၁. ဘၣ်မနုၤအဃိ ပတဲလၢ ခဲအံၤ ပအိၣ်မူဘၣ်လၢ ဆၢကတီၢ်လၢ အလီၤသူၣ်ပိၢ်သးဝးလဲၣ်.

 ခဲအံၤ ပအိၣ်မူဘၣ်လၢ ဆၢကတီၢ်လၢ အလီၤသူၣ်ပိၢ်သးဝးဒိၣ်မး. ဒီးတၢ်လၢလံာ်စီဆှံ တဲပာ်စၢၤဝဲန့ၣ် ပထံၣ်ဘၣ်လၢ အဟဲလၢပှဲၤထီၣ် ကိးနံၤဒဲး. အဒိ ပထံၣ်ဘၣ်လၢ “ကလံၤစိးအစီၤပၤ” ဒီး “ကလံၤထံးအစီၤပၤ” ဘၣ်သးဒိၣ်စိလၢ ဟီၣ်ခိၣ်ဒီဘ့ၣ်အဃိ အဝဲသ့ၣ် ပြၢလိာ်သး. (ဒၤ ၁၁:၄၀) ပထံၣ်ဘၣ်စ့ၢ်ကီးလၢ ဘီမုၢ်တၢ်သးခုကစီၣ်န့ၣ် ပှၤစံၣ်တဲၤတဲလီၤဝဲလၢ ဟီၣ်ခိၣ်ဒီဘ့ၣ်ညါ ဒီးပှၤအကကွဲၢ်တဖၣ် ဘူၣ်ထီၣ်ဘါထီၣ်က့ၤ ယဟိဝၤယွၤ. (ၡါ ၆၀:၂၂; မး ၂၄:၁၄) တကးဒံးဘၣ် ပဒိးန့ၢ်ဘၣ် နီၢ်သးတၢ်အီၣ် “ဖဲအဆၢကတီၢ်လၢ အကြၢးဝဲဘၣ်ဝဲ” အါအါဂီၢ်ဂီၢ်.—မး ၂၄:၄၅-၄၇.

၂. ဘၣ်ဃးဒီး တၢ်ကကဲထီၣ်သး လၢခါဆူညါန့ၣ် ပကသ့ၣ်ညါဘၣ် မနုၤလဲၣ် ဒီးပကဘၣ် သ့ၣ်နီၣ်ထီၣ် မနုၤလဲၣ်.

^၂ ဘၣ်ဃးဒီး တၢ်ကကဲထီၣ်သး လၢခါဆူညါန့ၣ် ယဟိဝၤယွၤ ဆဲးမၤစၢၤပှၤအဃိ ပနၢ်ပၢၢ်တၢ်ဂ့ၢ် ၡဲဒိၣ်ထီၣ်မၣ်ဒိၣ်ထီၣ်. (ကတိၤ ၄:၁၈; ဒၤ ၂:၂၈) ဒီးဖဲတၢ်နးတၢ်ဖှီၣ်ဖးဒိၣ် စးထီၣ်အခါ ဒ်သိးပကဆဲးအိၣ်ဒီး တၢ်သးတီ ဒီးဆဲးအိၣ်ဃူဃူဖိးဖိးအဂီၢ် ပကဘၣ်မၤဒ်လဲၣ်န့ၣ် ပကသ့ၣ်ညါဘၣ် တၢ်ဂ့ၢ်ခဲလၢာ်လၢ ပကြၢးသ့ၣ်ညါ. သနာ်က့ ဘၣ်ဃးဒီး တၢ်ကကဲထီၣ်သး လၢခါဆူညါန့ၣ် ပကဘၣ် သ့ၣ်နီၣ်ထီၣ်လၢ တၢ်ဂ့ၢ်လၢ ပတသ့ၣ်ညါဘၣ်န့ၣ် ကအိၣ်တနီၤ. လၢတၢ်မၤလိတခါအံၤ ပကတဲသကိးဆိ ဘၣ်ဃးဒီး ဘၣ်မနုၤအဃိ ပမၤဘၣ်ထီၣ်က့ၤ ပတၢ်နၢ်ပၢၢ် ဘၣ်ဃးဒီး တၢ်ကကဲထီၣ်သး လၢခါဆူညါ အဂ့ၢ်တနီၤလဲၣ်. ဝံၤဒီး ပကကွၢ်ကဒါက့ၤ တၢ်ဂ့ၢ်တနီၤလၢ ပသ့ၣ်ညါ ဒီးတဲသကိး ဘၣ်ဃးဒီး ယဟိဝၤယွၤ ကစံၣ်ညီၣ်တၢ် ဒ်လဲၣ်အဂ့ၢ်.

 တၢ်ဂ့ၢ်လၢ ပတသ့ၣ်ညါဘၣ်

၃. ဖဲတၢ်နးတၢ်ဖှီၣ်ဖးဒိၣ် စးထီၣ်အခါ ဘၣ်ဃးဒီး ပှၤလၢတဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် လၢညါ ပနၢ်ပၢၢ်ဒ်လဲၣ် ဒီးဘၣ်မနုၤအဃိ ပဆိကမိၣ် ဒ်န့ၣ်လဲၣ်.

^၃ လၢညါ ပနၢ်ပၢၢ်လၢ ဖဲတၢ်နးတၢ်ဖှီၣ်ဖးဒိၣ် စးထီၣ်အခါ ပှၤလၢတဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် တအိၣ်ဒီး တၢ်ခွဲးတၢ်ယာ်လၢ ကဘူၣ်ထီၣ်ဘါထီၣ် ယဟိဝၤယွၤ ဒီးပူၤဖျဲးလၢ အၢ်မက့းဒိၣ်တၢ်ဒုးဘၣ်. ပနၢ်ပၢၢ်ဒ်န့ၣ် ခီဖျိလၢ ပဆိကမိၣ်လၢ တၢ်ကဲထီၣ်သးဖဲ ထံလုၢ်ဘၢတၢ်အစိၤန့ၣ် မ့ၢ်ဝဲ ဝံအတၢ်စံးပာ်လၢ အဒိလီၤဝဲ တၢ်လၢကကဲထီၣ်သး လၢပစိၤခဲအံၤ. အဒိ တချုးဖဲ ထံလုၢ်ဘၢတၢ်ဒံးဘၣ်န့ၣ် ယဟိဝၤယွၤ “ကးတံာ်ဝဲတြဲၤ” အဃိ ပှၤအဂၤ နုာ်လီၤလၢ ကဘီပူၤတန့ၢ်လၢၤဘၣ်. အဃိ ပဆိကမိၣ်လၢ ဖဲတၢ်နးတၢ်ဖှီၣ်ဖးဒိၣ် စးထီၣ်အခါ ပှၤလၢတဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် တအိၣ်ဒီး တၢ်ခွဲးတၢ်ယာ်လၢ ကဘူၣ်ထီၣ်ဘါထီၣ် ယဟိဝၤယွၤ ဒီးပူၤဖျဲးနီတဂၤဘၣ်.—မး ၂၄:၃၇-၃၉.

၄. ဘၣ်မနုၤအဃိ ပတဲလၢ တၢ်ကဲထီၣ်သး ဖဲထံလုၢ်ဘၢတၢ်အစိၤန့ၣ် တမ့ၢ်ဝံအတၢ်စံးပာ်လၢ အဒိလီၤဝဲ တၢ်လၢကကဲထီၣ်သး လၢခါဆူညါဘၣ်လဲၣ်.

^၄ တၢ်ကဲထီၣ်သး ဖဲထံလုၢ်ဘၢတၢ်အစိၤန့ၣ် တမ့ၢ်ဝံအတၢ်စံးပာ်လၢ အဒိလီၤဝဲ တၢ်လၢကကဲထီၣ်သး လၢခါဆူညါဘၣ်. ဘၣ်မနုၤအဃိ ပတဲဒ်န့ၣ်လဲၣ်. ခီဖျိလၢ လံာ်စီဆှံ တတဲဝဲ ဒ်န့ၣ်ဘၣ်အဃိ. a သနာ်က့ ယ့ၣ်ၡူး တဲဝဲလၢ တၢ်ကဲထီၣ်သးဖဲ “စီၤနိအၤ အမုၢ်နံၤတဖၣ်” န့ၣ် ကလီၤဂာ်ဒီး တၢ်ကဲထီၣ်သးဖဲ အဟဲက့ၤ အဆၢကတီၢ်. ဘၣ်ဆၣ် တၢ်ကဲထီၣ်သးဖဲ စီၤနိအၤ အမုၢ်နံၤ ဒီးယဟိဝၤယွၤ ကးတံာ်ဝဲတြဲၤန့ၣ် တမ့ၢ်ဝံအတၢ်စံးပာ်လၢ အဒိလီၤဝဲ တၢ်လၢကကဲထီၣ်သး လၢခါဆူညါဘၣ်. သနာ်က့ ပဟံးန့ၢ်တၢ်မၤလိလၢ တၢ်ကဲထီၣ်သး ဖဲထံလုၢ်ဘၢတၢ်အစိၤ ဒီးလၢစီၤနိအၤအအိၣ်သ့ဒံး.

၅. (က) တချုးလၢ ထံလုၢ်ဘၢတၢ်ဒံးဘၣ်န့ၣ် စီၤနိအၤ ပာ်ဖျါထီၣ် အတၢ်နာ်ဒ်လဲၣ်. (ဧ့ၤဘြံၤ ၁၁:၇; ၁ ပ့းတရူး ၃:၂၀) (ခ) ဘၣ်ဃးဒီး တၢ်စံၣ်တဲၤတဲလီၤတၢ် တၢ်မၤန့ၣ် ပတၢ်အိၣ်သး လီၤဂာ်ဒီး စီၤနိအၤ အတၢ်အိၣ်သးဒ်လဲၣ်.

 ^၅ ဖဲစီၤနိအၤ ဒိးန့ၢ်ဘၣ် ယဟိဝၤယွၤ အတၢ်ဟ့ၣ်ပလီၢ်အခါ အပာ်ဖျါထီၣ် အတၢ်နာ်ခီဖျိ အတ့ထီၣ်ကဘီ. (ဖး ဧ့ၤဘြံၤ ၁၁:၇; ၁ ပ့းတရူး ၃:၂၀.) ဒ်န့ၣ်အသိး ပှၤလၢအမၤလိဘၣ် တၢ်သးခုကစီၣ် ဘၣ်ဃးဒီး ကစၢ်ယွၤ အဘီအမုၢ် အဂ့ၢ်န့ၣ် အဝဲသ့ၣ် ကဘၣ်ပာ်ဖျါထီၣ် အတၢ်နာ်ခီဖျိ အအိၣ်မူမၤထွဲ တၢ်လၢအမၤလိဘၣ်ဝဲ. (မၤတၢ် ၃:၁၇-၂၀) တကးဒံးဘၣ် စီၤနိအၤန့ၣ် စီၤပ့းတရူး ကိးအီၤလၢ “ပှၤစံၣ်တဲၤတဲလီၤ တၢ်တီတၢ်လိၤအဂ့ၢ်.” (၂ ပ့း ၂:၅) သနာ်က့ ဒ်ပတဲသကိးလၢ တၢ်မၤလိလၢ အပူၤကွံာ်တခါအသိး တချုးလၢ ထံလုၢ်ဘၢတၢ်ဒံးဘၣ်န့ၣ် စီၤနိအၤ ဂုာ်ကျဲးစၢး စံၣ်တဲၤတဲလီၤဝဲ ပှၤကိးဂၤဒဲး လၢဟီၣ်ခိၣ်ချၢဧါန့ၣ် ပတသ့ၣ်ညါ လီၤတံၢ်ဘၣ်. လၢပစိၤခဲအံၤစ့ၢ်ကီး တချုးလၢ တၢ်အကတၢၢ် တုၤဒံးဘၣ်န့ၣ် ပဂုာ်ကျဲးစၢး စံၣ်တဲၤတဲလီၤတၢ် ဆူၣ်ဆူၣ် လၢဟီၣ်ခိၣ်ဒီဘ့ၣ်ညါ. ပဂုာ်ကျဲးစၢး ဆူၣ်ဆူၣ် သနာ်က့ ပစံၣ်တဲၤတဲလီၤ ပှၤကိးဂၤဒဲး တဝးဘၣ်. ဘၣ်မနုၤအဃိ ပတဲဒ်န့ၣ်လဲၣ်.

၆-၇. တချုးလၢ တၢ်အကတၢၢ် ဟဲဒံးဘၣ်န့ၣ် ဘၣ်မနုၤအဃိ ပတဲလၢ ပတစံၣ်တဲၤတဲလီၤဘၣ် ပှၤကိးဂၤဒဲးဘၣ်လဲၣ်.

^၆ ပကကွၢ်သကိး ယ့ၣ်ၡူး တဲဘၣ်ဃးဒီး ပတၢ်စံၣ်တဲၤတဲလီၤ တၢ်မၤအဂ့ၢ်. ယ့ၣ်ၡူး တဲဝဲလၢ တၢ်သးခုကစီၣ်န့ၣ် ပှၤကစံၣ်တဲၤတဲလီၤဝဲလၢ “ဟီၣ်ခိၣ်ဒီဘ့ၣ်ညါ ဒ်သိး ကကဲထီၣ် တၢ်အုၣ်အသးလၢ ပှၤကလုာ်ခဲလၢာ် အဂီၢ်.” (မး ၂၄:၁၄) ပထံၣ်ဘၣ်လၢ ယ့ၣ်ၡူး အတၢ်စံးပာ်အံၤ ဟဲလၢပှဲၤထီၣ် အါန့ၢ်ဒံးလၢညါ. တကးဒံးဘၣ် ဘီမုၢ်တၢ်ကစီၣ်အဂ့ၢ်န့ၣ် အအိၣ်လၢကျိာ် ၁,၀၀၀ ဘျဲၣ်ညါ. ဒီးခီဖျိလၢ jw.org ဝဲးပဆဲးအဃိ ပှၤအါတက့ၢ် မၤလိဘၣ် တၢ်သးခုကစီၣ် ဘၣ်ဃးဒီး ကစၢ်ယွၤ အဘီအမုၢ်အဂ့ၢ်.

^၇ သနာ်က့ ယ့ၣ်ၡူး တဲဘၣ် အပျဲၢ်အဘီၣ်တဖၣ်လၢ တချုးလၢ အဝဲသ့ၣ် “စံၣ်တဲၤတဲလီၤတၢ် သကုၤလၢ . . . ဝ့ၢ် ခဲလၢာ်ဒံးဘၣ်” မ့တမ့ၢ် စံၣ်တဲၤတဲလီၤဘၣ် ပှၤကိးဂၤဒဲး ဒံးဘၣ်န့ၣ် ယ့ၣ်ၡူး ကဟဲ. (မး ၁၀:၂၃; ၂၅:၃၁-၃၃) ယ့ၣ်ၡူး အတၢ်ကတိၤအံၤ ကဟဲလၢပှဲၤထီၣ်လၢ ပစိၤခဲအံၤစ့ၢ်ကီး. ဆၢကတီၢ်ခဲအံၤ ပှၤအကကွဲၢ်တဖၣ် အိၣ်လၢတၢ်လီၢ်လၢ ပှၤတြီဃာ် ပတၢ်စံၣ်တဲၤတဲလီၤတၢ်မၤ. တကးဒံးဘၣ် လၢတမံးနံး အတီၢ်ပူၤန့ၣ် ဖိသၣ်အိၣ်ဖျဲၣ်ထီၣ် လၢအကယၤညါ. ဒီးပဂုာ်ကျဲးစၢး တဲဘၣ် “ပှၤကိးကလုာ်ဒဲး, ကလုာ်ဒူၣ်ကိးဒူၣ်ဒဲး, ပှၤတဲတၢ်အကျိာ်ကိးကျိာ်ဒဲး” လၢတၢ်သးခုကစီၣ်. (လီၣ် ၁၄:၆) ဘၣ်ဆၣ် တချုးလၢ တၢ်အကတၢၢ် ဟဲဒံးဘၣ်န့ၣ် ပတစံၣ်တဲၤတဲလီၤဘၣ် ပှၤကိးဂၤဒဲးဘၣ်.

၈. ဘၣ်ဃးဒီး ယဟိဝၤယွၤ ကစံၣ်ညီၣ် ပှၤဟီၣ်ခိၣ်ဖိ လၢခါဆူညါန့ၣ် ဘၣ်သ့ၣ်သ့ၣ် ပကဆိကမိၣ်ဘၣ် မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၈ ဘၣ်သ့ၣ်သ့ၣ် ပကဆိကမိၣ်ဘၣ်လၢ တချုးလၢ တၢ်နးတၢ်ဖှီၣ်ဖးဒိၣ် စးထီၣ်ဒံးဘၣ်န့ၣ် တၢ်ကကဲထီၣ်သးဒီး ပှၤလၢတနၢ်ဟူဘၣ် တၢ်သးခုကစီၣ်ဒံးဘၣ် တဖၣ်ဒ်လဲၣ်. ယဟိဝၤယွၤ ဒီးအဖိခွါလၢ အဃုထၢထီၣ်ဝဲလၢ ကစံၣ်ညီၣ်တၢ်န့ၣ် ကစံၣ်ညီၣ် အဝဲသ့ၣ်ဒ်လဲၣ်. (ယိၤ ၅:၁၉, ၂၂, ၂၇; မၤတၢ် ၁၇:၃၁) လံာ်စီဆှံအဆၢလၢ တၢ်မၤလိတခါအံၤအဂီၢ် တဲဝဲလၢ ယဟိဝၤယွၤ “တအဲၣ်ဒိးလၢ ပှၤကတုၤလၢတၢ်ဟးဂီၤ နီတဂၤဘၣ်.” ယဟိဝၤယွၤ အဲၣ်ဒိးဝဲလၢ “ပှၤခဲလၢာ် ကပီၢ်ယၢ်လီၤက့ၤအသး.” (၂ ပ့း ၃:၉; ၁ တံၤ ၂:၄) ပသ့ၣ်ညါ တၢ်ဂ့ၢ်တဖၣ်အံၤ သနာ်က့ ဘၣ်ဃးဒီး ပှၤလၢတနၢ်ဟူဘၣ် တၢ်သးခုကစီၣ်ဒံးဘၣ်တဖၣ် ယဟိဝၤယွၤ ကမၤဝဲဒ်လဲၣ်န့ၣ် အတပာ်ဖျါထီၣ်န့ၢ်ပှၤ တၢ်စံးဆၢဒံးဘၣ်. ဒီးနီၢ်ကီၢ်န့ၣ် တၢ်လၢယဟိဝၤယွၤ မၤတ့ၢ်ဝဲ ဒီးအကမၤဝဲလၢ ခါဆူညါန့ၣ် အတလိၣ်တဲပှၤ နီတမံၤဘၣ်.

၉. လၢလံာ်စီဆှံပူၤန့ၣ် ယဟိဝၤယွၤ တဲဘၣ်ပှၤ တၢ်ဂ့ၢ်မနုၤလဲၣ်.

^၉ လၢလံာ်စီဆှံပူၤန့ၣ် ယဟိဝၤယွၤ တဲဘၣ်ပှၤ ဘၣ်ဃးဒီး တၢ်လၢအကမၤဝဲတနီၤ. အဒိ လံာ်စီဆှံ တဲဝဲလၢ ယဟိဝၤယွၤ ကမၤသမူထီၣ်က့ၤ “ပှၤတတီတလိၤ” လၢအမ့ၢ် ပှၤလၢတနၢ်ဟူဘၣ် တၢ်သးခုကစီၣ် ဒီးတအိၣ်ဒီး တၢ်ခွဲးတၢ်ယာ်လၢ ကဆီတလဲအသးဘၣ်တဖၣ်. (မၤတၢ် ၂၄:၁၅; လူၤ ၂၃:၄၂, ၄၃) အဃိ တၢ်သံကွၢ်အရ့ဒိၣ် လၢအဂၤ ဟဲအိၣ်ထီၣ်ဝဲ.

၁၀. တၢ်သံကွၢ်အဂၤ ဟဲအိၣ်ထီၣ်ဒ်လဲၣ်.

^၁၀ ပှၤကိးဂၤဒဲး လၢအသံ ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် အဝဲသ့ၣ် ကဒိးန့ၢ်ဘၣ် တၢ်ခွဲးတၢ်ယာ်လၢ ကဂဲၤဆၢထၢၣ် သမူထီၣ်က့ၤဒံးဧါ. လံာ်စီဆှံ ပာ်ဖျါထီၣ်ဝဲ ပျီပျီလၢ ပှၤလၢအထီဒါ ယဟိဝၤယွၤ ဒီးပှၤလၢ ယဟိဝၤယွၤ ဒီးအသုးမုၢ်တဖၣ် မၤဟးဂီၤကွံာ်ဝဲ ဖဲအၢ်မက့းဒိၣ်တၢ်ဒုး အဆၢကတီၢ်န့ၣ် အဝဲသ့ၣ် တဒိးန့ၢ်ဘၣ် တၢ်ခွဲးတၢ်ယာ်လၢ ကဂဲၤဆၢထၢၣ် သမူထီၣ်က့ၤလၢၤဘၣ်. (၂ သ့း ၁:၆-၁၀) မ့မ့ၢ်လၢ ပှၤအဂၤတဖၣ်ဟီမီၤ. အဒိ ဖဲတၢ်နးတၢ်ဖှီၣ်ဖးဒိၣ် အဆၢကတီၢ် ပှၤတနီၤ ကသံလၢအသးပှၢ်ထီၣ် မ့တမ့ၢ် အဆိးက့အဃိ ဒီးတနီၤန့ၣ် ကသံလၢ  တၢ်ဘၣ်န့ၢ်အတီၤ မ့တမ့ၢ် ပှၤအဂၤတဂၤ မၤသံအီၤအဃိ. (စံၣ် ၉:၁၁; ကၤ ၁၄:၁၃) မ့ၢ်ပှၤတဖၣ်အံၤ ကပၣ်ဃုာ်လၢ “ပှၤတတီတလိၤ” လၢကဂဲၤဆၢထၢၣ် သမူထီၣ်က့ၤ လၢဟီၣ်ခိၣ်သီအပူၤဧါ. ပတသ့ၣ်ညါလီၤတံၢ်ဘၣ်.

တၢ်ဂ့ၢ်လၢ ပသ့ၣ်ညါ

၁၁. ဖဲအၢ်မက့းဒိၣ်တၢ်ဒုး အဆၢကတီၢ် ပှၤဟီၣ်ခိၣ်ဖိ ကဘၣ်တၢ်စံၣ်ညီၣ်အီၤဒ်လဲၣ်န့ၣ် ကဒိးသန့ၤထီၣ်သးလၢ တၢ်ဂ့ၢ်မနုၤလဲၣ်.

^၁၁ ဘၣ်ဃးဒီး တၢ်ကကဲထီၣ်သး လၢခါဆူညါန့ၣ် ပသ့ၣ်ညါဘၣ် တၢ်ဂ့ၢ်တနီၤ. အဒိ ပသ့ၣ်ညါလၢ ဖဲအၢ်မက့းဒိၣ်တၢ်ဒုး အဆၢကတီၢ် ပှၤဟီၣ်ခိၣ်ဖိ ကဘၣ်တၢ်စံၣ်ညီၣ်အီၤဒ်လဲၣ်န့ၣ် ကဒိးသန့ၤထီၣ်သးလၢ အဝဲသ့ၣ်ရ့ဒီး ယ့ၣ်ၡူးခရံာ် အဒီပုၢ်ဝဲၢ်တဖၣ်ဒ်လဲၣ် အဖီခိၣ်. (မး ၂၅:၄၀) ပှၤလၢ အဘၣ်တၢ်ပာ်ပနီၣ်အီၤ ဒ်သိဖိအသိးန့ၣ် အကဲပှၤလၢ အဆီၣ်ထွဲမၤစၢၤ ယ့ၣ်ၡူးခရံာ် ဒီးပှၤလၢအဘၣ်တၢ်ဒိးဖှူအီၤ. ဒီးပသ့ၣ်ညါစ့ၢ်ကီးလၢ ဖဲတၢ်နးတၢ်ဖှီၣ်ဖးဒိၣ် စးထီၣ်ဝံၤအလီၢ်ခံ ပှၤဘၣ်တၢ်ဒိးဖှူအီၤတနီၤ ကအိၣ်လၢ ဟီၣ်ခိၣ်ချၢဒံး. ဘၣ်ဆၣ် တချုးလၢ အၢ်မက့းဒိၣ်တၢ်ဒုး စးထီၣ်ဒံးဘၣ်အခါ ပှၤဘၣ်တၢ်ဒိးဖှူအီၤခဲလၢာ် လၢအအိၣ်တ့ၢ်ဒံးလၢ ဟီၣ်ခိၣ်ချၢန့ၣ် ကဘၣ်တၢ်ဟံးထီၣ်အီၤ ဆူမူခိၣ်. အဃိ ဖဲပှၤဘၣ်တၢ်ဒိးဖှူအီၤတနီၤ အိၣ်ဒံးလၢ ဟီၣ်ခိၣ်ချၢအခါ ဘၣ်သ့ၣ်သ့ၣ် ပှၤသးဘျၢလၢ တဘူၣ်ထီၣ်ဘါထီၣ် ယဟိဝၤယွၤဒံးဘၣ်တဖၣ် ကအိၣ်ဒီး တၢ်ခွဲးတၢ်ယာ်လၢ ကဆီၣ်ထွဲမၤစၢၤ အဝဲသ့ၣ် ဒီးဆီၣ်ထွဲတၢ်မၤလၢ အဝဲသ့ၣ်မၤဝဲ. (မး ၂၅:၃၁, ၃၂; လီၣ် ၁၂:၁၇) ဘၣ်မနုၤအဃိ တၢ်ဂ့ၢ်တဖၣ်အံၤ အရ့ဒိၣ်လဲၣ်.

၁၂-၁၃. ဖဲပှၤတနီၤ ထံၣ်ဘၣ် “ဘၤဘူၤလိၣ်ဖးဒိၣ်” ဟးဂီၤကွံာ် ဝံၤအလီၢ်ခံ ဘၣ်သ့ၣ်သ့ၣ် အဝဲသ့ၣ် ကမၤမနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၂ တၢ်နးတၢ်ဖှီၣ်ဖးဒိၣ် စးထီၣ်ဝံၤအလီၢ်ခံ ပှၤလၢအထံၣ်ဘၣ် “ဘၤဘူၤလိၣ်ဖးဒိၣ်” ဟးဂီၤကွံာ်န့ၣ် ဘၣ်သ့ၣ်သ့ၣ် အဝဲသ့ၣ် ကနီၣ်ဘၣ်က့ၤဝဲလၢ ယဟိဝၤပှၤအုၣ်အသးတဖၣ် တဲဆိပာ်စၢၤ ဘၣ်ဃးဒီး တၢ်ဂ့ၢ်အံၤ တဘျုးနံၣ်လံ. အဃိ ပှၤတနီၤလၢ အထံၣ်ဘၣ် ဘၤဘူၤလိၣ်ဖးဒိၣ် ဟးဂီၤကွံာ် ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် မ့ၢ်အဝဲသ့ၣ် ကဆီတလဲက့ၤ အတၢ်ပာ်သူၣ်ပာ်သးဧါ.—လီၣ် ၁၇:၅; ဃ့း ၃၃:၃၃.

^၁၃ ပှၤလၢအထံၣ်ဘၣ် တၢ်ကဲထီၣ်သးဒီး ဘၤဘူၤလိၣ်ဖးဒိၣ် ဝံၤဒီးဆီတလဲက့ၤ အတၢ်ပာ်သူၣ်ပာ်သးန့ၣ် အတၢ်အိၣ်သး လီၤဂာ်ဒ်သိးဒီး တၢ်ကဲထီၣ်သး ဖဲစီၤမိၤၡ့အစိၤ လၢကီၢ်အဲၤကူပတူးအပူၤ. လၢညါ ဖဲပှၤအံၣ်စရ့လးဖိ ဟးထီၣ်ကွံာ်လၢ ကီၢ်အဲၤကူပတူးအခါ “ပှၤအကလုာ်ကလုာ်ဂီၢ်မုၢ်” လဲၤပိာ်စ့ၢ်ကီး အဝဲသ့ၣ်အခံ. ဘၣ်သ့ၣ်သ့ၣ် ဖဲပှၤတဖၣ်အံၤ နၢ်ဟူဘၣ်ဝဲ စီၤမိၤၡ့ အတၢ်ဟ့ၣ်ပလီၢ် ဘၣ်ဃးဒီး တၢ်နးတၢ်ဖှီၣ် အခါတဆံ ဒီးထံၣ်ဘၣ်ဝဲလၢ အဟဲလၢပှဲၤထီၣ်အခါ အဝဲသ့ၣ် ဆၢတဲာ်လီၤသးလၢ ကဘူၣ်ထီၣ်ဘါထီၣ် ယဟိဝၤယွၤစ့ၢ်ကီး. (၂ မိၤ ၁၂:၃၈) လၢပစိၤခဲအံၤစ့ၢ်ကီး ဖဲဘၤဘူၤလိၣ်ဖးဒိၣ် ဟးဂီၤဝံၤအလီၢ်ခံ ဒီးဖဲတၢ်အကတၢၢ် ဘူးထီၣ်ကဘၣ်မၣ် ပှၤတနီၤ မ့ၢ်ဟဲနုာ်လီၤ လၢ ပကျါန့ၣ် မ့ၢ်ပကသးက့ၣ်အဝဲသ့ၣ်ဧါ. ပတဘၣ်သးက့ၣ် အဝဲသ့ၣ်ဘၣ်. ပကဘၣ် အိၣ်ဒီးတၢ်ထံၣ် ဒ်သိးဒီး ယဟိဝၤယွၤ. ယဟိဝၤယွၤန့ၣ် အကဲ “ကစၢ်ယွၤလၢ အသးကညီၤတၢ်, အသးဂ့ၤ, တသးဒိၣ်ထီၣ်တၢ် ချ့ချ့ဘၣ်, အိၣ်ဒီး တၢ်အဲၣ်လၢအတီဒိၣ်မး, တီဒီးအတၢ်ကတိၤ ထီဘိ.” b—၂ မိၤ ၃၄:၆.

၁၄-၁၅. ပှၤတဂၤ ကအိၣ်မူဘၣ် လီၤထူလီၤယိာ်ဧါ တအိၣ်မူဘၣ်ဧါန့ၣ် ဒိးသန့ၤထီၣ်သးလၢ အသံအခါဖဲလဲၣ် မ့တမ့ၢ် အအိၣ်တၢ်လီၢ်ဖဲလဲၣ်ဧါ. (စံးထီၣ်ပတြၢၤ ၃၃:၄, ၅)

^၁၄ တဘျီတခီၣ် ပကနၢ်ဟူဘၣ် ပှၤတနီၤတဲဝဲလၢ “တချုးလၢ တၢ်နးတၢ်ဖှီၣ်ဖးဒိၣ် စးထီၣ်ဒံးဘၣ်အခါ ယဘူးယတံၢ် မ့ၢ်သံဆိန့ၣ် ကဂ့ၤဒၣ်ဟီ. ဘၣ်သ့ၣ်သ့ၣ် အဝဲသ့ၣ် ကအိၣ်ဒီး တၢ်မုၢ်လၢ်လၢ ကဂဲၤဆၢထၢၣ် သမူထီၣ်ဘၣ်ဒံး.” အဝဲသ့ၣ် အတၢ်ကတိၤအံၤ ပာ်ဖျါထီၣ်လၢ အအဲၣ်အဘူးအတံၢ်. ဘၣ်ဆၣ် ပှၤတဂၤ ကအိၣ်မူဘၣ် လီၤထူလီၤယိာ်ဧါ တအိၣ်မူဘၣ်ဧါန့ၣ် တဒိးသန့ၤထီၣ်သးလၢ အသံအခါဖဲလဲၣ်ဘၣ်. ယဟိဝၤယွၤန့ၣ် အကဲစံၣ်ညီၣ်ကွီၢ်လၢ အတီအလိၤ ဒီးအဆၢတဲာ်တၢ် တီတီလိၤလိၤ. (ဖး စံးထီၣ်ပတြၢၤ ၃၃:၄, ၅.) ယဟိဝၤယွၤ လၢအမ့ၢ် “ဟီၣ်ခိၣ်ဒီဘ့ၣ်ညါ အပှၤစံၣ်ညီၣ်ကွီၢ်န့ၣ်” ပနာ်သပှၢ်တၢၢ်လၢ အကမၤတၢ်လၢ အဘၣ်ထီဘိ.—၁ မိၤ ၁၈:၂၅.

^၁၅ တကးဒံးဘၣ် ပှၤတဂၤ ကအိၣ်မူဘၣ် လီၤထူလီၤယိာ်ဧါ တအိၣ်မူဘၣ်ဧါန့ၣ် တဒိးသန့ၤထီၣ်သးလၢ အအိၣ်တၢ်လီၢ်ဖဲလဲၣ်ဘၣ်. အဒိ ပှၤအကကွဲၢ်တဖၣ် အိၣ်တၢ်လီၢ်လၢ ပှၤလဲၤစံၣ်တဲၤတဲလီၤ ဘီမုၢ်တၢ်သးခုကစီၣ် တတုၤဘၣ်အဃိ အဝဲသ့ၣ် တမၤလိဘၣ် ဘီမုၢ်တၢ်သးခုကစီၣ် အဂ့ၢ်ဘၣ်. ဆိကမိၣ်ကွၢ် ယဟိဝၤယွၤ မ့ၢ်ပာ်ပနီၣ်အဝဲသ့ၣ် ဒ်သိးဒီး “မဲာ်တဲးလဲး” န့ၣ် မ့ၢ်အကဘၣ် စ့ၢ်ကီးဧါ. (မး ၂၅:၄၆) ယဟိဝၤယွၤ လၢအမ့ၢ် ဟီၣ်ခိၣ်ဒီဘ့ၣ်ညါ အပှၤစံၣ်ညီၣ်ကွီၢ်န့ၣ်  အသူၣ်အိၣ်သးအိၣ် ပှၤတဖၣ်အံၤ အါန့ၢ်ပသးအိၣ် အဝဲသ့ၣ်ဒံး. ဒီးဖဲတၢ်နးတၢ်ဖှီၣ်ဖးဒိၣ် အဆၢကတီၢ် ယဟိဝၤယွၤ ကရဲၣ်ကျဲၤတၢ်ဒ်လဲၣ်န့ၣ် ပတသ့ၣ်ညါဘၣ်. ဖဲယဟိဝၤယွၤ ဒုးသ့ၣ်ညါ ပှၤကိးဂၤဒဲးလၢ အမ့ၢ်ကစၢ်ယွၤလၢ အစီဆှံအခါ ဘၣ်သ့ၣ်သ့ၣ် ပှၤတဖၣ်အံၤ ကန့ၢ်ဘၣ် တၢ်ခွဲးတၢ်ယာ်လၢ ကမၤလိဘၣ် ယဟိဝၤယွၤအဂ့ၢ်, ကဘူၣ်ထီၣ်ဘါထီၣ်အီၤ ဒီးအိၣ်လၢအအိၣ်တခီ.—ဃ့း ၃၈:၁၆.

၁၆. ယဟိဝၤယွၤ အဂ့ၢ်လၢ ပသ့ၣ်ညါထီၣ်န့ၣ် မ့ၢ်မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၆ လၢလံာ်စီဆှံပူၤန့ၣ် ပသ့ၣ်ညါဘၣ်လၢ ယဟိဝၤယွၤ ပာ်လုၢ်ပာ်ပှ့ၤ ပှၤဟီၣ်ခိၣ်ဖိ အသးသမူဒိၣ်မး. တကးဒံးဘၣ် ဒ်သိးပဝဲခဲလၢာ် ကဒိးန့ၢ်ဘၣ် တၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ်အဂီၢ် ယဟိဝၤယွၤ ဟ့ၣ်လီၤကွံာ် အဖိခွါအသးသမူ လၢပဂီၢ်. (ယိၤ ၃:၁၆) အဃိ ပသ့ၣ်ညါဘၣ်လၢ ယဟိဝၤယွၤ အဲၣ်ပှၤ ဒီးသးကညီၤပှၤဒိၣ်မး. (ၡါ ၄၉:၁၅) တကးဒံးဘၣ် ယဟိဝၤယွၤ သ့ၣ်ညါ ပဝဲတဂၤဘၣ်တဂၤ အဂ့ၢ်ဂ့ၤဂ့ၤ. အသ့ၣ်ညါပှၤ ဂ့ၤဒိၣ်မးတုၤလၢ ပမ့ၢ်သံသနာ်က့ အတသးပ့ၤနီၣ် ပဂ့ၢ်ပကျိၤ ဒီးပတၢ်ဆိကမိၣ် နီတမံၤဘၣ်အဃိ အမၤသမူထီၣ်က့ၤပှၤသ့. (မး ၁၀:၂၉-၃၁) ယဟိဝၤယွၤန့ၣ် အကဲစံၣ်ညီၣ်ကွီၢ်လၢ အကူၣ်တၢ်သ့, အတီအလိၤ ဒီးအအိၣ်ဒီး တၢ်သးကညီၤအဃိ ပနာ်သ့သပှၢ်တၢၢ်လၢ အကစံၣ်ညီၣ် ပှၤတဂၤဂ့ၤ တဂၤဂ့ၤ တီတီလိၤလိၤ.—ယၤ ၂:၁၃.

၁၇. တၢ်မၤလိလၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.

^၁၇ ခဲအံၤ ပသ့ၣ်ညါဘၣ် တၢ်နၢ်ပၢၢ်အသီတဖၣ်အံၤလံအဃိ ပကဘၣ်ဆဲး စံၣ်တဲၤတဲလီၤတၢ် အါန့ၢ်ဒံးလၢညါ. ဘၣ်မနုၤအဃိ ပကဘၣ်ဆဲး စံၣ်တဲၤတဲလီၤတၢ် ဆူၣ်ဆူၣ်လဲၣ်. ဒီးပကဆဲး စံၣ်တဲၤတဲလီၤတၢ် ဆူၣ်ဆူၣ်အဂီၢ် တၢ်မနုၤ ကထိၣ်ဟူးထိၣ်ဂဲၤထီၣ်ပှၤလဲၣ်. ပကတဲသကိး တၢ်သံကွၢ်တဖၣ်အံၤ အတၢ်စံးဆၢလၢ တၢ်မၤလိလၢခံတခါ.