယွၤအတၢ်မၤ လၢဆၢကတီၢ်လၢပှဲၤအဃိ ပမိပပါ သးခုဒိၣ်မး. ဖဲယအိၣ် ၁၉ နံၣ်န့ၣ် ယမၤတၢ်လၢ ဘ့ၤသ့လး. ဒီးဖဲ ၁၉၈၂ န့ၣ် ယဖျီသးဒီးယမါ ဒီးအဟဲအိၣ်ဒီးယၤလၢ ဘ့ၤသ့လး.

ဒီပုၢ်ဝဲၢ်မုၣ်အဲ တဲဝဲ– ပမၤတၢ်လၢ ဘ့ၤသ့လးမုာ်မး. ဘၣ်ဆၣ် ပဘၣ်သး လဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိစ့ၢ်ကီး. လၢဘ့ၤသ့လးန့ၣ် ပမၤသကိးဘၣ်တၢ်ဒီး ဒီပုၢ်ဝဲၢ်မုၣ်ခွါလၢ အမၤဘၣ် မံၤၡၢၤနရံၤတၢ်မၤ အဃိ အဝဲသ့ၣ် တၢ်လဲၤခီဖျိန့ၣ် မၤဆူၣ်ထီၣ်ပသးလၢ ပကမၤ မံၤၡၢၤနရံၤ. ဘၣ်ဃးဒီး တၢ်ဂ့ၢ်အံၤ ပဃ့ထုကဖၣ်လၢ ယဟိဝၤယွၤအအိၣ် လီၤတံၢ်လီၤဆဲး သၢနံၣ်ညါ. လၢခံဖဲ ၁၉၈၅ န့ၣ် ပန့ၢ်ဘၣ် လံာ်ကွဲမုာ်လၢ ပကလဲၤထီၣ် ကံးလဧးကၠိ ၇၉ ဘျီတဘျီအဃိ ပသးခုညါ. ပထီၣ်ကၠိ ဝံၤအလီၢ်ခံ ပလီၤဘၣ်မူဒါလၢ ကီၢ်လဲးဘံရံယါ လၢအအိၣ်လၢ အၤဖြံၤကၤ မုၢ်နုာ်တခီ.

ဒီပုၢ်ဝဲၢ်ခွါဖီ တဲဝဲ– ဒ်ပတဲလၢ အခီၣ်ထံးန့ၣ် ပဒိးထီၣ်ကဘီယူၤ တဘ့ၣ်လၢ ကလဲၤဆှၢပှၤလၢ ကီၢ်လဲးဘံရံယါ. ဖဲကီၢ်လဲးဘံရံယါန့ၣ် တၢ်အိၣ်သးတဂ့ၤဘၣ် ဒီးဖဲဟါလီၤခီန့ၣ် ပှၤဟးလၢကျဲပူၤ တန့ၢ်နီတဂၤဘၣ်. ထံဖိကီၢ်ဖိတဖၣ် ပျံၤတၢ်တုၤဒၣ်လဲာ် ဖဲကါကိးသီၣ်ဖးဒိၣ်အခါ အဝဲသ့ၣ် ကိးပသူထီၣ် ဒီးဃ့ၢ်ထီၣ်ကွံာ်ဝဲ. အဃိ ဒ်သိးပတပျံၤတၢ် ဒိၣ်တလၢ တဂ့ၤအဂီၢ် ပဖးလံာ်စံးထီၣ်ပတြၢၤ ကိးနၤဒဲး. ပထံၣ်ဘၣ် တၢ်အိၣ်သးကီခဲ သနာ်က့ ပမၤပမူဒါအံၤမုာ်မး. ယမါန့ၣ် အလဲၤစံၣ်တဲၤတဲလီၤတၢ် ကိးနံၤဒဲး, မ့မ့ၢ်ယၤန့ၣ် ယမၤတၢ်လၢ ဘ့ၤသ့လး ဒီးယမၤသကိးဘၣ်တၢ်ဒီး ဒီပုၢ်ဝဲၢ်ခွါကၠီ ခၠးရၢၣ်. a  ဒီပုၢ်ဝဲၢ်ခွါကၠီန့ၣ် အအိၣ်လၢ ကီၢ်လဲးဘံရံယါ ဖးယံာ်လံအဃိ အသ့ၣ်ညါ ဒီပုၢ်ဝဲၢ်မုၣ်ခွါ အတၢ်အိၣ်သး ဒီးအတၢ်ကီတၢ်ခဲ ဂ့ၤဂ့ၤ. ဒီးယန့ၢ်ဘၣ်စ့ၢ်ကီး တၢ်မၤလိလၢ အအိၣ်အါမး.

ဒီပုၢ်ဝဲၢ်မုၣ်အဲ တဲဝဲ– ပမၤပမူဒါလၢ ကီၢ်လဲးဘံရံယါ မုာ်မးန့ၣ် ခီဖျိလၢ ဒီပုၢ်ဝဲၢ်မုၣ်ခွါအဃိ. အဝဲသ့ၣ် အဲၣ်ပှၤ, ကဟုကယာ်ပှၤ ဒီးအတီဒီး ယဟိဝၤယွၤ. ပရ့လိာ်သးဘူးဘူး ဒီးပကဲထီၣ်ဒ်သိးဒီး ဟံၣ်ဖိဃီဖိ. တကးဒံးဘၣ် အဝဲသ့ၣ် တၢ်ဟ့ၣ်ကူၣ်န့ၣ် မၤဆူၣ်ထီၣ် ပဂံၢ်ပဘါဒိၣ်မး. ဖဲပလဲၤ စံၣ်တဲၤတဲလီၤတၢ်အခါ ဟံၣ်ကစၢ် ဘၣ်သးလၢ ပကဆဲးတဲသကိးတၢ်ဒီး အဝဲသ့ၣ်ဖးယံာ်. ဒီးလၢကျဲခိၣ်ကျဲဃၢၤန့ၣ် နကထံၣ်ဘၣ် ပှၤတဲသကိး လံာ်စီဆှံအဂ့ၢ်. နမ့ၢ်လဲၤဘၣ်အတီၤလၢ ပှၤတဲသကိးလံာ်စီဆှံန့ၣ် နတဲသကိး လံာ်စီဆှံဒီးအဝဲသ့ၣ်သ့. ဒီးခီဖျိလၢ ပပှၤမၤလိ လံာ်စီဆှံဖိအိၣ်ဒီဒူၣ်အဃိ ပကမၤလိအဝဲသ့ၣ် ကိးဂၤဒဲးန့ၣ် တၢ်ဆၢကတီၢ်တယၢဘၣ်. အဃိ ပစံၣ်တဲၤတဲလီၤတၢ်ဖဲန့ၣ် မုာ်ဒိၣ်မး.

ဒီပုၢ်ဝဲၢ်ခွါဖီ တဲဝဲ– တၢ်မုာ်တၢ်ခုၣ် အိၣ်ထီၣ်လၢ ကီၢ်ပူၤလွံၢ်နံၣ် ဝံၤအလီၢ်ခံ ဖဲ ၁၉၈၉ န့ၣ် တၢ်ဒုးအိၣ်ထီၣ်ကဒီး နးမး. ဖဲလါယူၤလံ ၂, ၁၉၉၀ န့ၣ် ပှၤလၢအထီဒါ ပဒိၣ်တဖၣ် ပၢဝဲတၢ်လီၢ်လၢ အဘူးဒီး ဘ့ၤသ့လး. ဒီးလၢသၢလါအတီၢ်ပူၤန့ၣ် ပဆဲးကျိးဒီး ထံကီၢ်အဂၤတန့ၢ်ဘၣ်အဃိ ပဆဲးကျိးဒီး ဝဲၤလီၢ်ခိၣ်သ့ၣ် ဒီးပဟံၣ်ဖိဃီဖိ တန့ၢ်ဘၣ်. တၢ်လီၢ်ဖဲန့ၣ်န့ၣ် အိၣ်ဒီး ပှၤမၤဆူၣ်မၤစိးတၢ်, ပှၤမၤတရီတပါ ပှၤပိာ်မုၣ် ဒီးတၢ်အီၣ်တၢ်အီကၤဝဲဒိၣ်မး. တၢ်ကဲထီၣ်သးဒ်အံၤန့ၣ် ယံာ်ဝဲ ၁၄ နံၣ်ညါအဃိ တၢ်ကီတၢ်ခဲ အိၣ်ထီၣ်လၢ ထံကီၢ်ဒီတဘ့ၣ်.

ဒီပုၢ်ဝဲၢ်မုၣ်အဲ တဲဝဲ– ကလုာ်ဒူၣ်တနီၤန့ၣ် ဒုးလိာ်က့ၤသး ဒီးမၤသံလိာ်အသး. ပှၤသုးဖိတဖၣ် ဟးလၢကျဲပူၤ ဒီးအဝဲသ့ၣ် စိာ်ဝဲဒီးကျိ ဒီးအတၢ်ကူတၢ်ကၤန့ၣ် လီၤဆီဒိၣ်မး. တကးဒံးဘၣ် ပှၤသုးဖိတဖၣ်အံၤ နုာ်လီၤလၢ ပှၤဟံၣ်ပူၤ ဒီးဟံးန့ၢ်ဆူၣ် ပှၤတၢ်ဖိတၢ်လံၤလၢ အလီကီဝဲ. ဒီးအဝဲသ့ၣ်တနီၤန့ၣ် မၤသံပှၤကညီ အၢအၢသီသီ ဒ်သိးဒီး “ပှၤမၤသံ ထိၣ်ဖိဆီဖိ.” ဒ်သိး ပှၤတခီကျဲ တဂ့ၤအဂီၢ် ပှၤသုးဖိတဖၣ် ပံးဃာ်ကျဲ. အဝဲသ့ၣ် မ့ၢ်ထံၣ်ပှၤတဂၤဂၤ ခီကျဲန့ၣ် အဝဲသ့ၣ်ခးသံဝဲ ဒီးပှၤသံအစိၣ်တဖၣ်န့ၣ် အဝဲသ့ၣ် ပာ်ပူၣ်ထီၣ်ဝဲ. ခီဖျိလၢ တၢ်ကဲထီၣ်သးအံၤ ဘူးဒီးဘ့ၤသ့လးအဃိ ဒီပုၢ်ဝဲၢ်မုၣ်ခွါတနီၤ ပှၤမၤသံအဝဲသ့ၣ် ဒီးလၢအကျါန့ၣ် ပၣ်ဃုာ်ဒီး မံၤၡၢၤနရံၤခံဂၤ.

ပှၤသုးဖိတဖၣ် မ့ၢ်ထံၣ်ကလုာ်ဒူၣ်လၢ အဝဲသ့ၣ်သးဟ့ဝဲန့ၣ် အမၤသံကွံာ်ဝဲ. အဃိ ဒီပုၢ်ဝဲၢ်မုၣ်ခွါတဖၣ်န့ၣ် တၢ်လီၤဘၣ်ယိၣ် မ့ၢ်အိၣ်လၢအဂီၢ် သနာ်က့ အဝဲသ့ၣ် ပာ်ခူသူၣ်ဝဲ ပဒီပုၢ်ဝဲၢ်မုၣ်ခွါလၢ ပှၤကမၤသံအီၤတဖၣ်. ဒီးဒီပုၢ်ဝဲၢ်မုၣ်ခွါလၢ အမၤမံၤၡၢၤနရံၤတၢ်မၤ ဒီးအမၤတၢ်လၢ ဘ့ၤသ့လးန့ၣ် အဝဲသ့ၣ် မၤစၢၤဒီပုၢ်ဝဲၢ်မုၣ်ခွါတဖၣ် ဒ်န့ၣ်စ့ၢ်ကီး. ဒီပုၢ်ဝဲၢ်တဖၣ်လၢ အလဲၤအိၣ်ခူသူၣ်လၢ ဘ့ၤသ့လးန့ၣ် အဝဲသ့ၣ်တနီၤ မံလၢဟံၣ်ဖီလာ် တကထြၢ ဒီးမ့မ့ၢ်ဟံၣ်ဖိဃီဖိ နွံဂၤဟီန့ၣ် အိၣ်ဒီးပှၤလၢ ဟံၣ်ဖီခိၣ် တကထြၢ.

ဒီပုၢ်ဝဲၢ်ခွါဖီ တဲဝဲ– ကိးနံၤဒဲးန့ၣ် ပှၤသုးဖိတဖၣ် ဟဲလၢဘ့ၤသ့လး ဒ်သိးကဃုကွၢ်ဝဲ မ့ၢ်ပပာ်ခူသူၣ် ပှၤတဂၤဂၤဧါ. ဒီးဖဲန့ၣ် ပအိၣ်ဒီး ဒီပုၢ်ဝဲၢ်လွံၢ်ဂၤလၢအခိးကွၢ်တၢ်. ဖဲပှၤသုးဖိတဖၣ် ဟဲတဘျီဂ့ၤ တဘျီဂ့ၤအခါ ဒီပုၢ်ဝဲၢ်ခံဂၤ လဲၤထီၣ်တဲတၢ်ဒီး ပှၤသုးဖိလၢ ကျဲခိၣ်ထိး, မ့မ့ၢ် အဂၤခံဂၤန့ၣ်  အဝဲသ့ၣ် ကွၢ်စူၣ်တၢ်လၢ ပဲတြီဖိ. ဖဲပဒီပုၢ်ဝဲၢ်ခံဂၤ လဲၤတဲတၢ်ဒီး ပှၤသုးဖိအခါ အဝဲသ့ၣ် မ့ၢ်ပာ်အစုလၢ အမဲာ်ညါန့ၣ် အခီပညီ သုးဖိတဟဲနုာ်လီၤဘၣ်. ဒီးအဝဲသ့ၣ် မ့ၢ်ပာ်အစုလၢ အလီၢ်ခံန့ၣ် သုးဖိတဖၣ် ကဟဲနုာ်လီၤအဃိ ဒီပုၢ်ဝဲၢ်ခံဂၤလၢ အကွၢ်စူၣ်တၢ်လၢ ပဲတြီဖိန့ၣ် ကရီက့ၤတဲဘၣ် ဒီပုၢ်ဝဲၢ်လၢ အဟဲအိၣ်ဖဲ ဘ့ၤသ့လးလၢ ကဃ့ၢ်အိၣ်ခူသူၣ်.

ဒီပုၢ်ဝဲၢ်မုၣ်အဲ တဲဝဲ– ဘၣ်တနံၤ ပှၤသုးဖိလၢ အသးပှံၢ်ထီၣ်တၢ်တဒူၣ် ဟဲနုာ်လီၤန့ၢ်ဆူၣ် လၢဘ့ၤသ့လးအပူၤ. အဃိ ယၤဒီးဒီပုၢ်ဝဲၢ်မုၣ်တဂၤ လဲၤနုာ်လီၤလၢ တၢ်လုၢ်ထံလီၢ် ဒီးဖဲန့ၣ် အိၣ်ဒီးတၢ်လီၢ် အံၣ်အံၣ်ဖိတတီၤလၢ ဒီပုၢ်ဝဲၢ်မုၣ် ကအိၣ်ခူသူၣ်အဂီၢ်. ပှၤသုးဖိတဖၣ် လၢအစိာ်ဒီးကျိန့ၣ် ဟဲထီၣ်လၢပအိၣ် ဒီးဒိတကျိာ် ပတြဲၤဆူၣ်ဆူၣ်. ယဝၤဃ့ကညးအဝဲသ့ၣ် ဒီးတဲလၢ “ယမါလုၢ်ထံ.” ဒီးဖဲယပံးန့ၢ် ဒီပုၢ်ဝဲၢ်မုၣ်တြဲၤအခါ အသီၣ်ဒိၣ် ဒီးယပာ်ဘၣ်ထီၣ် တၢ်ဖိတၢ်လံၤ ယံာ်တစဲး. ယဘၣ်ယိၣ်လၢ ပှၤသုးဖိတဖၣ် ကဆိကမိၣ်လၢ ယမၤမနုၤလဲၣ်အဃိ ယပျံၤတၢ် ဒီးယကနိး ဒီတဂၤညါ. ယမ့ၢ်အိးထီၣ်တြဲၤန့ၣ် ပှၤသုးဖိတဖၣ် ကထံၣ်လၢ ယပျံၤတၢ် ဒီးယကနိးယဃိ ယဃ့ထုကဖၣ်လၢ ယသးပူၤ ဒီးယဃ့လၢ ယဟိဝၤယွၤ ကမၤစၢၤယၤ ဒ်သိးယကပာ်သးမုာ်မုာ်. ယအိးထီၣ်တြဲၤ ဒီးယတဲတၢ်ဒီး အဝဲသ့ၣ်မုာ်မုာ်. သနာ်က့ ပှၤသုးဖိတဂၤ ဆီၣ်ဖျိးယၤ ဒီးအလဲၤဃုတၢ်လၢ ဒီပုၢ်ဝဲၢ်မုၣ်အိၣ်ခူသူၣ်အလီၢ် ဘၣ်ဆၣ် အတထံၣ်တၢ် နီတမံၤဘၣ်. ဝံၤဒီး အဝဲသ့ၣ် လဲၤဃုကွၢ်တၢ်လၢ ဒၢးအဂၤတဖၣ် ဒီးလၢဟံၣ်ဖီခိၣ်အဂၤတတီၤ သနာ်က့ တထံၣ်စ့ၢ်ကီး တၢ်နီတမံၤဘၣ်.

ဒီပုၢ်ဝဲၢ်ခွါဖီ တဲဝဲ– ပတၢ်အီၣ် တအိၣ်အါအါဘၣ် အဃိ ပတအီၣ်ဘၣ်တၢ် ဘျဲဘျဲဘၣ်န့ၣ် တဘျုးလါညါ. မ့မ့ၢ်လၢ နီၢ်သးတၢ်အီၣ်န့ၣ် ပအီၣ်ဘၣ်ဘျဲဘျဲ. ညီနုၢ်န့ၣ် ပတအီၣ်ဘၣ် ဂီၤခီတၢ်အီၣ်ဘၣ်. ဘၣ်ဆၣ် ဘ့ၤသ့လးဂီၤခီတၢ်ဘါန့ၣ် အလီၤဂာ်ဒ်သိးဒီး “ဂီၤခီတၢ်အီၣ်.” ပသ့ၣ်ညါလၢ တၢ်ဖးလံာ်စီဆှံ ဒီးတၢ်မၤလိလံာ်စီဆှံန့ၣ် မၤဆူၣ်ထီၣ်ပဂံၢ်ပဘါ ဒ်သိးပတူၢ်တၢ် ကိးနံၤဒဲးကန့ၢ်အဂီၢ်.

ပသ့ၣ်ညါလၢ ပမ့ၢ်လဲၤဃု တၢ်အီၣ်တၢ်အီ ဒီးထံလၢ တၢ်ချၢန့ၣ် ပဒီသဒၢ ပဒီပုၢ်ဝဲၢ်လၢ အအိၣ်ခူသူၣ်တဖၣ် တန့ၢ်ဘၣ် ဒီးပှၤကမၤသံအဝဲသ့ၣ်. ဘၣ်ဆၣ် တၢ်လၢပလိၣ်ဘၣ်န့ၣ် ယဟိဝၤယွၤ ဟ့ၣ်ပှၤ ဘၣ်ဆၢဘၣ်ကတီၢ် ဒီးမၤစၢၤပှၤလၢ ကျဲလၢပတဆိကမိၣ်ဘၣ်. အဃိ ပထံၣ်ဘၣ်လၢ တၢ်လၢပလိၣ်ဘၣ်န့ၣ် ယဟိဝၤယွၤဟ့ၣ်ပှၤ ဒီးအမၤစၢၤပှၤ ဒ်သိး ပကပာ်ပသးမုာ်မုာ်.

တၢ်အိၣ်သးလၢ ကီၢ်လဲးဘံရံယါန့ၣ် နးထီၣ်မးနးထီၣ် ဘၣ်ဆၣ် တၢ်မ့ၢ်တၢ်တီန့ၣ် မၤဂၢၢ်ကျၢၤထီၣ် ပတၢ်မုၢ်လၢ် ဒီးမၤဆူၣ်ထီၣ် ပဂံၢ်ပဘါ. ဒီပုၢ်ဝဲၢ်မုၣ်ခွါအါဂၤ ဘၣ်ဃ့ၢ်ပူၤဖျဲးအသးအါဘျီ ဒီးအဝဲသ့ၣ် ထံၣ်ဘၣ် တၢ်ကီတၢ်ခဲသနာ်က့ အဝဲသ့ၣ်ဆဲးအိၣ်ဒီး တၢ်နာ်လၢအဂၢၢ်ကျၢၤ ဒီးပာ်အသးမုာ်မုာ်. အဝဲသ့ၣ်တနီၤန့ၣ် တဲဝဲလၢ ပလဲၤခီဖျိဘၣ် တၢ်ဒုးတၢ်ယၤအဃိ “မၤစၢၤပှၤလၢ ပကအိၣ် ကတဲာ်ကတီၤသးလၢ တၢ်နးတၢ်ဖှီၣ်ဖးဒိၣ်အဂီၢ်.” ပထံၣ်ဘၣ်လၢ တၢ်အိၣ်ဖှိၣ်သးပှၢ် ဒီးဒီပုၢ်ဝဲၢ်ခွါသးစၢ်တဖၣ် ဂုာ်ကျဲးစၢးမၤစၢၤ ဒီပုၢ်ဝဲၢ်မုၣ်ခွါတဖၣ် သပှၢ်တၢၢ်. ဒီးဒီပုၢ်ဝဲၢ်မုၣ်ခွါလၢ အဘၣ်လဲၤဃ့ၢ်အိၣ်လၢ တၢ်လီၢ်အဂၤန့ၣ် မၤစၢၤလိာ်သး ဒီးအဝဲသ့ၣ် စံၣ်တဲၤတဲလီၤတၢ်ဖဲန့ၣ်. ဖဲအဝဲသ့ၣ်အိၣ်လၢ ပှၢ်ပူၤအခါ ဒ်သိး အဝဲသ့ၣ် ကထီၣ်ဘၣ်တၢ်အိၣ်ဖှိၣ်အဂီၢ် အဝဲသ့ၣ်တ့ထီၣ် တၢ်လီၢ်ဆံးဆံးဖိတတီၤ. ဒီပုၢ်ဝဲၢ်မုၣ်ခွါတဖၣ်န့ၣ် ထံၣ်ဘၣ်တၢ်အိၣ်သးကီခဲ သနာ်က့ အဝဲသ့ၣ် ထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်အဃိ အဝဲသ့ၣ် ဒိးန့ၢ်ဘၣ် တၢ်ဂံၢ်တၢ်ဘါဒိၣ်မး. ဒီးဖဲပဆှၢလီၤ တၢ်မၤစၢၤ ဒ်သိးဒီး တၢ်အီၣ်တၢ်အီ, တၢ်ကူတၢ်ကၤ ဒီးတၢ်အဂၤတဖၣ်အခါ အဝဲသ့ၣ်အါဂၤန့ၣ် တဃ့ပှၤတၢ်ကူတၢ်ကၤဘၣ်. အဝဲသ့ၣ် ဃ့ပှၤလၢထၢၣ် လၢကဟးစံၣ်တဲၤတဲလီၤတၢ်အဂီၢ်ဟီ. အဃိ ဖဲပထံၣ်ဘၣ်ဒ်န့ၣ်အခါ အမၤဆူၣ်ထီၣ် ပဂံၢ်ပဘါဒိၣ်မး. ခီဖျိလၢ တၢ်ဒုးတၢ်ယၤအဃိ ပှၤအါဂၤထံၣ်ဘၣ် တၢ်ကီတၢ်ခဲ ဒီးအဝဲသ့ၣ် ဘၣ်သးနၢ်ဟူ ဘီမုၢ်တၢ်သးခုကစီၣ်. ပှၤအါဂၤ ထံၣ်ဘၣ်လၢ ဒီပုၢ်ဝဲၢ်မုၣ်ခွါတဖၣ် ပာ်ဖျါထီၣ်တၢ်အဲၣ် ဒီးအိၣ်ဒီးတၢ်ထံၣ်လၢအဂ့ၤအဃိ အဝဲသ့ၣ် ကမၢကမၣ်ဒိၣ်မး. ဒီပုၢ်ဝဲၢ်မုၣ်ခွါ ဖဲန့ၣ်တဖၣ်န့ၣ် လီၤဂာ်ဒ်သိးဒီး တၢ်ကပီၤလၢတၢ်ခံးကျါ. (မး ၅:၁၄-၁၆) ခီဖျိလၢ ဒီပုၢ်ဝဲၢ်မုၣ်ခွါတဖၣ် စံၣ်တဲၤတဲလီၤတၢ် လၢတၢ်သးဆူၣ်အဃိ ပှၤသုးဖိတနီၤန့ၣ် ကဲထီၣ်က့ၤ ပဒီပုၢ်ဝဲၢ်.

ဒီပုၢ်ဝဲၢ်ခွါဖီ တဲဝဲ– တဘျီတခီၣ်န့ၣ် ပဘၣ်ဟးထီၣ်လၢ ကီၢ်လဲးဘံရံယါ. ပဘၣ်ဟးထီၣ်လၢ ကီၢ်ပူၤ ယံာ်ဝဲတစိၢ်တလီၢ်န့ၣ် အိၣ်ဝဲသၢဘျီ ဒီးပဘၣ်ဟးထီၣ် ယံာ်တနံၣ်န့ၣ် အိၣ်ဝဲခံဘျီ. တၢ်ကတိၤလၢ ဒီပုၢ်ဝဲၢ်မုၣ်လၢ အမၤမံၤၡၢၤနရံၤတဂၤ တဲဝဲန့ၣ် ဘၣ်လိာ်သးဒီး ပတၢ်တူၢ်ဘၣ် ဖးဒိၣ်ညါ. အတဲဝဲ “လၢကံးလဧးကၠိန့ၣ် ဒီပုၢ်ဝဲၢ်သိၣ်လိပှၤလၢ ဖဲပလဲၤလၢ တၢ်လီၢ်လၢ ပလီၤဘၣ်မူဒါအခါ ပဘၣ်အဲၣ် ဒီပုၢ်ဝဲၢ်မုၣ်ခွါ လၢပသးဒီဖျၢၣ် ဒီးပမၤဒ်န့ၣ်. အဃိ ဖဲပဘၣ်ပာ်တ့ၢ် ဒီပုၢ်ဝဲၢ်မုၣ်ခွါ လီၤဆီဒၣ်တၢ် ဖဲအဝဲသ့ၣ်ထံၣ်ဘၣ် တၢ်အိၣ်သးကီခဲအခါ ပသးဘၣ်ဒိဒိၣ်မး.” ပတအိၣ်လၢ ကီၢ်လဲးဘံရံယါ အပူၤဘၣ် သနာ်က့ ပမၤစၢၤဘၣ်ဒံး ဒီပုၢ်ဝဲၢ်မုၣ်ခွါ ဒီးဆီၣ်ထွဲဘၣ်ဒံး တၢ်စံၣ်တဲၤတဲလီၤတၢ်မၤ ဖဲန့ၣ်အဃိ ပသးခုဒိၣ်မး.

ဒီပုၢ်ဝဲၢ်မုၣ်အဲ တဲဝဲ– ဖဲလါမ့ၤ ၁၉၉၆ န့ၣ် ယၤ, ယဝၤ ဒီးဒီပုၢ်ဝဲၢ်အဂၤခံဂၤ ဒိးထီၣ်ဘ့ၤသ့လး အကါတခိၣ် ဒီးပဟးထီၣ်ကွံာ်လၢ ကီၢ်လဲးဘံရံယါ. လၢကါပူၤန့ၣ် အိၣ်ဒီးလံာ်က့လၢ ပှၤကွဲးနီၣ်ဃာ် တၢ်ဂ့ၢ်အရ့ဒိၣ် လၢအဘၣ်ဃးဒီး ပတၢ်ဖံးတၢ်မၤဖဲ ကီၢ်လဲးဘံရံယါ. ဒီးဒ်သိး ပကဟးဆှဲး တၢ်လီၤဘၣ်ယိၣ်အဂီၢ် ပလဲၤနီကါလၢ သဝီအဂၤတဖျၢၣ် လၢအယံၤဝဲ ၁၆ ကံလိမံထၢၣ် (အမံးလာ် ၁၀). ဖဲန့ၣ်အခါ ပှၤထီဒါက့ၤပဒိၣ်တဖၣ် လဲၤနုာ်လီၤလၢ သဝီလၢ ပလဲၤတဖျၢၣ်န့ၣ် အပူၤလံ. အဝဲသ့ၣ် ခးထီၣ်ကျိ လၢတၢ်ဖးဖီ ဒီးအကိးပတုာ်ပကါ ဝံၤဒီးမၢပဝဲသၢဂၤ စံၣ်လီၤလၢကါပူၤ. မ့မ့ၢ်ယဝၤန့ၣ် အိၣ်တ့ၢ်လၢကါပူၤ ဒီးအဝဲသ့ၣ် နီထီၣ်ပကါ. ပသးလီၤကတုၤ ဖးဒိၣ်ညါ. သတူၢ်ကလာ်န့ၣ် ပထံၣ်လၢ ယဝၤဟဲက့ၤ လၢပအိၣ် ဒီးအခိၣ်သွံၣ်လီၤ. ပဆိကမိၣ်လၢ ပှၤခးအီၤလၢကျိ ဘၣ်ဆၣ် ပဆိကမိၣ်ထီၣ်က့ၤလၢ ပှၤမ့ၢ်ခးအီၤလၢကျိဒု အဟဲက့ၤ တသ့လၢၤဘၣ်. နီၢ်ကီၢ်န့ၣ် ပှၤသုးဖိတဂၤတီၢ်အီၤ ဒီးဆီၣ်လီၤတဲာ်အီၤလၢ ကါပူၤအဃိ အဘၣ်ဒိတစဲးဖိ.

ပထံၣ်ပှၤသုးဖိအကါတခိၣ် ဒီးလၢကါပူၤန့ၣ် အိၣ်ဒီးပှၤသဝီဖိလၢ အပျံၤတၢ် ဒီးကဟးထီၣ်ကွံာ်လၢ သဝီပူၤ. ပလဲၤထီၣ်လၢကါပူၤ ဘၣ်ဆၣ် ပှၤကညီပှဲၤလံအဃိ ပဘၣ်ဆၢထၢၣ်လၢ ကါလီၢ်ခံ ဒီးဖီၣ်ဃာ်တၢ်ဃံးဃံး. ပှၤနီကါတဂၤန့ၣ် နီကါချ့တလၢအဃိ ပဘူးကလီၤတဲာ်ညါ. ပကိးပသူလၢ ပကလုၢ်ဒိၣ်ဒိၣ် ဒီးမၢအပတုာ်ကါ ဘၣ်ဆၣ် အပျံၤတၢ်ဒိၣ်မးအဃိ အတအိၣ်ပတုာ်န့ၢ်ပှၤဘၣ်. လၢခံန့ၣ် ပလဲၤတုၤလၢ ကါအိၣ်ပတုာ်အလီၢ်. ဒီးခီဖျိလၢ ပဘၣ်ဖီၣ်ဃာ်ကါဃံးဃံး ဒီးပပျံၤတၢ်ဒိၣ်မးအဃိ ပလီၤဘှံးဖးဒိၣ်ညါ.

ဒီပုၢ်ဝဲၢ်ခွါဖီ တဲဝဲ– ပဆ့ကၤအပိၣ် တပၣ်နီတဘ့ၣ်ဘၣ်. အိၣ်ဒၣ် ပဆ့ကၤညာ်ပြဲး လၢပလိၤတဘ့ၣ်လီၤ. ပကွၢ်လိာ်သးမဲာ် ဒီးတဲလိာ်သးလၢ ပအိၣ်မူဘၣ်ဒံးအဃိ ပသးခု. ပထံၣ်ကဘီယူၤတဘ့ၣ်လၢ ပှၤခးအကပၤလၢကျိချံ တဘျုးဘျီ ဒီးလီၤဂာ်လၢ အဘူးကလီၤပှီၢ်လံ. လၢခံတနံၤ ကဘီယူၤတဘ့ၣ်အံၤ ကလဲၤဆှၢပှၤလၢ ကီၢ်စံၣ်အဲရၢၣ်လံၣ်အိၣ် အဃိ ပမံတီၢ်လၢပျီပူၤ ဘူးဒီး ကဘီယူၤတဘ့ၣ်န့ၣ်. ပလဲၤတုၤလၢ ကီၢ်စံၣ်အဲရၢၣ်လံၣ်အိၣ် ဂ့ၤဂ့ၤအဃိ ပသးခု. ဘၣ်ဆၣ် ပဘၣ်ယိၣ်န့ၢ်တၢ်လၢ ဒီပုၢ်ဝဲၢ်မုၣ်ခွါ လၢအိၣ်လၢ ကီၢ်လဲးဘံရံယါ အဂီၢ်ဒိၣ်မး.

ဒီပုၢ်ဝဲၢ်မုၣ်အဲ တဲဝဲ– ဖဲပလဲၤတုၤလၢ ဘ့ၤသ့လး လၢအအိၣ်လၢ ဖြံထီ, ကီၢ်စံၣ်အဲရၢၣ်လံၣ်အိၣ်အခါ ဒီပုၢ်ဝဲၢ်မုၣ်ခွါ ကွၢ်ထွဲပှၤဂ့ၤမး. မ့မ့ၢ်ယၤန့ၣ် တဘျီတခီၣ် ယထံၣ်တမှံက့ၤ တၢ်ကဲထီၣ်သး ဖဲယအိၣ်လၢ ကီၢ်လဲးဘံရံယါ ဒီးအမၤတံာ်တာ် ယသးဒိၣ်မး. ယပျံၤတၢ် ဒီးယတၢ်ဆိကမိၣ် လဲၤကဒံကဒါ ဒီးဆိကမိၣ်လၢ တၢ်ကကဲထီၣ်သးဒီးယၤတမံၤမံၤ. ဒီးဖဲယမံလၢ မုၢ်နၤခီန့ၣ် ယနီၣ်ထီၣ်သး သတူၢ်ကလာ် ဒီးယကပၢၤပြိ ဒီတဂၤညါ. ယပျံၤတၢ် ဒီးယကနိးဒီတဂၤ. ယကသါ တပၢၢ်လၢၤဘၣ်. ယဝၤဖိးဟုယၤ ဒီးအဃ့ထုကဖၣ်ဒီးယၤ. ပသးဝံၣ် ဘီမုၢ်အတၢ်သးဝံၣ် တုၤလၢ ယသးခုၣ်လီၤက့ၤ. ယတူၢ်ဘၣ်လၢ ယပျုၢ်လံ ဒီးယဆိကမိၣ်လၢ ယဆဲးမၤ မံၤၡၢၤနရံၤ တန့ၢ်လၢၤဘၣ်.

တၢ်ကဲထီၣ်သးလၢခံန့ၣ် ယသးပ့ၤနီၣ် တန့ၢ်နီတဘျီဘၣ်. ဖဲတၢ်တနွံဃီန့ၣ် ပန့ၢ်ဘၣ် မဲးကစံခံဘ့ၣ်. မဲးကစံ တၢတဘ့ၣ်န့ၣ် မ့ၢ်ဝဲ ပၢၢ်ထီၣ် လါယူၤ ၈, ၁၉၉၆. မဲးကစံအံၤ အိၣ်ဒီး တၢ်ဂ့ၢ်ခိၣ်တီ လၢအမ့ၢ် “Coping With Panic Attacks.” ခဲအံၤ ဘၣ်မနုၤအဃိ ယပျံၤတၢ် ဒိၣ်မးလဲၣ်န့ၣ် ယနၢ်ပၢၢ်ထီၣ်လံ. မ့မ့ၢ် မဲးကစံ အဂၤတဘ့ၣ် လၢအမ့ၢ် တၢးထီခိးတၢ် လါမ့ၤ ၁၅, ၁၉၉၆ န့ၣ် အပာ်ဖျါထီၣ် တၢ်ဂ့ၢ်တခါလၢ အခိၣ်တီမ့ၢ်ဝဲ “Where Do They Get Their Strength.” လၢတၢ်ဂ့ၢ်တခါအံၤန့ၣ် အိၣ်ဒီး တၢ်ဂီၤလၢ အပာ်ဖျါထီၣ် စီးကပ့ၤဖိလၢ အဒံးဆ့ဘၣ်ဒိတဘ့ၣ်. တၢ်ဂ့ၢ်တခါအံၤ ၡဲပၠးဝဲလၢ စီးကပ့ၤဖိတဘ့ၣ်အံၤ အဒံးဆ့ မ့ၢ်ဘၣ်ဒိထဲလဲၣ်ဘၣ်ဆၣ် အဆဲးယူၤဒံး. ဒ်န့ၣ်အသိး ခီဖျိလၢ ပထံၣ်ဘၣ် တၢ်လီၤပျံၤလီၤဖုးအဃိ ပဂံၢ်ပဘါ မ့ၢ်လီၤစၢ် သနာ်က့ ဒ်သိး ပမၤစၢၤက့ၤပှၤဂၤ ကန့ၢ်အဂီၢ် ယဟိဝၤယွၤ ကဆဲးမၤစၢၤပှၤ. တၢ်ဂ့ၢ်တဖၣ်အံၤ အလီၤဂာ်ဒ်သိးဒီး နီၢ်သးတၢ်အီၣ်လၢ ယဟိဝၤယွၤ ဟ့ၣ်လီၤယၤ ဖဲယလိၣ်ဘၣ် အဆၢကတီၢ်. (မး ၂၄:၄၅) ယဃုကွၢ်အါထီၣ်စ့ၢ်ကီး တၢ်ဂ့ၢ်လၢ အလီၤဂာ်ဒီး တၢ်ဂ့ၢ်ခံခါအံၤ ဒီးကွဲးနီၣ်ဃာ်လၢလံာ်ပူၤ. ဖဲယကွၢ်ကဒါက့ၤ တၢ်ဂ့ၢ်တဖၣ်အံၤအခါ အမၤစၢၤယၤဒိၣ်မး. လၢခံ တၢ်ကဲထီၣ်သး လၢအပူၤကွံာ် လၢအမၤပျံၤယၤန့ၣ် လီၤမၢ်ကွံာ်ဝဲ ကယီကယီ.

ဒီပုၢ်ဝဲၢ်ခွါဖီ တဲဝဲ– ပမ့ၢ်က့ၤကဒါလၢ ကီၢ်လဲးဘံရံယါ တဘျီဂ့ၤ တဘျီဂ့ၤန့ၣ် ပသးခုဒိၣ်မး. ဖဲ ၂၀၀၄ ဘူးကကတၢၢ်န့ၣ် ပမၤပမူဒါလၢ ကီၢ်လဲးဘံရံယါ ဘူးကပှဲၤထီၣ်အနံၣ် ၂၀ ညါ. ဒီးဖဲန့ၣ်အခါ တၢ်ဒုးတအိၣ်လၢၤဘၣ်. တကးဒံးဘၣ် လၢဝဲၤတြၢ်န့ၣ် ဒီပုၢ်ဝဲၢ်တဖၣ် ရဲၣ်ကျဲၤစ့ၢ်ကီးလၢ က ဘှီဂ့ၤထီၣ်က့ၤတၢ်. ဘၣ်ဆၣ် သတူၢ်ကလာ်န့ၣ် ပဒိးန့ၢ်ဘၣ်မူဒါ လၢအသီတခါ.

ပကတူၢ်လိာ် မူဒါအသီအံၤအဂီၢ် အကီလၢပဂီၢ်ဒိၣ်မး. ဒီပုၢ်ဝဲၢ်မုၣ်ခွါလၢ ကီၢ်လဲးဘံရံယါန့ၣ် ပအဲၣ်အဝဲသ့ၣ် ဒ်သိးဒီး ပဟံၣ်ဖိဃီဖိအဃိ ပတဘၣ်သး ပာ်တ့ၢ်အဝဲသ့ၣ်ဘၣ်. ဒီးပနီၣ်ဘၣ်က့ၤ ဖဲပလဲၤထီၣ် ကံးလဧးကၠိအခါ ပဘၣ်ပာ်တ့ၢ်ကွံာ် ပနီၢ်ကစၢ် ဟံၣ်ဖိဃီဖိ. ဘၣ်ဆၣ် ခီဖျိလၢ ပပျဲလၢ ယဟိဝၤယွၤ ကသူပှၤအဃိ ပဒိးန့ၢ်ဘၣ် တၢ်ဆိၣ်ဂ့ၤဒီဒူၣ်. အဃိ ပတူၢ်လိာ် မူဒါအသီတခါအံၤ ဒီးပလဲၤလၢ ကီၢ်ကၣ်နၣ်.

ဒီပုၢ်ဝဲၢ်မုၣ်အဲ တဲဝဲ– ဖဲပဟးထီၣ်လၢ ကီၢ်လဲးဘံရံယါအခါ ပသးဘၣ်ဒိ ဒီးပဟီၣ် တဘျုးဘျီညါ. ဘၣ်ဆၣ် ဒီပုၢ်ဝဲၢ်ခွါဖြဲၣ် လၢအကဲ တၢ်အိၣ်ဖှိၣ်သးပှၢ်တဂၤ တဲပှၤလၢ “သုကဘၣ် သးပ့ၤနီၣ်ကွံာ်ပှၤ.” အတဲပှၤဒ်န့ၣ်အဃိ ပကမၢကမၣ်ညါ. သနာ်က့ အတဲက့ၤပှၤလၢ “ပသ့ၣ်ညါလၢ သုသးပ့ၤနီၣ်ပှၤ တန့ၢ်ဘၣ်, ဘၣ်ဆၣ် မူဒါအသီလၢ သုဒိးန့ၢ်ဘၣ်လၢ ယဟိဝၤယွၤ အအိၣ်န့ၣ် မၤအီၤလၢ သုသးဒီဖျၢၣ်. ဒီးကွၢ်ထွဲ ဒီပုၢ်ဝဲၢ်မုၣ်ခွါဖဲန့ၣ်တဖၣ် ဂ့ၤဂ့ၤနီၤ.” တၢ်လၢ ဒီပုၢ်ဝဲၢ်ခွါတဂၤအံၤ တဲပှၤန့ၣ် မၤဆူၣ်ထီၣ် ပဂံၢ်ပဘါ, မၤစၢၤပှၤဒ်သိး ပကစးထီၣ် ပတၢ်အိၣ်မူလၢအသီ ဒီးပကရ့ဒီး ဒီပုၢ်ဝဲၢ်မုၣ်ခွါ လၢအသီတဖၣ်.

ဒီပုၢ်ဝဲၢ်ခွါဖီ တဲဝဲ– လၢကီၢ်ကၣ်နၣ်န့ၣ် ဒီပုၢ်ဝဲၢ်မုၣ်ခွါ အိၣ်ဒီဒူၣ်ညါ. ဒီပုၢ်ဝဲၢ်မုၣ်ခွါတဖၣ်အံၤ ပရ့ဘၣ်အီၤညီ ဒီးပကဲထီၣ် ဒ်သိးဒီး ဟံၣ်ဖိဃီဖိ. ပမၤလိန့ၢ်တၢ်လၢ ဒီပုၢ်ဝဲၢ်မုၣ်ခွါလၢ အသးတီ ဒီးအနီၢ်သးဆူၣ်တဖၣ်အံၤ အအိၣ်အါမး. ပမၤစၢၤတၢ်လၢ ကီၢ်ကၣ်နၣ် ၁၃ ဝံၤအလီၢ်ခံ ပန့ၢ်ဘၣ်မူဒါလၢ အသီတခါ. ဒီပုၢ်ဝဲၢ်မၢ ပလဲၤမၤစၢၤတၢ်လၢ ကီၢ်အၤဖြံၤကၤမုၢ်ထီၣ် အဝဲၤတြၢ် လၢကဲၣ်နယၣ်. ပသးသယုၢ်ဘၣ် ဒီပုၢ်ဝဲၢ်မုၣ်ခွါလၢ ကီၢ်လဲးဘံရံယါ ဒီးကီၢ်ကၣ်နၣ်ဒိၣ်မး. ဘၣ်ဆၣ် ဖဲပရ့ဘၣ်ဒီး ဒီပုၢ်ဝဲၢ်မုၣ်ခွါလၢ ကီၢ်ကဲၣ်နယၣ်အခါ ပကဲထီၣ် ဒ်သိးဒီး ဟံၣ်ဖိဃီဖိချ့မး. ဒီးလၢကီၢ်ကဲၣ်နယၣ်န့ၣ် ပလိၣ်ဘၣ် တၢ်မၤစၢၤလၢ တၢ်စံၣ်တဲၤတဲလီၤ တကပၤဒီဒူၣ်ဒံး.

ဒီပုၢ်ဝဲၢ်မုၣ်အဲ တဲဝဲ– လၢယတၢ်အိၣ်မူပူၤန့ၣ် ယလဲၤခီဖျိဘၣ် တၢ်အိၣ်သးကီခဲအါမး ဒီးတဘျီတခီၣ်န့ၣ် ယပျံၤတၢ်ဒိၣ်မး. ပအိၣ်ဘၣ်လၢ တၢ်လီၢ်လၢ အလီၤဘၣ်ယိၣ် ဒီးတၢ်အိၣ်သးကီခဲ ကဲထီၣ်သးအဃိ အမၤဘၣ်ဒိ ပသးတၢ်ဆိကမိၣ် ဒီးပတၢ်အိၣ်ဆူၣ်အိၣ်ချ့သ့. ဒီးပသ့ၣ်ညါလၢ ယဟိဝၤယွၤ တမၤတၢ်လီၤလးဒ်သိး အကဒီသဒၢပှၤလၢ တၢ်ကီတၢ်ခဲတဖၣ်အံၤဘၣ်. ခဲအံၤစ့ၢ်ကီး ယမ့ၢ်နၢ်ဟူ ကျိသီၣ်ထီၣ်န့ၣ် ယပျံၤတၢ်ဒိၣ်မး. ဘၣ်ဆၣ် ယမၤလိဘၣ်လၢ ဒီပုၢ်ဝဲၢ်မုၣ်ခွါ အတၢ်မၤစၢၤ ဒီးတၢ်မၤစၢၤအဂၤလၢ ယဟိဝၤယွၤ ဟ့ၣ်ယၤန့ၣ် မၤဆူၣ်ထီၣ် ယဂံၢ်ယဘါဒိၣ်မး. ဒီးပထံၣ်ဘၣ်လၢ ဖဲပဆဲးမၤ နီၢ်ကစၢ် တၢ်မၤလိလံာ်စီဆှံ, ဃ့ထုကဖၣ်, ထီၣ်တၢ်အိၣ်ဖှိၣ် ဒီးလဲၤစံၣ်တဲၤတဲလီၤတၢ်အခါ ယဟိဝၤယွၤ မၤစၢၤပှၤ ဒ်သိးပကဆဲးမၤပမူဒါ.

ဒီပုၢ်ဝဲၢ်ခွါဖီ တဲဝဲ– တဘျီတခီၣ်န့ၣ် ပှၤသံကွၢ်ပှၤလၢ “သုမူဒါတခါအံၤ သုမၤအီၤမုာ်ဧါ.” ထံကီၢ် ဒီးတၢ်လီၢ်တနီၤန့ၣ် အဃံလၤဝဲ ဘၣ်ဆၣ် တၢ်အိၣ်သး တဂၢၢ်တကျၢၤဘၣ် ဒီးတၢ်လီၤဘၣ်ယိၣ် ကဲထီၣ်သးသ့. တၢ်လၢပဘၣ်သူၣ်ဘၣ်သး ဒိၣ်န့ၢ်ဒံး ထံကီၢ်တၢ်ဃံတၢ်လၤန့ၣ် မ့ၢ်ဝဲဒီပုၢ်ဝဲၢ်မုၣ်ခွါလၢ အလီၤဂာ်ဒ်သိးဒီး ပဟံၣ်ဖိဃီဖိ. ပတၢ်ဆဲးတၢ်လၤ မ့ၢ်တဒ်သိးလိာ်သး ဘၣ်ဆၣ် ပတၢ်တိာ်ပာ် မ့ၢ်တမံၤဃီ. ပဆိကမိၣ်လၢ ပှၤဆှၢလီၤပှၤဒ်သိး ပကလဲၤ ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါ ဘၣ်ဆၣ် အဝဲသ့ၣ် ဟ့ၣ်ဂံၢ်ဟ့ၣ်ဘါက့ၤ လၢပှၤဟီ.

ပမ့ၢ်ဘၣ်လဲၤ ဖဲလဲၣ်ဂ့ၤဖဲလဲၣ်ဂ့ၤ ပအိၣ်ဒီး ဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ်ညါအဃိ အကဲဝဲ ယဟိဝၤယွၤ အတၢ်ဆိၣ်ဂ့ၤ လၢအလီၤကမၢကမၣ်ဒိၣ်မး. ပမ့ၢ်ဆဲးအိၣ်လၢ ယဟိဝၤယွၤ အတၢ်ကရၢကရိအပူၤန့ၣ် ပကဒိးန့ၢ်ဘၣ် နီၢ်သးအဟံၣ်ဖိဃီဖိ ဒီးအိၣ်ဘၣ် ပူၤပူၤဖျဲးဖျဲး. ဒီးတၢ်မ့ၢ်ကဲထီၣ်သးဒ်လဲၣ် သနာ်က့ ပမ့ၢ်ဆဲးသန့ၤသးလၢ ယဟိဝၤယွၤန့ၣ် ပနာ်သပှၢ်တၢၢ်လၢ အကဟ့ၣ်ပှၤ တၢ်ဂံၢ်တၢ်ဘါ လၢပလိၣ်ဘၣ်.—ဖံလံး ၄:၁၃.