တၢ်မၤလိ ၁၃
တၢ်သးဝံၣ် ၁၂၇ ယကြၢးကဲထီၣ်ပှၤဒ်လဲၣ်
ယဟိဝၤယွၤ ဘၣ်သူၣ်ဘၣ်သးနၤဧါ
“ယဘၣ်သူၣ်ဘၣ်သးနၤ.”—လူၤ ၃:၂၂.
တၢ်ဂ့ၢ်မိၢ်ပှၢ်
ပဝဲတနီၤန့ၣ် ပဆိကမိၣ်လၢ ယဟိဝၤယွၤ တဘၣ်သူၣ်ဘၣ်သးပှၤဘၣ်. နမ့ၢ်တူၢ်ဘၣ် ဒ်န့ၣ်န့ၣ် နကဘၣ်မၤဒ်လဲၣ်.
၁. ယဟိဝၤယွၤ အခ့အပှၤလၢ အသးတီတနီၤ ကဆိကမိၣ်ဘၣ် မနုၤလဲၣ်.
လံာ်စီဆှံ တဲဝဲလၢ “ယဟိဝၤယွၤ ဘၣ်သးဝဲ အပှၤဂီၢ်မုၢ်.” (စံး ၁၄၉:၄) အဃိ ပသ့ၣ်ညါလၢ ယဟိဝၤယွၤ ဘၣ်သူၣ်ဘၣ်သး အပှၤဂီၢ်မုၢ်ခဲလၢာ်. ဘၣ်ဆၣ် ပှၤတနီၤနီၤန့ၣ် အသးဟးဂီၤ ဒီးတဘျီတခီၣ် အဝဲသ့ၣ် ဆိကမိၣ်လီၤသးလၢ ‘ယဟိဝၤယွၤ ဘၣ်သူၣ်ဘၣ်သးယၤ စ့ၢ်ကီးဧါ.’ လၢလံာ်စီဆှံအစိၤ ပှၤသးတီတနီၤလၢ အဘူၣ်ထီၣ်ဘါထီၣ် ယဟိဝၤယွၤန့ၣ် တဘျီတခီၣ် အဝဲသ့ၣ် သးဟးဂီၤ ဒီးတူၢ်ဘၣ်ဝဲဒ်န့ၣ်.—၁ မူၤ ၁:၆-၁၀; ဘး ၂၉:၂, ၄; စံး ၅၁:၁၁.
၂. မတဂၤ ကဒိးန့ၢ်ဘၣ် ယဟိဝၤယွၤ အတၢ်ဘၣ်သးလဲၣ်.
၂ လံာ်စီဆှံ ပာ်ဖျါထီၣ်ဝဲ ပျီပျီလၢ ပှၤဟီၣ်ခိၣ်ဖိ တကဲပှၤလၢပှၤပှဲၤဘၣ် သနာ်က့ အဝဲသ့ၣ်ဒိးန့ၢ်ဘၣ် ယဟိဝၤယွၤ အတၢ်ဘၣ်သးသ့. ပကဒိးန့ၢ်ဘၣ် အတၢ်ဘၣ်သးအဂီၢ် ပကဘၣ် မၤမနုၤလဲၣ်. ပကဘၣ်စူၢ်က့ၤနာ်က့ၤ ယ့ၣ်ၡူးခရံာ် ဒီးဒိးဘျၢထံ. (ယိၤ ၃:၁၆) ပမၤဒ်န့ၣ်အဃိ ပပာ်ဖျါထီၣ်လၢ ပှၤအါဂၤအမဲာ်ညါလၢ ပပီၢ်ယၢ်လီၤက့ၤသး ဒီးပအၢၣ်လီၤလၢ ပကမၤ ယဟိဝၤယွၤ အတၢ်ဘၣ်သး. (မၤတၢ် ၂:၃၈; ၃:၁၉) ခီဖျိလၢ ပမၤဒ်အံၤအဃိ ပတၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ် ဒီးပမၤသးခု ယဟိဝၤယွၤအသး. ပမ့ၢ်ဂုာ်ကျဲးစၢး အိၣ်မူဒ် ပအၢၣ်လီၤပာ်စၢၤ ယဟိဝၤယွၤအသိးန့ၣ် အကဘၣ်သူၣ်ဘၣ်သးပှၤ ဒီးပကကဲထီၣ် အသကိး ဘူးဘူးတံၢ်တံၢ်.—စံး ၂၅:၁၄.
၃. ပကတဲသကိး တၢ်သံကွၢ် မနုၤလဲၣ်.
၃ တဘျီတခီၣ် ဘၣ်မနုၤအဃိ ပှၤတနီၤ ဆိကမိၣ်ဝဲလၢ ယဟိဝၤယွၤ တဘၣ်သူၣ်ဘၣ်သး အဝဲသ့ၣ်ဘၣ်လဲၣ်. ယဟိဝၤယွၤ ဘၣ်သူၣ်ဘၣ်သးပှၤန့ၣ် အပာ်ဖျါထီၣ်ဝဲဒ်လဲၣ်. ဒီးခရံာ်ဖိတဂၤ မၤဂၢၢ်ကျၢၤထီၣ် အတၢ်နာ်လၢ ယဟိဝၤယွၤ ဘၣ်သူၣ်ဘၣ်သးအီၤ ကသ့ဒ်လဲၣ်.
ဘၣ်မနုၤအဃိ ပှၤတနီၤ ဆိကမိၣ်ဝဲလၢ ယဟိဝၤယွၤ တဘၣ်သူၣ်ဘၣ်သး အဝဲသ့ၣ်ဘၣ်လဲၣ်
၄-၅. ပမ့ၢ်တူၢ်ဘၣ်လၢ ပလုၢ်ပပှ့ၤတအိၣ်ဘၣ် သနာ်က့ ပဘၣ်နာ်န့ၢ် မနုၤလဲၣ်.
၄ ပဝဲတနီၤ ပကတူၢ်ဘၣ်လၢ ပလုၢ်ပပှ့ၤ တအိၣ်ဘၣ် စးထီၣ်လၢ ပနီၢ်ဆံးခါလံ. (စံး ၈၈:၁၅) ဒီပုၢ်ဝဲၢ်ခွါအါဒြံၤယၤ တဲဝဲလၢ “ယတူၢ်ဘၣ်လၢ ယလုၢ်ယပှ့ၤတအိၣ်ဘၣ် မၢ်မၢ်လီၤ. ယနီၣ်ဘၣ်က့ၤ ဖဲယနီၢ်ဆံးခါန့ၣ် ယဃ့ထုကဖၣ်လၢ ယဟံၣ်ဖိဃီဖိ ကအိၣ်ဘၣ်လၢ ပၤရဒံစူးအပူၤ. မ့မ့ၢ်ယၤန့ၣ် ယတူၢ်ဘၣ်လၢ ယတကြၢးအိၣ်လၢ ပၤရဒံစူးအပူၤဘၣ်.” ဒီပုၢ်ဝဲၢ်ခွါထိနံၤန့ၣ် အတဒိၣ်ထီၣ်ဘၣ်လၢ တၢ်မ့ၢ်တၢ်တီအပူၤဘၣ် ဒီးအတဲဝဲလၢ “ယမိယပါန့ၣ် အဝဲသ့ၣ် တပတြၢၤယၤ ဒီးတဲယၤလၢ အအဲၣ်ယၤနီတဘျီဘၣ်. အဃိ ယတူၢ်ဘၣ်လၢ ယမၤသးခုအဝဲသ့ၣ်သး တသ့နီတဘျီဘၣ်.”
၅ ပမ့ၢ်တူၢ်ဘၣ်လၢ ပလုၢ်ပပှ့ၤတအိၣ်ဘၣ် သနာ်က့ ပကဘၣ်နီၣ်ဘၣ်လၢ ယဟိဝၤယွၤ အနီၢ်ကစၢ်ဒၣ်ဝဲ မူၤဃီၤပှၤဆူအအိၣ်. (ယိၤ ၆:၄၄) တၢ်ဂ့ၤတၢ်ဝါလၢ ပနီၢ်ကစၢ် တထံၣ်ဘၣ်န့ၣ် ယဟိဝၤယွၤထံၣ်ဝဲ ဒီးအသ့ၣ်ညါ တၢ်အိၣ်လၢ ပသးပူၤ နီၢ်ကီၢ်. (၁ မူၤ ၁၆:၇; ၂ ကွဲး ၆:၃၀) အဃိ ဖဲယဟိဝၤယွၤတဲလၢ အပာ်လုၢ်ပာ်ပှ့ၤပှၤအခါ ပနာ်န့ၢ်အီၤသ့ သပှၢ်တၢၢ်.—၁ ယိၤ ၃:၁၉, ၂၀.
၆. တၢ်ကမၣ်လၢ တၢ်မၢဖိပီလူး မၤဘၣ်ဝဲလၢညါန့ၣ် အတူၢ်ဘၣ်ဝဲဒ်လဲၣ်.
၆ တချုးလၢပသ့ၣ်ညါ တၢ်မ့ၢ်တၢ်တီဒံးဘၣ်န့ၣ် ပဝဲတနီၤ ပမၤတ့ၢ်တၢ်ကမၣ် ဒီးပတူၢ်ဘၣ်လၢ ပတၢ်ကမၣ်အိၣ်ဒံး. (၁ ပ့း ၄:၃) ခရံာ်ဖိလၢ အအိၣ်ဒီး တၢ်သးတီစ့ၢ်ကီး အဝဲသ့ၣ် ဘၣ်ဆဲးတြီဆၢဒံး တၢ်သူၣ်လီသးကွံလၢ အတဂ့ၤဘၣ်. နၤမီၤ နတူၢ်ဘၣ်လၢ ယဟိဝၤယွၤ တပျၢ်ကွံာ်နတၢ်ကမၣ်ဘၣ်ဧါ. နမ့ၢ်တူၢ်ဘၣ်ဒ်န့ၣ်န့ၣ် တမ့ၢ်ထဲနၤတဂၤဘၣ်. ယဟိဝၤယွၤ အခ့အပှၤတနီၤ လၢအသးတီဒီးအီၤန့ၣ် တူၢ်ဘၣ်တၢ်ဒ်သိးနၤ စ့ၢ်ကီး. အဒိ ဖဲတၢ်မၢဖိပီလူး ဆိကမိၣ်ထီၣ်က့ၤ တၢ်ကမၣ်လၢ အမၤဝဲလၢညါတဖၣ်အခါ အတူၢ်ဘၣ်လၢ အကဲပှၤနးသံ. (ရိ ၇:၂၄) ဘၣ်ဆၣ် ပထံၣ်ဘၣ်လၢ စီၤပီလူး ပီၢ်ယၢ်လီၤက့ၤအသး ဒီးအဒိးဘျၢထံ. သနာ်က့ အတဲလီၤသးလၢ အမ့ၢ် “တၢ်မၢဖိအဆံးကတၢၢ်” ဒီးပှၤတၢ်ဒဲးဘးဖိ “အဒိၣ်ကတၢၢ်.”—၁ ကရံၣ် ၁၅:၉; ၁ တံၤ ၁:၁၅.
၇. ဘၣ်ဃးဒီး တၢ်ကမၣ်လၢ ပမၤဘၣ်လၢညါန့ၣ် ပကဘၣ် သ့ၣ်နီၣ်ထီၣ်လၢ ယဟိဝၤယွၤ အၢၣ်လီၤပှၤဒ်လဲၣ်.
၇ ပမ့ၢ်ပီၢ်ယၢ်လီၤက့ၤသးန့ၣ် ပပါအိၣ်လၢမူခိၣ် အၢၣ်လီၤပှၤလၢ အကပျၢ်ကွံာ် ပတၢ်ကမၣ်. (စံး ၈၆:၅) အဃိ ပမ့ၢ်ပီၢ်ယၢ်လီၤက့ၤသး နီၢ်ကီၢ်န့ၣ် ပနာ်သပှၢ်တၢၢ်လၢ ယဟိဝၤယွၤ ကပျၢ်ကွံာ်ပတၢ်ကမၣ် ဒ်အအၢၣ်လီၤပှၤအသိး.—ကလီး ၂:၁၃.
၈-၉. ပမၤယဟိဝၤယွၤ အတၢ်မၤ အါထဲလဲၣ်သနာ်က့ ပမ့ၢ်တူၢ်ဘၣ်လၢ ယဟိဝၤယွၤ တသးခုဒံးဘၣ်န့ၣ် ပမၤနၢၤကွံာ် တၢ်တူၢ်ဘၣ်အံၤ ကသ့ဒ်လဲၣ်.
၈ ပဝဲခဲလၢာ်န့ၣ် ပဘၣ်သး ဂုာ်ကျဲးစၢး မၤယဟိဝၤယွၤအတၢ်မၤ လၢအဂ့ၤကတၢၢ်. ဘၣ်ဆၣ် ပဝဲတနီၤန့ၣ် ပကတူၢ်ဘၣ်လၢ ပမၤအတၢ်မၤ အါထဲလဲၣ်သနာ်က့ ပတကြၢးဒီး အတၢ်ဘၣ်သး နီတဘျီဘၣ်. ဒီပုၢ်ဝဲၢ်မုၣ်အမဲဒၤ တဲဝဲလၢ “ညီနုၢ်န့ၣ် ယဆိကမိၣ်လၢ ယကဟ့ၣ် ယဟိဝၤယွၤ တၢ်လၢအဂ့ၤကတၢၢ်အဂီၢ် ယကဘၣ်မၤအါန့ၢ် ယမၤခဲအံၤဒံး. အဃိ ယမၤမ့ၢ်တန့ၢ်ဘၣ် သနာ်က့ ယဂုာ်ကျဲးစၢးမၤဒံး. လၢခံ ဖဲယသ့ၣ်ညါလၢ ယမၤတန့ၢ်ဘၣ်အခါ ယသးဟးဂီၤ ဒီးယဆိကမိၣ်လၢ ယဟိဝၤယွၤ တဘၣ်သူၣ်ဘၣ်သးယၤဘၣ်.”
၉ ပကတူၢ်ဘၣ်လၢ ပမၤယဟိဝၤယွၤ အတၢ်မၤ အါထဲလဲၣ်သနာ်က့ ယဟိဝၤယွၤ တသးခုဒံးဘၣ်. တၢ်တူၢ်ဘၣ်အံၤ ပမၤနၢၤအီၤကသ့ဒ်လဲၣ်. ပကဘၣ်သ့ၣ်နီၣ်ထီၣ်လၢ ယဟိဝၤယွၤန့ၣ် အအိၣ်ဒီး တၢ်ထံၣ်အကြၢးအဘၣ်. အဃိ တၢ်လၢပမၤတန့ၢ်ဘၣ်န့ၣ် ယဟိဝၤယွၤ တမၢဆူၣ်ပှၤဘၣ်. ပဂုာ်ကျဲးစၢးမၤ အတၢ်မၤ လၢအဂ့ၤကတၢၢ်န့ၣ် အပာ်လုၢ်ပာ်ပှ့ၤဝဲ. ဆိကမိၣ်ထီၣ်စ့ၢ်ကီး ပှၤလၢအမၤယဟိဝၤယွၤ အတၢ်မၤလၢ အသးဒီဖျၢၣ် အဒိအတဲာ်လၢ လံာ်စီဆှံပူၤ. အဒိ စီၤပီလူးန့ၣ် အမၤတၢ်ဆူၣ်ဆူၣ်လၢ အနံၣ်အါမး. အလဲၤတၢ်က့ၤတၢ် အမံးလာ်လၢ အကထိတဖၣ် ဒီးဒုးအိၣ်ထီၣ်ဝဲ တၢ်အိၣ်ဖှိၣ် အဖျၢၣ်အါမး. ဘၣ်ဆၣ် ဖဲစီၤပီလူး အတၢ်အိၣ်သးဆီတလဲ ဒီးအစံၣ်တဲၤတဲလီၤတၢ် တသ့ဒ်သိးလၢညါလၢၤဘၣ်အခါ မ့ၢ်ယဟိဝၤယွၤ တဘၣ်သူၣ်ဘၣ်သးအီၤလၢၤဘၣ်ဧါ. တမ့ၢ်ဘၣ်, စီၤပီလူး ဆဲးမၤတၢ်လၢအမၤဝဲသ့ ဒီးယဟိဝၤယွၤ ဆိၣ်ဂ့ၤအီၤ. (မၤတၢ် ၂၈:၃၀, ၃၁) ဒ်န့ၣ်အသိး ပမၤယဟိဝၤယွၤအတၢ်မၤ န့ၢ်အါမ့ၢ်ဂ့ၤ စှၤမ့ၢ်ဂ့ၤ တၢ်အရ့ဒိၣ်လၢ ယဟိဝၤယွၤအဂီၢ်န့ၣ် ပကမၤအတၢ်မၤလၢ တၢ်သူၣ်အိၣ်သးအိၣ်. ခဲအံၤ ပကတဲသကိး တၢ်ဂ့ၢ်တနီၤလၢ ယဟိဝၤယွၤ ပာ်ဖျါထီၣ်လၢ အသူၣ်အိၣ်သးအိၣ်ပှၤ.
ယဟိဝၤယွၤ ဘၣ်သူၣ်ဘၣ်သးပှၤန့ၣ် အပာ်ဖျါထီၣ်ဝဲဒ်လဲၣ်
၁၀. ပ “နၢ်ဟူ” ယဟိဝၤယွၤ တဲပှၤလၢ အဘၣ်သူၣ်ဘၣ်သးပှၤ သ့ဒ်လဲၣ်. (ယိၤဟၣ် ၁၆:၂၇)
၁၀ ခီဖျိ အဟ့ၣ်လီၤပှၤ လံာ်စီဆှံ. ယဟိဝၤယွၤ ပာ်ဖျါထီၣ် ဒီးတဲဖျါထီၣ်ဝဲလၢ အအဲၣ်အပှၤဂီၢ်မုၢ် ဒီးအဘၣ်သူၣ်ဘၣ်သး အဝဲသ့ၣ်. အဒိ လၢလံာ်စီဆှံအပူၤန့ၣ် ပထံၣ်ဘၣ်လၢ ယဟိဝၤယွၤ တဲဘၣ်ယ့ၣ်ၡူးလၢ ယ့ၣ်ၡူးမ့ၢ်အဖိခွါ လၢအအဲၣ်ဝဲ ဒီးဘၣ်သူၣ်ဘၣ်သးဝဲန့ၣ် ခံဘျီ. (မး ၃:၁၇; ၁၇:၅) နၤမီၤ, နဘၣ်သးလၢ ယဟိဝၤယွၤ တဲနၤဒ်န့ၣ် စ့ၢ်ကီးဧါ. ယဟိဝၤယွၤ တတဲတၢ်ဒီးပှၤ လၢအနီၢ်ကစၢ်ဘၣ်, ဘၣ်ဆၣ် အတဲတၢ်ဒီးပှၤခီဖျိ အကလုၢ်ကထါ လံာ်စီဆှံ. ဖဲပဖးဘၣ်ဃးဒီး ယ့ၣ်ၡူးတဲတၢ်ဒီးအပျဲၢ်အဘီၣ် လၢတၢ်အဲၣ်တၢ်ကွံအခါ လီၤဂာ်ဒ်သိးဒီးပ “နၢ်ဟူ” ယဟိဝၤယွၤ တဲပှၤလၢ အဘၣ်သူၣ်ဘၣ်သးပှၤ. (ဖး ယိၤဟၣ် ၁၆:၂၇.) ယ့ၣ်ၡူးကွၢ်လိ ဒီးပာ်ဖျါထီၣ်က့ၤ အပါအတၢ်ဂ့ၤတၢ်ဝါ လၢလၢပှဲၤပှဲၤ. အဃိ ဖဲပဖးဘၣ်ဃးဒီး ယ့ၣ်ၡူး တဲဖျါထီၣ်လၢ အဘၣ်သူၣ်ဘၣ်သး အပျဲၢ်အဘီၣ်လၢ အတလၢတပှဲၤဘၣ် အဂ့ၢ်အခါ ပထံၣ်တမှံကွၢ်လၢ တၢ်လၢယ့ၣ်ၡူးတဲ အဝဲသ့ၣ်န့ၣ် လီၤဂာ်ဒ်သိး ယဟိဝၤယွၤတဲပှၤသ့.—ယိၤ ၁၅:၉, ၁၅.
ယဟိဝၤယွၤ သူၣ်အိၣ်သးအိၣ်ပှၤန့ၣ် တၢ်အုၣ်သးအိၣ်ဝဲအါမး (ကွၢ်လံာ်အဆၢ ၁၀)
၁၁. ပထံၣ်ဘၣ် တၢ်ကီတၢ်ခဲသနာ်က့ ဘၣ်မနုၤအဃိ ပသ့ၣ်ညါလၢ ယဟိဝၤယွၤ ဘၣ်သူၣ်ဘၣ်သးပှၤဒံးလဲၣ်. (ယၤကိာ် ၁:၁၂)
၁၁ ခီဖျိ အဟ့ၣ်ပှၤတၢ်လၢပလိၣ်ဘၣ်. ယဟိဝၤယွၤ သးအိၣ်မၤစၢၤပှၤ ဒီးအဟ့ၣ်ပှၤ နီၢ်ခိတၢ်လိၣ်ဘၣ်တဖၣ်. ဘၣ်ဆၣ် တဘျီတခီၣ်န့ၣ် ယဟိဝၤယွၤ ပျဲဝဲလၢ ပကထံၣ်ဘၣ် တၢ်ကီတၢ်ခဲ ဒ်သိးဒီး စီၤယိၤဘးထံၣ်ဘၣ်ဝဲ. (ဘး ၁:၈-၁၁) ဒီးဖဲပထံၣ်ဘၣ် တၢ်ကီတၢ်ခဲအခါ ဘၣ်သ့ၣ်သ့ၣ် ပကဆိကမိၣ်လၢ ယဟိဝၤယွၤ တဘၣ်သူၣ်ဘၣ်သးပှၤလၢၤဘၣ်. ဘၣ်ဆၣ် နီၢ်ကီၢ်န့ၣ် တၢ်ကီတၢ်ခဲတဖၣ်အံၤ ဒုးအိၣ်ထီၣ် တၢ်ခွဲးတၢ်ယာ်လၢ ပကပာ်ဖျါထီၣ်လၢ ပအဲၣ်ယဟိဝၤယွၤ ဒီးသန့ၤသးလၢအီၤ. (ဖး ယၤကိာ် ၁:၁၂.) ဒီးဖဲပလဲၤခီဖျိ တၢ်ကီတၢ်ခဲအခါ ပကထံၣ်ဘၣ်လၢ ယဟိဝၤယွၤ အဲၣ်ပှၤဒိၣ်မး ဒီးဒ်သိး ပလဲၤခီဖျိ ကန့ၢ်အဂီၢ် အကမၤစၢၤပှၤ.
၁၂. လၢဒီပုၢ်ဝဲၢ်ခွါဒံၤမံတြံၤ အတၢ်လဲၤခီဖျိန့ၣ် ပန့ၢ်ဘၣ် တၢ်မၤလိဒ်လဲၣ်.
၁၂ ပကကွၢ်သကိး ဒီပုၢ်ဝဲၢ်ခွါဒံၤမံတြံၤ လၢအအိၣ်လၢ ကီၢ်အ့ၡၢၣ် အတၢ်လဲၤခီဖျိ. ဒီပုၢ်ဝဲၢ်ခွါအံၤ အတၢ်မၤတအိၣ်လၢၤဘၣ် ဒီးအဃုတၢ်မၤတဘၣ်ဘၣ် တဘျုးလါညါ. အဃိ အပာ်လီၤသးလၢ အကနာ်န့ၢ် ယဟိဝၤယွၤ ဒီးလဲၤစံၣ်တဲၤတဲလီၤတၢ် အါထီၣ်. တၢ်ဆၢကတီၢ် လဲၤတလၢကွံာ် တဘျုးလါလံ ဘၣ်ဆၣ် အဃုတၢ်မၤ တဘၣ်ဒံးဘၣ်. လၢခံ အဆိးက့ထီၣ်နးမး ဒီးအဘၣ်အိၣ်လၢ လီၢ်မံခိၣ်ထီဘိ. အဆိကမိၣ်လီၤသးလၢ အကဲပါ ဒီးဝၤလၢ အတကဲဘျုးလၢ အဟံၣ်ဖိဃီဖိအဂီၢ်ဘၣ် အဃိ အတူၢ်ဘၣ်ဝဲလၢ ယဟိဝၤယွၤ တဘၣ်သူၣ်ဘၣ်သးအီၤလၢၤဘၣ်. ဘၣ်တဟါ လၢလံာ်က့လိၤန့ၣ် အဖိမုၣ်ကွဲးန့ၢ်အီၤ တၢ်ကတိၤ လၢအအိၣ်ဖဲ ယၡါယၤ ၃၀:၁၅ လၢအတဲဝဲလၢ “သုမ့ၢ်ပာ်သုသး ဂၢၢ်ဂၢၢ် ဒီးနာ်န့ၢ်ယၤန့ၣ် သုကအိၣ်ဒီး တၢ်ဂံၢ်တၢ်ဘါ.” ဝံၤဒီး အဖိမုၣ် လဲၤဟ့ၣ်အီၤ ဒီးတဲအီၤလၢ “ပါပါ, နတူၢ်ဘၣ်တၢ် မ့ၢ်တမုာ်ဘၣ်န့ၣ် သ့ၣ်နီၣ်ထီၣ် လံာ်စီဆှံတဆၢအံၤနီၤ.” ဒီပုၢ်ဝဲၢ်ခွါဒံၤမံတြံၤ သ့ၣ်ညါက့ၤဝဲလၢ ခီဖျိလၢ ယဟိဝၤယွၤ အတၢ်မၤစၢၤအဃိ အဟံၣ်ဖိဃီဖိ တၢ်လိၣ်ဘၣ် ဒ်သိးဒီး တၢ်အီၣ်တၢ်အီ, တၢ်ကူတၢ်ကၤ ဒီးတၢ်အိၣ်တၢ်ဆိးအိၣ်ဒံး. ဒီပုၢ်ဝဲၢ်ခွါဒံၤမံတြံၤ တဲဝဲလၢ “တၢ်လၢယကဘၣ်မၤန့ၣ် မ့ၢ်ဝဲ ယကဘၣ်ပာ်သး ဂၢၢ်ဂၢၢ် ဒီးဆဲးနာ်န့ၢ် ယဟိဝၤယွၤထီဘိ.” ပဝဲစ့ၢ်ကီး ပမ့ၢ်ထံၣ်ဘၣ် တၢ်ကီတၢ်ခဲဒ်အံၤ သနာ်က့ ယဟိဝၤယွၤ သးအိၣ်ပှၤဒံး ဒီးဒ်သိး ပလဲၤခီဖျိ ပတၢ်ကီတၢ်ခဲ ကန့ၢ်အဂီၢ် အကမၤစၢၤပှၤ.
ယဟိဝၤယွၤ သူၣ်အိၣ်သးအိၣ်ပှၤန့ၣ် တၢ်အုၣ်သးအိၣ်ဝဲအါမး (ကွၢ်လံာ်အဆၢ ၁၂) a
၁၃. ဒ်သိး ယဟိဝၤယွၤ ကပာ်ဖျါထီၣ်လၢ အဘၣ်သူၣ်ဘၣ်သးပှၤအဂီၢ် အသူဝဲ မတဂၤလဲၣ် ဒီးအမၤဝဲဒ်လဲၣ်.
၁၃ ခီဖျိ ဒီပုၢ်ဝဲၢ်မုၣ်ခွါ အတၢ်မၤစၢၤ. ယဟိဝၤယွၤ ပာ်ဖျါထီၣ်လၢ အဘၣ်သူၣ်ဘၣ်သးပှၤ ခီဖျိအသူဝဲ ဒီပုၢ်ဝဲၢ်မုၣ်ခွါတဖၣ်. အဒိ ဖဲပလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါ သပှၢ်တၢၢ်အခါ ယဟိဝၤယွၤ သူဝဲဒီပုၢ်ဝဲၢ်မုၣ်ခွါလၢ ကဟ့ၣ်ဂံၢ်ဟ့ၣ်ဘါပှၤ. ဒီပုၢ်ဝဲၢ်မုၣ်လၢ အအိၣ်လၢ ကီၢ်အ့ၡၢၣ် ဒီးအထံၣ်ဘၣ် တၢ်ကီတၢ်ခဲအါမးတဂၤ သ့ၣ်ညါဘၣ်ဝဲလၢ ယဟိဝၤယွၤ မၤစၢၤအီၤခီဖျိ ဒီပုၢ်ဝဲၢ်မုၣ်ခွါတဖၣ်. ဒီပုၢ်ဝဲၢ်မုၣ်အံၤ အတၢ်မၤတအိၣ်လၢၤဘၣ် ဒီးအဆိးက့ထီၣ်နးမး. လၢခံ အဝၤစ့ၢ်ကီး မၤတၢ်ကမၣ်ဖးဒိၣ်အဃိ အတကဲဘၣ် တၢ်အိၣ်ဖှိၣ်သးပှၢ်လၢၤဘၣ်. ဒီပုၢ်ဝဲၢ်မုၣ် တဲဝဲလၢ “ဘၣ်မနုၤအဃိ တၢ်ကဲထီၣ်သးဒီးယၤ ဒ်အံၤလဲၣ်န့ၣ် ယတသ့ၣ်ညါဘၣ်. ယဆိကမိၣ်လၢ ယမၤကမၣ်တၢ် တမံၤမံၤအဃိ ယဟိဝၤယွၤ တဘၣ်သးယၤလၢၤဘၣ်.” ဒီပုၢ်ဝဲၢ်မုၣ်အံၤ ဃ့ကညး ယဟိဝၤယွၤလၢ အကပာ်ဖျါထီၣ်လၢ အဘၣ်သူၣ်ဘၣ်သးအီၤ. ယဟိဝၤယွၤ ပာ်ဖျါထီၣ်န့ၢ်အီၤဒ်လဲၣ်. ဒီပုၢ်ဝဲၢ်မုၣ် တဲဝဲလၢ “တၢ်အိၣ်ဖှိၣ်သးပှၢ်တဖၣ် တဲတၢ်ဒီးယၤ ဒီးတဲဘၣ်ယၤလၢ ယဟိဝၤယွၤ အဲၣ်ယၤဒံး.” လၢခံ အဆဲးဃ့ဝဲလၢ ယဟိဝၤယွၤ ကပာ်ဖျါထီၣ်လၢ အဘၣ်သူၣ်ဘၣ်သးအီၤဒံး. အတဲဝဲလၢ “တနံၤဃီဃီန့ၣ် ယန့ၢ်ဘၣ် လံာ်ပရၢလၢ ဒီပုၢ်ဝဲၢ်မုၣ်ခွါအအိၣ်. ဖဲယဖး အဝဲသ့ၣ် အတၢ်ကတိၤ ဟ့ၣ်ဂံၢ်ဟ့ၣ်ဘါအခါ ယသ့ၣ်ညါဘၣ်လၢ ယဟိဝၤယွၤ နၢ်ဟူယတၢ်ဃ့.” ပထံၣ်ဘၣ်လၢ ယဟိဝၤယွၤ ပာ်ဖျါထီၣ်လၢ အဘၣ်သူၣ်ဘၣ်သးပှၤ ခီဖျိအသူဝဲ ဒီပုၢ်ဝဲၢ်မုၣ်ခွါလၢ ကဟ့ၣ်ဂံၢ်ဟ့ၣ်ဘါပှၤ.—စံး ၁၀:၁၇.
ယဟိဝၤယွၤ သူၣ်အိၣ်သးအိၣ်ပှၤန့ၣ် တၢ်အုၣ်သးအိၣ်ဝဲအါမး (ကွၢ်လံာ်အဆၢ ၁၃) b
၁၄. ယဟိဝၤယွၤ ပာ်ဖျါထီၣ်လၢ အဘၣ်သူၣ်ဘၣ်သးပှၤန့ၣ် တၢ်အုၣ်သး မနုၤအိၣ်လဲၣ်.
၁၄ ဖဲပလိၣ်ဘၣ် တၢ်သိၣ်က့ၤသီက့ၤအခါ ယဟိဝၤယွၤ သူဝဲဒီပုၢ်ဝဲၢ်မုၣ်ခွါလၢ ကဟ့ၣ်ကူၣ်ပှၤ ဒီးအမၤဝဲဒ်န့ၣ်န့ၣ် အပာ်ဖျါထီၣ်လၢ အဘၣ်သူၣ်ဘၣ်သးပှၤ. အဒိ ဖဲတၢ်မၢဖိအစိၤန့ၣ် ယဟိဝၤယွၤသူဝဲ တၢ်မၢဖိပီလူး ဒီးမၢအကွဲး လံာ်ပရၢ ၁၄ ဘ့ၣ် လၢဒီပုၢ်ဝဲၢ်မုၣ်ခွါအအိၣ်. လၢလံာ်ပရၢအပူၤန့ၣ် ယဟိဝၤယွၤမၢ စီၤပီလူးကွဲးဃုာ်ဒီး တၢ်ဟ့ၣ်ကူၣ်လိၤလိၤ လၢအအိၣ်ဒီး တၢ်အဲၣ်တၢ်ကွံ. ဘၣ်မနုၤအဃိ ယဟိဝၤယွၤမၢ စီၤပီလူး ကွဲးဃုာ်ဒီး တၢ်ဟ့ၣ်ကူၣ်လဲၣ်. ယဟိဝၤယွၤန့ၣ် အကဲပါလၢအဂ့ၤ ဒီးအသိၣ်က့ၤသီက့ၤ အဖိလၢ “အအဲၣ်ဝဲ.” (ကတိၤ ၃:၁၁, ၁၂) အဃိ ပှၤတဂၤဂၤ မ့ၢ်ဟ့ၣ်ပှၤ တၢ်ဟ့ၣ်ကူၣ် လၢအသန့ၤထီၣ်သးလၢ လံာ်စီဆှံန့ၣ် ပကဘၣ်ထံၣ်လၢ ယဟိဝၤယွၤ ပာ်ဖျါထီၣ်လၢ အအဲၣ်ပှၤဒံး ဒီးပတဘၣ်ဆိကမိၣ်လၢ အသးထီၣ်ပှၤဘၣ်. (ဧ့ၤ ၁၂:၆) ယဟိဝၤယွၤ ပာ်ဖျါထီၣ်လၢ အဘၣ်သူၣ်ဘၣ်သးပှၤန့ၣ် တၢ်အုၣ်သးအဂၤ အိၣ်ဒံးဧါ.
ယဟိဝၤယွၤ ဘၣ်သူၣ်ဘၣ်သးပှၤန့ၣ် တၢ်အုၣ်သးအဂၤအိၣ်ဒံး
၁၅. ယဟိဝၤယွၤ ဟ့ၣ်လီၤအသးစီဆှံလၢ မတဂၤလဲၣ် ဒီးဘၣ်မနုၤအဃိ အမၤအါထီၣ် ပတၢ်နာ်လဲၣ်.
၁၅ ပှၤလၢ ယဟိဝၤယွၤ ဘၣ်သူၣ်ဘၣ်သးအီၤန့ၣ် ယဟိဝၤယွၤဟ့ၣ်အီၤ အသးစီဆှံ. (မး ၁၂:၁၈) သံကွၢ်လီၤနသးလၢ ‘တၢ်ဂ့ၤတၢ်ဝါတဖၣ်လၢ အဟဲအိၣ်ထီၣ် ခီဖျိလၢ သးစီဆှံန့ၣ် ယပာ်ဖျါထီၣ်လၢ ယတၢ်အိၣ်မူပူၤဧါ.’ နမၤလိဘၣ် ယဟိဝၤယွၤအဂ့ၢ် ဝံၤအလီၢ်ခံ နထံၣ်လၢ နတၢ်ဝံသးစူၤပှၤဂၤ အိၣ်အါထီၣ်ဧါ. နီၢ်ကီၢ်န့ၣ် ပမ့ၢ်ဂုာ်ကျဲးစၢး ပာ်ဖျါထီၣ် တၢ်ဂ့ၤတၢ်ဝါတဖၣ်လၢ အဟဲအိၣ်ထီၣ် ခီဖျိလၢသးစီဆှံ အါအါန့ၣ် ပကနာ်အါထီၣ်လၢ ယဟိဝၤယွၤ ဘၣ်သူၣ်ဘၣ်သးပှၤ.—ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ သးစီဆှံအတၤသၣ်န့ၣ် မ့ၢ်ဝဲ . . .”
ယဟိဝၤယွၤ သူၣ်အိၣ်သးအိၣ်နၤန့ၣ် နထံၣ်ဘၣ် တၢ်အုၣ်သးဒ်လဲၣ် (ကွၢ်လံာ်အဆၢ ၁၅)
၁၆. ပှၤလၢ ယဟိဝၤယွၤ ဘၣ်သူၣ်ဘၣ်သးအီၤန့ၣ် ယဟိဝၤယွၤ ဟ့ၣ်အီၤမူဒါ မနုၤလဲၣ် ဒီးနသ့ၣ်ညါဘၣ် ဒ်အံၤအဃိ နတူၢ်ဘၣ်ဒ်လဲၣ်. (၁ သ့းစၤလနံ ၂:၄)
၁၆ ပှၤလၢ ယဟိဝၤယွၤ ဘၣ်သူၣ်ဘၣ်သးအီၤန့ၣ် ယဟိဝၤယွၤ ဟ့ၣ်အီၤမူဒါလၢ ကစံၣ်တဲၤတဲလီၤ တၢ်သးခုကစီၣ်. (ဖး ၁ သ့းစၤလနံ ၂:၄.) ဒီပုၢ်ဝဲၢ်မုၣ်ကၠိစလ့ တဲဘၣ်ပှၤဂၤ တၢ်သးခုကစီၣ်အဃိ အနာ်အါထီၣ်ဝဲလၢ ယဟိဝၤယွၤ ဘၣ်သူၣ်ဘၣ်သးအီၤ. ဘၣ်တနံၤ ဖဲဒီပုၢ်ဝဲၢ်မုၣ်ကၠိစလ့ မံပၢၢ်ထီၣ်အခါ အသးလီၤစၢ်. အတဲဝဲလၢ “ယတူၢ်ဘၣ်လၢ ယဂံၢ်ယဘါတအိၣ်ဘၣ် ဒီးယတကဲဘျုးဘၣ်. ဘၣ်ဆၣ် ယမၤပှၤလဲၤလၢညါ ဒီးတၢ်တနံၤန့ၣ် ညီနုၢ် ယလဲၤစံၣ်တဲၤတဲလီၤတၢ်အဃိ ယဃ့ထုကဖၣ်ဝံၤဒီး ယလဲၤစံၣ်တဲၤတဲလီၤတၢ်.” ဖဲတၢ်တဂီၤန့ၣ် ဒီပုၢ်ဝဲၢ်မုၣ်ကၠိစလ့ ထံၣ်လိာ်သးဒီး ပိာ်မုၣ်တဂၤ လၢအမံၤမ့ၢ် မဲၤရံၤ. မဲၤရံၤန့ၣ် အသးဂ့ၤမး ဒီးအတူၢ်လိာ်လၢ အကမၤလိလံာ်စီဆှံ. လၢခံတဘျုးလါန့ၣ် မဲၤရံၤ တဲဝဲလၢ ဖဲဒီပုၢ်ဝဲၢ်မုၣ်ကၠိစလ့ လဲၤဒိတကျိာ် အတြဲၤအခါ ဘၣ်လၢ အဃ့ထုကဖၣ်တၢ်. ဒီပုၢ်ဝဲၢ်မုၣ်ကၠိစလ့ ဆိကမိၣ်ထံက့ၤ တၢ်လဲၤခီဖျိတခါအံၤ ဒီးအတဲဝဲလၢ “လီၤဂာ်ဒ်သိးဒီး ယဟိဝၤယွၤ တဲယၤလၢ ‘ယဘၣ်သူၣ်ဘၣ်သးနၤ.’” ပသ့ၣ်ညါလၢ တၢ်သးခုကစီၣ်လၢ ပစံၣ်တဲၤတဲလီၤန့ၣ် ပှၤတဘၣ်သး ကနၣ်ဝဲကိးဂၤဒဲးဘၣ်. သနာ်က့ ဖဲပဂုာ်ကျဲးစၢး တဲဘၣ်ပှၤဂၤ တၢ်သးခုကစီၣ်အခါ ပသ့ၣ်ညါလၢ ယဟိဝၤယွၤ ဘၣ်သူၣ်ဘၣ်သးပှၤ.
ယဟိဝၤယွၤ သူၣ်အိၣ်သးအိၣ်နၤန့ၣ် နထံၣ်ဘၣ် တၢ်အုၣ်သးဒ်လဲၣ် (ကွၢ်လံာ်အဆၢ ၁၆) c
၁၇. ဒီပုၢ်ဝဲၢ်မုၣ်ဝံးထိရံယါ တဲဘၣ်ဃးဒီး တၢ်ပှ့ၤက့ၤအဂ့ၢ်န့ၣ် နန့ၢ်ဘၣ် တၢ်မၤလိဒ်လဲၣ်. (စံးထီၣ်ပတြၢၤ ၅:၁၂)
၁၇ ပှၤလၢ ယဟိဝၤယွၤ ဘၣ်သူၣ်ဘၣ်သးအီၤန့ၣ် ယဟိဝၤယွၤ သူဝဲ တၢ်ပှ့ၤက့ၤ အလုၢ်အပှ့ၤ လၢအဂီၢ်. (၁ တံၤ ၂:၅, ၆) ဘၣ်ဆၣ် ပဒိးဘျၢထံလံ ဒီးပနာ်တၢ်ပှ့ၤက့ၤလံ သနာ်က့ ပမ့ၢ်ဆိကမိၣ်လၢ ယဟိဝၤယွၤ တဘၣ်သူၣ်ဘၣ်သးပှၤ ဒံးဘၣ်န့ၣ် ပကဘၣ်မၤဒ်လဲၣ်. ပတဘၣ် ဆိကမိၣ်ထဲလၢ ပနီၢ်ကစၢ် တၢ်တူၢ်ဘၣ်ဘၣ်, ပကဘၣ် နာ်န့ၢ် ယဟိဝၤယွၤ. ပှၤလၢ အနာ်တၢ်ပှ့ၤက့ၤန့ၣ် ယဟိဝၤယွၤ ထံၣ်အဝဲသ့ၣ်ဒ် ပှၤတီပှၤလိၤ ဒီးအအၢၣ်လီၤလၢ အကဆိၣ်ဂ့ၤ အဝဲသ့ၣ်. (ဖး စံးထီၣ်ပတြၢၤ ၅:၁၂; ရိ ၃:၂၆) ဒီပုၢ်ဝဲၢ်မုၣ်ဝံးထိရံယါန့ၣ် အဆိကမိၣ်ထံ တၢ်ပှ့ၤက့ၤအဂ့ၢ်အဃိ ကဲဘျုးလၢအဂီၢ်ဒိၣ်မး. ဘၣ်တနံၤ အဆိကမိၣ်ထံ တၢ်ပှ့ၤက့ၤအဂ့ၢ် လီၤတံၢ်လီၤဆဲး ဝံၤဒီး အတဲဝဲလၢ “ယဟိဝၤယွၤန့ၣ် အသးစူၤလၢယဖီခိၣ် ဖးယံာ်လံ . . . ဘၣ်ဆၣ် ခီဖျိလၢယတတူၢ်လိာ် အတၢ်အဲၣ်အဃိ လီၤဂာ်ဒ်ယတဲအီၤလၢ ‘နတၢ်အဲၣ်န့ၣ် ဆံးတလၢလၢယဂီၢ် ဒီးနဖိခွါအတၢ်တူၢ်သံအသးန့ၣ် ကျၢၢ်ဘၢ ယတၢ်ဒဲးဘးတန့ၢ်ဘၣ်.’” ခီဖျိလၢ ဒီပုၢ်ဝဲၢ်မုၣ်အံၤ ဆိကမိၣ်ထံ တၢ်ပှ့ၤက့ၤ အဂ့ၢ်အဃိ အတူၢ်ဘၣ်ဝဲလၢ ယဟိဝၤယွၤအဲၣ်အီၤ. ပဝဲစ့ၢ်ကီး ပမ့ၢ်ဆိကမိၣ်ထံ တၢ်ပှ့ၤက့ၤအဂ့ၢ်န့ၣ် ပကတူၢ်ဘၣ်လၢ ယဟိဝၤယွၤအဲၣ်ပှၤ ဒီးဘၣ်သူၣ်ဘၣ်သးပှၤ.
ယဟိဝၤယွၤ သူၣ်အိၣ်သးအိၣ်နၤန့ၣ် နထံၣ်ဘၣ် တၢ်အုၣ်သးဒ်လဲၣ် (ကွၢ်လံာ်အဆၢ ၁၇)
၁၈. ပမ့ၢ်ဆဲးအဲၣ် ယဟိဝၤယွၤန့ၣ် ပကန့ၢ်ဘၣ် အဘျုးဒ်လဲၣ်.
၁၈ ပကဂုာ်ကျဲးစၢး မၤထွဲတၢ်ဟ့ၣ်ကူၣ် လၢတၢ်မၤလိတခါအံၤ ပာ်ဖျါထီၣ်ဝဲ သနာ်က့ တဘျီတခီၣ် ပသးကလီၤစၢ်ဒံး. ဒီးဘၣ်သ့ၣ်သ့ၣ် ပကဆိကမိၣ်လၢ ယဟိဝၤယွၤ တဘၣ်သူၣ်ဘၣ်သးပှၤဘၣ်. ပမ့ၢ်ဆိကမိၣ် ဒ်န့ၣ်န့ၣ် ပကဘၣ် သ့ၣ်နီၣ်ထီၣ်လၢ ယဟိဝၤယွၤ ဘၣ်သူၣ်ဘၣ်သး “ပှၤလၢအအဲၣ်အီၤတဖၣ်.” (ယၤ ၁:၁၂) အဃိ ပကဘၣ် ဆဲးမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ ဒီးဆိကမိၣ်ထံ တၢ်အုၣ်သးလၢ ပထံၣ်ဘၣ်လၢ ယဟိဝၤယွၤ ပာ်ဖျါထီၣ်လၢ အဘၣ်သူၣ်ဘၣ်သးပှၤ. ဒီးပကဘၣ် နီၣ်ဘၣ်ထီဘိလၢ ယဟိဝၤယွၤ “အိၣ်တယံၤဒီး ပဝဲနီတဂၤဘၣ်.”—မၤတၢ် ၁၇:၂၇.
နကစံးဆၢဒ်လဲၣ်
-
ဘၣ်မနုၤအဃိ ပှၤတနီၤ ဆိကမိၣ်ဝဲလၢ ယဟိဝၤယွၤ တဘၣ်သူၣ်ဘၣ်သးအီၤဘၣ်လဲၣ်.
-
ယဟိဝၤယွၤ ဘၣ်သူၣ်ဘၣ်သးပှၤန့ၣ် အပာ်ဖျါထီၣ်ဝဲဒ်လဲၣ်.
-
ယဟိဝၤယွၤ ဘၣ်သူၣ်ဘၣ်သးပှၤန့ၣ် ပသ့ၣ်ညါဘၣ်ဒ်လဲၣ်.
တၢ်သးဝံၣ် ၈၈ ဒုးသ့ၣ်ညါယၤ တၢ်လၢအဘၣ်နသး
