တၢ်မၤလိ ၄
တၢ်သးဝံၣ် ၁၈ တၢ်စံးဘျုးစံးဖှိၣ်လၢ တၢ်ပှ့ၤက့ၤအဂီၢ်
ခီဖျိလၢ တၢ်ပှ့ၤက့ၤအဃိ ပဒိးန့ၢ်ဘၣ် တၢ်မၤလိဒ်လဲၣ်
“ကစၢ်ယွၤ ပာ်ဖျါထီၣ်အတၢ်အဲၣ်.”—၁ ယိၤ ၄:၉.
တၢ်ဂ့ၢ်မိၢ်ပှၢ်
ခီဖျိလၢ တၢ်ပှ့ၤက့ၤအဃိ ပသ့ၣ်ညါထီၣ်ဘၣ် ယဟိဝၤယွၤ ဒီးယ့ၣ်ၡူး အတၢ်ဂ့ၤတၢ်ဝါ မနုၤတဖၣ်လဲၣ်.
၁. ဘၣ်မနုၤအဃိ အရ့ဒိၣ်လၢ ပလဲၤထီၣ် တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး ကိးနံၣ်ဒဲးလဲၣ်.
တၢ်ပှ့ၤက့ၤန့ၣ် အမ့ၢ်ဝဲ တၢ်ဟ့ၣ်အလုၢ်ဒိၣ်ပှ့ၤဒိၣ် လၢအဟဲလၢ ယဟိဝၤယွၤအအိၣ်. (၂ ကရံၣ် ၉:၁၅) ခီဖျိလၢ ယ့ၣ်ၡူးဟဲတူၢ်သံသး လၢပဂီၢ်အဃိ ပကဲထီၣ် ယဟိဝၤယွၤ အသကိးသ့. ဒီးပအိၣ်ဒီးတၢ်မုၢ်လၢ်လၢ ခါဆူညါန့ၣ် ပကအိၣ်မူဘၣ် လီၤထူလီၤယိာ်. ယဟိဝၤယွၤ ရဲၣ်ကျဲၤန့ၢ်ပှၤ တၢ်ပှ့ၤက့ၤန့ၣ် ပာ်ဖျါထီၣ်ဝဲလၢ အအဲၣ်ပှၤဒိၣ်မးအဃိ ပကြၢးစံးဘျုးစံးဖှိၣ်က့ၤအီၤ ဒီးပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ပှ့ၤက့ၤ. (ရိ ၅:၈) ဒ်သိး ပကဆဲးပာ်ဖျါထီၣ်က့ၤ တၢ်စံးဘျုးစံးဖှိၣ် အဝဲသ့ၣ်အဂီၢ် ယ့ၣ်ၡူး မၤလိာ်ပှၤလၢ ပကလဲၤထီၣ် တၢ်သ့ၣ်နီၣ်ထီၣ်က့ၤ အတၢ်သံအမူး လၢပှၤမၤဝဲ တနံၣ်တဘျီ.—လူၤ ၂၂:၁၉, ၂၀.
၂. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.
၂ တနံၣ်အံၤ တၢ်သ့ၣ်နီၣ်ထီၣ် ယ့ၣ်ၡူးအတၢ်သံအမူးန့ၣ် ပကမၤအီၤဖဲ မုၢ်ဃုနံၤ, လါအ့ဖြ့ၣ် ၁၂, ၂၀၂၅. ပနာ်လၢ သုကဂုာ်ကျဲးစၢး လဲၤထီၣ်မူးအံၤ ကိးဂၤဒဲး. ဖဲတၢ်သ့ၣ်နီၣ်ထီၣ် ယ့ၣ်ၡူးအတၢ်သံအမူး တလါန့ၣ် ပမ့ၢ်ဟံးန့ၢ် တၢ်ဆၢကတီၢ်လၢ ပကဆိကမိၣ်ထံ a တၢ်လၢယဟိဝၤယွၤ ဒီးယ့ၣ်ၡူး မၤန့ၢ်ပှၤန့ၣ် ပကဒိးန့ၢ်ဘၣ်အဘျုး အါမး. လၢတၢ်မၤလိအံၤ ပကတဲသကိး ဘၣ်ဃးဒီး ခီဖျိလၢ တၢ်ပှ့ၤက့ၤအဃိ ပသ့ၣ်ညါထီၣ်ဘၣ် ယဟိဝၤယွၤ ဒီးအဖိခွါအဂ့ၢ်ဒ်လဲၣ်. တၢ်မၤလိလၢခံတခါန့ၣ် ကမၤစၢၤပှၤလၢ ပကနၢ်ပၢၢ်အါထီၣ် ဘၣ်ဃးဒီး ခီဖျိလၢ တၢ်ပှ့ၤက့ၤအဃိ ပဒိးန့ၢ်ဘၣ်အဘျုးဒ်လဲၣ် ဒီးပပာ်ဖျါထီၣ် တၢ်စံးဘျုး ကသ့ဒ်လဲၣ်.
ခီဖျိလၢ တၢ်ပှ့ၤက့ၤအဃိ ပသ့ၣ်ညါထီၣ်ဘၣ် ယဟိဝၤယွၤအဂ့ၢ်
၃. ပှၤလၢပှၤပှဲၤထဲတဂၤ အတၢ်ဟ့ၣ်လုၢ်ထီၣ်သးန့ၣ် အမၤထူၣ်ဖျဲးထီၣ် ပှၤဟီၣ်ခိၣ်ဖိခဲလၢာ်လၢ တၢ်ဒဲးဘး ဒီးတၢ်သံ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၃ ခီဖျိလၢ တၢ်ပှ့ၤက့ၤအဃိ ပသ့ၣ်ညါဘၣ်လၢ ယဟိဝၤယွၤန့ၣ် အကဲပှၤလၢ အစံၣ်ညီၣ်တၢ်တီ. (၅ မိၤ ၃၂:၄) ပသ့ၣ်ညါဘၣ်ဒ်လဲၣ်. ဆိကမိၣ်ကွၢ် ခီဖျိလၢ စီၤအၤဒၣ် မၤတၢ်ဒဲးဘး ဒီးတဒိကနၣ် ယဟိဝၤယွၤ အကလုၢ်ဘၣ်အဃိ ပဝဲစ့ၢ်ကီး ပကဲထီၣ် ပှၤတၢ်ဒဲးဘးဖိ ဒီးပဘၣ်သံ. (ရိ ၅:၁၂) ဒ်သိး ယဟိဝၤယွၤ ကမၤထူၣ်ဖျဲးထီၣ်ပှၤလၢ တၢ်ဒဲးဘး ဒီးတၢ်သံအဂီၢ် အဆှၢလီၤအဖိခွါလၢပဂီၢ် ဒ်သိးကပှ့ၤက့ၤပှၤ. ဘၣ်ဆၣ် ပှၤလၢပှၤပှဲၤထဲတဂၤ အတၢ်ဟ့ၣ်လုၢ်ထီၣ်သးန့ၣ် အမၤထူၣ်ဖျဲးထီၣ် ပှၤဟီၣ်ခိၣ်ဖိခဲလၢာ်လၢ တၢ်ဒဲးဘးဒီးတၢ်သံ ကသ့ဒ်လဲၣ်. ဘၣ်ဃးဒီး တၢ်ဂ့ၢ်အံၤ တၢ်မၢဖိပီလူး တဲဝဲလၢ “ခီဖျိလၢ ပှၤတဂၤ [စီၤအၤဒၣ်] တဒိကနၣ်တၢ်ဘၣ် အဃိ ပှၤဟီၣ်ခိၣ်ဖိ အါဂၤ ကဲထီၣ် ပှၤတၢ်ဒဲးဘးဖိလီၤ. ဒ်န့ၣ်အသိး ခီဖျိလၢ ပှၤတဂၤ [ယ့ၣ်ၡူး] အတၢ်ဒိကနၣ်အဃိ ပှၤအါဂၤ ကကဲထီၣ် ပှၤတီပှၤလိၤ.” (ရိ ၅:၁၉; ၁ တံၤ ၂:၆) ပမ့ၢ်ဘၣ်တဲယိယိဖိန့ၣ် ခီဖျိလၢ ပှၤတဂၤ တဒိကနၣ်တၢ်ဘၣ်အဃိ ပှၤဟီၣ်ခိၣ်ဖိခဲလၢာ် ကဲထီၣ်ပှၤတၢ်ဒဲးဘးဖိ ဒီးဘၣ်သံ. ဒ်န့ၣ်အသိး ခီဖျိလၢ ပှၤလၢပှၤပှဲၤတဂၤ ဒိကနၣ်တၢ်အဃိ ပှၤခဲလၢာ် ကထူၣ်ဖျဲးထီၣ်လၢ တၢ်ဒဲးဘး ဒီးတၢ်သံ.
ခီဖျိလၢ စီၤအၤဒၣ်အဃိ ပမၤတၢ်ဒဲးဘး ဒီးပဘၣ်သံ. ဘၣ်ဆၣ် ခီဖျိလၢ ယ့ၣ်ၡူးအဃိ ပထူၣ်ဖျဲးထီၣ်လၢ တၢ်ဒဲးဘး ဒီးတၢ်သံ (ကွၢ်လံာ်အဆၢ ၃)
၄. ဘၣ်မနုၤအဃိ ယဟိဝၤယွၤ တပျဲလၢ စီၤအၤဒၣ် အဖိအလံၤလၢ အဒိကနၣ်တၢ်တဖၣ် ဆဲးအိၣ်မူ လီၤထူလီၤယိာ်ဘၣ်လဲၣ်.
၄ ဘၣ်ဆၣ် ဒ်သိး ပကထူၣ်ဖျဲးထီၣ်လၢ တၢ်ဒဲးဘးဒီးတၢ်သံအဂီၢ် မ့ၢ်ယ့ၣ်ၡူး ကဘၣ်ဟဲတူၢ်သံသး လၢပဂီၢ် နီၢ်ကီၢ်ဧါ. ဒီးဘၣ်မနုၤအဃိ ယဟိဝၤယွၤ တပျဲလၢ စီၤအၤဒၣ် အဖိအလံၤလၢ အဒိကနၣ်တၢ်တဖၣ် ဆဲးအိၣ်မူ လီၤထူလီၤယိာ်ဘၣ်လဲၣ်. ဘၣ်သ့ၣ်သ့ၣ် ပကဆိကမိၣ်လၢ ယဟိဝၤယွၤ မ့ၢ်မၤဝဲဒ်န့ၣ်န့ၣ် ကဂ့ၤဝဲသၢၤ. ဘၣ်ဆၣ် ယဟိဝၤယွၤန့ၣ် အကဲပှၤလၢ အစံၣ်ညီၣ်တၢ်တီ ထီဘိအဃိ အတကွၢ်ကပာ်ကွံာ် စီၤအၤဒၣ် အတၢ်ဒဲးဘးဘၣ်.
၅. ဘၣ်မနုၤအဃိ ပနာ်သ့သပှၢ်တၢၢ်လၢ ယဟိဝၤယွၤန့ၣ် အမၤတၢ်လၢ အဘၣ်ထီဘိလဲၣ်.
၅ ယဟိဝၤယွၤ မ့ၢ်တရဲၣ်ကျဲၤဝဲ တၢ်ပှ့ၤက့ၤဘၣ် ဒီးအမ့ၢ်ပျဲလၢ စီၤအၤဒၣ် အဖိအလံၤတဖၣ် ဆဲးအိၣ်မူဘၣ် လီၤထူလီၤယိာ်န့ၣ် ဖျါလီၤဂာ်လၢ အကွၢ်ကပာ်ကွံာ် အတၢ်စံၣ်ညီၣ်တီ. ကစၢ်ယွၤ မ့ၢ်မၤဝဲဒ်န့ၣ်န့ၣ် အကဲပှၤလၢ အတမၤထွဲ အနီၢ်ကစၢ် တၢ်ဘျၢဘၣ်အဃိ ပှၤနာ်န့ၢ်အီၤတသ့ဘၣ်. အဒိ ဘၣ်သ့ၣ်သ့ၣ် ပကဆိကမိၣ်လၢ မ့ၢ်ယဟိဝၤယွၤ ကမၤလၢပှဲၤ အတၢ်အၢၣ်လီၤခဲလၢာ် စ့ၢ်ကီးဧါ. ပတလိၣ် ဘၣ်ယိၣ်တၢ်ဘၣ်. ယဟိဝၤယွၤ မ့ၢ်အၢၣ်လီၤတၢ်န့ၣ် အကမၤလၢပှဲၤထီၣ်ဝဲ သပှၢ်တၢၢ်. ဘၣ်မနုၤအဃိလဲၣ်န့ၣ် ယဟိဝၤယွၤ မၤထွဲဝဲ အတၢ်ဘျၢလၢ အပာ်လီၤဝဲ ဘၣ်ဃးဒီး တၢ်စံၣ်ညီၣ်တီ တုၤဒၣ်လဲာ် အဟ့ၣ်လီၤကွံာ်အဖိခွါ လၢပဂီၢ်အဃိ ပနာ်သ့သပှၢ်တၢၢ်လၢ ယဟိဝၤယွၤ ကမၤတၢ်လၢအဘၣ်ထီဘိ.
၆. တၢ်ပှ့ၤက့ၤန့ၣ် ပာ်ဖျါထီၣ်လၢ ယဟိဝၤယွၤ အဲၣ်ပှၤထဲလဲၣ်. (၁ ယိၤဟၣ် ၄:၉, ၁၀)
၆ ခီဖျိလၢ တၢ်ပှ့ၤက့ၤအဃိ ပသ့ၣ်ညါဘၣ်လၢ ယဟိဝၤယွၤန့ၣ် အကဲပှၤလၢ အစံၣ်ညီၣ်တၢ်တီ. တကးဒံးဘၣ် တၢ်ဂ့ၢ်အရ့ဒိၣ်ကတၢၢ်လၢ ပသ့ၣ်ညါဘၣ်န့ၣ်ကဲဝဲ ယဟိဝၤယွၤန့ၣ်မ့ၢ်ဝဲ တၢ်အဲၣ်. ဒီးခီဖျိလၢ ယဟိဝၤယွၤ အဲၣ်ပှၤအဃိ အဟ့ၣ်လီၤပှၤ အဖိခွါ ဒ်သိး အကတူၢ်သံအသးလၢပဂီၢ်. (ယိၤ ၃:၁၆; ဖး ၁ ယိၤဟၣ် ၄:၉, ၁၀.) တၢ်ပှ့ၤက့ၤန့ၣ် အပာ်ဖျါထီၣ်ဝဲ ယဟိဝၤယွၤ အဲၣ်ဒိးလၢ ပကအိၣ်မူဘၣ် လီၤထူလီၤယိာ် ဒီးအဘၣ်သးလၢ ပကဲထီၣ်ဘၣ် အဟံၣ်ဖိဃီဖိစ့ၢ်ကီး. ဆိကမိၣ်ကွၢ် ဖဲစီၤအၤဒၣ် မၤတၢ်ဒဲးဘး ဝံၤအလီၢ်ခံ ယဟိဝၤယွၤ နီဟးထီၣ်ကွံာ်အီၤလၢ အဟံၣ်ဖိဃီဖိအကျါ. အဃိ ဖဲပအိၣ်ဖျဲၣ်လီၤအခါ ပတကဲဘၣ် ယဟိဝၤယွၤ အဟံၣ်ဖိဃီဖိဘၣ်. ဘၣ်ဆၣ် ခီဖျိလၢ တၢ်ပှ့ၤက့ၤအဃိ ပှၤဟီၣ်ခိၣ်ဖိလၢ အစူၢ်က့ၤနာ်က့ၤ ယဟိဝၤယွၤ ဒီးဒိကနၣ်အကလုၢ်န့ၣ် ယဟိဝၤယွၤ ပျၢ်ကွံာ်အဝဲသ့ၣ် အတၢ်ကမၣ် ဒီးလၢခံအဝဲသ့ၣ် ကကဲထီၣ်ဘၣ် ယဟိဝၤယွၤ အဟံၣ်ဖိဃီဖိ. တကးဒံးဘၣ် ခဲအံၤပဝဲစ့ၢ်ကီး ယဟိဝၤယွၤ ပျၢ်ကွံာ်ပတၢ်ကမၣ် ဒီးပတၢ်ရ့လိာ်သးဒီးအီၤ ဒီးဒီပုၢ်ဝဲၢ်မုၣ်ခွါတဖၣ် ဂ့ၤထီၣ်ဝဲ. အဃိ ပတဲသ့သပှၢ်တၢၢ်လၢ ယဟိဝၤယွၤ အဲၣ်ပှၤနီၢ်ကီၢ်.—ရိ ၅:၁၀, ၁၁.
၇. ဖဲယ့ၣ်ၡူးတူၢ်ဘၣ် တၢ်မၤအၢမၤနးအခါ ပနၢ်ပၢၢ်ထီၣ်လၢ ယဟိဝၤယွၤ အဲၣ်ပှၤထဲလဲၣ်.
၇ ပမ့ၢ်ဆိကမိၣ်ထံ ဘၣ်ဃးဒီး ဖဲယဟိဝၤယွၤ ရဲၣ်ကျဲၤန့ၢ်ပှၤ တၢ်ပှ့ၤက့ၤအခါ အဘၣ်တူၢ်ဆါအသး ထဲလဲၣ်အဂ့ၢ်န့ၣ် ပကသ့ၣ်ညါဘၣ်လၢ အအဲၣ်ပှၤဒိၣ်မး. မုၣ်ကီၤလံၢ် တဲဝဲလၢ ကစၢ်ယွၤ အခ့အပှၤတဂၤ မ့ၢ်ထံၣ်ဘၣ်ဒီး တၢ်ကီတၢ်ခဲန့ၣ် အတဆဲးတီဒီး ယဟိဝၤယွၤလၢၤဘၣ်. အဃိ ဒ်သိး ယဟိဝၤယွၤ ကပာ်ဖျါထီၣ်လၢ မုၣ်ကီၤလံၢ်တဲတၢ် တဘၣ်ဘၣ်အဂီၢ် တချုးလၢ အဖိကခွါသံဒံးဘၣ်န့ၣ် ယဟိဝၤယွၤ ပျဲဝဲလၢ အကတူၢ်ဘၣ် တၢ်မၤအၢမၤနး. (ဘး ၂:၁-၅; ၁ ပ့း ၂:၂၁) ယဟိဝၤယွၤ ထံၣ်ဘၣ်ဝဲလၢ ပှၤဒုၣ်ဒွဲၣ်ယ့ၣ်ၡူး ဒီးပှၤရိမ့ၤသုးဖိ တီၢ်အီၤ. တကးဒံးဘၣ် ဖဲပှၤပျၤထီ အဖိခွါသးဘိလၢ သ့ၣ်တၢၣ်လိၤ ဒီးပှၤမၤသံအီၤ အၢအၢသီသီအခါ ယဟိဝၤယွၤ ဘၣ်ကွၢ်ဝဲဒ်န့ၣ်လီၤ. (မး ၂၇:၂၈-၃၁, ၃၉) အဒိ ပှၤထီဒါတၢ်တဖၣ် တဲဝဲလၢ “ကစၢ်ယွၤ မ့ၢ်လီကီအီၤန့ၣ် မ်အမၤပူၤဖျဲးအီၤသၢၤ.” (မး ၂၇:၄၂, ၄၃) နီၢ်ကီၢ်န့ၣ် ယဟိဝၤယွၤ အိၣ်ဒီး တၢ်စိတၢ်မီၤလၢ ကမၤပတုာ်ဝဲ တၢ်ကီတၢ်ခဲလၢ အဖိခွါထံၣ်ဘၣ်ဝဲ ဘၣ်ဆၣ် အတမၤဝဲဘၣ်. ယဟိဝၤယွၤ မ့ၢ်မၤပူၤဖျဲးအီၤန့ၣ် ယ့ၣ်ၡူးဟ့ၣ်လီၤ အသးသမူလၢ တၢ်ပှ့ၤက့ၤအဂီၢ် တသ့လၢၤဘၣ်. ဒီးပတၢ်မုၢ်လၢ်စ့ၢ်ကီး တအိၣ်လၢၤဘၣ်. အဃိ ယဟိဝၤယွၤ ပျဲဝဲလၢ အဖိခွါကတူၢ်ဝဲ တၢ်မၤအၢမၤနး တုၤလၢအသံ.
၈. ဖဲယဟိဝၤယွၤ ထံၣ်ပှၤမၤအၢမၤနး အဖိခွါနးမးအခါ အတူၢ်ဘၣ်ဝဲဒ်လဲၣ်. တဲဖျါထီၣ် တၢ်အဒိ. (ကွၢ်စ့ၢ်ကီးတၢ်ဂီၤ.)
၈ ယဟိဝၤယွၤကဲ သ့တၢ်လၢာ်ကစၢ်အဃိ အသးဘၣ်ဒိသ့ဧါ. ယဟိဝၤယွၤ တ့လီၤပှၤဟီၣ်ခိၣ်ဖိဃုာ်ဒီး အတၢ်တူၢ်ဘၣ်. ဒီးလံာ်စီဆှံ တဲဝဲလၢ ယဟိဝၤယွၤ တ့လီၤပှၤဒ်အက့ၢ်အဂီၤ အဃိ အဝဲစ့ၢ်ကီး အိၣ်ဒီးတၢ်တူၢ်ဘၣ်. လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤန့ၣ် အသး “ဘၣ်ဒိ” ဒီး “သးအုး” စ့ၢ်ကီး. (စံး ၇၈:၄၀, ၄၁) အဒိ ဆိကမိၣ်ကွၢ် ဘၣ်ဃးဒီး စီၤအၤဘြၤဟၣ် ဒီးစီၤအံၤစဲးအဂ့ၢ်. ယဟိဝၤယွၤ တဲဘၣ် စီၤအၤဘြၤဟၣ်လၢ အကဘၣ် ဟ့ၣ်လုၢ်ထီၣ် အဖိခွါထဲတဂၤဧိၤ. (၁ မိၤ ၂၂:၉-၁၂; ဧ့ၤ ၁၁:၁၇-၁၉) ဆိကမိၣ်ကွၢ် ဘူးထီၣ်ဖဲ စီၤအၤဘြၤဟၣ် ထုးထီၣ်ဒီ ဒီးကမၤသံအဖိခွါအခါ အသးကဘၣ်ဒိထဲလဲၣ်. ဒ်န့ၣ်အသိး ယဟိဝၤယွၤ စ့ၢ်ကီး ဖဲအထံၣ်ပှၤမၤအၢမၤနး အဖိခွါနးမး တုၤလၢအသံအခါ အသးကဘၣ်ဒိ ဒီးကသးအုးနးမး.—ကွၢ် တၢ်ဂီၤမူလၢ jw.org လၢအခိၣ်တီမ့ၢ် ကွၢ်လိမၤဒိး အဝဲသ့ၣ်အတၢ်နာ်—စီၤအၤဘြၤဟၣ်, အကူာ် ၂.
ဖဲယဟိဝၤယွၤ ဘၣ်ကွၢ်ဝဲ အဖိခွါတူၢ်တၢ်နးမးအခါ အသးဘၣ်ဒိဒိၣ်မး (ကွၢ်လံာ်အဆၢ ၈)
၉. ဖဲ ရိမ့ၤ ၈:၃၂, ၃၈, ၃၉ န့ၣ် ပသ့ၣ်ညါဘၣ် ယဟိဝၤယွၤ အတၢ်အဲၣ် အဒိၣ်အယိာ်ဒ်လဲၣ်.
၉ ယဟိဝၤယွၤ ဟ့ၣ်ပှၤတၢ်ပှ့ၤက့ၤအဃိ ပသ့ၣ်ညါဘၣ်လၢ အအဲၣ်ပှၤဒိၣ်န့ၢ် ပဘူးပတံၢ် ဒီးပသကိးလၢ ပမုာ်ဒီးအီၤဒိၣ်ကတၢၢ် အဲၣ်ပှၤဒံး. (ဖး ရိမ့ၤ ၈:၃၂, ၃၈, ၃၉.) ဒီးယဟိဝၤယွၤ အဲၣ်ပှၤဒိၣ်န့ၢ် ပအဲၣ်လီၤပနီၢ်ကစၢ်သး စၢၢ်တလၢၢ်ဒံး. အဒိ နအဲၣ်ဒိးအိၣ်မူ လီၤထူလီၤယိာ်ဧါ. ယဟိဝၤယွၤ အဲၣ်ဒိးလၢ နကအိၣ်မူဘၣ် လီၤထူလီၤယိာ် အါန့ၢ်နၤဒံး. နအဲၣ်ဒိးလၢ နတၢ်ကမၣ် ကပျၢ်ကွံာ်ဧါ. ယဟိဝၤယွၤ အဲၣ်ဒိးပျၢ်ကွံာ် နတၢ်ကမၣ်အါန့ၢ်ဒံး နအဲၣ်ဒိးလၢ နတၢ်ကမၣ်ကပျၢ်ကွံာ်ဒံး. အဃိ ဒ်သိးပကဒိးန့ၢ်ဘၣ် တၢ်ဆိၣ်ဂ့ၤတဖၣ်အံၤအဂီၢ် ယဟိဝၤယွၤ ဃ့ပှၤထဲလၢ ပကတူၢ်လိာ် တၢ်ပှ့ၤက့ၤ, စူၢ်က့ၤနာ်က့ၤအီၤ ဒီးဒိကနၣ်အကလုၢ်. ဒီးတၢ်ပှ့ၤက့ၤန့ၣ် အမ့ၢ်တၢ်ဟ့ၣ် လုၢ်ဒိၣ်ပှ့ၤဒိၣ်တခါလၢ အပာ်ဖျါထီၣ်လၢ ယဟိဝၤယွၤ အဲၣ်ပှၤဒိၣ်မး. တကးဒံးဘၣ် လၢဟီၣ်ခိၣ်သီန့ၣ် ပကမၤလိဘၣ် ယဟိဝၤယွၤ အတၢ်အဲၣ် အါန့ၢ်ခဲအံၤဒံး.—စံၣ် ၃:၁၁.
ခီဖျိလၢ တၢ်ပှ့ၤက့ၤအဃိ ပသ့ၣ်ညါထီၣ်ဘၣ် ယ့ၣ်ၡူးအဂ့ၢ်
၁၀. (က) ဖဲပှၤကမၤသံ ယ့ၣ်ၡူးအခါ အဘၣ်ယိၣ်တၢ်လၢ မနုၤအဂီၢ်လဲၣ်. (ခ) ယ့ၣ်ၡူး ပာ်စီဆှံ ယဟိဝၤယွၤ အမံၤဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ ယ့ၣ်ၡူးသးတီ တုၤလၢအသံအဃိ အပာ်စီဆှံ ယဟိဝၤယွၤအမံၤ.”)
၁၀ ယ့ၣ်ၡူးဒီသဒၢ အပါအမံၤဂ့ၤသၣ်ဂ့ၤ. (ယိၤ ၁၄:၃၁) ယ့ၣ်ၡူးန့ၣ် ပှၤစံၣ်ညီၣ်သံအီၤဒ် ပှၤအၢပှၤသီတဂၤလၢ အတဲအၢတဲသီ ကစၢ်ယွၤ ဒီးအတပာ်ကဲ ကစၢ်ယွၤဘၣ်အဃိ အဝဲဘၣ်ယိၣ်လၢ အပါမံၤကဟးဂီၤ. အဃိ ယ့ၣ်ၡူး ဃ့ထုကဖၣ်လၢ “ပါဧၢ, မ့ၢ်သ့န့ၣ် ထုးထီၣ်ကွံာ်ခွးအံၤ လၢယအိၣ်တက့ၢ်.” (မး ၂၆:၃၉) ဘၣ်ဆၣ် မ့ၢ်လၢ ယ့ၣ်ၡူးတီဒီး ယဟိဝၤယွၤ တုၤလၢအသံအဃိ အပာ်ဖျါထီၣ်ဝဲလၢ မုၣ်ကီၤလံၢ် တဲလံၣ်တၢ် ဘၣ်ဃးဒီး ယဟိဝၤယွၤအမံၤ.
၁၁. ယ့ၣ်ၡူး အဲၣ်ပှၤဟီၣ်ခိၣ်ဖိဒိၣ်မးန့ၣ် အပာ်ဖျါထီၣ်ဝဲဒ်လဲၣ်. (ယိၤဟၣ် ၁၃:၁)
၁၁ ခီဖျိလၢ တၢ်ပှ့ၤက့ၤအဃိ ပသ့ၣ်ညါဘၣ်လၢ ယ့ၣ်ၡူးသးအိၣ် ပှၤဟီၣ်ခိၣ်ဖိဒိၣ်မး လီၤဆီဒၣ်တၢ် အပျဲၢ်အဘီၣ်တဖၣ်. (ကတိၤ ၈:၃၁; ဖး ယိၤဟၣ် ၁၃:၁.) အဒိ ယ့ၣ်ၡူး သ့ၣ်ညါပာ်စၢၤဝဲလၢ ဖဲအအိၣ်လၢ ဟီၣ်ခိၣ်ချၢအခါ အကထံၣ်ဘၣ်ဒီး တၢ်ကီတၢ်ခဲ လၢအနးတနီၤ. ဒီးတၢ်ကီတၢ်ခဲလၢ အနးကတၢၢ် တခါန့ၣ်မ့ၢ်ဝဲ ပှၤကမၤသံအီၤ အၢအၢသီသီ. သနာ်က့ ယ့ၣ်ၡူး မၤလၢပှဲၤအမူဒါန့ၣ် တမ့ၢ်ထဲလၢ ယဟိဝၤယွၤ မၢအီၤအဃိဘၣ်. မ့ၢ်လၢအအဲၣ် ပှၤဟီၣ်ခိၣ်ဖိဒိၣ်မးအဃိ အစံၣ်တဲၤတဲလီၤတၢ်, အသိၣ်လိတၢ် ဒီးမၤစၢၤပှၤဂၤ လၢအသးဒီဖျၢၣ်. ဒီးဖဲယ့ၣ်ၡူး ကသံတနံၤန့ၣ် အသ့န့ၢ် အတၢ်မၢဖိတဖၣ်အခီၣ်, သိၣ်လိအဝဲသ့ၣ်, ဟ့ၣ်ဂံၢ်ဟ့ၣ်ဘါ အဝဲသ့ၣ် ဒီးမၤမုာ်ထီၣ် အဝဲသ့ၣ်အသး. (ယိၤ ၁၃:၁၂-၁၅) ဝံၤဒီး ပှၤပျၤထီအီၤလၢ သ့ၣ်တၢၣ်လိၤ ဒီးအဘၣ်တူၢ်တၢ်နးမး သနာ်က့ အတဲတၢ်ဒီး ပှၤအၢပှၤသီလၢ အကပၤတဂၤ ဒီးအၢၣ်လီၤအီၤလၢ အကအိၣ်ဘၣ်လၢ ပၤရဒံစူးအပူၤ. တကးဒံးဘၣ် အမၢစီၤယိၤဟၣ် ကွၢ်ထွဲန့ၢ်အမိ. (လူၤ ၂၃:၄၂, ၄၃; ယိၤ ၁၉:၂၆, ၂၇) ယ့ၣ်ၡူး အဲၣ်ပှၤဟီၣ်ခိၣ်ဖိဒိၣ်မးန့ၣ် အတပာ်ဖျါထီၣ်ဝဲထဲ အတူၢ်သံသးတခါဘၣ်. အပာ်ဖျါထီၣ်စ့ၢ်ကီးဝဲ ခီဖျိ အရ့ဒီး ပှၤဟီၣ်ခိၣ်ဖိလၢ တၢ်အဲၣ်တၢ်ကွံ ဒီးတၢ်သးကညီၤ.
၁၂. ခဲအံၤ ယ့ၣ်ၡူး ဆဲးမၤန့ၢ်ပှၤ မနုၤဒံးလဲၣ်.
၁၂ ယ့ၣ်ၡူး တူၢ်သံအသး လၢပဂီၢ် “ထဲတဘျီ” သနာ်က့ ခဲအံၤ အဆဲးမၤန့ၢ်ပှၤ တၢ်လၢအဂ့ၤအါမးဒံး. (ရိ ၆:၁၀) အမၤန့ၢ်ပှၤ မနုၤလဲၣ်. ခဲအံၤ ယ့ၣ်ၡူး ကဲဝဲပစီၤပၤ, တၢ်အိၣ်ဖှိၣ်အခိၣ် ဒီးပှၤလုၢ်တၢ်ခိၣ်အဒိၣ်ကတၢၢ်. (၁ ကရံၣ် ၁၅:၂၅; အ့း ၅:၂၃; ဧ့ၤ ၂:၁၇) အတီခိၣ်ရိၤမဲ တၢ်ရဲၣ်တၢ်ကျဲၤလၢ ကပာ်ဖှိၣ်ထီၣ် ပှၤဘၣ်တၢ်ဒိးဖှူအီၤ ဒီးပာ်ဖှိၣ်ထီၣ်စ့ၢ်ကီး ပှၤဂီၢ်မုၢ်ဖးဒိၣ်. ဒီးတၢ်ရဲၣ်တၢ်ကျဲၤအံၤ ကဝံၤဝဲ တချုး တၢ်နးတၢ်ဖှီၣ်ဖးဒိၣ် ကတၢၢ်ဒံးဘၣ်အခါ. b (မး ၂၅:၃၂; မၢ် ၁၃:၂၇) တကးဒံးဘၣ် အမၤစၢၤဝဲ ကုၢ်လၢအတီ ဒီးအကူၣ်တၢ်သ့ ဒ်သိး ကဒုးအီၣ်ပှၤ နီၢ်သးတၢ်အီၣ် ဖဲမုၢ်နံၤခံကတၢၢ်တဖၣ် အတီၢ်ပူၤ. (မး ၂၄:၄၅) ဒီးခါဆူညါ ဖဲအပၢတၢ် အနံၣ်တကထိ အဆၢကတီၢ်န့ၣ် အကဆဲးမၤန့ၢ်တၢ်လၢပဂီၢ်. ပထံၣ်ဘၣ်လၢ ခီဖျိလၢ ယ့ၣ်ၡူး ဟ့ၣ်လီၤအသးလၢပဂီၢ် လၢာ်လၢာ်ဆ့ဆ့အဃိ အကဲဝဲ တၢ်ဟ့ၣ်အလုၢ်ဒိၣ်ပှ့ၤဒိၣ် လၢယဟိဝၤယွၤ ဟ့ၣ်လီၤပှၤ.
ဆဲးမၤလိအါထီၣ်တၢ်ထီဘိ
၁၃. ပဆဲးမၤလိအါထီၣ် ဘၣ်ဃးဒီး ယဟိဝၤယွၤ ဒီးယ့ၣ်ၡူး အတၢ်အဲၣ်လၢပဂီၢ် သ့ဒ်လဲၣ်.
၁၃ နမ့ၢ်ဆဲးမၤလိ ဒီးဆိကမိၣ်ထံ ဘၣ်ဃးဒီး ယဟိဝၤယွၤ ဒီးယ့ၣ်ၡူးခရံာ် အတၢ်အဲၣ်န့ၣ် နကသ့ၣ်ညါအါထီၣ်ဘၣ် တၢ်ဂ့ၢ်အါမး. အဃိ တနံၣ်အံၤ ဖဲတၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး တလါန့ၣ် ဖးဒီးဆိကမိၣ်ထံအါထီၣ် လံာ်တၢ်သးခုကစီၣ် အကတြူၢ်တနီၤ. ဒီးဖဲနဖးအခါ တဘၣ်ဖး လံာ်အဆၢဒိၣ် အါဆၢတဂ့ၤ. ဖးအီၤကယီကယီ ဒီးဆိကမိၣ်ထံအါထီၣ် တၢ်ဂ့ၢ်လၢ ဘၣ်မနုၤအဃိ ပကြၢးအဲၣ် ယဟိဝၤယွၤ ဒီးယ့ၣ်ၡူးလဲၣ်. တကးဒံးဘၣ် တဲဘၣ်ပှၤဂၤဘၣ်ဃးဒီး တၢ်ဂ့ၢ်လၢ နမၤလိဘၣ်တဖၣ်.
၁၄. ပတၢ်ကရၢကရိ လံာ်လဲၢ်တဖၣ်န့ၣ် မၤစၢၤပှၤဒ်သိး ပဃုသ့ၣ်ညါအါထီၣ် တၢ်ပှ့ၤက့ၤအဂ့ၢ် ဒီးတၢ်သိၣ်လိလၢအဂၤတဖၣ် ကသ့ဒ်လဲၣ်. (စံးထီၣ်ပတြၢၤ ၁၁၉:၉၇) (ကွၢ်စ့ၢ်ကီးတၢ်ဂီၤ.)
၁၄ နမ့ၢ်အိၣ်လၢ တၢ်မ့ၢ်တၢ်တီအပူၤ ဖးယံာ်လံန့ၣ် ဘၣ်သ့ၣ်သ့ၣ် နကဆိကမိၣ်လၢ ယမ့ၢ်မၤလိအါထီၣ် ဘၣ်ဃးဒီး ယဟိဝၤယွၤ အတၢ်တီတၢ်လိၤ, အတၢ်အဲၣ် ဒီးတၢ်ပှ့ၤက့ၤအဂ့ၢ်န့ၣ် မ့ၢ်ယကသ့ၣ်ညါအါထီၣ် တၢ်ဂ့ၢ်အသီတမံၤမံၤဧါ. နီၢ်ကီၢ်န့ၣ် ပမ့ၢ်ဆဲးမၤလိ တၢ်ဂ့ၢ်တဖၣ်အံၤထီဘိမး ပကသ့ၣ်ညါအါထီၣ် တၢ်ဂ့ၢ်အသီ. အဃိ ဖးဒီးဃုသ့ၣ်ညါအါထီၣ် တၢ်ဂ့ၢ်လၢ အအိၣ်လၢ ပတၢ်ကရၢကရိ လံာ်လဲၢ်အပူၤ. ဒီးဖဲနဖးလံာ်စီဆှံအခါ နမ့ၢ်ထံၣ်တၢ်ဂ့ၢ်တမံၤမံၤလၢ နတနၢ်ပၢၢ်အီၤ လီၤတံၢ်လီၤဆဲးဘၣ်န့ၣ် ဆဲးဃုသ့ၣ်ညါအါထီၣ်အီၤ. ဝံၤဒီး လၢဒီတနံၤအတီၢ်ပူၤန့ၣ် ဆိကမိၣ်ထံ တၢ်ဂ့ၢ်လၢနမၤလိဘၣ် ဘၣ်ဃးဒီး ယဟိဝၤယွၤဒီးအဖိခွါ အတၢ်အဲၣ်လၢနဂီၢ်.—ဖး စံးထီၣ်ပတြၢၤ ၁၁၉:၉၇ ဒီးတၢ်ဂ့ၢ်အဘျဲၣ်.
ပမ့ၢ်အိၣ်လၢ တၢ်မ့ၢ်တၢ်တီအပူၤ ဖးယံာ်လံသနာ်က့ ပဆဲးမၤလိအါထီၣ် တၢ်ဂ့ၢ်အသီ ဘၣ်ဃးဒီး တၢ်ပှ့ၤက့ၤသ့ဒံး ဒီးပမ့ၢ်မၤဒ်န့ၣ်န့ၣ် ပကပာ်လုၢ်ပာ်ပှ့ၤအါထီၣ်တၢ်လၢ ယဟိဝၤယွၤ ဒီးယ့ၣ်ၡူး မၤန့ၢ်ပှၤ (ကွၢ်လံာ်အဆၢ ၁၄)
၁၅. ဘၣ်မနုၤအဃိ ပကဘၣ်ဆဲး ဃုသ့ၣ်ညါအါထီၣ် တၢ်လုၢ်ဒိၣ်ပှ့ၤဒိၣ်လၢ လံာ်စီဆှံအပူၤလဲၣ်.
၁၅ ဖဲနဖးလံာ်စီဆှံ ဒီးဃုသ့ၣ်ညါအါထီၣ်တၢ် တဘျီဂ့ၤတဘျီဂ့ၤအခါ နမ့ၢ်တထံၣ်န့ၢ် တၢ်ဂ့ၢ်အသီ မ့တမ့ၢ် အလီၤထုးန့ၢ်သး တမံၤမံၤဘၣ်သနာ်က့ တဘၣ်သးဆံးတဂ့ၤ. ဆိကမိၣ်လီၤနသးလၢ နကဲပှၤတဂၤလၢ အဂုာ်ကျဲးစၢးဃု တၢ်လုၢ်ဒိၣ်ပှ့ၤဒိၣ် ဒ်သိးဒီးထူ. ဒ်သိး ပှၤလၢအဃုထူတဂၤ ကထံၣ်န့ၢ်ထူအဂီၢ် ညီနုၢ်န့ၣ် အတၢ်ဆၢကတီၢ် ကလၢာ်ဝဲ တဘျုးနၣ်ရံၣ် ဒီးတဘျုးသီညါ. ဘၣ်ဆၣ် အတဟ့ၣ်အၡူဘၣ် ဒီးထူကိၣ်လိၣ် မ့ၢ်ဆံးသနာ်က့ အလုၢ်ဒိၣ်ပှ့ၤဒိၣ် လၢအဂီၢ်အဃိ အဆဲးဃုဝဲလၢ တၢ်ဝံသးစူၤအပူၤ. လံာ်စီဆှံ အတၢ်မ့ၢ်တၢ်တီ အသီတခါဂ့ၤ တခါဂ့ၤလၢ ပသ့ၣ်ညါဘၣ်န့ၣ် အလုၢ်ဒိၣ်ပှ့ၤဒိၣ်န့ၢ်ဒံးထူ စၢၢ်တလၢၢ်. (စံး ၁၁၉:၁၂၇; ကတိၤ ၈:၁၀) အဃိ ဆဲးဖးလံာ်စီဆှံ ဒီးဆဲးဃုသ့ၣ်ညါအါထီၣ် တၢ်ဂ့ၢ်လၢအသီထီဘိ.—စံး ၁:၂.
၁၆. ပကွၢ်လိ ယဟိဝၤယွၤ ဒီးယ့ၣ်ၡူး ကသ့ဒ်လဲၣ်.
၁၆ ဖဲနမၤလိတၢ်အခါ ဆိကမိၣ် ဘၣ်ဃးဒီး နကမၤထွဲတၢ်ဂ့ၢ်လၢ နမၤလိဘၣ်တဖၣ် လၢနတၢ်အိၣ်မူပူၤဒ်လဲၣ်. အဒိ ပကွၢ်လိယဟိဝၤယွၤ အတၢ်တီတၢ်လိၤ သ့ခီဖျိ ပရ့ဒီးပှၤဂၤတီတီလိၤလိၤ. ဒီးပကွၢ်လိယ့ၣ်ၡူး အတၢ်အဲၣ်လၢ အပါဒီးပှၤဂၤအဂီၢ် သ့ခီဖျိ ပသးအိၣ်တူၢ်ဆါပသး ဒ်သိးပကမၤ ယဟိဝၤယွၤ အတၢ်ဘၣ်သး ဒီးမၤစၢၤပှၤဂၤ. တကးဒံးဘၣ် ပကွၢ်လိယ့ၣ်ၡူး သ့ခီဖျိ ပတဲဘၣ်ပှၤဂၤလၢ တၢ်သးခုကစီၣ် ဒ်သိး အဝဲသ့ၣ်စ့ၢ်ကီး ကနာ်တၢ်ပှ့ၤက့ၤ ဒီးကအိၣ်ဒီးတၢ်ခွဲးတၢ်ယာ်လၢ ကသ့ၣ်ညါဘၣ်တၢ်လၢ ယဟိဝၤယွၤ မၤန့ၢ်ဝဲလၢ ပှၤဟီၣ်ခိၣ်ဖိအဂီၢ်.
၁၇. တၢ်မၤလိလၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.
၁၇ ပမ့ၢ်မၤလိအါထီၣ် ဘၣ်ဃးဒီး တၢ်ပှ့ၤက့ၤအဂ့ၢ်န့ၣ် ပတၢ်အဲၣ် ယဟိဝၤယွၤဒီးယ့ၣ်ၡူး ကဒိၣ်ထီၣ်အါထီၣ် ဒီးအဝဲသ့ၣ် ကအဲၣ်ပှၤဒိၣ်ထီၣ်စ့ၢ်ကီး. (ယိၤ ၁၄:၂၁; ယၤ ၄:၈) အဃိ ပကဘၣ် ဆဲးမၤလိအါထီၣ် ဘၣ်ဃးဒီး တၢ်ပှ့ၤက့ၤအဂ့ၢ်ထီဘိ. တၢ်မၤလိလၢခံတခါန့ၣ် ပကတဲသကိး ဘၣ်ဃးဒီး တၢ်ဆိၣ်ဂ့ၤလၢပန့ၢ်ဘၣ် ခီဖျိလၢ ယ့ၣ်ၡူးတူၢ်သံသးလၢပဂီၢ်အဃိ ဒီးပပာ်ဖျါထီၣ်က့ၤ တၢ်စံးဘျုးစံးဖှိၣ်လၢ ယဟိဝၤယွၤ အတၢ်အဲၣ် ကသ့ဒ်လဲၣ်အဂ့ၢ်.
တၢ်သးဝံၣ် ၁၀၇ ယွၤပာ်လီၤအဒိလၢအပှဲၤဒီးတၢ်အဲၣ်
a တၢ်ကတိၤအခီပညီ– “တၢ်ဆိကမိၣ်ထံတၢ်” န့ၣ် အခီပညီမ့ၢ်ဝဲ ပဆိကမိၣ် တၢ်ဂ့ၢ်တခါခါ လီၤတံၢ်လီၤဆဲး ဒီးဂုာ်ကျဲးစၢး နၢ်ပၢၢ်အါထီၣ် တၢ်ဂ့ၢ်အံၤ.
b တၢ်ရဲၣ်တၢ်ကျဲၤ ဘၣ်ဃးဒီး တၢ်ပာ်ဖှိၣ် “တၢ်အိၣ်လၢမူခိၣ်” လၢစီၤပီလူး တဲဖျါထီၣ်ဝဲဖဲ အ့းဖ့းစူး ၁:၁၀ န့ၣ် အလီၤဆီန့ၢ်ဒံး တၢ်ပာ်ဖှိၣ် “ပှၤလၢအဘၣ် တၢ်ဃုထၢအီၤတဖၣ်” လၢယ့ၣ်ၡူးတဲဝဲဖဲ မးသဲ ၂၄:၃၁ ဒီး မၢ်ကူး ၁၃:၂၇. စီၤပီလူးန့ၣ် အတဲ ဘၣ်ဃးဒီး ပှၤလၢယဟိဝၤယွၤ ဒိးဖှူဝဲလၢအသးစီဆှံ ဒီး ဃုထၢထီၣ်ဝဲ လၢကပၢဃုာ်တၢ်ဒီး ယ့ၣ်ၡူး. မ့မ့ၢ် ယ့ၣ်ၡူးန့ၣ် အတဲ ဘၣ်ဃးဒီး တၢ်ပာ်ဖှိၣ်ထီၣ် ပှၤဘၣ်တၢ်ဒိးဖှူအီၤလၢ အအိၣ်ဒံးလၢ ဟီၣ်ခိၣ်ချၢ ဖဲတၢ်နးတၢ်ဖှီၣ်ဖးဒိၣ် အဆၢကတီၢ်.
