တၢ်မၤလိ ၈
တၢ်သးဝံၣ် ၁၃၀ ပျၢ်ကွံာ်ပှၤဂၤအတၢ်ကမၣ်
ယဟိဝၤယွၤ ပျၢ်ကွံာ် ပတၢ်ကမၣ်အဃိ ပကဘၣ်ကွၢ်လိအီၤ
“ဒ်ယဟိဝၤယွၤ ပျၢ်သုတၢ်ကမၣ် လၢာ်လၢာ်ဆ့ဆ့အသိးန့ၣ် သုကဘၣ်မၤ ဒ်န့ၣ်အသိး စ့ၢ်ကီး.”—ကလီး ၃:၁၃.
တၢ်ဂ့ၢ်မိၢ်ပှၢ်
လၢတၢ်မၤလိအံၤ ပကတဲသကိး တၢ်ဂ့ၢ်ဘၣ်ဃးဒီး ဖဲပှၤဂၤ မၤဘၣ်ဒိ ပသးအခါ ဒ်သိး ပကပျၢ်ကွံာ် အတၢ်ကမၣ်အဂီၢ် ပကဘၣ်မၤဒ်လဲၣ်.
၁-၂. (က) ပပျၢ်ကွံာ် ပှၤတၢ်ကမၣ်န့ၣ် ကကီလၢပဂီၢ် လၢအဆၢကတီၢ်ဖဲလဲၣ်. (ခ) ဒီပုၢ်ဝဲၢ်မုၣ်ဒဲနံး ပျၢ်ကွံာ် ပှၤတၢ်ကမၣ်န့ၣ် အပာ်ဖျါထီၣ်ဝဲဒ်လဲၣ်.
နဆိကမိၣ် နကပျၢ်ကွံာ် ပှၤတၢ်ကမၣ်န့ၣ် အညီဘၣ်နၤဧါ. ပကပျၢ်ကွံာ် ပှၤတၢ်ကမၣ်န့ၣ် အတညီဘၣ်ပှၤဘၣ်. လီၤဆီဒၣ်တၢ် ဖဲပှၤတဂၤဂၤ မၤတၢ်တမံၤမံၤ မ့တမ့ၢ် တဲတၢ်တမံၤမံၤလၢ အမၤဘၣ်ဒိပသး ဒိၣ်မးအခါ တညီလၢ ပကပျၢ်ကွံာ် အတၢ်ကမၣ်ဘၣ်. ဘၣ်ဆၣ် ဒ်သိး ပတဆဲးသးထီၣ်တၢ်တဂ့ၤ ဒီးပကပျၢ်ကွံာ် ပှၤတၢ်ကမၣ်အဂီၢ် တၢ်လၢပမၤသ့န့ၣ် အိၣ်ဝဲ. အဒိ ပကကွၢ်သကိး ဒီပုၢ်ဝဲၢ်မုၣ်ဒဲနံး a အတၢ်လဲၤခီဖျိ ဘၣ်ဃးဒီး အပျၢ်ကွံာ် ပှၤတၢ်ကမၣ်အဂ့ၢ်. ဖဲ ၂၀၁၇ န့ၣ် ဒီပုၢ်ဝဲၢ်မုၣ်ဒဲနံး ဒီးအဟံၣ်ဖိဃီဖိ လဲၤဟးလၢ ယဟိဝၤပှၤအုၣ်အသး အဝဲၤလီၢ်ခိၣ်သ့ၣ်. ဒီးဖဲအဝဲသ့ၣ် ဟဲက့ၤလၢကျဲအခါ ကါလၢအဂၤတခိၣ် ဟဲတဲးဘၣ် အဝဲသ့ၣ်အကါ ဒီးဖဲတၢ်ကဲထီၣ်သး ဒ်န့ၣ်အခါ ဒီပုၢ်ဝဲၢ်မုၣ် သးပ့ၤနီၣ်အသး. လၢခံ ဖဲအနီၣ်ထီၣ်က့ၤသးအခါ အသ့ၣ်ညါဘၣ်လၢ အဖိဘၣ်ဒိနးမး ဒီးမ့မ့ၢ်လၢ အဝၤဘြါယၢၤန့ၣ် အသံ. ဖဲဒီပုၢ်ဝဲၢ်မုၣ်ဒဲနံး ဆိကမိၣ်ထီၣ် တၢ်ကဲထီၣ်သးအခါ အတဲဝဲလၢ “ယသးဘၣ်ဒိဒိၣ်မး ဒီးယခိၣ်နူာ်ဘံဘူလၢာ်ပျီ.” လၢခံ အသ့ၣ်ညါဘၣ်ဝဲလၢ ပှၤနီကါတဂၤန့ၣ် ဖဲအနီကါအခါ အတအီ တၢ်မူၤတၢ်ဘှီးဘၣ် ဒီးတၢ်တမၤတံာ်တာ်အီၤ နီတမံၤ စ့ၢ်ကီးဘၣ်. အဃိ ဒီပုၢ်ဝဲၢ်မုၣ်ဒဲနံး ဃ့ထုကဖၣ်လၢ ယဟိဝၤယွၤ ကမၤစၢၤအီၤဒ်သိး အကပာ်သးမုာ်မုာ်.
၂ ဖဲပှၤလၢ အတဲးဘၣ် အဝဲသ့ၣ်တဂၤ လဲၤထီၣ်ရူအခါ စံၣ်ညီၣ်ကွီၢ် ပာ်ပနီၣ်ဝဲလၢ အမၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤ. စံၣ်ညီၣ်ကွီၢ် မ့ၢ်ပာ်ပနီၣ်ဝဲလၢ အတၢ်ကမၣ်အိၣ်န့ၣ် အကဘၣ်လီၤလၢ ဃိာ်ပူၤ. ဘၣ်ဆၣ် ပှၤတဂၤအံၤ ကဘၣ်လီၤလၢ ဃိာ်ပူၤဧါ တလီၤဘၣ်ဧါန့ၣ် ကဒိးသန့ၤထီၣ်သးလၢ တၢ်လၢ ဒီပုၢ်ဝဲၢ်မုၣ်ဒဲနံး တဲဖျါထီၣ်ဝဲ. ဒီပုၢ်ဝဲၢ်မုၣ်ဒဲနံး တဲဝဲလၢ “ယဘၣ်တဲဖျါထီၣ် ယတၢ်တူၢ်ဘၣ် လၢအနးကတၢၢ် လၢယတၢ်အိၣ်မူအပူၤ ဒီးဖဲန့ၣ်အခါ ယတူၢ်ဘၣ်လၢ ပှၤဟဲအိးထီၣ် ယတၢ်ပူၤလီၢ် ဝံၤဘျီ ပှၤပၢနုာ်အံသၣ်လၢ ယတၢ်ပူၤလီၢ်ဒီဒူၣ်.” စှၤကိာ်နွံ ဝံၤအလီၢ်ခံ ဒီပုၢ်ဝဲၢ်မုၣ်ဒဲနံး အိၣ်လၢ စံၣ်ညီၣ်ကွီၢ်ရူ ဒီးတဲဖျါထီၣ် တၢ်အုၣ်သးလၢ ပှၤနီကါလၢ အတဲးဘၣ် အဝဲသ့ၣ်တဂၤန့ၣ် အမဲာ်ညါ. ဒီပုၢ်ဝဲၢ်မုၣ်ဒဲနံး ကတဲဝဲဒ်လဲၣ်. အတဲဘၣ် စံၣ်ညီၣ်ကွီၢ်လၢ အကပာ်ဖျါထီၣ် တၢ်သးကညီၤလၢ ပှၤနီကါ တဂၤန့ၣ် အဖီခိၣ်. b ဒီးဖဲအတဲတၢ်ဝံၤအခါ စံၣ်ညီၣ်ကွီၢ် သးလီၤ ဒီးအဟီၣ်ဝဲ. စံၣ်ညီၣ်ကွီၢ် တဲဝဲလၢ “ယကဲစံၣ်ညီၣ်ကွီၢ်န့ၢ် ၂၅ နံၣ်လံ. ဘၣ်ဆၣ် လၢစံၣ်ညီၣ်ကွီၢ် အရူပူၤန့ၣ် ယတထံၣ်ဘၣ် ဟံၣ်ဖိဃီဖိ လၢအတူၢ်ဘၣ်တၢ်တဖၣ် ဃ့ကညးန့ၢ်တၢ်လၢ ပှၤလၢအတၢ်ကမၣ်အိၣ် တဂၤအဂီၢ် နီတဘျီဘၣ်. ဒီးယတနၢ်ဟူဘၣ် တၢ်ကတိၤလၢ အပှဲၤဒီး တၢ်အဲၣ် ဒီးတၢ်ပျၢ်တၢ်ကမၣ် နီတဘျီစ့ၢ်ကီးဘၣ်.”
၃. ဒ်သိး ဒီပုၢ်ဝဲၢ်မုၣ်ဒဲနံး ကပျၢ်ကွံာ် ပှၤတၢ်ကမၣ်အဂီၢ် တၢ်မနုၤမၤစၢၤအီၤလဲၣ်.
၃ ဒ်သိး ဒီပုၢ်ဝဲၢ်မုၣ်ဒဲနံး ကပျၢ်ကွံာ် ပှၤတၢ်ကမၣ်အဂီၢ် တၢ်မနုၤမၤစၢၤအီၤလဲၣ်. အကွၢ်လိ ယဟိဝၤယွၤ လၢအပျၢ်ကွံာ် ပှၤတၢ်ကမၣ်န့ၣ် အဒိအတဲာ်. (မံ ၇:၁၈) ပမ့ၢ်ပာ်လုၢ်ပာ်ပှ့ၤ ယဟိဝၤယွၤ ပျၢ်ကွံာ် ပတၢ်ကမၣ်န့ၣ် ကမၤစၢၤပှၤဒ်သိး ပကသးအိၣ်ပျၢ်ကွံာ် ပှၤတၢ်ကမၣ် စ့ၢ်ကီး.
၄. ယဟိဝၤယွၤ ဘၣ်သးလၢ ပကမၤမနုၤလဲၣ်. (အ့းဖ့းစူး ၄:၃၂)
၄ ယဟိဝၤယွၤ ပျၢ်ကွံာ် ပတၢ်ကမၣ်အဃိ အအဲၣ်ဒိးလၢ ပကပျၢ်ကွံာ် ပှၤတၢ်ကမၣ်စ့ၢ်ကီး. (ဖး အ့းဖ့းစူး ၄:၃၂.) ဒီးအအဲၣ်ဒိးလၢ ပကသးအိၣ် ပျၢ်ကွံာ် ပှၤလၢအမၤဘၣ်ဒိ ပသးတဖၣ် အတၢ်ကမၣ်ထီဘိ. (စံး ၈၆:၅; လူၤ ၁၇:၄) လၢတၢ်မၤလိအံၤ ပကတဲသကိး တၢ်ဂ့ၢ်သၢခါလၢ ကမၤစၢၤပှၤဒ်သိး ပကသးအိၣ် ပျၢ်ကွံာ် ပှၤတၢ်ကမၣ်.
ကွၢ်ကပာ်ကွံာ် နတၢ်တူၢ်ဘၣ်တဂ့ၤ
၅. ဒ်ကတိၤဒိ ၁၂:၁၈ ပာ်ဖျါထီၣ်ဝဲအသိး ဖဲပှၤတဂၤ မၤဘၣ်ဒိပသးအခါ ပကတူၢ်ဘၣ်ဒ်လဲၣ်.
၅ တဘျီတခီၣ်န့ၣ် ခီဖျိလၢ ပှၤတဂၤ အတၢ်တဲ မ့တမ့ၢ် အတၢ်မၤအဃိ ပသးကဘၣ်ဒိ. ဒီးပှၤလၢအမၤဘၣ်ဒိ ပသးတဂၤ အမ့ၢ်ကဲ ပသကိးလၢ ပရ့အီၤမုာ် မ့တမ့ၢ် ပဟံၣ်ဖိဃီဖိန့ၣ် ပသးကဘၣ်ဒိဒိၣ်မး. (စံး ၅၅:၁၂-၁၄) ဒီးတဘျီတခီန့ၣ် ပကသးပှံၢ်ထီၣ်တၢ် ဒိၣ်မး ဒီးပတူၢ်ဘၣ် ဒ်သိးဒီး ပှၤလၢအမၤဘၣ်ဒိ ပသးတဂၤန့ၣ် ဆဲးပှၤဒီးဒီ. (ဖး ကတိၤဒိ ၁၂:၁၈.) ဘၣ်သ့ၣ်သ့ၣ် ပကဂုာ်ကျဲးစၢး သးပ့ၤနီၣ်ကွံာ် မ့တမ့ၢ် ကွၢ်ကပာ်ကွံာ် ပတၢ်တူၢ်ဘၣ်လၢ အမၤဆါပသး. ဘၣ်ဆၣ် ပမ့ၢ်မၤဒ်န့ၣ်န့ၣ် အလီၤဂာ်ဒ်သိးဒီး ပှၤဆဲးပှၤဒီးဒီ ဒီးဒီအိၣ်တ့ၢ်လၢ ပတၢ်ပူၤလီၢ်. အဃိ ပမ့ၢ်ကွၢ်ကပာ်ကွံာ် ပတၢ်တူၢ်ဘၣ်လၢ အလီၤဂာ်ဒီး တၢ်ပူၤလီၢ်န့ၣ် ပတၢ်တူၢ်ဘၣ်လၢ အမၤဆါပသး လီၤမၢ်ကွံာ် တန့ၢ်ဘၣ်.
၆. ဖဲပှၤတဂၤ မၤဘၣ်ဒိပသးအခါ ပကမၤဒ်လဲၣ်.
၆ ဖဲပှၤတဂၤ မၤဘၣ်ဒိပသးအခါ ဘၣ်သ့ၣ်သ့ၣ် ပကသးပှံၢ်ထီၣ်တၢ်. လံာ်စီဆှံ တဲဝဲလၢ တဘျီတခီၣ်န့ၣ် ပကသးဒိၣ်ထီၣ်တၢ် ဘၣ်ဆၣ် လံာ်စီဆှံ ဟ့ၣ်ပလီၢ်ပှၤလၢ ပတဘၣ်ဆဲး သးဒိၣ်ထီၣ်တၢ်ဘၣ်. (စံး ၄:၄; အ့း ၄:၂၆) ဘၣ်မနုၤအဃိလဲၣ်. ညီနုၢ်န့ၣ် ပမၤတၢ်ဒ် ပတၢ်တူၢ်ဘၣ် အိၣ်ဝဲအသိး. ဒီးပမ့ၢ်သးပှံၢ်ထီၣ်တၢ်န့ၣ် ပကမၤကမၣ်ဘၣ်တၢ်. (ယၤ ၁:၂၀) အဃိ ပကဘၣ် သ့ၣ်နီၣ်ထီၣ်လၢ ဖဲပှၤမၤဘၣ်ဒိပသးအခါ ပကသးဒိၣ်ထီၣ်တၢ် ဘၣ်ဆၣ် ပကဆဲး သးဒိၣ်ထီၣ်တၢ်ဧါ တသးဒိၣ်ထီၣ်တၢ်ဧါန့ၣ် ဒိးသန့ၤထီၣ်သးလၢ ပနီၢ်ကစၢ်.
ပကဆဲး သးဒိၣ်ထီၣ်တၢ်ဧါ တသးဒိၣ်ထီၣ်တၢ်ဧါန့ၣ် ဒိးသန့ၤထီၣ်သးလၢ ပနီၢ်ကစၢ်
၇. ပှၤတနီၤန့ၣ် ဖဲပှၤတရ့အီၤ တီတီလိၤလိၤဘၣ်အခါ အဝဲသ့ၣ် တူၢ်ဘၣ်ဝဲဒ်လဲၣ်.
၇ ဖဲပှၤတရ့ပှၤ တီတီလိၤလိၤဘၣ်အခါ ပသးဘၣ်ဒိဒိၣ်မး. အဒိ ဒီပုၢ်ဝဲၢ်မုၣ်အဲ တဲဝဲလၢ “ဖဲယနီၢ်ဆံးခါန့ၣ် ယပါပာ်တ့ၢ်ကွံာ်ယမိ ဒီးအဖျီအသးဒီး ပှၤလၢအကွၢ်ထွဲပှၤတဂၤ. ဖဲန့ၣ်အခါ ယတူၢ်ဘၣ်လၢ ပှၤတကနၣ်ဃုာ်ယၤဘၣ်. ဖဲအဝဲသ့ၣ်ဖိအိၣ်အခါ ယတူၢ်ဘၣ်ဒ်သိးဒီး အဖိဂုာ်န့ၢ်ယလီၢ် ဒီးဖဲယဒိၣ်ထီၣ်အခါ ယတူၢ်ဘၣ်လၢ ပှၤတလီကီယၤဘၣ်.” မ့မ့ၢ် ဒီပုၢ်ဝဲၢ်မုၣ်ကၠီၣ်ကၠဲးန့ၣ် ဖဲအဝၤ တတီဒီးအီၤလၢၤဘၣ်အခါ အတူၢ်ဘၣ်ဝဲဒ်လဲၣ်. အတဲဝဲလၢ “ပကဲဒီသကိးလၢ ပနီၢ်ဆံးခါ ဒီးပမၤပှၤလဲၤလၢညါ ဒ်သိးသိး. အဃိ ဖဲအတတီဒီးယၤလၢၤဘၣ်အခါ ယသးဘၣ်ဒိညါ.” မ့မ့ၢ်လၢ ဒီပုၢ်ဝဲၢ်မုၣ်န့ၤအိမံၤန့ၣ် အတဲဝဲလၢ “ယဝၤ ကမၤဘၣ်ဒိယသးန့ၣ် ယတဆိကမိၣ်ဘၣ် နီတဘျီဘၣ်. ဖဲအတဲယၤလၢ အကွၢ်ခူသူၣ် တၢ်ဂီၤဘ့ၣ်ဆ့အခါ ယတူၢ်ဘၣ်လၢ အတတီဒီးယၤလၢၤဘၣ်.”
၈. (က) ဘၣ်မနုၤအဃိ ပကဘၣ် ပျၢ်ကွံာ် ပှၤတၢ်ကမၣ်လဲၣ်. (ခ) ပမ့ၢ်ပျၢ်ကွံာ် ပှၤတၢ်ကမၣ်န့ၣ် ပကန့ၢ်ဘၣ် အဘျုးဒ်လဲၣ်. (ကွၢ်တၢ်လွံၢ်နၢၣ် လၢအမ့ၢ် “ ပှၤတဂၤဂၤ မ့ၢ်မၤဘၣ်ဒိပသးန့ၣ် ပကဘၣ်မၤဒ်လဲၣ်.”)
၈ ပှၤဂၤကတဲပှၤဒ်လဲၣ် ဒီးကမၤပှၤဒ်လဲၣ်န့ၣ် ပတြီအဝဲသ့ၣ် တသ့ဘၣ်. ဘၣ်ဆၣ် ပဂုာ်ကျဲးစၢး ပၢၤပသးသ့. ဒီးတၢ်အဂ့ၤကတၢၢ်လၢ ပမၤသ့န့ၣ် မ့ၢ်ဝဲ ပပျၢ်ကွံာ် အဝဲသ့ၣ် တၢ်ကမၣ်. ဘၣ်မနုၤအဃိ ပတဲဒ်န့ၣ်လဲၣ်. ခီဖျိလၢ ပအဲၣ်ယဟိဝၤယွၤအဃိ ဒီးယဟိဝၤယွၤ ဘၣ်သးလၢ ပကပျၢ်ကွံာ် ပှၤတၢ်ကမၣ်. ပမ့ၢ်ဆဲး သးဒိၣ်ထီၣ်တၢ် ဒီးတပျၢ်ကွံာ် ပှၤတၢ်ကမၣ်ဘၣ်န့ၣ် ဘၣ်သ့ၣ်သ့ၣ် ပကမၤကြီဘၣ်တၢ် ဒီးပကမၤဘၣ်ဒိ ပတၢ်အိၣ်ဆူၣ်အိၣ်ချ့. (ကတိၤ ၁၄:၁၇, ၂၉, ၃၀) အဒိ ဒီပုၢ်ဝဲၢ်မုၣ်ခရံၣ်စတံ တဲဝဲလၢ “ဖဲယသးဘၣ်ဒိအခါ ယနံၤမးတမုာ်ဘၣ်. ယအီၣ်တၢ်လၢ အတန့ၢ်ဂံၢ်န့ၢ်ဘါဘၣ်. ယမံတဘျဲဘၣ် ဒီးယပၢၤသး တန့ၢ်ဘၣ်အဃိ ယတရ့ဒီးယဝၤ ဒီးပှၤဂၤဂ့ၤဂ့ၤဘၣ်.”
၉. ဘၣ်မနုၤအဃိ ပတဘၣ်ဆဲး သးဒိၣ်ထီၣ်တၢ်ဘၣ်လဲၣ်.
၉ ပှၤလၢ အမၤဘၣ်ဒိပသးတဂၤ မ့ၢ်တဃ့ပျၢ် အတၢ်ကမၣ်ဘၣ် သနာ်က့ ဒ်သိးပတဆဲး သးဒိၣ်ထီၣ်တၢ် တဂ့ၤအဂီၢ် ပကဘၣ်မၤဒ်လဲၣ်. ဒီပုၢ်ဝဲၢ်မုၣ်ကၠီၣ်ကၠဲး လၢပတဲအဂ့ၢ်န့ၣ် အတဲဝဲလၢ “ယသးဒိၣ်ထီၣ် ယဝၤလီၢ်လံၤ ဖးယံာ်ညါ. ဘၣ်ဆၣ် လၢခံန့ၣ် ယပျၢ်ကွံာ် အတၢ်ကမၣ် ဒီးတဆဲး သးဒိၣ်ထီၣ်အီၤ လၢၤဘၣ်အဃိ ယသးမုာ်ထီၣ်က့ၤ ဖးဒိၣ်ညါ.” ပထံၣ်ဘၣ်လၢ ပမ့ၢ်တဆဲး သးဒိၣ်ထီၣ်တၢ်ဘၣ် ဒီးပျၢ်ကွံာ် ပှၤတၢ်ကမၣ်န့ၣ် ပကရ့ဒီးပှၤဂၤဂ့ၤဂ့ၤ. ပတဆိကမိၣ် တၢ်ကဲထီၣ်သး လၢအပူၤကွံာ်လၢၤဘၣ်အဃိ အကဲဘျုးလၢ ပနီၢ်ကစၢ်အဂီၢ် ဒီးပကသးခု. (ကတိၤ ၁၁:၁၇) ဘၣ်ဆၣ် ပပျၢ်ကွံာ် ပှၤတၢ်ကမၣ် မ့ၢ်တန့ၢ်ဒံးဘၣ်န့ၣ် ပကဘၣ်မၤဒ်လဲၣ်.
ဒ်သိးပတဆဲး သးဒိၣ်ထီၣ်တၢ် တဂ့ၤအဂီၢ် ပဘၣ်မၤဒ်လဲၣ်
၁၀. ဒ်သိးပတဆဲး သးဒိၣ်ထီၣ်တၢ် တဂ့ၤအဂီၢ် ဘၣ်မနုၤအဃိ ပလိၣ်ဘၣ် တၢ်ဆၢကတီၢ်လဲၣ်. (ကွၢ်စ့ၢ်ကီးတၢ်ဂီၤ.)
၁၀ ဒ်သိးပတဆဲး သးဒိၣ်ထီၣ်တၢ် တဂ့ၤအဂီၢ် ပကလိၣ်ဘၣ် တၢ်ဆၢကတီၢ်တတီၤဖိ. အဒိ ကသံၣ်သရၣ် ကူစါယါဘျါ ပှၤလၢအဘၣ်ဒိတဂၤ မ့ၢ်ဝံၤသနာ်က့ ဒ်သိးအကဘျါက့ၤ မူာ်မူာ်နီၢ်နီၢ်အဂီၢ် အကလိၣ်ဘၣ် တၢ်ဆၢကတီၢ်ဒံး. ပဝဲစ့ၢ်ကီး ဒ်သိးပတဆဲး သးဒိၣ်ထီၣ်တၢ်တဂ့ၤ ဒီးပပျၢ်ကွံာ် ပှၤတၢ်ကမၣ်လၢ ပသးဒီဖျၢၣ် ကန့ၢ်အဂီၢ် ပကလိၣ်ဘၣ် တၢ်ဆၢကတီၢ်.—စံၣ် ၃:၃; ၁ ပ့း ၁:၂၂.
ဒ်သိး ပှၤလၢအဘၣ်ဒိတဂၤ ကဘျါက့ၤ မူာ်မူာ်နီၢ်နီၢ်အဂီၢ် အကလိၣ်ဘၣ် တၢ်ဆၢကတီၢ်. ဒ်န့ၣ်အသိး ဖဲပှၤမၤဘၣ်ဒိပသးအခါ ဒ်သိး ပတၢ်သးဘၣ်ဒိ ကလီၤမၢ်အဂီၢ် ပလိၣ်ဘၣ် တၢ်ဆၢကတီၢ်စ့ၢ်ကီး (ကွၢ်လံာ်အဆၢ ၁၀)
၁၁. ဒ်သိး ပကသးအိၣ်ပျၢ်ကွံာ် ပှၤတၢ်ကမၣ်အဂီၢ် တၢ်ထုကဖၣ် မၤစၢၤပှၤသ့ဒ်လဲၣ်.
၁၁ ဒ်သိး ပကသးအိၣ်ပျၢ်ကွံာ် ပှၤတၢ်ကမၣ်အဂီၢ် ပကဘၣ်ဃ့ ယဟိဝၤယွၤ အတၢ်မၤစၢၤ. c ဒီပုၢ်ဝဲၢ်မုၣ်အဲ လၢပတဲတ့ၢ်အဂ့ၢ်န့ၣ် တၢ်ထုကဖၣ် မၤစၢၤအီၤဒိၣ်မး. အတဲဝဲလၢ “တၢ်လၢ ယၤဒီးယဟံၣ်ဖိဃီဖိ တဲကမၣ် ဒီးမၤကမၣ်ဘၣ် တမံၤမံၤန့ၣ် ယဃ့ ယဟိဝၤယွၤလၢ အကပျၢ်ကွံာ် ပတၢ်ကမၣ်. ဝံၤဘျီ ယကွဲးန့ၢ် ယပါဒီးအမါ လံာ်ပရၢ ဒီးတဲအဝဲသ့ၣ်လၢ ယပျၢ်ကွံာ် အဝဲသ့ၣ် တၢ်ကမၣ်.” ဒီပုၢ်ဝဲၢ်မုၣ်အဲ တဲဝဲလၢ အကမၤဒ်န့ၣ်အဂီၢ် အတညီဘၣ်. ဘၣ်ဆၣ် အတဲဝဲလၢ “ယကွၢ်လိ ယဟိဝၤယွၤ လၢအပျၢ်ကွံာ် ပတၢ်ကမၣ်အဃိ ယမုၢ်လၢ်လၢ ကကဲထီၣ် တၢ်မၤစၢၤလၢ ယပါဒီးအမါ ကမၤလိအါထီၣ် ယဟိဝၤယွၤအဂ့ၢ်.”
၁၂. ဘၣ်မနုၤအဃိ ပကဘၣ်နာ်န့ၢ် ယဟိဝၤယွၤ အါန့ၢ်ဒံး ပနီၢ်ကစၢ် တၢ်တူၢ်ဘၣ်လဲၣ်. (ကတိၤဒိ ၃:၅, ၆)
၁၂ နာ်န့ၢ် ယဟိဝၤယွၤ ဒီးတဘၣ် ဆိကမိၣ်လၢ နတၢ်ထံၣ် ဘၣ်ထီဘိတဂ့ၤ. (ဖး ကတိၤဒိ ၃:၅, ၆.) ယဟိဝၤယွၤ သ့ၣ်ညါ တၢ်အဂ့ၤကတၢၢ် လၢပဂီၢ်ထီဘိ. (ၡါ ၅၅:၈, ၉) ဒီးတၢ်လၢ ကမၤဘၣ်ဒိပှၤန့ၣ် အတမၢပမၤ နီတဘျီဘၣ်. အဟ့ၣ်ဂံၢ်ဟ့ၣ်ဘါပှၤလၢ ပကပျၢ်ကွံာ် ပှၤတၢ်ကမၣ် ဒီးပမ့ၢ်မၤဒ်န့ၣ်န့ၣ် ပကသးခု. (စံး ၄၀:၄; ၡါ ၄၈:၁၇, ၁၈) ဘၣ်ဆၣ် ပမ့ၢ်ဆိကမိၣ်လၢ ပတၢ်ထံၣ် ဘၣ်ထီဘိန့ၣ် ဘၣ်သ့ၣ်သ့ၣ် ပပျၢ်ကွံာ် ပှၤတၢ်ကမၣ် တန့ၢ်နီတဘျီဘၣ်. (ကတိၤ ၁၄:၁၂; ယံး ၁၇:၉) ဒီပုၢ်ဝဲၢ်မုၣ်န့ၤအိမံၤ လၢပတဲတ့ၢ်အဂ့ၢ်န့ၣ် အတဲဝဲလၢ “ခီဖျိလၢ ယဝၤ ကွၢ်တၢ်ဂီၤဘ့ၣ်ဆ့အဃိ ခီၣ်ထံးခါန့ၣ် ယဆိကမိၣ်လၢ ယတလိၣ် ပျၢ်ကွံာ် အတၢ်ကမၣ်ဘၣ်. ယဘၣ်ယိၣ်လၢ တၢ်လၢအမၤဝဲန့ၣ် အတဆိကမိၣ်လၢ အမၤဘၣ်ဒိယၤဘၣ် ဒီးယဘၣ်ယိၣ်စ့ၢ်ကီးလၢ အကမၤဘၣ်ဒိယသး လၢအသီတဘျီ. ယဆိကမိၣ်လၢ ယဟိဝၤယွၤ နၢ်ပၢၢ်ယတၢ်တူၢ်ဘၣ်. ဘၣ်ဆၣ်လၢခံ ယသ့ၣ်ညါထီၣ်လၢ ယဟိဝၤယွၤ နၢ်ပၢၢ် ယတၢ်တူၢ်ဘၣ် သနာ်က့ အသးတလီၤပလိာ်ဒီးယၤ ခဲလၢာ်ဘၣ်. ဒီးဒ်သိး ယတဆဲး သးဒိၣ်ထီၣ်တၢ် တဂ့ၤအဂီၢ် အသ့ၣ်ညါဝဲလၢ ယကလိၣ်ဘၣ် တၢ်ဆၢကတီၢ် သနာ်က့ အအဲၣ်ဒိးလၢ ယကပျၢ်ကွံာ် ယဝၤအတၢ်ကမၣ်.” d
ဒုးအိၣ်ထီၣ် တၢ်ပာ်သူၣ်ပာ်သး လၢအဂ့ၤ
၁၃. ဒ် ရိမ့ၤ ၁၂:၁၈-၂၁ ပာ်ဖျါထီၣ်ဝဲအသိး ပကဘၣ်မၤ မနုၤလဲၣ်.
၁၃ ဖဲပပျၢ်ကွံာ် ပှၤလၢအမၤဘၣ်ဒိပသး ဒိၣ်မးတဂၤ အတၢ်ကမၣ်အခါ ပတဘၣ် တဲဖျါထီၣ်က့ၤ တၢ်ကဲထီၣ်သးလၢ အပူၤကွံာ်ဘၣ်. ထဲန့ၣ်တကးဒံးဘၣ် ပှၤလၢအမၤဘၣ်ဒိပသးတဂၤ မ့မ့ၢ်ဒီပုၢ်ဝဲၢ်မုၣ်ခွါန့ၣ် ပကဘၣ် ဂုာ်ကျဲးစၢး မၤဃူမၤဖိးက့ၤတၢ်ဒီးအီၤ. (မး ၅:၂၃, ၂၄) ဒီးလၢ ပကသးဒိၣ်ထီၣ်တၢ်အလီၢ် ပကဘၣ်ဂုာ်ကျဲးစၢး ပာ်ဖျါထီၣ် တၢ်သးကညီၤ ဒီးပျၢ်ကွံာ် ပှၤတၢ်ကမၣ်. (ဖး ရိမ့ၤ ၁၂:၁၈-၂၁; ၁ ပ့း ၃:၉) ပကမၤဒ်န့ၣ်အဂီၢ် တၢ်မနုၤ ကမၤစၢၤပှၤလဲၣ်.
၁၄. ဘၣ်မနုၤအဃိ ပကဘၣ်ဃုထံၣ် ပှၤဂၤအတၢ်ဂ့ၤတၢ်ဝါလဲၣ်.
၁၄ ယဟိဝၤယွၤ ဃုထံၣ်ဝဲ ပတၢ်ဂ့ၤတၢ်ဝါထီဘိ. (၂ ကွဲး ၁၆:၉; စံး ၁၃၀:၃) အဃိ ပဝဲစ့ၢ်ကီး ပကဘၣ်ဃုထံၣ် ပှၤလၢအမၤဘၣ်ဒိပှၤတဂၤန့ၣ် အတၢ်ဂ့ၤတၢ်ဝါ. ညီနုၢ်န့ၣ် ဖဲပရ့ဒီးပှၤဂၤအခါ ပကထံၣ် အဝဲသ့ၣ် အတၢ်ဂ့ၤတၢ်ဝါ ဒီးအတၢ်လီၤတူာ်လီၤကာ်. ဘၣ်ဆၣ် ပမ့ၢ်ကွၢ်လၢ ပှၤဂၤအတၢ်ဂ့ၤတၢ်ဝါန့ၣ် ကမၤစၢၤပှၤလၢ ပကပျၢ်ကွံာ် ပှၤတၢ်ကမၣ်. အဒိ ဒီပုၢ်ဝဲၢ်ခွါကၠါရိၣ် တဲဝဲလၢ “ဖဲဒီပုၢ်ဝဲၢ်ခွါတဂၤ မၤကမၣ်ယၤအခါ ယတဆိကမိၣ် တၢ်လၢအမၤကမၣ်ဝဲဘၣ် ဒီးယဆိကမိၣ်ထီၣ်လၢ အတၢ်ဂ့ၤတၢ်ဝါတဖၣ်အဃိ မၤစၢၤယၤလၢ ယကပျၢ်ကွံာ် အတၢ်ကမၣ်.”
၁၅. ပမ့ၢ်တဲ ပှၤလၢအမၤကမၣ်ပှၤ တဂၤလၢ ပပျၢ်ကွံာ် အတၢ်ကမၣ်န့ၣ် ကကဲဘျုးဒ်လဲၣ်.
၁၅ တၢ်အရ့ဒိၣ်လၢ အဂၤတမံၤန့ၣ်မ့ၢ်ဝဲ ပကဘၣ်တဲ ပှၤလၢအမၤကမၣ်ပှၤ တဂၤန့ၣ်လၢ ပပျၢ်ကွံာ် အတၢ်ကမၣ်. ဘၣ်မနုၤအဃိ ပကဘၣ်မၤဒ်န့ၣ်လဲၣ်. ဒီပုၢ်ဝဲၢ်မုၣ်န့ၤအိမံၤ လၢပတဲတ့ၢ်အဂ့ၢ်န့ၣ် အတဲဝဲလၢ “ယဝၤသံကွၢ်ယၤလၢ ‘နပျၢ် ယတၢ်ကမၣ်လံဧါ.’ ဖဲန့ၣ်အခါ ယကတဲအီၤလၢ ‘ယပျၢ်နတၢ်ကမၣ်’ န့ၣ် ယတဲမးတထီၣ်ဘၣ်. အဃိ ယသ့ၣ်ညါလီၤသးလၢ ယတပျၢ် အတၢ်ကမၣ် လၢာ်လၢာ်ဆ့ဆ့ဒံးဘၣ်. ဘၣ်ဆၣ် လၢခံန့ၣ် ယတဲအီၤလၢ ‘ယပျၢ်နတၢ်ကမၣ်လံ.’ ဖဲယတဲလၢ ယပျၢ်ကွံာ် အတၢ်ကမၣ်အခါ အသးခုဖးဒိၣ် ဒီးအမဲာ်ထံလီၤ ဒီးယၤစ့ၢ်ကီး ယသးမုာ်ထီၣ်က့ၤ. ဖဲန့ၣ်ဝံၤအလီၢ်ခံ ယနာ်န့ၢ်က့ၤယဝၤ ဒီးပတၢ်ရ့လိာ်သး ဂ့ၤထီၣ်က့ၤ ဒ်သိးလၢညါ.”
၁၆. ဘၣ်ဃးဒီး တၢ်ပျၢ်ကွံာ် ပှၤတၢ်ကမၣ်န့ၣ် နန့ၢ်ဘၣ် တၢ်မၤလိဒ်လဲၣ်.
၁၆ ယဟိဝၤယွၤ အဲၣ်ဒိးလၢ ပကပျၢ်ကွံာ် ပှၤတၢ်ကမၣ်. (ကလီး ၃:၁၃) သနာ်က့ ပကပျၢ်ကွံာ် ပှၤတၢ်ကမၣ်အဂီၢ် တဘျီတခီန့ၣ် အတညီဘၣ်. ဘၣ်ဆၣ် ပမ့ၢ်တကွၢ်ကပာ်ကွံာ် ပတၢ်တူၢ်ဘၣ်ဘၣ် ဒီးဂုာ်ကျဲးစၢးဟးဆှဲး တၢ်သးဒိၣ်ထီၣ်တၢ်န့ၣ် ပပျၢ်ကွံာ် ပှၤတၢ်ကမၣ် ကညီဝဲ. ဒီးပဒုးအိၣ်ထီၣ် တၢ်ပာ်သူၣ်ပာ်သး လၢအဂ့ၤကသ့.—ကွၢ်တၢ်လွံၢ်နၢၣ် လၢအမ့ၢ် “ တၢ်ဂ့ၢ်သၢထံၣ်လၢ ကမၤစၢၤပှၤဒ်သိး ပကပျၢ်ကွံာ် ပှၤတၢ်ကမၣ်.”
သးစၢၢ်ဆၢလၢ ပကန့ၢ်ဘၣ်အဘျုး ခီဖျိလၢ ပပျၢ်ကွံာ် ပှၤတၢ်ကမၣ်
၁၇. ပမ့ၢ်ပျၢ်ကွံာ် ပှၤတၢ်ကမၣ်န့ၣ် ပကန့ၢ်ဘၣ်အဘျုး ဒ်လဲၣ်.
၁၇ ခီဖျိလၢ ပပျၢ်ကွံာ် ပှၤတၢ်ကမၣ်အဃိ ပန့ၢ်ဘၣ်အဘျုးအါမး. ပကကွၢ်သကိး တၢ်ဂ့ၢ်တနီၤ. ပမ့ၢ်ပျၢ်ကွံာ် ပှၤတၢ်ကမၣ်န့ၣ် တၢ, ပကွၢ်လိ ယဟိဝၤယွၤ လၢအအိၣ်ဒီး တၢ်သးကညီၤ ဒီးပမၤသးခုအသး. (လူၤ ၆:၃၆) ခံ, ပပာ်ဖျါထီၣ်လၢ ပစံးဘျုးက့ၤ ယဟိဝၤယွၤ လၢအပျၢ်ကွံာ် ပတၢ်ကမၣ်. (မး ၆:၁၂) သၢ, ပတၢ်အိၣ်ဆူၣ်အိၣ်ချ့ ကဂ့ၤထီၣ် ဒီးပတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤဒိၣ်ထီၣ်.
၁၈-၁၉. ပမ့ၢ်ပျၢ်ကွံာ် ပှၤတၢ်ကမၣ်န့ၣ် ကကဲဘျုးဒ်လဲၣ်.
၁၈ ဖဲပပျၢ်ကွံာ် ပှၤတၢ်ကမၣ်အခါ ပကဒိးန့ၢ်ဘၣ် တၢ်ဆိၣ်ဂ့ၤလၢ ပတဆိကမိၣ်ဘၣ်ဘၣ်. ခဲအံၤ ပကကွၢ်က့ၤ ဒီပုၢ်ဝဲၢ်မုၣ်ဒဲနံး လၢပတဲတ့ၢ်အဂ့ၢ်န့ၣ် အတၢ်လဲၤခီဖျိ. ဖဲပိာ်ခွါတဂၤ တဲးဘၣ် ဒီပုၢ်ဝဲၢ်မုၣ်ဒဲနံးအကါ ဝံၤအလီၢ်ခံ ပိာ်ခွါတဂၤန့ၣ် ပာ်လီၤသးလၢ အထီၣ်ရူမ့ၢ်ဝံၤန့ၣ် အကမၤသံလီၤသး. ဖဲန့ၣ်အခါ ဒီပုၢ်ဝဲၢ်မုၣ်ဒဲနံး တသ့ၣ်ညါဝဲ တၢ်ဂ့ၢ်အံၤဘၣ်. ဘၣ်ဆၣ် ခီဖျိလၢ အပျၢ်ကွံာ် ပိာ်ခွါတဂၤအံၤ အတၢ်ကမၣ်အဃိ ထုးန့ၢ်ဝဲ ပိာ်ခွါတဂၤအံၤ အသးဒိၣ်မး. ဒီးပိာ်ခွါတဂၤအံၤ စးထီၣ်မၤလိ လံာ်စီဆှံဒီး ယဟိဝၤပှၤအုၣ်အသး.
၁၉ ဘၣ်သ့ၣ်သ့ၣ် ပကတူၢ်ဘၣ်လၢ ပကပျၢ်ကွံာ် ပှၤတၢ်ကမၣ်န့ၣ် အတညီ နီတစဲးဘၣ်. ဘၣ်ဆၣ် ပမ့ၢ်ပျၢ်ကွံာ် ပှၤတၢ်ကမၣ်န့ၣ် ပကန့ၢ်ဘၣ်အဘျုး. (မး ၅:၇) အဃိ မ်ပဂုာ်ကျဲးစၢးကွၢ်လိ ယဟိဝၤယွၤ လၢအသးအိၣ် ပျၢ်ကွံာ် ပတၢ်ကမၣ်န့ၣ် အဒိအတဲာ်ထီဘိ.
တၢ်သးဝံၣ် ၁၂၅ “ပှၤလၢအပာ်ဖျါထီၣ် တၢ်သးကညီၤန့ၣ် ကသးခု”
a ပှၤမံၤတနီၤန့ၣ် ပှၤဆီတလဲဝဲ.
b ခရံာ်ဖိတဂၤစုာ်စုာ် မ့ၢ်ထံၣ်ဘၣ် တၢ်အိၣ်သးဒ်အံၤန့ၣ် အကဘၣ် ဆၢတဲာ်တၢ်လၢ အနီၢ်ကစၢ်.
c ကွၢ် တၢ်သးဝံၣ်အဂၤတဖၣ် လၢ jw.org အပူၤ လၢအခိၣ်တီမ့ၢ်ဝဲ “Forgive One Another,” “Forgive Freely” ဒီး “Friends Again.”
d ပှၤတဂၤလၢ အကွၢ်တၢ်ဂီၤဘ့ၣ်ဆ့န့ၣ် အမၤတၢ်ကမၣ် ဒီးအမၤဘၣ်ဒိ အသးသမူ တံၤသကိးအသး. သနာ်က့ လံာ်စီဆှံ တဟ့ၣ်အခွဲးလၢ အသးသမူ တံၤသကိးလၢ အတၢ်ကမၣ် တအိၣ်ဘၣ်တဂၤ ကမၤလီၤဖးအသးဒီးအီၤ လၢတၢ်ဂ့ၢ်အံၤအဃိဘၣ်.
