၁. တဘျီတခီၣ်န့ၣ် ဘၣ်မနုၤအဃိ ပပျံၤတၢ်လဲၣ်.

 တဘျီတခီၣ် ပဝဲကိးဂၤဒဲးန့ၣ် ပပျံၤတၢ်. ဘၣ်ဆၣ် ခီဖျိလၢ ပသ့ၣ်ညါဘၣ် လံာ်စီဆှံ အတၢ်သိၣ်လိ ဘၣ်ဃးဒီး တၢ်သံ, တၢ်ဝံတၢ်နါအဂ့ၢ် ဒီးတၢ်ကကဲထီၣ်သး လၢခါဆူညါအဂ့ၢ်အဃိ ပတပျံၤတၢ်လၢၤဘၣ်. သနာ်က့ ပအိၣ်မူဒံးလၢ တၢ်အိၣ်သးလၢ “အလီၤပျံၤလီၤဖုး” ဒ်သိးဒီး တၢ်ဒုးတၢ်ယၤ, တၢ်မၤဆူၣ်မၤစိး ဒီးတၢ်ဆူးတၢ်ဆါ ကဲထီၣ်သး အဆၢကတီၢ်အဃိ ပဘၣ်ပျံၤတၢ်ဒံး. (လူၤ ၂၁:၁၁) ဘၣ်သ့ၣ်သ့ၣ် ပပျံၤစ့ၢ်ကီး ပှၤဟီၣ်ခိၣ်ဖိ ဒ်သိးဒီး ပဒိၣ်တဖၣ်လၢ အမၤအၢမၤနးပှၤ ဒီးပဟံၣ်ဖိဃီဖိလၢ အထီဒါ တၢ်ဘူၣ်ထီၣ်ဘါထီၣ် အမ့ၢ်အတီ. အဃိ ပဝဲတနီၤ ပကဘၣ်ယိၣ်လၢ တၢ်ကီတၢ်ခဲလၢ ပထံၣ်ဘၣ်ခဲအံၤ ဒီးပကထံၣ်ဘၣ်ဒံးလၢ ခါဆူညါန့ၣ် ပလဲၤခီဖျိအီၤ တန့ၢ်ဘၣ်.

၂. လၢဝ့ၢ်ကၤသးန့ၣ် ဘၣ်မနုၤအဃိ စီၤဒၤဝံး ပျံၤတၢ်လဲၣ်.

^၂ စီၤဒၤဝံးန့ၣ် အထံၣ်ဘၣ်ဒီး တၢ်အိၣ်သးလၢ အလီၤပျံၤလီၤဖုးစ့ၢ်ကီး. အဒိ ဖဲစီၤပၤစီလူး ဂုာ်ကျဲးစၢး လူၤမၤသံအီၤအခါ စီၤဒၤဝံး ပာ်လီၤအသးလၢ အကလဲၤဃ့ၢ်ပူၤဖျဲးအသးလၢ ဝ့ၢ်ကၤသး လၢအမ့ၢ် ပှၤဖလ့ၡသးဖိအဝ့ၢ်. တယံာ်ဘၣ်ဒီး ဝ့ၢ်ကၤသး အစီၤပၤအၤကံၣ် သ့ၣ်ညါဘၣ်ဝဲလၢ စီၤဒၤဝံးန့ၣ် အကဲပှၤသုးဖိလၢ အမၤသံဝဲ ပှၤဖလ့ၡသးဖိ “လၢအကလးတဖၣ်.” အဃိ စီၤဒၤဝံး “ပျံၤ . . . စီၤပၤအၤကံၣ် ဒိၣ်မး.” (၁ မူၤ ၂၁:၁၀-၁၂) ဒီးစီၤဒၤဝံး ဘၣ်ယိၣ်ဝဲလၢ စီၤပၤအၤကံၣ် ကမၤအီၤတမံၤမံၤ. စီၤဒၤဝံး ပျံၤတၢ်သနာ်က့ ဒ်သိးအကအိၣ်ဒီး တၢ်သးဒူအဂီၢ် တၢ်မနုၤမၤစၢၤအီၤလဲၣ်.

၃. ဒ် စံးထီၣ်ပတြၢၤ ၅၆:၁-၃, ၁၁ ပာ်ဖျါထီၣ်ဝဲအသိး စီၤဒၤဝံး မၤလီၤမၢ်ကွံာ် အတၢ်ပျံၤတၢ်ဖုး န့ၢ်ဒ်လဲၣ်.

^၃ စံးထီၣ်ပတြၢၤ ၅၆ ပာ်ဖျါထီၣ်ဝဲ စီၤဒၤဝံးအတၢ်တူၢ်ဘၣ် ဖဲအအိၣ်လၢ ဝ့ၢ်ကၤသးအခါ. ဖဲထါစံးထီၣ်ပတြၢၤတယုၢ်န့ၣ် စီၤဒၤဝံး တဲဖျါထီၣ်တၢ်ဂ့ၢ်လၢ ဘၣ်မနုၤအဃိ အပျံၤတၢ်လဲၣ် ဒီးဒ်သိးအတပျံၤတၢ်လၢၤတဂ့ၤအဂီၢ် တၢ်မနုၤမၤစၢၤအီၤလဲၣ်. ဖဲစီၤဒၤဝံးပျံၤတၢ်အခါ အနာ်န့ၢ် ယဟိဝၤယွၤ. (ဖး စံးထီၣ်ပတြၢၤ ၅၆:၁-၃, ၁၁.) စီၤဒၤဝံး နာ်န့ၢ် ယဟိဝၤယွၤန့ၣ် ကဲဘျုးလၢအဂီၢ် ဖးဒိၣ်ညါ. ဒီးခီဖျိလၢ ယဟိဝၤယွၤ မၤစၢၤအီၤအဃိ စီၤဒၤဝံးမၤဝဲ တၢ်လၢအလီၤကမၢကမၣ် ဖးဒိၣ်တမံၤခီဖျိ အပာ်မၤအသး ဒ်ပှၤပျုၢ်တဂၤအသိး. တဘျီအံၤ စီၤပၤအၤကံၣ် တထံၣ်စီၤဒၤဝံး ဒ်သိးဒီး ပှၤလၢအလီၤဘၣ်ယိၣ်တဂၤလၢၤဘၣ် ဒီးအဘၣ်သးလၢ စီၤဒၤဝံး ကဟးထီၣ်ကွံာ် လၢ အဝ့ၢ်ပူၤအဃိ စီၤဒၤဝံး အသးသမူပူၤဖျဲးဝဲ.—၁ မူၤ ၂၁:၁၃–၂၂:၁.

၄. ပမၤဂၢၢ်ကျၢၤဒိၣ်ထီၣ် ပတၢ်နာ်န့ၢ် ယဟိဝၤယွၤ ကသ့ဒ်လဲၣ်. တဲဖျါထီၣ် တၢ်အဒိ.

^၄ ပဝဲစ့ၢ်ကီး ပမ့ၢ်နာ်န့ၢ် ယဟိဝၤယွၤန့ၣ် ကမၤစၢၤပှၤဒ်သိး ပကမၤလီၤမၢ်ကွံာ် ပတၢ်ပျံၤတၢ်ဖုး. ဘၣ်ဆၣ် ဖဲပပျံၤတၢ်အခါ ပမၤဂၢၢ်ကျၢၤဒိၣ်ထီၣ် ပတၢ်နာ်န့ၢ် ယဟိဝၤယွၤ ကသ့ ဒ်လဲၣ်. ဆိကမိၣ်ကွၢ် တၢ်အဒိတခါအံၤ. ပမ့ၢ်သ့ၣ်ညါဘၣ်လၢ ပအိၣ်ဒီးတၢ်ဆူးတၢ်ဆါ တခါခါန့ၣ် လၢအခီၣ်ထံးခါဒု ပကပျံၤတၢ်. ဘၣ်ဆၣ် ပမ့ၢ်နာ်န့ၢ် ကသံၣ်သရၣ် လၢအကွၢ်ထွဲပှၤတဂၤန့ၣ် ပတပျံၤတၢ် အါအါလၢၤဘၣ်. ကသံၣ်သရၣ် တဂၤအံၤ အမၤစၢၤဘၣ် ပှၤဆါလၢ အအိၣ်ဒီးတၢ်ဆါ ဒ်သိးဒီးပှၤ တဘျုးဂၤညါ. တကးဒံးဘၣ် အတဲပၠးပှၤ တၢ်ကူဆါယါဘျါ အကျိၤအကျဲလၢ ကမၤစၢၤပှၤ. ဒီးဖဲပတဲဘၣ်အီၤ ပတၢ်ဘၣ်ယိၣ်အခါ အဒိကနၣ်န့ၢ်ပှၤထံထံ ဒီးပထံၣ်ဘၣ်လၢ အသးအိၣ်ပှၤဒိၣ်မး အဃိ ပတပျံၤတၢ် အါအါလၢၤဘၣ်. ဒ်န့ၣ်အသိး ပမၤဂၢၢ်ကျၢၤဒိၣ်ထီၣ် ပတၢ်နာ်န့ၢ် ယဟိဝၤယွၤ သ့ခီဖျိ ပဆိကမိၣ်ထံက့ၤ တၢ်လၢအမၤတ့ၢ်လၢပဂီၢ်, တၢ်လၢအမၤန့ၢ်ပှၤခဲအံၤ ဒီးတၢ်လၢအကမၤန့ၢ်ပှၤ လၢခါဆူညါ. စီၤဒၤဝံး မၤဝဲဒ်န့ၣ်စ့ၢ်ကီး. အဃိ ဖဲပတဲသကိး တၢ်လၢစီၤဒၤဝံးကွဲးဝဲ ဖဲစံးထီၣ်ပတြၢၤ ၅၆ အပူၤအခါ ပကဘၣ် ဆိကမိၣ်ထီၣ် ဘၣ်ဃးဒီး ပမၤဂၢၢ်ကျၢၤဒိၣ်ထီၣ် ပတၢ်နာ်န့ၢ် ယဟိဝၤယွၤ ကသ့ဒ်လဲၣ် ဒီးပမၤလီၤမၢ်ကွံာ် ပတၢ်ပျံၤတၢ်ဖုး ကသ့ဒ်လဲၣ်.

တၢ်လၢယဟိဝၤယွၤ မၤတ့ၢ်လၢပဂီၢ်

၅. ဖဲစီၤဒၤဝံး ပျံၤတၢ်အခါ အဆိကမိၣ်ထံဝဲ တၢ်ဂ့ၢ်မနုၤလဲၣ်. (စံးထီၣ်ပတြၢၤ ၅၆:၁၂, ၁၃)

^၅ စီၤဒၤဝံး ထံၣ်ဘၣ်ဒီး တၢ်လီၤဘၣ်ယိၣ် လၢအသးသမူအဂီၢ် သနာ်က့ အဆဲး ဆိကမိၣ်ထံဝဲ တၢ်လၢယဟိဝၤယွၤ မၤတ့ၢ်လၢအဂီၢ်. (ဖး စံးထီၣ်ပတြၢၤ ၅၆:၁၂, ၁၃.) စီၤဒၤဝံး ဆိကမိၣ်ထံက့ၤ ယဟိဝၤယွၤ အတၢ်မၤစၢၤဒ်န့ၣ် လၢအတၢ်အိၣ်မူ ဒီတစိၤညါ. အဒိ တဘျီတခီၣ်န့ၣ် စီၤဒၤဝံး ဆိကမိၣ်ထံဝဲ ယဟိဝၤယွၤ အတၢ်ဘၣ်တ့ အဂ့ၢ်. ယဟိဝၤယွၤ အတၢ်ဘၣ်တ့န့ၣ် ဒုးသ့ၣ်နီၣ်ထီၣ်အီၤလၢ ယဟိဝၤယွၤန့ၣ် အစိအကမီၤဒိၣ်မး ဒီးအအဲၣ်ပှၤဟီၣ်ခိၣ်ဖိဖးဒိၣ်ညါ. (စံး ၆၅:၆-၉) စီၤဒၤဝံး ဆိကမိၣ်ထံစ့ၢ်ကီး တၢ်လၢယဟိဝၤယွၤ မၤတ့ၢ်လၢ ပှၤဂၤအဂီၢ်. (စံး ၃၁:၁၉; ၃၇:၂၅, ၂၆) တကးဒံးဘၣ် အဆိကမိၣ်ထံဝဲ လီၤဆီဒၣ်တၢ် တၢ်လၢယဟိဝၤယွၤ မၤတ့ၢ်လၢအဂီၢ်. စးထီၣ်လၢ စီၤဒၤဝံး အနီၢ်ဆံးအခါန့ၣ် ယဟိဝၤယွၤ မၤစၢၤအီၤ ဒီးဒီသဒၢအီၤ. (စံး ၂၂:၉, ၁၀) ခီဖျိလၢ စီၤဒၤဝံး ဆိကမိၣ်ထံက့ၤ တၢ်ဂ့ၢ်တဖၣ်န့ၣ်အဃိ အမၤစၢၤအီၤဒ်သိး အကမၤဂၢၢ်ကျၢၤဒိၣ်ထီၣ် အတၢ်နာ်န့ၢ် ယဟိဝၤယွၤဒိၣ်မး.

၆. ဖဲပပျံၤတၢ်အခါ ဒ်သိးပကနာ်န့ၢ် ယဟိဝၤယွၤအဂီၢ် တၢ်မနုၤကမၤစၢၤပှၤလဲၣ်.

^၆ ဖဲနပျံၤတၢ်အခါ သံကွၢ်လီၤနသးဒ်အံၤ. ‘လၢအပူၤကွံာ်န့ၣ်  ယဟိဝၤယွၤ မၤစၢၤတ့ၢ်ယၤဒ်လဲၣ်.’ ဒီးဆိကမိၣ်ထံစ့ၢ်ကီး ယဟိဝၤယွၤ အတၢ်ဘၣ်တ့တဖၣ်အဂ့ၢ်. အဒိ ပမ့ၢ် “ကွၢ်” ထိၣ်ဒီးဖီတဖၣ်န့ၣ် ယဟိဝၤယွၤ တတ့လီၤ အဝဲသ့ၣ် ဒ်အက့ၢ်အဂီၤအသိးဘၣ် ဒီးအဝဲသ့ၣ် ဘူၣ်ထီၣ်ဘါထီၣ် ယဟိဝၤယွၤ တသ့ဘၣ်. ဘၣ်ဆၣ် ပသ့ၣ်ညါဘၣ်လၢ ယဟိဝၤယွၤ သးအိၣ်အဝဲသ့ၣ် ဒီးကွၢ်ထွဲ အဝဲသ့ၣ်ဂ့ၤဂ့ၤ. အဃိ ပနာ်သပှၢ်တၢၢ်လၢ ယဟိဝၤယွၤ ကသးအိၣ်ပှၤ ဒီးကွၢ်ထွဲပှၤဂ့ၤန့ၢ်ဒံး အကွၢ်ထွဲ ထိၣ်ဒီးဖီတဖၣ်ဒံး. ပမ့ၢ်ဆိကမိၣ်ထံ တၢ်ဂ့ၢ်အံၤ လီၤတံၢ်လီၤဆဲးန့ၣ် ပတၢ်နာ်န့ၢ်ယဟိဝၤယွၤ ကဂၢၢ်ကျၢၤဒိၣ်ထီၣ်. (မး ၆:၂၅-၃၂) ပကဘၣ် ဆိကမိၣ်ထံစ့ၢ်ကီး ဘၣ်ဃးဒီး ယဟိဝၤယွၤ မၤစၢၤတ့ၢ် ပှၤလၢအဘူၣ်ထီၣ်ဘါထီၣ်အီၤ အဂ့ၢ်. ပကမၤဒ်န့ၣ်အဂီၢ် ပမၤလိ ပှၤလၢအအိၣ်ဒီးတၢ်နာ် လၢလံာ်စီဆှံအပူၤ တဂၤဂၤအဂ့ၢ်သ့ မ့တမ့ၢ် ပဖးဘၣ်ဃးဒီး ယဟိဝၤယွၤ အပှၤဂီၢ်မုၢ် လၢဆၢကတီၢ်ခဲအံၤ အတၢ်လဲၤခီဖျိအဂ့ၢ်သ့. a ထဲန့ၣ်တကးဒံးဘၣ် ပကဘၣ် ဆိကမိၣ်ထံစ့ၢ်ကီး ဘၣ်ဃးဒီး ယဟိဝၤယွၤ ပာ်ဖျါထီၣ်လၢ အသးအိၣ် ပဝဲတဂၤဘၣ်တဂၤ ဒ်လဲၣ်အဂ့ၢ်. အဒိ ဆိကမိၣ်ထီၣ်က့ၤလၢ ယဟိဝၤယွၤ မူၤဃီၤနၤလၢ တၢ်မ့ၢ်တၢ်တီ အပူၤဒ်လဲၣ်. (ယိၤ ၆:၄၄) ယဟိဝၤယွၤ စံးဆၢ နတၢ်ထုကဖၣ်ဒ်လဲၣ်. (၁ ယိၤ ၅:၁၄) ဒီးဆိကမိၣ်ထီၣ်က့ၤလၢ ခီဖျိလၢ ယ့ၣ်ၡူးဟ့ၣ်လုၢ်ထီၣ်သးအဃိ ကိးနံၤဒဲးန့ၣ် နန့ၢ်ဘၣ်အဘျုး ဒ်လဲၣ်.—အ့း ၁:၇; ဧ့ၤ ၄:၁၄-၁၆.

၇. ဝံဒၤနံးယ့လး အတၢ်လဲၤခီဖျိန့ၣ် မၤစၢၤဝဲ ဒီပုၢ်ဝဲၢ်မုၣ်ဘၢၤနဲစၤဒ်လဲၣ်.

^၇ ဒီပုၢ်ဝဲၢ်မုၣ်ဘၢၤနဲစၤ b လၢအအိၣ်လၢ ဟ့းထံၣ်န့ၣ် အထံၣ်ဘၣ်ဒီး တၢ်အိၣ်သးလၢ အလီၤပျံၤဒိၣ်မးတခါ. ပိာ်ခွါတဂၤလၢ အအိၣ်တၢ်လီၢ် တတီၤဃီဒီးအီၤန့ၣ် ဆဲးကျိးအီၤ ဒီးဆှၢန့ၢ်အီၤလံာ်လၢ လီတဲစိအပူၤကိးနံၤဒဲး ဒီးမၢဆူၣ်အီၤလၢ အကမံဃုာ်ဒီးအီၤ. ဒီပုၢ်ဝဲၢ်မုၣ်ဘၢၤနဲစၤ တဲဘၣ်ပိာ်ခွါတဂၤန့ၣ် ပျီပျီလၢ အတဘၣ်သး မၤဝဲဒ်န့ၣ်ဘၣ်. သနာ်က့ ပိာ်ခွါတဂၤန့ၣ် ဘၣ်သးဃုတၢ်အ့ၣ်လိာ် ဒီးတဲပျံၤစ့ၢ်ကီး ဒီပုၢ်ဝဲၢ်မုၣ်ဘၢၤနဲစၤလၢ အကမၤဆါအီၤ. ဒီပုၢ်ဝဲၢ်မုၣ်ဘၢၤနဲစၤ တဲဝဲလၢ “ယပျံၤတၢ်ဒိၣ်မး.” အဃိ ဒ်သိး ဒီပုၢ်ဝဲၢ်မုၣ်ဘၢၤနဲစၤ ကမၤလီၤမၢ်ကွံာ် အတၢ်ပျံၤအဂီၢ် အမၤဝဲဒ်လဲၣ်. အကျဲးစၢးအဂ့ၤကတၢၢ်ဒ်သိး အကဒီသဒၢလီၤအသး. ဒီးတၢ်အိၣ်ဖှိၣ်သးပှၢ်တဂၤ မၤစၢၤအီၤဒ်သိး အကဆဲးကျိးဒီး ပှၤဘၣ်မူဘၣ်ဒါတဖၣ်. တကးဒံးဘၣ် အဆိကမိၣ်ထံစ့ၢ်ကီး ဘၣ်ဃးဒီး ယဟိဝၤယွၤ မၤစၢၤတ့ၢ် အခ့အပှၤလၢညါတဖၣ် ဒ်လဲၣ်အဂ့ၢ်. အတဲဝဲလၢ “ပှၤလၢ ယဆိကမိၣ်ထီၣ် အဆိကတၢၢ်တဂၤန့ၣ် ကဲဝဲ ဝံဒၤနံးယ့လး. ဝံဒၤနံးယ့လးန့ၣ် အတမၤကမၣ်တၢ် နီတမံၤဘၣ်, သနာ်က့ ပှၤကွံာ်လီၤအီၤလၢ ခ့ယုၢ်ကပိၤပူၤ. ဘၣ်ဆၣ် ယဟိဝၤယွၤ ဒီသဒၢအီၤ. အဃိ ယဃ့ယဟိဝၤယွၤလၢ အကမၤဝဲဒ်သိး ပိာ်ခွါတဂၤန့ၣ် တဆိကမိၣ်ယဂ့ၢ်လၢၤတဂ့ၤ ဒီးယအးလီၤ ယတၢ်ကီတၢ်ခဲလၢ ယဟိဝၤယွၤအစုပူၤ. ယမၤဒ်န့ၣ်အဃိ ယတပျံၤတၢ်လၢၤဘၣ်.”—ဒၤ ၆:၁၂-၂၂.

တၢ်လၢယဟိဝၤယွၤ မၤန့ၢ်ပှၤခဲအံၤ

၈. စီၤဒၤဝံး ထံၣ်ဘၣ်ဒီး တၢ်ကီတၢ်ခဲဘၣ်ဆၣ် အနာ်ဝဲမနုၤလဲၣ်. (စံးထီၣ်ပတြၢၤ ၅၆:၈)

^၈ ဖဲစီၤဒၤဝံး အိၣ်လၢဝ့ၢ်ကၤသးအခါ အထံၣ်ဘၣ် တၢ်လီၤဘၣ်ယိၣ်ဒိၣ်မး သနာ်က့ အတသးစၢၢ်ဆၢဝဲ တၢ်လၢအမၤပျံၤအီၤဘၣ်. လၢအကပျံၤတၢ်အလီၢ် အဆိကမိၣ်ထံဝဲ ဘၣ်ဃးဒီး ယဟိဝၤယွၤ မၤစၢၤအီၤ ဖဲအပျံၤတၢ် အဆၢကတီၢ်. စီၤဒၤဝံး သ့ၣ်ညါဘၣ်ဝဲလၢ ယဟိဝၤယွၤ ဟံးစုနဲၣ်ကျဲအီၤ, ဒီသဒၢအီၤ ဒီးယဟိဝၤယွၤ နၢ်ပၢၢ်အတၢ်တူၢ်ဘၣ်. (ဖး စံးထီၣ်ပတြၢၤ ၅၆:၈.) တကးဒံးဘၣ် အသကိးလၢ အသးတီဒီးအီၤ လၢအမ့ၢ် စီၤယိနၤသၣ် ဒီးပှၤလုၢ်တၢ်ခိၣ် အဒိၣ်ကတၢၢ် စီၤအဃံၤမ့လ့း ဟ့ၣ်ဂံၢ်ဟ့ၣ်ဘါအီၤ ဒီးမၤစၢၤအီၤစ့ၢ်ကီး. (၁ မူၤ ၂၀:၄၁, ၄၂; ၂၁:၆, ၈, ၉) ပထံၣ်ဘၣ်စ့ၢ်ကီးလၢ စီၤပၤစီလူး ဘၣ်သးမၤသံ စီၤဒၤဝံးသနာ်က့ စီၤဒၤဝံး အသးသမူပူၤဖျဲးဝဲ. အဃိ စီၤဒၤဝံး နာ်ဝဲ သပှၢ်တၢၢ်လၢ ယဟိဝၤယွၤ သ့ၣ်ညါဝဲ အတၢ်ကီတၢ်ခဲ ဒီးအတၢ်တူၢ်ဘၣ် လီၤတံၢ်လီၤဆဲး.

၉. ဘၣ်ဃးဒီး ပဝဲတဂၤဘၣ်တဂၤန့ၣ် ယဟိဝၤယွၤ ထံၣ်ဝဲမနုၤလဲၣ်.

^၉ ဖဲပထံၣ်ဘၣ်ဒီး တၢ်ကီတၢ်ခဲ ဒီးပပျံၤတၢ်အခါ ပကဘၣ် သ့ၣ်နီၣ်ထီၣ်လၢ ယဟိဝၤယွၤ ထံၣ်ဝဲပတၢ်ကီတၢ်ခဲ ဒီးအသ့ၣ်ညါဝဲ ပတၢ်တူၢ်ဘၣ်. အဒိ လၢညါ ဖဲပှၤအံၣ်စရ့လးဖိ အိၣ်လၢကီၢ်အဲၤကူပတူးအခါ ပှၤရ့ဒီးအဝဲသ့ၣ် တဂ့ၤဘၣ်န့ၣ် ယဟိဝၤယွၤထံၣ်ဝဲ တကးဒံးဘၣ် ယဟိဝၤယွၤ သ့ၣ်ညါဝဲ “တၢ်လၢအဝဲသ့ၣ် [တူၢ်ဘၣ်ခီၣ်ဘၣ်ဝဲ].” (၂ မိၤ ၃:၇) လၢစီၤဒၤဝံး အတၢ်သးဝံၣ်တယုၢ် အပူၤန့ၣ် အတဲဝဲလၢ ယဟိဝၤယွၤ ထံၣ်လီၤအ “တၢ်နးတၢ်ဖှီၣ်” ဒီးအ “တၢ်ကိၢ်တၢ်ဂီၤလၢ  အဒိၣ်အမုၢ်တဖၣ်.” (စံး ၃၁:၇) ဒီးတဘျီတခီၣ်န့ၣ် ကစၢ်ယွၤ အပှၤဂီၢ်မုၢ် တူၢ်ဘၣ်ခီၣ်ဘၣ်တၢ် ခီဖျိလၢ အဝဲသ့ၣ်အနီၢ်ကစၢ် အတၢ်ကမၣ်အဃိ. သနာ်က့ “ကစၢ်ယွၤ ဘၣ်ကိၢ်ဘၣ်ဂီၤ” တၢ်လၢ အဝဲသ့ၣ်အဂီၢ်ဒံး. (ၡါ ၆၃:၉) အဃိ ပသ့ၣ်ညါဘၣ်လၢ ဖဲပပျံၤတၢ်အခါ ယဟိဝၤယွၤ နၢ်ပၢၢ်ပတၢ်တူၢ်ဘၣ် ဒီးဒ်သိး ပတပျံၤတၢ်လၢၤတဂ့ၤအဂီၢ် အသးအိၣ် မၤစၢၤပှၤ.

၁၀. ဘၣ်မနုၤအဃိ နနာ်လၢ ယဟိဝၤယွၤ သးအိၣ်နၤ ဒီးကမၤစၢၤနၤလဲၣ်.

^၁၀ ဘၣ်သ့ၣ်သ့ၣ် ပကဆိကမိၣ်လၢ ဖဲပထံၣ်ဘၣ် တၢ်ကီတၢ်ခဲ လၢအလီၤပျံၤလီၤဖုးအခါ ယဟိဝၤယွၤ မၤစၢၤပှၤဒ်လဲၣ်. ပမ့ၢ်ဆိကမိၣ်ဘၣ် ဒ်န့ၣ်န့ၣ် ပကဘၣ် ဃ့ယဟိဝၤယွၤလၢ အကမၤစၢၤပှၤ ဒ်သိးပကထံၣ်ဘၣ် အတၢ်မၤစၢၤ. (၂ စီၤပၤ ၆:၁၅-၁၇) ဝံၤဒီး ဆိကမိၣ်ထံ တၢ်သံကွၢ်တဖၣ်အံၤ. ပနၢ်ဟူဘၣ် တၢ်စံၣ်တဲၤတဲလီၤ မ့တမ့ၢ် ပှၤဟ့ၣ်တၢ်စံးဆၢ လၢတၢ်အိၣ်ဖှိၣ် ဒီးအမၤဆူၣ်ထီၣ် ပသးဂံၢ်ဘါ အိၣ်တခါခါဧါ. လံာ်လဲၢ်, တၢ်ဂီၤမူ မ့တမ့ၢ် တၢ်သးဝံၣ် လၢအဟ့ၣ်ဂံၢ်ဟ့ၣ်ဘါပှၤန့ၣ် အိၣ်တခါခါဧါ. ပှၤတဲဘၣ်ပှၤတၢ်ဂ့ၢ် မ့တမ့ၢ် လံာ်စီဆှံအဆၢ လၢအမၤမုာ်ထီၣ်ပသး အိၣ်တဂၤဂၤဧါ. ပဒီပုၢ်ဝဲၢ်မုၣ်ခွါ အတၢ်အဲၣ် ဒီးနီၢ်သးတၢ်အီၣ် လၢပဒိးန့ၢ်ဘၣ်တဖၣ် ကဲဘျုးလၢပဂီၢ်ဒိၣ်မးန့ၣ် တဘျီတခီၣ် ပတနီၣ်ဘၣ်ဘၣ်. ပဒီပုၢ်ဝဲၢ်မုၣ်ခွါ ဒီးနီၢ်သးတၢ်အီၣ် တဖၣ်အံၤန့ၣ် မ့ၢ်ဝဲယဟိဝၤယွၤ အတၢ်ဟ့ၣ် လၢအလီၤကမၢကမၣ်ဒိၣ်မး. (ၡါ ၆၅:၁၃; မၢ် ၁၀:၂၉, ၃၀) တၢ်ဟ့ၣ်တဖၣ်အံၤ ပာ်ဖျါထီၣ်ဝဲလၢ ယဟိဝၤယွၤ သးအိၣ်ပှၤဖးဒိၣ်ညါ ဒီးပာ်ဖျါထီၣ်ဝဲလၢ ပနာ်န့ၢ်အီၤ သ့သပှၢ်တၢၢ်.—ၡါ ၄၉:၁၄-၁၆.

၁၁. ဒ်သိး ဒီပုၢ်ဝဲၢ်မုၣ်အါဒၤ အတၢ်ပျံၤ ဒီးအတၢ်ဘၣ်ယိၣ် ကစှၤလီၤအဂီၢ် တၢ်မနုၤမၤစၢၤအီၤလဲၣ်.

^၁၁ ဒီပုၢ်ဝဲၢ်မုၣ်အါဒၤ လၢအအိၣ်လၢ စဲနံကိန့ၣ် အထံၣ်ဘၣ်ဝဲလၢ ယဟိဝၤယွၤ မၤစၢၤအီၤ ဖဲအလဲၤခီဖျိ တၢ်ကီတၢ်ခဲအခါ. ခီဖျိလၢ အကဲဖိဝဲၢ်ကိအဃိ အမိအပါ အဲၣ်ဒိးလၢ အကဃုကျိၣ်စ့ ဒ်သိးကလုၢ်အီၣ်လီၤအသး ဒီးကွၢ်ထွဲက့ၤအမိအပါ. ဘၣ်ဆၣ် ဒ်သိး အကမၤဘၣ် ပှၤလဲၤလၢညါအဂီၢ် အကျဲးစၢးအိၣ်မူယိယိဖိအဃိ အစ့တအိၣ်အါအါဘၣ်. အဃိ အဟံၣ်ဖိဃီဖိ သးထီၣ်အီၤ ဒီးတဲဆါအီၤ. ဒီပုၢ်ဝဲၢ်မုၣ်အါဒၤ တဲဝဲလၢ “ယဘၣ်ယိၣ်လၢ ယမၤစၢၤယမိယပါတန့ၢ်ဘၣ် ဒီးယသးကိၢ်လၢ ပှၤတကနၣ်ဃုာ်ယၤ နီတဂၤလၢၤဘၣ်. ဒီးခီဖျိလၢ တၢ်ကဲထီၣ်သးဒ်အံၤအဃိ ယပာ်တၢ်ကမၣ် လၢယဟိဝၤယွၤ အလိၤစ့ၢ်ကီး.” လၢခံ ဒီပုၢ်ဝဲၢ်မုၣ်အါဒၤ နၢ်ဟူဘၣ် တၢ်စံၣ်တဲၤတဲလီၤတခါ လၢတၢ်အိၣ်ဖှိၣ်. ဒီပုၢ်ဝဲၢ်မုၣ်အါဒၤ တဲဝဲလၢ “ဒီပုၢ်ဝဲၢ်ခွါလၢ အဟ့ၣ်တၢ်စံၣ်တဲၤတဲလီၤန့ၣ် အဒုးသ့ၣ်နီၣ်ထီၣ်ပှၤလၢ ယဟိဝၤယွၤ သ့ၣ်ညါဝဲ တၢ်လၢအမၤကိၢ်မၤဂီၤပသး. လၢခံကယီကယီန့ၣ် ယသ့ၣ်ညါထီၣ်က့ၤလၢ တၢ်ဟ့ၣ်ကူၣ်လၢ ယဒိးန့ၢ်ဘၣ်လၢ တၢ်အိၣ်ဖှိၣ်သးပှၢ် ဒီးဒီပုၢ်ဝဲၢ်မုၣ်ခွါတဖၣ် အအိၣ်န့ၣ် ဒုးနာ်န့ၢ်ယၤလၢ ယဟိဝၤယွၤအဲၣ်ယၤ. ဒီးဖဲယဃ့ထုကဖၣ်လၢ ယဟိဝၤယွၤအအိၣ်အခါ ယနာ်န့ၢ်အီၤအါထီၣ် ဒီးနာ်သပှၢ်တၢၢ်လၢ အကမၤစၢၤယၤ. တကးဒံးဘၣ် ဖဲယထံၣ်ဘၣ်လၢ ယဟိဝၤယွၤ စံးဆၢ ယတၢ်ထုကဖၣ်အခါ ယဒိးန့ၢ်ဘၣ် တၢ်သူၣ်မံသးမုာ်နီၢ်ကီၢ်.” လၢခံ ဒီပုၢ်ဝဲၢ်မုၣ်အါဒၤ န့ၢ်ဘၣ်တၢ်မၤတခါလၢ အမၤစၢၤအီၤဒ်သိး အကဆဲးမၤ ပှၤလဲၤလၢညါ တကးဒံးဘၣ် မၤစၢၤစ့ၢ်ကီး အမိအပါ. ဒီပုၢ်ဝဲၢ်မုၣ်အါဒၤ တဲဝဲလၢ “ခဲအံၤ ယသ့ၣ်ညါဘၣ်လၢ ယကဘၣ်နာ်န့ၢ် ယဟိဝၤယွၤ လၢယသးဒီဖျၢၣ် ဒီးဖဲယဃ့ထုကဖၣ် ဝံၤအလီၢ်ခံန့ၣ် ယတပျံၤတၢ် ဒီးဘၣ်ယိၣ်တၢ်လၢၤဘၣ်.”

တၢ်လၢယဟိဝၤယွၤ ကမၤန့ၢ်ပှၤ လၢခါဆူညါ

၁၂. ဒ် စံးထီၣ်ပတြၢၤ ၅၆:၉ ပာ်ဖျါထီၣ်ဝဲအသိး စီၤဒၤဝံး နာ်န့ၢ်ဝဲမနုၤလဲၣ်.

^၁၂ ဖး စံးထီၣ်ပတြၢၤ ၅၆:၉. လံာ်စီဆှံတဆၢအံၤ အပာ်ဖျါထီၣ်ဝဲ တၢ်ဂ့ၢ်အဂၤတခါလၢ အမၤစၢၤ စီၤဒၤဝံး ဖဲစီၤဒၤဝံး ပျံၤတၢ်အခါ. စီၤဒၤဝံး ထံၣ်ဘၣ်ဒံး တၢ်ဘၣ်ယိၣ် လၢအသးသမူအဂီၢ် သနာ်က့ အဆိကမိၣ်ထံဝဲ တၢ်လၢယဟိဝၤယွၤ ကမၤန့ၢ်အီၤ လၢခါဆူညါ. စီၤဒၤဝံး သ့ၣ်ညါဝဲလၢ အဆၢကတီၢ်မ့ၢ်ဘၣ်န့ၣ် ယဟိဝၤယွၤ ကမၤပူၤဖျဲးအီၤ. တကးဒံးဘၣ် ယဟိဝၤယွၤ တဲဆိပာ်စၢၤဝဲလၢ စီၤဒၤဝံး ကကဲထီၣ် အံၣ်စရ့လးအစီၤပၤ လၢခံတဂၤ. (၁ မူၤ ၁၆:၁, ၁၃) အဃိ စီၤဒၤဝံး နာ်ဝဲသပှၢ်တၢၢ်လၢ တၢ်လၢယဟိဝၤယွၤ အၢၣ်လီၤဝဲ တမံၤဂ့ၤတမံၤဂ့ၤန့ၣ် ကဟဲလၢပှဲၤထီၣ်နီၢ်ကီၢ်.

၁၃. ပနာ်သပှၢ်တၢၢ်လၢ ယဟိဝၤယွၤ ကမၤန့ၢ်ပှၤမနုၤလဲၣ်.

^၁၃ မ့မ့ၢ်ပဝဲမီၤ, ယဟိဝၤယွၤ အၢၣ်လီၤလၢ အကမၤန့ၢ်ပှၤ မနုၤလဲၣ်. ပတမုၢ်လၢ်လၢ ယဟိဝၤယွၤ ကဒီသဒၢပှၤလၢ ပတၢ်ကီတၢ်ခဲ ခဲလၢာ်ဘၣ်. c ဘၣ်ဆၣ် ပကဘၣ် သ့ၣ်နီၣ်ထီၣ်လၢ တၢ်ကီတၢ်ခဲလၢ ပထံၣ်ဘၣ်တမံၤဂ့ၤတမံၤဂ့ၤ လၢဆၢကတီၢ်ခဲအံၤန့ၣ် ခါဆူညါ လၢဟီၣ်ခိၣ်သီအပူၤန့ၣ် ယဟိဝၤယွၤ ကမၤလီၤမၢ်ကွံာ်ဝဲခဲလၢာ်. (ၡါ ၂၅:၇-၉) ပတၢ်ဘၣ်တ့ကစၢ်န့ၣ် အအိၣ်ဒီး တၢ်စိတၢ်ကမီၤ လၢအကမၤသမူထီၣ်က့ၤပှၤသံ, မၤဘျါက့ၤ ပတၢ်ဆူးတၢ်ဆါ, မၤလီၤမၢ်န့ၢ် ပတၢ်တူၢ်ဘၣ် လၢအတမုာ်ဘၣ် ဒီးမၤလီၤမၢ်ကွံာ် ပှၤအၢပှၤသီခဲလၢာ်.—၁ ယိၤ ၄:၄.

၁၄. ပဆိကမိၣ်ထံ တၢ်ဂ့ၢ်မနုၤသ့လဲၣ်.

^၁၄ ဖဲပပျံၤတၢ်အခါ ပကဘၣ် ဆိကမိၣ်ထံ ဘၣ်ဃးဒီး တၢ်လၢယဟိဝၤယွၤ ကမၤန့ၢ်ပှၤ လၢခါဆူညါ. အဒိ ဖဲပဆိကမိၣ်ထံ ဘၣ်ဃးဒီး ဆၢကတီၢ်ဖဲ မုၣ်ကီၤလံၢ်တအိၣ်လၢၤဘၣ်, ပှၤအၢပှၤသီ တအိၣ်လၢၤဘၣ် ဒီးအိၣ်တ့ၢ်ထဲ ပှၤတီပှၤလိၤ ဒီးတၢ်တလၢတပှဲၤ ကလီၤမၢ်ကွံာ်ဝဲ တနံၤဘၣ်တနံၤ ကယီကယီအခါ ပကတူၢ်ဘၣ်ဒ်လဲၣ်. ဖဲ ၂၀၁၄ တၢ်အိၣ်ဖှိၣ်ဖးဒိၣ်န့ၣ် ပထံၣ်ဘၣ် တၢ်ဒုးနဲၣ်တၢ်အဒိ လၢပကဘၣ်ဆိကမိၣ်ထံ ဘၣ်ဃးဒီး ပတၢ်မုၢ်လၢ် လၢခါဆူညါအဂီၢ်. လၢတၢ်ဒုးနဲၣ်တၢ်အဒိအပူၤန့ၣ် ပါတဂၤ တဲသကိးတၢ်ဒီး အဟံၣ်ဖိဃီဖိ ဘၣ်ဃးဒီး တၢ်လၢကအကဲထီၣ်သး လၢဟီၣ်ခိၣ်ပၤရဒံစူးအပူၤန့ၣ် ကလီၤဆီဒီး တၢ်လၢအကဲထီၣ်သးလၢ ဆၢကတီၢ်ခဲအံၤ ဒ် ၂ တံၤမသ့း ၃:၁-၅ ပာ်ဖျါထီၣ်ဝဲအသိး. ဒီးပါတဂၤန့ၣ် တဲဝဲဒ်အံၤ. “လၢဟီၣ်ခိၣ်သီအပူၤန့ၣ် တၢ်သးခုအဒိၣ်ကတၢၢ် အဆၢကတီၢ် ကအိၣ်ထီၣ်ဝဲ. ပှၤဟီၣ်ခိၣ်ဖိ ကအဲၣ်လိာ်အသး တဂၤဒီးတဂၤ, ကအဲၣ် တၢ်မ့ၢ်တၢ်တီ, တပာ်ထီၣ်ထီသးဘၣ်, တဆိကမိၣ်ဒိၣ်လီၤသးဘၣ်, ကစံးထီၣ်ပတြၢၤ ကစၢ်ယွၤ, ကဒိကနၣ် အမိအပါအကလုၢ်, ကသ့ၣ်ညါ စံးဘျုးစံးဖှိၣ်တၢ်, အသးကတီ, ကအဲၣ်အဟံၣ်ဖိဃီဖိ, အခိၣ်တကိၤဘၣ်, ကတဲဂ့ၤပှၤဂၤထီဘိ, ကပၢၤသူၣ်ပၢၤသး, ကအိၣ်ဒီးတၢ်သးစူၤ, ကအဲၣ်တၢ်လၢအဂ့ၤ, ကမ့ၢ်ပှၤလၢ ပှၤနာ်န့ၢ်အီၤသ့, ကကွၢ်န့ၢ်တၢ်လၢပှၤဂၤအဂီၢ်, ကအိၣ်ဒီး တၢ်ဆီၣ်လီၤသး, အကအဲၣ်ကစၢ်ယွၤဒိၣ်န့ၢ် အအဲၣ်တၢ်မုာ်တၢ်ပၠီၣ် ဒီးကသးတီဒီးကစၢ်ယွၤနီၢ်ကီၢ်. ပှၤဒ်န့ၣ်တဖၣ်န့ၣ် ရ့ဒီးအဝဲသ့ၣ်ဘူးဘူးတက့ၢ်.” မ့မ့ၢ်ပဝဲမီၤ, ပတဲသကိးဒီး ပဟံၣ်ဖိဃီဖိ မ့တမ့ၢ် ဒီပုၢ်ဝဲၢ်မုၣ်ခွါတဖၣ် ဘၣ်ဃးဒီး တၢ်အိၣ်မူလၢ ဟီၣ်ခိၣ်သီအဂ့ၢ် စ့ၢ်ကီးဧါ.

၁၅. ဒီပုၢ်ဝဲၢ်မုၣ်ထါနယၤ ပျံၤတၢ်ဒီးဘၣ်ယိၣ်တၢ် သနာ်က့ အမၤလီၤမၢ်ကွံာ် အတၢ်ပျံၤတၢ်ဖုးဒ်လဲၣ်.

^၁၅ ဒီပုၢ်ဝဲၢ်မုၣ်ထါနယၤ လၢအအိၣ်လၢ ကလံၤစိး မဲၤစံၤဒိနံၤယၤန့ၣ် အမၤလီၤမၢ်ကွံာ် အတၢ်ပျံၤတၢ်ဖုး ခီဖျိအဆိကမိၣ်ထံဝဲ တၢ်ဆိၣ်ဂ့ၤလၢ အကဒိးန့ၢ်ဘၣ်ဝဲ လၢခါဆူညါ. ဖဲအစးထီၣ် မၤလိလံာ်စီဆှံအခါန့ၣ် အမိအပါ တြီအီၤသပှၢ်တၢၢ်. အတဲဝဲလၢ “တၢ်လၢယဘၣ်ယိၣ်လၢ ကကဲထီၣ်သးန့ၣ် အဟဲကဲထီၣ်သး. ယထီၣ်တၢ်အိၣ်ဖှိၣ် မ့ၢ်ဝံၤတဘျီဂ့ၤတဘျီဂ့ၤန့ၣ် ယမိတီၢ်ယၤထီဘိ. ယမိယပါ တဲပျံၤယၤလၢ ယမ့ၢ်ကဲထီၣ် ယဟိဝၤပှၤအုၣ်အသးန့ၣ် အဝဲသ့ၣ် ကမၤသံယၤ.” လၢခံန့ၣ် ဒီပုၢ်ဝဲၢ်မုၣ်ထါနယၤ အမိအပါ နီဟးထီၣ်ကွံာ်အီၤလၢဟံၣ်ပူၤ. တၢ်ကဲထီၣ်သး ဒ်အံၤအဃိ ဒီပုၢ်ဝဲၢ်မုၣ်ထါနယၤ မၤဝဲဒ်လဲၣ်. အတဲဝဲလၢ “ယထံၣ်တမှံကွၢ်လၢ ခါဆူညါန့ၣ် ယကန့ၢ်ဘၣ် တၢ်သးခု လီၤထူလီၤယိာ် ခီဖျိလၢ ယအိၣ်ဒီးတၢ်သးတီအဃိ. တကးဒံးဘၣ် ယဆိကမိၣ် ဘၣ်ဃးဒီး ခါဆူညါ တၢ်လၢယဟိဝၤယွၤ ကဟ့ၣ်က့ၤယၤ လၢယဘၣ်တူၢ်ၡူအီၤလၢ ဆၢကတီၢ်ခဲအံၤ ဒီးယကသးပ့ၤနီၣ်ကွံာ် တၢ်လၢအမၤဆါယသးခဲလၢာ်.” ဒီပုၢ်ဝဲၢ်မုၣ်ထါနယၤ အိၣ်ဒီးတၢ်သးတီ သပှၢ်တၢၢ်. ဒီးခီဖျိလၢ ယဟိဝၤယွၤ မၤစၢၤအီၤအဃိ အဃုအိၣ်ဟံၣ်ဘၣ်ဝဲ. ခဲအံၤန့ၣ် ဒီပုၢ်ဝဲၢ်မုၣ်ထါနယၤ  ဆီဟံၣ်ဆီဃီဒီး ဒီပုၢ်ဝဲၢ်ခွါလၢ အအဲၣ်ယဟိဝၤယွၤတဂၤ ဒီးအဝဲသ့ၣ်မၤသကိးဝဲ ကစၢ်ယွၤအတၢ်မၤ လၢဆၢကတီၢ်လၢပှဲၤ လၢတၢ်သးခုအပူၤ.

မၤဂၢၢ်ကျၢၤဒိၣ်ထီၣ် နတၢ်နာ်န့ၢ်ယဟိဝၤယွၤ လၢဆၢကတီၢ်ခဲအံၤ

၁၆. ဖဲပထံၣ်ဘၣ် တၢ်အိၣ်သးလၢ လူၤကၣ် ၂၁:၂၆-၂၈ ဟဲလၢပှဲၤထီၣ်အခါ ဒ်သိး ပတပျံၤတၢ်တဂ့ၤအဂီၢ် တၢ်မနုၤကမၤစၢၤပှၤလဲၣ်.

^၁၆ ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် ပှၤဟီၣ်ခိၣ်ဖိတဖၣ် “ကပျံၤတၢ် တုၤဒၣ်လဲာ် ကသးပ့ၤနီၣ်လီၤအသး.” မ့မ့ၢ်လၢ ကစၢ်ယွၤ အပှၤဂီၢ်မုၢ်န့ၣ် အဝဲသ့ၣ် ကအိၣ်ဂၢၢ်ဆိးကျၢၤ ဒီးကအိၣ်ဒီးတၢ်သးဒူ. (ဖး လူၤကၣ် ၂၁:၂၆-၂၈.) ဘၣ်မနုၤအဃိ ပတပျံၤတၢ်ဘၣ်လဲၣ်. ခီဖျိလၢ ပတၢ်နာ်န့ၢ် ယဟိဝၤယွၤန့ၣ် အဂၢၢ်ကျၢၤဝဲလံအဃိ. ဒီပုၢ်ဝဲၢ်မုၣ်ထါနယၤ လၢပတဲသကိးအဂ့ၢ် ဖဲမၢကၢာ်န့ၣ် အတဲဝဲလၢ တၢ်လၢအလဲၤခီဖျိဘၣ်ဝဲတဖၣ်န့ၣ် မၤစၢၤအီၤဒ်သိး အလဲၤခီဖျိ တၢ်အိၣ်သးကီခဲ လၢအဂၤတဖၣ်ကန့ၢ်အဂီၢ်. ဒီပုၢ်ဝဲၢ်မုၣ်ထါနယၤ တဲဝဲလၢ “ဒ်သိး ပလဲၤခီဖျိ တၢ်အိၣ်သးကီခဲ တမံၤဂ့ၤတမံၤဂ့ၤ ကန့ၢ်အဂီၢ် ယသ့ၣ်ညါလၢ ယဟိဝၤယွၤ ကမၤစၢၤပှၤ ဒီးအကဆိၣ်ဂ့ၤပှၤ.” အတဲစ့ၢ်ကီးဝဲလၢ “တဘျီတခီၣ် ပှၤလၢအဒိၣ်စိလၢ ပဖီခိၣ်တဖၣ်န့ၣ် အတၢ်စိတၢ်ကမီၤ အိၣ်အါန့ၢ်ပှၤဒံး. ဘၣ်ဆၣ် နီၢ်ကီၢ်န့ၣ် ယဟိဝၤယွၤ အတၢ်စိတၢ်ကမီၤ အိၣ်အါန့ၢ် အဝဲသ့ၣ်ဒံး. ဒီးဖဲပထံၣ်ဘၣ် တၢ်အိၣ်သးကီခဲအခါ အတညီဘၣ်, ဘၣ်ဆၣ် တၢ်အိၣ်သးကီခဲအံၤ မုၢ်ကအိၣ်တနံၤန့ၣ် အကကတၢၢ်ကွံာ်ဝဲ.”

၁၇. ၂၀၂၄ လံာ်စီဆှံအဆၢလၢ ဒီတနံၣ်အဂီၢ်န့ၣ် ကမၤစၢၤပှၤဒ်လဲၣ်. (ကွၢ်တၢ်ဂီၤလၢ လံာ်ကုခိၣ်.)

^၁၇ မုၢ်မဆါတနံၤအံၤ တၢ်လၢအကမၤပျံၤမၤဖုးပှၤန့ၣ် အိၣ်ဝဲအါမး. ဘၣ်ဆၣ် ဒ်စီၤဒၤဝံးအသိး ပတပျဲလၢ ပတၢ်ပျံၤတၢ်ဖုး ကဒိၣ်စိလၢ ပဖီခိၣ်ဘၣ်. တကးဒံးဘၣ် ၂၀၂၄ လံာ်စီဆှံအဆၢလၢ တနံၣ်အဂီၢ်န့ၣ် မ့ၢ်ဝဲ စီၤဒၤဝံး အတၢ်ထုကဖၣ် လၢအတဲဘၣ် ယဟိဝၤယွၤလၢ “ဖဲယပျံၤတၢ်အခါ ယနာ်န့ၢ်နၤ.” (စံး ၅၆:၃) ဘၣ်ဃးဒီး လံာ်စီဆှံ တဆၢအံၤန့ၣ် လံာ်စီဆှံ အတၢ်ကွဲးကျိာ်ထံ အဂၤတဘ့ၣ် တဲဝဲလၢ စီၤဒၤဝံး “တဆဲးဆိကမိၣ်ဝဲ အတၢ်ကီတၢ်ခဲ ဒီးတၢ်လၢ အမၤပျံၤမၤဖုးအီၤဘၣ်. ဘၣ်ဆၣ် အသန့ၤအသးလၢ ကစၢ်ယွၤလၢ အကမၤပူၤဖျဲးအီၤဟီ.” အဃိဖဲပ ထံၣ်ဘၣ်ဒီး တၢ်အိၣ်သးကီခဲ လၢအလီၤပျံၤလီၤဖုးအခါ ပကဘၣ် ဆိကမိၣ်ထံ ဘၣ်ဃးဒီး လံာ်စီဆှံအဆၢလၢ တနံၣ်အဂီၢ်. ပကဘၣ် ပာ်လီၤတၢ်ဆၢကတီၢ်လၢ ပကဆိကမိၣ်ထံ တၢ်လၢယဟိဝၤယွၤ မၤတ့ၢ်ဝဲ, တၢ်လၢအမၤဝဲခဲအံၤ ဒီးတၢ်လၢအကမၤဝဲ လၢခါဆူညါ. ပမ့ၢ်မၤ ဒ်န့ၣ်န့ၣ် ဒ်စီၤဒၤဝံးအသိး ပကတဲလၢ “ယနာ်န့ၢ်ကစၢ်ယွၤ, ယတပျံၤတၢ်ဘၣ်.”—စံး ၅၆:၄.