၁-၂. ပှၤတဂၤ ဒိးဘျၢထံ ဝံၤအလီၢ်ခံ အန့ၢ်ဘၣ် တၢ်ခွဲးတၢ်ယာ်လီၤဆီ မနုၤလဲၣ်.

 ပဒိးဘျၢထံ ဒီးကဲထီၣ်ဘၣ် ယဟိဝၤယွၤ အဟံၣ်ဖိဃီဖိအဃိ အကဲဝဲ တၢ်ခွဲးတၢ်ယာ်လီၤဆီ ဒီးပသးခုဒိၣ်မး. တၢ်ခွဲးတၢ်ယာ်လီၤဆီအံၤ အမၤစၢၤပှၤဒ်သိး ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. အဃိ ပတူၢ်ဘၣ်ဒ်သိးဒီး စီၤဒၤဝံးလၢအမ့ၢ် ပှၤကွဲးထါစံးထီၣ်ပတြၢၤ လၢအတဲဝဲလၢ “ပှၤလၢန [ယဟိဝၤယွၤ] ဃုထၢအီၤ ဒီးကွဲမုာ်အီၤလၢ ကဟဲဘူးဒီးနၤ ဒ်သိးကအိၣ်လၢ နဟံၣ်အတၢ်ပျီတဖၣ်အပူၤန့ၣ် ကသးခုဝဲ.”—စံး ၆၅:၄.

^၂ ယဟိဝၤယွၤ တမၢဆူၣ်ပှၤလၢ ပကကဲထီၣ် အဟံၣ်ဖိဃီဖိဘၣ်. တၢ်မၤလိလၢ အပူၤကွံာ်တခါန့ၣ် ပထံၣ်ဘၣ်လၢ ပှၤလၢအအဲၣ်ဒိး သုးဘူးအသးလၢ ယဟိဝၤယွၤအအိၣ် ဒီးကဲထီၣ်အသကိးန့ၣ် ယဟိဝၤယွၤ ကသုးဘူးအသး လၢအအိၣ်. (ယၤ ၄:၈) အဃိ ဖဲပဟ့ၣ်လုၢ်ထီၣ်သး ဒီးဒိးဘျၢထံအခါ လီၤဂာ်ဒ်သိးဒီး ပသုးဘူးပသးလၢ ယဟိဝၤယွၤအအိၣ် လၢကျဲလီၤလီၤဆီဆီတဘိ. ဒီးပဒိးဘျၢထံ ဝံၤအလီၢ်ခံ ယဟိဝၤယွၤ အၢၣ်လီၤပှၤလၢ အက “လူလီၤန့ၢ် [ပှၤ] တၢ်ဆိၣ်ဂ့ၤ တုၤလၢ [ပ] တလိၣ်ဘၣ် တၢ်နီတမံၤလၢၤဘၣ်.”—မၤ ၃:၁၀; ယံး ၁၇:၇, ၈.

၃. ခရံာ်ဖိလၢ အဟ့ၣ်လုၢ်ထီၣ်သး ဒီးဒိးဘျၢထံဝံၤန့ၣ် အအိၣ်ဒီး မူဒါအရ့ဒိၣ်မနုၤလဲၣ်. (စံၣ်တဲၤတဲလီၤတၢ် ၅:၄, ၅)

^၃ တၢ်ဒိးဘျၢထံန့ၣ် အကဲဝဲ ခီၣ်ခါအဆိကတၢၢ်တခါလၢ ပကစးထီၣ်မၤ ယဟိဝၤယွၤ အတၢ်မၤ. အဃိ ပဒိးဘျၢထံ ဝံၤအလီၢ်ခံ ပမ့ၢ်ထံၣ်ဘၣ် တၢ်မၤကွၢ် ဒီးတၢ်လ့ပစီ သနာ်က့ ပကဘၣ်ဆဲးတီဒီး ယဟိဝၤယွၤ. တကးဒံးဘၣ် ပကဘၣ်ဂုာ်ကျဲးစၢး အဂ့ၤကတၢၢ် ဒီးမၤလၢပှဲၤ ပတၢ်အၢၣ်လီၤ လၢပမၤအီၤဖဲ ပဟ့ၣ်လုၢ်ထီၣ်သးလၢ ယဟိဝၤယွၤအအိၣ်အခါ. (ဖး စံၣ်တဲၤတဲလီၤတၢ် ၅:၄, ၅.) ဒီးခီဖျိလၢ ပကဲယ့ၣ်ၡူးအပျဲၢ်အဘီၣ်အဃိ ပကဘၣ် ဂုာ်ကျဲးစၢး မၤထွဲ ယ့ၣ်ၡူးအတၢ်မၤလိာ် ဒီးတသ့ဖဲအသ့ ဂုာ်ကျဲးစၢးအိၣ်မူဒ် ယ့ၣ်ၡူးအသိး. (မး ၂၈:၁၉, ၂၀; ၁ ပ့း ၂:၂၁) တၢ်မၤလိတခါအံၤ ကမၤစၢၤပှၤလၢ ပကမၤဒ်န့ၣ်.

နမ့ၢ်ထံၣ်ဘၣ် တၢ်မၤကွၢ် ဒီးတၢ်လ့ပစီ သနာ်က့ ဆဲးပိာ်ယ့ၣ်ၡူးအခံ

၄. ယ့ၣ်ၡူး အပျဲၢ်အဘီၣ် ကဘၣ်ယိးထီၣ် “တၢ်မၤအၢမၤနး အသ့ၣ်တၢၣ်” န့ၣ်အဲၣ်ဒိးတဲဝဲ အခီပညီဒ်လဲၣ်. (လူၤကၣ် ၉:၂၃)

^၄ ပဒိးဘျၢထံ ဝံၤအလီၢ်ခံ ပကထံၣ်ဘၣ် တၢ်ကီတၢ်ခဲဒံး. ယ့ၣ်ၡူး တဲဘၣ် အပျဲၢ်အဘီၣ် ပျီပျီလၢ အဝဲသ့ၣ် ကဘၣ်ယိးထီၣ် “တၢ်မၤအၢမၤနး အသ့ၣ်တၢၣ်.” ဒီးအဝဲသ့ၣ် ကဘၣ်မၤဝဲဒ်န့ၣ် “တနံၤဘၣ်တနံၤ.” (ဖး လူၤကၣ် ၉:၂၃.) ယ့ၣ်ၡူး အဲၣ်ဒိးတဲဝဲလၢ အပျဲၢ်အဘီၣ် ကထံၣ်ဘၣ် တၢ်ကီတၢ်ခဲ ထီဘိဧါ. တမ့ၢ်ဒ်န့ၣ်ဘၣ်. ယ့ၣ်ၡူး အဲၣ်ဒိးတဲဝဲလၢ အပျဲၢ်အဘီၣ်တဖၣ် ကဒိးန့ၢ်ဘၣ်တၢ်ဆိၣ်ဂ့ၤ တကးဒံးဘၣ် အဝဲသ့ၣ် ကထံၣ်ဘၣ် တၢ်ကီတၢ်ခဲ. ဒီးတၢ်ကီတၢ်ခဲတနီၤန့ၣ် အဝဲသ့ၣ် ကဘၣ်လဲၤခီဖျိဝဲနးမး.—၂ တံၤ ၃:၁၂.

၅. ယ့ၣ်ၡူးအၢၣ်လီၤဝဲလၢ ပှၤလၢအတူၢ်ဆါသးတဖၣ်န့ၣ် အကန့ၢ်ဘၣ် တၢ်ဆိၣ်ဂ့ၤဒ်လဲၣ်.

^၅ ခီဖျိလၢ ပပာ်ဆိ ကစၢ်ယွၤအဘီအမုၢ် လၢနီၣ်ဂံၢ်တၢ လၢပတၢ်အိၣ်မူ ဒီးပတူၢ်ၡူကွံာ် တၢ်ခွဲးတၢ်ယာ်လၢ ပကဃုအါထီၣ် ကျိၣ်စ့တၢ်ထူးတၢ်တီၤအဃိ ဘၣ်သ့ၣ်သ့ၣ် ပဟံၣ်ဖိဃီဖိတနီၤ ကထီဒါပှၤ. (မး ၆:၃၃) ဘၣ်ဆၣ် ပကဘၣ်နာ်သပှၢ်တၢၢ်လၢ ယဟိဝၤယွၤ ထံၣ်ဒီးသ့ၣ်ညါဝဲ တၢ်လၢပမၤန့ၢ်လၢအဂီၢ်. (ဧ့ၤ ၆:၁၀) ပမၤဒ်န့ၣ်အဃိ ပထံၣ်ဘၣ်လၢ ယ့ၣ်ၡူး အတၢ်ကတိၤ ဟဲလၢထီၣ်ပှဲၤထီၣ်. ယ့ၣ်ၡူးတဲဝဲလၢ “ပှၤလၢ အပာ်တ့ၢ်ကွံာ် အဟံၣ်အဃီမ့ၢ်ဂ့ၤ, အဒီပုၢ်ဝဲၢ်မုၣ်မ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ, အမိၢ်မ့ၢ်ဂ့ၤ, အပၢ်မ့ၢ်ဂ့ၤ, အဖိ မ့တမ့ၢ် အစံာ်ဧိၤပှဲၤဧိၤတဖၣ် လၢယဃိဒီး လၢတၢ်သးခုကစီၣ် အဃိန့ၣ် ဆၢကတီၢ်ခဲအံၤ အဝဲသ့ၣ် ကန့ၢ်ဘၣ် အဟံၣ်, အဒီပုၢ်ဝဲၢ်မုၣ်, အဒီပုၢ်ဝဲၢ်ခွါ, အမိၢ်, အဖိ ဒီးအစံာ်ဧိၤပှဲၤဧိၤတဖၣ် အါန့ၢ်အလီၢ်အစး ၁၀၀ ဃုာ်ဒီး တၢ်မၤနးမၤဖှီၣ်လီၤ. ဒီးလၢခါဆူညါန့ၣ် ကန့ၢ်ဘၣ်ဝဲ တၢ်မူအထူအယိာ်လီၤ.” (မၢ် ၁၀:၂၉, ၃၀) အဃိ တၢ်ဆိၣ်ဂ့ၤလၢ ပန့ၢ်ဘၣ်တဖၣ်န့ၣ် အဂ့ၤဒိၣ်န့ၢ် တၢ်လၢပဘၣ်တူၢ်ၡူကွံာ်ဒံး.—စံး ၃၇:၄.

၆. ပဒိးဘျၢထံ မ့ၢ်ဝံၤသနာ်က့ ဘၣ်မနုၤအဃိ ပကဘၣ်ဆဲးတြီဆၢ “တၢ်ဖံးတၢ်ညၣ် အတၢ်သူၣ်လီသးကွံ” လဲၣ်.

^၆ ပဟဲလီၤစၢၤလၢ စီၤအၤဒၣ်အဃိ ပတကဲပှၤလၢပှၤပှဲၤဘၣ်. အဃိ ပဒိးဘျၢထံ မ့ၢ်ဝံၤသနာ်က့ ပကဘၣ်ဆဲးတြီဆၢ “တၢ်ဖံးတၢ်ညၣ် အတၢ်သူၣ်လီသးကွံ.” (၁ ယိၤ ၂:၁၆) ဒီးတဘျီတခီၣ်န့ၣ် ပကတူၢ်ဘၣ်ဒ်သိးဒီး တၢ်မၢဖိပီလူး လၢအတဲဝဲ “လၢယသးကံၢ်ပူၤန့ၣ် ယဘၣ်သူၣ်ဘၣ်သး ကစၢ်ယွၤ အတၢ်သိၣ်တၢ်သီ နီၢ်ကီၢ်လီၤ. ဘၣ်ဆၣ် ယထံၣ်တၢ်သိၣ်တၢ်သီ အဂၤတခါလၢ အအိၣ်လၢ ယနီၢ်ခိအပူၤ လၢအထီဒါလိာ်သးဒီး တၢ်သိၣ်တၢ်သီလၢ အဒိၣ်စိလၢ ယတၢ်ဆိကမိၣ်တဖၣ် အဖီခိၣ်လီၤ. ဒီးအဒုးကဲကုၢ်ယၤလၢ တၢ်ဒဲးဘးအတၢ်သိၣ်တၢ်သီလၢ အအိၣ်လၢ ယနီၢ်ခိအပူၤလီၤ.” (ရိ ၇:၂၂, ၂၃) ပဘၣ်တြီဆၢ တၢ်သူၣ်လီသးကွံ လၢအတဂ့ၤဘၣ်အဃိ ဘၣ်သ့ၣ်သ့ၣ် ပသးကဟးဂီၤ. သနာ်က့ ပမ့ၢ်ဆိကမိၣ်ထီၣ်က့ၤ တၢ်အၢၣ်လီၤလၢ ပမၤအီၤဖဲ ပဟ့ၣ်လုၢ်ထီၣ်သးလၢ ယဟိဝၤယွၤအအိၣ်န့ၣ် ပသးကဆူၣ်ထီၣ်လၢ ပကဆဲးတြီဆၢ တၢ်လ့ပစီ. နီၢ်ကီၢ်န့ၣ် ဖဲပထံၣ်ဘၣ် တၢ်လ့ပစီအခါ ပတၢ်အၢၣ်လီၤတခါန့ၣ် ကမၤစၢၤပှၤ. အကမၤစၢၤပှၤဒ်လဲၣ်.

၇. ပမ့ၢ်ဟ့ၣ်လုၢ်ထီၣ်သးလၢ ယဟိဝၤယွၤအအိၣ်န့ၣ် ကမၤစၢၤပှၤလၢ ပကဆဲးအိၣ်ဒီး တၢ်သးတီဒ်လဲၣ်.

^၇ ဖဲပဟ့ၣ်လုၢ်ထီၣ်သးလၢ ယဟိဝၤယွၤအအိၣ်အခါ ပပာ်ဖျါထီၣ်လၢ ပတအိၣ်မူလၢ ပနီၢ်ကစၢ်အဂီၢ်လၢၤဘၣ်. အခီပညီန့ၣ် ပတမၤထဲပနီၢ်ကစၢ် တၢ်ဘၣ်သးလၢၤဘၣ် ဒီးပတဃုထၢတၢ်လၢ ယဟိဝၤယွၤ တဘၣ်သးဝဲန့ၣ်ဘၣ်. (မး ၁၆:၂၄) ဒီးခီဖျိလၢ ပဆၢတဲာ်ပာ်စၢၤသး ဂၢၢ်ဂၢၢ်ကျၢၤကျၢၤလၢ ပကတီဒီး ယဟိဝၤယွၤအဃိ ဖဲပထံၣ်ဘၣ် တၢ်လ့ပစီ ဒီးတၢ်မၤကွၢ်အခါ ပသးတဒံဝ့ၤဒံဝီၤဘၣ်. အဒိ စီၤယိၤဘး ထံၣ်ဘၣ်ဒီး တၢ်မၤကွၢ် နးဒိၣ်မးသနာ်က့ အတဲဝဲလၢ “ယတမၤဟးဂီၤ ယတၢ်သးတီဘၣ်.” (ဘး ၂၇:၅) အဃိ ဒ်စီၤယိၤဘးအသိး ပပာ်လီၤသး ဂၢၢ်ဂၢၢ်ကျၢၤကျၢၤလၢ ပကမၤသးခု ယဟိဝၤယွၤအသးထီဘိ.

၈. ပမ့ၢ်ဆိကမိၣ်ထံက့ၤ ပတၢ်ဃ့ထုကဖၣ် ဖဲပဟ့ၣ်လုၢ်ထီၣ်သးလၢ ယဟိဝၤယွၤအအိၣ်အခါန့ၣ် ကမၤစၢၤပှၤလၢ ပကတြီဆၢကွံာ် တၢ်လ့ပစီဒ်လဲၣ်.

 ^၈ ဒ်သိး ပတြီဆၢကွံာ် တၢ်လ့ပစီ တခါဂ့ၤတခါဂ့ၤ ကန့ၢ်အဂီၢ် ပကဘၣ် ဆိကမိၣ်ထံက့ၤ ပတၢ်ဃ့ထုကဖၣ် ဖဲပဟ့ၣ်လုၢ်ထီၣ်သးလၢ ယဟိဝၤယွၤအအိၣ်အခါ. အဒိ ပကဂဲၤလိာ်ကွဲတၢ်အဲၣ်ဒီး ပှၤဂၤအမါ မ့တမ့ၢ် အဝၤဧါ. ပတမၤဒ်န့ၣ် နီတစဲးဘၣ်. ပအၢၣ်လီၤပာ်စၢၤ ယဟိဝၤယွၤလၢ ပတမၤဒ်န့ၣ် နီတဘျီဘၣ်. ပမ့ၢ်တပျဲလၢ တၢ်သူလီသးကွံ လၢအကမၣ် နုာ်လီၤလၢ ပသးပူၤဘၣ်န့ၣ် လၢခံ ဖဲပဘၣ်တြီဆၢကွံာ်အီၤအခါ အတကီလၢ ပဂီၢ်ဘၣ်. ဒီးပက “ဃၣ်ကွံာ် [ပ] သး” လၢ “ပှၤအၢပှၤသီ အကျဲ.”—ကတိၤ ၄:၁၄, ၁၅.

၉. ပမ့ၢ်ဆိကမိၣ်ထံက့ၤ ပတၢ်ဃ့ထုကဖၣ် ဖဲပဟ့ၣ်လုၢ်ထီၣ်သးလၢ ယဟိဝၤယွၤအအိၣ်အခါန့ၣ် ကမၤစၢၤပှၤလၢ ပတၢ်ဘူၣ်ထီၣ်ဘါထီၣ်ဒ်လဲၣ်.

^၉ ပှၤမ့ၢ်ဟ့ၣ်ပှၤ တၢ်မၤလၢ အဘၣ်လိာ်သးဒီး ပဘၣ်လဲၤထီၣ် တၢ်အိၣ်ဖှိၣ် အဆၢကတီၢ်န့ၣ် ပကမၤဒ်လဲၣ်. ပကဘၣ် ဆၢတဲာ်ပာ်စၢၤသးလၢ ပတတူၢ်လိာ်တၢ်မၤလၢ အဘၣ်လိာ်သးဒီး တၢ်အိၣ်ဖှိၣ် အဆၢကတီၢ်ဘၣ်. ပမ့ၢ်ဆၢတဲာ်ပာ်စၢၤသးန့ၣ် ပတတူၢ်လိာ် တၢ်မၤတခါန့ၣ်ဘၣ်, ပတြီဆၢ တၢ်လ့ပစီအံၤကန့ၢ် ဒီးပကပာ်ဆိ ယဟိဝၤယွၤ အတၢ်ဘၣ်သး လၢနီၣ်ဂံၢ်တၢ. တကးဒံးဘၣ် ပမ့ၢ်ဆိကမိၣ်ထံ ယ့ၣ်ၡူးအဒိအတဲာ်န့ၣ် ကမၤစၢၤပှၤစ့ၢ်ကီး. ပထံၣ်ဘၣ်လၢ ယ့ၣ်ၡူးန့ၣ် အသးဆူၣ်လၢ အကမၤ အပါယဟိဝၤယွၤ အတၢ်ဘၣ်သး. အဃိ ဒ်ယ့ၣ်ၡူးအသိး ပကဘၣ်ပာ်လီၤသး ဂၢၢ်ဂၢၢ်ကျၢၤကျၢၤလၢ ပတမၤ တၢ်တမံၤဂ့ၤ တမံၤဂ့ၤလၢ ယဟိဝၤယွၤ တဘၣ်သးဝဲဘၣ် ဒီးတြီဆၢကွံာ်အီၤ တဘျီဃီ.—မး ၄:၁၀; ယိၤ ၈:၂၉.

၁၀. ပဒိးဘျၢထံဝံၤအလီၢ်ခံ ဒ်သိး ပကဆဲးပိာ်ယ့ၣ်ၡူးအခံအဂီၢ် ယဟိဝၤယွၤ ကမၤစၢၤပှၤဒ်လဲၣ်.

^၁၀ ဖဲပထံၣ်ဘၣ် တၢ်မၤကွၢ် ဒီးတၢ်လ့ပစီအခါ ပကဘၣ်ပာ်အီၤဒ် တၢ်ခွဲးတၢ်ယာ်လၢ အကမၤစၢၤပှၤဒ်သိး ပကဆဲးပိာ်ယ့ၣ်ၡူးအခံ. ဒီးယဟိဝၤယွၤ အၢၣ်လီၤဝဲလၢ အကမၤစၢၤပှၤစ့ၢ်ကီး. လံာ်စီဆှံ တဲဝဲလၢ “ကစၢ်ယွၤန့ၣ် မ့ၢ်ပှၤလၢအကလုၢ်တီ ဒီးအဝဲတဟ့ၣ်အခွဲးလၢ တၢ်ကမၤကွၢ်သု တုၤလၢ သုတူၢ်တကဲလၢၤဘၣ်န့ၣ်ဘၣ်. ဖဲသုဘၣ် တၢ်မၤကွၢ်အခါ အဝဲကအိးဟိထီၣ်ကျဲ ဒ်သိးသုတူၢ်တၢ်ခီၣ်တၢ် ကကဲအဂီၢ်.”—၁ ကရံၣ် ၁၀:၁၃.

ပဆဲးပိာ်ယ့ၣ်ၡူးအခံ ကသ့ဒ်လဲၣ်

၁၁. ပဒိးဘျၢထံ ဝံၤအလီၢ်ခံ ပဆဲးပိာ်ယ့ၣ်ၡူးအခံ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၁ ယ့ၣ်ၡူး မၤယဟိဝၤယွၤအတၢ်မၤ လၢအသးဒီဖျၢၣ် ဒီးအဃ့ထုကဖၣ်လၢ ယဟိဝၤယွၤအအိၣ်ထီဘိ. (လူၤ ၆:၁၂) နီၢ်ကီၢ်န့ၣ် ပဒိးဘျၢထံ မ့ၢ်ဝံၤသနာ်က့ ဒ်သိးပကဆဲးပိာ် ယ့ၣ်ၡူးအခံအဂီၢ် ပကဘၣ်မၤတၢ်လၢ ကမၤစၢၤပှၤဒ်သိး ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. လံာ်စီဆှံတဲဝဲလၢ “ပလဲၤထီၣ်လဲၤထီပာ်စၢၤထဲလဲၣ် သနာ်က့ မ်ပဆဲးလဲၤထီၣ်လဲၤထီ ဒ်န့ၣ်ဆူညါ.” (ဖံလံး ၃:၁၆) တဘျီတခီၣ်န့ၣ် ပနၢ်ဟူဘၣ် ဒီပုၢ်ဝဲၢ်မုၣ်ခွါလၢ အမၤအါထီၣ် ကစၢ်ယွၤအတၢ်မၤတဖၣ် အတၢ်လဲၤခီဖျိ. ဘၣ်သ့ၣ်သ့ၣ် အဝဲသ့ၣ်လဲၤထီၣ် ပှၤစိာ်ဘီမုၢ်တၢ်သးခုကစီၣ်ဖိအကၠိ မ့တမ့ၢ် အဝဲသ့ၣ်လဲၤပၠီလၢ တၢ်လီၢ်လၢ ပှၤလိၣ်ဘၣ်တၢ်မၤစၢၤ. ပပာ်လီၤဖီတၢၣ်ဒ်န့ၣ် သ့စ့ၢ်ကီး. ယဟိဝၤယွၤ အခ့အပှၤတဖၣ်န့ၣ် အဝဲသ့ၣ် သးဆူၣ်ဒိၣ်မးလၢ ကမၤအါထီၣ် ယဟိဝၤယွၤ အတၢ်မၤ. (မၤတၢ် ၁၆:၉) ဘၣ်ဆၣ်ခဲအံၤ ပမၤဒ်သိးပှၤဂၤ မ့ၢ်တန့ၢ်ဒံးဘၣ်န့ၣ် ဘၣ်သ့ၣ်သ့ၣ် ပသးကဟးဂီၤ ဒီးဆိကမိၣ်လၢ ပမၤတန့ၢ် နီတဘျီဘၣ်. ဘၣ်ဆၣ် ပတဘၣ် ဆိကမိၣ်ဒ်န့ၣ်ဘၣ်. တၢ်လၢအရ့ဒိၣ်န့ၣ် မ့ၢ်ဝဲ ပကဘၣ်ဆဲးအိၣ်ဒီး တၢ်တူၢ်န့ၢ်ခီၣ်ကဲ. (မး ၁၀:၂၂) ပတၢ်အိၣ်သး မ့ၢ်အိၣ်ဒ်လဲၣ်သနာ်က့ ပဂုာ်ကျဲးစၢးမၤ ယဟိဝၤယွၤအတၢ်မၤ လၢအဂ့ၤကတၢၢ်အဃိ ယဟိဝၤယွၤ ပာ်လုၢ်ပာ်ပှ့ၤဝဲ. ဒီးဒ်သိးပက ဆဲးပိာ်ယ့ၣ်ၡူးအခံအဂီၢ် အရ့ဒိၣ်ဒိၣ်မးလၢ ပကဆဲးမၤဒ်အံၤ.—စံး ၂၆:၁.

၁၂-၁၃. ပမ့ၢ်တူၢ်ဘၣ်လၢ ပနီၢ်သးတဆူၣ် ဒ်သိးလၢညါလၢၤဘၣ်န့ၣ် ပကဘၣ်မၤဒ်လဲၣ်. (၁ ကရံၣ်သူး ၉:၁၆, ၁၇) (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ ဆဲးအိၣ်လၢ တၢ်ဃ့ၢ်ပြၢအပူၤ.”)

^၁၂ ပမ့ၢ်ဆိကမိၣ်လၢ ပတဃ့ထုကဖၣ် လၢပသးဒီဖျၢၣ်လၢၤဘၣ်, ပဟးစံၣ်တဲၤတဲလီၤတၢ် ဒီးဖးလံာ်စီဆှံ မ့ၢ်တမုာ် ဒ်သိးလၢညါလၢၤဘၣ်န့ၣ် ပကဘၣ်မၤဒ်လဲၣ်. ပဒိးဘျၢထံ ဝံၤအလီၢ်ခံ ပမ့ၢ်ထံၣ်ဘၣ် တၢ်အိၣ်သးဒ်အံၤန့ၣ် ပကဆိကမိၣ်ဘၣ်လၢ ယဟိဝၤယွၤ အသးစီဆှံ တအိၣ်ဒီးပှၤလၢၤဘၣ်. ဘၣ်ဆၣ် အတမ့ၢ်ဒ်န့ၣ်ဘၣ်. ခီဖျိလၢ ပတကဲပှၤလၢပှၤပှဲၤဘၣ်အဃိ တဘျီတခီၣ်န့ၣ် ပတၢ်တူၢ်ဘၣ် ဆီတလဲသး သ့. ပသးမ့ၢ်တဆူၣ် အါအါလၢၤဘၣ်န့ၣ် ပကဘၣ် ဆိကမိၣ်ထီၣ်က့ၤ တၢ်မၢဖိပီလူး အဒိအတဲာ်. တၢ်မၢဖိပီလူးန့ၣ် အဂုာ်ကျဲးစၢး ကွၢ်လိယ့ၣ်ၡူး ဒီးအသ့ၣ်ညါလီၤသးလၢ တၢ်လၢအဘၣ်မၤဝဲန့ၣ် တဘျီတခီၣ် အသးတဆူၣ်လၢ အကမၤဝဲဘၣ်. (ဖး ၁ ကရံၣ်သူး ၉:၁၆, ၁၇.) အတဲဝဲလၢ “ယသးမ့ၢ်တအိၣ်ဘၣ် သနာ်က့ မ့ၢ်လၢကစၢ်ယွၤ အးလီၤယၤမူဒါအဃိ ယမၤအီၤဒံး.” ပမ့ၢ်တဲလၢ အဂၤတမံၤန့ၣ် စီၤပီလူး မ့ၢ်တူၢ်ဘၣ်လၢ အသးတဆူၣ်ဘၣ် သနာ်က့ အဆဲးမၤဝံၤအမူဒါလၢ တၢ်စံၣ်တဲၤတဲလီၤ တၢ်မၤဒံး.

^၁၃ ပဝဲစ့ၢ်ကီး ဖဲပဆၢတဲာ်တၢ်အခါ ပတဘၣ်ပျဲလၢ ပတၢ်တူၢ်ဘၣ် ကဒိၣ်စိလၢ ပဖီခိၣ်ဘၣ်. ပတၢ်တူၢ်ဘၣ် မ့ၢ်အိၣ်ဒ်လဲၣ် သနာ်က့ ပကဘၣ် ပာ်လီၤသး ဂၢၢ်ဂၢၢ်ကျၢၤကျၢၤလၢ ပကဆဲးမၤ တၢ်လၢအဘၣ်. ပမ့ၢ်ဆဲးမၤ တၢ်လၢအဘၣ်န့ၣ် လၢခံကယီကယီ ပတၢ်တူၢ်ဘၣ် ဆီတလဲသးသ့. အဃိ ပဒိးဘျၢထံ မ့ၢ်ဝံၤသနာ်က့ ဒ်သိး ပကဆဲးပိာ်ယ့ၣ်ၡူးအခံအဂီၢ် ပကဘၣ်ဆဲးမၤ နီၢ်ကစၢ် တၢ်မၤလိလံာ်စီဆှံ, ဃ့ထုကဖၣ်, လဲၤထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်. ပမ့ၢ်ဆဲးမၤဒ်အံၤ ထီဘိန့ၣ် ကကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ ဒီပုၢ်ဝဲၢ်မုၣ်ခွါအဂီၢ်စ့ၢ်ကီး.—၁ သ့း ၅:၁၁.

“သမံသမိးလီၤက့ၤ သုသး . . . မၤကွၢ်လီၤသုသး”

၁၄. နကဘၣ်သမံသမိးလီၤက့ၤနသး ဘၣ်ဃးဒီး တၢ်ဂ့ၢ်မနုၤလဲၣ် ဒီးဘၣ်မနုၤအဃိလဲၣ်. (၂ ကရံၣ်သူး ၁၃:၅)

^၁၄ နဒိးဘျၢထံ မ့ၢ်ဝံၤသနာ်က့ အရ့ဒိၣ်ဒိၣ်မးလၢ နကဘၣ် သမံသမိးလီၤက့ၤနသးထီဘိ. (ဖး ၂ ကရံၣ်သူး ၁၃:၅.) အဃိ သမံသမိးလီၤက့ၤနသး ဘၣ်ဃးဒီး နတၢ်ဃ့ထုကဖၣ်, တၢ်ဖးလံာ်စီဆှံ, တၢ်ထီၣ်တၢ်အိၣ်ဖှိၣ် ဒီးတၢ်ဟးစံၣ်တဲၤတဲလီၤတၢ်. ဒီးဂုာ်ကျဲးစၢးဃုကျဲဒ်သိး နမၤတၢ်သ့ၣ်တဖၣ်အံၤကမုာ် ဒီးနကန့ၢ်အါထီၣ်အဘျုး. အဒိ သံကွၢ်လီၤနသးလၢ ‘လံာ်စီဆှံအတၢ်သိၣ်လိ အခီၣ်ထံးခီၣ်ဘိန့ၣ် ယၡဲပၠးပှၤဂၤဘၣ်ဧါ. ယဟးစံၣ်တဲၤတဲလီၤတၢ် ကမုာ်ဒိၣ်ထီၣ်အဂီၢ် ယကဘၣ်မၤဒ်လဲၣ်. ဖဲယဃ့ထုကဖၣ်အခါ ယဃ့တၢ်ဂ့ၢ် လီၤတံၢ်လီၤဆဲးဧါ ဒီးယတၢ်ဃ့ထုကဖၣ်န့ၣ် ပာ်ဖျါထီၣ်လၢ ယသန့ၤသးလၢ ယဟိဝၤယွၤဧါ. ယလဲၤထီၣ်တၢ်အိၣ်ဖှိၣ် ကိးဘျီဒဲးဧါ. ဖဲယထီၣ်တၢ်အိၣ်ဖှိၣ်အခါ ဒ်သိး ယသးစၢၢ်ဆၢတၢ်ကန့ၢ် ဒီးကဟ့ၣ်ထီၣ် တၢ်စံးဆၢအဂီၢ် ယမၤဂ့ၤထီၣ်ကသ့ဒ်လဲၣ်.’

၁၅-၁၆. ဘၣ်ဃးဒီး တၢ်ဂ့ၢ်လိာ်ကွံာ် တၢ်ကွဲန့ၢ်လွဲန့ၢ်န့ၣ် နန့ၢ်ဘၣ်တၢ်မၤလိလၢ ဒီပုၢ်ဝဲၢ်ခွါရီဘၢၤ အတၢ်လဲၤခီဖျိဒ်လဲၣ်.

^၁၅ ဖဲနသမံသမိးလီၤက့ၤနသးအခါ အရ့ဒိၣ်ဒိၣ်မးလၢ နကဘၣ်သ့ၣ်ညါစ့ၢ်ကီး နတၢ်ဂံၢ်စၢ်ဘါစၢ်. အဒိ ဘၣ်ဃးဒီး တၢ်ဂ့ၢ်တခါအံၤန့ၣ် ဒီပုၢ်ဝဲၢ်ခွါရီဘၢၤ တဲဖျါထီၣ်က့ၤ အတၢ်လဲၤခီဖျိဒ်အံၤ– “ဖဲယအိၣ်အနံၣ် ၂၀ အခါ ယမၤတၢ်တနွံစှၤကိာ်သီ. ဘၣ်တနံၤ ဖဲတၢ်မၤဝံၤအလီၢ်ခံ ပိာ်မုၣ်လၢ ယတၢ်မၤလီၢ်တဂၤ ကွဲဟးယၤလၢအဟံၣ်. အတဲဝဲလၢ ပကအိၣ်လၢဟံၣ်ထဲခံဂၤ ဒီး ‘အကဲဝဲတၢ်ခွဲးတၢ်ယာ်ဖးဒိၣ်တခါ.’ ခီၣ်ထံးခါန့ၣ် ယတဲပူၤဖျဲးသး တစဲးတမွဲး ဘၣ်ဆၣ် လၢခံန့ၣ် ယတဲအီၤလိၤလိၤလၢ ယတလဲၤဘၣ် ဒီးယၡဲပၠးအီၤ လီၤတံၢ်လီၤဆဲး.” ဒီပုၢ်ဝဲၢ်ခွါရီဘၢၤ တကနၣ်ဃုာ် တၢ်ကွဲန့ၢ်လွဲန့ၢ်အံၤဘၣ်အဃိ လီၤကွၢ်လိဒိၣ်မး. လၢခံ ဒီပုၢ်ဝဲၢ်ခွါရီဘၢၤ ဆိကမိၣ်ထံက့ၤ တၢ်ကဲထီၣ်သးအံၤ ဒီးအဆိကမိၣ်ဝဲလၢ အမ့ၢ်ဂ့ၢ်လိာ်ဝဲ တဘျီဃီန့ၣ် ကဂ့ၤဒိၣ်. အတဲဝဲလၢ “ယတဂ့ၢ်လိာ်ကွံာ် တၢ်ကွဲန့ၢ်လွဲန့ၢ် တဘျီဃီ ဒ်သိး  စီၤယိၤသး ဂ့ၢ်လိာ် စီၤပိၤတံၤဖၢ်အမါဘၣ်. (၁ မိၤ ၃၉:၇-၉) ယမ့ၢ်ဘၣ်ကွၢ်န့ၣ် ယကဂ့ၢ်လိာ်ကွံာ် တၢ်ကွဲန့ၢ်လွဲန့ၢ်အံၤအဂီၢ် ယမၣ်တဆိကမိၣ်လၢ အကကီဘၣ်ယၤထဲအံၤဘၣ်. တၢ်ကဲထီၣ်သးအံၤ မၤစၢၤယၤဒ်သိး ယကသ့ၣ်ညါလီၤသးလၢ ယကဘၣ် မၤဂ့ၤထီၣ် ယတၢ်ရ့လိာ်သးဒီး ယဟိဝၤယွၤ.”

^၁၆ နမ့ၢ်သမံသမိးလီၤက့ၤနသး ဒ်ဒီပုၢ်ဝဲၢ်ခွါရီဘၢၤ မၤဝဲအသိးန့ၣ် နကန့ၢ်ဘၣ် အဘျုးစ့ၢ်ကီး. ဒီးနဂ့ၢ်လိာ်ကွံာ် တၢ်ကွဲန့ၢ်လွဲန့ၢ် မ့ၢ်န့ၢ်သနာ်က့ သံကွၢ်လီၤနသးလၢ ‘ယဂ့ၢ်လိာ်ကွံာ် တၢ်ကွဲန့ၢ်လွဲန့ၢ် တဘျီဃီဧါ.’ နမ့ၢ်သ့ၣ်ညါလီၤသးလၢ နအိၣ်ဒီး တၢ်ဂံၢ်စၢ်ဘါစၢ် တမံၤမံၤ ဒီးတၢ်လၢနဘၣ်မၤဂ့ၤထီၣ် မ့ၢ်အိၣ်တမံၤမံၤန့ၣ် တဘၣ်သးဟးဂီၤတဂ့ၤ. ဃ့ထုကဖၣ်လၢ ယဟိဝၤယွၤအအိၣ် ဒီးတဲဘၣ်အီၤလၢ နတၢ်ဂံၢ်စၢ်ဘါစၢ်. ဒီးပာ်လီၤနသး ဂၢၢ်ဂၢၢ်ကျၢၤကျၢၤလၢ နကဆဲးအိၣ်မူမၤထွဲ ယဟိဝၤယွၤ အတၢ်သိၣ်တၢ်သီ.—စံး ၁၃၉:၂၃, ၂၄.

၁၇. ဒီပုၢ်ဝဲၢ်ခွါရီဘၢၤ အတၢ်လဲၤခီဖျိန့ၣ် အဘၣ်ထွဲဒီး ယဟိဝၤယွၤ အမံၤဒ်လဲၣ်.

^၁၇ လၢဒီပုၢ်ဝဲၢ်ခွါရီဘၢၤ အတၢ်လဲၤခီဖျိန့ၣ် ပန့ၢ်ဘၣ် တၢ်မၤလိ လၢအဂၤအိၣ်ဒံး. ဒီပုၢ်ဝဲၢ်ခွါရီဘၢၤ ဆဲးတဲဝဲလၢ “ယဂ့ၢ်လိာ်ကွံာ် ပိာ်မုၣ်တဂၤန့ၣ် အတၢ်ကွဲန့ၢ်လွဲန့ၢ် ဝံၤအလီၢ်ခံ အတဲယၤလၢ ‘နဖျိလံ.’ ယသံကွၢ်အီၤလၢ အတဲတၢ်န့ၣ် အခီပညီဒ်လဲၣ်. အတဲပၠးယၤလၢ အသကိးခွါ လၢအကဲတ့ၢ် ယဟိဝၤပှၤအုၣ်အသးတဂၤ တဲဘၣ်အီၤလၢ ပှၤသးစၢ်ကိးဂၤဒဲး လၢအကဲ ယဟိဝၤပှၤအုၣ်အသးန့ၣ် အဝဲသ့ၣ်အိၣ်မူ တၢ်အိၣ်မူခံမၠိ ဒီးအဝဲသ့ၣ် မ့ၢ်န့ၢ်ဘၣ် တၢ်ခွဲးတၢ်ယာ်လၢ ကမၤကမၣ်တၢ်န့ၣ် အဝဲသ့ၣ်ကမၤဝဲ. အဃိ အတဲအသကိးခွါလၢ အကဟဲမၤကွၢ်ယၤ. ယသ့ၣ်ညါဘၣ်က့ၤလၢ ယမၤလၤကပီၤဘၣ် ယဟိဝၤယွၤအမံၤအဃိ ယသးခုဒိၣ်မး.”

၁၈. နဒိးဘျၢထံ ဝံၤအလီၢ်ခံ နပာ်လီၤသးလၢ နကမၤမနုၤလဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ တၢ်ဂ့ၢ်ခံခါလၢ ကမၤစၢၤနၤ.”)

^၁၈ ဖဲနဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးဒိးဘျၢထံအခါ နပာ်ဖျါထီၣ်လၢ တၢ်မ့ၢ်ကဲထီၣ်သးဒီးနၤ ဒ်လဲၣ်သနာ်က့ နဘၣ်သး မၤလၤကပီၤ ယဟိဝၤယွၤအမံၤ. တကးဒံးဘၣ် နထံၣ်ဘၣ် တၢ်မၤကွၢ် ဒီးနဂ့ၢ်လိာ် တၢ်လ့ပစီန့ၣ် ယဟိဝၤယွၤ ထံၣ်ဝဲဒီးသ့ၣ်ညါဝဲ. ခီဖျိလၢ နဂုာ်ကျဲးစၢး တီဒီးယဟိဝၤယွၤအဃိ အကဆိၣ်ဂ့ၤက့ၤနၤ. ဒီးနကဘၣ် နာ်သပှၢ်တၢၢ်လၢ အကဟ့ၣ်နၤ အသးစီဆှံ ဒီးအကမၤစၢၤနၤ ဒ်သိးနကဆဲးတီဒီးအီၤ. (လူၤ ၁၁:၁၁-၁၃) ခီဖျိလၢ ယဟိဝၤယွၤ ကဆဲးမၤစၢၤနၤအဃိ နဒိးဘျၢထံ ဝံၤအလီၢ်ခံ နဆဲးပိာ် ယ့ၣ်ၡူးအခံသ့.