၁-၂. ယဟိဝၤယွၤ အခ့အပှၤလၢအသးတီအါဂၤ ထံၣ်ဘၣ်ဝဲ တၢ်အိၣ်သးကီခဲ မနုၤလဲၣ်.

 တၢ်အိၣ်သးကီခဲနးမးတခါ မ့ၢ်ဟဲဘၣ်ပှၤ သတူၢ်ကလာ်န့ၣ် အဆီတလဲ ပတၢ်အိၣ်မူ ခဲလၢာ်စီပျီသ့ ဒီးဘၣ်သ့ၣ်သ့ၣ် ပတၢ်အိၣ်မူတအိၣ် ဒ်သိးဒီးလၢညါလၢၤဘၣ်. အဒိ ဒီပုၢ်ဝဲၢ်ခွါလူဝံးန့ၣ် a အသ့ၣ်ညါဘၣ်လၢ အအိၣ်ဒီး ခဲစၢၤတၢ်ဆါ လၢအနးတကလုာ်. ဒီးကသံၣ်သရၣ် တဲအီၤလၢ အကအိၣ်မူဘၣ်က့ၤ ထဲစှၤကိာ်လါလီၤ. ဒီပုၢ်ဝဲၢ်မုၣ်မီနံးကၤ ဒီးအဝၤန့ၣ် အဝဲသ့ၣ် မၤဝဲ ယဟိဝၤယွၤအတၢ်မၤ ဒ်သိးသိး ဒီးအဝဲသ့ၣ် သးဆူၣ်ဒိၣ်မး. ဘၣ်တနံၤန့ၣ် ဒီပုၢ်ဝဲၢ်မုၣ်မီနံးကၤ သ့ၣ်ညါဘၣ်လၢ အဝၤလၢအကဲစ့ၢ်ကီး တၢ်အိၣ်ဖှိၣ်သးပှၢ်န့ၣ် အိၣ်မူဝဲတၢ်အိၣ်မူခံမၠိ တဘျုးနံၣ်ညါ. မ့မ့ၢ် ဒီပုၢ်ဝဲၢ်မုၣ်အီၣ်လံဘံယါ လၢအကဲ ပှၤအိၣ်သဘျ့တဂၤန့ၣ် အဘၣ်ဟးထီၣ်ကွံာ်လၢအဟံၣ် ခီဖျိလၢ ကလံၤမုၢ်ဖးဒိၣ်ကလီၤဝဲအဃိ. ဖဲအဟဲက့ၤကဒါအခါ အထံၣ်ဘၣ်လၢ အဟံၣ်ဟးဂီၤကွံာ်ဝဲ ခီဖျိလၢ ကလံၤမုၢ်အဃိ. လၢသတူၢ်ကလာ်အတီၢ်ပူၤ ပထံၣ်ဘၣ်လၢ ဒီပုၢ်ဝဲၢ်ခွါလူဝံး, ဒီပုၢ်ဝဲၢ်မုၣ်မီနံးကၤ ဒီးဒီပုၢ်ဝဲၢ်မုၣ်အီၣ်လံဘံယါန့ၣ် အဝဲသ့ၣ်အတၢ်အိၣ်မူ ဆီတလဲသးခဲလၢာ်စီပျီ. နၤမီၤ, ခဲအံၤနထံၣ်ဘၣ် တၢ်အိၣ်သးကီခဲနးမး လၢအဆီတလဲ နတၢ်အိၣ်မူ ခဲလၢာ်စီပျီ အိၣ်တခါခါဧါ.

^၂ ပကဲယဟိဝၤယွၤအခ့အပှၤ လၢအသးတီသနာ်က့ ပကထံၣ်ဘၣ်ဒံး တၢ်ကီတၢ်ခဲ ဒီးတၢ်ဆူးတၢ်ဆါ ဒ်သိးဒီး ပှၤဟီၣ်ခိၣ်ဖိအဂၤတဖၣ် ထံၣ်ဘၣ်ဝဲ. တကးဒံးဘၣ် ပှၤလၢအသးဟ့ ကစၢ်ယွၤအပှၤဂီၢ်မုၢ်တဖၣ် ကမၤအၢမၤနးပှၤ ဒီးထီဒါပှၤစ့ၢ်ကီး. ဒ်သိး တၢ်ကီတၢ်ခဲတဖၣ်အံၤ တဟဲဘၣ်ပှၤတဂ့ၤအဂီၢ် ယဟိဝၤယွၤ တတြီဃာ်ဝဲဘၣ်, သနာ်က့ အအၢၣ်လီၤပှၤလၢ အကမၤစၢၤပှၤ. (ၡါ ၄၁:၁၀) ဒီးခီဖျိလၢ ယဟိဝၤယွၤ မၤစၢၤပှၤအဃိ ပမ့ၢ်ထံၣ်ဘၣ် တၢ်အိၣ်သးကီခဲနးမး သနာ်က့ ပကဆဲးအိၣ်ဒီးတၢ်သးခု, ပကဆၢတဲာ်တၢ်လၢအဘၣ် ဒီးပကဆဲးတီဒီးအီၤ. လၢတၢ်မၤလိတခါအံၤ ပကတဲသကိး ကျဲလွံၢ်ဘိလၢ ယဟိဝၤယွၤ မၤစၢၤပှၤ ဖဲပထံၣ်ဘၣ် တၢ်အိၣ်သးကီခဲနးမး လၢပတၢ်အိၣ်မူအပူၤအခါ. ပကသ့ၣ်ညါဘၣ်စ့ၢ်ကီးလၢ ဒ်သိး ပကဒိးန့ၢ်ဘၣ် အဘျုးလၢ ယဟိဝၤယွၤ အတၢ်မၤစၢၤအဂီၢ် ပကဘၣ်မၤဒ်လဲၣ်.

 ယဟိဝၤယွၤ ကဒီသဒၢနၤ

၃. ဖဲပထံၣ်ဘၣ် တၢ်အိၣ်သးကီခဲနးမးအခါ ပမၤတၢ်မနုၤ တညီလၢၤဘၣ်လဲၣ်.

^၃ တၢ်ကီတၢ်ခဲ. ဖဲပထံၣ်ဘၣ် တၢ်အိၣ်သးကီခဲနးမးအခါ ပဆိကမိၣ်တၢ် တဘၣ်လၢၤဘၣ် ဒီးပဆၢတဲာ်တၢ်တဘၣ်ဘၣ်. ဘၣ်မနုၤအဃိလဲၣ်. ခီဖျိလၢ ပသးဘၣ်ဒိဒိၣ်မး, ပသးအုး ဒီးပကသူၣ်ကိၢ်သးဂီၤတၢ်အါမး. ပကတူၢ်ဘၣ်ဒ်သိးဒီး ပကျဲကတၢၢ် ဒီးပမၤတၢ် တဘၣ်နီတမံၤလၢၤဘၣ်. ဒီပုၢ်ဝဲၢ်မုၣ်လၢ ပတဲသကိးအဂ့ၢ် ဖဲမၢကၢာ်ခံဂၤန့ၣ် အဝဲသ့ၣ် တဲဝဲဘၣ်ဃးဒီး အတၢ်ကီတၢ်ခဲအဂ့ၢ်ဒ်လဲၣ်. ဒီပုၢ်ဝဲၢ်မုၣ်အီၣ်လံဘံယါ တဲဝဲလၢ “ကလံၤမုၢ် မၤဟးဂီၤ ယဟံၣ်ဝံၤအလီၢ်ခံ ယမၤတၢ် တဘၣ်နီတမံၤလၢၤဘၣ် ဒီးယထၢမံထၢမၣ်လၢာ်ပျီ.” မ့မ့ၢ်လၢ ဒီပုၢ်ဝဲၢ်မုၣ်မီနံးကၤန့ၣ် ဘၣ်ဃးဒီး အဝၤအိၣ်မူဝဲတၢ်အိၣ်မူခံမၠိန့ၣ် အတဲဝဲလၢ “ယသးဟးဂီၤဖးဒိၣ်ညါ. တကးဒံးဘၣ် ယသးဘၣ်ဒိ လီၤဂာ်ဒ်သိးဒီး ပှၤဆဲးယၤလၢဒီ. တၢ်လၢ ယမၤညီနုၢ်အီၤ လၢတနံၤဘၣ်တနံၤအဂီၢ်န့ၣ် ယမၤမၣ်တကဲလၢၤဘၣ်. ယတဆိကမိၣ်လၢ တၢ်ကကဲထီၣ်သးဒီးယၤ ဒ်အံၤနီတဘျီဘၣ်.” အဃိ ဖဲပဆိကမိၣ်လၢ ပမၤတၢ် တဘၣ်နီတမံၤလၢၤဘၣ်အခါ ယဟိဝၤယွၤ အၢၣ်လီၤပှၤလၢ အကမၤစၢၤပှၤဒ်လဲၣ်.

၄. ဒ် ဖံလံးပံၤ ၄:၆, ၇ ပာ်ဖျါထီၣ်ဝဲအသိး ယဟိဝၤယွၤ အၢၣ်လီၤပှၤမနုၤလဲၣ်.

^၄ ယဟိဝၤယွၤ ကမၤစၢၤပှၤဒ်လဲၣ်. ယဟိဝၤယွၤ အၢၣ်လီၤပှၤလၢ အကဟ့ၣ်ပှၤ “တၢ်သူၣ်မံသးမုာ်” လၢအဟဲလၢ အအိၣ်. (ဖး ဖံလံးပံၤ ၄:၆, ၇.) တၢ်သူၣ်မံသးမုာ်အံၤ အဲၣ်ဒိးတဲဝဲ တၢ်မုာ်တၢ်ခုၣ် လၢအဟဲကဲထီၣ်အသး ခီဖျိလၢ ပအိၣ်ဒီး တၢ်ရ့လိာ်သးလၢအဂ့ၤဒီး ယဟိဝၤယွၤအဃိ. တၢ်သူၣ်မံသးမုာ်အံၤ “အဒိၣ်န့ၢ်ယိာ်န့ၢ်တၢ်လၢ ပနၢ်ပၢၢ်အီၤ.” တၢ်ကတိၤတထံၣ်အံၤ အခီပညီမ့ၢ်ဝဲ တၢ်မုာ်တၢ်ခုၣ် လၢပတူၢ်ဘၣ်တခါအံၤန့ၣ် အဂ့ၤဒိၣ်န့ၢ် ပဆိကမိၣ်ဒံး. အဒိ ဖဲနဃ့ထုကဖၣ်ဝံၤအလီၢ်ခံ နတူၢ်ဘၣ်လၢ နသးခုၣ်လီၤ ဒီးသးမုာ်ထီၣ်က့ၤ သတူၢ်ကလာ်န့ၣ် အိၣ်တဘျီဘျီဧါ. နမ့ၢ်တူၢ်ဘၣ်ဒ်န့ၣ်န့ၣ် မ့ၢ်ဝဲခီဖျိလၢ နဒိးန့ၢ်ဘၣ် “တၢ်သူၣ်မံသးမုာ်လၢ အဟဲလၢ ကစၢ်ယွၤအအိၣ်” အဃိ.

၅. တၢ်သူၣ်မံသးမုာ်လၢ အဟဲလၢ ကစၢ်ယွၤအအိၣ်န့ၣ် ကမၤစၢၤပှၤဒ်လဲၣ်.

^၅ ဖံလံးပံၤ ၄:၇ တဲစ့ၢ်ကီးဝဲလၢ တၢ်သူၣ်မံသးမုာ်လၢ အဟဲလၢ ကစၢ်ယွၤအအိၣ်န့ၣ် “ကပၢၤ” မ့တမ့ၢ် ဒီသဒၢ “သုသးဒီး သုတၢ်ဆိကမိၣ်တဖၣ်.” တၢ်ကတိၤ “ပၢၤ” တဖျၢၣ်အံၤ လၢကြံးကျိာ်န့ၣ် ပှၤသူဝဲဒ်သိး ကတဲဖျါထီၣ် ဘၣ်ဃးဒီး ပှၤသုးဖိတဖၣ်လၢ အအိၣ်ခိး ဒီသဒၢဝဲဝ့ၢ် ဒ်သိးပှၤဟဲဒုးဝ့ၢ် တန့ၢ်တဂ့ၤအဂီၢ်. ဒီးပှၤဝ့ၢ်ဖိတဖၣ် သ့ၣ်ညါဝဲလၢ ပှၤသုးဖိ အိၣ်ခိး ဒီသဒၢဝဲဝ့ၢ်အဃိ အဝဲသ့ၣ် အိၣ်ဘၣ်ဘံၣ်ဘံၣ်ဘၢဘၢ ဒီးတဘၣ်ယိၣ်တၢ်ဘၣ်. ဒ်န့ၣ်အသိး ဖဲတၢ်သူၣ်မံသးမုာ်လၢ အဟဲလၢ ကစၢ်ယွၤအအိၣ် ပၢၤဝဲပသး ဒီးပတၢ်ဆိကမိၣ်အခါ ပပာ်ပသးမုာ်မုာ်သ့ ဒီးပတူၢ်ဘၣ်လၢ ပအိၣ်ဘၣ်ဘံၣ်ဘံၣ်ဘၢဘၢ. (စံး ၄:၈) ဘၣ်ဆၣ် ဒ်နီၢ်ဃးနၤအသိး ပတၢ်အိၣ်သး မ့ၢ်တဆီတလဲ တဘျီဃီဘၣ်သနာ်က့ ပအိၣ်ဒီးတၢ်သူၣ်မံသးမုာ်သ့ဒံး. (၁ မူၤ ၁:၁၆-၁၈) ဒီးပမ့ၢ်ပာ်ပသးမုာ်မုာ်န့ၣ် ပဆိကမိၣ်တၢ်ကဘၣ် ဒီးပကဆၢတဲာ်တၢ်လၢ တၢ်ကူၣ်သ့အပူၤ.

၆. ဒ်သိး ပကဒိးန့ၢ်ဘၣ် တၢ်သူၣ်မံသးမုာ်လၢ အဟဲလၢ ကစၢ်ယွၤအအိၣ်အဂီၢ် ပကဘၣ်မၤ မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၆ ပကဘၣ်မၤ မနုၤလဲၣ်. ဖဲပသးဘၣ်တံာ်တာ်အခါ ပကဘၣ် ဃ့ယဟိဝၤယွၤ အတၢ်မၤစၢၤလၢ အကပၢၤပသး. ပမၤကသ့ဒ်လဲၣ်. ပကဘၣ်ဃ့ထုကဖၣ် တုၤလၢ ပန့ၢ်ဘၣ် တၢ်သူၣ်မံသးမုာ်လၢ အဟဲ လၢ ကစၢ်ယွၤအအိၣ်. (လူၤ ၁၁:၉; ၁ သ့း ၅:၁၇) ဒီပုၢ်ဝဲၢ်ခွါလူဝံး လၢပတဲသကိးအဂ့ၢ် လၢအခီၣ်ထံးန့ၣ် အတဲဝဲလၢ အကအိၣ်မူဘၣ်ထဲ စှၤကိာ်လါသနာ်က့ အီၤဒီးအမါအါနၤ လဲၤခီဖျိတၢ်အိၣ်သးကီခဲ ကန့ၢ်အဂီၢ် တၢ်မနုၤမၤစၢၤအဝဲသ့ၣ်လဲၣ်. ဒီပုၢ်ဝဲၢ်ခွါလူဝံး တဲဝဲလၢ “တၢ်ကဲထီၣ်သး ဒ်အံၤအဃိ ပကဘၣ်ဆၢတဲာ်တၢ် ဘၣ်ဃးဒီး တၢ်ကူဆါယါဘျါ ဒီးတၢ်ဂ့ၢ်အဂၤန့ၣ် တညီနီတစဲးဘၣ်. ဘၣ်ဆၣ် တၢ်ထုကဖၣ် မၤစၢၤပှၤဒ်သိး ပကအိၣ်ဒီး တၢ်သူၣ်မံသးမုာ် ဖးအါညါ.” ဒီပုၢ်ဝဲၢ်ခွါလူဝံး ဒီးအမါ တဲဝဲလၢ အဝဲသ့ၣ် ဃ့ထုကဖၣ်တၢ်ဆူၣ်ထီၣ် ဒီးဃ့ဝဲခဲအံၤခဲအံၤ. အဝဲသ့ၣ် ဃ့ယဟိဝၤယွၤလၢ ကမၤစၢၤအီၤဒ်သိး အဆိကမိၣ်တၢ်ကဘၣ်, အပာ်သးမုာ်မုာ်ကသ့ ဒီးကဟ့ၣ်အီၤ တၢ်ကူၣ်သ့ဒ်သိး အဆၢတဲာ်တၢ်လၢအဘၣ် ကသ့အဂီၢ်. ဒီးအဝဲသ့ၣ် ထံၣ်ဘၣ်ဝဲလၢ ယဟိဝၤယွၤ မၤစၢၤအီၤ. ပဝဲစ့ၢ်ကီး ဖဲပထံၣ်ဘၣ် တၢ်အိၣ်သးကီခဲနးမးအခါ ပကဘၣ် ဃ့ထုကဖၣ်တၢ်ဆူၣ်ဆူၣ်. ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်သူၣ်မံသးမုာ်လၢ အဟဲလၢ ယဟိဝၤယွၤအအိၣ် ဒီးတၢ်သူၣ်မံသးမုာ်အံၤ ကပၢၤဝဲပသး ဒီးပတၢ်ဆိကမိၣ်.—ရိ ၁၂:၁၂.

ယဟိဝၤယွၤ ကမၤဂၢၢ်ထီၣ်နသး

၇. ဖဲပထံၣ်ဘၣ် တၢ်အိၣ်သးကီခဲနးမးအခါ ပကတူၢ်ဘၣ်ဒ်လဲၣ်.

^၇ တၢ်ကီတၢ်ခဲ. ဖဲပထံၣ်ဘၣ် တၢ်အိၣ်သးကီခဲနးမးအခါ ပတၢ်တူၢ်ဘၣ်, ပတၢ်ဆိကမိၣ် ဒီးတၢ်လၢပမၤစ့ၢ်ကီးန့ၣ် ကလီၤဆီဝဲ. အဒိ ဒ်ကဘီတဘ့ၣ် လၢကလံၤမုၢ်ဆီၣ်ဖျိးအီၤ လၢအံၤတပူၤ လၢန့ၣ်တပူၤအသိး ဖဲပထံၣ်ဘၣ် တၢ်အိၣ်သးကီခဲနးမးအခါ ပဝဲစ့ၢ်ကီး ပတၢ်တူၢ်ဘၣ် တဂၢၢ်ကျၢၤဘၣ် ဒီးအကထီၣ်ကလီၤ ခဲအံၤခဲအံၤ. ဒီပုၢ်ဝဲၢ်မုၣ်အါနၤ လၢပတဲသကိးအဂ့ၢ် ဖဲမၢကၢာ်န့ၣ် တဲဝဲလၢ အဝၤလူဝံး သံဝံၤအလီၢ်ခံ အအိၣ်ဒီး သးအတၢ်တူၢ်ဘၣ် အကလုာ်ကလုာ်. အတဲဝဲလၢ “ဖဲယသးလီၤစၢ်အခါ ယသးကညီၤလီၤယသး. ယဝၤသံသဒၣ်ယၤအဃိ ယသးပှံၢ်ထီၣ်တၢ် စ့ၢ်ကီး.” တဘျီတခီၣ်န့ၣ် ဒီပုၢ်ဝဲၢ်မုၣ်အါနၤ တူၢ်ဘၣ်ဝဲလၢ အအိၣ်သယုၢ်သညိ ထဲတဂၤ ဒီးအဘၣ်ဆၢတဲာ်က့ၤဝဲ တၢ်လၢအဝၤညီနုၢ် ဆၢတဲာ်ဝဲတဖၣ်. ဒီးတဘျီတခီၣ် ဖဲအတူၢ်ဘၣ်တၢ် တမုာ်ဘၣ်အခါ အတူၢ်ဘၣ်ဝဲ လီၤဂာ်ဒ်သိး အအိၣ်လၢ ပီၣ်လဲၣ်ပူၤ ဖဲကလံၤမုၢ်လီၤ အဆၢကတီၢ်. ပဝဲစ့ၢ်ကီးမီၤ, ဖဲပတၢ်တူၢ်ဘၣ်တဖၣ် လုၢ်ဘၢကွံာ်ပှၤအခါ ယဟိဝၤယွၤ ကမၤစၢၤပှၤဒ်လဲၣ်.

၈. ဒ် ယၡါယၤ ၃၃:၆ ပာ်ဖျါထီၣ်ဝဲအသိး ယဟိဝၤယွၤ ကဟ့ၣ်လီၤပှၤ တၢ်မနုၤလဲၣ်.

^၈ ယဟိဝၤယွၤ ကမၤစၢၤပှၤဒ်လဲၣ်. ကစၢ်ယွၤ အၢၣ်လီၤပှၤလၢ အကဟ့ၣ်လီၤပှၤ တၢ်ဘံၣ်တၢ်ဘၢ. တၢ်ကတိၤအံၤ အဲၣ်ဒိးတဲစ့ၢ်ကီး အခီပညီလၢ ကစၢ်ယွၤ ကမၤဂၢၢ်ထီၣ်ပသး. (ဖး ယၡါယၤ ၃၃:၆.) အဒိ ဖဲကလံၤမုၢ်လီၤလၢ ပီၣ်လဲၣ်ပူၤအခါ ကဘီလၢ အလဲၤတၢ်တဘ့ၣ်န့ၣ် ကဟူးဝးဝဲ လၢအံၤတပၤ လၢန့ၣ်တပၤ. ဒ်သိးကဘီကဂၢၢ် ဒီးတဟူးဝးဝဲ အါအါတဂ့ၤအဂီၢ် လၢကဘီအကပၤ ခံကပၤလၢာ်န့ၣ် အိၣ်ဝဲဒီးကဘီအနီၣ်ကၢၤ. ကဘီအနီၣ်ကၢၤအံၤ မၤဂၢၢ်ထီၣ်ဝဲကဘီ အဃိ ပှၤဒိးကဘီဖိတဖၣ် ကအိၣ်ဘၣ်ပူၤပူၤဖျဲးဖျဲး ဒီးလဲၤဘၣ်တၢ်ဂ့ၤဂ့ၤ. ဘၣ်ဆၣ် ကဘီမ့ၢ်ဆဲးလဲၤတၢ်မၣ် ကဘီအနီၣ်ကၢၤအံၤ မၤတၢ်ကသ့ဂ့ၤဂ့ၤ. ဒ်န့ၣ်အသိး ဖဲပထံၣ်ဘၣ် တၢ်အိၣ်သးကီခဲနးမးအခါ ပမ့ၢ်ဆဲးမၤ ယဟိဝၤယွၤအတၢ်မၤ လၢတၢ်သးတီအပူၤမၣ် ယဟိဝၤယွၤ ကမၤဂၢၢ်ထီၣ်ပသး.

၉. တၢ်ပီးတၢ်လီလၢ ပကဃုသ့ၣ်ညါတၢ်အဂီၢ်န့ၣ် မၤစၢၤပှၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၉ ပကဘၣ်မၤ မနုၤလဲၣ်. ဖဲပတၢ်တူၢ်ဘၣ် လၢအနးတဖၣ် လုၢ်ဘၢကွံာ်ပှၤအခါ ပကဘၣ် ကျဲးစၢးမၤ နီၢ်ကစၢ် တၢ်မၤလိလံာ်စီဆှံ,  လဲၤထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်. ဘၣ်သ့ၣ်သ့ၣ် ပမၤနီၢ်သးတၢ်ဖံးတၢ်မၤတဖၣ်အံၤ တန့ၢ်အါအါ ဒ်သိးလၢညါလၢၤဘၣ်, သနာ်က့ ပကဘၣ် သ့ၣ်နီၣ်ထီၣ်လၢ တၢ်လၢပမၤတသ့ဘၣ်န့ၣ် ယဟိဝၤယွၤ တမၢပမၤဘၣ်. (ထိၣ်သတြီၤဒီး လူၤကၣ် ၂၁:၁-၄.) တကးဒံးဘၣ် ပကဘၣ် ပာ်လီၤဆီ တၢ်ဆၢကတီၢ်လၢ နီၢ်ကစၢ် တၢ်မၤလိလံာ်စီဆှံ ဒီးတၢ်ဆိကမိၣ်ထံတၢ်အဂီၢ်. ဘၣ်မနုၤအဃိလဲၣ်. ယဟိဝၤယွၤ သူဝဲအတၢ်ကရၢကရိ ဒီးထုးထီၣ်န့ၢ်ပှၤ လံာ်လဲၢ်ဒီးတၢ်ဂီၤမူလၢ ကမၤစၢၤပှၤဒ်သိး ပကပၢၤဃာ် ပသးအတၢ်တူၢ်ဘၣ် ဖဲပထံၣ်ဘၣ် တၢ်ကီတၢ်ခဲနးမးအခါ. ဒ်သိး ပကဃုကွၢ် တၢ်ဂ့ၢ်လၢ ပလိၣ်ဘၣ်အဂီၢ် ပသူ JW Library^® app, တၢးထီခိးတၢ် လံာ်ရဲၣ်လီၤလၢ လံာ်လဲၢ်တဖၣ်အဂီၢ် (Watch Tower Publications Index) ဒီး လံာ်နဲၣ်ကျဲလၢ ယဟိဝၤပှၤအုၣ်အသးတဖၣ် ကဃုသ့ၣ်ညါတၢ်အဂီၢ် (Research Guide for Jehovah’s Witnesses) သ့. ဒီပုၢ်ဝဲၢ်မုၣ်မီနံးကၤ လၢပတဲသကိးအဂ့ၢ် လၢအခီၣ်ထံးန့ၣ် အတဲဝဲလၢ ဖဲအသးတၢ်တူၢ်ဘၣ် လၢအမၤဆါအီၤ ဟဲနးဒိၣ်ထီၣ်အခါ အသူဝဲ တၢ်ပီးတၢ်လီလၢ ကဃုသ့ၣ်ညါအါထီၣ် တၢ်ဟ့ၣ်ကူၣ်အဂီၢ်. အဒိ အဃုဝဲ တၢ်ကတိၤ ဒ်သိးဒီး “တၢ်သူၣ်ဒိၣ်သးဖျိး.” တကးဒံးဘၣ် အဃုစ့ၢ်ကီးဝဲ တၢ်ကတိၤ ဒ်သိးဒီး “သးတတီဘၣ်” မ့တမ့ၢ် “တၢ်သးတီ.” ဝံၤဒီး တၢ်ဂ့ၢ်လၢ အထံၣ်န့ၢ်ဝဲတဖၣ်န့ၣ် အဖးဝဲတုၤလၢ အသးမုာ်ထီၣ်က့ၤ. ဒီပုၢ်ဝဲၢ်မုၣ်မီနံးကၤ တဲဝဲလၢ “ဖဲယစးထီၣ်ဃုကွၢ်တၢ်ဂ့ၢ် သီသီခါန့ၣ် ယသူၣ်ကိၢ်သးဂီၤတၢ်ညါ. ဘၣ်ဆၣ် ဖဲယဖးတၢ်ဂ့ၢ်လၢ ယထံၣ်န့ၢ်အီၤတဖၣ်အခါ ယတူၢ်ဘၣ်ဒ်သိးဒီး ယဟိဝၤယွၤ ဖိးဟုယၤ. ဒီးယသ့ၣ်ညါဘၣ်လၢ ယဟိဝၤယွၤ နၢ်ပၢၢ်စၢၤ ယတၢ်တူၢ်ဘၣ်ခဲလၢာ် ဒီးအမၤစၢၤယၤ.” တၢ်မၤစၢၤလၢ ယဟိဝၤယွၤ ကတဲာ်ကတီၤပာ်ဝဲတဖၣ်အံၤ ကမၤစၢၤပှၤ ဒ်သိး ပကပၢၤဃာ် ပသးအတၢ်တူၢ်ဘၣ် ဒီးပာ်ပသးမုာ်မုာ်.—စံး ၁၁၉:၁၄၃, ၁၄၄.

ယဟိဝၤယွၤ ကဆီၣ်ထွဲမၤစၢၤနၤ

၁၀. ပထံၣ်ဘၣ် တၢ်လၢအမၤကိၢ်မၤဂီၤပသးနးနး ဝံၤအလီၢ်ခံ ပကတူၢ်ဘၣ်ဒ်လဲၣ်.

^၁၀ တၢ်ကီတၢ်ခဲ. ပထံၣ်ဘၣ် တၢ်လၢအမၤကိၢ်မၤဂီၤပသးနးနး ဝံၤအလီၢ်ခံ ပကတူၢ်ဘၣ်လၢ ပနီၢ်ခိဂံၢ်ဘါ ဒီးပသးဂံၢ်ဘါလီၤစၢ်. ဘၣ်သ့ၣ်သ့ၣ် ပတၢ်တူၢ်ဘၣ်န့ၣ် ကလီၤဂာ်ဒ်သိးဒီး ပှၤဃ့ၢ်ပြၢတၢ်ဖိတဂၤ လၢအဃ့ၢ်ချ့ ဘၣ်ဆၣ် ခီဖျိလၢ အဘၣ်ဒိအဃိ ခဲအံၤန့ၣ် အဘၣ်ဟးက့ၤ တကျဲၢ်တကျဲၢ်. တကးဒံးဘၣ် တၢ်လၢပမၤညီနုၢ်အီၤ ညီညီဖိတဖၣ်န့ၣ် ပမၤတသ့ အါအါလၢၤဘၣ် ဒီးတၢ်လၢပမၤအီၤမုာ် လၢညါန့ၣ် ပတဘၣ်သးမၤအီၤလၢၤဘၣ်. ပကတူၢ်ဘၣ်ဒ်သိးဒီး ဝံအ့ၤလံယၤ ဒီးပဂဲၤဆၢထၢၣ် မၣ်တမုာ်ဘၣ် ဒီးအိၣ်ဒၣ် ပဘၣ်သးမံလီၤ. (၁ စီၤပၤ ၁၉:၅-၇) အဃိ ဖဲပတူၢ်ဘၣ်လၢ ပသးဂံၢ်ဘါလီၤစၢ်အခါ ယဟိဝၤယွၤ အၢၣ်လီၤဝဲလၢ အကမၤစၢၤပှၤဒ်လဲၣ်.

၁၁. ယဟိဝၤယွၤ ဆီၣ်ထွဲမၤစၢၤပှၤ ဒ်လဲၣ်. (စံးထီၣ်ပတြၢၤ ၉၄:၁၈)

^၁၁ ယဟိဝၤယွၤ ကမၤစၢၤပှၤဒ်လဲၣ်. ယဟိဝၤယွၤ အၢၣ်လီၤဝဲလၢ အကဆီၣ်ထွဲမၤစၢၤပှၤ. (ဖး စံးထီၣ်ပတြၢၤ ၉၄:၁၈.) ဒ်ပှၤဃ့ၢ်ပြၢတၢ်ဖိ လၢအဘၣ်ဒိတဂၤ လိၣ်ဘၣ် တၢ်ဆီၣ်ထွဲမၤစၢၤအသိး ပဝဲစ့ၢ်ကီး ဒ်သိးပကဆဲးမၤ ယဟိဝၤယွၤအတၢ်မၤအဂီၢ် ပကလိၣ်ဘၣ် တၢ်မၤစၢၤ. ဖဲပလိၣ်ဘၣ် တၢ်မၤစၢၤအခါ ယဟိဝၤယွၤ အၢၣ်လီၤပှၤ ဒီးတဲဘၣ်ပှၤလၢ “ယၤ, သုကစၢ် ယဟိဝၤယွၤအံၤ က ဖီၣ်ဃာ် သုစုထွဲလီၤ. ဒီးယမ့ၢ်ပှၤတဂၤလၢ အတဲသုလၢ ‘တဘၣ်ပျံၤတၢ်တဂ့ၤ. ယကမၤစၢၤသု.’” (ၡါ ၄၁:၁၃) လၢညါန့ၣ် စီၤပၤဒၤဝံး ဒိးန့ၢ်ဘၣ်ဝဲ တၢ်မၤစၢၤအံၤ သပှၢ်တၢၢ်. ဖဲအထံၣ်ဘၣ် တၢ်ကီတၢ်ခဲ ဒီးဘၣ်သဂၢၢ်ဒီး ဒုၣ်ဒါတဖၣ်အခါ အတဲဘၣ် ယဟိဝၤယွၤလၢ “နစုထွဲ ဆီၣ်ထွဲယၤ.” (စံး ၁၈:၃၅) မ့မ့ၢ်ဒ်န့ၣ်န့ၣ် ယဟိဝၤယွၤ ကဆီၣ်ထွဲမၤစၢၤပှၤဒ်လဲၣ်.

၁၂. ဖဲပသးဂံၢ်ဘါလီၤစၢ်အခါ ဒ်သိးယဟိဝၤယွၤ ကမၤစၢၤပှၤအဂီၢ် အသူဝဲ မတဂၤသ့ၣ်တဖၣ်လဲၣ်.

^၁၂ အါဘျီန့ၣ် ပထံၣ်ဘၣ်လၢ ယဟိဝၤယွၤ ဆီၣ်ထွဲမၤစၢၤပှၤခီဖျိ အထိၣ်ဟူးထိၣ်ဂဲၤထီၣ်ပှၤဂၤ လၢကမၤစၢၤပှၤအဂီၢ်. အဒိ ဘၣ်တဘျီ ဖဲစီၤဒၤဝံး တူၢ်ဘၣ်လၢ အသးဂံၢ်ဘါလီၤစၢ်အခါ အသကိး စီၤယိနၤသၣ် လဲၤလၢအအိၣ် ဒီးမၤဆူၣ်ထီၣ်အဂံၢ်အဘါ ခီဖျိ အတဲတၢ်လၢ အကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ စီၤဒၤဝံးအဂီၢ်. (၁ မူၤ ၂၃:၁၆, ၁၇) ပထံၣ်ဘၣ်စ့ၢ်ကီးလၢ ယဟိဝၤယွၤ ဃုထၢထီၣ် စီၤအလံၤၡါ ဒ်သိးအကကဲထီၣ် တၢ်မၤစၢၤလၢ စီၤအ့ၤလံယၤအဂီၢ်. (၁ စီၤပၤ ၁၉:၁၆, ၂၁; ၂ စီၤပၤ ၂:၂) ဆၢကတီၢ်ခဲအံၤစ့ၢ်ကီး ယဟိဝၤယွၤ ဆီၣ်ထွဲမၤစၢၤပှၤခီဖျိ အသူဝဲ ပဟံၣ်ဖိဃီဖိ, ပသကိး မ့တမ့ၢ် တၢ်အိၣ်ဖှိၣ်သးပှၢ်တဖၣ်. သနာ်က့ ဖဲပသူၣ်အုးသးအုးအခါ ဘၣ်သ့ၣ်သ့ၣ် ပတဘၣ်သး ကနၣ်ဃုာ်ပှၤနီတဂၤဘၣ် ဒီးပဘၣ်သး အိၣ်ဒၣ်ထဲတဂၤ. တၢ်တူၢ်ဘၣ်ဒ်အံၤန့ၣ် အကဲထီၣ်အသးသ့. အဃိ ဒ်သိး ပကဒိးန့ၢ်ဘၣ် ယဟိဝၤယွၤ အတၢ်ဆီၣ်ထွဲမၤစၢၤအဂီၢ် ပကဘၣ်မၤ မနုၤလဲၣ်.

၁၃. ဒ်သိး ပကဒိးန့ၢ်ဘၣ် ယဟိဝၤယွၤ အတၢ်ဆီၣ်ထွဲမၤစၢၤအဂီၢ် ပကဘၣ်မၤ မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၃ ပကဘၣ်မၤ မနုၤလဲၣ်. ပတဘၣ်အိၣ် ထဲတဂၤဘၣ်. ပမ့ၢ်တကနၣ်ဃုာ် ပှၤဂၤဘၣ် ဒီးဘၣ်သးအိၣ် ထဲတဂၤန့ၣ် ပကစးထီၣ်ဆိကမိၣ်တၢ် ထဲလၢပနီၢ်ကစၢ်အဂီၢ် ဒီးသးစၢၢ်ဆၢ ထဲတၢ်ကီတၢ်ခဲလၢ ပထံၣ်ဘၣ်တဖၣ်. ဒီးလၢခံန့ၣ် ပကဆၢတဲာ်ဘၣ်တၢ် လၢအကမၣ်. (ကတိၤ ၁၈:၁) ဖဲပထံၣ်ဘၣ် တၢ်အိၣ်သးကီခဲနးမးအခါ ပမ့ၢ်လိၣ်ဘၣ် တၢ်ဆၢကတီၢ်လၢ ပကအိၣ်ထဲတဂၤ တစိၢ်ဖိန့ၣ် အတကမၣ်ဘၣ်. သနာ်က့ ပမ့ၢ်အိၣ်ထဲတဂၤ ယံာ်တလၢန့ၣ် ဘၣ်သ့ၣ်သ့ၣ် ပတဒိးန့ၢ်ဘၣ် တၢ်မၤစၢၤလၢ ပှၤလၢယဟိဝၤယွၤသူဝဲ ဒ်သိးကမၤစၢၤပှၤအဂီၢ်ဘၣ်. အဃိ ဖဲပထံၣ်ဘၣ် တၢ်အိၣ်သးကီခဲနးမးအခါ ပကဘၣ်ကျဲးစၢးတူၢ်လိာ် ပဟံၣ်ဖိဃီဖိ, ပသကိး ဒီးတၢ်အိၣ်ဖှိၣ်သးပှၢ်တဖၣ် အတၢ်မၤစၢၤ. ပကဘၣ်ထံၣ်အဝဲသ့ၣ် ဒ်ပှၤလၢယဟိဝၤယွၤသူဝဲ လၢကဆီၣ်ထွဲမၤစၢၤပှၤအဂီၢ်.—ကတိၤ ၁၇:၁၇; ၡါ ၃၂:၁, ၂.

ယဟိဝၤယွၤ ကမၤမုာ်ထီၣ်နသး

၁၄. ပကထံၣ်ဘၣ်ဒီး တၢ်အိၣ်သးလၢ အလီၤပျံၤလီၤဖုး ဒ်လဲၣ်တဖၣ်လဲၣ်.

^၁၄ တၢ်ကီတၢ်ခဲ. တဘျီတခီၣ်န့ၣ် ပကထံၣ်ဘၣ် တၢ်အိၣ်သးလၢ အလီၤပျံၤလီၤဖုး. လၢလံာ်စီဆှံအပူၤန့ၣ် ပထံၣ်ဘၣ်လၢ ယဟိဝၤယွၤ အခ့အပှၤလၢ အသးတီတဖၣ် တဲဖျါထီၣ်ဝဲ တၢ်ဆၢကတီၢ်ဖဲ အဝဲသ့ၣ်သူၣ်ကိၢ်သးဂီၤတၢ် ဒီးပျံၤတၢ်ဖုးတၢ် ခီဖျိလၢ အဒုၣ်အဒါတဖၣ် အတၢ်မၤပျံၤမၤဖုး ဒီးတၢ်ဆီၣ်သနံးအဂၤတဖၣ်အဃိ. (စံး ၁၈:၄; ၅၅:၁, ၅) ဆၢကတီၢ်ခဲအံၤစ့ၢ်ကီး ပကထံၣ်ဘၣ် တၢ်ထီဒုၣ်ထီဒါလၢကၠိ, လၢတၢ်မၤလီၢ်,  လၢပဟံၣ်ဖိဃီဖိအကျါ မ့တမ့ၢ် ပထံၣ်ဘၣ် ပဒိၣ်အတၢ်တြီမၤတံာ်တာ်. တကးဒံးဘၣ် ခီဖျိလၢ ပတၢ်အိၣ်ဆူၣ်အိၣ်ချ့ တၢ်ကီတၢ်ခဲအဃိ ပဘၣ်ယိၣ်လၢပကသံ. ဖဲပထံၣ်ဘၣ် တၢ်အိၣ်သးကီခဲ ဒ်အံၤအခါ ပကတူၢ်ဘၣ်ဒ်သိးဒီး ပကဲဖိသၣ်လၢ အမၤစၢၤလီၤအသးတသ့ဘၣ်. အဃိ ယဟိဝၤယွၤ ကမၤစၢၤပှၤဒ်လဲၣ်.

၁၅. ဒ် စံးထီၣ်ပတြၢၤ ၉၄:၁၉ ပာ်ဖျါထီၣ်ဝဲအသိး ယဟိဝၤယွၤ ကမၤစၢၤပှၤဒ်လဲၣ်.

^၁၅ ယဟိဝၤယွၤ ကမၤစၢၤပှၤဒ်လဲၣ်. ယဟိဝၤယွၤ ကမၤမုာ်ထီၣ်ပသး ဒီးမၤသးခုပှၤ. (ဖး စံးထီၣ်ပတြၢၤ ၉၄:၁၉.) လံာ်စံးထီၣ်ပတြၢၤ တဆၢအံၤ ဒုးထံၣ်တမှံပှၤလၢ ဖိသၣ်ပိာ်မုၣ်တဂၤ လၢအပျံၤတၢ် ခီဖျိလၢ ကလံၤမုၢ်အူတၢ် သီၣ်ဝဲဖးဒိၣ်အဃိ. ထံၣ်တမှံကွၢ်လၢ အပါလဲၤနုာ်လၢအဒၢးပူၤ, စိာ်ထီၣ်အီၤလၢ အစုဒုၣ်တီၤလိၤ ဒီးဖိးဟုအီၤ တုၤလၢ အမံကမၣ်ဘၣ်သး. ကလံၤမုၢ်အူတၢ်ဒံး သနာ်က့ အပါအိၣ်လၢအကပၤ ဒီးမၤမုာ်ထီၣ်အသးအဃိ အသးမုာ်ထီၣ်က့ၤဝဲ. ပဝဲစ့ၢ်ကီး ဖဲပထံၣ်ဘၣ် တၢ်အိၣ်သးလၢ အလီၤပျံၤလီၤဖုးအခါ ပလိၣ်ဘၣ်လၢ ပပါယဟိဝၤယွၤ ကမၤမုာ်ထီၣ်ပသး တုၤလၢ ပသးမုာ်ထီၣ်က့ၤ. အဃိ ပဒိးန့ၢ်ဘၣ် တၢ်မၤမုာ်ထီၣ်က့ၤလၢ ယဟိဝၤယွၤအအိၣ် ကသ့ဒ်လဲၣ်.

၁၆. ဒ်သိး ပကဒိးန့ၢ်ဘၣ် တၢ်မၤမုာ်ထီၣ်က့ၤ လၢယဟိဝၤယွၤအအိၣ်အဂီၢ် ပကဘၣ်မၤ မနုၤလဲၣ်. (ကွၢ်စ့ၢ်ကီးတၢ်ဂီၤ.)

^၁၆ ပကဘၣ်မၤ မနုၤလဲၣ်. ပကဘၣ် ပာ်လီၤတၢ်ဆၢကတီၢ်လၢ ပကဃ့ထုကဖၣ် ဒီးဖးလံာ်စီဆှံထီဘိ. (စံး ၇၇:၁, ၁၂-၁၄) ပမ့ၢ်မၤဒ်န့ၣ်န့ၣ် ဖဲပသူၣ်ကိၢ်သးဂီၤတၢ်အခါ ပကဃ့ ယဟိဝၤယွၤ အတၢ်မၤစၢၤ တဘျီဃီ. ပကဘၣ် တဲဘၣ်ယဟိဝၤယွၤလၢ ပတၢ်ဘၣ်ယိၣ် ဒီးပတၢ်သူၣ်ကိၢ်သးဂီၤ. ဝံၤဒီး ဒ်သိးပကသ့ၣ်ညါဘၣ် တၢ်လၢယဟိဝၤယွၤ တဲဘၣ်ပှၤ ဒီးကဒိးန့ၢ်ဘၣ် အတၢ်မၤမုာ်ထီၣ်က့ၤအဂီၢ် ပကဘၣ် ဖးအကလုၢ်ကထါ လံာ်စီဆှံ. (စံး ၁၁၉:၂၈) ဖဲပပျံၤတၢ်အခါ ပမ့ၢ်ဃုဖး တၢ်ဂ့ၢ်လီၤလီၤဆီဆီ တခါခါလၢ လံာ်စီဆှံအပူၤန့ၣ် ပသးကမုာ်ထီၣ်က့ၤ. အဒိ ပဃုဖး တၢ်ဂ့ၢ်လၢ အကဲထီၣ်တၢ်ဂံၢ်တၢ်ဘါ လၢအအိၣ်လၢ လံာ်ယိၤဘး, လံာ်စံးထီၣ်ပတြၢၤ, လံာ်ကတိၤဒိ ဒီးဖးစ့ၢ်ကီး ယ့ၣ်ၡူး အတၢ်ကတိၤ လၢအအိၣ်လၢ မးသဲ အဆၢဒိၣ် ၆ အပူၤသ့. အဃိ ဒ်သိး ပကဒိးန့ၢ်ဘၣ် တၢ်မၤမုာ်ထီၣ်က့ၤအဂီၢ် ပကဘၣ် ဃ့ထုကဖၣ် လၢယဟိဝၤယွၤအအိၣ် ဒီးဖးအကလုၢ်ကထါ လံာ်စီဆှံ.

၁၇. ပနာ်န့ၢ် တၢ်မနုၤသ့လဲၣ်.

^၁၇ ဖဲပထံၣ်ဘၣ် တၢ်အိၣ်သးကီခဲနးမးအခါ ပနာ်သ့သပှၢ်တၢၢ်လၢ ယဟိဝၤယွၤ ကအိၣ်လၢပကပၤ အဃိ ပတအိၣ်ထဲတဂၤ နီတဘျီဘၣ်. (စံး ၂၃:၄; ၉၄:၁၄) ယဟိဝၤယွၤ အၢၣ်လီၤဝဲလၢ အကဒီသဒၢပှၤ, မၤဂၢၢ်ထီၣ်ပသး, ဆီၣ်ထွဲမၤစၢၤပှၤ ဒီးအကမၤမုာ်ထီၣ်ပသး. ဘၣ်ဃးဒီး ယဟိဝၤယွၤန့ၣ် ယၡါယၤ ၂၆:၃ တဲဝဲလၢ “ပှၤလၢအသန့ၤသးလၢနၤန့ၣ် နကဒီသဒၢအီၤလီၤ. မ့ၢ်လၢ အဝဲသ့ၣ် နာ်န့ၢ်နၤအဃိ နကဟ့ၣ်အဝဲသ့ၣ် တၢ်သူၣ်မံသးမုာ် ထီဘိ.” အဃိ ပကဘၣ် နာ်န့ၢ်ယဟိဝၤယွၤ ဒီးဒ်သိး ပကဒိးန့ၢ်ဘၣ်အဘျုးလၢ အတၢ်မၤစၢၤအဂီၢ် ပကဘၣ် ကျဲးစၢးမၤတၢ်လၢ ပဘၣ်မၤခဲလၢာ်. ပမ့ၢ်မၤဒ်န့ၣ်န့ၣ် ဖဲပထံၣ်ဘၣ် တၢ်အိၣ်သးကီခဲနးမးအခါ ပကအိၣ်ဒီး တၢ်ဂံၢ်တၢ်ဘါ.