တၢ်မၤလိ ၅
တၢ်သးဝံၣ် ၁၀၈ ယွၤအတၢ်အဲၣ်လၢအတီ
ခီဖျိလၢ ယဟိဝၤယွၤ အတၢ်အဲၣ်အဃိ ပဒိးန့ၢ်ဘၣ် အဘျုးအါမး
“ယ့ၣ်ၡူးခရံာ် ဟဲလီၤလၢ ဟီၣ်ခိၣ်ချၢန့ၣ် မ့ၢ်ဒ်သိး ကအုၣ်က့ၤခီၣ်က့ၤ ပှၤတၢ်ဒဲးဘးဖိအဂီၢ်.”—၁ တံၤ ၁:၁၅.
တၢ်ဂ့ၢ်မိၢ်ပှၢ်
ခီဖျိလၢ တၢ်ပှ့ၤက့ၤအဃိ ပဒိးန့ၢ်ဘၣ်အဘျုးဒ်လဲၣ် ဒီးပစံးဘျုးစံးဖှိၣ်က့ၤ ယဟိဝၤယွၤ ကသ့ဒ်လဲၣ်.
၁. ပမၤသးခု ယဟိဝၤယွၤသး ကသ့ဒ်လဲၣ်.
ဆိကမိၣ်ကွၢ်လၢ နဟ့ၣ် ပှၤလၢနအဲၣ်တဂၤ တၢ်ဟ့ၣ်လၢအဂ့ၤ ဒီးအကဲဘျုးတခါ. ဘၣ်ဆၣ် အမ့ၢ်တသူဝဲဘၣ် ဒီးပာ်ဃာ်ဝဲ ဒ်န့ၣ်န့ၣ် နသးကဘၣ်ဒိထဲလဲၣ်. သနာ်က့ အမ့ၢ် သူတၢ်ဟ့ၣ်အံၤ ဒီးစံးဘျုးက့ၤနၤန့ၣ် နကသးခုဒိၣ်မး. တၢ်အဒိတခါအံၤ အဘၣ်ထွဲလိာ်သးဒီး ယဟိဝၤယွၤ အတၢ်ဟ့ၣ် လၢအမ့ၢ် တၢ်ပှ့ၤက့ၤဒ်လဲၣ်. ယဟိဝၤယွၤ ဟ့ၣ်လီၤပှၤအဖိခွါလၢ ကတူၢ်သံသးလၢပဂီၢ်. အဃိ ပမ့ၢ်စံးဘျုးစံးဖှိၣ်က့ၤ ယဟိဝၤယွၤ ခီဖျိလၢ အအဲၣ်ပှၤ ဒီးအဟ့ၣ်ပှၤ တၢ်ဟ့ၣ်အလုၢ်ဒိၣ်ပှ့ၤဒိၣ် လၢအမ့ၢ်တၢ်ပှ့ၤက့ၤန့ၣ် အကသးခုဒိၣ်မး.—ယိၤ ၃:၁၆; ရိ ၅:၇, ၈.
၂. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.
၂ ဘၣ်ဆၣ် တၢ်ဆၢကတီၢ် ယံာ်ထီၣ်ဘျီ တၢ်ဟ့ၣ်လၢအမ့ၢ် တၢ်ပှ့ၤက့ၤန့ၣ် ဘၣ်သ့ၣ်သ့ၣ် ပတပာ်လုၢ်ပာ်ပှ့ၤအီၤ ဒ်သိးလၢညါလၢၤဘၣ်. ပသးခုလၢ ပဒိးန့ၢ်ဘၣ် တၢ်ဟ့ၣ်အံၤ ဘၣ်ဆၣ် ပမ့ၢ်တသူအီၤဘၣ်န့ၣ် လီၤဂာ်ဒ်သိးဒီး ပတပာ်လုၢ်ပာ်ပှ့ၤ တၢ်ဟ့ၣ်အံၤဘၣ် ဒီးပပာ်အီၤလၢ တၢ်လီၢ်တတီၤတီၤ ဒီးပတနီၣ်ဘၣ်အီၤလၢၤဘၣ်. ဒ်သိး ပတမၤဒ်န့ၣ် တဂ့ၤအဂီၢ် ပကဘၣ် ဆိကမိၣ်ထီၣ်က့ၤ တၢ်လၢ ယဟိဝၤယွၤ ဒီးယ့ၣ်ၡူး မၤန့ၢ်လၢပဂီၢ်ထီဘိ. ဒီးတၢ်မၤလိတခါအံၤ ကမၤစၢၤပှၤဒ်သိး ပကစံးဘျုးက့ၤ အဝဲသ့ၣ်. ခဲအံၤ ပကတဲသကိး ဘၣ်ဃးဒီး ဆၢကတီၢ်ခဲအံၤ ပဒိးန့ၢ်ဘၣ်အဘျုးလၢ တၢ်ပှ့ၤက့ၤဒ်လဲၣ် ဒီးခါဆူညါစ့ၢ်ကီး ပကဒိးန့ၢ်ဘၣ် အဘျုးဒ်လဲၣ်. တကးဒံးဘၣ် ပပာ်ဖျါထီၣ် တၢ်စံးဘျုးစံးဖှိၣ်က့ၤ ယဟိဝၤယွၤ အတၢ်အဲၣ်, လီၤဆီဒၣ်တၢ် ဖဲတၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး တလါန့ၣ် ကသ့ဒ်လဲၣ်န့ၣ် ပကသ့ၣ်ညါဘၣ်စ့ၢ်ကီး.
ခီဖျိလၢ တၢ်ပှ့ၤက့ၤအဃိ ခဲအံၤပဒိးန့ၢ်ဘၣ် အဘျုးဒ်လဲၣ်
၃. ခီဖျိလၢ တၢ်ပှ့ၤက့ၤအဃိ ခဲအံၤပဒိးန့ၢ်ဘၣ် အဘျုးဒ်လဲၣ်.
၃ ခီဖျိလၢ တၢ်ပှ့ၤက့ၤအဃိ ခဲအံၤပဒိးန့ၢ်ဘၣ် အဘျုးအါမး. အဒိ ခီဖျိလၢ တၢ်ပှ့ၤက့ၤအဃိ ယဟိဝၤယွၤ ပျၢ်ကွံာ်ပတၢ်ဒဲးဘး. နီၢ်ကီၢ်န့ၣ် ယဟိဝၤယွၤ တလိၣ်ပျၢ်ကွံာ် ပတၢ်ကမၣ်ဘၣ် ဘၣ်ဆၣ် အပျၢ်ကွံာ်ပတၢ်ကမၣ်. ဘၣ်ဃးဒီးတၢ်ဂ့ၢ်အံၤ ပှၤကွဲးထါစံးထီၣ်ပတြၢၤတဂၤ ပာ်ဖျါထီၣ် တၢ်စံးဘျုးစံးဖှိၣ် ဒီးတဲဝဲလၢ “အိ ယဟိဝၤယွၤဧၢ, နမ့ၢ်ပှၤလၢအဂ့ၤ ဒီးပျၢ်ကွံာ်တၢ်ကမၣ်ညီ.”—စံး ၈၆:၅; ၁၀၃:၃, ၁၀-၁၃.
၄. ယဟိဝၤယွၤ ကတဲာ်ကတီၤ တၢ်ပှ့ၤက့ၤလၢ မတဂၤအဂီၢ်လဲၣ်. (လူၤကၣ် ၅:၃၂; ၁ တံၤမသ့း ၁:၁၅)
၄ ပှၤတနီၤ ဆိကမိၣ်ဝဲလၢ ယဟိဝၤယွၤ တကြၢးပျၢ်ကွံာ် အတၢ်ကမၣ်ဘၣ်. နီၢ်ကီၢ်န့ၣ် ယဟိဝၤယွၤ တကြၢးပျၢ်ကွံာ် ပတၢ်ကမၣ် နီတဂၤဘၣ်. အဒိ တၢ်မၢဖိပီလူး သ့ၣ်ညါလီၤအသး ဒီးတဲဝဲလၢ ပှၤ “တကြၢးကိးယၤလၢ တၢ်မၢဖိတဂၤဘၣ်.” ဘၣ်ဆၣ် အဆဲးတဲဝဲလၢ “ခီဖျိလၢ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်အဃိ ယမ့ၢ်တၢ်မၢဖိတဂၤ.” (၁ ကရံၣ် ၁၅:၉, ၁၀) ဒီးဖဲပပီၢ်ယၢ်လီၤက့ၤသးအခါ ယဟိဝၤယွၤ ပျၢ်ကွံာ်ပတၢ်ကမၣ်. ဘၣ်မနုၤအဃိလဲၣ်. ယဟိဝၤယွၤ ပျၢ်ကွံာ်ပတၢ်ကမၣ်န့ၣ် ခီဖျိလၢ အအဲၣ်ပှၤအဃိ ဒီးတမ့ၢ်လၢ အကဘၣ် ပျၢ်ကွံာ်ပတၢ်ကမၣ် အဃိဘၣ်. အဃိ နမ့ၢ်သးအုး ဒီးဆိကမိၣ်လၢ ယဟိဝၤယွၤ တကြၢးပျၢ်ကွံာ် နတၢ်ကမၣ်ဘၣ်န့ၣ် နကဘၣ် သ့ၣ်နီၣ်ထီၣ်လၢ ယဟိဝၤယွၤ ကတဲာ်ကတီၤဝဲ တၢ်ပှ့ၤက့ၤလၢ ပှၤတၢ်ဒဲးဘးဖိလၢ အပီၢ်ယၢ်လီၤက့ၤသးအဂီၢ်, တမ့ၢ်လၢ ပှၤလၢပှၤပှဲၤအဂီၢ်ဘၣ်.—ဖး လူၤကၣ် ၅:၃၂; ၁ တံၤမသ့း ၁:၁၅.
၅. ဘၣ်မနုၤအဃိ ပတကြၢး ဆိကမိၣ်လၢ ယဟိဝၤယွၤ ကဘၣ်ပျၢ်ကွံာ် ပတၢ်ကမၣ်ဘၣ်လဲၣ်.
၅ ပမၤဘၣ် ယဟိဝၤယွၤ အတၢ်မၤ လၢအနံၣ်အါမးအဃိ ပတကြၢး ဆိကမိၣ်လၢ ယဟိဝၤယွၤ ကဘၣ်ပျၢ်ကွံာ် ပတၢ်ကမၣ်ဘၣ်. ပမၤအတၢ်မၤလၢ တၢ်သးတီအပူၤန့ၣ် အပာ်လုၢ်ပာ်ပှ့ၤဝဲ. (ဧ့ၤ ၆:၁၀) ယဟိဝၤယွၤ ဟ့ၣ်ပှၤတၢ်ပှ့ၤက့ၤ ဒ်သိးဒီး တၢ်ဟ့ၣ်ခီလီတခါ ဒီးတမ့ၢ် တၢ်အဘူးအလဲလၢ ပမၤအတၢ်မၤ အဃိဘၣ်. ပမ့ၢ်ဆိကမိၣ်လၢ ပမၤအတၢ်မၤအါမး အဃိ အကြၢးပျၢ်ပတၢ်ကမၣ်န့ၣ် ပတၢ်ဆိကမိၣ်အံၤ ကမၣ်လံ. ပမ့ၢ်ဆိကမိၣ် ဒ်န့ၣ်န့ၣ် လီၤဂာ်ဒ်သိးဒီး ပတဲလၢ ယ့ၣ်ၡူးတူၢ်သံအသးန့ၣ် အကဲ တၢ်ကလီကလီလီၤ.—ထိၣ်သတြီၤဒီး ကလၤတံ ၂:၂၁.
၆. ဘၣ်မနုၤအဃိ စီၤပီလူး မၤယဟိဝၤယွၤ အတၢ်မၤ ဆူၣ်ဆူၣ်လဲၣ်.
၆ စီၤပီလူး သ့ၣ်ညါဝဲလၢ အဒိးန့ၢ်ဘၣ် ယဟိဝၤယွၤ အတၢ်ဘၣ်သးန့ၣ် တမ့ၢ်ခီဖျိလၢ အမၤယဟိဝၤယွၤ အတၢ်မၤ အါထဲလဲၣ်အဃိဘၣ်. ဘၣ်ဆၣ် ဘၣ်မနုၤအဃိ အမၤဒံး ယဟိဝၤယွၤ အတၢ်မၤ ဆူၣ်ဆူၣ်လဲၣ်. အမၤဝဲဒ်အံၤန့ၣ် မ့ၢ်လၢ အအဲၣ်ဒိး စံးဘျုးစံးဖှိၣ်က့ၤ ယဟိဝၤယွၤ လၢအပာ်ဖျါထီၣ် တၢ်သးကညီၤ ဒိၣ်ဒိၣ်မုၢ်မုၢ် လၢအဖီခိၣ်အဃိ. (အ့း ၃:၇) ဒ်စီၤပီလူးအသိး ပမၤယဟိဝၤယွၤ အတၢ်မၤဆူၣ်ဆူၣ်န့ၣ် တမ့ၢ်ခီဖျိလၢ ပအဲၣ်ဒိး ဒိးန့ၢ်ဘၣ် ယဟိဝၤယွၤ အတၢ်သးကညီၤ အဃိဘၣ်. ခီဖျိလၢ ပအဲၣ်ဒိး စံးဘျုးစံးဖှိၣ်က့ၤအီၤအဃိ ပမၤအတၢ်မၤဆူၣ်ဆူၣ်.
၇. တၢ်အဘျုး အဂၤတမံၤ လၢပဒိးန့ၢ်ဘၣ် ခဲအံၤန့ၣ် မ့ၢ်မနုၤလဲၣ်. (ရိမ့ၤ ၅:၁; ယၤကိာ် ၂:၂၃)
၇ ခီဖျိလၢ တၢ်ပှ့ၤက့ၤအဃိ တၢ်အဘျုး အဂၤတမံၤ လၢပဒိးန့ၢ်ဘၣ် ခဲအံၤန့ၣ်မ့ၢ်ဝဲ ပကဲထီၣ်ဘၣ် ယဟိဝၤယွၤ အသကိး. a ဒ်တၢ်မၤလိလၢ အပူၤကွံာ်တခါ ပာ်ဖျါထီၣ်ဝဲအသိး ဖဲပအိၣ်ဖျဲၣ်လီၤအခါ ပတကဲ ကစၢ်ယွၤ အသကိးဘၣ်. ဘၣ်ဆၣ် ခီဖျိလၢ တၢ်ပှ့ၤက့ၤအဃိ ပ “အိၣ်ဃူအိၣ်ဖိးဒီး ကစၢ်ယွၤ” သ့ ဒီးပကဲထီၣ်ဘၣ် အသကိး.—ဖး ရိမ့ၤ ၅:၁; ယၤကိာ် ၂:၂၃.
၈. ပအိၣ်ဒီး တၢ်ခွဲးတၢ်ယာ်လၢ ပကဃ့ထုကဖၣ်တၢ်အဃိ ဘၣ်မနုၤအဃိ ပကြၢးစံးဘျုးစံးဖှိၣ်က့ၤ ယဟိဝၤယွၤလဲၣ်.
၈ ပကဲထီၣ်ဘၣ် ယဟိဝၤယွၤ အသကိးအဃိ ပအိၣ်ဒီး တၢ်ခွဲးတၢ်ယာ်လၢ ပကဃ့ထုကဖၣ် လၢအအိၣ်. ဖဲပထီၣ်တၢ်အိၣ်ဖှိၣ် တပူၤဃီဒီး ဒီပုၢ်ဝဲၢ်မုၣ်ခွါအခါ ယဟိဝၤယွၤ နၢ်ဟူပတၢ်ထုကဖၣ် တကးဒံးဘၣ် ဖဲပအိၣ်တဂၤ အခါစ့ၢ်ကီး အဒိကနၣ် ပတၢ်ထုကဖၣ်. တၢ်ထုကဖၣ်န့ၣ် မၤစၢၤပှၤလၢ ပကပာ်ပသးမုာ်မုာ်, ပတသးကိၢ်တၢ် အါတလၢဘၣ် ဒီးအမၤစၢၤစ့ၢ်ကီးပှၤလၢ ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. (စံး ၆၅:၂; ယၤ ၄:၈; ၁ ယိၤ ၅:၁၄) ယ့ၣ်ၡူး သ့ၣ်ညါဝဲလၢ အပါယဟိဝၤယွၤ ဒိကနၣ် အတၢ်ထုကဖၣ် ဒီးတၢ်ထုကဖၣ်န့ၣ် မၤစၢၤအီၤဒ်သိး အကမၤဂၢၢ်ကျၢၤဒိၣ်ထီၣ် အတၢ်ရ့လိာ်သးဒီးအပါ. အဃိ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဃ့ထုကဖၣ်လၢ အပါအအိၣ် ခဲအံၤခဲအံၤ. (လူၤ ၅:၁၆) ခီဖျိလၢ တၢ်ပှ့ၤက့ၤအဃိ ပကဲထီၣ်ဘၣ် ယဟိဝၤယွၤ အသကိး ဒီးပဃ့ထုကဖၣ်လၢ အအိၣ်သ့အဃိ ပသးခုဒိၣ်မး.
ခီဖျိလၢ တၢ်ပှ့ၤက့ၤအဃိ ခါဆူညါန့ၣ် ပကန့ၢ်ဘၣ် အဘျုးဒ်လဲၣ်
၉. ခီဖျိလၢ တၢ်ပှ့ၤက့ၤအဃိ ယဟိဝၤယွၤ အခ့အပှၤလၢ အသးတီတဖၣ်န့ၣ် ခါဆူညါ အဝဲသ့ၣ် ကန့ၢ်ဘၣ် အဘျုးဒ်လဲၣ်.
၉ ခီဖျိလၢ တၢ်ပှ့ၤက့ၤအဃိ ယဟိဝၤယွၤ အခ့အပှၤလၢ အသးတီတဖၣ်န့ၣ် ခါဆူညါ အဝဲသ့ၣ် ကန့ၢ်ဘၣ် အဘျုးဒ်လဲၣ်. ယဟိဝၤယွၤ ကဟ့ၣ်အဝဲသ့ၣ် တၢ်မူအထူအယိာ်. ဘၣ်ဆၣ် လၢအနံၣ် လၢအကထိ အတီၢ်ပူၤန့ၣ် ပှၤဟီၣ်ခိၣ်ဖိ သံဝဲအါမးအဃိ ပှၤတနီၤ ဆိကမိၣ်ဝဲလၢ ပှၤဟီၣ်ခိၣ်ဖိ အိၣ်မူဘၣ် လီၤထူလီၤယိာ် တသ့ဘၣ်. သနာ်က့ ပကဘၣ်နီၣ်ဘၣ်လၢ ခီၣ်ထံးခါန့ၣ် ယဟိဝၤယွၤ တိာ်ပာ်ဝဲလၢ ပှၤဟီၣ်ခိၣ်ဖိ ကအိၣ်မူဘၣ် လီၤထူလီၤယိာ်. ဒီးစီၤအၤဒၣ် မ့ၢ်တမၤဘၣ် တၢ်ဒဲးဘးဘၣ်န့ၣ် ပှၤကိးဂၤဒဲး ကအိၣ်မူဘၣ် လီၤထူလီၤယိာ်အဃိ တၢ်အိၣ်မူ လီၤထူလီၤယိာ်န့ၣ် အတကဲ တၢ်လီၤကမၢကမၣ် လၢပှၤဟီၣ်ခိၣ်ဖိ အဂီၢ်ဘၣ်. ဘၣ်ဆၣ် ခီဖျိလၢ ယဟိဝၤယွၤ ဟ့ၣ်လီၤပှၤ အဖိခွါ ဒ်တၢ်ပှ့ၤက့ၤလၢ အလုၢ်ဒိၣ်ပှ့ၤဒိၣ်ကတၢၢ်အဃိ ခဲအံၤ ပမ့ၢ်ဆိကမိၣ်လၢ ပအိၣ်မူလီၤထူလီၤယိာ် တသ့ဘၣ် သနာ်က့ ခါဆူညါန့ၣ် ပကအိၣ်မူဘၣ် လီၤထူလီၤယိာ်.—ရိ ၈:၃၂.
၁၀. ပှၤဘၣ်တၢ်ဒိးဖှူအီၤ ဒီးသိလၢအဂၤတဖၣ်န့ၣ် အဝဲသ့ၣ် အိၣ်ခိးကွၢ်လၢ်ဝဲ မနုၤလဲၣ်.
၁၀ တၢ်မူအထူအယိာ်န့ၣ် အကဲဝဲ တၢ်ဆိၣ်ဂ့ၤလၢ ပကန့ၢ်ဘၣ်အီၤလၢ ခါဆူညါ, ဘၣ်ဆၣ် ယဟိဝၤယွၤ အဲၣ်ဒိးလၢ ပကဆိကမိၣ်ထံအဂ့ၢ် လၢဆၢကတီၢ်ခဲအံၤ. ပှၤဘၣ်တၢ်ဒိးဖှူအီၤတဖၣ်န့ၣ် အဝဲသ့ၣ် အိၣ်ခိးကွၢ်လၢ်ဝဲလၢ ကပၢဘၣ်တၢ်ဒီး ယ့ၣ်ၡူးလၢမူခိၣ်. (လီၣ် ၂၀:၆) မ့မ့ၢ် သိလၢအဂၤတဖၣ်န့ၣ် အိၣ်ခိးကွၢ်လၢ်ဝဲလၢ ကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤ ဒီးဖဲန့ၣ်န့ၣ် တၢ်လၢအကမၤဆါပှၤ ဒီးမၤသးအုးပှၤန့ၣ် တအိၣ်လၢၤဘၣ်. (လီၣ် ၂၁:၃, ၄) မ့ၢ်နကဲပှၤလၢ အပၣ်ဃုာ်လၢ သိလၢအဂၤတဖၣ်အကျါ လၢအအိၣ်ခိးကွၢ်လၢ် လၢအကအိၣ်မူဘၣ် လီၤထူလီၤယိာ်ဧါ. ဖဲယဟိဝၤယွၤ တ့လီၤပှၤဟီၣ်ခိၣ်ဖိအခါ အအဲၣ်ဒိးလၢ အဝဲသ့ၣ်ကအိၣ်မူလၢ ဟီၣ်ခိၣ်အဃိ ပမ့ၢ်အိၣ်မူဘၣ်လၢဟီၣ်ခိၣ် လီၤထူလီၤယိာ်န့ၣ် ပကသးခုသပှၢ်တၢၢ်. တကးဒံးဘၣ် တၢ်မူအထူအယိာ်လၢ ပကန့ၢ်ဘၣ်န့ၣ် အလုၢ်ဒိၣ်ပှ့ၤဒိၣ်ဒိၣ်မး.
၁၁-၁၂. တၢ်ဆိၣ်ဂ့ၤတနီၤလၢ ပအိၣ်ခိးကွၢ်လၢ်အီၤ လၢပၤရဒံစူးအပူၤန့ၣ် မ့ၢ်မနုၤလဲၣ်. (ကွၢ်စ့ၢ်ကီးတၢ်ဂီၤ.)
၁၁ ဆိကမိၣ်ကွၢ် ဘၣ်ဃးဒီး တၢ်အိၣ်မူလၢ ဟီၣ်ခိၣ်ပၤရဒံစူးအပူၤန့ၣ် ကမုာ်ထဲလဲၣ်. ဖဲန့ၣ်န့ၣ် ပတလိၣ်ဘၣ်ယိၣ်လၢ ပကဆိးက့ ဒီးဘၣ်သံလၢၤဘၣ်. (ၡါ ၂၅:၈; ၃၃:၂၄) ဒီးယဟိဝၤယွၤ ကမၤလၢပှဲၤန့ၢ်ပှၤ တၢ်လၢပလီကီခဲလၢာ်. လၢဟီၣ်ခိၣ်ပၤရဒံစူးအပူၤန့ၣ် နအဲၣ်ဒိး မၤလိအါထီၣ် တၢ်ဂ့ၢ်မနုၤလဲၣ်. နအဲၣ်ဒိး မၤလိအါထီၣ် ဘၣ်ဃးဒီး ဆၣ်ဖိကီၢ်ဖိအဂ့ၢ်ဧါ. နအဲၣ်ဒိး ဒ့လိ တၢ်ဒ့တၢ်အူ မ့တမ့ၢ် ဆွဲလိ တၢ်ဂီၤဧါ. တကးဒံးဘၣ် လၢဟီၣ်ခိၣ်ပၤရဒံစူးအပူၤန့ၣ် ပှၤကဘၣ် တ့ထီၣ်ဟံၣ် ဒီးသူၣ်ထီၣ်တၢ် အါမးအဃိ ပကလိၣ်ဘၣ် ပှၤလၢကတ့ထီၣ်ဘှီထီၣ်တၢ် သပှၢ်တၢၢ်. ပကလိၣ်ဘၣ်စ့ၢ်ကီး ပှၤလၢကသူၣ်အီၣ်ဖျးအီၣ်တၢ်, ကဖီအီၣ်တၢ်, တ့ထီၣ်တၢ်ပီးတၢ်လီ, ကတ့ထီၣ် ကရၢၢ်ဃံလၤ ဒီးကကွၢ်ထွဲဝဲ. (ၡါ ၃၅:၁; ၆၅:၂၁) ခီဖျိလၢ ပကအိၣ်မူဘၣ် လီၤထူလီၤယိာ်အဃိ ပတၢ်ဆၢကတီၢ် ကအိၣ်အါမးလၢ ပကမၤလိအါထီၣ် တၢ်သ့တၢ်ဘၣ်တဖၣ်.
၁၂ ထံၣ်တမှံကွၢ်လၢ နတူၢ်လိာ်မုာ်ဘၣ်က့ၤ ပှၤလၢအဂဲၤဆၢထၢၣ် သမူထီၣ်က့ၤအဃိ နကသးခုဒိၣ်မး. (မၤတၢ် ၂၄:၁၅) ဒီးဖဲနမၤလိ ယဟိဝၤယွၤ အတၢ်ဘၣ်တ့ အဂ့ၢ်အခါ နကသ့ၣ်ညါအါထီၣ် ယဟိဝၤယွၤ အဂ့ၢ်အဃိ နကသးခု သပှၢ်တၢၢ်. (စံး ၁၀၄:၂၄; ၡါ ၁၁:၉) တကးဒံးဘၣ် တၢ်လၢအဂ့ၤကတၢၢ်န့ၣ် မ့ၢ်ဝဲ နတမၤကမၣ်တၢ် နီတဘျီလၢၤဘၣ်အဃိ ဖဲနဘူၣ်ထီၣ်ဘါထီၣ် ယဟိဝၤယွၤအခါ နသးလၢ အမၤတံာ်တာ်နၤန့ၣ် တအိၣ်လၢၤဘၣ်. တၢ်ဆိၣ်ဂ့ၤလၢ နကန့ၢ်ဘၣ်လၢ ခါဆူညါန့ၣ် မ့ၢ်နကခီလဲအီၤဒီး “တၢ်မုာ်တၢ်ပၠီၣ် တစိၢ်တလီၢ်လၢ အဟဲခီဖျိ တၢ်ဒဲးဘးအဃိ” ဧါ. (ဧ့ၤ ၁၁:၂၅) နတဘၣ်သး ခီလဲအီၤနီတစဲးဘၣ်. တၢ်ဆိၣ်ဂ့ၤလၢ ပကဒိးန့ၢ်ဘၣ်လၢ ခါဆူညါန့ၣ် အဂ့ၤဒိၣ်န့ၢ်ဒံး တၢ်လၢပကဘၣ် ဟ့ၣ်ၡူကွံာ်ခဲအံၤတဖၣ် စၢၢ်တလၢၢ်. ပကဘၣ် သ့ၣ်နီၣ်ထီၣ်လၢ ဟီၣ်ခိၣ်ပၤရဒံစူးန့ၣ် အတကဲတၢ်လၢ ပကဘၣ်အိၣ်ခိးအီၤ လီၤထူလီၤယိာ်ဘၣ်, ပကအိၣ်ဘၣ်ဖဲန့ၣ် သပှၢ်တၢၢ်. အဃိ ယဟိဝၤယွၤ မ့ၢ်တအဲၣ်ပှၤဒိၣ်မး တုၤလၢ အဟ့ၣ်လီၤပှၤအဖိခွါဘၣ်န့ၣ် ပတဒိးန့ၢ်ဘၣ် တၢ်ဆိၣ်ဂ့ၤတဖၣ်အံၤဘၣ်.
တၢ်ဆိၣ်ဂ့ၤတနီၤလၢ ပအိၣ်ခိးကွၢ်လၢ်အီၤ လၢဟီၣ်ခိၣ်ပၤရဒံစူးအပူၤန့ၣ် မ့ၢ်မနုၤလဲၣ် (ကွၢ်လံာ်အဆၢ ၁၁-၁၂)
ခီဖျိလၢ ယဟိဝၤယွၤ အဲၣ်ပှၤအဃိ ပကဘၣ် စံးဘျုးက့ၤအီၤ
၁၃. ယဟိဝၤယွၤ အဲၣ်ပှၤအဃိ ပပာ်ဖျါထီၣ် တၢ်စံးဘျုးက့ၤအီၤ ကသ့ဒ်လဲၣ်. (၂ ကရံၣ်သူး ၆:၁)
၁၃ ယဟိဝၤယွၤ ဟ့ၣ်ပှၤတၢ်ဟ့ၣ်လၢအမ့ၢ် တၢ်ပှ့ၤက့ၤအဃိ ပစံးဘျုးက့ၤအီၤ ကသ့ဒ်လဲၣ်. ပစံးဘျုးက့ၤအီၤ သ့ခီဖျိ ပပာ်ဆိ အတၢ်မၤလၢနီၣ်ဂံၢ်တၢ လၢပတၢ်အိၣ်မူပူၤ. (မး ၆:၃၃) ပမၤဒ်န့ၣ်မ့ၢ်လၢ ယ့ၣ်ၡူးတူၢ်သံအသး “ဒ်သိး ပှၤလၢအမူဝဲတဖၣ်န့ၣ် အသုတမူလၢ အနီၢ်ကစၢ်အဂီၢ် လၢၤတဂ့ၤ ဒီးကမူဝဲလၢ ပှၤလၢအသံလၢ အဝဲသ့ၣ်အဂီၢ် လၢအဘၣ် တၢ်ဒုးဂဲၤဆၢထၢၣ်က့ၤအီၤ တဂၤန့ၣ်အဂီၢ်.” (၂ ကရံၣ် ၅:၁၅) ယဟိဝၤယွၤ ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ်အဃိ ပစံးဘျုးက့ၤအီၤ သ့ခီဖျိ ပတကွၢ်လီၤထဲ ပနီၢ်ကစၢ်အဂီၢ်လၢၤဘၣ် ဒီးပပာ်ဆိ အတၢ်မၤလၢနီၣ်ဂံၢ်တၢ.—ဖး ၂ ကရံၣ်သူး ၆:၁.
၁၄. ပနာ်ဒီးပအိၣ်မူမၤထွဲ ယဟိဝၤယွၤ အတၢ်ဟံးစုနဲၣ်ကျဲ ကသ့ဒ်လဲၣ်.
၁၄ ပစံးဘျုးစ့ၢ်ကီး ယဟိဝၤယွၤ သ့ခီဖျိ ပနာ်ဒီးအိၣ်မူမၤထွဲ အတၢ်ဟံးစုနဲၣ်ကျဲ. အဒိ ဖဲပကဘၣ်ဆၢတဲာ်တၢ် ဘၣ်ဃးဒီး ပကဆဲးထီၣ်ကၠိ လၢအပတီၢ်ထီဧါ မ့တမ့ၢ် ပကဃုထၢ တၢ်မၤဒ်လဲၣ် တကလုာ်လဲၣ်အခါ ပကဘၣ် ဆိကမိၣ်ဆိ ယဟိဝၤယွၤ အတၢ်ဘၣ်သးလၢညါ. (၁ ကရံၣ် ၁၀:၃၁; ၂ ကရံၣ် ၅:၇) ပမ့ၢ်အိၣ်မူမၤထွဲ ယဟိဝၤယွၤ အတၢ်ဟံးစုနဲၣ်ကျဲန့ၣ် ပကနာ်န့ၢ်အီၤအါထီၣ် ဒီးပတၢ်ရ့လိာ်သးဒီးအီၤ ကဂ့ၤဒိၣ်ထီၣ်. တကးဒံးဘၣ် ပတၢ်မုၢ်လၢ်စ့ၢ်ကီး ကဂၢၢ်ကျၢၤဒိၣ်ထီၣ်ဝဲ.—ရိ ၅:၃-၅; ယၤ ၂:၂၁, ၂၂.
၁၅. ဖဲတၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး တလါန့ၣ် ပပာ်ဖျါထီၣ်လၢ ပစံးဘျုးစံးဖှိၣ်က့ၤ ယဟိဝၤယွၤ ကသ့ဒ်လဲၣ်.
၁၅ ကျဲအဂၤလၢ ပပာ်ဖျါထီၣ် တၢ်စံးဘျုးစံးဖှိၣ်က့ၤ ယဟိဝၤယွၤ အတၢ်အဲၣ်န့ၣ် အိၣ်ဒံး. အဒိ ပပာ်ဖျါထီၣ် သ့ခီဖျိ ဖဲတၢ်သ့ၣ်နီၣ်ထီၣ်က့ၤအမူး တလါန့ၣ် ပစံးဘျုးက့ၤ ယဟိဝၤယွၤလၢ အရဲၣ်ကျဲၤန့ၢ်ပှၤ တၢ်ပှ့ၤက့ၤ. အဃိ ပကတဲာ်ကတီၤ ပသးလၢ ပကလဲၤထီၣ် တၢ်သ့ၣ်နီၣ်ထီၣ်က့ၤအမူး တကးဒံးဘၣ် ပကွဲမုာ်ပှၤဂၤလၢ အဝဲသ့ၣ် ကလဲၤထီၣ်စ့ၢ်ကီး. (၁ တံၤ ၂:၄) ဒီးပမၤတၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး ဒ်လဲၣ်န့ၣ် ပတဲဘၣ် ပှၤလၢပကွဲမုာ်အီၤသ့. ပဒုးနဲၣ်စ့ၢ်ကီး အဝဲသ့ၣ် တၢ်ဂီၤမူလၢ jw.org အပူၤ လၢအခိၣ်တီမ့ၢ် ဘၣ်မနုၤအဃိ ယ့ၣ်ၡူးတူၢ်သံအသးလဲၣ် ဒီး သ့ၣ်နီၣ်ထီၣ်က့ၤ ယ့ၣ်ၡူးအတၢ်သံ သ့. တကးဒံးဘၣ် ဒီပုၢ်ဝဲၢ်မုၣ်ခွါလၢ အပတုာ် ဟးစံၣ်တဲၤတဲလီၤတၢ်တဖၣ်စ့ၢ်ကီး ပကဘၣ် ကွဲမုာ်အဝဲသ့ၣ်လၢ ကဟဲက့ၤထီၣ်ကဒါ တၢ်သ့ၣ်နီၣ်ထီၣ်က့ၤအမူး. ထံၣ်တမှံကွၢ် ဖဲယဟိဝၤယွၤ အသိဖိလၢ အလီၤမၢ်တဒု ဟဲက့ၤကဒါလၢ အသိကရၢၢ်အခါ လၢမူခိၣ်ဒီးဟီၣ်ခိၣ်န့ၣ် တၢ်သးခုကအိၣ်ထဲလဲၣ်. (လူၤ ၁၅:၄-၇) အဃိ ဖဲတၢ်သ့ၣ်နီၣ်ထီၣ်က့ၤအမူးန့ၣ် ပကတူၢ်လိာ် ဒီးပကဆၢဂ့ၤဆၢဝါလိာ်သး တဂၤဒီးတဂၤ. ဒီးလီၤဆီဒၣ်တၢ် ပှၤအသီတဖၣ် ဒီးပှၤလၢအတထီၣ် တၢ်သ့ၣ်နီၣ်ထီၣ်က့ၤအမူးဘၣ် ဖးယံာ်လံတဖၣ်န့ၣ် ပအဲၣ်ဒိးပာ်ဖျါထီၣ်လၢ ပသးအိၣ် တူၢ်လိာ်အဝဲသ့ၣ်.—ရိ ၁၂:၁၃.
၁၆. ဖဲတၢ်သ့ၣ်နီၣ်ထီၣ်က့ၤအမူး တလါန့ၣ် ဘၣ်မနုၤအဃိ နအဲၣ်ဒိး မၤအါထီၣ် နီၢ်သးအတၢ်ဖံးတၢ်မၤလဲၣ်.
၁၆ ဖဲတၢ်သ့ၣ်နီၣ်ထီၣ်က့ၤအမူး တလါန့ၣ် မ့ၢ်နအဲၣ်ဒိး မၤအါထီၣ် နီၢ်သးအတၢ်ဖံးတၢ်မၤဧါ. ပမ့ၢ်မၤအါထီၣ် နီၢ်သးအတၢ်ဖံးတၢ်မၤန့ၣ် ပပာ်ဖျါထီၣ်န့ၢ် ယဟိဝၤယွၤ ဒီးယ့ၣ်ၡူးလၢ ပစံးဘျုးစံးဖှိၣ်က့ၤ တၢ်လၢအဝဲသ့ၣ် မၤန့ၢ်လၢပဂီၢ်. အဒိ ပမ့ၢ်လဲၤစံၣ်တဲၤတဲလီၤတၢ် ဆူၣ်ဆူၣ်န့ၣ် ပကထံၣ်ဘၣ်လၢ ယဟိဝၤယွၤ မၤစၢၤပှၤ ဒီးပကနာ်န့ၢ်အီၤ အါထီၣ်. (၁ ကရံၣ် ၃:၉) တကးဒံးဘၣ် တၢ်ဖးလံာ်စီဆှံလၢ တၢ်သ့ၣ်နီၣ်ထီၣ်က့ၤအမူးအဂီၢ် လၢအအိၣ်လၢ တၢ်သမံသမိးလံာ်စီဆှံအဆၢကိးနံၤဒဲး မ့တမ့ၢ် ကၠိဖိလံာ်တၢ်မၤလိ အပူၤန့ၣ် တဘၣ်သးပ့ၤနီၣ် ဖးအီၤတဂ့ၤ. တၢ်ဖးလံာ်စီဆှံ အတၢ်ရဲၣ်တၢ်ကျဲၤအံၤ နသူအီၤလၢနကမၤ နီၢ်ကစၢ်တၢ်မၤလိလံာ်စီဆှံအဂီၢ် သ့စ့ၢ်ကီး.
၁၇. တၢ်လၢယဟိဝၤယွၤ ဘၣ်သူၣ်ဘၣ်သးဝဲန့ၣ် မ့ၢ်မနုၤလဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ ပပာ်ဖျါထီၣ်လၢ ပပာ်လုၢ်ပာ်ပှ့ၤ ယဟိဝၤယွၤ အတၢ်အဲၣ် ကသ့ဒ်လဲၣ်.”)
၁၇ ခီဖျိလၢ နတၢ်အိၣ်သးအဃိ ဘၣ်သ့ၣ်သ့ၣ် နမၤအါထီၣ် နီၢ်သးအတၢ်ဖံးတၢ်မၤ တန့ၢ်အါအါဘၣ်. ဘၣ်ဆၣ် သ့ၣ်နီၣ်ထီၣ်လၢ တၢ်လၢနမၤန့ၢ်န့ၣ် ယဟိဝၤယွၤ တထိၣ်သတြီၤဝဲဒီး တၢ်လၢပှၤဂၤမၤဝဲန့ၢ်ဘၣ်. ယဟိဝၤယွၤ ထံၣ်ဝဲတၢ်အိၣ်လၢနသးပူၤ ဒီးနပာ်ဖျါထီၣ်လၢ နပာ်လုၢ်ပာ်ပှ့ၤ အတၢ်ဟ့ၣ်လၢအမ့ၢ် တၢ်ပှ့ၤက့ၤန့ၣ် အထံၣ်ဝဲ ဒီးအဘၣ်သူၣ်ဘၣ်သးဝဲဒိၣ်မး.—၁ မူၤ ၁၆:၇; မၢ် ၁၂:၄၁-၄၄.
၁၈. ဘၣ်မနုၤအဃိ ပစံးဘျုးစံးဖှိၣ်က့ၤ ယဟိဝၤယွၤ ဒီးယ့ၣ်ၡူးလဲၣ်.
၁၈ ခီဖျိလၢ တၢ်ပှ့ၤက့ၤအဃိ ယဟိဝၤယွၤ ပျၢ်ကွံာ်ပတၢ်ဒဲးဘး, ပကဲထီၣ်ဘၣ် အသကိး ဒီးပအိၣ်ဒီး တၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်. တကးဒံးဘၣ် ခီဖျိလၢ ယဟိဝၤယွၤ အဲၣ်ဆိပှၤအဃိ အသးအိၣ်ဟ့ၣ်ပှၤ တၢ်ဆိၣ်ဂ့ၤတဖၣ်အံၤ. (၁ ယိၤ ၄:၁၉) ဒီးယ့ၣ်ၡူးစ့ၢ်ကီး အဲၣ်ပှၤဒိၣ်မး တုၤလၢ အဟ့ၣ်လီၤကွံာ် အသးသမူ လၢပဂီၢ်. အဃိ မ်ပပာ်ဖျါထီၣ်လၢ ပပာ်လုၢ်ပာ်ပှ့ၤ ယဟိဝၤယွၤ အတၢ်အဲၣ် ဒီးစံးဘျုးစံးဖှိၣ်က့ၤ ယ့ၣ်ၡူးထီဘိ.—ယိၤ ၁၅:၁၃.
တၢ်သးဝံၣ် ၁၅၄ တၢ်အဲၣ်ဂၢၢ်ကျၢၤ
