၁. လၢညါမ့ၢ်ဂ့ၤ ခဲအံၤမ့ၢ်ဂ့ၤ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် အဝဲသ့ၣ် ပာ်ဖျါထီၣ် တၢ်ပာ်သူၣ်ပာ်သး လၢအဂ့ၤဒ်လဲၣ်.

 နပာ်လုၢ်ပာ်ပှ့ၤ နတၢ်ရ့လိာ်သးဒီး ယဟိဝၤယွၤဧါ. ပသ့ၣ်ညါလၢ နပာ်လုၢ်ပာ်ပှ့ၤ သပှၢ်တၢၢ်. ဒီးပှၤအဂၤစ့ၢ်ကီး ပာ်လုၢ်ပာ်ပှ့ၤဝဲ. အဒိ ပမ့ၢ်ကွၢ်က့ၤ လၢအပူၤကွံာ်န့ၣ် ပှၤအါဂၤ ပာ်လုၢ်ပာ်ပှ့ၤဝဲ အတၢ်ရ့လိာ်သးဒီး ယဟိဝၤယွၤ. (စံး ၁၀၄:၃၃, ၃၄) ဒီးပှၤအါဂၤန့ၣ် အဝဲသ့ၣ်သးအိၣ် ဟ့ၣ်လီၤအသးလၢ တၢ်ဘူၣ်ထီၣ်ဘါထီၣ် ယဟိဝၤယွၤအဂီၢ် သပှၢ်တၢၢ်. ပှၤအံၣ်စရ့လးဖိလၢညါ လၢအကဲ ပှၤနစၤရံဖိတဖၣ်န့ၣ် အဝဲသ့ၣ်မၤဝဲဒ်န့ၣ်. ပှၤနစၤရံဖိတဖၣ်န့ၣ် အဝဲသ့ၣ်ကဲ မတဂၤလဲၣ် ဒီးပန့ၢ်ဘၣ် တၢ်မၤလိလၢ အဝဲသ့ၣ်အအိၣ် ဒ်လဲၣ်.

၂. (က) ပှၤနစၤရံဖိတဖၣ်န့ၣ် အကဲဝဲ မတဂၤသ့ၣ်လဲၣ်. (၄ မိၤၡ့ ၆:၁, ၂) (ခ) ဘၣ်မနုၤအဃိ ပှၤအံၣ်စရ့လးဖိတနီၤ ဆၢတဲာ်လီၤအသးလၢ အကအိၣ်မူ ဒ်ပှၤနစၤရံဖိအသိးလဲၣ်.

^၂ တၢ်ကတိၤ “နစၤရံ” တဖျၢၣ်အံၤ လၢဧ့ၤဘြံၤကျိာ်န့ၣ် အခီပညီမ့ၢ်ဝဲ “ပှၤလၢ အဘၣ်တၢ်ဃုထၢအီၤ,” “ပှၤလၢ အဘၣ်တၢ်ပာ်လီၤဆီအီၤ” မ့တမ့ၢ် “ပှၤလၢအဟ့ၣ်လီၤအသး.” ပှၤနစၤရံဖိန့ၣ် အကဲဝဲ ပှၤအံၣ်စရ့လးဖိလၢ အသးဆူၣ် ဒီးအဟ့ၣ်လီၤအသး လီၤလီၤဆီဆီ လၢကမၤ ယဟိဝၤယွၤ အတၢ်မၤ. ဒီးလၢစီၤမိၤၡ့ အတၢ်သိၣ်တၢ်သီအပူၤန့ၣ် ပိာ်ခွါမ့ၢ်ဂ့ၤ ပိာ်မုၣ်မ့ၢ်ဂ့ၤ မၤတၢ်အၢၣ်လီၤ လီၤလီၤဆီဆီလၢ ကအိၣ်မူဒ်ပှၤနစၤရံဖိလၢ ယဟိဝၤယွၤအဂီၢ် တတီၤဖိသ့. a (ဖး ၄ မိၤၡ့ ၆:၁, ၂.) ဒီးဖဲပှၤအံၣ်စရ့လးဖိတဂၤ မၤတၢ်အၢၣ်လီၤလၢ အကအိၣ်မူဒ် ပှၤနစၤရံဖိအခါ အကဘၣ်မၤထွဲဝဲ တၢ်သိၣ်တၢ်သီလၢ ပှၤအံၣ်စရ့လးဖိ လၢအဂၤတဖၣ် တလိၣ်မၤထွဲဝဲဘၣ်. မ့မ့ၢ်ဒ်န့ၣ်န့ၣ် ဘၣ်မနုၤအဃိ ပှၤအံၣ်စရ့လးဖိတဂၤ မၤတၢ်အၢၣ်လီၤလၢ အကအိၣ်မူ ဒ်ပှၤနစၤရံဖိအသိးလဲၣ်. အမၤတၢ်အၢၣ်လီၤဒ်န့ၣ် ဘၣ်သ့ၣ်သ့ၣ်  ခီဖျိလၢ အအဲၣ်ယဟိဝၤယွၤဒိၣ်မး ဒီးအအဲၣ်ဒိး စံးဘျုးက့ၤ ယဟိဝၤယွၤ ခီဖျိလၢ ယဟိဝၤယွၤ ဆိၣ်ဂ့ၤအီၤအါမးအဃိ.—၅ မိၤ ၆:၅; ၁၆:၁၇.

၃. ကစၢ်ယွၤအခ့အပှၤ လၢဆၢကတီၢ်ခဲအံၤန့ၣ် အဝဲသ့ၣ်လီၤဂာ်ဒီး ပှၤနစၤရံဖိဒ်လဲၣ်.

^၃ ဖဲ “ခရံာ်အတၢ်သိၣ်တၢ်သီ” မၤကတၢၢ်ကွံာ် စီၤမိၤၡ့ အတၢ်သိၣ်တၢ်သီအခါ တၢ်ရဲၣ်တၢ်ကျဲၤလၢ ပှၤကမၤတၢ်အၢၣ်လီၤ လၢကအိၣ်မူဒ် ပှၤနစၤရံဖိအသိးန့ၣ် တအိၣ်လၢၤဘၣ်. (ကလၤ ၆:၂; ရိ ၁၀:၄) သနာ်က့ ဒ်ပှၤနစၤရံဖိအသိး ပဝဲယဟိဝၤယွၤအခ့အပှၤ လၢဆၢကတီၢ်ခဲအံၤန့ၣ် ပဆဲးပာ်ဖျါထီၣ် တၢ်သးဆူၣ်လၢ ပကမၤယဟိဝၤယွၤအတၢ်မၤ လၢပသးဒီဖျၢၣ်, လၢပတၢ်အိၣ်မူ ကိးသနၢၣ်ဒဲးအပူၤ, လၢပတၢ်ကူၣ်တၢ်ဆး ဒီးလၢပဂံၢ်ပဘါခဲလၢာ်. (မၢ် ၁၂:၃၀) ဒီးဖဲပဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်အခါ မ့ၢ်ဝဲပအၢၣ်လီၤအီၤလၢ ပကမၤဒ်န့ၣ်. အဃိ ဒ်သိး ပကမၤလၢပှဲၤထီၣ် ပတၢ်အၢၣ်လီၤတခါန့ၣ်အဂီၢ် ပကဘၣ်မၤ ယဟိဝၤယွၤ အတၢ်ဘၣ်သး ဒီးသးအိၣ်ဟ့ၣ်လီၤပသး. ဒီးဖဲပမၤလိသကိး ပှၤနစၤရံဖိ မၤလၢပှဲၤထီၣ် အတၢ်အၢၣ်လီၤအခါ ကမၤစၢၤပှၤဒ်သိး ပကမၤလၢပှဲၤထီၣ် ပတၢ်အၢၣ်လီၤစ့ၢ်ကီး. b (မး ၁၆:၂၄) ခဲအံၤ ပကကွၢ်သကိး တၢ်အဒိတနီၤ.

သးအိၣ်တူၢ်ဆါသး

၄. ဒ် ၄ မိၤၡ့ ၆:၃, ၄ ပာ်ဖျါထီၣ်ဝဲအသိး ပှၤနစၤရံဖိ သးအိၣ်တူၢ်ၡူကွံာ် မနုၤလဲၣ်.

^၄ ဖး ၄ မိၤၡ့ ၆:၃, ၄. ပှၤနစၤရံဖိန့ၣ် အဝဲသ့ၣ် ဘၣ်ဟးဆှဲး စပံးထံ ဒီးတၢ်ထံတၢ်နိလၢ အပၣ်ဃုာ်ဒီးသံး ဒီးအဝဲသ့ၣ် တဘၣ်အီၣ်ဝဲစပံးသၣ် ဒီးစပံးသၣ်အဃ့ဘၣ်. ပှၤအံၣ်စရ့လးဖိ လၢအဂၤတဖၣ် အီၣ်ဝဲအီဝဲ တၢ်အီၣ်တၢ်အီတဖၣ်အံၤသ့ ဒီးတၢ်အီၣ်တၢ်အီတဖၣ်အံၤ တမ့ၢ်တၢ်လၢအကမၣ်ဘၣ်. တကးဒံးဘၣ် “စပံးထံလၢ အမၤဖှံထီၣ်ပှၤသး” န့ၣ်လံာ်စီဆှံ တဲဝဲလၢ အကဲဝဲ တၢ်ဟ့ၣ်လၢ အဟဲလၢ ယဟိဝၤယွၤအအိၣ်. (စံး ၁၀၄:၁၄, ၁၅) တၢ်အီၣ်တၢ်အီတဖၣ်အံၤ အမၤသးခုပှၤသး သနာ်က့ ပှၤနစၤရံဖိ သးအိၣ်တူၢ်ၡူကွံာ် တၢ်ခွဲးတၢ်ယာ်အံၤ ဒီးတအီၣ်ဝဲ တၢ်အီၣ်တၢ်အီတဖၣ်အံၤဘၣ်. c

၅. ဒီပုၢ်ဝဲၢ်ခွါမဲၣ်ဒံယၤ ဒီးအမါမးစဲလၤ သးအိၣ်တူၢ်ဆါအသးဒ်လဲၣ် ဒီးဘၣ်မနုၤအဃိလဲၣ်.

^၅ ဒ်သိးပကမၤအါထီၣ်ဘၣ် ယဟိဝၤယွၤအတၢ်မၤအဂီၢ် ပသးအိၣ် ဟ့ၣ်လီၤပသး ဒ်ပှၤနစၤရံဖိအသိး. ပကကွၢ်သကိး ဒီပုၢ်ဝဲၢ်ခွါမဲၣ်ဒံယၤ ဒီးအမါမးစဲလၤ အတၢ်လဲၤခီဖျိ. d ပှၤဒီမိၢ်ဝၤ ခံဂၤအံၤ အဝဲသ့ၣ် အိၣ်ဘၣ်မုာ်မုာ် ဒီးဘီၣ်ဘီၣ်ညီညီ. ဒီပုၢ်ဝဲၢ်ခွါမဲၣ်ဒံယၤန့ၣ် အအိၣ်ဒီး တၢ်မၤလၢအဂ့ၤတခါ ဒီးအငါအိၣ်ဟံၣ်ဂ့ၤမး. သနာ်က့  အဝဲသ့ၣ်ဘၣ်သး မၤအါထီၣ် ယဟိဝၤယွၤအတၢ်မၤ. ဒီးဒ်သိး အဝဲသ့ၣ်မၤဝဲကန့ၢ်အဂီၢ် အဝဲသ့ၣ်ပာ်လီၤသးလၢ ကဆီတလဲ အတၢ်အိၣ်မူတစဲး. အဝဲသ့ၣ် တဲဝဲလၢ “ပသူစှၤလီၤကျိၣ်စ့. ပလဲၤငါအိၣ်က့ၤ ဟံၣ်လၢအဆံးလီၤတစဲး ဒီးပဆါကွံာ်ပကါ.” ဒီပုၢ်ဝဲၢ်ခွါမဲၣ်ဒံယၤ ဒီးအမါမးစဲလၤ တလိၣ်မၤဝဲဒ်အံၤဘၣ်. သနာ်က့ အဝဲသ့ၣ် သးအိၣ်တူၢ်ဆါအသး ဒ်အံၤအဃိ အဝဲသ့ၣ် မၤယဟိဝၤယွၤအတၢ်မၤ ဒီးစံၣ်တဲၤတဲလီၤတၢ် န့ၢ်အါထီၣ်. အဃိ အဝဲသ့ၣ် ဒိးန့ၢ်ဘၣ်တၢ်သးခု ဒီးအိၣ်ဒီးတၢ်သူၣ်မံသးမုာ်.

၆. ဘၣ်မနုၤအဃိ ယဟိဝၤယွၤ အခ့အပှၤအါဂၤ သးအိၣ်ဟ့ၣ်လီၤအသးလဲၣ်. (ကွၢ်စ့ၢ်ကီးတၢ်ဂီၤ.)

^၆ ဒ်သိး ယဟိဝၤယွၤ အခ့အပှၤ လၢဆၢကတီၢ်ခဲအံၤစ့ၢ်ကီး ကမၤအါထီၣ်ဘၣ် ယဟိဝၤယွၤ အတၢ်မၤအဂီၢ် အဝဲသ့ၣ် သးအိၣ်ဟ့ၣ်လီၤသးအါမး. (၁ ကရံၣ် ၉:၃-၆) ယဟိဝၤယွၤ တမၢပှၤလၢ ပကဟ့ၣ်လီၤပသး ဒီးတူၢ်ၡူကွံာ်ပသး ဒ်အံၤဘၣ်. ဒီးတၢ်လၢ ပတူၢ်ၡူကွံာ်တဖၣ်န့ၣ် တမ့ၢ်တၢ်လၢ အကမၣ်ဘၣ်. အဒိ ပဝဲတနီၤန့ၣ် ပတူၢ်ၡူကွံာ် တၢ်မၤလၢ ပအဲၣ်ဒိးမၤ, ဟံၣ်လၢပအဲၣ်ဒိးအိၣ် ဒီးဆၣ်ဖိကီၢ်ဖိလၢ ပအဲၣ်ဒိးဘုၣ်အီၤ. ဒီးပဝဲအါဂၤန့ၣ် ပပာ်လီၤသးလၢ ပတဆီဟံၣ်ဆီဃီဒံးဘၣ် ဒီးပမ့ၢ်ဆီဟံၣ်ဆီဃီသနာ်က့ ပတဟံဖိ တဘျီဃီဘၣ်. မ့မ့ၢ်လၢ ပဝဲအဂၤတနီၤန့ၣ် ပမ့ၢ်ဘၣ်အိၣ်ယံၤဒီး ပဟံၣ်ဖိဃီဖိ ဒီးပသကိးဘၣ်ဆၣ် ပလဲၤမၤစၢၤတၢ်လၢ တၢ်လီၢ်လၢပှၤလိၣ်ဘၣ်တၢ်မၤစၢၤ. ဒီးပဝဲအါဂၤန့ၣ် ပသးအိၣ်ဟ့ၣ်လီၤသးဒ်အံၤ ခီဖျိလၢ ပအဲၣ်ဒိး ဟ့ၣ်ယဟိဝၤယွၤ တၢ်လၢအဂ့ၤကတၢၢ်. ပဟ့ၣ်လီၤသး ဒီးတူၢ်ၡူကွံာ်ပသး မ့ၢ်အါမ့ၢ်ဂ့ၤ စှၤမ့ၢ်ဂ့ၤ ပသ့ၣ်ညါလၢ ယဟိဝၤယွၤ ပာ်လုၢ်ပာ်ပှ့ၤ ပတၢ်ဟ့ၣ်လီၤသးအဃိ ပသးမုာ်ဒိၣ်မး.—ဧ့ၤ ၆:၁၀.

နမ့ၢ်ဖျါလီၤဆီဒီးပှၤဂၤ သနာ်က့ သးအိၣ်မၤဒ်န့ၣ်

၇. ဒ်သိး ပှၤနစၤရံဖိတဂၤ ကမၤလၢပှဲၤ အတၢ်အၢၣ်လီၤအဂီၢ် ဘၣ်မနုၤအဃိ ကကီလၢအဂီၢ်လဲၣ်. (၄ မိၤၡ့ ၆:၅) (ကွၢ်စ့ၢ်ကီးတၢ်ဂီၤ.)

^၇ ဖး ၄ မိၤၡ့ ၆:၅. ပှၤနစၤရံဖိ အၢၣ်လီၤဝဲလၢ အတတံာ်အခိၣ်ဆူၣ်ဘၣ်. အဝဲသ့ၣ် အတၢ်အၢၣ်လီၤန့ၣ် ပာ်ဖျါထီၣ်လၢ အဝဲသ့ၣ် ဒိးပၢအသး လၢယဟိဝၤယွၤ အဖီလာ် လၢာ်လၢာ်ဆ့ဆ့. ပှၤအံၣ်စရ့လးဖိတဂၤ မ့ၢ်ကဲဝဲ ပှၤနစၤရံဖိ ဖးယံာ်န့ၣ် အခိၣ်ဆူၣ် ကထီထီၣ်ဖးထီ ဒီးပှၤဂၤကထံၣ်ဝဲစ့ၢ်ကီး. ဒီးပှၤလၢအဃၢၤတဖၣ် မ့ၢ်ပာ်ကဲ အတၢ်ဆၢတဲာ် ဒီးဆီၣ်ထွဲအီၤလၢ အကမၤလၢပှဲၤ အတၢ်အၢၣ်လီၤန့ၣ် အမ့ၢ်ဖျါလီၤဆီန့ၢ်ပှၤဂၤ သနာ်က့ တၢ်ကီတၢ်ခဲတအိၣ်ဘၣ်. ဘၣ်ဆၣ် လၢညါန့ၣ် ပှၤအံၣ်စရ့လးဖိတနီၤ တပာ်ကဲ ပှၤနစၤရံဖိ ဒီးဆီၣ်ထွဲအဝဲသ့ၣ်ဘၣ်. အဒိ ဖဲဝံဧၤမိၣ်အစိၤန့ၣ် ပှၤအံၣ်စရ့လးဖိလၢ အထီဒါက့ၤတၢ်မ့ၢ်တၢ်တီတနီၤ “ဒုးအီ ပှၤနစၤရံဖိတဖၣ်လၢ စပံးထံ.” အဝဲသ့ၣ် မၤဝဲဒ်န့ၣ် လီၤဂာ်ဒ်သိး အကွဲန့ၢ်လွဲန့ၢ်ဝဲ ပှၤနစၤရံဖိလၢ အကမၤဟးဂီၤ အတၢ်အၢၣ်လီၤ ဘၣ်ဃးဒီး တၢ်ဟးဆှဲးစပံးထံ. (ဧၤ ၂:၁၂) အဃိ တဘျီတခီၣ်န့ၣ် ဒ်သိး ပှၤနစၤရံဖိတဂၤ ကဖျါလီၤဆီန့ၢ်ပှၤဂၤ ဒီးကမၤလၢပှဲၤ အတၢ်အၢၣ်လီၤအဂီၢ် အကဘၣ်အိၣ်ဒီး တၢ်သးဒူဖးအါညါ.

၈. ဘဲကၠၢၤမဲၤ အတၢ်လဲၤခီဖျိန့ၣ် ကဲထီၣ် တၢ်ဂံၢ်တၢ်ဘါ လၢပဂီၢ်ဒ်လဲၣ်.

^၈ ပမ့ၢ်ကဲပှၤလၢ အသးတဒူဘၣ် ဒီးမဲာ်ဆှးသ့ ဘၣ်ဆၣ် ခီဖျိလၢ ယဟိဝၤယွၤ အတၢ်မၤစၢၤအဃိ ပတမဲာ်ဆှးလၢ ပကဖျါလီၤဆီဒီးပှၤဂၤဘၣ်. ပကကွၢ်သကိး ဘဲကၠၢၤမဲၤ အတၢ်လဲၤခီဖျိ. ဘဲကၠၢၤမဲၤန့ၣ် အအိၣ်လၢ ကီၢ်နီၣ်ဝ့ ဒီးအအိၣ်အနံၣ်တဆံ ဒီးအကဲ ယဟိဝၤပှၤအုၣ်အသး တဂၤ. ခီဖျိလၢ တၢ်ဒုးကဲထီၣ်လၢ ကီၢ်ယူၣ်ခြ့အဃိ လၢဘဲကၠၢၤမဲအကၠိန့ၣ် ပှၤမၤတၢ်ရဲၣ်တၢ်ကျဲၤတခါလၢ အဆီၣ်ထွဲဝဲ ပှၤအိၣ်လၢ ကီၢ်ယူၣ်ခြ့. ပှၤမၢဖိသၣ်တဖၣ် သးဝံၣ်တၢ် ဒီးကူကၤဝဲ တၢ်ကူတၢ်ကၤလၢ အလွဲၢ်လီၤဂာ်ဒ်သိးဒီး ကီၢ်ယူၣ်ခြ့ အထံကီၢ် နီၣ်တယၢ်အလွဲၢ်. ဒ်သိး ဘဲကၠၢၤမဲၤ တပၣ်ဃုာ်လၢ တၢ်ရဲၣ်တၢ်ကျဲၤအံၤ တဂ့ၤအဂီၢ် အဆၢထၢၣ်ယံၤဒီး တၢ်လီၢ်လၢ ပှၤမၤတၢ်ရဲၣ်တၢ်ကျဲၤတခါအံၤ. သနာ်က့ သရၣ်မုၣ်တဂၤ ထံၣ်စိအီၤ ဒီးတဲဘၣ်အီၤလၢ “ဟဲလၢအံၤသၢၤ, ပအိၣ်ခိးနၤ.” ဘဲကၠၢၤမဲၤလဲၤလၢ သရၣ်မုၣ်အအိၣ် ဒူဒူ ဒီးတဲဘၣ်အီၤလၢ “ဘၣ်ဃးဒီး ထံဂ့ၢ်ကီဂ့ၢ်န့ၣ် ယအိၣ်လၢတၢ်ဘၢၣ်စၢၤ. နီၢ်ကီၢ်န့ၣ် ယဟိဝၤပှၤအုၣ်အသးအါဂၤ တလဲၤကဲသုးဘၣ်အဃိ အဝဲသ့ၣ်လီၤဘၣ်လၢ ဃိာ်ပူၤ.” ဘဲကၠၢၤမဲၤတဲဘၣ် သရၣ်မုၣ်တဂၤန့ၣ် ဒ်န့ၣ်အဃိ သရၣ်မုၣ်တဲအီၤလၢ အတလိၣ်ပၣ်ဃုာ်လၢ တၢ်ရဲၣ်တၢ်ကျဲၤဘၣ်. ဘၣ်ဆၣ် ဖဲဘဲကၠၢၤမဲၤ အသကိးလၢ အတီၤဒၢးပူၤ သံကွၢ်အီၤလၢ ဘၣ်မနုၤအဃိ အတပၣ်ဃုာ်လၢ တၢ်ရဲၣ်တၢ်ကျဲၤဘၣ်လဲၣ်အခါ ဘဲကၠၢၤမဲၤ သးကနိးဒိၣ်မး ဒီးအဘူးကဟီၣ်ညါ. သနာ်က့ တၢ်လၢအတဲဘၣ် သရၣ်မုၣ်န့ၣ် အတဲဘၣ်က့ၤ ပှၤကၠိဖိလၢ အတီၤဒၢးပူၤ. ဒီးလၢခံန့ၣ် ဘဲကၠၢၤမဲၤတဲဘၣ် အမိအပါလၢ ယဟိဝၤယွၤ မၤစၢၤအီၤဒ်သိး အကတဲဖျါထီၣ် အတၢ်စူၢ်တၢ်နာ်ဒူဒူ.

၉. ပမၤသးခု ယဟိဝၤယွၤအသး ကသ့ဒ်လဲၣ်.

^၉ ခီဖျိလၢ ပဆၢတဲာ်လီၤပသးလၢ ပကဒိကနၣ် ယဟိဝၤယွၤ အကလုၢ်အဃိ ပဖျါလီၤဆီဒီးပှၤဂၤ. လၢကၠိမ့ၢ်ဂ့ၤ လၢတၢ်မၤလီၢ်မ့ၢ်ဂ့ၤ ဒ်သိး ပကတဲဘၣ်ပှၤဂၤလၢ ပကဲယဟိဝၤပှၤအုၣ်အသးအဂီၢ် ပကဘၣ်အိၣ်ဒီး တၢ်သးဒူ. ဒီးခီဖျိလၢ ပှၤဟီၣ်ခိၣ်ဖိ အတၢ်ပာ်သူၣ်ပာ်သး ဒီးအလုၢ်လၢ်သကဲာ်ပဝး အၢထီၣ်မၣ်အၢထီၣ်အဃိ ပကအိၣ်မူဒ်သိး လံာ်စီဆှံ အတၢ်ဟံးစုနဲၣ်ကျဲ ဒီးတဲဘၣ်ပှၤဂၤ တၢ်သးခုကစီၣ်အဂီၢ် တဘျီတခီၣ်န့ၣ် အတညီလၢပဂီၢ်ဘၣ်. (၂ တံၤ ၁:၈; ၃:၁၃) ဘၣ်ဆၣ် ပကဘၣ်နီၣ်ဘၣ်လၢ ပမ့ၢ်အိၣ်ဒီးတၢ်သးဒူ ဒီးပမ့ၢ်လီၤဆီဒီး ပှၤလၢအတဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် ပက “မၤသးခု [ယဟိဝၤယွၤအ] သး.”—ကတိၤ ၂၇:၁၁; မၤ ၃:၁၈.

ပာ်ဆိယဟိဝၤယွၤ လၢနီၣ်ဂံၢ်တၢ

၁၀. တၢ်မၤလိာ်လၢ ပထံၣ်ဘၣ်ဖဲ ၄ မိၤၡ့ ၆:၆, ၇ န့ၣ်ကဲထီၣ်တၢ်မၤကွၢ်လၢ ပှၤနစၤရံဖိအဂီၢ်ဒ်လဲၣ်.

^၁၀ ဖး ၄ မိၤၡ့ ၆:၆, ၇. ပှၤနစၤရံဖိန့ၣ် အလဲၤဘူးလၢ ပှၤသံစိၣ်ကပၤ တန့ၢ်ဘၣ်. ဘၣ်သ့ၣ်သ့ၣ် ပကဆိကမိၣ်လၢ အဝဲသ့ၣ်ကမၤထွဲ တၢ်မၤလိာ်တခါအံၤအဂီၢ် တၢ်ကီတၢ်ခဲတအိၣ်ဘၣ်. သနာ်က့ လၢလံာ်စီဆှံအစိၤန့ၣ် ပှၤနစၤရံဖိတဂၤ အဘူးအတံၢ် မ့ၢ်သံန့ၣ် အကမၤထွဲဝဲ တၢ်မၤလိာ်တခါအံၤအဂီၢ် ကကီလၢအဂီၢ် ဖးဒိၣ်ညါ. စိၤလၢညါန့ၣ် လုၢ်လၢ်အိၣ်လၢ ဖဲပှၤလဲၤခူၣ်လီၤပှၤသံအခါ ပှၤကဘၣ်အိၣ်လၢ ပှၤသံတဂၤန့ၣ် အစိၣ်ကပၤ. (ယိၤ ၁၉:၃၉, ၄၀; မၤတၢ် ၉:၃၆-၄၀) သနာ်က့ ပှၤနစၤရံဖိန့ၣ် အတဘၣ်မၤဝဲ လုၢ်လၢ်တခါန့ၣ်ဘၣ်. ဖဲအဝဲသ့ၣ် ထံၣ်ဘၣ်ဒီး ဟံၣ်ဖိဃီဖိ တၢ်အိၣ်သးကီခဲ ဒ်သိးဒီး တၢ်သူၣ်အုးသးအုးဒ်အံၤအခါ အဝဲသ့ၣ် ကဘၣ်ပာ်ဖျါထီၣ်လၢ အအိၣ်ဒီး တၢ်နာ်ဂၢၢ်ကျၢၤ ဒီးတဘၣ်မၤဟးဂီၤ အတၢ်အၢၣ်လီၤဘၣ်. ဘၣ်ဆၣ် ဒ်သိး ပှၤနစၤရံဖိလၢ အသးတီတဖၣ်အံၤ လဲၤခီဖျိ  တၢ်အိၣ်သးကီခဲ ကန့ၢ်အဂီၢ် ယဟိဝၤယွၤ မၤစၢၤအဝဲသ့ၣ် သပှၢ်တၢၢ်.

၁၁. ဖဲခရံာ်ဖိတဂၤ ဆၢတဲာ်တၢ် ဘၣ်ဃးဒီး အဟံၣ်ဖိဃီဖိ အတၢ်ဂ့ၢ်အခါ အကဘၣ် ပာ်လီၤသးလၢ အကမၤမနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၁ ဒ်ခရံာ်ဖိအမ့ၢ်အတီအသိး ပတၢ်အၢၣ်လီၤလၢ ပမၤအီၤဖဲ ပဟ့ၣ်လုၢ်ထီၣ်သးအခါန့ၣ် ပထံၣ်အီၤလၢ အရ့ဒိၣ်ဒိၣ်မး. ဒီးတၢ်အၢၣ်လီၤတခါအံၤ အကဲဘျုး မ့တမ့ၢ် အမၤဘၣ်ဒိ ပတၢ်ဆၢတဲာ် ဘၣ်ဃးဒီး ပဟံၣ်ဖိဃီဖိ အတၢ်ဂ့ၢ်သ့. ပအဲၣ်ဒိးမၤလၢပှဲၤ ပမူဒါလၢ ပဟံၣ်ဖိဃီဖိအဂီၢ် သနာ်က့ ပတပာ်ဆိ ပဟံၣ်ဖိဃီဖိ အတၢ်ဘၣ်သးလၢ နီၣ်ဂံၢ်တၢဘၣ်. ပပာ်ဆိ ယဟိဝၤယွၤ အတၢ်ဘၣ်သး လၢနီၣ်ဂံၢ်တၢ. (မး ၁၀:၃၅-၃၇; ၁ တံၤ ၅:၈) ဒီးပကဘၣ်ဆၢတဲာ်တၢ်လၢ ကမၤသးခု ယဟိဝၤယွၤအသး. ဘၣ်ဆၣ် တဘျီတခီၣ်န့ၣ် ပတၢ်ဆၢတဲာ် တမၤသးခု ပဘူးပတံၢ်အသးဘၣ်.

၁၂. အဲးလဲစါဒြူၤ ထံၣ်ဘၣ် တၢ်ကီတၢ်ခဲလၢ အဟံၣ်ပူၤဃီပူၤ ဘၣ်ဆၣ် အမၤဝဲဒ်လဲၣ် ဒီးအတမၤမနုၤဘၣ်လဲၣ်.

^၁၂ ပကကွၢ်သကိး အဲးလဲစါဒြူၤ ဒီးအမါဒိရံနၤ အတၢ်လဲၤခီဖျိ. ပှၤဒီမိၢ်ဝၤခံဂၤအံၤ အဝဲသ့ၣ်မၤလိလံာ်စီဆှံ န့ၢ်တနံၣ်ဘျီ ဒိရံနၤ ဆၢတဲာ်လီၤသးလၢ အကပတုာ် တၢ်မၤလိလံာ်စီဆှံ ဒီးအအဲၣ်ဒိးလၢ အဝၤအဲးလဲစါဒြူၤ ကပတုာ်စ့ၢ်ကီး. သနာ်က့ အဲးလဲစါဒြူၤ တဲတၢ်ဒီးအမါမုာ်မုာ် ဒီးတဲအီၤဒူဒူလၢ အကဆဲးမၤလိလံာ်စီဆှံဒံး. အမါဒိရံနၤ တဘၣ်သးဝဲဘၣ် ဒီးအဂုာ်ကျဲးစၢး မၤပတုာ်အဝၤ ဒ်သိးအဝၤတမၤလိ လံာ်စီဆှံလၢၤတဂ့ၤ. အဲးလဲစါဒြူၤ တဲဝဲလၢ အဂုာ်ကျဲးစၢး နၢ်ပၢၢ်စၢၤ အမါအတၢ်တူၢ်ဘၣ် ဘၣ်ဆၣ် တညီလၢအဂီၢ်ဘၣ်. တဘျီတခီၣ် ဖဲအမါဒိရံနၤ တဲဆါအီၤ ဒီးတဲတၢ်ဒီးအီၤ ဆူၣ်ဆူၣ်အခါ အဲးလဲစါဒြူၤ တူၢ်ဘၣ်ဝဲလၢ အတဘၣ်သး ဆဲးမၤလိ လံာ်စီဆှံလၢၤဘၣ်. သနာ်က့ အဲးလဲစါဒြူၤ ဂုာ်ကျဲးစၢး ပာ်ဆိယဟိဝၤယွၤ လၢနီၣ်ဂံၢ်တၢ ဒီးတကတီၢ်ဃီန့ၣ် အပာ်ဖျါထီၣ်လၢ အအဲၣ်အမါဒီးပာ်ကဲအီၤ. လၢခံ အဒိအတဲာ် လၢအဂ့ၤန့ၣ် ထိၣ်ဟူးထိၣ်ဂဲၤထီၣ်အမါလၢ အကမၤလိကဒီး လံာ်စီဆှံ ဒီးလၢခံန့ၣ် အမါဒိးဘျၢထံ.—လၢ jw.org အပူၤန့ၣ် ကွၢ်တၢ်ဂီၤမူ လၢအခိၣ်တီမ့ၢ်ဝဲ အဲးလဲစါဒြူၤ ဒီးဒိရံနၤ ဖဲခူး– “တၢ်အဲၣ်တၢ်ကွံန့ၣ် ဝံသးစူၤတၢ် ဒီးအသူၣ်ဂ့ၤသးဝါလီၤ” လၢအအိၣ်ဖဲ တၢ်ဂ့ၢ်ပိာ်ထွဲလိာ်အခံတဖၣ် လၢအခိၣ်တီမ့ၢ် “တၢ်မ့ၢ်တၢ်တီဆီတလဲ ပတၢ်အိၣ်မူ.”

၁၃. ပပာ်ဖျါထီၣ်လၢ ပအဲၣ်ယဟိဝၤယွၤ ဒီးပဟံၣ်ဖိဃီဖိ သ့ဒ်လဲၣ်.

^၁၃ ယဟိဝၤယွၤန့ၣ် အဒုးအိၣ်ထီၣ် ဟံၣ်ဖိဃီဖိ အတၢ်ရဲၣ်တၢ်ကျဲၤ ဒီးအဘၣ်သးလၢ ဟံၣ်ဖိဃီဖိ ကအိၣ်ဒီးတၢ်သးခု. (အ့း ၃:၁၄, ၁၅) အဃိ ပမ့ၢ်ဘၣ်သး ဒိးန့ၢ်ဘၣ် တၢ်သးခု နီၢ်ကီၢ်န့ၣ် ပကဘၣ်မၤတၢ်လၢ ယဟိဝၤယွၤ အဲၣ်ဒိးလၢပမၤ. နဂုာ်ကျဲးစၢး ဟ့ၣ်လီၤသးလၢ နကဘူၣ်ထီၣ်ဘါထီၣ် ယဟိဝၤယွၤ ဒီးတကတီၢ်ဃီ နအံးထွဲကွၢ်ထွဲ နဟံၣ်ဖိဃီဖိ, နပာ်ဖျါထီၣ် တၢ်အဲၣ် ဒီးတၢ်ပာ်ကဲ လၢအဝဲသ့ၣ်အဖီခိၣ်န့ၣ် ယဟိဝၤယွၤ ပာ်လုၢ်ပာ်ပှ့ၤဝဲ.—ရိ ၁၂:၁၀.

ဟ့ၣ်ဂံၢ်ဟ့ၣ်ဘါလိာ်သး ဒ်သိးပကသးအိၣ်မၤ ဒ်ပှၤနစၤရံဖိအသိး

၁၄. ပကဘၣ် ဂုာ်ကျဲးစၢး ဟ့ၣ်ဂံၢ်ဟ့ၣ်ဘါ မတဂၤသ့ၣ်လဲၣ်.

^၁၄ ဆၢကတီၢ်ခဲအံၤ ပှၤကိးဂၤဒဲးလၢ အဘူၣ်ထီၣ်ဘါထီၣ် ယဟိဝၤယွၤန့ၣ် အဝဲသ့ၣ် သးအိၣ်ဟ့ၣ်လီၤအသး ခီဖျိလၢ အအဲၣ်ယဟိဝၤယွၤအဃိ. ဒီးအဝဲသ့ၣ် ကဟ့ၣ်လီၤအသးန့ၣ် တညီဝဲထီဘိဘၣ်.  ဒ်သိး ပကသးအိၣ်ဟ့ၣ်လီၤသး ဒ်ပှၤနစၤရံဖိအသိးအဂီၢ် ပဟ့ၣ်ဂံၢ်ဟ့ၣ်ဘါလိာ်သး သ့ဒ်လဲၣ်. ပဟ့ၣ်ဂံၢ်ဟ့ၣ်ဘါလိာ်သး သ့ခီဖျိ ပတၢ်ကတိၤ. (ဘး ၁၆:၅) လၢနတၢ်အိၣ်ဖှိၣ်အပူၤ ပှၤလၢအဂုာ်ကျဲးစၢး အိၣ်မူယိယိဖိ ဒ်သိးအကမၤအါထီၣ်ဘၣ် ယဟိဝၤယွၤအတၢ်မၤန့ၣ် အိၣ်တဂၤဂၤဧါ. ပှၤသးစၢ်လၢ အအိၣ်ဒီးတၢ်သးဒူ ဒီးအမ့ၢ်ထံၣ်ဘၣ် တၢ်မၤကွၢ်လၢကၠိ သနာ်က့ အသးအိၣ် ဖျါလီၤဆီဒီးပှၤဂၤန့ၣ် နသ့ၣ်ညါဘၣ် တဂၤဂၤဧါ. ပှၤမၤလိလံာ်စီဆှံဖိ မ့တမ့ၢ် ဒီပုၢ်ဝဲၢ်မုၣ်ခွါလၢ အဟံၣ်ဖိဃီဖိ ထီဒါအီၤ ဒီးအဘၣ် ဂုာ်ကျဲးစၢးအိၣ်ဒီး တၢ်သးတီန့ၣ် နသ့ၣ်ညါဘၣ် တဂၤဂၤဧါ. ပာ်လီၤနသးလၢ နကဂုာ်ကျဲးစၢး ဟ့ၣ်ဂံၢ်ဟ့ၣ်ဘါ အဝဲသ့ၣ် ဒီးတဲအဝဲသ့ၣ်လၢ နပာ်လုၢ်ပာ်ပှ့ၤ အတၢ်သးအိၣ်ဟ့ၣ်လီၤသး လၢယဟိဝၤယွၤအဂီၢ် ဒီးနဘၣ်သူၣ်ဘၣ်သး အတၢ်သးဒူဒိၣ်မး.—ဖံၤ ၄, ၅, ၇.

၁၅. ပှၤတနီၤန့ၣ် အဝဲသ့ၣ်မၤစၢၤ ဒီပုၢ်ဝဲၢ်မုၣ်ခွါလၢ အမၤကစၢ်ယွၤတၢ်မၤ လၢဆၢကတီၢ်လၢပှဲၤဒ်လဲၣ်.

^၁၅ တဘျီတခီၣ် ပသူတၢ်လၢအအိၣ်ဒီးပှၤ ဒီးဟ့ၣ်မၤစၢၤ ဒီပုၢ်ဝဲၢ်မုၣ်ခွါလၢ အမၤကစၢ်ယွၤတၢ်မၤ လၢဆၢကတီၢ်လၢပှဲၤ သ့စ့ၢ်ကီး. (ကတိၤ ၁၉:၁၇; ဧ့ၤ ၁၃:၁၆) ဒီပုၢ်ဝဲၢ်မုၣ်သးပှၢ် လၢအအဲၣ် ယဟိဝၤယွၤဒိၣ်မးတဂၤ ဒီးအအိၣ်လၢ ကီၢ်စြံၣ်လၣ်ကၣ်န့ၣ် အသးအိၣ်မၤဝဲဒ်န့ၣ်. ဒီပုၢ်ဝဲၢ်မုၣ်အံၤ န့ၢ်အါထီၣ်ဘၣ် ပ့ၣ်စ့ၣ်လါလဲ ဒီးကျိၣ်စ့တၢ်ကီတၢ်ခဲ မ့ၢ်အိၣ်သနာ်က့ အဘၣ်သးမၤစၢၤ ဒီပုၢ်ဝဲၢ်မုၣ်သးစၢ်ခံဂၤ ဒ်သိးအဝဲသ့ၣ် ဆဲးမၤပှၤလဲၤလၢညါ ကန့ၢ်အဂီၢ်. အဃိ ဒီပုၢ်ဝဲၢ်မုၣ်သးပှၢ်အံၤ ပာ်လီၤအသးလၢ အကဟ့ၣ်န့ၢ်အဝဲသ့ၣ် လီတဲစိအပှ့ၤ ကိးလါဒဲး. ဒီပုၢ်ဝဲၢ်မုၣ်သးပှၢ်အံၤ အသးဂ့ၤဒိၣ်မး.

၁၆. ပှၤနစၤရံဖိ လၢညါတဖၣ် အဒိအတဲာ် လၢအဂ့ၤန့ၣ် ပန့ၢ်ဘၣ်တၢ်မၤလိဒ်လဲၣ်.

^၁၆ ပှၤနစၤရံဖိ လၢညါတဖၣ် အဒိအတဲာ် လၢအဂ့ၤန့ၣ် ပန့ၢ်ဘၣ်တၢ်မၤလိအါမး. ပှၤနစၤရံဖိအဂ့ၢ်န့ၣ် အသိၣ်လိအါထီၣ်ပှၤ ဘၣ်ဃးဒီး ပပါအိၣ်လၢမူခိၣ် ယဟိဝၤယွၤ အဂ့ၢ်စ့ၢ်ကီး. ယဟိဝၤယွၤ သ့ၣ်ညါဝဲလၢ ပဘၣ်သး မၤသးခုအသး ဒီးမၤလၢပှဲၤထီၣ် ပတၢ်အၢၣ်လီၤ ဖဲပဟ့ၣ်လုၢ်ထီၣ်သး လၢအအိၣ်အခါ. အဃိ ယဟိဝၤယွၤ မၤလၤကပီၤပှၤခီဖျိ အဟ့ၣ်ပှၤ တၢ်ခွဲးတၢ်ယာ်လၢ ပဝဲတဂၤဘၣ်တဂၤ ကပာ်ဖျါထီၣ်လၢ ပအဲၣ်အီၤ. (ကတိၤ ၂၃:၁၅, ၁၆; မၢ် ၁၀:၂၈-၃၀; ၁ ယိၤ ၄:၁၉) ယဟိဝၤယွၤ တၢ်ရဲၣ်တၢ်ကျဲၤလၢ ပှၤကဲဘၣ် ပှၤနစၤရံဖိန့ၣ် ပာ်ဖျါထီၣ်ဝဲလၢ ယဟိဝၤယွၤန့ၣ် အထံၣ်ဝဲ ပတၢ်သးအိၣ်ဟ့ၣ်လီၤသး ဒီးအပာ်လုၢ်ပာ်ပှ့ၤ တၢ်လၢပမၤတဖၣ်. အဃိ မ်ပပာ်လီၤသး ဂၢၢ်ဂၢၢ်ကျၢၤကျၢၤလၢ ပကဆဲးဘူၣ်ထီၣ်ဘါထီၣ် ယဟိဝၤယွၤ ဒီးသးအိၣ်ဟ့ၣ်အီၤ တၢ်အဂ့ၤကတၢၢ် လၢအတၢ်မၤအပူၤထီဘိ.