တၢ်မၤလိ ၄၄
တၢ်သးဝံၣ် ၃၃ ပာ်ထီၣ်နတၢ်ဝံတၢ်ယိးလၢ ယဟိဝၤယွၤအလိၤ
ဖဲနထံၣ်ဘၣ် တၢ်တတီတလိၤအခါ နလဲၤခီဖျိအီၤ ကသ့ဒ်လဲၣ်
“တဘၣ်ပျဲတၢ်အၢ မၤနၢၤနၤတဂ့ၤ. ဆဲးမၤနၢၤတၢ်အၢလၢ တၢ်ဂ့ၤတက့ၢ်.”—ရိ ၁၂:၂၁.
တၢ်ဂ့ၢ်မိၢ်ပှၢ်
ဖဲပှၤရ့ပှၤ တတီတလိၤအခါ ဒ်သိးပတမၤကမၣ်ဘၣ်တၢ် တဂ့ၤအဂီၢ် ပကဘၣ်မၤဒ်လဲၣ်.
၁-၂. တဘျီတခီၣ် ပကထံၣ်ဘၣ် တၢ်တတီတလိၤ လၢကျဲဒ်လဲၣ်.
ယ့ၣ်ၡူးဟ့ၣ်တၢ်အဒိ ဘၣ်ဃးဒီး မုၣ်ကမဲတဂၤလၢ စံၣ်ညီၣ်ကွီၢ် တစံၣ်ညီၣ်န့ၢ်တၢ် လၢအဂီၢ် တီတီလိၤလိၤဘၣ်. ဖဲယ့ၣ်ၡူးတဲပၠးဝဲ အတၢ်မၢဖိတဖၣ် ဘၣ်ဃးဒီး တၢ်အဒိအံၤအခါ အဝဲသ့ၣ် ကနၢ်ပၢၢ်မုၣ်ကမဲအံၤ အတၢ်အိၣ်သး, ခီဖျိလၢ ဖဲန့ၣ်အခါ ပှၤအါဂၤန့ၣ် ပှၤတရ့အဝဲသ့ၣ် တီတီလိၤလိၤဘၣ်. (လူၤ ၁၈:၁-၅) ပဝဲစ့ၢ်ကီး ပထံၣ်ဘၣ် တၢ်တတီတလိၤ စ့ၢ်ကီးအဃိ ပနၢ်ပၢၢ်စၢၤ မုၣ်ကမဲတဂၤအံၤ အတၢ်တူၢ်ဘၣ်သ့.
၂ ဆၢကတီၢ်ခဲအံၤ ပှၤအါတက့ၢ် ထံၣ်ဆံးပှၤဂၤ, တရ့ဒီးပှၤဂၤ ဂ့ၤဂ့ၤဘၣ် ဒီးမၤနၢၤအီၣ်ပှၤဂၤ. အဃိ ဖဲပှၤရ့ပှၤ တတီတလိၤအခါ ပတကမၢကမၣ်ဘၣ်. (စံၣ် ၅:၈) တဘျီတခီၣ် ဒီပုၢ်ဝဲၢ်မုၣ်ခွါတဖၣ် တရ့ပှၤ တီတီလိၤလိၤဘၣ်အဃိ ပသးဘၣ်ဒိဒိၣ်မး. ဘၣ်ဆၣ် ပကဘၣ် သ့ၣ်နီၣ်လၢ အဝဲသ့ၣ်န့ၣ် တကဲပှၤလၢပှၤပှဲၤဘၣ် ဒ်သိးဒီးပှၤ ဒီးတမ့ၢ်လၢ အဝဲသ့ၣ် အဲၣ်ဒိးမၤပှၤဒ်န့ၣ်ဘၣ်. အဒိ ဖဲပှၤထီဒါတၢ်တဖၣ် တရ့ဒီးယ့ၣ်ၡူး တီတီလိၤလိၤဘၣ်အခါ ယ့ၣ်ၡူး မၤက့ၤဝဲ ဒ်လဲၣ်န့ၣ် ပဟံးန့ၢ်တၢ်မၤလိ လၢအအိၣ်သ့အါမး. ပမ့ၢ်ဘၣ်ကွၢ်န့ၣ် ဖဲပှၤတၢ်ချၢတဖၣ် တရ့ပှၤ တီတီလိၤလိၤအခါ ပဝံသးစူၤ အဝဲသ့ၣ်အဃိ ဖဲဒီပုၢ်ဝဲၢ်မုၣ်ခွါတဖၣ် တရ့ပှၤ တီတီလိၤလိၤအခါ ပကြၢးဝံသးစူၤ အဝဲသ့ၣ်အါဒံး. ဖဲပှၤတၢ်ချၢ မ့တမ့ၢ် ဒီပုၢ်ဝဲၢ်မုၣ်ခွါ တဂၤဂၤ တရ့ပှၤ တီတီလိၤလိၤအခါ ယဟိဝၤယွၤ ထံၣ်ဝဲဒ်လဲၣ် ဒီးအတူၢ်ဘၣ်ဝဲဒ်လဲၣ်.
၃. ယဟိဝၤယွၤ ဘၣ်သးလၢ ပှၤကရ့ဒီး အခ့အပှၤဒ်လဲၣ် ဒီးဘၣ်မနုၤအဃိလဲၣ်.
၃ ယဟိဝၤယွၤ ဘၣ်သးလၢ ပှၤကရ့ပှၤ တီတီလိၤလိၤ ဒီးဖဲပှၤတရ့ပှၤ တီတီလိၤလိၤဘၣ်အခါ အထံၣ်ဝဲ. ဒီးလံာ်စီဆှံ တဲဝဲလၢ “ယဟိဝၤယွၤ အဲၣ်တၢ်စံၣ်ညီၣ်တီ.” (စံး ၃၇:၂၈) တကးဒံးဘၣ် ယ့ၣ်ၡူး အၢၣ်လီၤပှၤလၢ ဆၢကတီၢ်မ့ၢ်ဘၣ်န့ၣ် ယဟိဝၤယွၤ “ကစံၣ်ညီၣ်တၢ် တီတီလိၤလိၤလၢ . . . အဆိအချ့.” (လူၤ ၁၈:၇, ၈) ဒီးတယံာ်လၢၤဘၣ်န့ၣ် ယဟိဝၤယွၤ ကမၤလီၤမၢ်ကွံာ် တၢ်နးတၢ်ဖှီၣ် ဒီးတၢ်တတီတလိၤခဲလၢာ် လၢပှၤဟီၣ်ခိၣ်ဖိ ထံၣ်ဘၣ်ဝဲ.—စံး ၇၂:၁, ၂.
၄. ဒ်သိးပလဲၤခီဖျိ တၢ်တတီတလိၤ ကန့ၢ်အဂီၢ် ယဟိဝၤယွၤ မၤစၢၤပှၤဒ်လဲၣ်.
၄ ပခိးကွၢ်လၢ် တၢ်ဆၢကတီၢ်ဖဲ ယဟိဝၤယွၤ ကမၤလီၤမၢ်ကွံာ် တၢ်တတီတလိၤခဲလၢာ်. ဘၣ်ဆၣ် ခဲအံၤ ဒ်သိး ပလဲၤခီဖျိ တၢ်တတီတလိၤ ကန့ၢ်အဂီၢ် ယဟိဝၤယွၤ ကမၤစၢၤပှၤ. (၂ ပ့း ၃:၁၃) ဖဲပထံၣ်ဘၣ် တၢ်တတီတလိၤအခါ ဒ်သိးတၢ်အိၣ်သး တနးထီၣ်တဂ့ၤအဂီၢ် ပကဘၣ်မၤဒ်လဲၣ်န့ၣ် ယဟိဝၤယွၤ သိၣ်လိပှၤ. အဒိ ဖဲပှၤရ့ပှၤ တတီတလိၤအခါ ပကဘၣ်မၤဒ်လဲၣ်န့ၣ် ယဟိဝၤယွၤ သိၣ်လိပှၤ ခီဖျိလၢ အဖိခွါယ့ၣ်ၡူး အဒိအတဲာ်. တကးဒံးဘၣ် ယဟိဝၤယွၤ ဟ့ၣ်ပှၤ တၢ်ဟ့ၣ်ကူၣ်အဂၤ လၢလံာ်စီဆှံအပူၤ.
ဖဲနထံၣ်ဘၣ် တၢ်တတီတလိၤအခါ နမၤဆၢက့ၤတၢ် ဒ်လဲၣ်န့ၣ် ပလီၢ်နသး
၅. ဖဲပှၤရ့ပှၤ တတီတလိၤဘၣ်အခါ ပကဘၣ် ပလီၢ်ပသးဒ်လဲၣ်.
၅ ဖဲပထံၣ်ဘၣ် တၢ်တတီတလိၤအခါ ပသးကဟးဂီၤ ဒီးပသးကဘၣ်ဒိ ဒိၣ်မး. (စံၣ် ၇:၇) ယဟိဝၤယွၤ အခ့အပှၤ လၢအသးတီ ဒ်သိးဒီး စီၤယိၤဘး ဒီးဝံဃဘးကူာ်န့ၣ် အဝဲသ့ၣ် တူၢ်ဘၣ်ဝဲ ဒ်န့ၣ်စ့ၢ်ကီး. (ဘး ၆:၂, ၃; ဃဘး ၁:၁-၃) အဃိ ပဝဲစ့ၢ်ကီး ပကတူၢ်ဘၣ်ဒ်သိးဒီး အဝဲသ့ၣ်. ဘၣ်ဆၣ် ပမၤဆၢက့ၤတၢ် ဒ်လဲၣ်န့ၣ် ပကဘၣ် ပလီၢ်ပသး. ပမ့ၢ်တပလီၢ်ပသးဘၣ်န့ၣ် ပကမၤကမၣ်ဘၣ်တၢ်.
၆. ပန့ၢ်ဘၣ် တၢ်မၤလိလၢ စီၤအးဘၡါလိၣ် အအိၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၆ ပှၤမ့ၢ်ရ့ဒီးပှၤ မ့တမ့ၢ် ပှၤမ့ၢ်ရ့ဒီး ပှၤလၢပအဲၣ်တဖၣ် တတီတလိၤဘၣ်န့ၣ် ပကအဲၣ်ဒိး မၤကၣ်က့ၤအဝဲသ့ၣ်လၢ ပနီၢ်ကစၢ်. ပမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် တၢ်ကီတၢ်ခဲ ကအါထီၣ်. ဆိကမိၣ်ကွၢ် စီၤပၤဒၤဝံး အဖိခွါစီၤအးဘၡါလိၣ်အဂ့ၢ်. ဖဲစီၤအးဘၡါလိၣ် နၢ်ဟူဘၣ်လၢ အဒီပုၢ်ဝဲၢ်ခိၣ်ချၢ စီၤအၤမနိၣ် မၤတရီတပါ အဒ့မုၣ်နီၢ်တၤမၢ်အခါ အသးဒိၣ်ထီၣ်တၢ်ဖးဒိၣ် ဒီးအမၤသံဝဲ စီၤအၤမနိၣ်. စီၤအၤမနိၣ် မၤတရီတပါဝဲ အဒ့မုၣ်အဃိ ပမ့ၢ်ကွၢ်လၢ စီၤမိၤၡ့ အတၢ်သိၣ်တၢ်သီန့ၣ် ပှၤကဘၣ်မၤသံအီၤ. (၃ မိၤ ၂၀:၁၇) စီၤအးဘၡါလိၣ် သးဒိၣ်ထီၣ်တၢ်န့ၣ် ပနၢ်ပၢၢ်သ့, ဘၣ်ဆၣ် အတကြၢးမၤသံ စီၤအၤမနိၣ်ဘၣ်.—၂ မူၤ ၁၃:၂၀-၂၃, ၂၈, ၂၉.
ဖဲပှၤမၤတရီတပါ စီၤအးဘၡါလိၣ် အဒ့မုၣ်နီၢ်တၤမၢ်အခါ စီၤအးဘၡါလိၣ် တပၢၤအသးဘၣ် ဒီးအသးဒိၣ်ထီၣ်တၢ် (ကွၢ်လံာ်အဆၢ ၆)
၇. ဖဲပှၤကွဲးထါ စံးထီၣ်ပတြၢၤတဂၤ ထံၣ်ဘၣ် တၢ်တတီတလိၤအခါ အတူၢ်ဘၣ်ဝဲဒ်လဲၣ်.
၇ ပှၤလၢအမၤတၢ် တတီတလိၤတဖၣ် မ့ၢ်တဒိးန့ၢ်ဘၣ် တၢ်စံၣ်ညီၣ်နီတမံၤဘၣ်န့ၣ် ဘၣ်သ့ၣ်သ့ၣ် ပကဆိကမိၣ်လၢ ပဂုာ်ကျဲးစၢး မၤတၢ်တီတီလိၤလိၤ သနာ်က့ အဘျုးတအိၣ်ဘၣ်. ပှၤကွဲးထါ စံးထီၣ်ပတြၢၤတဂၤ ထံၣ်ဘၣ်ဝဲ ပှၤအၢပှၤသီတဖၣ် မၤနၢၤအီၣ် ပှၤလၢအဂ့ၤ ဘၣ်ဆၣ် ပှၤအၢပှၤသီတဖၣ်န့ၣ် အိၣ်ဘၣ်မုာ်မုာ်. အဃိ အတဲဝဲလၢ “ပှၤအၢပှၤသီတဖၣ်အံၤ အိၣ်ဘၣ် ဘီၣ်ဘီၣ်ညီညီ ထီဘိ.” (စံး ၇၃:၁၂) အထံၣ်ဘၣ် တၢ်တတီတလိၤအဃိ အသးဘၣ်တံာ်တာ်ဒိၣ်မး ဒီးအတူၢ်ဘၣ်ဝဲလၢ အမၤကစၢ်ယွၤ အတၢ်မၤ သနာ်က့ အဘျုးတအိၣ်ဘၣ်. အတဲဝဲလၢ “ဖဲယဂုာ်ကျဲးစၢး ဒ်သိးဒီးယကနၢ်ပၢၢ် တၢ်ဂ့ၢ်တခါအံၤအခါ ယသးဘၣ်တံာ်တာ်ဒိၣ်မး.” (စံး ၇၃:၁၄, ၁၆) အသးဘၣ်တံာ်တာ် တုၤဒၣ်လဲာ် အတဲဝဲလၢ “မ့မ့ၢ်ယၤန့ၣ် ယဘူးကလဲၤကမၣ်ကျဲ ဒီးယခီၣ် ဘူးကတပျာ်” ညါ. (စံး ၇၃:၂) ဒီပုၢ်ဝဲၢ်ခွါအဲၤဘၢဒိၤန့ၣ် အလဲၤခီဖျိဘၣ်ဝဲဒ်န့ၣ်စ့ၢ်ကီး.
၈. ဖဲဒီပုၢ်ဝဲၢ်ခွါအဲၤဘၢဒိၤ ထံၣ်ဘၣ်ဒီး တၢ်တတီတလိၤအခါ အမၤဝဲဒ်လဲၣ် ဒီးတၢ်လၢအမၤဝဲန့ၣ် မၤဘၣ်ဒိအီၤဒ်လဲၣ်.
၈ ဒီပုၢ်ဝဲၢ်ခွါအဲၤဘၢဒိၤန့ၣ် ဒီပုၢ်ဝဲၢ်လၢ တၢ်အိၣ်ဖှိၣ်ပူၤတနီၤ ဆိကမိၣ်ကမၣ်အီၤ ဒီးတဲလၢ အဟုၣ် တၢ်အိၣ်ဖှိၣ်အစ့. အဃိ အတကဲဘၣ် တၢ်အိၣ်ဖှိၣ်သးပှၢ်လၢၤဘၣ် ဒီးဒီပုၢ်ဝဲၢ်အါဂၤ လၢတၢ်အိၣ်ဖှိၣ်ပူၤန့ၣ် တပာ်ကဲအီၤ ဒီးနာ်န့ၢ်အီၤလၢၤဘၣ်. ဒီပုၢ်ဝဲၢ်ခွါအဲၤဘၢဒိၤ တဲဝဲလၢ “ယသးဒိၣ်ထီၣ်တၢ် ဒီးယသးဟးဂီၤ ဒိၣ်မး.” ဒီပုၢ်ဝဲၢ်ခွါအံၤ အသးဟးဂီၤ ဒီးအတလဲၤထီၣ် တၢ်အိၣ်ဖှိၣ်လၢၤဘၣ် ဒီးအတဟး စံၣ်တဲၤတဲလီၤတၢ်ဘၣ်န့ၣ် အိၣ်ဝဲယဲၢ်နံၣ်ညါ. တၢ်လဲၤခီဖျိတခါအံၤ ပာ်ဖျါထီၣ်န့ၢ်ပှၤလၢ ဖဲပှၤရ့ပှၤ တတီတလိၤဘၣ်အခါ ပမ့ၢ်တပၢၤပသးဘၣ်န့ၣ် တၢ်ကကဲထီၣ်သးဒီးပှၤဒ်အံၤ.
ပလဲၤခီဖျိ တၢ်တတီတလိၤ ကန့ၢ်အဂီၢ် ပကွၢ်လိ ယ့ၣ်ၡူးကသ့ဒ်လဲၣ်
၉. ယ့ၣ်ၡူးထံၣ်ဘၣ်ဒီး တၢ်တတီတလိၤဒ်လဲၣ်. (ကွၢ်စ့ၢ်ကီးတၢ်ဂီၤ.)
၉ ဒ်သိး ပလဲၤခီဖျိ တၢ်တတီတလိၤ ကန့ၢ်အဂီၢ် ယ့ၣ်ၡူးပာ်လီၤန့ၢ်ပှၤ အဒိအတဲာ် ဂ့ၤဒိၣ်မး. ယ့ၣ်ၡူးန့ၣ် အဟံၣ်ဖိဃီဖိ ဒီးပှၤအဂၤ တရ့အီၤတီတီလိၤလိၤဘၣ်. ဒီးအဘူးအတံၢ်လၢ တစူၢ်က့ၤနာ်က့ၤတၢ်တဖၣ်န့ၣ် ဆိကမိၣ်ကမၣ်အီၤ ဒီးတဲအီၤလၢ အပျုၢ်လံ. တကးဒံးဘၣ် တၢ်ဘူၣ်တၢ်ဘါ ခိၣ်နၢ်တဖၣ် တဲအီၤလၢ အမၤသကိးတၢ်ဒီး တၢ်ဝံတၢ်နါ. မ့မ့ၢ်လၢ ရိမ့ၤအသုးဖိတဖၣ်န့ၣ် မၤမဲာ်ဆှးအီၤ, ထိအီၤတီၢ်အီၤ ဒီးလၢခံမၤသံအီၤ. (မၢ် ၃:၂၁, ၂၂; ၁၄:၅၅; ၁၅:၁၆-၂၀, ၃၅-၃၇) ယ့ၣ်ၡူးထံၣ်ဘၣ်ဒီး တၢ်တတီတလိၤအါမး သနာ်က့ အတမၤဆၢက့ၤတၢ် အၢအၢသီသီ နီတဘျီဘၣ်. ပဟံးန့ၢ်တၢ်မၤလိလၢ ယ့ၣ်ၡူးအဒိအတဲာ် ကသ့ဒ်လဲၣ်.
ဖဲပှၤရ့ပှၤ တတီတလိၤဘၣ်အခါ ပကဘၣ်မၤဒ်လဲၣ်န့ၣ် ယ့ၣ်ၡူး ပာ်လီၤန့ၢ်ပှၤ တၢ်ဒိတၢ်တဲာ် လၢအဂ့ၤဒိၣ်မး (ကွၢ်လံာ်အဆၢ ၉-၁၀)
၁၀. ယ့ၣ်ၡူး လဲၤခီဖျိ တၢ်တတီတလိၤ န့ၢ်ဝဲဒ်လဲၣ်. (၁ ပ့းတရူး ၂:၂၁-၂၃)
၁၀ ဖး ၁ ပ့းတရူး ၂:၂၁-၂၃. a ဖဲပထံၣ်ဘၣ် တၢ်တတီတလိၤအခါ ပကဘၣ်မၤဒ်လဲၣ်န့ၣ် ယ့ၣ်ၡူး ပာ်လီၤန့ၢ်ပှၤ အဒိအတဲာ်လၢအဂ့ၤ. ယ့ၣ်ၡူးန့ၣ် ဖဲအကြၢးအိၣ်ဘှ့ၣ်အခါ အအိၣ်ဘှ့ၣ် ဒီးဖဲအဘၣ်တဲတၢ်အခါ အတဲတၢ်. (မး ၂၆:၆၂-၆၄) ဒီးယ့ၣ်ၡူးန့ၣ် ပှၤပာ်ဒ့ၣ်ပာ်ကမၣ်အီၤလၢ တၢ်ဂ့ၢ်အါမံၤ ဘၣ်ဆၣ် အတတဲဆၢက့ၤဝဲ ခဲလၢာ်ဘၣ်. (မး ၁၁:၁၉) အမ့ၢ်ဘၣ်တဲတၢ်န့ၣ် အတတဲဆါတၢ် ဒီးအတတဲပျံၤ ပှၤလၢအမၤအၢမၤနးအီၤဘၣ်. ယ့ၣ်ၡူး ပၢၤအသးန့ၢ်ဝဲ ခီဖျိလၢအ “အးလီၤအသးလၢ ပှၤလၢအစံၣ်ညီၣ်တၢ် တီတီလိၤလိၤတဂၤန့ၣ် အစုပူၤ.” ယ့ၣ်ၡူးနာ်ဝဲလၢ ပှၤရ့ဒီးအီၤ တတီတလိၤဘၣ်န့ၣ် ယဟိဝၤယွၤ ထံၣ်ဝဲခဲလၢာ် ဒီးတၢ်ဆၢကတီၢ်မ့ၢ်ဘၣ်န့ၣ် ယဟိဝၤယွၤ ကမၤလီၤမၢ်ကွံာ် တၢ်တတီတလိၤ ခဲလၢာ်.
၁၁. ပကဘၣ်အိၣ်ဘှ့ၣ် လၢအခါဖဲလဲၣ် ဒီးဖဲပတဲတၢ်အခါ ပကဘၣ် တဲတၢ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၁ ဖဲပှၤရ့ပှၤ တတီတလိၤအခါ ပကွၢ်လိ ယ့ၣ်ၡူး သ့ခီဖျိ ပပလီၢ်သး ဘၣ်ဃးဒီး တၢ်လၢပတဲ. တၢ်တတီတလိၤ တနီၤလၢ ပထံၣ်ဘၣ်န့ၣ် အကဲဝဲ တၢ်ဂ့ၢ်ဆံးဆံးဖိအဃိ ဒ်သိး တၢ်အိၣ်သး တနးထီၣ်တဂ့ၤအဂီၢ် ပကွၢ်ကပာ်ကွံာ်အီၤသ့ မ့တမ့ၢ် ပအိၣ်ဘှ့ၣ်သ့. (စံၣ် ၃:၇; ယၤ ၁:၁၉, ၂၀) ဒီးတဘျီတခီၣ်န့ၣ် ဖဲပထံၣ်ဘၣ် ပှၤတဂၤ လဲၤခီဖျိဘၣ် တၢ်တတီတလိၤအခါ ပကဘၣ်တဲန့ၢ်တၢ် လၢအဂီၢ်. မ့တမ့ၢ် ဖဲပှၤသံကွၢ်ပှၤ ပတၢ်စူၢ်တၢ်နာ်အခါ ပကဘၣ်တဲတၢ်စ့ၢ်ကီး. (မၤတၢ် ၆:၁, ၂) ဒီးဖဲပတဲတၢ်အခါ ပကဘၣ် ဂုာ်ကျဲးစၢး တဲတၢ်မုာ်မုာ် ဒီးတဲတၢ်လၢတၢ်ပာ်ကဲ.—၁ ပ့း ၃:၁၅. b
ဖဲပှၤရ့ပှၤ တတီတလိၤဘၣ်အခါ ပကွၢ်လိယ့ၣ်ၡူး သ့ခီဖျိ ပဆၢတဲာ်လီၤသးလၢ ပကတဲတၢ်လၢ အခါဖဲလဲၣ် ဒီးပကတဲတၢ်ဒ်လဲၣ် (ကွၢ်လံာ်အဆၢ ၁၁-၁၂)
၁၂. ပအးလီၤ တၢ်ခဲလၢာ်လၢ “ပှၤလၢအစံၣ်ညီၣ်တၢ် တီတီလိၤလိၤတဂၤန့ၣ် အစုပူၤ” ကသ့ဒ်လဲၣ်.
၁၂ ပကွၢ်လိယ့ၣ်ၡူး လၢကျဲအဂၤ သ့ခီဖျိ ပအးလီၤ တၢ်ခဲလၢာ်လၢ “ပှၤလၢအစံၣ်ညီၣ်တၢ် တီတီလိၤလိၤတဂၤန့ၣ် အစုပူၤ.” ဖဲပှၤဂၤ ဆိကမိၣ်ကမၣ်ပှၤ မ့တမ့ၢ် တရ့ပှၤ တီတီလိၤလိၤအခါ ပနာ်လၢ ယဟိဝၤယွၤ သ့ၣ်ညါဝဲ တၢ်ကဲထီၣ်သးခဲလၢာ်. ဒီးပသ့ၣ်ညါလၢ အခါမ့ၢ်ဘၣ်န့ၣ် ယဟိဝၤယွၤ ကမၤဂ့ၤထီၣ်က့ၤ တၢ်အိၣ်သးအဃိ မၤစၢၤပှၤလၢ ပကဆဲးအိၣ်ဒီး တၢ်တူၢ်န့ၢ်ခီၣ်ကဲ. ဖဲပထံၣ်ဘၣ် တၢ်တတီတလိၤအခါ ပမ့ၢ်နာ်န့ၢ် ယဟိဝၤယွၤ ဒီးအိၣ်ခိးလၢ အကမၤဘၣ်ဂီၢ်န့ၢ်ပှၤ တၢ်ဂ့ၢ်ကီန့ၣ် ပတဆဲးသးဒိၣ်ထီၣ်တၢ် ဒီးတစၢဃာ် ပှၤတၢ်ကမၣ်ဘၣ်. ပမ့ၢ်ဆဲးသးဒိၣ်ထီၣ်တၢ်န့ၣ် ပကမၤကမၣ်ဘၣ်တၢ်, ပတသးခု အါအါလၢၤဘၣ် ဒီးပတၢ်ရ့လိာ်သးဒီး ယဟိဝၤယွၤ တဂ့ၤလၢၤဘၣ်.—စံး ၃၇:၈.
၁၃. ဖဲပထံၣ်ဘၣ် တၢ်တတီတလိၤအခါ ဒ်သိး ပလဲၤခီဖျိ ကန့ၢ်အဂီၢ် တၢ်မနုၤ ကမၤစၢၤပှၤလဲၣ်.
၁၃ ပတကဲ ပှၤလၢပှၤပှဲၤဘၣ်အဃိ ပကွၢ်လိယ့ၣ်ၡူး ဒီးမၤထွဲ အဒိအတဲာ် တန့ၢ်လၢလၢပှဲၤပှဲၤဘၣ်. တဘျီတခီၣ် ပကမၤကမၣ်ဘၣ်တၢ် ဒီးတဲဘၣ်တၢ်လၢ ပတကြၢးတဲဘၣ်. (ယၤ ၃:၂) ဒီးတဘျီတခီၣ်န့ၣ် ပှၤတရ့ပှၤ တီတီလိၤလိၤဘၣ်အဃိ ပသးကဟးဂီၤ တုၤလၢ ပတူၢ်တကဲလၢၤဘၣ်. တၢ်မ့ၢ်ကဲထီၣ်သးဒီးနၤ ဒ်န့ၣ်န့ၣ် နာ်သပှၢ်တၢၢ်လၢ ယဟိဝၤယွၤ နၢ်ပၢၢ်ဝဲ နတၢ်တူၢ်ဘၣ်. တကးဒံးဘၣ် ယ့ၣ်ၡူး အနီၢ်ကစၢ်စ့ၢ်ကီး ထံၣ်ဘၣ်ဝဲ တၢ်တတီတလိၤအဃိ နတူၢ်ဘၣ် ဒ်န့ၣ်န့ၣ် အနၢ်ပၢၢ်စၢၤနၤသ့. (ဧ့ၤ ၄:၁၅, ၁၆) ဒ်သိး ပလဲၤခီဖျိ တၢ်တတီတလိၤ ကန့ၢ်အဂီၢ် ယဟိဝၤယွၤ ပာ်ဖျါန့ၢ်ပှၤ ယ့ၣ်ၡူးအဒိအတဲာ် တကးဒံးဘၣ် အဟ့ၣ်စ့ၢ်ကီးပှၤ တၢ်ဟ့ၣ်ကူၣ်အဂၤ လၢကမၤစၢၤပှၤ. ခဲအံၤ ပကတဲသကိး လံာ်စီဆှံအဆၢ ခံဆၢလၢ လံာ်ရိမ့ၤအပူၤ.
“အးလီၤလၢ ကစၢ်ယွၤအစုပူၤလၢ အကပာ်ဖျါထီၣ် အတၢ်သးဒိၣ်”
၁၄. ပ “အးလီၤ” တၢ်သးဒိၣ်လၢ ယဟိဝၤယွၤ အစုပူၤန့ၣ် အဲၣ်ဒိးတဲဝဲ မနုၤလဲၣ်. (ရိမ့ၤ ၁၂:၁၉)
၁၄ ဖး ရိမ့ၤ ၁၂:၁၉. တၢ်မၢဖိပီလူး ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါလၢ က “အးလီၤလၢ ကစၢ်ယွၤအစုပူၤလၢ အကပာ်ဖျါထီၣ် အတၢ်သးဒိၣ်.” ပအးလီၤတၢ်သးဒိၣ်လၢ ယဟိဝၤယွၤ အစုပူၤခီဖျိ ပပျဲလၢ အကမၤဘၣ်ဂီၢ်က့ၤ တၢ်ဂ့ၢ်ကီ ဒ်တၢ်ဆၢကတီၢ်လၢ အပာ်ပနီၣ်ဝဲအသိး. ဒီပုၢ်ဝဲၢ်ကၠီ လၢပှၤတရ့အီၤ တီတီလိၤလိၤဘၣ်န့ၣ် အတဲဝဲလၢ “ဒ်သိး ယတမၤကမၣ်ဘၣ်တၢ် တဂ့ၤအဂီၢ် ယဘၣ်ပၢၤယသးသပှၢ် ဒီးအတညီ နီတစဲးဘၣ်. ရိမ့ၤ ၁၂:၁၉ မၤစၢၤယၤ ဒ်သိး ယကနာ်န့ၢ် ယဟိဝၤယွၤ ဒီးဆဲးအိၣ်ခိးအီၤ.”
၁၅. ပမ့ၢ်ပျဲလၢ ယဟိဝၤယွၤ ကမၤဘၣ်ဂီၢ်က့ၤ ပတၢ်ဂ့ၢ်ကီန့ၣ် ဘၣ်မနုၤအဃိ အဂ့ၤဒိၣ်လဲၣ်.
၁၅ ပမ့ၢ်အိၣ်ခိး ယဟိဝၤယွၤ ဒီးပျဲလၢ အကမၤဘၣ်ဂီၢ်က့ၤ ပတၢ်ဂ့ၢ်ကီန့ၣ် ကဂ့ၤဒိၣ်ဒံး. ဖဲပမၤဒ်န့ၣ်အခါ ပတတူၢ်ဘၣ် တၢ်ဝံဃၢလၢ အကဲဝဲ တၢ်သးဟးဂီၤ အါအါဘၣ်. ယဟိဝၤယွၤ အဲၣ်ဒိးမၤစၢၤပှၤ ဒီးလီၤဂာ်ဒ်သိး အတဲပှၤလၢ ‘အိၣ်ခိးယၤ, ယကမၤဘၣ်ဂီၢ်က့ၤ နတၢ်ဂ့ၢ်ကီ.’ ပမ့ၢ်နာ်န့ၢ် ယဟိဝၤယွၤ အတၢ်အၢၣ်လီၤလၢအ “ကဟ့ၣ်ကၣ်တၢ်” လၢပဂီၢ်န့ၣ် ပတလိၣ် သးဟးဂီၤဘၣ် ဒီးပနာ်သ့ သပှၢ်တၢၢ်လၢ အကစံၣ်ညီၣ်တၢ် တီတီလိၤလိၤထီဘိ. ဒီပုၢ်ဝဲၢ်ခွါကၠီ လၢပတဲအဂ့ၢ် ဖဲမကၢာ်န့ၣ် အနာ်ဝဲ ဒ်န့ၣ်စ့ၢ်ကီး. အတဲဝဲလၢ “ယမ့ၢ်အးလီၤ ယတၢ်ဂ့ၢ်ကီ လၢယဟိဝၤယွၤ အစုပူၤ ဒီးအိၣ်ခိးလၢ အကမၤဘၣ်ဂီၢ်န့ၢ်ယၤန့ၣ် အဂ့ၤဒိၣ်န့ၢ်ဒံး ယမၤလၢ ယနီၢ်ကစၢ်.”
“ဆဲးမၤနၢၤတၢ်အၢလၢ တၢ်ဂ့ၤ”
၁၆-၁၇. တၢ်ဃ့ထုကဖၣ်န့ၣ် ကမၤစၢၤပှၤလၢ ပက “ဆဲးမၤနၢၤတၢ်အၢလၢ တၢ်ဂ့ၤ” ဒ်လဲၣ်. (ရိမ့ၤ ၁၂:၂၁)
၁၆ ဖး ရိမ့ၤ ၁၂:၂၁. စီၤပီလူး ဟ့ၣ်ဂံၢ်ဟ့ၣ်ဘါစ့ၢ်ကီး ဒီပုၢ်ဝဲၢ်မုၣ်ခွါလၢက “ဆဲးမၤနၢၤတၢ်အၢလၢ တၢ်ဂ့ၤ.” ဖဲယ့ၣ်ၡူး စံၣ်တဲၤတဲလီၤတၢ်လၢ ကစၢၢ်ခိၣ်အခါ အတဲဝဲလၢ “ဆဲးအဲၣ်သုဒုၣ်သုဒါတက့ၢ်. ဒီးပှၤလၢ အမၤအၢမၤနးသုန့ၣ် ဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်တက့ၢ်.” (မး ၅:၄၄) ပထံၣ်ဘၣ်လၢ ယ့ၣ်ၡူး မၤဝဲဒ်သိးဒီး အတဲဝဲ. ဆိကမိၣ်ကွၢ် ဖဲရိမ့ၤသုးဖိတဖၣ် ပျၤထီယ့ၣ်ၡူးလၢ သ့ၣ်တၢၣ်လိၤအခါ အကတူၢ်ဘၣ်တၢ်နးမး. ပှၤမၤမဲာ်ဆှးအီၤ ဒီးပှၤမၤအၢမၤနးအီၤအဃိ အကတူၢ်ဘၣ်တၢ် နးထဲလဲၣ်န့ၣ် ပဆိကမိၣ်မးတဘၣ်ဘၣ်.
၁၇ ယ့ၣ်ၡူး ထံၣ်ဘၣ် တၢ်မၤအၢမၤနး နးမးဘၣ်ဆၣ် အပာ်ဖျါထီၣ်တၢ်အဲၣ် လၢပှၤဂၤအဖီခိၣ် ဒီးဆဲးတီဒီး ယဟိဝၤယွၤ. အတမၤကၣ်က့ၤ ရိမ့ၤသုးဖိတဖၣ်ဘၣ်, ဘၣ်ဆၣ် အဃ့ထုကဖၣ် ဒီးတဲဝဲလၢ “ပါဧၢ, အဝဲသ့ၣ် မၤမနုၤလဲၣ်န့ၣ် တသ့ၣ်ညါဝဲဘၣ်အဃိ ပျၢ်အဝဲသ့ၣ် အတၢ်ကမၣ်တက့ၢ်.” (လူၤ ၂၃:၃၄) ပမ့ၢ် ဃ့ထုကဖၣ်န့ၢ်တၢ်လၢ ပှၤလၢတရ့ဒီးပှၤ တီတီလိၤလိၤဘၣ် အဂီၢ်န့ၣ် ကမၤစၢၤပှၤလၢ ပကပာ်ပသးမုာ်မုာ် ဒီးပတသးဒိၣ်ထီၣ်တၢ်ဘၣ်. ဒီးပကအိၣ်ဒီး တၢ်ထံၣ်လၢအဂ့ၤ လၢအဝဲသ့ၣ်ဖီခိၣ်.
၁၈. ဒီပုၢ်ဝဲၢ်ခွါအဲၤဘၢဒိၤ ဒီးဒီပုၢ်ဝဲၢ်ခွါကၠီ ထံၣ်ဘၣ် တၢ်တတီတလိၤ ဘၣ်ဆၣ် တၢ်ဃ့ထုကဖၣ် မၤစၢၤ အဝဲသ့ၣ်ဒ်လဲၣ်.
၁၈ ဒီပုၢ်ဝဲၢ်ခွါခံဂၤ လၢပတဲသကိးအဂ့ၢ်န့ၣ် ဒ်သိး အဝဲသ့ၣ် လဲၤခီဖျိ တၢ်တတီတလိၤ လၢအထံၣ်ဘၣ်ဝဲ ကန့ၢ်အဂီၢ် တၢ်ထုကဖၣ် မၤစၢၤအဝဲသ့ၣ်. ဒီပုၢ်ဝဲၢ်ခွါအဲၤဘၢဒိၤ တဲဝဲလၢ “ဒီပုၢ်ဝဲၢ်တဖၣ်လၢ တရ့ယၤ တီတီလိၤလိၤဘၣ်န့ၣ် ယဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်. ဒီးဒ်သိး တၢ်လၢအကဲထီၣ်သးလၢ အပူၤကွံာ်န့ၣ် တမၤဘၣ်ဒိ ယသးတဂ့ၤအဂီၢ် ယဃ့ ယဟိဝၤယွၤလၢ ကမၤစၢၤယၤ တဘျုးဘျီညါ.” ခဲအံၤ ဒီပုၢ်ဝဲၢ်ခွါအဲၤဘၢဒိၤ မၤက့ၤ ယဟိဝၤယွၤ အတၢ်မၤ ဒီးတီဒီးအီၤ. ဒီပုၢ်ဝဲၢ်ခွါကၠီ တဲဝဲလၢ “ယဃ့ထုကဖၣ်န့ၢ်တၢ်လၢ ဒီပုၢ်ဝဲၢ်တဂၤလၢ အမၤဘၣ်ဒိယသးအဂီၢ်. ယမၤဒ်န့ၣ်အဃိ မၤစၢၤယၤလၢ ယကပျၢ် အတၢ်ကမၣ် ဒီးတသးထီၣ်အီၤလၢၤဘၣ်. တၢ်ဃ့ထုကဖၣ်န့ၣ် မၤစၢၤယၤလၢ ယကပာ်သးမုာ်မုာ်.”
၁၉. တချုးလၢ တၢ်အကတၢၢ် ဟဲတုၤဒံးဘၣ်န့ၣ် ပကဘၣ်ဆဲးမၤ မနုၤလဲၣ်. (၁ ပ့းတရူး ၃:၈, ၉)
၁၉ တချုးလၢ တၢ်အကတၢၢ် ဟဲတုၤဒံးဘၣ်န့ၣ် ပကထံၣ်ဘၣ် တၢ်တတီတလိၤဒံး. ပမ့ၢ်ထံၣ်ဘၣ် တၢ်အိၣ်သး ဒ်လဲၣ်ဒ်လဲၣ် သနာ်က့ ပကဘၣ် ဆဲးဃ့ထုကဖၣ်လၢ ယဟိဝၤယွၤ ကမၤစၢၤပှၤ. ဒီးပကဘၣ် ဆဲးကွၢ်လိ ယ့ၣ်ၡူး အဒိအတဲာ် ဖဲပှၤရ့အီၤ တတီတလိၤဘၣ်အခါ ဒီးဆဲးမၤထွဲ တၢ်ဟ့ၣ်ကူၣ်လၢ လံာ်စီဆှံအပူၤ. ပမ့ၢ်မၤဒ်န့ၣ်န့ၣ် ပနာ်သ့ သပှၢ်တၢၢ်လၢ ယဟိဝၤယွၤ ကဆိၣ်ဂ့ၤပှၤ.—ဖး ၁ ပ့းတရူး ၃:၈, ၉.
တၢ်သးဝံၣ် ၃၈ ကစၢ်ကမၤဆူၣ်ထီၣ် နဂံၢ်ဘါ
a ဖဲ ၁ ပ့းတရူး အဆၢဒိၣ် ၂ ဒီး ၃ န့ၣ် တၢ်မၢဖိပ့းတရူး တဲဝဲဘၣ်ဃးဒီး ခရံာ်ဖိလၢ တၢ်မၢဖိအစိၤတဖၣ်န့ၣ် အတၢ်မၤကစၢ် တရ့အီၤ တီတီလိၤလိၤဘၣ် ဒီးမ့မ့ၢ် ဒီပုၢ်ဝဲၢ်မုၣ်တနီၤန့ၣ် အဝၤတရ့အီၤ တီတီလိၤလိၤဘၣ်.—၁ ပ့း ၂:၁၈-၂၀; ၃:၁-၆, ၈, ၉.
b ကွၢ်တၢ်ဂီၤမူ လၢအခိၣ်တီမ့ၢ် တၢ်အဲၣ်န့ၣ် ဒုးအိၣ်ထီၣ်တၢ်ဃူတၢ်ဖိးနီၢ်ကီၢ် လၢ jw.org အပူၤ.
